TBP Balochi

بلوچستان ءِ جتاجتائیں دمگاں چار مردم یل بیتگ انت ءُ دگہ چار آوار جنگ ءَ پد بیگواہ کنگ بیتگ انت-

گیشیں ھالانی رِد ءَ گوستگیں شپ ءَ بلوچستان ءِ بُنجاھی شھر شال ءَ کلی قمبرانی لوگ دیم ءَ میر شیھک قمبرانی نامیں ورنایے پاکستانی پوج ءَ زورانسری دزگیر کتگ ءُ وتی ھمراھی ءَ برتگ-

آئی ءِ زورانسری پدری کنان ءَ سیاداں گوشتگ کہ میر شیھک قمبرانی یک کودکیں ، وانندھیں ، یک مھر کنوکیں ورنایے-

کھول ءَ لوٹ کتگ کہ پاکستانی پوج ءَ آئی ءِ زوت یل کنگ ءِ لوٹ کتگ-

ھمے وڑ شال ءَ سریاب دمگ ءَ برجاہ زھری ھاؤس چہ ھم شپ ءِ وھد ءَ پاکستانی پوج ءَ صالح محمد ء محمد بخش آوار جتگ ءُ ناشناسیں جاھے ءَ برتگ انگت بیگواہ ءَ اِنت-

ھمے وڑ سی اکتوبر 2025 ءَ سوراب ءِ دمگ گدر ءِ بازار ءَ پاکستانی پوج ءَ وحید احمد ء ھزور بخش جھمنند شیر علی گدر سوراب آوار جتگ ءُ بیگواہ کتگ –

ھمے وڑ دو نومبر 2025 ءَ ڈیرہ گازی ھان ءَ شاہ سکندر دگ ءَ سی ٹی ڈی ءَ محمد اشرف ء محمد دین جھمنند ڈیرہ گازی آوار جتگ ءُ بیگواہ کتگ-

دومی نیمگ ءَ چار آوار جنگ بیتگیں مردم یل کنگ بیتگ اَنت –

یل کنگ بیتگیں مردمانی تہ ءَ نوزدہ اکتوبر 2025 ءَ چہ پنجگور ءَ آوار جنگ بیتگیں پرزاد ء حاجی ازیم، بیست چار ستمبر 2025 ءَ چہ پنجگور ءَ آوار جنگ بیتگیں شھسوار ء اسماعیل، دہ اکتوبر 2025 ءَ تمپ ءَ آوار جنگ بیتگیں محمد حاصل ء خدابندگ ءُ عبدالستار ء مراد شاہ ھوار اَنت-

بلوچستان ءِ جتاجتائیں دمگاں پاکستانی پوج ءُ کیمرہ ٹاور سر ءَ بیتگیں اُرشانی زمہ واری دو جتاجتائیں گل بلوچ لبریشن آرمی ءُ بلوچستان لبریشن فرنٹ ءَ زرتگ اَنت-

بلوچ لبریشن آرمی جارکش ءَ جیئند بلوچ ءَ گوشتگ کہ مروچی شال شھر بروری دگ سر ءَ زورگریں پاکستانی پوج ءِ کارندہ ھما وھد ءَ گرنیڈ لانچر ءَ چہ نشانگ کتگ وھدے آ وتی پوسٹ نزیک ءَ ناکہ بندی ءَ دلگوش بیتگ اَنت- تراکانی آسر ءَ زورگریں پوج ءِ پنچ کارندہ ٹپی بیتگ اَنت-

جارکش ءَ گوشتگ مئے سرمچاراں ھاران ءِ دمگ برشونکی ءَ زورگریں پاکستانی پوج ءِ یک ٹرک گاڑی یے ریموٹ کنٹرول آئی ای ڈی سر ءَ نشانگ کتگ- تراک ءِ آسر ءَ دو کارمند مرتگ ءُ چار ٹپی بیتگ اَنت-

جارکش ءَ گوشتگ سرمچارانی اُرش ءَ پد پروش وارتگیں زورگریں پوج ءَ لَس آبادیانی سر ءَ مزنیں سلاھاں چہ تیرگواری کتگ ءُ لوگ نشانگ کتگ اَنت-

