TBP Balochi

روکپتی بلوچستان ءِ بنجاھی شھر زاھدان ءَ سلاہ بندیں مردمانی تیرگواری ءَ نودربرے ءَ ھوار دو مردم بیران بیتگ اَنت-

گیشیں ھالانی رد ءَ زاھدان یونیورسٹی آف میڈیکل سائنسز ءِ بیست ءُ پنچ سالی ئیں نودربر ناشناساں تیرباران کرتگ ءُ کشتگ –

نودربر ءِ پجار یاسر ناروئی ء عبداللہ ءِ نام ءَ زانگ بیتگ کہ آ ناشناساں دگ ءِ کش ءَ تیرگواری کرتگ ءُ کشتگ-

تیرگواری ءُ کوش ءِ سبب زانگ نہ بیتگ اَنت-

ھمے وڑ ءَ شیعہ کمیونٹی ءَ چہ سیادی داروکیں ملایے ءِ سر ءَ سلاہ بنداں تیرگواری کنان ءَ آ کشتگ-

تیرگواری ءَ بیران بیتگیں شیعہ عالم ءِ پجار سجاد سھرکی ءِ نام ءَ زانگ بیتگ کہ آ شیعہ مسیت زاھدان ءِ امام اِنت-

پولیس ءَ وئیل راست کرتگ ءُ گوشتگ کہ آ سلاہ بندانی تیرگواری ءَ ھما وھد ءَ بیران بیتگ کہ آ مسیت ءَ چہ دراتکگ بیتگ ءُ لوگ ءَ روگ ءَ بیتگ ءُ سلاہ بنداں تیرگواری کرتگ ءُ کشتگ-

پولیس ءِ رد ءَ آ تیرگواری ءَ چہ زدگ بیتگ ءُ نادراہ جاہ ءِ برگ ءِ وھد ءَ آ نادراہ ءَ سر کنگ بیتگ بلے آئی ءَ ساہ داتگ اَنت-

پولیس ءِ رد ءَ سجاد سھرکی ءِ کوشکارانی پٹ ءُ پول برجاہ اِنت ءُ اے درگت ءَ گچینی پٹ ءُ پول ءَ ٹیمے دارگ بیتگ-

روکپتی بلوچستان ءَ یک ماھے ءَ گیش اِنت کہ اود ءَ جاورانی ناگیگی ءَ بازیں کچے ءَ مردماں مرگ ءِ دیمپانی کنگ کپگ اِنت-

سربوتگیں ھالانی رِد ءَ گوستگیں روچ ءَ بزاں دو نومبر ءِ شپ ءَ ناشناسیں سلاہ بندیں مردماں کیچ ءِ دمگ ھیرونک ءَ پاکستانی پوج ءِ سر ءَ اُرش کُتگ –

اُرش ءِ ھیرونک ءِ کوھی دمگاں برجاھیں پوجی پانگسے ءِ سر ءَ کنگ بوتگ چریشی ءَ پاکستانی پوج ءَ جانی ءُ مالی تاوان ءِ دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ –

جارکش ءَ وتی درشان ءِ تہ ءَ گوشتگ کہ دو نومبر ءِ شپ ءِ ادار دھ ءَ سرمچاراں ھیرونک ءِ کوھی دمگاں برجاھیں پوجی پانگسے ءِ سر ءَ راکٹ ءُ دگہ مزنیں سلاھاں گوں اُرش کتگ – اُرش ءَ پوج ءَ جانی ءُ مالی تاوان رستگ –

آئی ءَ وتی درشان ءِ گڈسر ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

بلوچستان ءِ دمگ بولان ءَ مروچی پنچمی روچ ءَ پاکستانی پوج ءِ لشکر کشی برجاہ ءَ اِنت – پوج ءَ چُک ءُ زالبول آوار جتگ اَنت، جنگی بالگردانی بُرز بالی دمگ ءَ یکشلہ برجاہ ءَ اِنت-

ٹی بی پی ءَ سربیتگیں ھالانی رِد ءَ پاکستانی پوج ءِ کارندھاں بولان ءِ دمگ اوچ کمان ءَ زالبول ءُ چک یکجاہ مچ کتگ اَنت داشتگ اَنت- کہ آ تُرندیں سارتی سر ءَ نادینتگ اَنت وھدے کہ اشانی تہ ءَ چُکاں ھوار پیرکماش ھوار اَنت-

دومی نیمگ ءَ اے ھال ھم سر بوگ ءَ اِنت کہ پاکستانی پوج ءَ زالبول گوں چُکاں ھوار یازدہ مردم آوار جتگ ءُ بیگواہ کتگ اَنت-

پوج ءِ دست ءَ آوار جنگ بیتگیں زالبول ءُ چُکانی پجّار سمو سمالانی، زربخت سمالانی، بانی سمالانی ، فریدہ ، سمیدھا سمالانی ، راجی سمالانی ، ماھسو سمالانی، گُل بی بی سمالانی ، زرگُل مری ، حنیپہ مری ءُ دُرخاتون مری نام ءَ چہ بیتگ اَنت-

زانگ بہ بیت اوچ کمان ءِ دمگ ءَ پیسر ءَ بمب گواریں بالگرداں شیلنگ کتگ اَت وھدے کہ اے دمگ ءَ تراکانی توار اش کنگ بیتگ-

