پنچ شمبے ءُ آدینگ ءِ میانی شپ ءَ بلوچستان ءِ بنجاھی شھر شال ءَ پاکستانی لشکر ءَ نودربر ایمل اورنگزیب ءِ لوگ ءَ اُرش کتگ ءُ لوگ ءِ مردمانی دیم ءَ دزگیر کتگ ءُ ناشناسیں جاھے ءَ برتگ ءُ چہ ایشی ءَ پد آ بیگواہ اِنت۔ اے وئیل ءِ اھوال کھول ءُ انسانی ھکانی باسکاں شنگ ءُ تالان کتگ-
چمدیستگین ءُ کھول ءِ مردمانی گشگ ءِ رد ءَ پورسز ءِ کارندہ کم چہ کم شش گاڑیاں سوار بیتگ انت یک جھمنندی دمگے ءَ یک لوگے ءَ پترگ انت ءُ دودمان لگتمال کتگ ءُ کھول ءِ گون ءَ کمشرپی کتگ ءُ نودربر ایمل زورانسری گران کتگ ءُ برتگ –
ایمل اورنگزیب جشتمی کلاس ءِ نودربر ءُ انسانی ھکانی کسان سالیں باسک فاطمہ بلوچ ءِ مسترین برات انت کہ زورانسری بیگواھیانی، درکانودی کوش ءُ ریاستی زوراکیانی ھلاپ ءَ پرکار انت-
بلوچستان ءَ زورانسری بیگواہ کنگ ءِ جیڑہ بازیں دھکاں چہ کہ انسانی ھکانی گلانی دلگوشی ءَ ئیگ ءَ انت گوستگیں دو دھکانی تہ ءَ بلوچستان ءَ ھزاراں شھری بیگواہ بوھگ ءِ ھال دیم ءَ اتکگ انت۔
گوستگیں شپ ءِ وئیل ءِ بابت ءَ چاگردی کار دار گوشگ ءَ انت کہ اے بچک بس یک کسان سالیں بچکے، آئی ءِ یکیں جرم ایش انت کہ آئی ءِ گوھار ءَ انسانی ھکانی واستا توار چِست کتگ بیتگ-