TBP Balochi

بلوچستان ءِ بُنجاھی شھر چہ شال ءَ پاکستانی پوج ءَ یک ھپتگے ءَ ساری ورنایے آوار جتگ ءُ ناشناسیں جاھے ءَ برتگ-

سربوتگیں ھالانی رِد ءَ شال ءِ دمگ بروری دگ وحدت کالونی اولی اسٹاپ ءَ پاکستانی پوج ءَ یک مردمے آوار جنگ ءَ پد بیگواہ کتگ-

آوار جنگ بیتگیں ورنا ءِ پجّار امید ء ولی خان رند نام ءَ چہ بیتگ-

کھول ءَ وئیل راست کتگ ءُ گْوشتگ کہ اے ورناہ یک ھپتگے ءَ ساری پوج ءَ آوار جتگ ءُ بیگواہ کتگ کھول رِد ءَ امید یک پوریاگرے ءُ آئی ءَ پوریاگری کتگ ءُ وتی لوگ مردم لاپ داتگ اَنت –

آیاں انسانی ھکانی ادارھاں گوں دزبندی کتگ ءُ گْوشتگ کہ آئی ءِ یل کنائینگ ءِ ھاتر ءَ وتی کرد ءَ پیلو بہ کن اَنت-

زانگ بہ بیت بلوچستان ءَ جتاجتائیں دمگاں ھمکروچ زورانسری آوار جنی ءِ وئیل نکش بیگ ءَ اَنت-

بلوچستان ءِ دمگ قلات ءَ گوستگیں شپ ءَ سلاہ بندیں مردماں پاکستانی پوج ءِ بُنجل نشانگ کتگ –

پاکستانی پوج ءِ بُنجل ءِ سر ءَ اُرش قلات ءِ دمگ شئے مردان ءَ گوستگیں شپ ءَ کنگ بیتگ- اُرش ءِ وھد ءَ دمگ ءَ تراک ءُ تیرگواری توار ھم اِش کنگ بیتگ-

پوج ءِ واکدار ءَ تاوانانی درگت ءَ تنی وھدے ھچ وڑیں درشان دیم ءَ نیتکگ اَنت – اُرش زمہ واری انگت ھچ گل ءَ نہ زرتگ-

بلوچستان ءَ پاکستانی پوج ءُ آئی ءِ کمکارانی سر ءَ یکشل ءَ اُرش بیگ ءَ اَنت کہ اے اُرشانی زمہ واریاں بلوچ آجوئی لوٹوکیں سلاہ بندیں گل منّگ ءَ اَنت –

زانگ بہ بیت گوستگیں ماہ ءَ بی ایل اے ءَ یک بیڑے ءِ وھد ءَ پاکستانی پوج ءِ دو کارمند دزگیر کرتگ اِت اَنت ءُ گوستگیں روچاں بی ایل اے ءِ نوکتریں درشان ءَ گرگ بیتگیں مردمانی یل کنگ ءِ پژدر ءَ بی ایل اے ءَ بلوچ سیاسی مردمانی یل کنگ ءِ مٹ ءَ ھردوکیں پوجی کارمندانی یل کنگ ءِ جار جتگ اَت-

بلوچ لبریشن آرمی ءِ جارکش جیئند بلوچ ءَ گوشتگ ات کہ اے وھداں اگاں پاکستانی پوج ءَ ھرچ ٹگی ءُ ھُنرے ءِ جھد کت گڑا زوت آئی ءِ کارمند کشگ ءُ چگل دیگ بنت-

بلوچ لبریشن آرمی ءَ ھوار ھوار دگہ سلاہ بندیں گلانی نیمگ ءَ چد ءُ ساری چوشیں درشان گندگ ءَ نیتکگ اَنت اے اولی رند اِنت کہ بلوچ لبریشن آرمی ءِ سینٹرکونسل کمانڈ ءَ وتی درشانی ءَ یک درشانے گوستگیں روچاں داتگ –

بلوچستان ءِ دمگ لسبیلہ کیچ ءُ گوادر ءَ ڈینگی ءِ نادراھی ءِ دگہ شست ءُ دو کیس رپورٹ بوتگ انت کہ اے وھدی ڈینگی نادراھی ءِ نوکیں کساساں ھواری سرجمی ءَ سَے ھزار ءُ ھشت سد ءُ چِل ءُ یک ءَ سربوتگ انت –

