روکپتی بلوچستان: زاھدان ءَ ایرانی لشکری ءِ تیرگواری ءَ چاگردی رسانکدر کامرد کنوک ءَ ھوار چار کس بیران

الم بوانیت

زاھدان ءَ گوستگیں سَے روچاں یکشل ءَ زھرشانیانی درچ برجاہ اَنت ءُ وھد وھد ءِ سر ءَ ایرانی لشکر ءُ ناشناسیں مردمانی میان ءَ جنگ ءُ چوپ ھم بوگ ءَ اَنت-

گوستگیں سَے روچاں روکپتی بلوچستان ءِ بنجاھی شھر زاھدان یک جنگ جاھے جوڑ بیتگ ءُ چریشی ءَ کار ءُ بار ءَ ھوار ھوار زند ءِ دگہ چیزاں ھم اسر کپتگ اَنت-

ھالانی تہ ءَ گوشگ بیتگ کہ گوستگیں روچ ءِ مگرب ءَ ایرانی پھازگی لشکر ءِ تیرگواری ءَ یک چاگردی رسانکدر کارمرد کنوکے ءَ ھوار چار کس بیران بیتگ اَنت-

بیران بیتگیں مردمانی یکے ءِ پجار دیم ءَ اتکگ کہ آئی ءِ نام جمال عبدالناصر محمد حسنی ءِ نام ءَ زانگ بیتگ ءُ آ گیشتر جاورھالانی ءُ چاگرد ءِ سر ءَ ناوشیانی درشانی ءَ چاگردی ترامجاہ کارمرد کنوکیں مردماں چہ یکے بیتگ-

ھالانی تہ ءَ گوشگ بیتگ کہ آ گوستگیں روچ ءَ بیگاہ ءَ زاھدان ءَ یک دمکے ءَ روگ ءَ بیتگ کہ پھازگی لشکر ءَ آئی ءِ سر ءَ تیرگواری کرتگ ءُ کشتگ –

ھمے وڑ دگہ سَے مردم ھم ھمے رنگ ءَ تیرانی آماچ کنگ ءُ کُشگ بیتگ اَنت ءُ بلے اے ھرسئیں مردمانی پجار نہ بیتگ اَتت-

گوستگیں آدینگ ءَ بندات بیتگیں زھرشانی پژدر ءَ روکپتی بلوچستان ءَ سرجمی ءَ انٹرنیٹ بند اَنت ءُ بازیں آسراتیانی جنجالی اِنت ءُ چریشی ءَ چہ ھالانی گرگ تچکی ءَ بازیں جیڑھانی دیمپانی کنگ کپگ اِنت-

آدینگ ءِ روچ ءَ ایرانی لشکر ءُ زھرشانی کنوکانی میان ءَ جنگ ءُ چوپ ءَ پنجاہ ءُ ھشت مردم بیران ءُ دو سد ءُ ھپتاد مردم زدگ بیتگ ات اَنت ءُ چریشی ءِ پژدر ءَ روکپتی بلوچستان ءَ زھرشانی درچ گیش بیتگ ءُ ایرانشھر ءُ دگہ جاھاں ھم شنگ ات اتگ-

اے زھرشانی چھبار ءَ یک پانزدہ سالی ئیں جنکوئی ءِ گون ءَ پولیس ءِ آفیسر ابراھیم کوچکزئی ءِ زوراکیانی پژدر ءَ بندات بیتگ ءُ چریشی ءَ پد اے زھرشانی گیش پراہ بیان ءُ جاور گیش ناگیگ بیتگ اَنت-

روکپتی بلوچستان ءَ باز جاھاں دامگی ھال ءُ نیٹ ورک ءِ نہ بوگ ءَ راستیں ھال سر نہ بوگ ءَ اَنت ھما جاھاں زھرشانیاں چہ جاور ناگیگ بیتگ اَنت اود ءَ انٹرنیٹ سروس بند کنگ بیتگ-

نوکتریں