TBP Balochi

بلوچستان ءَ اتکگیں توپان ءَ پد ڈینگی نادراھی ءِ تہ ءَ گیشی آیگ ءَ انت، وھدیکہ بازیں دمگاں ڈینگی نادراھی ءِ جاور نگیگ انت –

اے وھدی سرجمیں بلوچستان ءَ ڈینگی وائروس ءِ نادراھیانی کچ ءُ کساس چار ھزار گوشگ بوگ ءَ انت – وھدیکہ کیچ درسیں دمگاں چہ گیشتر ڈینگی ءِ آماچ انت –

گوستگیں بیست ءُ چار ادارانی میان ءَ چہ لسبیلہ سِی ءُ ھپت، چہ کیچ ءَ چاردہ ءُ گوادر ءَ دو کیس دیم ءَ اتکگ انت – ھمے سال ءَ چہ کیچ ءَ رپورٹ بوتگیں کیسانی کچ سَے ھزار ءُ چِل ءُ دو ءَ سر بوتگ انت- چہ لسبیلہ پنچ سد ءُ چار ءُ گوادر ءَ چار سد ءُ چِل ءُ چار کیس رپورٹ بوتگ انت – شال ءَ ڈینگی ءِ بیست ءُ دو نادراھ انت – بلوچستان ءَ ڈینگی نادراھانی کچ سرجمی ءَ چار ھزار ءُ دوازدہ انت –

بلوچستان ءَ ترندیں ھئور ءُ توپان ءَ پد جانسلامتی جاورھال نگیگتر بوان انت – ھئور ءُ ھاراں پیداک بوتگیں بازیں نادراھیاں بلوچستان انگر کتگ-

ھئور ءُ توپان ءَ چہ بلوچستان ءَ سِی ءُ پنچ دمگ سانمند بوتگ انت ءُ سَے سد ءَ گیش مردم بیران بوتگ انت -وھدیکہ ھار آماچیں دمگاں وبائی نادراھی شنگ تالان بوتگ انت – ھپتگ ءِ میان ءَ ڈائریا، دل لاپ، ملیریا، چم ءُ پوست ءِ انفیکشن ءُ دم ءِ نادراھیاں ھوار دگہ نادراھیانی آماچ بوتگیں کیس رپورٹ بوتگ انت –

اھوالکار ءِ رِد جانسلامتی ءِ واکدارانی نادلگوشی ءِ سوب ءَ ڈینگی ءِ نادراھی ءِ تہ ءَ گیشی آیگ ءَ انت ءُ جانسلامتی ءِ واکدار ھچ وڈیں گامگیج زورگ ءَ نہ انت –

بلوچستان ءَ ھمے زوتاں اتکگیں توپان ءَ جانسلامتی ءِ بازیں بنجل ءِ تباہ بوتگ انت چریشی ءِ سوب ءَ نادراھانی الاج ءَ ھم باز اڈاند پیداک انت –

بلوچستان ءِ دمگ کیچ ءَ مھکمہ ماحولیات ءَ دنز ءُ مُجانی گیش بیگ ءِ سبب ءَ کریش پلانٹ بند کتگ –

تربت ءَ روتاک ڈیلی ایگل ءِ رد ءَ کریش پلانٹ تربت ءَ ھواریں دمگ گوگدان ءَ آبادی ءِ توک ءَ بیتگ ءُ چریشی ءِ سبب ءَ اود ءَ جھمنندیں مردمان دنز ءُ ریکانی دیمپانی کنگ کپتگ-

دنز ءُ ریکانی سبب ءَ دمگ ءَ مھلوک جتا جتائیں نادراھیانی دیمپان ھم بیتگ اَنت کہ دنز انسان ءِ دپ ءُ دماگاں مانریچت اَنت چریشی ءَ چہ انسان جتا جتائیں نادراھیانی دیمپان بیت کنت-