جارکش ءَ گوشتگ بلوچ لبریشن آرمی ءِ سرمچاراں 30 اکتوبر ءَ گیشکور، سامی ءَ زورگریں پاکستانی پوج ءِ نیمگ ءَ جتگیں چاریگی کیمرہ ءُ ھال اھوال ٹاور اُرش ءِ نشانگ کتگ تباہ کتگ-

بلوچستان لبریشن فرنٹءِ جارکش میجر گْوھرام بلوچ ءَ وتی شنگ کتگیں درشانے ءَ گوشتگ کہ بی ایل ایف ءِ سرمچاراں 3 نومبر 2025 ءِ بیگاہ ءَ جھاؤ ءَ زورگریں پاکستانی پوج ءِ سے گاڑیانی کاروانے ءِ سر ءَ سنگر گپتگ گوں ٹوھیں سلاھاں اُرش کرتگ۔ اُرش ءَ پوج ءِ یازدہ کارندہ مرتگ ءُ کیپٹن ارتضیٰ ءَ ھوار شش کارندہ سک ٹپی بیتگ اَنت۔

گْوھرام بلوچ ءَ گوشتگ کہ اُرش ھمنچو ترند بوتگ کہ لشکر ءِ کاروان ءَ ھواریں سے ئیں گاڑی تباہ بیتگ اَنت کہ پوج ءِ کارندہ وتی رکینگ ءِ موہ نہ رستگ۔ اُرش ءَ پد بی ایل ایف ءِ سرمچار پہ سلامتی وتی اوتاکاں سر بیتگ اَنت۔

جارکش ءَ گوشتگ کہ سرمچاراں جھاؤ ءِ میتگ پتکی ءَ پوج ءِ لشکر کشی ءُ زوربیگواہ کنگ بوتگیں کودکیں مزدور حمزہ بلوچ ءِ شھیدی ءِ ھال ءِ پژدر ءَ پوج ءِ واتر روکیں کاروان ءِ سر ءَ اُرش کرتگ۔اُرش ءَ پد زورگریں پوج ءَ وتی ٹپی بیتگیں کارندہ چہ برزی کمک ءَ آواران ءُ ھُزدار ءَ برتگ اَنت۔

جارکش ءَ گوشتگ کہ زورگریں پوج ءِ ابرم اِنت کہ آ وتی مرتگیں ءُ ٹپی بوتگیں کارندھانی سرجمیں ھال ءَ کدی شنگ نہ کنت دانکہ پوج ءِ آدگہ کارندہ بے توکل مہ بنت۔ پوج چہ بلوچ سرمچارانی اُرشاں سسائی نادراھیانی آماچ اِنت برزی کمک ءِ بوگ ءَ ابید وتی کارندھانی لاشانی زورگ ءَ ترس آماچ اِنت۔

میجر گْوھرام بلوچ ءَ اُرش ءِ زمہ واری من اِتگ ءُ گوشتگ کہ داں بلوچستان ءِ آجوئی ءَ بی ایل ایپ ءِ ترندیں کاروائی برجاہ بنت۔

گُڈی ءَ دوئیں گلاں بیتگیں اُرشانی زمہ واری منّ اِتگ گوشتگ کہ مئے اُرش داں بلوچستان وتواجھی ءَ داں برجاہ بنت-

بلوچستان ءِ دمگ آواران ءَ بوتگیں اُرش ءَ پاکستان آرمی ءَ جانی تاوان بوتگ ءُ اے اُرش ءَ یک افسرے ءَ ھوار سئے کارندہ ٹپیگ بوتگ اَنت۔

گوستگیں روچ ءَ جھاؤ ءِ پتکی ءِ دمگ ءَ سلاہ بندیں مردماں پاکستانی لشکر ءِ کاروان ءِ سر بستگ ءُ اُرش کتگ۔ دمگی مردمانی رد ءَ فوجی کاروان ھما وھد ءَ نشانگ جوڑ کنگ بوتگ کہ آ آپریشن ءَ پد واتر بوھگ ءَ بوتگ۔

مردماں گیش گْوشتگ کہ اے اُرش بازیں وھدے ءَ برجاہ بوتگ کہ ایشی ءِ تہ ءَ لشکر ءِ گاڑیاں ھم تاوان بوتگ اَنت۔

