شمبے ءِ سھب شال ءَ ریل ءَ اسٹیشن ءَ بوتگیں تراک ءَ چہ 22 مردم بیران ءُ 18 ٹپیگ بوتگ انت۔
تراک ھما وھد ءَ بوتگ کہ مسافر روگ ءِ تیاری ءَ بوتگ اَنت۔
واکداراں بیران بوتگیں مردمانی کچ ءِ گیش بوھگ ءِ گمان درشان کتگ ریسکیو ءُ سیکورٹی ٹیماں وئیل ءِ سر ءَ زوت کارروائی کتگ ءُ لاش ءُ ٹپیگ پہ دوا ءُ درمان کمک ءِ واستا کوئٹہ ءِ سول اسپتال ءَ سر کتگ اَنت۔
لھتے ٹپیگ ٹراما سنٹر ءَ دیم دیگ بوتگ اَنت، سول ہسپتال ءَ ایمرجنسی ءِ جار جنگ بوتگ ءُ ڈاکٹر ءُ پیرامیڈیکل اسٹاف ءَ را زوت ڈیوٹی ءِ سر ءَ گوانک جنگ بوتگ انت۔
ریلوے ءِ کارندھانی گشگ اِنت کہ وھدے تراک ٹکٹ بوتھ ءِ نزیک ءَ بوتگ گڑا دو ریل روگ ءِ واستا چن ءُ لانچ ءَ بوتگ اَنت ءُ مزنیں کساسے ءَ مسافر پلیٹ فارم ءِ سر ءَ بوتگ اَنت۔
سیکورٹی پورسز ءَ دمگ انگر کتگ ءُ تراک ءِ دروشم ءِ پٹ ءُ پول بندات کتگ۔
اُستانی سرکار ءِ جارکش شاھد رند ءَ ٹاہ داتگ کہ پولیس ءُ سیکورٹی ٹیم جاہ ءَ سر بوتگ انت ءُ گشتگ کہ وئیل ءِ رپورٹ ءِ لوٹ کنگ بوتگ۔ آئی ءَ گیش تران کت کہ تراک ءِ ترندی ءِ پجار کنگ بوھگ ءَ انت وھدیکہ اسپتالانی تہ ءَ ایمرجنسی ءِ جار جنگ بوتگ ۔ ترجمان ءَ گیش گوشت کہ تاوان ءِ اندازہ ھم کنگ بوگ ءَ اِنت۔
بلوچ لبریشن آرمی ءَ اے اُرش ءِ زمہ واری زرتگ ءُ گْوشتگ: مرچی سھب ءَ شال ءَ ریلو ءِ اسٹیشن ءَ پاکستانی لشکر ءِ یک یونٹے ءِ سر ءَ اُرش کتگ وھدے کہ آ انفنٹری اسکول ءَ چہ وتی کورس ءَ سرجم کنگ ءَ پد جعفر ایکسپریس ءِ سر ءَ واتر بوھگ ءَ بیتگ انت-
جیئند بلوچ ءِ گشگ اِنت کہ اے اُرش بی ایل اے ءِ یونٹ مجید برگیڈ ءَ کتگ۔