شال ءِ ایس ایس پی آپریشنز محمد بلوچ ءِ رِد ءَ شال ءَ تراک ءِ آسر ءَ بیران ءُ ٹپیگانی تہ ءَ فوجی ءُ سول دوئیں ھوار اَنت ۔
بلوچستان ءِ بنجاھی شھر شال ءَ ریل ءِ اسٹیشن ءَ بوتگیں تراک ءِ سبب ءَ 21 مردم بیران ءُ 46 ٹپی بوتگ انت۔
شال ءِ ایس ایس پی آپریشنز محمد بلوچ ءِ رد ءَ بیرانی ءِ تہ ءَ گیشی ءِ بوگ ءِ گمان ھست انت ۔
ریل ءِ اسٹیشن ءَ اھوالکاراں گوں تران کنان ءَ ایس ایس پی آپریشنز ءَ گشتگ کہ لس مردمانی ھمراھی ءَ لشکری اے اسٹیشن ءَ ٹرانسپورٹ ءِ ھاتر ءَ ھم کارمرز کن انت ءُ ٹپیگ ءُ بیران بوتگیں مردمانی تہ ءَ لشکری ءُ لس مردم ھم ھوار انت۔
ایس ایس پی آپریشنز محمد بلوچ ءَ بی بی سی ءَ گوں تران کنان ءَ گْوشتگ کہ تراک ریل ءِ اسٹیشن ءَ ھما وھد ءَ بوتگ کہ جعفر ایکسپریس ءِ مسافر پلیٹ فارم ءَ ریل ءِ ودار ءَ بوتگ اَنت ءُ آھانی تہ ءَ گیشتریں مردم تراک ءِ آماچ بوتگ اَنت۔
ایس ایس پی آپریشن ءِ رد ءَ تراک ءِ وھد ءَ اودا کم چہ کم 150-200 مردم جم بوتگ انت۔
آئی ءَ گوشت کہ ٹپیگیں مردم سول ھسپتال شال ءِ ٹراما سنٹر ءَ دیم دیگ بوتگ انت وھدیکہ تراک ءِ زور ءِ زانگ ءِ واستا پٹ ءُ پول بندات کنگ بوتگ انت۔
اے ارش ءِ زمہ واری بلوچ لبریشن آرمی ءَ زرتگ۔
بی ایل اے ءِ جارچین جیئند بلوچ ءَ یک کسانیں بیانے ءِ تہ ءَ گْوشتگ کہ مرچی سھب ءَ شال ءَ ریل اسٹیشن ءَ پاکستانی لشکر ءِ سر ءَ اُرش کتگ وھدے کہ آ انفنٹری اسکول ءَ چہ وتی کورس ءَ سرجم کنگ ءَ پد جعفر ایکسپریس ءِ سر ءَ واتر بوھگ ءَ بیتگ انت-
جیئند بلوچ ءِ گشگ اِنت کہ اے اُرش بی ایل اے ءِ فدائی یونٹ مجید برگیڈ ءَ کتگ۔