دمگی ھالانی رِد ءَ روگ ءُ آھگی سرجمیں راہ ءُ در بند بوگ ءِ سبب ءَ دمگ ءَ ورگی توژگ کمی ودی بیتگ- سرجمیں دمگ کرفیو جنگ بیتگ- میتگانی سر ءَ تُرندی کنگ بوگ ءَ اِنت- ھمے میان ءَ نادُراھاں تُرندیں دلسیاھی ءِ دیمپانی اِنت کہ آیاں دوا درمان ءُ ڈاکٹرانی گور ءَ روگ ءَ نیلگ اَنت-

مروچی پنچمی روچ ءَ ھم جتائیں جاھاں بالگرد شیلنگ ءُ بمبگواری کنگ ءَ اَنت چریشی ءِ آسر ءَ لَس مھلوک ءَ جانی ءُ مالی تاوان ءِ ھال آھگ ءَ اِنت –

اے ھال ھم سر بوگ ءَ اِنت کہ کوھی دمگاں گلہ کشت ءُ کشاراں لوگاں چہ در کنگ ءُ تیرباران کنگ ءَ اَنت کُشگ ءَ اَنت ءُ اے گمان کنگ بوگ ءَ اِنت لَس مھلوک ءَ بلوچ جُھدکار پدر کن اَنت-

گوستگیں روچ ءَ پاکستانی پوج بنشون آئی ایس پی آر ءَ دمگ ھَ لشکر کشی راست کتگ ءُ گْوشتگ کہ سلاہ بندیں میڑ ءَ دو ایس ایس جی کمانڈوز مرتگ اَنت- آئی ایس پی آر ءَ چار بلوچ آجوئی لوٹوکانی جنگ ءِ ٹاہ جتگ بلے تنی وھدے دگہ رسانکدر ءَ اے گپ راست کنگ نہ بیتگ-

اشی ءَ پد بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ میڑاں پاکستانی پوج ءِ ھشت ایس ایس جی کمانڈوز جتگ –

بولان ءُ کش ءَ گوراں لشکر کشی ءِ بندات انچیں وھدے ءَ کنگ بیتگ وھدے بلوچ لبریشن آرمی ءَ گْوستگیں روچاں دزگیر کتگیں دو پاکستانی پوج ءِ کارندھانی یل کنگ ءِ بدل ءَ وتی لوٹانی ھاتر ءَ چار نومبر ءَ تاں گُڈی روچ داتگ-

گوستگیں روچاں بی ایل اے ءِ جارکش ءَ رسانکدر ءَ شنگ کتگیں درشان ءِ تہ ءَ بی ایل اے پاکستانی پوج ءَ جنگی بندیگانی بدل ءِ ھاتر ءَ دگہ یک ھپتگے وھد داتگ، چریشی ءَ پد بی ایل اے ءِ دزگیریں جنگی بندیگاں جونیئر کمیشنڈ آفیسر کیلم اللہ ءُ ملٹری انٹیلیجنس ایجنٹ محمد فیصل ءَ بلوچ راجی آمیدگس ءَ چہ رسوکیں سزا ءِ سر ءَ گامگیج زورگ بیت-

زانگ بہ بیت بلوچ راجدوستیں گل ءُ انسانی ھکانی ءِ جتائیں گلاں باز رند ءَ پاکستانی پوج سر ءَ اے بھتام جنگ ءُ آھگ ءَ اَنت کہ بلوچ جنگولانی سر ءَ لشکر کشی ءِ نام ءَ بلوچستان ءِ کوھی دمگ میتگ ءُ لَس مھلوک سر ءَ بمبگواری کنگ بیت ءُ ھمے میان ءَ دزگیری ءُ کُشتگیں مردماں جنگول پدر کن اَنت-

نبشتانک :وھد چہ دست ءَ شُتگ

نبشتہ کار : شاھد اھمد

دی بلوچستان پوسٹ

زندگی روچ پہ روچ گوں وھد ءِ ھمراھی ءَ ءُ گوں وتی داب ءُ رنگ ءَ مٹ کنگ ءَ اِنت گیشتریں وھد ءَ مردم وتی زند ءَ چے کار ءِ تہ ءَ گْوازینگ ءَ اِنت ءُ وھد ھم مئے میراس اِنت بلے ما وھد ءَ چے پیم ءَ کارمرز کنگ ءَ ایں؟ وھد ءَ زندگی ءَ گوں ھچ کار نیست بلکیں زندگی ءَ وھد ءِ ھمراھداری الم کنگ لوٹ اِیت۔ اگاں کَسے ءَ وھد پَھم اِت بزاں وتی جِند پَھم اِت ئِے ءُ من وت ءَ گوں وھد ءِ ھمراھداری ءَ میزان میزان ءَ پَھم اِت چیاکہ بندات ءَ من وَ وھد نہ پَھم اِتگ بلے مرچی من ءَ سما بوتگ کہ زندگی وھد ءِ ھمراھداری ءَ چون بکنت۔لھتے چیز ھست اَنت کہ من ءَ سما ئِے داتگ۔

گْوَستگیں وھداں من ءَ ھچ چیز ءِ بابت ءَ سرپدی نہ بوتگ بے سمائی ءَ زند گوازینتگ بلے من ءَ کتاباں وھد ءِ بابت ءَ رھشونی دات۔