دمگی مردماں دی بلوچستان پوسٹ ءَ گوں تران کنان ءَ گْوشتگ کہ اے اُرش ءَ آرمی کیپٹن ارتضیٰ ءُ دو دگہ کارندہ ٹپیگ بوتگ اَنت ءُ آ سی ایم ایچ خضدار ءَ سر کنگ بوتگ اَنت۔

واکداراں انگت ءَ اے اُرش ءَ بیران بوتگیں کارندھانی بابت ءَ ھچ وڑیں ھال ءُ اھوال نہ داتگ۔

اے دمگ ءَ بلوچ سلاھ بندیں آجوئی گل پرکار اَنت بلے انگت ءَ کس ءَ اے اُرش ءِ زمہ واری نہ گپتگ۔

ھمے وڑ ءَ کچھیطءِ ھند کھٹن ءَ سلاہ بندیں مردماں پولیس تھانہ ءِ سر ءَ اُرش کتگ –

دمگی مردمانی اُرشکار گوں نوکیں سلاھاں بندوک بیتگ انت ءُ آیاں تھانہ ءِ سرکاری سلاہ دستیگ کتگ انت- ءُ ریکارڈ ءُ دگہ ساز ءُ سامان آس داتگ انت-

بلوچستان ءِ جتاجتائیں دمگ زورانسری آوار جنی ءُ بیگواھیں مردمانی لاشانی دور دیگ دْرچ یکشل ءَ برجاہ ءَ اِنت وھدے کہ یک بیگواھیں مردمے آجو بوتگ-

بلوچستان ءِ دمگ چہ پسنی ءَ ھال سر بیتگ کہ گوستگیں شپ ءَ پاکستانی پوج ءَ چیک پوسٹ ءَ چہ پسنی ءِ وارڈ نمبر یک ءِ جھمنند آصف حاصل آوار جتگ ءُ ناشناسیں جاھے ءَ برتگ-

زورانسری بیگواہ کنگ بیتگیں کھول ءِ رِد ءَ گوستگیں شپ ءَ کساس ساھت یک ءَ پاکستانی پوج ءَ مئے لوگانی سر ءَ بیڑبرتگ، لوگانی پٹ ءُ پول کتگ کھول لَٹ ءُ کُٹانی نشانگ کتگ-

آیانی رِد ءَ بیڑ وھد ءَ پوج ءَ آصف حاصل ءِ درگت ءَ جُست پُرس کنگ ءَ بیتگ اَنت، بلے آ اے وھد ءَ لوگ ءَ ساڑی نہ بیتگ اَنت ھمے شپ ھپت ءَ پاکستانی پوج ءُ سی ٹی ڈی کارندھاں آصف پسنی چیک پوسٹ ءَ چہ آوار جتگ ءُ وتی ھمراھی ءَ برتگ-

کھول ءِ رِد ءَ بیڑوھد ءَ پاکستانی پوج ءِ کارندھاں زورانسری لوگ ءَ پُترتگ اَنت سرجمی ءَ پٹ ءُ پول کتگ موباھل پچ گپتگ اَنت، آیاں آصف حاصل ءِ درگت ءَ جُست ءُ پُرس ھم کتگ-

کھول ءَ دیمتر ءَ گوشتگ کہ پسنی چیک پوسٹ ءَ چہ آوار جنگ ءَ پد آصف حاصل ناشیاسیں جاھے ءَ برتگ کہ آئی ءِ درگت ءَ ھچ وڑیں ھال نیست-

کھول ءِ گوشگ اِنت کہ آیاں آصف حاصل ءِ زند ءُ سلامتی ءِ درگت ءَ سک تُرس اِیت، آیاں زوت یل کنائینگ ءِ لوٹ کتگ-

ھمے وڑ کیچ ءِ بُنجاھی شھر تربت ءَ پاکستانی پوج ءَ بیربرتگ ءُ سے مردم آوار جنگ ءَ پد بیگواہ کتگ اَنت

آوار جنگ بیتگیں مردمانی پجّار یاسر بلوچ ء الاھی بخش، ظریف بلوچ ء مولابخش ءُ وحید احمد ء مولابخش اِنت کہ پاکستانی پوج ءَ 30 ءُ 31 اکتوبر ءِ میانی شپ ءَ تربت ءِ دمگ ھمن ءَ بیڑ برتگ ءُ سے ئیں مردم آوار جتگ اَنت۔

