TBP Balochi

بلوچستان لبریشن فرنٹ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ بی ایل ایف ءِ سرمچاراں دہ نومبر 2025 بیگاہ ءَ کساس شش ءَ کیچ ءِ دمگ کیساک ءَ برجاہ پولیس ءِ دو کارگسانی سر ءَ اُرش کتگ ءُ کارندہ دزگیر کتگ اَنت- بنداتی پٹ ءُ پول ءَ پد پولیس کارندہ ھچ وڑیں تاوان دیگ ءَ بید یل داتگ اَنت، وھدے کہ دوئیں کارگسانی سرکاری ماڑی مانداشتگ اَنت ءُ اود ءَ سرکاری سلاہ وتی دستیگ کتگ اَنت-

جارکش ءَ دیمتر ءَ گوشتگ کہ سرمچاراں کساس ساھت ءَ تاں سی پیک شھدگ پہ روگ آیگ ءِ واستا بند کتگ ءُ آؤکیں ءُ رؤکیں گاڑیانی پٹ ءُ پول کتگ، بلے اے میان ءَ زورگریں پوج یا کہ چیریں ادارھانی کارندہ یا کہ دمگی چاریگ نہ بیتگ- پٹ ءُ پول ءِ سرجم کنگ ءَ پد شھدگ پچ کتگ ءُ مساپر روگ ءِ موکل داتگ اَنت-

جارکش ءَ گوشتگ کہ بلوچستان لبریشن فرنٹ کیساک ءَ پولیس تھانہ ءُ سرکاری ماڑیانی ماندارگ ءُ سی پیک شھدگ نیم ساھت ءَ تاں بند کنگ گاڑیانی پٹ ءُ پول کنگ ءِ زمہ واری ءَ منّ اِیت-

بلوچستان ءَ چہ گوستگیں روچ پبلک ٹرانسپورٹ بند کنگ ءَ پد بازیں شھراں تھریٹ الرٹ بندش جنگ بیتگ ، وھدیکہ موبائل انٹرنیٹ ءِ بند کنگ ءِ نوٹیفکیشن ھم شنگ کنگ بیتگ ۔

بلوچستان ءِ 36 دمگاں 10 نومبر ءَ بگر داں 16 نومبر 2025 ءَ تھری جی ءُ فور جی موبائل انٹرنیٹ سروسز ءِ بند کنگ ءِ نوٹیفکیشن شنگ کنگ بوتگ۔

دمگانی تہ ءَ شال، گوادر، چمن، خضدار، تربت، کلات، لسبیلہ، مستونگ، نصیر آباد، سبی، ژوب، ہرنائی، پنجگور، کیچ، کچھی، سوراب، کوہلو، دکی، قلعہ سیف اللہ، پشین، قلعہ عبداللہ، بارکھان، آواران ، جعفر آباد، موسیٰ خیل، ھاران، زیارت،دالبندین، نوشکی، اوستہ محمد، واشک، بولان، جھل مگسی، حب ءُ ڈیرہ بگٹی ھوار انت۔

انٹرنیٹ سروس ءِ بند کنگ ءَ چہ لس مھلوک، نودربر، تاجر ءُ رسانکدر ءِ ادارگ سک باز تاوان دیگ بوگ ءَ اَنت ءُ شھری دمگاں اے کار ءَ را زانتکاری ءِ رسگ ءِ سر ءَ بندش لیک اِتگ۔

ھمے وڑ خضدار ءِ تحصیل نال ءَ سیکورٹی ءِ جیڑھانی سبب ءَ بینک بند کنگ بوتگ انت۔

ڈیرہ بگٹی ءِ دمگی انتزامیہ ءَ تھریٹ الرٹ شنگ کتگ کہ بلوچ ریپبلکن آرمی ءُ بلوچستان لبریشن فرنٹ ءِ نیمگ ءَ یکجائی ءَ اُرش کنگ ءِ ترس ھست انت۔

ایشانی رد ءَ بی آر اے ءِ مزنیں کمانڈراں ھاسیں دیوان ءِ تہ پیسلہ کتگ کہ بی ایل ایف ءِ ھمکوپگی ءَ ڈیرہ بگٹی ضلع ءَ سئے یکجائی کیمپ جوڑ کنگ بنت۔

ایشی ءَ ابید بی ایل ایف ءِ نیمگ ءَ بی آر اے ءَ سلاہ ءُ گولہ بارود دیگ ءِ ٹاہ ھم بوتگ۔

