شپیک مینگل مھترھندیانی زورمندیں ھونوار، دی بلوچستان پوسٹ گچینی

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

دوھزار ءُ پانزدہ ءَ سند ءِ شھر شکار پور ءَ بیتگیں بمب تراک ءُ دوھزار ءُ دَہ ءَ ھُزدار ءَ بی ایس او آزاد ءِ روانک ءِ سر ءَ تیرگواری ، چریشانی تہ ءَ ھما وھدی ھمبستگی زانگ بیت کہ وھدیکہ دوھزار ءُ شانزدہ ءَ وتکش تراکے ءَ جاڑیگ بیتگیں اُزمان بروھی کہ شکار پور ءَ یک شئیہ مسیتے ءَ تراک کنگ ءَ پیسر گِرگ بیتگ اَت، اے اولی رند اَت کہ یک وتکش تراک کنوکے گرگ بیتگ اَت ءُ وتی زبان ءَ چَہ گوشگ ءَ اَت کہ منی وتکُش “جیکٹ “بلوچستان ءِ دمگ وڈھ ءَ مئاز نامی ئیں مردمے ءَ جوڑ کرتگ.

وڈّ ءَ ناشرانی جاڑیگ بیگ ھروھد ءَ نہ بیتگ ناکہ سرجمیں بلوچستان ءَ نیکراھی یے نامانی راجمانی بیتگ، سِند ءَ شئیہ مسلمانانی مسیت، شال ءَ ھزارہ برادری ءُ بلوچ آجوئی دوستانی کُشت ءُ کوشاں بہ گر کراچی ءَ ایم کیو ایم ءِ رھشون واجہ ازھار الھک ءِ سر ءَ کوشی یے بیڑ بہ بیت، اے درستانی بند ءُ ریشک وڈّ ءِ ھند باڈڑی ءَ نندوکیں شپیک الرھمان مینگل ءَ رو اَنت ھوار بنت.

شپیک مینگل کَے اِنت؟ چون آ نیکراھی ناشرکار جوڑ بتگ ءُ پد ءَ مھترھندیانی مزنیں باسکے بتگ، اے درگت ءَ دی بلوچستان پوسٹ ءَ وتی وانوکانی واستا الکاپیں پَٹ ءُ پول ءَ رند جتائیں ھال یکجاہ کرتگ ءُ تالان کنگ ءَ اِنت.

شپیک الرھمان، مینگل ٹکے مھمد زئی تائپے ءَ چَہ سیادی کنت، آ گوستگیں پاکستانی وزیر نامگپتی پیٹرولیم ءُ گوستگیں چار ءُ گزاری اُستانی وزیر نسیر مینگل ءِ زھگ اِنت،شپیک مینگل ءَ وتی بنداتی وانگ ءُ زانگ لاھور ءَ یک دربرجاھے ءَ کہ آئی ءِ نام “ایچی سن ” ءَ دربرتگ، بلے چریشی ءَ پد آئی ءَ امروزی زانگ یلہ کرتگ ءُ کراچی ءَ یک دیوبندی نیک جاھے ءَ وتی وانگ بندات کرتگ ءُ ھمود ءَ ایشی ءِ ھما سپر بندات بیتگ کہ چریشی ءَ نگران سروزیر ءِ زھگے ءَ چہ بہ گر ھزاراں مردمانی ھونوار جوڑ کرت ءُ داں روچ ء مروچی ءَ وتی دستاں لس نیزگاریں مردمانی ھوناں گوں وتی دست شودی ءَ کنگ ءَ اِنت.

شپیک مینگل ءُ آئی ءِ کَھول بنداتی ءَ ھُزدار ءِ شھر ءَ واپڈا میتگ ءَ یک کسانوکیں لوگے ءَ نندوک بیتگ اَنت، آ وتی بنداتی روچاں وتی مستریں برات اَتارھمان مینگل ءُ وتی ناکو کُدوس مینگل ءِ ھمراھی ءَ اوگستان ءَ چَہ آیورتگیں گاڑیانی سر ءَ نِشھی کار ءُ بار ءَ کنگ ءَ بیتگ اَنت.

کراچی ءَ دیوبندی نیکجاہ ءَ وانگ ءِ وھد ءَ آئی ءِ گِند ءُ نند لشکر ء تیبا ءِ مردمانی گون ءَ بیتگ، اود ءَ لھتیں وھداں کشمیر ءِ جھادی ٹولیانی گون ءَ ھمراہ ھم بیتگ ءُ پد ءَ کشمیر ءَ ھم پاکستانی لشکر ءِ کمکاری ءَ جھادی گلانی ھمراھی ءَ جنگ ئِے کرتگ اے کشمیری جھادی یے بیتگ کہ اود ءَ آئی ایس آئی ءِ یک مزنیں آپسرے ءِ چَماں کپ اِیت ءُ چمود ءَ چَہ آئی ءَ یک مزنیں مردمے جوڑ کنت.


