ھزارہ چکچینی ءُ بلوچ راجی زرمبشت ءِ سیادی؟ دی بلوچستان پوسٹ گچینی

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

ھزارہ چکچینی ءُ بلوچ راجی زرمبشت ءِ سیادی؟

ھزارہ ءِ کوش ءُ کوشانی سر ءَ بلوچ ءُ ھزارہ راجدوستانی راستیں لیکہ

دی بلوچستان پوسٹ گچینی : بھزاد دیدگ بلوچ

گوستگیں ھشت روچانی تہ ءَ بلوچستان ءِ شھر شال ءَ ھزارہ یک رندے پد ءَ اَلمدار ءِ دگ ءَ نندانک ءَ نیشتگ اَنت، وتی ھک ءُ زندمانی پھریزگ ءَ زھرشانی کنگ ءَ اَنت، ھزارہ ایکشن کمیٹی ءِ نیمگ ءَ اے برجاہ داشتگیں نندانک ءَ سدانی کَچ ءَ زالبول، چک ءُ کماش ھوار اَنت، اے نندانک ءِ بنکی ءَ ٹیکسیانی ڈرائیور کنگ ءَ اَنت نندانک ءِ بندات ھما وھد ءَ بیتگ کہ سِی ءُ یک مارچ ءَ کندھاری میتگ شال ءَ یک ٹیکسی یے ءِ سر ءَ تیرگواری کنگ بیتگ چریشی ءَ چَہ ڈرائیور بیران بیتگ ءُ دگہ یکے زدگ بیتگ.

اے ویل اولی ویل نہ اِنت بلکیں گوستگیں دو دیھکاں چَہ برجاھیں ھزارہ نسل کُشی ءِ نہ کُٹوکیں وھدے، سرکاری کَچ ءُ کساسانی رد ءَ گوستگیں شانزدہ سالانی تہ ءَ ھزارہ ٹک ءِ سر ءَ بیوکیں اُرشاں پنچ سد ءُ بیست ءُ پنچ مردم بیران ءُ ھپت سد زدگ بیتگ، وھدیکہ ھزارہ رھشونیں گلانی رد ءَ اے کَچ ءُ کساس، راستی نہ اِنت بلکیں بیرانی اشاں گیش اَنت.

ھمے وڑ ءَ یک نندانکے ما دوھزار ءُ سیزدہ ءَ ھم دیستگ اَت، وھدیکہ دَہ جنوری دوھزار ءُ سیزدہ ءَ المدار چار راہ ءِ سر ءَ سنوکر کلب ءَ بیتگیں دو بمب تراکاں سد ءَ چَہ گیش مردم بیران ءُ یک سد ءُ پنجاہ مردم زدگ بیتگ اَت چریشی ءَ پد کھولاں کُنٹانی کَل ءُ کسارات نہ منّ اِتگ ءُ کُنٹ زرتگ اَنت ءُ نندانک ءَ نیشتگ اِت اَنت.

اے بری ءِ نندانک ءَ بس جتائیں ایش اِنت کہ ناں ھزاراہ ڈیموکریٹک پاٹی گندگ ءَ پیداک اِنت نانکہ مجلس وھدتُ لمسلمین ءُ نانکہ رسانکدر نندانک ءِ ھالاں شنگ ءُ تالان کنگ ءَ کندگ ءَ پیداک اَنت اے نندانک لس مردمانی نیمگ ءَ نندانکی بیتگ، چُشکہ ایشی ءَ مردمی اگبالانی پانکجنوکیں چاگردی باسک ءُ وکیل جلیلہ ھیدر ءُ ھزارہ راجدار باسک پاٹی ءِ سروک تاھر ھان ھزارہ ھمگرنچی ءَ گندگ بنت.


آ دگہ راجدار ءُ رسانکدرانی کودیدی ءِ بارو ءَ نندانک ءَ نندوکیں مردمانی گوشگ اِنت کہ سرکار اے جیڑہ ءَ گار کنگ لوٹ اِیت.