انچش کیچ ءِ بُنجاھی شھر تربت ءَ پاکستانی پوج ءِ دست ءَ آوار جنگ بوتگیں ورنایے آجو بوتگ-

ھالانی رِد ءَ بیست یک اکتوبر 2025 ءچیریں ادارھانی دست ءَ تربت ءِ ھند چہ آپسر بلوچی بازار ءَ آوار جنگ بوتگیں بالاچ ءِ دلوش ، دو شمبے ءِ روچ ءَ لیویز ءَ کھول ءِ دست ءَ داتگ –

دومی نیمگ ءَ ڈیتھ اسکواڈ کارندھانی دست ءَ آوار جنگ ءَ پد زورانسری بیگواہ کنگ بیتگیں ورنایے لاش دزکپتگ-

گیشیں ھالانی رِد ءَ بلوچستان ءِ دمگ آواران ءِ ھند چہ جھاؤ ءَ انتزامیہ ءَ یک مردمے ءِ لاش دزکپتگ، انتزامیہ ءَ لاش چست کتگ نادُراھجاہ ءَ برتگ اود ءَ آئی ءِ پجّار حمزہ ء نورجان نام ءَ چہ بوتگ-

اِھوالکار ءِ رِد ءَ حمزہ ء نور جان پنچ روچ ءَ ساری بلوچستان ءِ دمگ ھُزدار ءِ ھند اورناچ ءَ سرکاری پلامرزی ڈیتھ اسکواڈ کارندھاں آوار جتگ ءُ پاکستانی پوج ءِ دست ءَ داتگ-

حمزہ ء نور جان لاش مروچی چہ جھاؤ ءَ دزکپتگ-

زانگ بہ بیت گوستگیں روچ ءَ کیچ ءِ دمگ بلیدہ ءَ ھم چار مردمانی لاش دزکپتگ اَت کہ آ پکنک ءَ شتگ اَنت واتر نہ بیتگ اَنت ءُ چریشی ءَ پد آیانی لاش دزکپتگ اَنت-

بلوچستان ءِ دمگ کیچ دشت ءِ جھمنندیں دو مردم چہ گوادر ءُ کراچی ءَ پاکستانی پوج ءَ آوار جتگ ءُ بیگواہ کتگ انت-

اھوالانی رد ءَ متحدہ امارات ءَ آیوکیں امجد ء غلام محمد جھمنند دشت زریں بگ کراچی بالی پٹ ءَ ایر کپگ ءَ پد بیگواہ کنگ بیتگ-

دمگی مردمانی رد ءَ امجد بازیں وھدے بیت کہ آ متحدہ عرب امارات ءَ پہ روزگار ءَ شتگ بیتگ کہ انی واتر موکلانی واستا کراچی ءِ بالی پٹ ءَ پاکستانی چیریں ادارھاں آوار جتگ ءُ بیگواہ کتگ-

ھمے وڑ چہ گوادر ءَ ھکیم ء شریف جھمنند دشت زریں بگ یک ھپتگے ءَ پیش پاکستانی پوج ءُ چیریں ادارھاں آوار جنگ ءَ پد بیگواہ کتگ-

ھردوکانی آوار جنگ ءَ پد دوئیں مردم بیگواہ انت ءُ آیانی بارو ءَ دگہ اھوال دیم ءَ نیتکگ انت-

دمگی مردمانی رد ءَ ھکیم ءِ پد شریف سال دو ھزار ءُ پانزدہ ءَ آئی ءِ پت شریف آوار جنگ بیتگ ءُ پد ءَ چار سال ءِ بیگواہ کنگ ءَ پد یل کنگ بیتگ ءُ انی آئی ءِ زھگ ھکیم آوار جنگ ءُ بیگواہ کنگ بیتگ-

کیچ ءِ دمگ مند ءِ ھند اپسار کور ءَ گوستگیں شپ ءَ دست کپتگیں لاش ءِ پجار اسماعیل ء نزیر جھمنند کھنک ءِ نام ءَ بوتگ۔

پولیس ءِ رد ءَ گوستگیں شپ ءَ جلال آباد ءُ تلمن ءِ نیام ءَ جاہ منندیں آپسار کوت ءَ دمگی مردماں لاشے دست کپتگ۔