بلوچستان جانسلامتی ءِ واکدارانی رِد ءَ گوستگیں روچ ءَ لسبیلہ ءَ ڈینگی نادراھی ءِ چِل ءُ ھشت، کیچ ءَ دو ءُ چہ گوادر ءَ دوازدہ کیس رپورٹ بوتگ انت اشاں ھوار سرجمی ءَ سَے ھزار ءُ ھشت سد ءُ چِل ءُ یک رپورٹ بوتگ انت –

جانسلامتی ءِ واکدارانی رِد ءَ ڈینگی نادراھی ءِ آماچ بوتگیں درساں گیشتر کیچ ءَ دو ھزار ءُ نُھ سد ءُ شست ءُ شش، گوادر ءَ چار سد ءُ سِی ءُ لسبیلہ ءَ چار سد ءُ نُھ کیس رپورٹ بوتگ انت –

بلوچستان ءَ موسم ءِ مٹ بوگ ءُ ھئور ءُ ھاراں پد جانسلامتی ءِ جاورانی تہ ءَ گیشی اتکگ، ھئوراں پد بلوچستان ءَ بازیں نادراھی ءِ شنگ بوتگ انت –

ھئور ءُ توپان بلوچستان ءَ سِی ءُ پنچ دمگ سانمند بوتگ انت ءُ سَے سد ءَ گیش مردم بیران بوتگ انت وھدیکہ ھار آماچیں دمگاں وبائی نادراھی شنگ تالان بوتگ انت – ھپتگ ءِ میان ءَ ڈائریا، دل لاپ، ملیریا، چم ءُ پوست ءِ انفیکشن ءُ دم ءِ نادراھیاں ھوار دگہ نادراھیانی بازیں کیس ءِ رپورٹ بوتگ انت-

اھوالکار ءِ رِد جانسلامتی ءِ واکدارانی نادلگوشی ءِ سوب ءَ ڈینگی تپ ءِ تہ ءَ گیشی اتکگ ءُ واکدار ھچ وڈیں گامگیج زورگ ءَ نہ انت –

بلوچستان ءَ بوتگیں توپان ءَ بازیں جانسلامتی ءِ بنجل تباھی ءِ آماچ بوتگ انت کہ ھما وھد ءَ نادراھانی الاج ءِ تہ ءَ اڈاند پیدا بوگ ءَ انت –

بلوچستان ءِ ھئور ءُ توپان ءَ گوستگیں ماھے ءَ گیش ءِ میان ءَ ھپسد ءَ گیش جانسلامتی بنجل ءُرورل ہیلتھ سنٹراں تاوان رستگ – جانسلامتی ءِ رپورٹ ءِ رِد ءَ توپان ءَ بلوچستان ءِ بازیں دمگاں جانسلامتی بنجلاں تاوان رستگ کہ ھچ دردیگ نھاں چریشی ءَ بیست ءُ شش ھار آماچیں دمگاں جانسلامتی ءِ کار سانمند بوتگ انت –

نبشتانک: جنگانی بامَردیں کارست اَسد پنامِ مِیجَر باسّد

نبِشتہ کار: باھڈ بلوچ

دی بلوچستان پوسٹ

زمین ءِ مِھرانی کسّہ ءُ داستان ھردیں کہ دیم ءَ گوز اَنت گڑا الّم ءَ ما گند اِیں کہ راجی بامرد پہ وتی زمین ءُ ھاک ءَ کجام سکی ءُ تھلیانی دیمپان بوتگ اَنت- اے کِسہ ءِ چاریں دانکانی مول ءُ مراد ھم ھمیش اِنت کہ دنیا بہ زانت کہ بلوچ پہ وتی زمین پھازگ ءُ آجوئی ءَ کجام سکیاں گوں گوزگ ءَ اِنت اے کسہ انچیں سنگتے ءِ کسہ اِنت کہ آ سنگت بلوچ سرڈگار ءِ ھاتر ءَ نمیران ءُ ابدمان بوتگ۔