ھزارہ چکچینی ءِ جیڑہ ءِ گار کنگ اِنت، کَچ ءُ کسانی کم پیشدارگ، یا کُشندہ روچ ء رھمانی ترگ، اے بارو ءَ سرکار ءُ چیریں ادارھاں نا ایوک ءَ ھزارہ ٹک بلکیں بلوچانی نیمگ ءَ ھمے بھتام سرکار ءَ جنگ بیگ ءَ اِنت.

چم نگاھی ھزارہ نسل کُشی ءُ بلوچ زرمبشت ءِ دو جتائیں بنگپ ءُ جیڑہ جتائیں رنگے ءَ کَیت بلے اے ھردوکانی میان ءَ یک جھلانکیں سیادی ءِ ھست یکیں گوشت ءَ دو رگ اَنت،ھاں انیگیں بلوچ زرمبشت ءُ ھزارہ چکچینی ءَ یکیں وھد ءَ یکیں شوربندی یے؟

اِے بابت ءَ دی بلوچستان پوسٹ ءَ نندانک ءَ ھواریں ھزارہ راجدار باسک ءِ سروک تاھِر ھان ھزارہ ءَ گپ ءُ رپ کرتگ ءُ آئی ءَ را چَہ ھزارہ چکچینی ءِ بارو ءَ راستیں کَچ ءُ کساس گپتگ اَنت “اے وھد ءَ ھپتاد ھزار ءَ چَہ گیش ھزارہ میاربندی ءَ لاچار بیتگ اَنت ءُ کم چہ کم دوھزار ءُ یک سد ءُ شست مردم شھید کنگ بیتگ ”آئی ءَ کَچ ءُ کساس راست کرتگ ءُ دی بلوچستان پوسٹ ءِ گون ءَ گْوشتگ.

ھزارہ چکچینی ءِ بارو ءَ تاھر ھان ھزارہ ءَ گپ کنان ءَ گْوشت کہ “ھزارہ چکچینی کجام ھم دینی ءِ بناھے سر ءَ بیگ ءَ نہ اِنت اے درست شئیھے ءِ نام ءَ ھزارہ نسل ءِ گون ءَ بیگ ءَ اَنت بلکیں ایشی ءِ راستیں رنگ اش اَنت کہ بلوچانی زرمبشت ءِ ھلاس کنگ ءَ مارا اَئیدی براکانی پیم ءَ ڈلگ ءُ ریچگ ءَ اَنت مارا کُشگ ءُ وتی مستراں چَہ لشکر کشی ءِ لوٹ ءَ کن اَنت، مئے کُشت ءُ گوشاں پھریزگی لشکر ھوار اِنت.

تاھر ھان ھزارہ ءَ وتی گپ دو گال بندانی تہ ءَ دی بلوچستان پوسٹ ءِ دیم ءَ ایر کُرت، اے بھتام نوکیں نہ اِنت ایشی ءَ پیسر ھزارہ راجدوستیں گل بازیں کَچے ءَ ءُ بلوچ آجوئی لوٹوکیں گلاں ھم اے بھتامی ریاستی ادارھانی نام ءَ کنگ ءَ اَنت، اے درگت ءَ بلوچ آجوئی ءِ واستا جھد ءِ پِڑ ءَ اوشتوکیں گل بلوچ لبریشن آرمی ءِ جارکش میرک بلوچ ءَ دوھزار ءُ چاردہ ءَ ھزارہ ءِ کوشیانی سر ءَ یک ویلے ءَ پد وتی ایرت چاریں درشان شنگ کرتگ ءُ گُشتگ اَت ” ریاستی ادارہ ھمک وھد ءَ ھزارہ برادری ءِ کُشت ءُ کوش ءَ سودمانی رنگے ءَ کنگ ءَ اَنت ءُ اے انسانی سوزمانی بنکارانی نام ءَ بلوچ ابادیانی یلگاری کنگ ءُ بلوچانی سر ءَ زُلمانی کوہ ءَ پروشگ لوٹگ اِیت ءُ اشانی ھمراھی ءَ بلوچاں نیکراھی ءَ گوں ھمگرنچی ءِ پندل ءَ سازگ ءَ اِنت زیردست ءُ بے میاریں مردمانی کوش ءَ ما گیر انسانی بنکار سرپد بہ ایں،