ڈیلی ایگل ءَ وتی درور دیان ءَ گوشتگ ’ اے کریش پلانٹ ءَ دمگی مردماں بے کساس ءَ ایراد بیتگ ءُ چریشی ءَ اے گپ آئی ءَ دیم ءَ برتگ ءُ مروچی کریش پلانٹ انتزامیہ ءَ بند کتگ‘-

ھالانی تہ ءَ گوشگ بیتگ کہ اے کریش پلانٹ بلوچستان ءِ اُستانی وزیر صحت ئیگ اِنت کہ آئی ءَ مھلوک ءِ میان ءَ مک کرتگ ءُ دمگ ءَ دنز ءُ آڈھور گیش کتگ اَنت-

تربت ءَ بازیں کریش پلانٹانی سر ءَ ھم مردماں ایراد گوست گپتگ چریشی ءَ آئی ءِ گڈ ءُ کونچانی سبب ءَ دمگ ءَ آپ مچ بنت ءُ چریشی ءَ چہ ھمے آپ میتگ ءُ لوگاں مانریچ اَنت-

بلوچستان فزیوتھراپی ایسوسی ایشن گوستگیں 128 روچاں چہ شال پریس کلب ءِ دیما چیدگی شُد مرگ ھڑتالی بُنجل جتگ اِش ءُ نشتگ اَنت سرکار ءُ پرگینگی واکدارانی نیمگ ءَ دلگوش نہ کنگ ءِ سوب ءَ گوستگیں روچ ءَ زھرشانی کنوکاں گورنر ھاؤس ءِ دیما وتی زھرشانی بُرتگ۔

گوستگیں روچ ءَ بلوچستان فزیوتھراپی ایسوسی ایشن ءِ نیمگ ءَ شال پریس کلب ءَ بگر داں گورنر ھاؤس چوک ءَ داں یک روانک ءِ کشگ بیتگ کہ اِشی ءَ رند گورنر ھاؤس ءِ دیما نندانک دیگ بیتگ کہ داں انگت برجاہ اِنت۔ جتاھیں نودربر گل، سیاسی پاٹی ءُ پرگینگی واکدارانی وفداں انگت ءُ نندانک کنوکاں گوں یکجاھی درشان کُتگ ءُ آیانی ھمک پئیمیں کمک کنگ ءِ باوری داتگ۔

پرگینگی وزیر انور محمد دُمڑ ءُ حاجی محمد خان لہڑی ءَ اتکگ ءُ درانگازی کنوکانی گوم ءَ گپ کنگ ءِ کوشست کُتگ بلے دلجمیں پسہ نہ رسگ ءِ سوب ءَ گپانی آسر بے سوب بیتگ۔ گپ ءُ نیادانی بے سوب بیگ ءَ پد بلوچستان فزیوتھراپی ایسوسی ایشن ءِ گپ رَپ کنوکیں ٹیم ءَ بلوچستان سرکار ءَ پریس کانفرنس ءِ تہءَ دو روچے وھد داتگ کہ آیانی جیڑھانی گیش ءُ گیواری ءِ ھاترءَ راہ بہ کش اَنت۔ بلوچستان فزیوتھراپی ایسوسی ایشن ءَ وتی زھرشانی ننداک ءَ دں وتی لوٹانی پیلو بیگ ءَ داں برجاہ دارگ ءِ جار ھم جتگ۔

آیاں گُشتگ کہ ما بلوچستان سرکار ءِ سرءَ پدر کنگ لوٹیں کہ مئے ھقیگیں لوٹاں سنجیدگی ءَ گوں بہ زیر اَنت ءُ زیت ءَ زیت بہ من اَنت ءُ مارءَ مئے لائقیانی پیلو کنگ ءِ موہ دیگ بہ بیت۔ اگں مئے لوٹ دو روچ ءَ منگ نہ بیت اَنت، گُڑءَ لاچاری ءَ ما ءَ شُد مرگ ھڑتال ءِ نیمگ ءَ رؤیں۔ اگں اَے نیام ءَ مارا کجام ھم تاوان رست گُڑءَ زمہ وار سرکار بیت۔