دوھزار ھشت ءَ وھدیکہ پاکستانی لشکر ءَ بلوچستان ءَ “کِل اینڈ ڈمپ ” بزاں کُشت ءُ کوشی ءِ شَور بندات کرت اَنت گڑا لشکر ءَ ھمے زوت زوتاں “لوکل میلیشیا ” بزاں دمگی مردم پہ ھونواری ءِ واستا چن ءُ لانچ کنگ بندات کُرت، آیانی مول ءُ مراد بس آ وھد ءَ آوار جنیانی کمکاری بیتگ ءُ لشکری مردماں پہ سلامتی درکنگ بیتگ، بلے آجوئی ءِ زرمبشت کہ جنزان بیت ءُ بلوچ سلاہ بند مھکم بیان بیت اَنت گڑا پاکستانی لشکر ءَ وتی داشتگیں کاسگ چَٹ ھم سلاہ بند کرت اَنت ءُ گڑا اود ءَ شپیک مینگل ءِ سِلاہ بندیں گَل دپا ” دیم ءَ اتک.

ھما سرکاری چریکاں وتی اولی اُرش دوھزار ءُ دَہ ءَ ھُزدار ڈگری شھدربرجاہ ءَ بیوکیں بی ایس او آزاد ءِ روانک ءِ سر ءَ تیرگواری کُرت، چریشی ءِ آسرا یک نودربرے کہ آئی ءِ نام الی دوست اَت بیران بیت ءُ بازیں کساسے ءَ نودربر زدگ بیت اَنت، چریشی ءَ پد ھمے گل ءَ ھُزدار مزن شھدربرجاہ ءَ دودمان ءِ مراگش ءِ سر ءَ دزبمباں گوں اُرش کرت اود ءَ دو ورنا بیران بیت ءُ بازیں ورنایے زدگ بیت،

اے دوئیں اُرشاں لیاکت کرد ءُ بیبرگ زھری وتی پاداں چَہ زبھر بیت اَنت،


چرے کار ءَ چَہ پد شپیک مینگل ءَ چیریں ادارھانی نیمگ ءَ سرجمی ءَ کمک رسی بیت گڑا چریشی ءَ پد آئی ءِ مستریں برات اتا الرھمان وتی سلکاریانی بانزلاں پد ءَ ھُزدار ءِ شھر ءِ سر ءَ ایر دنت بلے ھمے وھد ءَ بلوچستان ءَ ترامگامیں آجوئی دوستیں گل بلوچستان لبریشن آرمی ءِ دستاں آئی ءِ ناکو کُدوس مینگل ءِ کوشی بیت اِنت کہ آئی ءِ ناکو ءَ را پاکستانی لشکر ءِ چریکاری ءِ بھتام جنگ بیت اِنت ، کہ ایشی ءِ کوش ءِ سبب ءَ پد آئی ءَ آجوئی دوستیں باسکاں بہ گر تاں پلامرزی کنوکانی کُشت ءُ کوش ءِ سرجمیں زور دیگ بیت.

دوھزار ءُ نُھ ءَ بہ گر داں دوھزار ءُ سیزدہ ءَ ھُزدار ءِ شھر ءَ سدانی کَچ ءَ تیر جنگی ءِ کوش ءُ آوارجنیاں درستاں شپیک مینگل ءِ چریک کنگ ءَ بیتگ اَنت ھمے چریکانی دست ءَ کسان سالیں بالاچ ءُ مجید زھری شھید کنگ بیتگ اَنت ھمے وڑ ءَ کماش ھاجی رمزان ءُ ھاپِز ابدلکادر مینگل ھم ایشانی تیرانی آماچ بنت ءُ شھید بنت،

شپیک مینگل ءِ پت ءِ سیادی مینگل ٹک ءَ اِنت بلے آئی ءِ مات ءِ سیادی ھُزدار ءِ دمگ توتک ءِ میتگ ءَ اِنت اود ءَ کلندرانی ٹک ءِ مردم نندوک اَنت ھمے سیادی ءِ نام ءَ مِلکتانی بھانگ ءَ شپیک مینگل ءَ وتی نوکیں بنجل توتک ءَ جوڑ کُرت.