“جنین آدمانی وھد سکّ ءَ ھراب گْوستگ چمیشکا مردین آدم آسودگ نہ اَنت”

مردین ءَ ھَک ھست کہ اے جنک دوست بیت بلے وھدے کہ جِنک ءَ ھک نیست کہ بچک ءَ دوست بدار اِیت بلے تُرس ءِ آماچ ءَ گوشت ئِے نہ کنت۔ مھر وَ جنینی چیزے گڑا وھد مردیناں پرچا تَھنا وتی میراس کُتگ کہ جنین مردینے نہ اِنت۔

مردین گیشتر بگا بوگ ءَ اَنت چیاکہ جنین جنینی کَٹّ ءَ ھم شُتگ اَنت گڑا ملامتی کَے اِنت تئی پت اِنت یا مات اِنت ءُ یا مُلا پرچا جنیناں سَھر دنت؟-

زندگی وھد لوٹ اِیت ءُ وھد ءَ مھر ءِ گون ءَ جنگ لوٹ اِیت گیشتریں وھد زندگی مرگ ءِ بابت ءَ جیڑ اِیت ءُ بے سریں زند وَ پیسر ءَ مرگ ءِ آماچ اِنت زندگی ءِ واست ءَ مِرگ بہ لوٹ ناں کہ بس ساہ کَشّگ ءِ واست ءَ ھُشکیں ساھے کَشّگ ءَ مور ءُ مَدگ بس اَنت گڑا وَ انسانے ئے؟-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کتاب : مُروارِد

نبشتکار : جان ارنسٹ اسٹینبک

رجانکار : ڈاکٹر الی دوست

چمشانک دیوک : وسیم بلوچ

دی بلوچستان پوسٹ

   
اِے کتاب ءِ نبشتہ کار اِنت جان ارنسٹ اسٹینبک( 27اُستپان 1902- 20 تاکشان 1968) آ یک امریکی نامداریں نبشتہ کارے اَت، آئی ءَ بیست ءُ ھپت کتاب نبشتہ کُرتگ۔ آئی ءَ را لبزانک ءِ نوبل داد ھم دیگ بوتگ۔ (the pearl) مُروارِد 1947 ءَ چاپ ءُ شنگِ بوت۔ مُروارِد یک کھولے ءِ کسّہ اِنت کہ آیاں یک مُروارِدے دست کپ اِیت ءُ اِے مُروارِد ءِ دست کپگ ءَ پد آ چونیں چکّاس ءُ جنجالانی دیم پان بنت، اِے بابت ءَ کسانیں چمشانکے دے آں۔ کتاب ءِ بندات ءَ ھما کھول ءُ میتگ ءِ ندارگ ءَ پیشدار اِیت۔ اِشی ءِ کارست  کھولے کہ سے کس اَنت یکےکینو، دومی آئی ءِ جنین جیونا ءُ سیمی آیانی نُنک کویوٹیٹوؔ اِنت بندات ءَ ھما میتگ ءُ چاگِرد ءِ ندارگ کشی کنگ بوتگ۔ یک روچے کویوٹیٹو ءِ گْوانزگ ءَ دْرنجوکیں چیلک ءَ چہ یک زومّے دیم ءَ جھل ءَ آیان اِنت کہ آئی ءِ مات ءِ چمّ بہ گْوانزگ ءَ آیوکیں زوم ءَ کپ اَنت۔ ھُشک ءُ ھیران بیت، سنگ ءُ سْیاہ اوشت ایت ءُ جادوئی دوا وانگ ءَ لگ اِیت دانکہ زومّ کویوٹیٹو ءَ مہ وارت وھدے کہ زومّ جھل ءَ کیت کینو دست ءَ بُرز کنت کہ من آئی ءَ گِر آن ءُ کُش آں، بلے گوانزگ ءِ نُنک بچکند اِیت ءُ چیلک ءَ سُرین اِیت زومّ گوانزگ ءِ تہ ءَ کپ ایت ءُ وتی کار ءَ کنت۔ کینو چہ زھر ءَ ھمے زوم ءَ گیپت ءُ چُنڈ چُنڈ کنت کویوٹیٹو چہ بازیں درد ءَ گریوگ ءُ چیھانٹ ءَ لگ اِیت۔ جیونا آئی ءَ کُٹّ ءَ کنت ءُ آئی ءِ ھمے زومّ ورتگیں ٹپ ءَ دپ ءَ کنت ءُ چُش اِیت ءُ زھراں در کنت بلے انگت آئی درد کم نہ بنت ءُ پریات ءُ زار ءَ بس نہ کنت ءُ چہ ھمے زھگ ءِ واو ءُ پریاتاں دُرستیں ھمساھگ کا اَنت باریں جیڑہ چی اِنت؟ جیونا مرد ءَ توار کنت کہ ڈاکٹرے بْیار بلے پہ اِے وڑیں پدمنتگیں چاگِرد ءَ یک چُشیں ڈاکٹرے نیست کہ یک بزگے ءِ درد ءَ دوّا بہ کنت۔