دھمکی ءِ الرٹ ءَ پد سرجمیں دمگ ءَ چیکنگ ءُ سیکورٹی ءَ را گیش ءُ گیوار کنگ بوتگ ءُ پترگی ءُ درآیگی راھانی سر ءَ سکیں نگرانی بندات کنگ بوتگ۔

اسلام آباد ءَ جی الیون کچھری ءِ نزیک ءَ وت کُش تراک ءَ 5 مردم بیران ءُ 21 ٹپیگ بوتگ انت ۔

بنشون ءِ رد ءَ تراک ءِ جاگہ ​​ءَ وتکش اُرشکار ءِ سر ھم دست کپتگ ۔

بنشون ءِ رد ءَ کچھری ءِ نزیک ءَ گاڑی یے ءِ تہ ءَ تراک ءَ کہ ایشی ءِ توار دور ءُ دراج ءَ گوشدارگ بوتگ۔ تراک ءَ چہ پارکنگ ءِ جاہ ءَ آس بوتگ ءُ نزیکیں گاڑی ھم آس ءَ گپتگ اَنت۔

بنشون ءِ رد ءَ تراک ءِ آسر ءَ 12 مردم ٹپیگ بوتگ اَنت کہ آیانی تہ ءَ وکیل ءُ سائلین ھم ھوار اَنت۔

پولیس ءِ واکدار ءِ گشگ ءَ انت کہ تراک ءِ درگت ءَ تپاسی بوگ ءَ انت۔ تراک ءَ پد پولیس ءُ ریسکیو کارندہ کچھری ءَ سر بوتگ انت ۔

بلوچستان ٹرانسپورٹ اتھارٹی ءَ سرجمیں دمگی ٹرانسپورٹ اتھارٹیاں پرمان داتگ کہ آ 12 ءَ بگر داں 14 نومبر 2025 ءَ سرجمیں بلوچستان ءَ سرجمیں ٹرانسپورٹ بس سروسز ءَ را مھتل بہ کن اَنت۔

اتھارٹی ءِ نیمگ ءَ چہ شنگ بوتگیں نوٹیفکیشن ءِ رد ءَ اے پیسلہ محکمہ داخلہ ءُ محکمہ ٹرانسپورٹ ءِ نیمگ ءَ چہ رس اتگیں ھالرسانی کنگ بوتگ۔

نوٹیفکیشن ءِ تہ ءَ گْوشگ بیتگ کہ اے گامگیج اُستان ءں امن ءُ ایمنی ءِ جاور ھال ءِ رد ءَ چست کنگ بوھگ ءَ اِنت۔

اُستان ءِ ٹرانسپورٹ اتھارٹی ءِ کلیں سیکرٹری ءُ سیادی داروکیں سروکاں کڈن کےگ کہ آ بُرزتر ءِ پرماناں سرجمیں رنگ ءَ امل کنگ ءَ دلستکی بہ کن اَنت۔ دیمتر ءَ گْوشگ بوتگ کہ اے جیڑھ ءَ را ”کڈنی“ ءُ ”گچینی“ لیکگ بہ بیت۔

مردمانی رد ءَ سرکار ءِ نیمگ ءَ اے گامگیج 13نومبر ءَ بلوچستان شھیدانی روچ ءِ درگت ءَ سلاہ بندیں گلانی اُرشانی رد ءَ چست کنگ بوتگ اَنت ۔

زانگ بہ بیت پیش ءَ ھم باز رند ءَ پبلک ٹرانسپورٹ بلوچستان ءَ ایمنی ءِ جیڑھانی سبب ءَ بند کنگ بیتگ ۔

بلوچستان ءَ زورانسری بیگواہ کنگ بیتگیں ورنایانی لاشانی دور دیگ دْرچ یکشل ءَ برجاہ ءَ اِنت-

گیشیں ھالانی رِد ءَ بلوچستان ءِ دمگ کیچ ءِ تھسیل تُربت ءِ دمگ چہ گنہ ءَ زورانسری بیگواھیں ورنایانی لاش دزکپتگ کہ آئی ءِ پجّار میر دوست ء عبداللہ، جھمنند کونشکلات تمپ نام ءَ چہ بیتگ-

دمگی اِھوالکار ءِ رِد ءَ میر دوست 13 فروری 2025 ءَ پاکستانی پوج ءِ پلامرزی ٹولی ڈیتھ اسکواڈ ءِ کارندھاں آوار جتگ چریشی ءَ پد آ بیگواہ بیتگ-

