بلوچ سیاست ءُ یک زالبولے
نبشتہ کار : ماھو بلوچ
دی بلوچستان پوسٹ
مئے چاگرد ءِ تہ ءَ سیاست ءِ گال انچو بدنام بوتگ کہ انچو کہ سیاست ءِ نام گرگ بیت گڑا ھمے دمان ءَ چاگرد ءِ دزّ ءُ ڈنگ بدماش ءُ دو نمبر ءِ مردانی ھیال دیم ءَ کیت۔ ھمے سبب انت کہ گشگ بیت کہ سیاست شریں مردمانی کار نہ انت۔ یک شریپیں مردمے ءَ گوں سیاست ءَ چے کار؟ اگاں اے چپّیں پکر اِنت۔چوناھی ءَ سیاست ءِ بابت ءَ چوشیں ھیال ءُ لیکھانی دارگ ءَ ھچ ردی نیست۔
پرچا کہ پاکستان ءَ اتکگیں درستیں نام ناد سیاست دانانی کردار ءُ گپ ءُ کرد متزاد انت، زبانی ءُ مزھبی کارڈاں کارمرز کنان ءَ چاگرد ءِ مجرمانی جرم ءِ کانونی جواز ءِ دیم ءَ آرگ ءُ وتی سرپرستی ءِ چیر دستی ءَ ھرچ ھرابیں کار ءِ ھمایت کنگ، ھمے سبباں چے مئے چاگرد ءَ سیاست ءِ بابت ءَ ھما ھیال کہ رائج اَنت آ راست زانگ بنت۔ بلے اے گپ ایوک ءَ نہ اِنت، ایشی ءِ تہ ءَ مئے وتی کوتاھی ھم ھوار اَنت کہ ما ایشاں یلہ دات نہ کنیں۔
در ھکیکت ما سیاست ھچبر راستیں چم ءَ نہ دیستگ ءُ آئی ءَ گندگ ءِ جھد نہ کتگ اگاں ما سیاست ءَ راستیں چمشانکے ءَ بچاریں گڑا ما زانیں کہ سیاست چے یے ءُ پرچا سیاست کنگ بیت ؟ ھو سیاست پہ گلامیں راج ءِ واستا چینچو الّمی انت۔
سیاست زندگی ءِ ھرج پڑ ءِ تہ ءَ ھوار انت ءُ یک ایردستیں راجے یے واستا سیاست ءُ سیاسی اَمل سک زلوری انت پرچا کہ ایر دستیں چاگرد ءِ تہ ءَ زور آور مدام ھمے لوٹ کنت کہ آ چاگرد ءِ مردمانی ھاس نوجوان تبکھاں زھنی مپلوج جوڑ بکنت آ وڑ وڑیں ڈسکورس دیم ءَ کار اِیت ھو ایشانی وسیلہ آ کوم ءَ یا کہ چاگرد ءَ گلام داریت ۔
زور آور ءِ اے ڈسکورس ءَ یک گلامیں چاگردے یے تہ ءَ سیاست ءِ سیاسی پروگرامانی وسیلہ ءَ پروش دیگ بنت، بلوچ ھم زور آور ءِ ڈسکورس ءِ سیاسی پروگرام ءِ وسیلہ پروش دیگ ءَ انت وتی نوجوان ءَ شعور یافتہ کنگ ءَ انت ھمے سیاسی تنظیم ءِ زریعہ ءَ نوک نوکیں پروگرام دیم ءَ آرگ ءَ انت-
ھرچ چاگرد ءِ تہ ءَ نیم بھر مردین انت گڑا نیم بھر زالبول انت زانتکارے گش اِیت ،یک زور آورےدومی کوم ءِ سر ءَ وتی زور ءَ برجا دارگ ءِ واستا درستاں پیسر آ کوم ءِ زالبول ءَ زھنی مپلوج جوڑ کنت، ھمے وڑ بلوچ ءِ زالبول ءَ زھنی گلام جوڑ کنگ ءِ واستا ریاست ءَ وڑ وڑیں ڈسکورس دیم ءَ آؤرتگ بلے مروچی بلوچ ءِ مات ءُ گھاراں ریاست ءِ اے سرجمیں ڈسکورس پروش داتگ انت،مرچی زالبول بلوچ ءِ راجدپتر ءَ نوکیں رنگے دیگ ءَ انت ءُ بلوچ تھریک ءِ تہ ءَ زالبول ھرچ پڑ ءَ ھوار انت سیاست ءُ سیاسی تنظیم ءُ پروگرام ءَ بھر بوگ ءَ ھوار مروچی جنگ ءِ پڑ ءَ ھم جوانیں کردے ادا کنگ ءَ انت۔
