TBP Balochi

میکسیکو ءَ سٹی ھال ءِ تہ ءَ تیرگواری ءَ بازار ءِ میئر ءَ ھوار ھژدہ مردم بیران بوتگ انت –

درملکی رسانکدرانی رِد ءَ چار شمبے بیگاہ ءَ سلاہ بندین مردماں گوریرو بازار سان میگوئل توتولاپن ءِ سٹی ھال ءِ تہ ءَ پُترتگ انت ءُ پہ دیم تیرگواری ءِ کتگ چریشی ءَ بازار ءِ میئر ءَ ھوار ھژدہ مردم بیران بوتگ انت –

واکدارانی رِد ءَ بیران بوتگیں مردمانی تہ ءَ میئر کونراڈو مینڈوزا، آئی ءِ پت ءُ گوستگیں میئر جوان مینڈوزا ءَ ھوار کونسل ءِ باسک ءُ پولیس کارمند ھوار انت –

بیران بوتگیں مردمانی کچ ھژدہ گیش گوشگ بوگ انت ءُ آھانی تہ ءَ دوازدہ سالی زھگے ھم ھوار –

بلوچستان ءِ ضلع کیچ ءَ ناشناسیں سلاہ بندیں مردماں پاکستانی پوج ءِ چوکی ءِ سر ءَ اُرش کتگ-

پوج ءِ چوکی سر ءَ اُرش ضلع کیچ ءِ دمگ مند ءِ ھند ءَ کنگ بیتگ، اِھوالکارانی رِد ءَ کوھی دمگ چُکاپ ءُ نیلگ ءِ میانی دمگ ءَ پاکستانی پوج ءِ چوکی سر ءَ سلاہ بنداں اُرش کتگ ءُ تتکگ اَنت-

اِھوالکارانی رِد ءَ سلاہ بندیں مردماں راکٹ ءُ دگہ سلاھاں چہ چوکی نشانگ کتگ-

اِھوالکارانی گْوشگ اِنت کہ اُرش ءَ پوج ءَ جانی تاوان چست کنگ کپتگ بلے واکدار نیمگ ءَ انگت اے اُرش درگت ءَ درشان دیم ءَ نیتکگ دنیگت ءَ اے اُرش زمہ واری ھچ گل ءَ نہ زرتگ-

روکپتی بلوچستان ءِ دمگ چھبار ءَ ایرانی چیریں ادارھانی دست ءَ آوار جنگ بیتگیں بلوچ چاگردی باسک یل بیتگ-

یل بیتگیں مردم ءِ پجار مبین بلوچ جھمنند صدیق زئی دشتیاری ءِ نام ءَ زانگ بیتگ کہ آ چھبار ءَ گرگ بیتگ ات-

مبین گوستگیں ھشت روچاں ساری چھبار ءَ پانزدہ سالی ئیں جنکو ءِ گون ءَ بیوکیں زیادتیانی ھلاپ ءَ توار چست کنگ ءِ پژدر ءَ گرگ بیتگ ات –

مبیب ھشت روچانی بند بیگ ءَ پد مروچی یل بیتگ ءُ وتی گس ءَ سر بیتگ، مبین ءِ یل بیگ ءِ ھال چاگرفی رسانکجاھاں راست بیتگ-

زانگ بہ بیت مروچی زاھدان ءَ مکی مسیت ءَ نیکراھی مردم ءُ دگہ دگہ مردمانی یک نیادے بیتگ کہ چرے نیاد ءَ گرگ بیتگیں بندیگانی یل کنگ ءُ دگہ مردمانی انساپ ءِ دزبندی بیتگ اَنت-

بلوچستان ءِ دمگ جعفرآباد ءَ پولیس کارمنداں تیرگواری کُتگ ءُ یک ورنایے کُشتگ –

گیشیں ھالانی رِد ءَ جعفرآباد پولیس تھانہ کیٹل فارم ءِ نزیک ءَ پولیس ءَ تیرگواری کتگ ءُ راشن ءِ بھر گروکیں ورنایے کُشتگ –

اھوالکار ءِ رِد ءَ اے وئیل ھار آماچیں مھلوک ءَ راشن دیگ وھد ءَ بوتگ کہ اودا ایس ایچ او ءِ تیرگواری ءَ ورنایے زدگ کُتگ – زدگ بوتگیں ورنا ءَ نادراھجاہ ءَ برگ ءَ بوتگ انت کہ نیم راہ ءَ آئی ءَ دردانی ٹپ نہ سگ اِتگ ءُ بیران بوتگ –

وئیل ءِ بگیری ءَ دمگی مردم زھرشانی کنگ انت ءُ ایس ایچ او ءِ دزگیر کنگ ءِ لوٹ ءَ کنگ ءَ انت –