گُڈّی ءَ بزگ بنت کہ زھگ ءِ جِند ءَ ڈاکٹرے ءَ بہ بَر اَنت گُڑا زھگ ءَ زور اَنت ءُ دیم ءَ ڈاکٹر ءِ بادگیر ءَ ھمساھِگ ھم کا اَنت گوں یک روانکے ءِ پیم ءَ راہ ءَ روان بنت، دیم ءَ چرچ ءِ دیم ءَ نِندوکیں پکیر ھم ھوار کپ اَنت گوں پرچا کہ اِے درتہ پُچیں مرد ءَ گِند اَنت زان اَنت کہ ٖڈاکٹر اِے پیمیں بزگیں مردمانی اِلاج ءَ نہ کنت پمیشکا ھوار کپ اَنت کہ باریں چے بیت۔ وھدے کہ روانک ماں ڈاکٹر ءِ بادگیر ءَ رَس اِیت، کینو گیٹ ءَ ٹُکّ اِیت یک کاردارے کیت ایشاں جُست کنت کہ شما چونیں مردم اِت؟ کینو گُش اِیت کہ مئے گونڈویے ءَ را زومّ ءَ وارتگ ما ڈاکٹرے ءَ آورتگ کہ دارو ءُ درمانے دنت ئِے کاردار پد ءَ در ءِ دپ ءَ بند کنت ءُ روت کہ ڈاکٹر ءَ ھال دے آں۔ ڈاکٹر جُست کنت “ھاں” کاردار گُش ایت” گوں گونڈو ءَ یک انڈینے گون اِنت گُش اِیت کہ آ را زومّ ءَ وارتگ”-

ڈاکٹر گْوش اِیت ” زاناں لولوکانی ورگے دارو ءُ درمان ءَ ابید من ءَ دگہ کار نیست؟ من ڈاکٹرے آں۔ دلوتانی تبیبے نہ آں نوکر ءَ گْوَشت ” ھاں، منی واجہ” زاناں آئی ءِ کِرّ ءَ زَرّ ءُ مّرے ھست؟” ڈاکٹر ءَ گْشت” دنیا ءِ تہ ءَ یکیں مردم من آں کہ مُپتیں کار کن آں نو من چہ ایشی ءَ دم بُرتگ بچار باریں آیاں زَرّ ھست اِنت؟” نوکر ءَ گیٹ ءَ را پچ کُرت ءُ مردمانی نیمگ ءَ چار اِت ءُ اے رندی وتی کوھنیں زبان ءَ گْوشت ئِے “زاناں دارو ءُ درمان ءِ واست ءَ شمارا زَرّ گون اِنت؟-

کینو کمبل ءِ چیر ءَ وتی دست بُرت ءُ چہ جاگھے ءَ کاگدے درکُرت کہ باریں چُنت رند ءَ پتاتگ اَت آئی ءَ را پچ ئِے کُرت کہ چہ آئی ھشت بد ڈولیں مُروارِد دراتک۔ نوکر ءَ کاگد زُرت ءُ گیٹ ءَ را پد ءَ بند کُرت بلے اِے رندی دور نہ شُت ءُ پد ءَ اَتک ءُ کاگد ئِے پد ءَ سر کُت ءُ گْوَشت ئِے کہ ڈاکٹر دگہ نادراھے ءِ گور ءَ شُتگ گیٹ ئِے بند کُت پُشت ئِے مان دات ءُ شُت روانک ءِ مردم ھر کس پُشت ءَ بوت ءُ شُت دانکہ کینو گیش ملامت مہ بیت۔
کینو ءَ ھچ گپ نہ جَت ءُ گیٹ ءَ را زھر ءَ مُشتے جَت ئِے۔ گوں ھیرانی ءَ چار اِت کہ منی دست ءَ چہ ھون پِٹگ ءَ اِنت ءُ لنککے پُرشتگ۔

کینو ءِ کیمتیں چیز آئی ءِ یدار اَت کہ آئی پِس ءَ داتگ اَت کینو ءُ جیونا اَتکگ اِت اَنت تیاب ءَ کہ رواں بلکیں شکارے بوت ما وتی چُک ءِ اِلاج ءَ کن ایں ءُ آئی ءَ پہ جْوانیں گُد ءُ چیز گِر این ءُ  آئی ءَ وانین اِیں۔ جیونا  پہ وتی چُک ءَ گیش پہ یک کیمتی مُروارِدے ءِ دوا ءَ کنگ ءَ اَت۔ کویوٹیٹو ءِ دست گْوات گیپتگ اَت داں گردن ءَ بلے نو آرام اَت آیاں وت دارو ءُ درمان کُتگ اَت۔ اِے روچ ءِ شکّار ءَ دنیا ءِ مستریں کیمتیں مُروارِد دست کپت گُڑا  چہ بازیں گَل ءَ کُوکار ئِے کُت اِندگہ ناھُدایاں وتی یدار ءِ دیم بہِ کینو یدار ءَ دات کہ آئی ءَ کیمتی مُروارِدے دزکپتگ کینو تنیگا لوگ ءَ سر نہ اَت کہ ھال ءَ دُرستیں میتگ سئی بوت کہ کینو ءَ کیمتیں مُروارِدے دیستگ اِے ھال ھما چَرچ ءِ پکیراں رَس اِت کہ آیاں گْوَشت اِے گریب ءَ را کہ انچوکیں مزنیں مُروارِدے دست کپتگ الم مئے ھیرات ءَ دنت اِے ھال ھما سوداگراں سَر بوت کہ آ مُروارِد ءِ سوداگری ءَ کنگ ءَ اَنت، اِے ھال ھما ڈاکٹر ءَ رَس اِت ھر کس ھیران بوت ءُ گوں کینو ءَ وت ءَ نزیک کنگ ءِ جُھد اِش کُت آئی ءِ بْرات جون ٹومس آئی ءِ نشار اپولونیا ھم سک باز وش اِتاں بیگاھے ءَ آئی گِس چہ ھمساھِگ ءَ پُرّ اَت ھرکسی چمّ بہ کینو ءِ مُروارِد ءَ سک اِت اَنت۔ آئی ءِ راستیں دست ءِ نیمگ ءَ آئی بْرات نِشتگ اَت ءُ چہ آئی ءَ جُست ئِے کُت کہ تو نو سیر بوتگ ئے چے کنگ لوٹ ئے؟ آ باز جیڑگ ءَ اَت کہ من پہ وت جْوانیں گُد گِر آں ، جْوانیں لوگ بند آں، چُک ءَ وانین آں پہ وت یک تُپنگے گِر آں دگہ دگہ باز جیڑگ ءَ لگ اِت شپ ءَ یکے ایشی ءِ دُزّگ ءَ کیت ءُ چیزے ءِ توار بیت آ گْوش اِیت کہ اِے بلکیں منی وھم اِنت، دومی رند ءَ پد ءَ یکے لنکُکّانی ڈگار ءِ کرّگے توار بیت۔ نو کینو تُرس ءِ آماچ بیت ءُ وتی کارچ ءَ زُور اِیت ءُ آئی ءِ سر ءَ اُرش کنت بلے سوبمَنْد نہ بیت۔