اے گپ ھم زانگی یے کہ شپیک مینگل ءِ آیگ ءَ پیسر ھم یک مزنیں ءُ گران باریں کَچے ءَ توتک ءَ پاکستانی لشکر لشکر کشی ءِ کنت ءُ کلندرانی ٹک ءِ سردار ءِ زھگاں ھوار دَہ کلندرانی بلوچاں آوار جَن اَنت، آوار جنگ بیتگینانی تہ ءَ مکسود کلندرانی ءِ کُنٹ پد ءَ شال ءِ دمگ بروری دگ ءَ دزکپ اِیت، بلے آ دگہ دھیں مردم انگت ءَ بیگواہ ءَ اَنت،چریشانی تہ ءَ ھشتا ءُ دو سالی ئیں ابدلرھیم کلندرانی ھم ھوار اِنت.

توتک ءِ شھر ءَ وتی بنجل ءِ جوڑ کنگ ءَ پد شپیک مینگل ءَ اود ءَ وتی لَٹ شاپی ھم برجاہ داشت ءُ سرجمیں بلوچستان ءَ لس بے میاریں مردمانی آوار جنگ ءَ پد اود ءَ زندان جاہ ءَ بند کرتگ اَنت ءُ دمگی مردمانی گوشگ اِنت کہ دمگ ءَ تروکیں شپانکاں گوشتگ کہ ما شپ ءَ شپیک مینگل ءِ بنجل ءَ گریوْگانی توار اشکرتگ کہ کسے ءَ کس ءِ بہ جنت، شپیک مینگل ءَ توتک بنجل ءِ کَش ءُ گوراں گار بُراِتگ ءُ اگاں لَٹ شاپیانی وھد ءَ کسے ءِ بیرانی بہ بیت گڑا ھمود ءَ کَل ءُ کسارات کنگ بہ بیت.

اے گار ءُ بیگواھیں گورانی پدراھی دوھزار ءُ چاردہ ءَ یک شپانکے ءَ کرتگ ، شپیک مینگل ءِ بنجل ءَ دزکپتگیں گاریں گوراں یک سد ءُ شست ءُ نُھ کَنٹ دزکپتگ اَت کہ آیانی جاور ھنچُش نگیگ بیتگ اِت اَنت بس پشکپتگیں “ھڈ ” اِت اَنت کہ ھچ زانگ نہ بیت اَنت اے کُنٹانی تہ ءَ بس دو ءِ پجار بیتگ کہ آیانی سیادی بلوچستان ءِ دمگ آواران ءَ بیتگ اَت.

اے گاریں گورانی پدراھی ھما وھد ءَ بیتگ اَت کہ وھدیکہ شپیک مینگل ءَ اے دمگ یلہ کرتگ اَت ءُ وتی پِتی ھنکین وڈّ ءَ شتگ اَت اے ھمے واستا بیتگ اِت اَنت کہ زرداری ءِ سرکار ھلاس بیتگ اَت ءُ “آئی ایس آئی ” دیم ءَ ” ایم آئی ” کمان ءَ چارگ ءَ اَت، بلے شپیک مینگل ءِ پالیسانی مٹ بیگ باز پیسر ءَ بیتگ اَت ءُ آ نِی لس شھریانی وڑ ءَ واتر روکیں مردمے نہ اِت.


شپیک مینگل پاکستانی لشکر ءِ یک ھنچیں زورمندیں کوشکارے ءَ اَت کہ بس وتی میر ءُ واجہ “آئی ایس آئی ” ءِ گپانی گوشداروک اَت “ملٹری انٹیلیجنس ” ءَ وتی بید ء سلاہ بندی کنگ ءَ وتی دست ءِ راست سید وھید شاہ ھُزدار ءَ بانام ءِ ڈپٹی کمشنر جوڑ کرتگ اَت ءُ دیم داتگ اَت ،بلے آئی ءَ اے گپ ءِ سما ھما وھد ءَ بیتگ اَت کہ شپیک مینگل ءَ نِی لشکر وت لگام کرت نہ کنت وھدیکہ وڈّ ءِ نزیک ءَ چریکاراں سرکاری لیویز لشکر ءِ ھشت مردمانی کوش ءُ بازینیں زدگ کرتگ اَت.