بلے تنی وھدی سرکار نیمگ ءَ اے درگت ءَ ھچ وڑیں درشان شنگ نہ بوتگ –

بلوچستان ءَ زورانسری آوار جنگ بوتگیں مردمانی پانکجنیں گل وائس فار بلوچ مسنگ پرسنز ءِ سرکماش نصراللہ بلوچ ءَ چاگردی ترامجاہ ٹویٹر ءَ چہ بلوچ سلاہ بندیں گلاں دزبندی کتگ کہ دزگیر کنگ بوتگیں پاکستانی کارمنداں انسانی ھمدردی ءِ ردءَ یل بہ کن انت –

نصراللہ بلوچ ءَ گوشتگ کہ پوجی کارمند یل کنگ بہ بنت ءُ آھانی کھول چہ ماژگی ازیت ءَ رکینگ بہ بنت –

زانگ بہ بیت گوستگیں روچ ءَ بلوچستان ءِ آجوئی لوٹوکیں سلاہ بندیں گل بلوچ لبریشن آرمی ءَ دزگیر کتگیں پوجی کارمندانی اکس شنگ کرتگ ءُ وتی درشان ءِ تہ ءَ گوشتگ کہ پاکستانی پوج ءِ گوم ءَ جنگی بندیانی مٹ ءُ بدل ءَ ساڑی ایں –

بلوچ لبریشن آرمی ءِ درشان ءِ رِد ءَ سینئر کمانڈ کونسل ءَ اے گپ ءِ منّ اِتگ بین الاقوامی کنونشنز ءُ جھانی جنگی رھبندانی پلامرزی کنان ءَ پاکستان پوج ءِ گون ءَ جنگی بندیگانی رد ءُ بدل کنگ ءِ امل بندات کنگ بیت اِنت –

جارکش ءَ گوشتگ کہ بیست ءُ پنچ ستمبر سال دوھزار ءُ بیست ءُ دو ءَ بی ایل اے ءِ ایلیٹ فورس (ایس ٹی او ایس) بزاں اسپیشل ٹیکٹیکل آپریشنز اسکواڈ ءَ ھرنائی ءِ دمگ زردآلو ءَ انٹیلیجنس ھال دیگ ءَ بیڑ برتگ ءُ پاکستان ملٹری انٹیلی جنس ءِ یک کارمندے ءُ پاکستانی پوج ءِ جے سی او ( جونیئر کمیشنڈ آفیسر) ءِ دزگیر کتگ انت – بی ایل اے نوں بلوچ راجداریں بندیگانی بدل ءَ دژمن ءِ اے بندیگاں یل کنت –

بلے پدا ھم تنی وھدی پاکستانی سرکار ءُ پھازگی ادارھانی نیمگ ءَ ھچ وڈیں ھبر دیم ءَ نہ اتگ –

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں درشانی ءَ گشتگ مئے سرمچاراں کیچ ءِ بنجاھی شھر تربت ءَ اسٹار پلس مارکیٹ ءَ زورگریں پاکستانی چیریں ادارھانی یک کارمندے جاوید ء اسلم جھمنند لودھراں پنجاپ تیرگواری کرتگ ءُ کشتگ-

جارکش ءَ گشتگ اے مرد ءِ سر ءَ اے شک بیتگ آ آئی ءَ وتی دروشم مٹ کرتگ ءُ تربت ءِ شھر ءَ چاریگری ءِ کار ءَ بیتگ چریشی ءَ پد بی ایل اے ءِ انٹیلیجنس ونگ ءَ یک بازیں وھدے ءَ داں نگاہ ایر کرتگ انت چریشی ءَ چہ اسلم ءِ گوں چیریں ادارھاں رھوت پدر بیتگ اَنت ھمے سزا ءِ سر ءَ آئی ءَ مرگ ءِ سزا داتگ ءُ اے پرکاریں چاریگ ءِ کوش ءِ زمہ واری ءَ بی ایل اے من ایت-

نبشتانک: زالبول ءِ آزادی ءُ بلوچ چاگرد

نبشتہ کار: سازین بلوچ

دی بلوچستان پوسٹ

زالبول کہ اسل ءَ یک انسانے ءُ دنیا ءِ آبادی ءِ کساس نیم بھر زانگ بیت ءُ بنی آدم ءِ زند ءِ یک شرنگیں ھمراھے بلے مردیناں اِے زات مُدام وتی دست ءِ چیر ءِ گُلام زانتگ ءُ انگت اِے جاورانی تھ ءَ گیش بدلی نہ یتکگ ما اگاں زالبول آزادی ءِ بزانت نیمگ ءَ بہ رو ایں گڑا آ چو اِے وڑ ءَ اِنت کہ زالبول ءُ مردین دویں انسان اَنت ءُ یک ھساب ءَ چارگ بہ بنت ءُ آھاں یک ھساب ءَ ھک دیگ بہ بیت۔ مئے چاگرد ءَ اگاں یک کارے مردین کنت گڑا بائد اِنت کہ زالبول آ کار ءَ مکن کنگ بہ بیت۔