ھال ءِ رسگ ءَ پد پولیس جاہ ءَ سر بوتگ ءُ دمگی مردمانی کمک ءَ لاش چِست کتگ ءُ المی ئیں کارروائی ءَ پد وارسانی دست ءَ داتگ۔

دمگی مردمانی گشگ انت کہ اسماعیل ءَ نزیک ءَ بیست روچ پیسر ناشناسیں سلاہ بندیں مردماں بودیگ ڈیم ءِ نزیک ءَ آوار جتگ۔ آئی ءِ تیر ءِ آماچیں لاش گوستگیں شپ ءَ چہ اپسار کور ءَ دست کپتگ۔

ویل ءِ سبب زانگ نہ بیتگ کہ چونیں مردماں آوار جتگ ءُ برتگ-

دومی نیمگ ءَ کیچ ءِ بنجاھی شھر تربت آپسر کوہ مراد ءِ نزیک ءَ ناشناسیں مردمانی تیرگواری ءَ سعید اھمد ء سوالی زدگ بیتگ-

پولیس ءِ رد ءَ سعید اھمد وتی پرپٹ ءِ ھواری ءَ آپسر ءَ آیگ ءَ بیتگ کہ کوہ مراد ءِ نزیک ءَ تیرگواری ءِ نشانگ کنگ بیتگ- ءُ تیر آئی ءِ لاپ ءُ پاد ءَ لگ اتگ انت بلے آ مَرگ ءَ رک اتگ –

یک شمبے ءُ دوشمبے ءِ میانی شپ ءَ اوگانستان ءِ گوریچانی اُستان بلخ ءِ بنجاھی شھر مزار شریف ءِ نزیک ءَ زمین چنڈ بوتگ۔ واکدارانی رد ءَ اے زمین چنڈ ءَ کم چہ کم 8 مردم بیران بوتگ انت۔

امریکہ ءِ جیولوجیکل سروے ءِ رد ءَ اے زمین چنڈ ءِ زور 6.3 بوتگ ءُ ایشی ءِ تہ ءَ 28 کلومیٹر (17 میل) ءِ تہ ءَ بوتگ۔ ادارہ ءَ گشتگ کہ زمین چنڈ ءِ آسر ءَ مزنیں کساسے ءَ مردمانی بیرانی ءُ تباھی ءِ گمان ھست انت۔

مھکمہ جان سلامتی ءِ جارکش ءَ بی بی سی ءَ گوں تران کنان ءَ گشتگ کہ اے زمین چنڈ ءَ 180 مردم ھم ٹپی بوتگ انت۔ بلخ اُستان ءِ طالبان ءِ جارکش ءَ سوشل نیٹ ورک ءِ ویب سائٹ ایکس ءَ وتی بیان ءَ گشتگ کہ شولگرہ ءَ زمین چنڈ ءَ چہ چار مردم بیران ءُ بازیں مردمے ٹپیگ بوتگ انت۔

پیشتر ءَ حاجی زید ءَ وتی بیان ءَ گْوشتگ کہ آئی ءَ را “چہ استان ءِ درستیں دمگاں کمے ٹپی ءُ برزی تاوان ءِ ھال رس اِتگ۔”

آئی ءَ گْوشتگ کہ گیشتریں ٹپی چہ بُرزیں ماڑیانی کپگ ءَ بوتگ اَنت۔

کساس پنچ لکھ مردم مزار شریف ءَ آباد انت -میان استمانی ھالجاہ اے ایف پی ءِ رد ءَ شھر ءِ بازیں نندوکیں مردم چہ زمین چنڈ ءَ پد کوچگاں دراتکگ انت پرچا کہ آہاں وتی لوگانی کپگ ءِ ترس بوتگ۔

بلخ ءِ طالبان ءِ جارکش ءَ ھم ایکس ءِ سر ءَ ویڈیو شنگ کتگ کہ آئی ءِ تہ ءَ مزار شریف ءِ راجدپتری نیلیں مسیت ءِ دیوال زمین ءِ سر ءَ کپگ ءَ گندگ بیت انت-