آئی ءِ لاش مروچی گنہ ءِ دمگ ءَ کپتگ، چمّگدانی رِد ءَ لاش سر ءَ مزنیں کچے ءَ لَٹ ءُ کُٹانی نشان بیتگ اَنت-

ھمے وڑ پنجگور ءَ ایئرپورٹ دگ نزیک ءَ امین اللہ ء جان محمد جھمنند گچک ءِ لَٹ ءُ کُٹّیں لاش دزکپتگ دمگی انتزامیہ ءَ ھسپتال ءَ سر کتگ گیش ءُ چار ءُ ٹپاس ءَ پد کھول ءِ دست ءَ داتگ-

کوش سوب زانگ نہ بیتگ-

زانگ بہ بیت کہ بلوچستان ءَ زورانسری آوار جنی ءُ لاشانی دزکپگ وئیل یکشل ءَ گیشی گندگ آیگ ءَ اِنت اود ءَ لھتے روچ ءَ بازیں دمگاں لاش دزکپتگ اَنت-

انسانی ھکانی گلاں یکرندے پد ءَ بلوچستان ءَ زورانسری آوار جنی ءُ ٹارگٹ کلنگ ءِ تہ ءَ گیشی سر ءَ دلپردی درشان اِتگ-

گلانی گوشگ اِنت کہ پٹ ءُ پول زمہ داراں جُست گرگ ءِ لوٹ کنگ ءَ ابید ءَ بلوچستان ءَ کُشت کوش زورانسری آوار جنی وئیلانی تہ ءَ کمی آیگ جاہ ءَ گیشی گندگ آیگ ءَ اِنت-

بلوچستان ءِ دمگ گوادر ءِ ھند پسنی ءَ پاکستانی پورسز ءِ بنجل سلاہ بندیں مردماں نشانگ جوڑ کتگ۔

پاکستانی لشکر ءِ سر ءَ اُرش پسنی ءِ دمگ شادی کور ءَ بوتگ کہ اود ءَ سلاہ بندیں مردماں راکٹ ءُ دگہ سلاھاں گوں پوج ءِ بنجل ءِ سر ءَ اُرش کتگ۔

اُرش ءِ وھد ءَ دمگ ءَ مزنیں تیرگواری ءُ تراکانی توار بوتگ انت ءُ ارشکاراں پشتمانداتگ ءُ شتگ انت-

واکدارانی نیمگ تنی وھدی دگہ اھوال دیم ءَ نیتکگ انت- ءُ چوشیں اُرشانی زمہ واری پیش ءَ بلوچستان ءِ آجوئی لوٹوکیں سلاہ بندیں گلاں زرتگ انت-

ھمے وڑ ءَ سبی ءَ بیتگین اُرش ءِ زمہ واری بی آر جی ءَ من اتگ-

جارکش دوستین بلوچ ءَ گوشتگ گوستگیں شپ ءَ بلوچ ریپبلکن گارڈز ءِ سرمچاراں سبی ءِ شھر ءَ ھسپتال ءِ نزیک ءَ ایف سی ءِ کینٹ ءِ سر ءَ راکٹ گواری کتگ-

آئی ءَ گوشتگ اے اُرش ءَ ایف سی ءَ جانی ءُ مالی تاوانانی دیمپانی کنگ کپتگ-

13 نومبر ءِ روچ

نبشتہ کار: گواڑخ بلوچ

دی بلوچستان پوسٹ

بلوچستان ءِ راجدپتر چہ جُھد ءُ مدامی مزنیں کربانی ءَ چہ پُر اِنت۔

اے سر زمین ءِ پرزنداں مدام وتی سرڈگار ءِ وتی پجار ءُ وتی ھک ءِ واستا کربانی ءِ مسال پیش داشتگ کہ آ راجدپتر ءِ تاکانی تہ ءَ نبیسگ بنت اے روچ ھما روچ اِنت کہ مارا ھما شھیدانی کربانیانی یات ءَ دنت کہ آیاں آجوئی ءِ واب گوں وتی ھون ءِ چراگ ءَ روک کتگ –

اے روچ ایوک ءَ راجدپتر ءِ تاکے نہ اِنت بلکیں یک وادھے نومبر مارا ھمے سبک ءَ دنت کہ راج مدام وتی شھیدانی ھونانی سر ءَ زندگ بنت –