اے دراھیں بند ءُ کَڑیاں چَہ زانگ بیت کہ ھزارہ چکچینی ءَ ایرجنی درشان کاینت ءُ آیانی گون پدردری بیت اِنت، ھرس گواری بیت اِنت، بلے نانکہ کسے اے چکچینی ءِ راستگیں رنگانی سر ءَ گپ کنگ ءَ جاڑیگ اِنت ءُ نانکہ زمہ وارانی نیمگ ءَ دست چِست کنگ ءَ ھمے سبب اِنت کہ دو دیھکاں روچ ء رھمانیاں اے چکچینی بیگ ءَ اِنت.

ھاں بلوچ وتی سرڈگار ءِ سر ءَ برجاھیں اے چکچینی ءَ چَہ سرپد نہ اِنت؟ ھاں اے سروکاریاں بلوچانی کمک گون اِنت؟ اے جست ءُ ھزارہ نسل کُشی ءُ بلوچ زرمبشت ءِ ھمبستگی ءُ بے بنیں سیادی ءِ سرپد بیگ ءِ واستا دی بلوچستان پوسٹ ءَ جتائیں بلوچ آجوئی لوٹوکیں رھشونانی گون ءَ گپ ءُ تران کرتگ ءُ ایشی ءِ درگت ءَ پَٹ ءُ پول کرتگ.

اسلم بلوچ بلوچ لبریشن آرمی ءِ بُنکی رھشون ءِ گوشگ ءَ تروکیں چیرجنگیں کماندار اِنت، وھدیکہ دی بلوچستان پوسٹ ءَ آئی ءِ گون ءَ رھوت کرتگ ءُ ھزارہ نسل کُشی ءِ درگت ءَ آئی ءِ گپ گپتگ اَنت ءُ آئی ءَ گْوشتگ، کجام ھم بے میاریں مردمے کوش زھری ءِ درانگاز اِنت، ھما وڑ ءَ کہ ھزارہ برادری نشانگ کنگ بیگ ءَ اِنت، ایشی ءَ چَہ اے پدر بیت کہ ھزارہ چکچینی ءِ پُشت ءَ ریاستی پلامرزی اِنت، پاکستان بنداتی روچاں چَہ اسلام ءُ دین ءِ نام ءَ وتی ریاستی لوٹاں سرجم کنان اِنت ءُ پیداک اِنت، پرچاکہ پاکستان ءَ راجی ءُ زانشتی بنریشگ نیست، راجدپتر ءَ شئیہ،سنی ءِ جیڑواں وھدے ھمراھی ءَ سَئودی ارب ءُ ایران ءَ وتی شوربندیانی بھر جوڑیشت کرتگ، آئی ءِ شوربندیانی میان ءَ پاکستان ءِ راجدپتری کردمان ءِ ھست ءُ بلوچستان ءِ پراھگیں زمینے ءِ واھند بیگے نھاد ءَ ھزارہ برادری ءَ بلوچانی رنگ ءَ وتی کوشانی دروشمانی ندارگ کندگ ءُ کوپگاں کنگی اِنت، اے گپ ءَ راستیگینیں کہ اے کُشت ءُ کوشی ءِ کَڑی ریاست ءَ گوں بندوک بنت.