کابل ءِ پولیس ءِ جارکش خالد زدران ءَ ایکس ءِ سر ءَ نبشتگ کہ پولیس ءِ ٹیم “اے جاوراں گوں نزیکی ءَ چارگ ءَ اَنت۔” ترجمان ءِ رد ءَ مزار شریف ءِ نزیک ءَ استان سمنگان ءَ چہ بازیں مردمانی بیرانی ءِ ھال ھم رس اتگ انت۔

ایشی ءَ چہ پیسر اگست ءِ گڈسر ءَ اوگانستان ءِ رودراتکی دمگاں 6.0 ءِ زمین چنڈ بوتگ کہ ایشی ءِ تہ ءَ ھزار ءَ چہ گیش مردم بیران بوتگ اَنت۔

بلوچستان لبریشن فرنٹ ءَ شنگ کتگیں درشان ءِ تہ ءَ گوشتگ کہ مئے سرمچاراں یک نومبر ءِ سُھب ءَ کساس ھشت ءِ نزیک ءَ اورماڑہ ءِ ھند کواری شھدگ سر ءَ زورگریں پاکستانی پوج ءِ کاروان ءَ ھوار یک گاڑی یے آئی ای ڈی بمب تراک ءِ نشانگ کتگ اَنت- اُرش ءِ آسر ءَ گاڑی سرجم ءَ تباہ بیتگ، وھدے کہ اشی ءَ سوار چار کارندہ جاہ پہ جاھی مرتگ اَنت ءُ آ دگہ ٹپی بیتگ اَنت- کاروان ءِ آ دگہ گاڑی وتی ھمراھیں کارندھانی رکینگ جاہ وت وئیلجاہ ءَ چہ تتکگ اَنت-

جارکش ءَ گوشتگ کاروائی ءِ سرجم کنگ ءَ پد سرمچار پہ سلامتی وتی مُھریں اوتاکاں واتر سر بیگ ءَ سوبمند بیتگ اَنت-

جارکش ءَ گوشتگ دگہ یک کاروائی یے بلوچستان لبریشن فرنٹ ءِ سرمچاراں سی یک اکتوبر ءَ کوھلو ءِ دمگ لاسئے زئی ءِ نزیک ءَ ببر تاک ھند سر ءَ یک بند ساچی شرکت سر ءَ اُرش کتگ- سرمچاراں اود ءَ ساڑی لیویز کارندہ کڈن کتگ اَنت کہ آ وت ءَ گستا بدار اَنت- بلے لیویز کارندھاں ھال دیگ ءَ اَبید سرمچارانی سر ءَ اُرش کتگ کہ چریشی ءِ پسّہ ءَ یک لیویز کارندھے جاہ پہ جاھی مرتگ ءُ دو ٹپی بیتگ اَنت-

جارکش ءَ گوشتگ بلوچستان لبریشن فرنٹ اورماڑہ ءَ زورگریں پاکستانی پوج ءُ کوھلو ءَ بند ساچی شرکت سر ءَ اُرشاں چار پوجی کارندھاں ھوار یک لیویز کارندھے کوش زمہ واری ءَ منّ اِیت-

بلوچستان ءِ جتاجتائیں دمگاں زوراکی یکشل ءَ برجاہ ءَ اِنت یک نیمگے ورنا تیرانی آماچ کنگ بیگ ءَ اَنت دومی نیمگ ءَ ورنایانی لاش دور دیگ بیگ ءَ اَنت-

گیشیں ھالانی رِد ءَ بلوچستان ءِ دمگ چہ بلیدہ جاڑین ءَ چار ورنایانی لاش دزکپتگ اَنت -بیران بیتگیں ورنایانی پجّار ذاکر ء عبداللہ، رزاق ء عبداللہ، صادق ءُ پیرجان نام ءَ چہ بیتگ اَنت-

دمگی اِھوالکار ءِ رِد ءَ سے ورنا زِردان کوچہ بلیدہ ءِ جھمنند بیتگ اَنت، وھدے کہ یک ورنایے ءِ سیادی بٹ کور پُشت جاڑین بازار ءَ گوشگ بیگ ءَ اَنت-

دمگ مردمانی رِد ءَ اے ورنا کساس یک ھپتگے ءَ ساری پکنک ءَ شتگ اَنت ءُ ھما روچ ءَ چہ آیانی موباھل بند بیتگ اَنت-