اے کسّہ اِنت یک بامردے ءِ، یک استادے ءِ، یک جنگولے ءِ ھما مردم کہ زمین ءَ گوں آشنا اِنت آ مردم گوں اَسد پنامِ مِیجَر باسّد ءَ گوں المی ءَ آشنا اِنت اے کِسہ باسو ءِ کسّہ اِنت، ھو باسوے-

باسد ھما بَامرد اَت کہ آئی ءَ دُژمِن ھروَھد ءَ بِے واب ءُ بے تاھیر کُتگ اَت اَگاں مَن باسد ءِ کِسّہ ءَ بِندات بِہ کن آں من وت دَمبراں ند وتی سیاھیاں وارت ءُ ھلاس کنت، بلئے اُستاد ءِ کِسّہ سرجم نہ بیت۔ اُستاد ءِ زِندگِی ءِ درگت ءَ ھرچِی کہ مَن سَرپداں ءُ زاناں من کوشست کن آں کہ استاد ءِ سیاسی زندگی ءَ بہ گر داں سلاہ بندیں زرمبشت ءِ درگت ءَ نبشتہ بکن آں کہ استاد ءَ چوں ءُ چی ءَ پہ وت ءَ اے گرانیں راہ گچین کُتگ ءُ وتی زند ءِ واھشت ءُ وشی پہ ھمے سرڈگار ءِ ھاتر ءَ کربان کُتگ اَنت-

باسد ءَ بنداتی جھد چہ سْیاسی جھد ءَ چہ ھما گل ءَ بندات کتگ اَت کہ آ مادر آرگنائزیشن گُشگ بیت بزاں کہ بلوچ اسٹوڈنٹ آرگنازیشن آزاد، آ 2009 ءَ بی ایس او آزاد ءَ گوں ھوار بیت ءُ پد ءَ زون ءِ یونٹ سیکریٹری ھم بیت لھتے وھد ءَ پد بی ایس او آزاد پَسنی زون ءِ ڈپٹی آرگنائزر بیت۔

ھمے وڈ ءَ وھد وتی گاماں دیم ءَ بران کنت گڈا لھتے وھد ءَ رند چو بلوچستان ءِ آ دگہ دمگانی وڈ ءَ پسنی ءِ جاور ھم ناگیگ بنت اے سال دوھزار یازدہ بیت گڈا استاد سیاست کت نہ کنت پرچہ کہ آئی ءِ ھما کہ سیاسی سنگت بوتگ اَنت آ چست کنگ ءُ شھید کنگ بوت اَنت ریاست ءُ آئی ءِ داشتگیں دلاراں آ ھم نندگ ءَ نہ اِشت گڈا باسد ءَ وتی سیاسی جُھد یلہ دات ءُ سلاہ بندیں جُھد ءَ ھوار بیت- آ پہ سلاہ بندیں جُھد ءَ بلوچستان ءِ مستریں سلاہ بندیں گل بلوچستان لبریشن پرنٹ ءَ گچین کنت ءُ کوھاں وتی ھنکین کنت-

استاد باسد ءَ کہ وتی سرزمین ءِ جنگ ءِ گرانیں بار وتی کوپگاں زرت چہ اشی ءَ چہ نوں دژمن ءِ دل ءَ آئی ءِ بیم ودّان اَت دشمن ءَ چار اِت کہ اے مارا ھچ وڈا کِمار نہ کنت ءُ نزور نہ بیت گڑا دژمن ءَ استاد ءِ سْیاد ءُ وارس تاوان دات اَنت- چار مارچ دوھزار سیزدہ ءَ لگوریں دژمن ءَ آئی ءِ مکھیں مات ءِ سر ءَ تیر گواری کُت بلے آ انگت گوں وتی گَل ءِ کاراں گوں وتی ھم ستکیں ھمبلاں دیم پہ منزل ءَ جنزان اَت ءُ آئی ءِ ھمک گام دژمن ءَ پروش دیان اَت۔