دومی رند ءَ پد ءَ پہ اُرش کنگ ءَ آئی ءِ سر ءَ چیزے لگ اِیت ءُ چم ئِے تیری میری کن اَنت چہ بازیں درد ءَ ڈگار ءَ کپ ایت ءُ نو دُزّ تچ اِیت۔ جیونا کیت آسے روک کنت ءُ کینو ءِ پیشانی ءِ ھوناں گوں گُدے ءَ پھک کنت نو جیونا بے تاھیر بیت ءُ گُش اِیت کہ اِے شیتانی چیزے ایشی ءَ دور بہ دے، اِے مارا برباد کنت مئے زھگ ءَ ھم اِیشی ءَ پد ءَ بَر دریا ءَ دور بہ دے۔ کینو بد بارت ءُ وتی جَنین جیونا ءَ گُش ایت “ھوش اِے مئے بھت اِنت کہ ھدا ءَ مارا داتگ ما ایشی ءَ بھا کن ایں سیر بہ ایں” –
 
ھمے وڑ ءَ( لاپاز) ءَ سھبے ءَ ھال تالان بوت کہ مرچی کینو وتی مُروارِد ءِ  بھا کنگ ءَ روگ ءَ اِنت۔
ھمساھِگ دُرست گَل اِت اَنت کہ کینو ءَ اِنچو زَرّ بہ رَس اِیت  تہ اَلم گریب ءُ بزگانی ھیال ءَ کنت چو زردارانی وڑ ءَ نہ بیت۔ جیونا ءَ وت ءَ جْوان شوک کُت گونڈیں کویوٹیٹو ءَ را ھم شوک ئِےکُت ءُ زُرت ئِے۔ دراَتک اَنت پہ مُروارِد ءِ بھا کنگ ءَ اِیشانی ھمراھی ءَ سک باز مردم گون کپ ایت چو یک روانکے ءِ پیم ءَ روان بنت۔ وھدے کہ سر بنت اولی سوداگر ءِ گْور ءَ آ گْوش اِیت اِے مُروارِد یک مزنیں مُروارِدے بلے بھا نہ بیت اگاں شما من ءَ دے اِت ئِے من شمارا ھزار کلدار دے آں۔ اِے نہ منّ اِیت ءُ گْوش اِیت اِے ھساب ءَ نہ دے آن ئِے دگہ دو سوداگر کیت آ ھم ھشت سد کلدار ءِ گُش اَنت اِے نہ دنت ئِے ءُ گُش اِیت اِے کیمتیں مُروارِدے ایشی کیمت باز اِنت شما من ءَ رد دیگ ءَ اِت اِے کہ راہ کپ اِیت گُڑا ءَ ھما اولی سوداگر گوْش اِیت کہ من شمارا پانزدہ سد دے آں۔ بلے اِے نہ دنت ئِے کینو ءَ وتی زند ءَ پانزدہ سد کلدار نہ دیستگ بلے اَنگت مُروارِد ءَ اِے ھساب ءَ نہ دنت پد ءَ لوگ ءَ واتر بنت جیونا ءَ تُرس اِنت کہ اِے بھا نہ بیت اِے شیتانی چیزے مارا برباد کنت۔ 
     