بلوچستان ءِ دمگ کیچ ءِ بنجاھی شھر تربت ءَ حق دو تحریک ءِ بگیری ءَ لیویز کارگس ءَ ارزی نبشتہ کنگ بیتگ-

ارزی رسالدار ایس ایچ او لیویز تھانہ اللہ بخش مراد ءِ سروکی ءَ نبشتہ کنگ بیتگ، ارزی ءَ 12 جتا جتائیں تکاں بندوکانی سر ءَ نبشتہ کنگ بیتگ-

ارزی حق دو تحریک ءِ پرکاری رھشون غلام اعظم دشتی ءُ یعقوب جوسکی ءِ ھلاپ ءَ کنگ بیتگ-

ارزی نامہ ءَ حق دو تحریک ءِ رھشون وسیم سفر ءُ ملا نصیر بلیدی ھم نامزد کنگ بیتگ اَنت-

زانگ بہ بیت حق دو تحریک کیچ ءِ نیمگ ءَ ڈپٹی کمشنر کیچ ءِ کارگس ءِ دیم ءَ گوستگیں سَے روچاں نندانک برجاہ اِنت کہ چریشی ءَ بیگواھیں مردمانی کھول ھم ھوار اَنت-

میان اُستمانی زرکاری پوڑی ءَ یوکرین ءِ جنگ ءِ سبب ءَ وردنی توانمندی ءِ نھادانی برز بیگ ءِ گمان پدر کرتگ ءُ میان اُستمانی تکاں باپاری پھنات آوکیں سال دوھزار ءُ بیست ءُ سَے سُستی ءِ آماچ بنت-

ھبر رساں ادارہ اے ایف پی ءِ رد ءَ میان اُستمانء زرکاری پوڑی ادارہ (آئی ایم ایف) ءَ زرکاری ءِ کونسلر پیخی اولیویئر ءَ کورونا وائرس ءُ یوکرین ءِ جنگ ءِ سبب ءَ گیش بیتگیں گرانھادیانی درور دیان ءَ گوشتگ کہ آوکیں سال ءَ میان اُستمانی باپاری پھنات یک نیم بھرے ءِ کساس ءَ سڑانکی ءِ آماچ بیت اِنت –

آئی ءَ گوشتگ کہ دنیا ءِ سَے مزنیں زرکار امریکہ، یورپی یونین ءُ چین ءِ زرکاری ءِ راہ ءَ اڑانک بنت اِنت-

آئی ایم ایف ءِ چیف کونسلر ءَ گوشتگ کہ ناوشیں جاور ڈکالی ءِ آیگ ءَ اَنت ءُ سال دوھزار ءُ بیست ءُ سَے ءِ سال ءَ زرکاری ءِ باپاری بازار نیزروی یے آماچ بنت-

آئی ءِ رد ءَ یوکرین ءِ جنگ ءِ سبب ءَ میان اُستمانی زرکاری ءَ آسرکپتگ اے زرکاری ءِ ناوشیں ٹپ یک رندے پد ءَ کُد اَنت کہ جھانی نادراھی ءَ پد نوک تْرک ءَ بیتگ اَنت –

زانگ بہ بیت آئی ایک ایف ءَ وتی یک رپورٹے ءِ تہ ءَ سال دوھزار ءُ بیست ءُ سَے ءَ میان اُستمانی پداوری ءِ زرکاری ءِ شبین ءَ 0.2 پوائنٹ کم کتگ ءُ 2.7 درسد گمان داتگ-

آئی ایم ایف ءِ گوشگ اِنت میان اُستمانی پھناتاں زرکاری ءِ نیستی ءُ کورونا وائرس ءَ ابید سال دوھزار ءُ بیست ءُ یک ءَ پد زرکاری ءِ تک نیزتریں جاورانی دیمپان بیتگ اَنت-