ھمے وڈ ءَ یک سالے ءَ پد 31 مارچ دوھزار چاردہ ءَ دژمن ءَ استاد ءِ ناکو (ملا یوسف) گوں دگے یک سْیادے ءَ شھید کُت اشی ءَ ابید ھم استاد ھما بامرد اَت نوں پدا دشمن ءَ ھرجاگہ ترّ اِت ءُ گوشت (باسو کو ہر صورت میں مارنا ہے) دشمن وتی دراھیں زور ءَ جنگ ءَ اَت پندل سازگ ءَ اَت آئی ءِ کھول ءِ مردماں بْیھار دیگ ءَ اَت کہ شُما اگاں اسد ءَ نیار اِت ما پہ شُما ھچ نئیلاں دژمن آئی ءِ سْیاد ءُ وارس ءُ مردماں چست کنگ ءَ اَت بلکیں پہ آئی ءَ ھچ پش گیجگ ءَ نہ اَت استاد ءَ اد ءَ ھم دشمن ھچ کِمار نہ کُت ءُ بس جنزان اَت دیم ءَ پند جنان ءُ روان اَت آئی ءِ تھنا گپ ھمیش اَت کہ آجوئی-

چار اگست دوھزار چاردہ ءَ دُژمن ءَ آئی ءِ ناکو بابو مھراب چست کُت پد ءَ بْرات صابر گوں ھمراہ ءِ امیربخش ءَ چست کُت ءُ آئی ءَ پیگام اِش کت کہ اگاں تو نیائے ما تئی مردماں شھید کن اِیں بلئے چو سیاھجی ءُ بولان ءَ مُھکمیں باسو انگت ایرموش نہ بوت ءُ جُھد ءَ دیم ءَ بران اَت۔

دژمن ءِ دراھیں مکر ءُ پندل کہ بے سوب بوت اَنت گڑا آئی ءَ دگہ نوکیں پندلے ساز اِت ءُ وتی لھتے داشتگیں چریک یک مزنیں کچے ءَ گوں سنگتاں ھوار کت سرزاھر ءَ آ گل ءِ سنگت بنت بلے آچہ ریاست ءِ نیمگ ءَ چہ راہ دیگ بنت کہ ایم آئی ءِ کارندہ ءُ منشیات پروشانی مردم بنت اشاں ھمے ٹاسک دیگ بیت کہ شما اسد ءَ بہ جن اِت گڑا سَے جنوری دوھزار شانزدہ ءَ ھمے مردم باسو ءِ سر ءَ اُرش کن اَنت آ پاد ءَ تیر وارت ءُ ٹپی بیت بلئے انگت باسو وتی جھد ءُ زمین ءِ گرانبھائیں مھراں چہ دزکش نہ بیت- ھمے یکیں سال ءَ بزانکہ پانزدہ اکتوبر 2016 ءَ دژمن آئی ءِ ناکو لال بکش ءَ شھید کنت دانکہ باسو نزور بہ بیت ءُ منی دیم سر ءَ جھل بہ کنت- بلے آ گیش توانمند بیت ءُ دژمن ءَ گیش تاوان دیان کنت دُژمن ءِ سر ءِ ھوش رؤت، دژمن ءِ دست تھنا استاد ءِ کھول ءُ سْیاد وارساں رس اِیت آھاں تاوان دنت۔

پدا ھمے میان ءَ گپے ترّگ ءَ اَت کہ اسد سرنڈر بوتگ باز مردم گوشگ ءَ اَت اشی ءَ اگاں سرنڈر کنگی اَت ساری ءَ بُکتین ئِے وتی مردم ئِے جنائینتاں نوں سرنڈر کُتگ ئِے بلے مارا ھچ باور نہ بوت کہ چوشیں بامرد دژمن ءِ دیم ءَ وتی سر ءَ ھچبر جھل نہ کنت- اگاں ما آ نہ دیستگ اَت بلے گوں زمین ءَ آئی ءِ مھرانی کسّہ اِش کتگ اِت اَنت- آئی ءَ گوں سرڈگار ءَ انچو مھر اَت کہ آ مھر ءِ برورد آزادی یہ شھادت اَت۔

دو نومبر 2016 ءَ دژمن آئی ءِ برات سابر ءَ شھید کنت اشی ءَ پد مردماں چار اِت اگاں باسو ءَ سرنڈر بہ کتیں دشمن ءَ بْرات شہید نہ کُتگ اَت نوں مردماں زانت کہ اے راجی پُسگ انگت گوں دژمن ءَ مِڑگ ءَ اِنت- شپ کہ بیت دژمن ءَ بس آئی ءِ سْیاد ءُ مردمانی لوگاں بیڑ برت پٹ ءُ پول کت مردمانی سر ءَ زوراکی بہ کن، بہ جن برو ھرچ شپ ھمے وڑ ءَ گْوست بلے استاد انگت مھکم اَت ءُ بلوچ سرڈگار ءِ آجوئی ءِ جھد ءَ ھوار اَت۔