مئے چاگرد ءِ تھ ءَ اگاں ما زالبول ءِ زند ءِ سر ءَ چمشانک ءِ بدیاں گڑا مارا اِے سما بیت کہ زالبول تھنا لوگ ءِ سمبالگ ءُ سور دیگ ءِ واستا جوڑ بوتگ۔ ھنچوش کہ یک جنکے ءِ لوگ ءِ تھ ءَ بِندات ءَ بس دوچ ھیل دیگ بیت داں کہ آ وتی سور ءِ جامگاں زُوت تیار کُت بہ کنت ءُ پد ءَ کساس 13 یا 14 سال ءَ سور دیگ بنت ۔ ھمے یکیں چیز ءِ واستا کہ مئے چاگرد ءِ تھ ءَ زالبول کارمرز بیت اِے چیز ءِ تھ ءَ ھم زالبول ءَ آزادی نیست آئی ءِ سور ءِ پیسلہ ھم آئی ءِ لوگ ءِ مستر ءُ کماش کن اَنت۔ اِے پیسلہ کنگ ءِ واستا لوگ ءِ مستر بِزاں کہ مردین وتی کش ءُ گور ءِ آ دگہ مردیناں وتی سْیاد ءُ وارس دُرستاں چہ شور ءُ مشورہ گِپت بلے ھما زالبول کہ آئی ءِ زند ءِ پیسلہ بوگ ءَ اِنت آ جُست کنگ نہ بیت اِنت –

اِلم ءُ زانت ءِ پِڑا ھم بلوچ زالبول پُشت ءَ کپتگ باز کم بلوچ زالبول مارا ونگ ءِ پِڑا داں ابد دست کپ اِیت۔ انچوش کہ یک زانت کار ءُ سرپدیں ماتے یک جْوانیں چاگردے ٹاھینت کنت بلے مئے چاگرد ءِ تھ ءِ زالبول ءِ واستا وانگ ءُ زانگ ءَ چہ گیش سور دیگ شرتِر سرپد بوھگ بیت۔ اِے درستاں چہ مارا اِے گِندگ ءَ کیت کہ بلوچ زالبول چہ بنیادی ھکاں زِبھر کنگ بوتگ اَنت۔ آزادی ءُ بنیادی ھک ءِ تھ ءَ تپاوت ھست۔ بلوچ چاگرد ءِ تھ ءَ اگاں بلوچ زالبول آزادی ءِ بابت ءَ گپ بہ بیت گڑا مردم اِے سرپد بنت کہ بلوچ زالبول ویسٹرین کلچر ءِ مُتابک ءَ زندگی کنگ لوٹ اَنت بلے مئے چاگرد ءِ میان ءَ زالبول آزادی ءِ بِزانت آئی ءِ بنیادی ھک اَنت کہ چہ آھاں زبھر کنگ بوتگ اَنت۔

یک وانندگیں بنی آدمے کدی وتی دود ءُ ربیدگ ءَ یل نہ کنت زالبولانی آزادی بلوچ چاگرد ءَ چہ سک دور اِنت ءُ اِے اسلام ءِ چیر دستی ءُ اے مزھبی ٹیکادارانی بوَھگ ءَ نا مُمکن اِنت بلے بائد اِنت کہ بلوچ چاگرد ءِ تھ ءَ زالبول چہ بنیادی ھکاں زبھر کنگ مہ بیت۔ آ اِلم ءُ زانت ءِ پِڑا موکل دیگ بہ بیت ءُ آئی ءَ وتی زند ءِ پیسلہ زورگ ءِ وت ھک دیگ بہ بیت اِنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ بنجاھی شھر تربت ءَ ناشناسیں پرپٹ سواریں مردماں تیرگواری کنان ءَ پنجاپ ءِ جھمنندے کُشتگ –

گیشیں ھالانی رد ءَ تربت ءِ شھر ءَ اسٹار پلس مارکیٹ ءَ پرپٹ سواریں مردماں تیرگواری کرتگ ءُ یک مردمے کُشتگ –

تیرگواری ءِ آسر ءَ بیران بیتگیں مردم ءِ پجار جاوید ء اسلم جھمنند لودھراں پنجاپ ءِ نام ءَ زانگ بیتگ-

وئیل ءَ پد تیرگواری کنوک تتکگ اَنت پولیس وئیل جاہ ءَ سر بیتگ ءُ گیشیں پٹ ءُ پول کنگ ءَ اِنت-