ھمے سبب اِنت امریکہ ءَ ھوار دنیا ءِ مزن مزنیں ڈیھاں ڈیھی پداور ءِ تہ ءَ سال دوھزار ءُ بیست ءُ دو ءِ اولی شش ماھاں ٹپ بیتگ وھدیکہ چین ءَ یکشلیں لاک ڈاؤن ءِ سبب ءَ زرکاری سیکٹر ناگیگانی آماچ بیتگ-

زرکاری کونسلر پیخی اولیویئر ءِ گوشگ اِنت میان زرکاری نابودی ءِ بازار ءَ ناوشی ءَ کت کنت بلے زرکاری ءِ پھناتاں دو درسد نیزوو بیگ ءِ گمان اِنت-

سال نوزدہ سد ءُ ھپتاد ءَ پد بس پنچ رند ءَ کساد بازاری ءِ دیمپانی بیتگ ھمے وڑ سال نوزدہ سد ءُ ھپتاد ءُ سَے ءَ تیل ءِ نیھادانی برز بیگ ءَ مھلوک لرزینتگ اَت، نوزدہ سد ءُ ھشتاد ءُ یک ءَ گرانھادی ءَ، دوھزار ءُ ھشت ءَ زرکار نیستی یے آماچ، اے درستانی دیمپانیانی سبب ءَ میان اُستمانی زرکاری ءَ آسر کپتگ-

بلوچستان ءِ ضلع نوشکی ءَ زورانسری آوار جنگ بیتگیں ورنایے آجو بیتگ وھدے کہ دگہ یک ورنایے ضلع ھُزدار بیگواہ کنگ بیتگ-

ھمے سال ءَ سے مئی ءَ نودربر عتیق مینگل چہ نوشکی قاضی آباد ءَ پاکستانی پوج ءُ چیریں ادارھانی کارندھاں زورانسری آوار جتگ اَت کہ آجو بیتگ وتی لوگ ءَ سر بیتگ-

ھمے وڑ چہ ضلع ھُزدار ءِ دمگ زھری نورگامہ فٹبال گراؤنڈ ءَ پاکستانی پوج ءُ چیریں ادارھانی کارندھاں آوار جتگ ءُ گوں وت برتگ-

ورنائے پجّار زھری بلبل جھمنند یحیٰ زاھد ء عبدالحمید موسیانی نام ءَ چہ بیتگ گوستگیں روچ ءَ بیگواہ کنگ بیتگ-

چمّدیستانی رِد ءَ دو سرف گاڑیاں سلاہ بندانی ھمراھی ءَ فرنٹیئر کور کارندہ ھم گون بیتگ اَنت وھدے کہ دمگ ءِ راہ ءُ در ھم بستگ اَنت-

دمگی واکداراں اے درگت ءَ ھچ وڑیں درشان شنگ نہ کتگ-

زانگ بہ بیت بلوچستان ءِ جتاجتائیں دمگاں زورانسری آوار جنی ءِ دْرچ یکشلہ برجاہ ءَ اِنت ءُ زورانسری آوار جنی نشانگ بوکیں نودربرانی کچ گیش اِنت-

روکپتی بلوچستان ءِ بنجاھی شھر دزاپ ءَ ایرانی لشکر ءَ یک مردمے آوار جنگ ءَ پد بیگواہ کرتگ-

گیشیں ھالانی رد ءَ دزاپ ءِ نادراہ جاہ ءَ ایرانی لشکر ءَ یک زدگیں مردمے آوار جنگ ءَ پد بیگواہ کرتگ-

ھالانی تہ ءَ گوشگ بیتگ کہ آئی ءِ دست ءَ گوستگیں سی ستمبر ءَ زھرشانی ءِ وھد ءَ تیر لگ اتگ ءُ چریشی ءَ چہ آ زدگ بیتگ-