باسو مکران ءِ ھمک کوہ ءُ کوچگاں چہ آشنا اَت ھمک جاگہ آئی ءِ پادانی گواھی ءَ دیاں برے کولواہ، برے کلانچ، برے دشت، برے آواران ھرچ ھند ءُ دمگاں اے سرزمین ءِ سرگنوک پہ آجوئی ءَ پند جنان اَت ھمے پند ءُ جُھد ءِ راہ ءَ یکروچے بزانکہ نوہ اکتوبر 2021 ءَ گوں دگہ سےَ سنگت ءَ کولواہ ءِ ھند ءَ پاکستانی لشکر ءُ آئی ءِ داشتگیں چریکاں گوں دپ کپیت ءُ دیم پہ دیمی میڑے بندات بیت اے میڑ داں دیراں برجاہ بیت ھمے میڑ ءَ اسد پنام ء میجر باسد گوں سنگت عاقل، شہید سخی ءُ پرویز جان ءَ پہ سرڈگار ءَ نمیران بیت-

استاد باسو ءِ مھنت ءُ کارانی برورد ءَ مروچی جنگ مئے ھما ھند ءُ دمگاں شریں وڑے ءَ جنزان اِنت کہ اود ءَ آئی ءَ جوانیں وڈے ءَ کار کتگ- سنگت جُھد ءَ ھوار بوھان اَنت نوکیں ورناہ زمین ءِ مھر ءَ گوں آشنا بوھان اَنت ءُ ھچ وڑیں کربانی ءُ دیمونی دیگ ءَ چَک ءُ پد بوھگ ءَ نہ اَنت- ھاسکار مروچی کلانچ ءِ ورناہ کہ اے جنگ ءَ پھمگ ءَ اَنت دیم ءَ درآھان اَنت اے باسو ءِ داتگیں سبکانی برورد اِنت- آئی ءِ پگر ءُ لیکہ ءِ ھُنڈال کلانچ ءِ پیمیں جنگلے ءَ ایر کپتگ اَنت آئی ءِ جُھدانی سرپتگیں گواڈگ ھمک کشک ءِ دلبند ءَ وتی زبادیں بُواں آتارگ ءَ اَنت-

باسو! اے نبشتانک ءِ نویسگ ءَ مناں انچو سما بیت کہ تو منی کش ءَ نشتگ ئے ءُ من ءَ سکین ءُ دلبڈی دیگ ءَ ئے دانکہ من باندا چہ اے راہ ءَ وت ءَ گار مہ کناں ءُ تو مارا ھمے گوشگ ءَ ئے کہ جھد شُمے ئیگ اِنت ءُ شمے کوپگان اِنت- اے کسہ ھلاس نہ اِنت کہ تو انچیں کارستے ءِ کہ تئی کسّہ ھچبر ھلاس بوت نہ کن اَنت بلے منی مارشت ھلاس بوت اَت کسہ روان کنت ءُ وتی کارستاں بدل کنان کنت بلئے ھمک کارست ءِ تہ ءَ تو الّم گندگ بہ ئے-

رُخصت اف اوارن سنگت

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءَ مند ءَ پاکستانی پوج سر ءَ بیتگیں اُرش زمہ واری منّ اِتگ-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ گوستگیں روچ شش اکتوبر 2022 ءَ پشمبے ءِ بیگاہ ءِ ساھت شش ءَ کیچ ءِ دمگ مند ءِ کوھی ھند چُکاپ ءُ نیلگ ءِ میانی ءَ برجاھیں پاکستانی پوج ءِ بُنجل ءِ پھازوکی چوکی ءِ سر ءَ راکٹ ءُ وتکاریں سلاھاں گوں اُرش کتگ-

آئی ءَ گْوشتگ کہ اُرش ءَ دُژمنیں پوج ءَ جانی ءُ مالی تاوان چست کنگ کپتگ-

جارکش ءَ گْوشتگ کہ بلوچستان ءِ وتواجھی ءَ تاں پوج ءِ سر ءَ اُرش گوں تُرندی ءَ برجاہ بنت-

