پنجگور : نصیب اللہ یل کنگ بہ بیت، اگاں ناں سی پیک دگ سر ءَ نندانک دے ایں زھرشانی کن ایں- کھول

پنجگور ءِ دمگ گچک حال سریکوران ءِ جھمنند عبدالحکیم ءَ صوفی محمد عظیم، قاضی عبدالواحد، شے جان، حاجی عبدالوحید، واجہ جمعہ، شریف احمد، حافظ شمس الدین، سرور بلوچ ءَ وتی دگہ سیادانی ءُ دمگی واجکارانی ھمراھی ءَ پنجگور پریس کلب ءَ پریس کانفرنس ءَ چہ تران کنان ءَ گْوشتگ کہ ما پنجگور ءِ دمگ سریکوران وش آپ ءِ جھمنندیں، بیست شش فروری ءَ دو گاڑیانی سر ءَ سوار سادھیں پوشاکانی تہ ءِ سلاہ بندیں مردم منی لوگ ءِ تہ ءَ پُترتگ ءُ پروشت ءُ پرش ءُ تیرگواری اش کتگ نصیب اللہ درگت ءَ جُست ءِ پُرس ءِ کتگ منی کستریں چُک گاڑی ءِ تہ ءَ نادینتگ اِت نزیکیں باگ کہ اود ءَ مچّ کشگ ءَ بیتگ سلاہ بندیں مردماں اود ءَ چہ نصیب اللہ وتی ھمراھی ءَ برتگ اِت وھدے کہ کستریں چُک یل داتگ اِت-

آئی ءَ گْوشتگ کہ نصیب اللہ کہ یک نودربرے، تنی وھدے آئی ءِ پجّار کارڈ ھم جوڑ کنگ نہ بیتگ اُمر ءِ شانزدہ سال اِنت-

آئی ءَ گْوشتگ کہ نصیب اللہ ءِ بروکاں لوگ ءَ چہ لک ءُ چیزے کلدار ھم برتگ اِت ءُ زالبول ءُ چُکاں دزمانجنی کتگ تیرگواری کتگ تپنگ ءِ زور ءَ نصیب اللہ وتی ھمراھی ءَ برتگ گوں-

آئی ءَ گْوشتگ کہ ما انگت ھچ سرپدی نیست کہ منی کسان سالی ئیں چُک کے برتگ، ما سک دلسیاھی ءِ دیمپان ایں-

آئی ءَ گْوشتگ کہ اے درگت ءَ من ڈپٹی کمشنر پنجگور میرو ءُ واجھاں گوں ھال ءُ منت کتگ بلے تنی وھدے اے درگت ءَ شریں پسّہ نہ رس اِتگ-

آئی ءَ گْوشتگ کہ اگاں مئے چُک ءَ چُشیں جرمے کتگ مارا سرپد بہ کن اَنت ما وتی چُک ءِ ھرچ وڑیں زمہ واری زیرگ ءَ ساڑی ایں اگاں جرم نہ کتگ گُڑا یل بہ کن اِت پرچاکہ رمضان المبارک ءِ ماہ اِنت ما سک دلیساھی ءِ دیمپان ایں-

آئی ءَ گْوشتگ کہ اگاں مئے چک دو روچ تہ ءَ یل کنگ نہ بیت گُڑا چُک ءِ یل کنائینگ ھاتر ءَ لاچار اَنت زھرشانی کن ایں سی پیک دگ ءَ بند کن ایں-

آئی ءَ ڈپٹی کمشنر پنجگور ءُ سرجمیں ادارھاں چہ دزبندی کتگ کہ نصیب اللہ ءِ یل کنائینگ ھاتر ءَ گامگیج بزیر اَنت اگاں ناں گُڑا چُک ءُ جنیانی ھمراھی ءَ سی پیک دگ سر ءَ نندانک دے ایں زھرشانی کن ایں-