آوار جنگ بیتگیں مردم ءِ پجار آصف گورگیج جھمنند شیر آباد ءِ نام ءَ زانگ بیتگ –

زانگ بہ بیت اے وھد ءَ دزاپ ءَ بازیں کچے ءَ زدگ بیتگیں مردمانی جاندراھی بیگ ءَ اِنت کہ اود ءَ زھرشانی ءِ وھد ءَ بازیں کچے ءَ مردم زدگ ءُ بیران بیتگ ات اَنت-

گوستگیں روچ ءَ داں بیرانیانی کچ نود ءُ ھشت ءَ سر بیتگ ات اَنت کہ تنی وھدی دگہ مردمانی جاور ھم ناگیگ گوشگ بیگ ءَ اَنت-

ھالانی تہ ءَ گوشگ بیتگ کہ آصف آوار جنگ ءَ پد ناشناسیں زنداناں برگ بیتگ ءُ پد ءَ دوبر آئی ءِ ھچ ھال نیست اِنت-

وندر ءَ ھار آماچیں زالبولاں بے نظیر انکم سپورٹ پروگرام ءِ واکدارانی بگیری ءَ زھرشانی کتگ –

گیشیں ھالانی رِد ءَ وندر ءَ ھار آماچیں زالبولاں بے نظیر انکم سپورٹ پروگرام ءِ واکدارانی بگیری ءَ وندر شھر ءُ کراچی تاں شال ءَ روکیں بنجاھی شھدگ بند کتگ ءُ چریشی ءَ بازیں گاڑی ءِ پنس اِتگ ءُ گاڑیانی لین لگ اِتگ –

درنگاز کنوکیں زالبولاں بے نظیر انکم سپورٹ پروگرام ءِ ڈپٹی ڈایکٹر عبدالوحید شاہ ءِ بگیری ءَ ترندیں نارہ جتگ – درنگاز کنوکانی گوشگ ات کہ تاں ھما وھد ءَ بے نظیر انکم سپورٹ پروگرام ءِ ڈاریکٹر عبدالوحید شاہ لسبیلہ بدل کنگ نہ بیت دگ ھچ وڈا پچ کنگ نہ بیت –

درنگاز کنوکانی گوشگ ات کہ بے نظیر انکم سپورٹ پروگرام ءِ ڈپٹی ڈائریکٹر نااھل ءُ وتی سرکاری کاراں شری ءَ کنگ ءَ نہ انت اپسرے اے وڈیں آپسر چہ لسبیلہ ءَ بدل کنگ بہ بنت –

بے نظیر انکم سپورٹ پروگرام ءِ ڈائریکٹر عبدالوحید شاہ ءَ گوں گند ءُ نند لوٹانی منگ ءَ پد شھدگ دوبر پچ کنگ بوتگ –

شال ءَ فزیو تھراپیسٹاں وتی لوٹانی ھک ءَ گورنر کارگس ءِ دیم ءَ نندانک جتگ، کہ اودا مزنیں کچے ءَ جنین ءُ مردینیں فزیو تھراپیسٹاں بھر زرتگ –

بلوچستان فزیوتھراپی ایسوسیشن ءِ نیمگ ءَ بلوچستان ءِ فزیو تھراپیسٹاں وتی لوٹانی ھک ءَ مروچی جی پی او چار راھ ءِ سر ءَ نندانک جتگ ءُ زھرشانی کتگ -فزیو تھراپیسٹاں مروچی ء یکسد ءُ بیست ءُ ھپت روچ سرجم انت کہ شال پریس کلب ءِ دیم ءَ زھر شانی ءَ بوتگ انت فزیو تھراپیسٹاں ھمے الزام جتگ کہ سرکار لوٹانی گیش گیواری بدل ءَ پرایمنیں زھرشانی دارگے ھاتر ء مزنیں کچے ءَ پولیس دیم دیگ انت –