نبشتانک: زِند رَنگاں مَٹاھیت

نبشتہ کار : شاھد داد

دی بلوچستان پوسٹ

اِے گَپ ما درست زانیں کہ زندگی مٹ بُوَگ ءِ نام اِنت یک انسانے ءِ زندگی ھما روچ ءُ ھما وھد ءَ بندات بیت کہ آ چہ مات ءِ لاپ در کیت ءُ وتی چمّاں پچ کنت ءُ آئی ءِ زند ءِ سپر ھمود ءَ ءُ ھما جاہ ءَ بندات بیت۔ آئی زند ءِ روچ مَٹ بوان بنت ءُ آئی ءِ رنگ ءُ شُبین ءُ چھرگ ھمے روچانی ھمرائی ءَ وت ءَ مَٹ کن اَنت۔ بلے آئی ءِ زند ءِ روچ یک وڑ ءُ یک داب نہ بنت ءُ آ پہ آئی ءَ وڑ وڑیں تکلیپی ءُ سکّی گوں وت ءَ کار اَنت۔ ھمے سکّی ءُ تکلیپی پہ یک کسانیں زھگ ءَ نادراھی ءِ رنگ ءَ کاینت ءُ آئی ءِ زند ءِ روچاں مُشکِل ءُ گرانتر کَن اَنت۔

او ھما روچ ءَ کہ ما ھوش کُتگ ءُ مارا ھوش اِنت داں ھما روچ ءَ بِگر داں کے مرچی ءُ ھمے ساھت ءَ کہ من ءُ تو زندگ آں۔ من ءُ تو اگاں وتی گوست ءِ بابت ءَ بہ جیڑ آں گُڑا زانیں کے ما وتی زند چوں دیستگ ءُ پھمتگ ءُ زندگی ءَ مارا چونیں رنگ پیش داشگ ءُ گوں چونیں وڑ ءُ داب ءَ مئے دیم ءَ اتکگ۔ برے گوں بزّگی ءُ واری گَم ءُ رنج ءُ ازابیاں گوں ءُ برے ماں وشی ءُ گَل ءُ شاتیاں گوں۔ پرچاکہ زندگی یک داب ءُ یک ڈول ءَ نہ اِنت ءُ نہ بیت ۔ بلے اِے چیز ءَ ما ھچبر زَانت نہ کنیں کہ آوکیں وھد ءَ مئے زند چون بیت ءُ چون گْوَز ایت۔ بلے مارا گوں زند ءِ ھمک رنگاں دوچار کپّگی اِنت۔

او برے برے ما ءُ تو انچیں جاوراں گوں دوچار کَپ اِیں کہ مارا وتی زند چو گرانیں بارے ءِ وڑا ماں کوپگ ءَ بیت ءُ تئی ھیال ءَ گوست ءِ درائیں جاوراں یکجاہ بکن ئے ایشی ءِ کساس ءَ نباں۔ او تو ھمے جیڑ ئے کہ زند ءِ سپر ءَ ھمدا ھلاس بکن آں ءُ وت ءَ بُکش آں۔بلے ھردیں کہ تو چہ ھمے جاوراں در کائے ءُ یک نوکیں سُھبے ءَ گوں وشیاں پہ تئی وش اتک ءَ در کیت ءُ تو چہ گوست ءِ جاوراں بے ھیال بہ ئے ءُ تو ھمے جیڑ ئے ءُ گشُ ئے کہ زندگی سک وش اِنت۔ واکی زندگی سک وش اِنت بلے ھما وھد ءَ کہ تو وشیانی منگیرا ئِے۔ بگندے داں دیگر ءِ گڈی برمش ءَ تئی وشیانی منگیر مھکم بہ بیت۔