اشانی کھول ءَ رسانکدر ءَ چہ بازیں رند ءَ راج ءَ چہ کُمک ءِ لوٹ کتگ- بلے مروچی ھال سر بیتگ کہ چاریں سنگتانی لاش جاڑین ءِ کوہ ءَ دزکپتگ اَنت، ءُ سک ھراب بیتگ اَنت-

اِھوالکار ءِ رِد ءَ ھمے ورنایانی موٹر سائیکل ھم ماندارگ بیتگ اَنت- وئیل ءِ ھال سر بیگ ءَ کھول ءُ دمگی مردم لاشانی دزگرگ ءَ کوھی دمگ ءَ شتگ اَنت-

زانگ بہ بیت بلوچستان ءَ یک دراجیں مدتے بیت کہ لاشانی دور دیگ ءِ دْرچ برجاہ ءَ اِنت بلوچ آجوئی لوٹوکیں سیاسی گل ءُ انسانی ھکانی ادارہ ءَ پاکستانی پوج ءُ آئی ءِ داشتگیں کُشندہ ٹولی کارندھانی سر ءَ بھتام جنگ ءُ آیگ ءَ اَنت –

جیوز گوادر ءِ ھَمُک ماھی زانشی ءُ لبزانکی مَراگِش نومبر ءِ اولی رمس ءَ ماں جیوز کارگِس ءَ بَرجم دارگ بوتگ ۔ مراگِش ءِ گچینی مِھمان بلوچی زبان ءِ ورنائیں گشندہ ءُ ترز نگار سمیر رحیم بوتگ ۔ مراگش ءِ پاگواجہ کے بی فراق بوتگ ءُ جارچینی ءِ ڈُبہ عارف نور ءَ گون بوتگ ۔ اے مَراگِش ءَ آیوکیں نِبشتہ کار ءُ شائراں وتی رِدانک ءُ لَچہ دیوان ءَ نَدر کتگ انت ۔ ھمے دابءَ اے برنامہ ردانک، لچہ ءُ گشتانک ءُ وش گٹی ءِ دروشم ءَ وتی مانا اش سھرا ءُ درانگاز کُتگ انت ۔

مراگش ءَ نبشتانک طاہر تاج ءَ ونتگ ءُ آزمانک جے ایم آزات ءَ ءُ چندے دلدوستیں شائراں وتی لچہ دستونک ءُ رجانک ساڑی ایں اشکنوکانی ندر کتگ انت۔

مراگش ءَ مراد بخش مہر ءِ باروا ھالترانی بیتگ ات ءُ آ یات کنگ بوتگ ۔ پرچاکہ ھمے روچءَ اے کارست چہ ما جتا بوتگ ءُ اے امروز یل کتگ ۔

مراگش ءَ ڈاکٹر عبدالعزیز بلوچ ءِ درگت ءَ جارے پرینگ بوتگ کہ باند ءَ پریس کلب ءَ واجہ ءِ درگت ءَ یاتگیری مراگش ءِ چہ وتی جندے پاٹی ءِ نیمگءَ برجم دارگ بوگ انت ءُ پدا چہ جیوز ءِ چیردستی ءَ ڈاکٹر یاتگیری مراگش ھم برجم دارگ بیت۔

مراگش ءَ شائری بھر ءَ اسلم جگنو ، عبداللہ یاسین، واھگ ودار ، صدام الطاف، طاہر ہاشمی، سخی داد، وسیم وارث، شوہاز شمس، سیف قیس، اکبر خیال، شاہ بخش شاہ، ندیم نایاب، انس آرزو، زبیر مراد ءَ وتی شئر درانگاز کتگ انت۔

مراگش ءَ گچینی مھمان ءَ جیوز ءِ زانشی، لبزانکی ءُ دودمانی کارانی ستاہ کتگ ءُ ساڑاتگ ءُ وتی سیالی اش ھمک وھد ءِ ھاترا سھرا کتگ انت۔ ھمے ڈول پاگواجہ ءِ دوئیں دانکاں ءُ چہ ایشیءَ پد جارچین عارف نور ءِ ھمے لبزانی پدا کہ اے برنامہ برجاہ اِنت کہ اے برنامہ آنی سرشونی چیدگ مہر اِنت کہ ابدمان اِنت مراگش آسر کتگ ۔