درنگاز کنوکانی گوشگ ات کہ بلوچستان ءُ دگہ سوبھانی جاندراھی ءُ الاج ءِ تہ ءَ زمین ءُ آزمان ءِ تپاوت انت بلوچستان ءِ کُنڈ کنڈاں نشتگیں مردم کسانیں نادراھی ءِ ھاتر ءَ دگہ سوبھاں رو انت کہ اشی ءِ تہ ءَ ھچ شک نیست کہ دگہ جاھاں آھاں گیشتر آسراتی رسیت – اے آسراتی تہ پروفیشنل عملہ انت کہ فزیو تھراپیسٹ کہ جاندراھی ءِ ھاتر ءَ آئی ءِ بلاھیں کرد ءِ بیت بلے بلوچستان ءِ تہ ءَ اے شعبہ چہ سرکار ءِ نیمگ ءَ ھچ دلگوش دیگ نہ بوگ ءَ انت –

آھانی گوشگ ات کہ فزیکل تھراپی ءِ وڈیں بلاھیں شعبے ءَ مئے سوبہ ءِ تہ ءَ ھچ سنجیدگ زورگ بوگ ءَ نہ انت، دگہ سوبھاں فزیکل تھراپی ءِ ہیلتھ پروفیشنلز ڈاکٹر مزنیں نادراھیانی ھلاس کنگ ءِ ھاتر ءُ یک وشھالیں چاگردے ءِ جوڈ کنگ ءَ وتی کرد ءَ پیلو کنگ ءَ انت –

بلوچستان فزیوتھراپی ایسوسیشن ءِ رھشونانی گوشگ ات کہ مئے واھشت انت ما وتی سوبہ ءِ تہ ءَ نوکتریں آسراتی بیار این ءُ وتی راج ءِ کمک ءَ بہ کنیں کہ گریبی ءُ تنگدستی ءَ ابید دگہ جاھاں پہ الاج ءَ رؤ انت بلے چوش کہ سوبائی سرکار ءُ آئی گیر سنجیدگیں پالیسی اے گپ ءَ پدر کن انت کہ جانسلامتی ءِ درگت ءَ آھانی گور ءَ ھچ وڈیں پالیسی نیست –

ما ( فزیکل تھراپسٹ ڈاکٹراں) باز جھد کتگ کہ بید چہ نندانک ءُ زھرشانیاں وتی سوبہ ءِ تہ ءَ وتی کمیونٹی ءِ ھاتر ءَ روزگارے بندوبست ءَ سرکار ءَ رازی بہ کن ایں بلے بژن کہ اے برزی تبک ھاکم وت لوٹ انت کہ وانندھیں نودربر دگانی سر ءَ بیا انت ءُ زھرشانی بہ کن انت –

آھانی لوٹ چوش انت کہ ایندگہ سوبھانی وڈا ہیلتھ پروفیشنلز فزیو تھراپسٹ ڈاکٹر ءُ آھانی واست ءَ درستیں ٹرشری کئیر، ٹیچنگ ءُ ڈی ایچ کیو نادراھجاھاں آسراتی دیگ بہ بیت – وھدیکہ فزیوتھراپسٹ ہاؤس آفیسر کہ شال ءِ جتا جتائیں نادراھجاھاں کلینکل پریکٹس کنگ ءَ انت آھاں پیڈ ہاوس جاب دیگ بہ بیت –

لوٹانی ءَ گوشگ بوتگ کہ پنچ سالی ڈی پی ٹی ڈگری ھولڈرانی ھاتر ءَ بنداتی گچینی پالیسی یک سال ءِ کلینکل ہاؤس جاب ءِ بہ بیت ءُ سوشل ویلفیر ڈپارٹمنٹ بلوچسستان ءِ درسیں کیمپلکساں فزیو تھراپسٹسانی ھاتر ءَ آسراتی دیگ بہ بیت –

ھمے وڈ درسیں ڈی ایچ کیو ءُ ٹیچنگ نادراھجاھاں فزیکل تھراپی ءُ ریہبلیٹیشن سنٹر برجم کنگ بہ بیت- تاں ھما وھد ءَ مئے بنکی لوٹ پورا نہ بنت ما وتی زھرشانی ءَ ھمے وڈ برجاہ دار ایں –