بلوچ آجوئی لوٹوکیں گل اے گپ ءَ ڈاھینگ ءَ اَنت کہ آ یکیں پِڑ ءَ دو جنگانی دیمپانی ءَ کنگ ءَ اَنت یک نیمگے ریاستی لشکر ءُ دومی نیمگ ءَ نیکراھی ناشرکاریں گلانی دیمپانی کنگ ءَ اَنت، آیانی بھتام اِنت کہ بلوچستان ءَ راجدوستی ءِ زیردست کنگ ءَ ریاستی سروکاری ءَ نیکراھی ناشرکار رودینگ بیگ ءَ اَنت ءُ آ گل “ڈیتھ اسکواڈ ” رنگ ءَ بلوچ آجوئی دوستیں باسکاں نشانگ کُشگ ءُ آوارجنیاں کاربندگ ءَ اَنت ءُ ھمے کار کنوک ھزارہ چکچینی ءَ دزمان جن اَنت.

ھمے درگت ءَ دی بلوچستان پوسٹ ءَ نامی ئیں بلوچ رھشون بلوچستان لبریشن پَرنٹ ءِ سروک ءُ سلاہ بندیں کماندار ڈاکٹر اَلّا نزر بلوچ ءِ گون ءَ گپ ءُ تران کرتگ ءُ آئی ءِ لیکہ ھزارہ چکچینی ءُ آئی ءِ سببانی بارو ءَ جست گپت،

ڈاکٹر اَلّا نِزر بلوچ ءَ ھزارہ نسل کُشی ایر جتگ ءُ گُشت “کہ من ھزارہ ءِ ھوبریچاں ترندی ءَ ایر جن آں “بلوچانی “سیکیولر ڈیموکریٹک “بزاں کہ آجوئی ءِ چاگرد دابے ءَ ھروھد ءَ دینداری ءِ کجام تک بہ بیت آئی ءِ شرپ بیتگ، ھزارھانی کُشت ءُ کوش کنگ ءِ مول ءُ مراد ھما بلوچ دودمان ءِ نہ وش کنگ ءُ جھان ءِ دلگوش ءَ بلوچ راجی زرمبشت ءَ چَہ گستا کنگ اِنت تانکہ جھان ءِ چماں اے پدر کنگی اِنت کہ بلوچستان ءَ ھچ وڑیں آجوئی ءِ جنگ نیست بلکیں دین ءُ دینداری ءِ سر ءَ جنگ بیگ ءَ اِنت “

وھدیکہ ڈاکٹر اَلّا نزر بلوچ ءَ چَہ دی بلوچستان پوسٹ ءَ اے کُشت ءُ کوشی ءِ بارو ءَ پُرس اِت گڑا آئی ءَ گْوشت کہ “ایشی ءِ پُشت ءَ لشکر ء جھنگوی دزمان جن اِنت، شما وت زان اِت کہ اے ھما کوھنیں سپاہ سھابہ اِنت آئی ءَ ھک نواز جھنگوی ءِ نام مٹ کرتگ ءُ لشکر ء جھنگوی نام ایر کرتگ اشانی سرجمیں بنریشگ پنجاپ ءَ اِنت نِی آ ایشی ءَ بلوچستان ءَ آرگ لوٹ اَنت، ھما مول ءُ مراد ءِ واستا گیشتر ھونواریں مردم یکجاہ کنگ بیتگ اَنت، آیاں چَہ نا ایوک ءَ ھزارہ ءِ کُشت ءُ کوش ءِ کار بلکیں بلوچ زرمبشت ءِ نگاھی ءِ دیر کنگ ءِ کار ھم دیگ بیتگ بلکیں ھما زوراں بلوچ آجوئی دوستانی بگیری ءَ کاربندگ ءَ اَنت، بھمیانگی گپ ایش اِنت کہ اے گل ءِ بنریشگ پنجاپ ءَ اِنت بلے اود ءَ اشی ءِ ھچ وڑیں ناشری بیگ ءَ نہ اِنت بلے بلوچستان ءَ ھشتر ءِ وش مھار ءَ تر اَنت ءُ کاروائی کنگ ءَ اَنت”.