ھما جانانی کربانی ءَ کہ پہ وتن ءَ دیگ بوتگ اَنت اے ایوک ءَ یک جوشے یک جزبگے نہ اِنت بلکیں یک کلوھے کہ راستی ءِ راہ ءَ رؤکیں مردم ھچبر مٹ کنگ نہ بنت-

بلوچستان ءِ شھیداں اے گپ منّارینتگ کہ ابید ءِ کربانی ءَ ھچ راج وتی پجار ءَ وتی ھک ءَ ءُ وتی آجوئی ءَ رکینت نہ کنت-

13 نومبر اے روچ تھنا یک روچے نہ اِنت بلکیں اے روچ بلوچ ءِ گھگیری ءِ روچ اِنت اے ھما روچ اِنت کہ میر مھراب ھان برتانیہ ءِ پوج ءِ دیم ءَ گوں کمّے سلاہ ءُ مزنیں جوزگ ءَ گوں اوشت اِیت میر مھراب ھان زانت کہ آئی ءِ کِر ءَ سلاہ برتانیہ پوج ءِ مکابلہ ءَ سک کم اَنت بلے انگت آ پد کنز نہ بیت آ گھگیری کنت ءُ برتانیہ ءِ پوج ءِ دیم ءَ چو باتیل ءِ کوہ ءَ مک بیت داں ھما ساھت ءَ کہ وتی ھمراھاں گوں شھید بیت بلے وتی زمین ءِ سود ءَ نہ جنت ءُ دری تاگت ءَ چہ وتی زمین ءَ رکّین اِیت –

ھرچ کوم ءُ ھرچ راج وتی شھیداں یات کنگ ءِ واستا یک روچے برجم دار اَنت ھمے وڑ بی ایس او آزاد 2010 ءَ اے جار ءَ ِپرّین اِیت کہ ھرچ سال 13 نومبر بلوچ شھیدانی روچ برجم دارگ بیت اِنت ھما روچ ءَ بگر داں روچ مروچی بلوچ 13 نومبر ءَ شھیدانی روچ برجم دار اَنت اے روچ ھرچ ھما شھید ءِ نام ءَ اِنت کہ آئی ءَ وتی ڈیھ ءِ رکینگ ءِ واستا وتی نگرھیں ساہ ندر کتگ بلے زمین ءِ سود ءَ نہ جتگ راجدپتر گواہ اِنت کہ بلوچ پُسگاں ھزارانی کچ ءَ وتی ساہ ندر کتگ اَنت بلے ھچبر زمین ءِ سود ءَ نہ جتگ ءُ ناں دری تاگت وتی زمین ءِ سر ءَ اوپار کتگ ھرچ وھد ءَ دری تاگت ءِ دیم ءَ چو ساجی ءِ کوہ ءَ مک بوتگ اَنت ساہ ءُ سر داتگ اَنت بلے سر جھل نہ کتگ اَنت۔

اے روچ ءِ تھنا برجم دارگ گوں شھیداں انساپ نہ اِنت بلکیں ما ھما وھد شھیداں گوں انساپ کنیں کہ ما آیانی نزریہ پکر ءُ آجوئی ھما واب کہ آیاں دیستگ آئی ءَ بہ زیر ایں ءُ منزل ءَ سر بہ کن ایں گڑا بزاں ھکیکت ما شھیداں یات کنگ ءَ ایں ءُ آیاں گوں انساپ کنگ ءَ ایں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

سرجمیں بلوچستان ءَ دفعہ 144 ءِ سر ءَ بندش آرگ بیتگ کہ ایشی ءِ تہ ءَ موٹر سائیکل ءِ ڈبل سواری، لس جاھاں دیم ءِ پوشگ، سیاھیں کانچ ءُ گیر رجسٹرڈ موٹر سائیکل ءِ کارمرز کنگ ءَ ھوار بازیں نوکیں بندش دیم ءَ آرگ بیتگ انت۔

محکمہ بلوچستان ءِ نیمگ ءَ شمبے ءِ روچ ءَ شنگ بوتگیں نوٹیفکیشن ءِ تہ ءَ گوشتگ کہ اے بندش امن ءُ ایمنی ءِ برجائی ءِ واستا ایر کنگ بوتگ اَنت۔

محکمہ داخلہ بلوچستان ءَ اے نوکیں بندش 5 نومبر 2025 ءِ نوٹیفکیشن ءَ کمے ایر کنان ءَ گوشتگ اے تاں 30 نومبر ءَ برجاہ بیت انت۔