بلوچ سیاست ءِ تہ ءَ زالبول ءِ کِرد ءَ اگاں ما بچاریں گڑا راجدپتر ءَ بگر دانگہ مروچی ءَ مدام بلوچ زالبول سیاست ءِ پڑ ءَ پرنٹ لائن ءَ گندگ کاینت اگاں آ زیکیں روچ ءِ بانک کریمہ بہ بیت یا کہ مروچی مارنگ سمی سبیہ یا کہ دگہ بازیں درورے دست کپ اِیت، بلے بلوچ چاگرد ءِ تہ ءَ یک زالبولے یے واستا سیاست ءِ پڑ ءَ ھوار بوگ آسان نہ انت بازیں زالبولے وھدے سیاست ءِ پڑ ءَ ھوار کپ اِیت گڑا آرا چاگرد ءَ بگر دانکہ وتی جندءِ لوگ ءَ بازیں جنجالے ءِ دیمپان بیت مارا مروچی چوشیں بازیں زالبول ءِ درور دست کپ اِیت کہ آیاں سیاست ءَ ھوار بوگ ءُ سیاسی چست ءُ ایرانی سوب ءَ بازیں اڑ ءُ جنجالانی دیمپانی بوتگ بلے آئی وتی لوگ والا ءَ ھوار چاگرد یا کہ ھما زور آور درستاں گوں جنگ کتگ بلے سیاسی چست ءُ ایر یا کہ سیاست ءَ چہ پد کنز نہ بوتگ اَنت بس ھمے امید ءَ کہ مدام وتی سنگتانی دپ ءَ ھمے اش کتگ کہ یک سیاسی سنگتے درست بیت سیاسی سنگتی رشتہ سک ءَ مزنیں رشتھے ھو سنگتانی کر ءَ مھر ھم دیستگ بلے وھدے ھمے زالبولانی سر ءَ مسلہ اتکگ یا کہ جنجالے ءَ کپتگ اَنت گڑا درستاں پیسر آ وتی سیاسی سنگتانی کر ءَ شتگ انت مدت ءِ لوٹ کتگ بلے اپسوز ءِ گپ انت کہ مسلہ ءِ مسیبت ءِ وھد ءَ مدام ھمے سیاسی سنگت پشت ءَ کِنز اِتگ انت مدت ءُ دور ءِ ھبر مسلہ ءِ وھد ءَ ھمے سنگتاں شریں سلامے تاں نہ داتگ آں۔
اے گپانی نبشتہ کنگ ءِ مول ءُ مراد ھمیش انت کہ پلیز وتی سنگتانی ھمراھداری ءَ بکن اِت چو مہ بیت ھمے سنگت ءَ وتی اُمر ءِ نیم سیاسی چست ءُ ایرانی تہ ءَ داتگ وتی راج ءِ واستا چیزے کنگ واستا مدام جاڑیگ بوتگ بلے سنگتانی ھمراھداری نہ کنگ سوب ءَ آ سیاست ءَ چہ دور بہ بیت ءُ ھمے جزبہ کہ آئی ءِ دل ءِ تہ ءَ انت یا کہ ھمے سنگتانی امید ءَ آ ھرچ مسلہ پیش کنگ ءَ تیار انت بلے سنگتانی ھمراھداری نہ کنگ سوب ءَ آ درستیں چیزاں چے دور بہ بیت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-