شپیک مینگل ءَ وتی یلھی ءِ سیت مندی چِست کرت ءُ لشکر ء جھنگوی ءِ وڑیں نیکراھی ناشریں گلے ءِ تہ ءَ وتی جاہ جوڑ کرت ءُ چریشی ءَ پد اوگستان ءِ تالبان ءِ گون ءَ رھوت ئِے کرت، آجوئی دوستانی ھونریچی کنگ ءَ پد آئی ءَ وتی کار برجاہ داشت اود ءَ درستاں پیسر اولی رند ءَ “آئی ایس آئی ” ءِ واستا بھرمند کنگ ءَ گچین کنگ بیت.
شپیک مینگل ءَ وڈّ ءِ دمگ باڈڑی ءَ وتی ھیلکاری ءِ بنجل جوڑ کرت اَنت،

اے بنجلانی تہ ءَ شپیک مینگل ءَ “آئی ایس آئی ” ءِ چیردستی ءَ ردوکیں “دائش ” ءُ “لشکر ء جھنگوی ال آلمی ” نامیں گلانی کارندھاں ھیلکاری دیگ بندات کُت شپیک مینگل بلوچستان ءَ ھوار سرجمیں دمگ ءَ بندوکیں مھترھندانی واستا بیمناکیں رنگے ءِ رنگاں پدراھی کنگ ءَ اِنت اے گپ ءِ بارہ ءَ درستاں سرپدی ھست بلے اے زانگ ءُ چارگاں پد ھم کجام ھم سرکار یا وزیر”آئی ایس آئی ” ءِ دیم ءَ اُشتات نہ بیتگ اَنت.

بلوچ سلاہ بندیں گلاں بازیں وھداں شپیک مینگل ءِ سر ءَ اُرش کرتگ، چریشانی تہ ءَ درستاں مستریں اُرش شال ءَ آئی ءِ لوگ ءِ سر ءَ بیتگیں وتکش اُرش بیتگ کہ چریشی ءِ سبب ءَ چریکانی بازیں کارندھے مرتگ اَت.

اے ھم اِشکُنگ بیتگ اَت کہ کراچی ءَ پولیس ءِ بیڑی ءِ وھد ءَ دزگیر کنگ بیتگیں نیکراھی ناشرکاریں گل “انسار شریئہ ” ءِ کارندھاں پدراھی کرتگ کہ مارا ھیلکاری بلوچستان ءِ دمگ وڈّ ءَ رسگ اِنت ءُ اود ءَ مئے ھیلکاری کنوک ابدُلا بلوچ نامے مردمے بیتگ، زانگ بہ بیت ایشی ءَ پیسر سند ءَ دزگیر کنگ بیتگیں ناشرکاراں ھم شپیک مینگل ءِ بنجل ءِ نام گپتگ اَت ءُ ایشی ءِ ھمراھی ءَ ھم اے ھم پدراھی کرتگ اَت کہ شاہ نورانی ءِ درگاہ ءَ وتکش کنگ ءِ تراکاری ھم وڈّ ءَ چَہ کنگ بیتگ ءُ اے ارش ءَ پنجاہ ءُ دو درگاہ روکیں مردمانی بیرانی بیتگ اَت.

شپیک مینگل نی یک زورمندین کوشکارے جوڑ بیتگ ءُ اگاں ایشی ءَ گیش چارینگی رس اِت گڑا دائش ءِ مھکمی ءِ ھمراھی ءَ دمگ ءَ وت یک نیکراھی ناشریں مردمے ءِ رنگ ءَ دیم ءَ کیت.

نوکتریں

پھرہ ءَ یک دکانے ءِ سر ءَ ناشناساں تیرگواری کرتگ ءُ یک مردمے کُشتگ

دی بلوچستان پوسٹ سر بیتگیں ھالانی رد ءَ روکپتی بلوچستان ءِ دمگ پھرہ "ایرانشھر " ناشناسیں مردماں...

بی ایس او ءِ بندری سیاسی مول ءُ مراد گھگیری اِنت – بشیر زیب بلوچ

بلوچستان ءَ راجداری ءِ بنکی تالان کنگ ءِ کرد ءِ پیلو کنوکیں نودربر گل بلوچ اسٹوڈنٹس آرگنائزیشن ءِ بنھِشت ءَ مروچی...

کیچ زامران ءَ پاکستانی پوج ءِ سرا اُرش، اُرش ءِ زمّہ واری یو بی اے ءَ منّ اِتگ –

گونجتو ءَ پاکستانی پوج ءِ کارمند تراک ناکیں شوروانی نشانگ کُتگ - مزار بلوچ دی بلوچستان پوسٹ

سبی ءَ پاکستانی پوج ءَ یک مردمے آوار جنگ ءَ پد بیگواہ کرتگ

دی بلوچستان پوسٹ سر بیتگیں ھالانی رد ءَ بلوچستان ءِ دمگ سبی ءَ پاکستانی پوج ءَ چلّا...