او بلے اِے گَپ تو زانت نہ کن ئے کے تئی آؤکیں سھب تئ ہمے وشیانی منگیر وش اَتک کنت یاکہ نہ بلے ترا الّم سُھب وش اتک کنگی اِنت کہ سُھب ءَ پرتو چے آورتگ گوں ءُ ترا چے ئے بکشائیت ءُ سپر کنت۔ بلے ھُشک ءَ نہ روت اّلم پرتو چیزے گون ئے وشی یے یا کہ گَم ءُ رنج ءُ یا کہ دگہ انچیں مُشکِل ءُ ازابے بلے نوکیں چیزے تئی باھوٹ کنت ءُ در کپ ایت۔ تئی ھمک روچ ءِ بندات گوں نوکیں چیرے ءَ بیت۔ پرچا کہ زندگی مٹ بوھگ ءِ نام اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

امریکہ ءِ سروک جوبائیڈن ءَ گوشتگ کہ دنیا ءَ سرد جنگی ءَ پد اولی رند ءَ ایٹمی جنگ ءِ ترسی گمان اِنت-

فرانسیسی ھبر رساں ادارہ اے ایف پی ءِ رد ءَ پشمبے ءِ روچ ےَ مھتر جوبائیڈن ءَ نیویارک ءَ ڈیموکریٹک فبڈ ریزنگ ءِ یک نیادے ءَ گوشتگ کہ’ مارا 1962 ءَ کینیڈی ءُ کیوبن میزائل ءِ تباھکاری ءَ پد نیوکلیئر آرماگیڈن ءِ گمانانی دیمپانی کنگ نہ کپتگ‘-

مھتر جوبائیڈن ءَ گوشتگ وھدیکہ روسی سروک ءَ زھرناکیں سلاھانی کارمرد کنگ ءِ بیھار داتگ گڑا آ ’ ًمزاک کنگ ءَ نہ بیتگ ‘ –

پاٹی ءِ منوکانی میان ءَ آئی ءَ تران ءِ تہ ءَ امریکی مھتر ءَ روسی مھتر ءِ نیمگ ءَ جوھری سلاھانی کامرد کنگ ءِ بیھار ءَ ودی بیتگیں ترس ءِ ترندی درشان کتگ –

آئی ءَ گوشتگ کہ کیوبن میزائل ءِ ناوشیاں پد اولی رند ءَ جوھری سلاھانی کارمرد کنگ ءِ تچکی ءَ ترس اِنت جوبائیڈن ءَ گشتگ کہ آ اے زانگ اِنت روسی سروک چی گامگیج زورگ اِنت –

کیوبن میزائل کدی دیم ءَ اتکگ؟

کیوبن میزائل ءِ ناوشی 1962 ءَ دیم ءَ اتکگ ءُ اے سرد جنگ ءِ ترسناکیں وھداں بیتگ آ وھد ءَ امریکی سروک جان ایف کینیڈی ءَ کیوبا ءِ سوویت میزائلانی جاڑیگ بیگ ءِ جار جتگ ات –

اے ناوشیاں پد دنیا ءَ ایٹمی جنگ سک ءَ دیم ءَ شتگ ءُ بلے اشی ءَ پد ایٹمی سلاھانی کارمرد کنگ ءِ تاوانانی سر ءَ باوست بندات بیتگ اَنت-

اے گپ دلگوش کنگی اِنت ھمے زوتاں روسی سروک ءَ یوکرین ءَ جوھری سلاھانی کارمرد کنگ ءِ بیھار داتگ –

زانتکار چی گوش اَنت اے درگت ءَ؟

زانتکارانی گوشگ اِنت روس ءِ نیمگ ءَ چیریں کچے ءَ جوھری سلاھانی کارمردی بیت اِنت بلے امریکی سروک ءَ اے گپ کڈن کتگ ءُ گوشتگ کہ جوھری سلاھانی کارمرد کنگ ءَ دنیا ءَ تباھی بازیں کچے ءَ ودی بیگ ءِ ترس ءِ گمان اِنت –

جوھری سلاھانی کارمرد کنگ ءِ بیھار ءَ پد زانتکاراں چی گشتگ؟

زانتکارانی گوشگ اِنت روس ءِ نیمگ ءَ یوکرین ءَ دیگ بیتگیں بیھاراں جوھری سلاھانی کارمرد کنگ ءِ مول ءُ مراد آئی ءَ ترسینگ ءُ گپ ءُ تران ءِ راہ ءِ پچ کنگ اِنت یا سلاھانی ایر کنگ ءُ یا ڈیھ ءِ روکپت ءَ بھر ءُ بانگی اِنت-