گوادر: حق دو تحریک ءِ نندانک ءِ سر ءَ پولیس ءِ بیڑ، بازیں باسک دزگیر، جاور ناگیگ

گوادر ءَ حق دو تحریک ءِ باسکانی دزگیری ءِ ھلاپ ءَ گوادر، پسنی، اورماڑہ ءُ تربت ءَ زھرشانی دگ بند ءُ دزگیر کرتگیں باسکانی یل کنگ ءِ لوٹ ءَ کنگ ءَ اَنت –

بلوچستان ءِ تیابدپی شھر گوادر ءَ برجاھیں حق دو تحریک ءَ پولیس ءَ بیڑ برتگ حق دو تحریک ءِ رھشون حسین واڈیلہ ءَ ھوار بازیں باسک دزگیر کتگ اَنت-

دمگی مردمانی رد ءَ آنسو گیس ءِ شیلنگ کنگ بیتگ ءُ دریاورداں وتی زھرشانی برجاہ داشتگ ءُ شپ ءَ زھرشانی ءَ زالبول ھوار بیتگ اَنت-

دمگی مردمانی رد ءَ مروچی دریاورداں زر ءَ نہ روگ ءِ کڈنی کتگ ءُ نندانک ءَ ھوار بوگ ءِ جار جتگ، مکران ءِ سیاسی ءُ پوریاگراں زھرشانی ءَ ھمگرنچی ءِ واستا شتگ انت ءُ بازیں جاھاں جاور ناگیگی پیش کنگ ءَ اَنت-

دومی نیمگ ءَ حق دو تحریک اورماڑہ ءِ باسکاں پاٹی ءِ رھشونانی دزگیری ءِ ھلاپ ءَ اورماڑہ زیروپوائنٹ ءُ سربند چار بند کتگ ءُ روانی مھتل کتگ اَنت-

ھمے وڑ ءَ تربت ءَ ھم حق دو تحریک ءِ رھشونانی دزگیری ءِ ھلاپ ءَ زھرشانی بندات بیتگ ءُ شھر ءَ روانک ءُ زھرشانی بوگ ءَ اَنت-

ھمے وڑ ءَ پنجگور ءَ ھم حق دو تحریک ءِ نیمگ ءَ زھرشانی کنگ بیتگ ءُ سرکار ءَ بیست ءُ چار ادار دیگ بیتگ کہ پاٹی ءِ باسکاں یل بہ کنت اگاں ناں زھرشانی ترند کنگ بنت –

زھرشانی کنوکاں گوشتگ کہ مئے زرمبشت پر ایمن اِنت اگاں مئے باسک ءُ رھشون واجہ حسین واڈیلہ ءُ محمد یعقوب ءُ دگہ مردم یل نہ بیت اَنت گڑا سی پیک دگ سرجمی ءَ بند کنگ بیت اِنت-

ھمے وڑ ءَ حق دو تحریک ءِ سروک مولانا ھدایت اللہ رحمان ءَ تران کنان ءَ گوشتگ کہ حسین واڈیلہ ءَ ھوار تحریک ءِ بیست ءُ شش باسک دزگیر کنگ بیتگ اَنت-

زانگ بہ بیت بلوچستان ءِ تیابدپی شھر گوادر ءَ گوستگیں دو ماھاں وتی ھکانی ھاتر ءَ زھرشانی برجاہ اِنت ءُ گوستگیں روچاں بلوچستان ءِ وزیر داکلہ ضیا لانگو روزیر پبلک ھیلتھ لالا رشید پہ گپ ءُ تران ءَ گوادر ءَ سر بیتگ اَنت بلے گپ ءُ تران ابید آسری ءَ ھلاس بیتگ-