ایشی ءَ چہ پیسر 5 نومبر ءِ نوٹیفکیشن ءَ ایوک ءَ مچی ءُ سلاھانی پیشدارگ ءِ سر ءَ بندش جتگ ات-

اڑ داتگیں نوٹیفکیشن ءِ تہ ءَ گشگ بوتگ کہ ‘سرجمیں بلوچستان ءَ سلاھانی پیشدارگ ءُ کارمرز کنگ، موٹر سائیکل ءِ سر ءَ ڈبل سواری ءِ سر ءَ سرجمیں پابندی جنگ بیت، البت زالبول ءُ زھگ چہ ایشی ءَ جتا کنگ بنت۔’

‘گاڑیانی سیاھیں شیشگ، گیر رجسٹرڈ موٹر سائیکل ءُ مچی، دھرنا یا پنچ یا گیش مردمانی جلسہ ءِ سر ءَ ھم سرجمیں پابندی جنگ بیت۔’

اے پرمان ءِ رد ءَ لس جاھاں دیم ءِ پوشگ ءِ سر ءَ ھم بندش جنگ بوتگ ھاسیں رنگ ءَ مفلر، ماسک یا دگہ ھرچ وڑیں دروشمے ءِ کارمرد کنگ ءِ سر ءَ کہ پجار ءِ تہ ءَ رکاوٹ جوڑ بہ بنت۔ ایشی ءَ ابید بلوچستان ءَ سلفیورک ایسڈ ءُ تراکناکیں چیزانی برگ ءُ بار کنگ ءِ سر ءَ ھم سرجمی ءَ بندش جنگ بیتگ ۔

محکمہ داخلہ ءَ پولیس، لیویز ءُ فرنٹیئر کور ءِ درستیں کارندھاں پرمان کتگ کہ آ اے پرمان ءِ سر ءَ ترندی ءَ گوں امل کنگ ءَ دل یکیمی بہ کن اَنت۔

نوٹیفکیشن ءِ تہ ءَ گیش گشگ بوتگ کہ پاکستان ءِ رھبندانی دفعہ 188 ءُ اے دگہ کانود ءِ رد ءَ گلاف ورزی کنوکیں مردمانی ھلاف ءَ کارروائی کنگ بیت۔

ڈپٹی کمشنراں کڈن کنگ بوتگ کہ آ روچ پہ روچ جاورھالانی رپورٹ ءَ محکمہ داخلہ ءَ را پیش بہ کن اَنت۔

بلوچستان ءِ دمگ نصیرآباد ءِ دمگ نوتال ءَ پجّار نہ سلاہ بندیں مردماں بند ساچی شرکت ءِ دو ایکسیویٹر ڈرائیور آوار جتگ اَنت-

پولیس ءِ رِد ءَ وئیل نوتال تھانہ ءِ نزیک ءَ کینال صوفی واہ ءِ ھند سر ءَ بیتگ، اود ءَ سلاہ بندیں مردماں بند ساچی شرکت ءِ کار ءَ دلگوش ڈرائیور عاشق علی محمد حسنی ءُ شکیل احمد کورائی سلاہ ءِ زور ءَ آوار جتگ ءُ ناشناسیں جاھے ءَ برتگ-

اِھوالکار ءِ رِد ءَ سلاہ بنداں ھمے مردمانی برگ ءَ پد ایکسیویٹر ھمود ءَ یل دیگ بیتگ چریشی ءَ پد دمگ ءَ برجاہ بند ساچی شرکت پُرکاری اوشت آماچ بیتگ اَنت-

پولیس ءَ وئیل ءِ پٹ ءُ پول بندات کتگ ءُ آوار جنگ بیتگیں مردمانی یل کنائینگ ءِ دمگ ءَ سرچ آپریشن برجاہ-

دومی نیمگ ءَ، ھاران ءِ دمگ برشونکی ءَ جمعہ ءِ روچ ءَ آوار جنگ بیتگیں گوستگیں ڈسٹرکٹ چیئرمین ءُ نیشنل پارٹی رھشون میر صغیر بادینی یل کنگ بیتگ-

