شورِشیں ھپتگ- ٹی بی پی شونگال

الم بوانیت

شورِشیں ھپتگ

ٹی بی پی شونگال

دوھزار ءُ بیست ءُ پنچ ءِ بنداتی دو ھپتگ شورِش بیتگ انت – چار جنوری ءَ تربت ءَ پاکستانی آرمی ءِ کاروان ءِ سر ءَ پداحی اُرش بیتگ ات، ءُ لھتے روچ پیش ھزدار ءِ تھسیل زھری ءِ شھر ءَ بلوچ لبریشن آرمی ءِ فتح اسکواڈ ءُ ایس ٹی او ایس ءَ یکجاھیں اُرش کتگ ءُ دستیگ کتگ ات- اُرش ءِ وھد ءَ لیویز تھانہ سوچگ بیتگ ات، توپک دستیگ کنگ بیتگ ات اَنت ءُ دَہ اداراں شھر وتی کنٹرول ءَ کتگ ات- اے دستیگ کنگ ءَ آپریشن ھیروپ ءِ دومی بھر ءِ ھیلکاری ءِ نام دیگ بیتگ ات-

پاکستانی پوج ءَ بی ایل اے ءِ اے یکجاھیں اُرش ءَ پد ھمک وھدانی ڈول ءَ زھری ءِ شھر ءَ سیزدہ مردم زورانسری آوار جتگ ات – اے مردمانی کھولاں زھری ءِ کراس ءُ سوراب ءِ آر سی ڈی ھائی وے بند کتگ ات ءُ زھرشانی نندانک داتگ ات- اے زھرشانی ءِ سبب ءَ لھتے مردم یل کنگ بیتگ ات – کیچ ءِ بنجاھی شھر تربت ءَ شھید فدا چوک ءَ زورانسری بیگواھیانی یل کنگ ءِ ھاتر ءَ بازیں روچاں زھرشانی برجاہ انت-

بلوچستان ءَ اے دو ھپتگانی وھد ءَ زورانسری بیگواھیانی تہ ءَ گیشی اتکگ، ءُ بلوچ راجدوستیں پاٹی گمان کنگ ءَ انت ریاستی ادارہ پیش ءَ دزگیریں مردماں کُش ایت ءُ آیاں بلوچ جنگول کنت اِنت – بلوچستان ءَ زورانسری بیگواھیانی مردم یل دیگ ءِ سبب بس چہ زھرشانیاں بوگ ءَ انت، ھمے واستا مھلوک ءَ ترند ءُ یکشلیں زھرشانیانی زور ءَ زورانسری بیگواھیانی یل دیگ ءُ ریاست ءِ زور ءِ ھلاپ ءَ زرمبشت برجاہ داشتگ –

بلوچ لبریشن آرمی ءِ یکجاھیں ءُ پیچدگیں اُرشانی ترندی ءِ آیگ ءِ ھواری ءَ ریاستی زوراکیانی توک ءَ ھم گیشی اتکگ – ریاستی ادارہ بلوچ سلاہ بندیں گلانی ھترناکیں ءُ کوشتکاریں اُرشانی دارگ ءَ بے سوبی ءِ پژدر ءَ لس مھلوک ءَ زورانسری بیگواہ کنگ ءَ انت ءُ پیش ءَ دزگیریں مردماں کشگ ءَ انت – بلے ریاستی زوراکیانی ھلاپ ءَ راجی زُرمبشت یکجاہ بیتگ، ءُ نی مھلوک اے زُلمانی ھلاپ ءَ بے توار بوگ ءَ ابید ریاستی ادارھانی ھلاپ ءَ ترندیں زھرشانیانی راہ ءَ گچین کنگ ءَ اَنت-

نوکتریں