شپ ءَ وپس اَنت، شپ ءِ نیم ءَ جیونا پاد کیت ءُ مُروارِد ءَ زور اِیت مدان مدان ءَ لوگ ءَ دَر کیت کہ من اِیشی بر آں دریا ءَ دور دے آں کینو ھم پاد کیت ءُ آئی ءِ پُشت ءَ روت گوں آ دریا ءَ سر نہ بیت کہ کینو آئی ءَ را چہ پُشت ءَ جَنت لگتے کُپت ءَ آ کپ ایت ءُ چہ کُپت ءِ درد ءَ پاد اَتک نہ کنت۔ کینو وتی مُروارِد ءِ شوھازگ ءَ بیت کہ آئی ءِ سر ءَ دگہ یکے اِرش کنت کہ من مُروارِد ءَ ئِے پچگر آن ءُ بر آں۔ بلے کینو ءِ کارچ آئی ءَ لپاش اِیت مَرد کہ کپ ایت، جیونا پاد کیت چہ تُرس ءَ گُش اِیت “تئی مُروارِد اِیش اِنت سنگ ءِ سر ءَ کپتگ مرد ءَ مہ کُش” کینو گُش اِیت کہ “من ایشی ءِ سر ءَ اُرش نہ کُتگ ایشی ءَ وت منی سر ءَ اُرش کُتگ دانکہ من ءَ بہ جَنت ءُ منی مُروارِد ءَ بہ بارت من وتی تُرس ءَ ایش ءَ کُشتگ”۔

ایشی ءِ کُشگ ءَ رند یدار ئِے سوچگ بیت ءُ لوگ ھم ماندارگ بیت گُڑا وتی زھگ ءُ جنین ءَ زور اِیت ءُ تھاری ءَ وتی بْرات جون ٹومس ءِ لوگ ءَ روت ءُ وتی دُرستیں سرگْوست ءَ بْیان کنت برات اِے روچ ءَ چیر دنت ئِے ءُ گُش اِیت کہ “منی کِرّ ءَ مہ جل کہ تو اد ءَ گِرگ بہ شپ ءَ بہ تچ ءَ اِے مُلک ءَ چہ در ءَ کہ تئی جِند کُشگ بیت ءُ اِے مُروارِد شیتانی چیزے اِیشی ءَ پد ءَ دریا دور دے کہ ترا گار کنت”. بلے مُروارِد ءِ دور دیگ ءَ رازِیگ نہ بیت ءُ شپ ءَ بْرات ءَ رُکست کنت ءُ در کیت چہ میتگ آں دیگہ دیمے ءَ روت۔ پدگِر ھم اِیشی رنداں گِران بنت ءُ رواَنت۔

گُڈّی ءَ یک شپے ءَ کوہ ءُ گارے ءَ جَل اَنت چہ تلاپے ءَ آپ ور اَنت ءُ گار ءِ تہ ءَ رو اَنت کویوٹیٹو گریت جیونا آئی ءَ کیک ءُ ورگ دنت ءُ وش کنت یک تُپنگ والا اپس سوارے ءُ دگہ دو پدگِر ھم ایشانی پُشت ءَ آیان داں ھمے تلاپ ءَ سر بنت شپ کپ اِیت اِش ءُ ھمد ءَ دو وپس اِیت ءُ یکیں تپنگ والا مرد آیانی پاسپانی ءَ نِند اِیت گُڑا کینو گوں جیونا ءَ پیسلہ کَنت کہ نو دگہ راہ نیست یکیں راہ ھمیش اِنت کہ من آیاں گوں جنگ بہ کن آں۔ اگاں من جَنگ بوت آں تو چہ اد ءَ بہ تچ ءُ بُرو اگاں من آیان ءَ جُت گُڑا ما بچ اِتگ ایں ھمے وھد ءَ تھاری ءَ پاسپانی کنوکیں مرد سِگریٹے روک کنت کمو روژنائی ءَ آئی ءِ تُپنگ زاھر بیت کہ آئی ءِ کِرّ ءَ اِیر اِنت ھمد ءَ کینو روت کہ من آئی ءِ سر ءَ چہ ماہ ءِ دَرّوگ ءَ ساری اُرش بہ کن آں دانکہ ماہ ءِ مھتاپی ءَ من بے سوب بہ آں۔ گُڑا کینو وتی زھم ءَ زور اِیت ءُ گوں شیواری ءَ مدان مدان ءَ آئی ءِ کِرّ ءَ سر بیت کہ زھگ گریوگ ءَ لگ اِیت یک چہ دومی ءَ جُست کنت کہ زھگے ءِ گریوگ اِنت دومی گُش اِیت اِنّا اے کُچِک ءِ گُلّوے ءِ توار اِنت، آ وپس اَنت گُڑا کینو شیواری ءَ گوں وتی زھم ءَ آئی ءِ سَر ءَ اُرش کنت ءُ تُپنگ ءَ پچ گیپت آیاں ھم جَنت ءُ کُش اِیت پد ءَ وتی زھگ  جنین ءَ زور اِیت ءُ وتی مُلک ءَ واترّ کنت۔

اِے گِدار وانگ ءَ پد من ءَ وتی بلوچ راج ءِ بزگی دیم ءَ اَتک کہ مئے مُلک ءَ کُجام گوھر کیمتی نیست، سُھر ، گیس، سنگ، تیل ءُ زمینانی کِشت ءُ کیشاری چے نیست بلے ھمے ھُدا ءِ داتگیں ھزانگ ءِ سبب ءَ ما در پہ در کنگ بوتگ ایں ھر روچ مئے ورنایانی لاش ماں ویرانگ ءَ کپتگ اَنت۔ کسے کہ دانکے چہ دپ ءَ در کنت گُڈّی روچ ءَ بدواہ آئی ءَ گِر اَنت ءُ تھاریں کوٹی ءُ آزابانی باھوٹ کن اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوریچانی کوریا ءَ پشمبے ءِ روچ ءَ بازیں بیلسٹک میزائلانی چکاس کتگ اَنت چریشی ءِ سبب ءَ رودراتک ءُ گوریچانی جاپان ءِ دمگاں ترس ودی بیتگ اَنت ءُ شھری مھکمیں جاھاں برگ بیتگ اَنت-