بلوچ یکجھتی کمیٹی ءِ بنجاہ ءِ نیمگ ءَ شنگ بوتگیں درشان ءِ تہ ءَ گوشتگ کہ رھشونانی بگیری ءِ ارزی ءَ یکبرے پدا پدر بوتگ کہ ریاست ایوک ءَ بگیرداری کنوکانی ایرموش کنگ ءِ ھاتر ءَ کانود ءَ کارمرز کنگ ءَ نہ انت بلکنہ آمیدگس ھم Rubber stamp ءِ تہ ءَ بدل کتگ ۔

آئی ءَ گوشتگ کہ گوستگیں روچ ءَ بندیگ جاہ ءَ بوتگیں پیشی ءِ میان ءَ کاؤنٹر ٹررازم ڈیپارٹمنٹ یکبرے پدا آمیدگس ءَ سرجمیں چالان جما کنگ ءَ بے سوب بوتگ ۔ اے کیس پہ زور دراج کش دیگ بوگ ءَ انت ۔ چہ بندات ءَ CTD چالان جما کنگ ءَ وت ءَ دور دارگ ءَ انت وھدیکہ آمیدگس ھمے سازشانی پلامرزی ءَ کنگ ءَ گندگ پیداک انت ۔ آمیدگس ناسرجمیں چالان ءِ بنیاد ءَ فرد جرم جنگ ءِ سرا انت بلےچوش کہ کانودی ءَ اے کار ھما وھد ءَ دیما برگ نہ بیت وھدیکہ چالان سرجمی ءَ جما مہ بنت ۔

درشان ءِ تہ ءَ گوشگ بوتگ کہ بنداتی ءَ سی ٹی ڈی ءَ بی وائی سی ءِ رھشونانی بگیری ءَ دروگیں ارزی درچ ءِ بندات کتگ ۔ جانی ریمنانڈ پیشیانی میان ءَ جج گوشتگ کہ درسیں ارزی یکجاہ پیش کنگ بہ بنت بلے اشی ءَ پد سی ٹی ڈی ءَ 25 ءَ گیش دروگیں ارزی جوڈ کتگ ۔ نوں اے سی ٹی ڈی ءِ اے نوکیں ارزی ءِ چالان ءَ پیش کنگ ءَ انت کہ پیسرا ھچبر پیش کنگ نہ بوتگ انت ۔ اے جاور ایوک ءَ ریاستی ادارھانی نیمگ ءَ کانودی نزام سلاہ بوگ ءِ گواہ نہ انت بلکہ آمیدگس ھم سک باز سانمند کنگ ءَ انت ۔

درشان ءِ تہ ءَ گوشگ بوتگ کہ اے وڈین چار ارزی ءَ ھزدار ءَ ناشرکاری ءِ امیدگس ءَ بی وائی سی ءِ رھشون زمانت داتگ انت بلے شال ءِ ناشرکاری ءِ آمیدگس ءَ کار دیر ءَ دارگ بوگ ءَ انت ۔ چریشی ءَ ھمے پدر بیت اے ارزی ءَ آمیدگس نادراھ جوڈ کتگ ءُ ریاستی زور ءَ کارکنگ ءَ انت ۔

دیمتر ءَ گوشتگ ءِ کہ گوستگیں روچ ءَ پیشی ءَ ڈاکٹر ماھرنگ بلوچ ءَ جج جست کتگ کہ ملک ءِ تہ ءَ گپ کنگ ءِ آزاتی ھست ؟ جج ءَ پسو داتگ کہ کہ ھئو ، اے ھر یک شھری ءِ ھک انت“ بلے زمینی راستی دگرے انت پرچاکہ بی وائی سی ءِ رھشونانی بگیری ءَ درسیں ارزی آیانی تران ءُ راج ءِ یکجاھی ءِ بنیاد ءَ نبشتہ کنگ بوتگ انت ۔ ھما جج کہ کانود ءِ تہ ءَ آزاتی ءَ گپ جنگ ءَ من ایت ، بلے املی چیریں ادارھانی ھکمانی سرا امل کنگ ءَ انت ۔

گڈسر ءَ گوشگ بوتگ کہ بلوچ یکجھتی کمیٹی میان استمانی انسانی ھکانی گل ، وکیل ءُ سیول سوسائٹی ءَ چہ لوٹ کنت کہ آ کانود ءِ ردیں کارمرزی ءُ بلوچ انسانی ھکانی باسکانی بگیری ءَ ریاستی زوراکی ءِ بگیری ءَ زوت گامگیج بہ زور ایت ءُ بی وائی سی ءِ رھشونانی یل کنائینگ ءِ ھاتر ءَ وتی کرد ءَ پیلو بہ کنت ۔