بلوچستان: پنچ مردم زورانسری بیگواہ، دو یل کنگ بیتگ انت

بلوچستان ءِ جتا جتائیں دمگاں پاکستانی لشکر ءَ پنچ مردم آوار جتگ انت ءُ چہ گوادر ءَ آوار جنگ بیتگیں دو بیگواھیں مردم یل کنگ بیتگ انت-

گیشیں ھالانی رد ءَ 6 اگست 2026 ءِ سھب ءَ پاکستانی فورسز، ایف سی ءُ ملٹری انٹیلی جنس ءِ کارندھاں کیچ ءِ دمگ بلیدہ ءَ سئے مردم چہ وتی لوگاں دزگیر کتگ ءُ بیگواہ کتگ۔ بیگواھیں مردمانی تہ ءَ 18 سالی ئیں.یاسر ء نیک سال ، 20 سالی ئیں شے حق ء بشیر احمد ءُ 24 سالی ئیں سیف اللہ ء زھور احمد ھوار اَنت ۔

یاسر ءُ سیف اللہ ءِ سیادی گوں بلیدہ ءِ دمگ کورپشت ءَ اِنت ءُ شے حق بلیدہ ءِ دمگ ڈمبانی ءِ نندوک ءُ نودربر انت۔ اے سئیں مردم شش اگست ءَ سھب ءِ سئے ءُ نیم ءَ دزگیر کنگ بوتگ اَنت کہ ایشی ءَ پد آیانی بابت ءَ ھچ وڑیں ھال ءُ اھوال نہ بوتگ۔

دومی نیمگ ءَ شال ءِ موسیٰ کالونی سریاب ءَ چہ دو مردم پہ زور بیگواہ کنگ ءِ ھم ھال دیم ءَ اتکگ انت۔ 19 سالی ئیں مزمل ء عبدالماجد بیست ءُ ھشت جولائی دوھزار ءُ بیست ءُ شش ءَ چہ وتی لوگ ءَ دزگیر کنگ بوتگ ءُ 17 سالی ئیں جلیل ء سلیم 7 اگست ءَ سھب ءِ شش ءِ نزیک ءَ چہ وتی لوگ ءَ دزگیر کنگ بوتگ۔

دومی نیمگ ءَ 11 جولائی 2026 ءَ گوادر ءِ دمگ پانوان جیونی ءَ چہ زورانسری ءَ بیگواہ کنگ بوتگیں دو مردم محمد بلوچ ء ھبش ءُ اعظم بلوچ ء احمد ھپت اگست ءَ یل کنگ بیتگ ءُ وتی گساں سر بیتگ انت-