اسما جتک ءِ کیس – ٹی بی پی شونگال

اسما جتک ءِ کیس

ٹی بی پی شونگال

بلوچستان ءِ دمگ ھزدار ءِ جھمنندیں اسما جتک کہ آ پروری 2025 ءَ گمانی رنگ ءَ سانگ ءِ نہ دیگ ءِ پژدر ءَ آوار جنگ بیتگ ات، ھمے زوتاں یک شنگ بیتگیں تامرے ءَ پاک تاک ءِ گوں دستاں چِست کتگ ات آوار جنی ءِ زمہ واریں مردمانی ھلاپ ءَ انساپ ءِ لوٹ ءَ کنگ ءَ گندگ آیگ ءَ ات- بلے تامر ءِ شنگ بوگ ءِ بس لھتے اداراں پد آئی ءِ پت ماسٹر انایت اللہ ناشناسیں مردماں ھزدار ءَ کشتگ-

اے سرجمیں وئیل ءِ مستریں جرمکار زھور جمالزئی نامیں مردمے نامینگ بیتگ- ارزی ھم آئی ءِ نام ءَ نبشتگ کنگ بیتگ، آئی ءِ سر ءَ اسما ءِ آوار جنی ءِ بھتام ھم ھست انت- داں انگت ءَ دزگیر کنگ نہ بیتگ-

ماسٹر انایت اللہ ءِ کوش ءِ وئیل بلوچستان اسمبلی ءَ زھرشانی دیم ءَ اتکگ انے- یونس عزیز زھری ءَ بلوچستان اسمبلی ءِ نیاد ءَ گوشتگ اسما ءِ شنگ بوتگیں تامر ءَ دو ادار پد آئی ءِ پت کُشگ بوتگ ، آئی ءَ گوشتگ اسما جتک ءِ آوار جنی ءِ ھلاپ ءَ توار چِست کنوکیں بازیں مردم نشانگ کنگ ءُ کُشگ بوتگ انت، مولانا ھدایت الرھمان ءَ گوشتگ آوار جنی ءُ کوش ءَ ھواریں مردن نواب سناء اللہ زھری ءِ کارندہ انت ءُ آئی ءِ سروکی گون انت، ھمے واستا سرکار آئی ءِ دیم ءَ بے وس انت-

بلوچستان ءَ بازیں وھدے ءَ راجدوست ءُ انسانی ھکانی پھناتانی نیمگ ءَ اے بھتام دیم ءَ آیگ ءَ انت کہ بلوچستان ءَ سلاہ بندیں ٹولی روچ ء رھمان پرکار انت، آ لس نام ءَ “ ڈیتھ اسکواڈ ” ءِ نام ءَ زانگ بنت- اے ٹولی ءَ ریاستی ادارھانی نیمگ ءَ سِلاہ، مزنی ءُ پھریزی دیگ بوگ ءَ انت-

راجدوستیں تکانی لیکہ انت اے سلاہ بندیں ٹولی بلوچستان ءَ برجاھیں راجدوستیں زرمبشت ءِ ھلاپ ءَ پاکستانی پوج ءُ چیریں ادارھانی سروکی ءَ جوڑ کنگ بیتگ، آیاں ریاستی ادارھانی نیمگ ءَ سرجمیں کمک گون انت- ڈیتھ اسکواڈ ءِ پرکاری بلوچستان ءَ بس سیاسی باسک یا جھدکارانی نشانگ کنگ ءَ اوشتوک انت بلکیں آوار جنی، دُزی، ءُ دگہ چاگردی سلکاریاں ھوار بوگ ءِ بھتامے لڈگ بوگ ءَ انت-

اے ٹولی ءَ ھما کچ ءَ کمک ھست انت پولیس ءُ دگہ ادارہ اشانی ھلاپ ءَ کاروائی کنگ ءَ لرز انت- اگاں پولیس اشانی ھلاپ ءَ کاروائی کنت گڑا پوج ءُ چیریں ادارہ دزمانجن بنت ءُ دزگیریں مردماں چُٹین انت – اے سلاہ بندیں ٹولیاں ھما کساس ءَ کمک گون انت کہ بے ترس ءَ وتی پرکاری اش برجاہ داشتگ انت-

بلوچستان ءِ ناگیگ بوتگیں جاورھال ءُ سلاہ بندیں ٹولی ءَ ریاستی سروکی رسگ ءِ وڑیں پالیسی پیش ءَ گڑ ءُ منجی جاورھالاں گیشتر گڑ ءُ مُنج کن انت- اے پالیسیانی سان تھنا سیاسی ءُ سیکیورٹی تک ءَ اوشتوک نہ انت بلکیں سرجمیں چاگردے ءِ وتی لپیٹ ءَ زرتگ اش – یکشل ءَ بد امنی، ترس، بے پھریزی ءُ بے ستکی ءَ لس شھریانی زندگی ازاب کتگ انت-