اے چون اے ناشریں گل اینچُک سبکی ءَ چون مزن کچے ءَ دو دیھکاں روچ ءِ رھمانی مردماں کُشگ اِنت ءُ پد ءَ ھم سر ءِ بازار ترگ ءَ اَنت؟ اے درگت ءَ ڈاکٹر الا نزر بلوچ ءَ گوشت کہ “لشکر ء جھنگوی بہ بیت، لشکر ء تیبا، ھرکت الانسار، جند اُلا، جیش الادل بہ بیت یا جیش مھمد ءِ وڑیں ناشرانی پُشت ءَ پاکستانی چیریں ادارہ آئی ایس آئی ءُ ایم آئی دست کمک اِنت اے درست پاکستانی رودینتگیں زور اَنت، اشانی سرجمیں ونڈ ءُ سنڈ پاکستان ءُ سَئودی ءَ چَہ پیداک اِنت.

آیا اے گلانی بلوچستان ءَ کسے ءِ پلامرزی گون اِنت گوں؟ اے درگت ءَ ڈاکٹر الا نزر بلوچ ءَ گوشت کہ،“اے گلاں ھنچیں مردمانی پلامزری گون اِنت گوں کہ سرکاری اَنت، ھَنچُشکہ لشکر ء جھنگوی سردار اَزیز اِنت کہ دومی نیمگ ءَ چَہ نیشنل پاٹی ءَ اِنت، جمئت ءَ اَتا اُلّا ءُ آگا پئیسل ءِ وڑیں مردم آیانی کمکار اَنت ھمے وڑ ءَ بی این پی ءِ سردار نسیر موسیانی آیانی پلامرز اِنت، مکران ءَ مجید بزنجو ءُ آئی ءِ چُک کہ نِی سروزیر اِنت،، کدوس بزنجو کہ آیانی مزنیں کمکارے ءُ ایشی ءِ دمگ ءَ لشکر جھنگوی ءُ دگہ بازیں بنجل ھست اَنت ھمیشی ءِ سروکی ءَ برجاہ اَنت کہ داں انیگ ءَ درزانی کَچ ءَ بلوچانی ھون ھمیشاں شُلپیتگ ءُ وارتگ اَنت ”.

بلوچستان ءَ کم ءُ گیش درستیں آجوئی دوستیں گلانی یکے پنت ءُ گپ اِنت وھدے دی بلوچستان پوسٹ ءَ بلوچ ریپبلکن آرمی ءَ گوں رھوت کرتگ اَت گڑا آئی ءَ ھم ھزارہ چکچینی ءِ بارو ءَ ھمے پنٹ ءُ گپ درشان کرتگ اِت اَنت، گلزار امام بلوچ ریپبلکن آرمی ءِ مستریں کماندار اِنت آئی ءَ دی بلوچستان پوسٹ ءَ گپ کنان ءَ گوشتگ کہ پہ بستارے راج بلوچ راج ءُ ھزارہ ٹک ءَ ھچ وڑیں زمینی، راجی، زبانی یا دینی ھچ وڑیں اڑ ءُ کُڑ نیست، اے کُشت ءُ ھونریچی ءَ تچک ءَ ریاستی کارندہ دزمانجن اَنت کہ ایشی ءِ پُشتگیری ءَ سئودی ھم کنگ اِنت، ریاست بلوچستان ءَ دینی ءُ زبانی جیڑواں پیداگ کنگ لوٹ اِیت ءُ بلوچ راجمان ءَ نہ وش کنگ لوٹ اِیت، بلوچ راج اے جیڑو ءَ ریاست ءِ سر ءَ لَڈ اِیت.