برطانوی ھبر رساں ادار روئٹرز ءِ رد ءَ گوریچانی کوریا ءِ نیمگ ءَ آس دیگ بیتگیں میزائلانی بارو ءَ گمان پدر کرتگ کہ اشانی توک ءَ انٹرکانٹیننٹل بیلسٹک میزائل (آئی سی بی ایم) ھوار بیتگ-

میزائلانی آس دیگ ءَ پد واکداراں بیھاری شنگ کتگ ءُ گوشتگ کہ یک میزائلے جاپان ءِ سر ءَ گوستگ بلے پد ءَ اے گپ دروگ کنگ بیتگ-

زرباری کوریا ءُ جاپان گمان پدر کنگ ءَ اَنت بوت کنت آ میزائل آئی سی بی ایم ءُ گوریچانی کوریا دور جنگی ءِ میزائل ءَ وتی جوھری موادانی برگ ءِ سنچ ءَ دارگ اِنت-

ھمے وڑ ءَ گوریچانی کوریا ءَ دو کم گاماں آس دیوکیں میزائلانی چکاس کتگ اَنت –

نوکتریں چکاس یک روچے ءَ پد دیم ءَ اتکگ بیتگ چریشی ءَ یک روچے ءِ وھد ءَ گوریچانی کوریا کم چہ کم بیست ءُ سَے میزائل آس داتگ اَنت اولی رند ءَ یکے زریاری کوریا ءِ زر ءِ نزیک ءَ کپتگ –

زرباری کوریا ءِ نائب وزیر ھارجہ ھائیون ڈانگ ءُ امریکہ ءِ نائب وزیر ھارجہ وینڈی شرمن ءُ گوریچانی کوریا ءِ چکاس ایر جتگ اَنت-

برطانوی ھبر رساں ادارہ روئٹرز ءَ زرباری کوریا ءِ جوائنٹ چیفس آف اسٹاف ءِ بیان ءِ درور دیان ءَ گوشتگ کہ وانسن زر ءِ دمگ ءَ کم گاماں آس دیگ بیتگیں میزائل آس دیگ بیتگ-

دومی نیمگ ءَ زرباری کوریا ءِ سروک یون سوکیول ءِ کارگس یَ گوشگ بیتگ ات گوریچانی کوریا ءِ نیمگ ءَ اے چکاس دمگانی سر ءَ اُرشی اِنت –

زاھدان ءَ یک مردمے آوار جنگ بیتگ ءُ سراوان ءَ یکے یل بیتگ-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی چیریں ادارھاں یک مردمے آوار جنگ ءَ پد بیگواہ کرتگ-

اے مردم گوستگیں دو روچاں پیسر ما زاھدان ءَ آوار جنگ ءُ بیگواہ کنگ بیتگ کہ آئی ءِ پجار اسماعیل شاہ بخش ءِ نام ءَ زانگ بیتگ-

ھالانی تہ ءُ گوشگ بیتگ کہ اسماعیل یک چار سد ءُ پنچ پژوے ءَ آئی ءِ رندگیری کرتگ ءُ پد ءَ اسماعیل اش آوار جتگ ءُ برتگ-

ھمے وڑ ءَ چہ سراوان ءَ ھم یک مردمے آوار جنگ ءَ پد بیگواہ کنگ بیتگ –

سراوان ءَ آوار جنگ بیتگیں مردم ءِ پجار علیر رضا جنگی زئی ءِ نام ءَ زانگ بیتگ کہ آ گوستگیں روچاں ما سراوان ءَ آوار جنگ برگ بیتگ ءُ پد ءَ گوستگیں روچ ءَ یل کنگ بیتگ-

ھالانی تہ ءَ گوشگ بیتگ کہ پد ءَ چیزے روچانی دارگ ءَ پد علیر رضا ایرانی چیریں ادارھاں یلو کتگ –

بلوچستان ءِ دمگ بولان ءَ مروچی چارمی روچ ءَ ھم پوج ءِ لشکر کشی برجاہ بوتگ – اے ھم ھال آیگ انت کہ پوج ءَ بولان ءِ بازیں دمگ سرجمی ءَ انگیر کتگ ءُ رؤگ ءُ آیگ ءِ سرجمیں راہ ءُ در بند کتگ انت – ھمے میان ءَ بازیں بالگرد ھم تر ءُ گرد ءَ گندگ بوتگ انت –

دمگی اھوالکارانی رِد ءَ رؤگ آیگ ءِ سرجمیں راہ ءُ درانی بند بوگ ءِ سوب ءَ دمگ ءِ تہ ءَ وردنی راشن ءِ ڈکال انت – سرجمیں دمگ ءَ کرفیو انت – مھلوک انگیر ءِ تہ ءَ انت اے میان ءَ نادراہ ھم سک باز دلسیاہ انت کہ پہ آھاں درمان ءُ ڈاکٹرانی گور ءَ رؤگ ءَ نیلگ ءَ انت –

