بلوچستان ءِ دمگ پنجگور ءَ پاکستان ءِ فوج ءِ یک پوسٹے سلاہ بندیں مردمانی نشانگ جوڑ کتگ۔
گوستگیں شپ ءَ پنجگور ءِ دمگ پروم ءَ سلاہ بندیں مردماں فورسز ءِ پوسٹ ءِ سر ءَ اُرش کتگ کہ اود ءُ بازیں وھدے ءَ تیر گواری ءُ تراکانی توار بوتگ انت۔
دمگی مردمانی رد ءَ اُرش ءِ آماچیں پوسٹ نوک جوڑ کنگ بوتگ ءُ اے وھد ءَ کار برجاہ بوتگ کہ سلاہ بندیں مردماں ایشی ءِ سر ءَ اُرش کتگ۔ واکداراں ءَ اے وئیل ءِ بابت ءَ انگت ءَ ھچ وڑیں ھال ءُ اھوال نہ داتگ۔
ایشی ءَ ابید پنجگور ءَ گوستگیں روچاں گاڑی ءِ سر ءَ تیرگواری ءِ وئیل ءَ بیران بوتگیں مردمانی کچ دو ءَ سر بوتگ انت۔
گوستگیں شپ ءَ پنجگور ءِ دمگ سوردو ءَ ناشناسیں سلاہ بندیں مردماں گاڑی ءِ سر ءَ تیرگواری کتگ کہ ایشی ءِ آسر ءَ حاتم نامیں مردمے جاہ ءَ بیران بوتگ ءُ حلیم ءُ بھروز سک ٹپیگ بوتگ اَنت، البت حلیم ھم رند ءَ وتی ٹپانی سبب ءَ بیران بوتگ۔
بیران بوتگیں مردمانی بابت ءَ گشگ بیت کہ آ سرکاری کمک ءِ سلاہ بندیں گل ’ڈیتھ اسکواڈ‘ ءِ مردم اَنت۔ انگت ءَ اے دوئیں اُرشانی زمہ واری کس ءَ نہ زرتگ۔
ھمے وڑ ءَ گوستگیں شپ ءَ کلات منگچر بدرنگ ءَ سلاہ بندیں مردماں پاکستانی لشکر ءِ پوسٹ نشانگ کتگ-
دمگی مردمانی رد ءَ اے پوسٹ ءَ یک بند ءُ ساچی شرکتے ھم نزیک ءَ انت-
اُرش ءِ آسر ءَ تاوانانی بارو ءَ دگہ گیشتریں ھال دیم ءَ نیتکگ انت-