اے ناشرکارانی دستاں یک نیمگے ھزارہ ٹک باز واری ءِ دیمپان بیتگ دومی نیمگ ءَ درستاں بزگ ءُ وارکشوکیں بلوچ اشکامیں راجداری باسک اَنت،

بلوچ آجوئی دوستیں سلاہ بند وت ءَ توپک ءِ زور ءَ وتی پھریزی ءَ کن اَنت کجام ھم کَچ ءَ زورمندیں ناشراں چَہ بزگیانی دیمپانی نہ بیتگ بلے لس دست ءُ گوشیں راجداریں باسک، پروپیسر، ڈاکٹر ءُ دگہ باز سبکی ءَ ھمیشانی نشانگ بیتگ اَنت ھمے سبب ءَ سدانی کچ ءَ بلوچ راجداریں باسک تیرانی آماچ بیتگ اَنت ءُ بازیں زانگولیں لاش ھم دزکپتگ اَنت، کہ آیانی زمہ واری ھمے ناشرکاریں گلاں منّ اِتگ اَنت جتائیں ناماں بیتگ اَنت، توتک ءِ گورانی دزکپگ ءِ دروشم اِنت کہ اود ءَ شپیک مینگل ءِ چیردستی ءَ دینی ناشرکارانی یک بنجلے برجم بیتگ ءُ آئی ءِ جوڑ کرتگیں گل ءَ گیشتر ھزدار ءَ نانکہ راجداریں باسکانی بلکیں ھزارہ برداری ءَ سیادی کنوکیں مردمانی کُشت ءُ کوش ھم کرتگ ءُ آیانی زمہ واری وتی کوپگاں زرتگ ءُ اشانی تہ ءَ ھاشم ھزارہ ءِ کوش پہ منّانکے ءَ وت بس اِنت.


ھمے درگت ءَ بلوچ آجوئی لوٹوکیں راجداریں گلانی لیکھانی زانگ ءَ دی بلوچستان پوسٹ ءَ بلوچستان ءِ درستاں چَہ مستریں آجوئی لوٹوکیں راجداریں پاٹی بلوچ نیشنل مومنٹ ءِ سروک ھلیل بلوچ ءَ گوں رھوت کرتگ ءُ آئی ءَ چَہ بلوچستان ءَ برجاھیں ھزارہ ھونریچی ءِ بارو ءَ جست کرتگ“ ھلیل بلوچ گْوش اِیت ” کہ ھزارہ ءِ کُشت کوش ایرجنی ءِ ما ایشی ءَ بنی آدمانی ھوانواری سرپد بہ ایں، چُشکہ دینی ءِ سر ءَ کجام ھم بنی آدم ءِ زندمان ءَ گون ملنڈی کنگ درندگانی ءَ ابید دگہ ھچ نہ اِنت ”.

وھدیکہ بلوچستان پوسٹ ءَ پَٹ ءُ پول کرتگ آیا بلوچ چاگرد ءَ ٹکانی سر ءَ جتائی ءِ باوست ھست؟ گڑا ھلیل بلوچ ءَ گْوشت “ ٹکی یا دینانی نام ءِ سر ءَ ھونریچی بلوچ دودمان ءَ نیست ، اے پاکستان ءِ دین اِنت، ایشی ءِ سبب ایش اِنت کہ پاکستان یک ریاستے ءِ زانشت سِنچ ءُ نامانی ءَ ھچ ایر کپت نہ کنت، ڈیھ وتی راجدپتر ءُ دودمان ءَ پُشت چاران اَنت بلے پاکستان چریشاں چَہ زبھر اِنت ھمے واستا ما گْوش ایں کہ پاکستان بے دودمانیں ڈیھے، یک بے دودمانیں ڈیھ ھروھد ءَ وتی واجھانی دپیلانی سر ءَ نیشتگ اَنت پاکستان یکے ءَ چَہ گیش زورانی یا واجھانی دپیلانی چمدار اَنت ھمود ءَ کہ ھزارہ برادری ءِ کُشت ءُ کوش کنوکانی سیادی اِنت چریشی ءَ سَئودی تچک ءَ تچک دزماجنی ءَ گِندگ ءَ کَیت ”.