دمگی اھوالکار ءِ رِد ءَ سرجمیں دمگ وھد وھد ءِ سر ءَ بمب تراکانی توار ھم آیگ ءَ انت – چریشی ءِ سوب ءَ لس مھلوک ءِ جان ءُ مال ءِ تاوان ءِ ھال ھم آیگ انت –

اھوالکار ءِ رِد ءَ اے ھم ھال آیگ انت کہ کوھی دمگاں گلہ ءِ کشت ءُ کشانی کنوکیں دھکانکار چہ گساں در کنگ بوگ انت ءُ آھاں تیرباران کنگ ءُ کُشگ انت – ھمے گمان کنگ بوگ ءَ انت کہ لس مردم بلوچ سرمچار زاھر کنگ بنت –

گوستگیں روچ ءَ پاکستانی پوج آئی ایس پی آر ءَ دمگ ءِ تہ ءَ لشکر کشی ءِ ھبر راست کتگ ءُ گوشتگ کہ جنگ چوپ ءَ دو ایس ایس جی کمانڈو مرتگ انت – آئی ایس پی آر ءَ چار بلوچ سلاہ بندانی کوش ءِ ٹاہ ھم داتگ ات بلے تنی وھدی دمگی اھوالکارانی نیمگ ءَ اے ھبر راست کنگ نہ بوتگ –

لشکر کشی بولان ءِ دمگ کمان، اوچ کمان، یخو، بزگر ءَ ھوار ھرنائی ءِ کوھی دمگاں کنگ بوگ ءَ انت وھدیکہ مروچی سبی ءِ کوھی دمگاں ھم بالگردانی تر ءُ گرد ءِ تہ ءَ گیشی گندگ بوتگ –

بولان ءُ کش ءُ گوراں لشکر کشی ھنچیں وھدے ءَ کنگ بوتگ کہ بلوچ لبریشن آرمی ءَ گوستگیں روچاں دزگیر کتگیں دو پاکستانی پوجی کارمندانی یل کنگ ءِ بدل ءَ وتی لوٹانی گڈی مھلت چار نومبر داتگ ات –
یات بہ بیت کہ ھمے سال ءِ بیست ءُ پنچ ستمبر ءِ شپ ءَ ھرنائی ءِ دمگ زردآلو ءِ ھند ءَ سلاہ بندیں مردماں بنجاھی شھدگ بستگ ات گاڑی پٹ پول کتگ ات انت ءُ پجار کنگ ءَ پد دو مردم دزگیر کتگ ءُ گوں وت برتگ اِتنت – وھدیکہ سلاہ بندیں مردماں اشکر بروکیں چار ٹرکانی ٹائر ھم تراکین اِتگ اتنت –

اے وئیل ءِ پد پاکستانی پوج ءَ لشکر کشی بندات کتگ ات کہ اے لشکر کشی ءَ دو بالگرداں ھم بھر زرتگ ات کہ آھانی تہ ءَ یک بالگرد ءِ سلاہ بندیں مردماں جتگ ءُ چگل داتگ ات، بالگرد کپگ ءَ پاکستانی پوج ءِ شش کارمند مرتگ اتنت –

اے مردمانی دزگیری، بالگرد ءِ جنگ ءُ دور دیگ ءُ اشکر بروکیں ٹرکانی سر ءَ بوتگیں اُرش ءِ زمہ واری بی ایل اے ءَ منّ اِتگ اتنت –

بلوچ لبریشن آرمی ءِ جارکش جیئند بلوچ ءَ پدا رند ءَ وتی داتگیں درشان ءِ تہ ءَ بلوچ راجداریں باسکانی یل کنگ ءِ بدل ءَ پوجی کارمندانی یل کنگ ءِ گپ جتگ ات –

گوستگیں روچاں بی ایل اے ءَ وتی یک دگہ درشان ءِ تہ ءَ پاکستانی پوجی کارمندانی یل کنگ ءِ وتی لوٹانی منگ ءِ ھاتر ءَ پاکستانی پوج ءَ ھپتگے ءِ مھلت داتگ ات – جارکش ءَ گوشتگ ات کہ اے مھلت ءِ ھلاس بوگ ءَ پد بی ایل اے دزگیر کتگیں جنگی بندیگ جونیئر کمیشنڈ آفیسر کلیم اللہ ءُ ملٹری انٹلجنس ایجنٹ محمد فیصل ءَ بلوچ راجی آمیدگس ءِ نیمگ ءَ دیگ بوتگیں شزایے سر ءَ گامگیج زوریت –

زانگ بہ بیت بلوچ راجدوستیں گل ءُ انسانی ھکانی بازیں گل مدامی پاکستانی پوج ءِ سر ءَ ھمے الزام ءَ جنگ ءَ انت کہ بلوچ سرمچارانی ھاترءَ لشکر کشی ءِ نام ءَ پاکستانی پوج بلوچستان ءِ کوچگاں جاھمنندیں مھلوک ءِ سر ءَ بمبگواری کنت ءُ ھمے میان ءَ دزگیر کتگیں ءُ بیران بوتگیں ءُ مردماں بلوچ سرمچار زاھر کنت –