تیرگواری ءَ بیران بیتگیں مردم ءِ کوش ءِ درگت ءَ دگہ گیشیں گپ زانگ نہ بیتگ اَنت-

روکپتی بلوچستان ءِ بنجاھی شھر زاھدان “دزاپ ” ءَ مکی میست ءَ آدینگ ءِ روچ ءَ پیش اتکگیں ھونریچیانی سر ءَ یک نیادے برجم دارگ بیتگ، نیاد ءَ دمگ ءِ ھاکم ءُ نیکراھی رھشون ءُ سرکاری شش رکنی باسکاں بھر زرتگ ءُ وئیل ءِ درگت ءَ مولانا عبدالحمید ءِ سروکی ءَ درشان دیگ بیتگ-

آیاں گوشتگ کہ گوستگیں آدینگ ءَ زاھدان ءَ جمعہ مسیت ءَ یک ھنچیں ناوشیں وئیلے پیش اتکگ کہ ھچبر شموشگ نہ بیت اِنت اشی ءَ پد اے ھونریچی گیش بیتگ ءُ دگہ جاھاں ھم سر بیتگ –

آیاں گوشتگ اے روچ یک سیاھیں روچے ءِ درگت ءَ زانگ بیت اِنت ھمے روچ ءَ بازیں نمازی ءُ دگہ لس مھلوک ءِ ھون زاھدان ءِ دلبند ءَ ریچگ بیتگ اَنت-

آیاں تران کنان ءَ گوشتگ کہ ما ھچبر نہ جیڑ اتگ اے وڑیں وئیل مسیت ءُ نمازیانی سر ءَ کاینت بلے اے روچ ءَ نمازیانی سر ءَ اُرش کنگ بیتگ ءَ پد ءَ ھم نمازی پر ایمن بیتگ اَنت ءُ پد ءَ پولیس ءِ کارمنداں ھرچاریں نیمگاں مردمانی سر ءَ تیرگواری کرتگ ءُ اود ءَ پولیس ءُ دگہ آپسر بیتگ اَنت –

آیاں گوشتگ کہ اے وئیل ءِ درگت ءَ گپ کنان ءَ ’ گوشتگ کہ اے وئیل نا کہ جتائی گل ھوار بیتگ نہ دگہ ناشریں ٹولی بس اے وئیل بے پروائی ءُ بے سُدی ءَ پیش اتکگ ‘-

نیاد ءَ آیاں آدینگ ءِ روچ ءَ بیتگیں ھونریچانی درگت ءَ تچکیں پٹ ءُ پول ءُ ھواریں آپسر ءُ کانوندارانی سر ءَ سزا دیگ ءِ لوٹ ءُ بیران بیتگیں مردمانی کھولانی سھڑینگ ءُ آیانی ھون ءِ مٹ ءَ دیگ ءِ لوٹ کرتگ-

آیاں گوشتگ کہ اے وئیل ءَ پد ھرچ مردمے گرگ ءُ زندانی کنگ بیتگ اَنت آ درست یل کنگ بہ بنت ءُ اُستان ءَ سرکاری رویشانی بدلی ءُ آپسرانی زوراکی ءِ دارگ ءِ لوٹ کرتگ-

آیاں گوشتگ کہ اے وئیل ءِ درگت ءَ یک کمیٹی ءِ دارگ بہ بیت ءُ چریشی ءِ سر ءَ آ تچکی ءَ ھُرت چاری بہ کنت ءُ ھواریں مردمانی درگت ءَ سزا بہ دنت-

آیاں گوشتگ کہ سیستان و بلوچستان ءَ اُستانی رسانکدر ءُ سرکاری رسانکدراں دروگ شنگ ءُ تالان کرتگ ءُ چریشی ءَ مھلوک ءِ ٹپاں گیشواد پریچگ بیتگ اَنت-

آیاں گوشتگ کہ اے جیڑہ سیاسی جیڑے سرکار باید وتی زوراں توپک مہ کنت بلکیں سیاسی رنگ ءَ اے جیڑھانی گیش ءُ گیوار ءَ بہ کنت-

نیاد ءِ گڈسر ءَ مولانا عبدالحمید ءَ آدینگ ءِ روچ ءَ پیش اتکگیں ھونریچی وئیل ایر جتگ ءُ اے روچ ھونریچی روچے نامینگ بیتگ ءُ چریشی ءَ اُستان ءِ مزنیں اگدوداراں چہ لوٹ کرتگ ءُ گوشتگ کہ آ اے جیڑہ ءِ پٹ ءُ پول ءَ بہ کن اَنت ءُ چریشی ءَ آیانی نادانی ءَ گیشتر جاور ناگیگ بنت ءُ اے جیڑہ گیش دور رو اَنت –