ھزارہ کُشت ءُ کوشے راستیں رنگ ءُ دروشم چی اَنت؟ اے بارو ءَ ھلیل بلوچ ءَ دی بلوچستان پوسٹ ءَ را پسھی ءَ گْوشت “ پاکستان ءَ بلوچ راج گلامی ءِ زنجیراں کنگ ءُ اوگستان ءَ را گیش جنجالانی دیمپان کنگ ءَ لشکر ءِ ھمراھی ءَ دومی مستریں اُردکاری ءَ کنگ اِنت، چُشکہ چیرنامے ءِ دروشم ءَ چاپلوسکی ءِ زانگ بیت اے درندگانی گور ءَ مردین ءُ جنینانی تہ ءَ دگری ءِ زانگ نئیت، بے جُست ءُ گپ ءَ آیاں کُشگ ءَ اَنت، پاکستان یک نیمگے سئودی ارب ءِ واھابی ازم ءِ پُشت ءَ گون اِنت کہ ھماھی ءِ ریپکاں زورگ ءُ آئی ءِ وش کنگ ءَ مسلمانی ءِ نام ءِ سر ءَ کُشت ءُ کوش کنگ اِنت ءُ دومی نیمگ ءَ جھد کنگ اِنت کہ بلوچ چاگرد ءَ ٹکی جیڑہ چِست بہ بیت ریگزاری ءَ ریزان بہ کنت تانکہ جھان ءَ ایشی ءَ بیسہ بہ دارائین ایِت کہ بلوچ زرمبشت آجوئی ءِ جنز نہ اِنت بلکیں ٹکی جدال کَشے، کہ چریشی ءَ چَہ مھلوک دین ءِ نام ءَ دومی ءِ ھوناں چُسگ ءَ اَنت.

بلوچ زرمبشت ءِ ھلاس کنگ ءَ یک تھی پندلے یا میان اُستمانی “گریٹ گیم ” ءِ آماچ پد ءَ لھتیں دینی سرگردانی دین ءِ جزبگ ءِ سان؟ سبب کجام ھم بہ بیت! پَسہ یک اِنت، اے درستیں جاورھالاں ھزارہ راج یک بھمیانگیں گناھے ءِ سزا دو دیھکاں گوزگ اِنت ءُ ھمک روچ لاشانی لاش چِست کنگ ءَ اَنت، درستیں مھلوک ءِ چم ءُ نگاہ ریاست ءِ نیمگ ءَ بیگ ءَ اَنت، ریاست اگاں کُشندھانی سروکاری ءَ کنگ ءَ نہ اِنت پد ءَ ھم شھریانی پھریز یا دگہ بے میار نہ اِنت الم شریدار اِنت.

نوکتریں

کیچ الندور ءَ ناشناسیں مردماں ھائی اسکول سوتکگ

دی بلوچستان پوسٹ کیچ ءِ دمگ بلیدہ الندور ءَ ناشناسیں مردماں گورنمنٹ ھائی اسکول بُن داتگ، چریشی...

گچک: دو زالبول ءُ چُکاں ھوار نُھ مردم بیگواہ

دی بلوچستان پوسٹ چہ گچگ ءَ پاکستانی پوج ءِ دست ءَ دو زالبول ءُ چکاں ھوار نُھ...

مند ءَ پاکستانی پوج ءِ پانگس ءِ سر ءَ اُرش، اُرش ءِ زمّہ واری بی ایل ایف ءَ منّ اِتگ –

گوک رودان ءَ پاکستانی پوج ءِ پانگس ءِ سر ءَ اُرش کتگ دو کارمند کُشتگ یکے زدگ کُرتگ - میجر گْوھرام...