بلوچ یکجھتی کمیٹی ءِ بنجاھی رھشون ڈاکٹر صبیحہ بلوچ ءَ گوشتگ مروچی ھما مردم وت ءَ بلوچ ءِ ھیرواہ گوش انت آیاں مروچی شانزدہ سالی ئیں بلوچ زھگ بندیگ کتگ انت – اے زھگانی چکاس ءَ بس یک روچے پشکپتگ، بلے شال ءِ ڈپٹی کمشنر ءِ کرد اے وھد ءَ بس یک ریسسٹ ءُ فاشسٹیں ھاکمے ءِ وڑ ءَ انت- تھری ایم پی او ءِ وڑیں بے رھبندیں کانون ءِ درچ ءَ اے زھگانی اُمر چار بوگ ءَ انت ناکہ آیانی وانگ-
آئی ءَ گوشتگ ما اے زُلم ءَ وتی پیشانیگ ءَ سگگ ءَ انت کہ وتی رھشونی ءِ واستا مئے سیاسی ءُ کانونی جد ءُ جھد برجاہ بیت اِنت- بلے اے زھگانی واستا دل ءَ درد چِست بنت اِنت کہ آیاں وانگ ءِ ھک ءَ ھم زبھر کنگ ءَ انت – شال ءِ ڈی سی اینٹی بلوچ رویش راجدپتر ءَ سیاھیں تاکاں گوں یاد کنگ بیت اِنت-
آئی ءَ گوشتگ مئے زھگانی ھون ریچگ بیتگ انت ءُ مئے ھمراہ لٹ شاپی بندیگجاھاں بند کتگ انت ءُ مارا وانگ ءِ وڑیں بنیادانی ھکاں دور اش کتگ – اے درست ھمے واستا کنگ بوگ ءَ انت ما وتی راجی پجار، ھک ءُ انساپ ءِ گپ ءَ جنگ ءَ انت-
ڈاکٹر صبیحہ ءَ گوشتگ مئے آیوکیں نسل ھچبر اے زُلم ءَ بے ھیال کت نہ کن انت اے زالمیں ھاکمانی داتگیں درد ھروھد ءَ مئے زھرگ ءَ زندگ کن اَنت-