TBP Balochi

بلوچستان ءِ دمگ ھاران ءِ ھند لجے ءَ گوستگیں روچ ءَ پاکستانی پوج ءَ دمگ انگیر ءَ کتگ مزنیں کچے ءَ آپریشن کتگ، آپریشن ءَ ڈرون بالگرد ءُ کواڈ کاپٹر گندگ بیتگ اَنت-

ھالانی رِد ءَ گوستگیں روچ ءَ لجے ءَ پاکستانی پوج ءُ حافظ ممتاز ءِ سروکی ءَ سلاہ بندیں ڈیتھ اسکواڈ ءِ ٹولی ءَ تیرگواری کتگ یازدہ دکانانی کُبل پروشتگ اَنت ءُ لکّانی کلدار ءُ سامان برتگ اَنت وھدے کہ یک پٹرول پمپ ءِ پٹرول ھم وتی ھمراھی ءَ برتگ اَنت-

سانمندیں دکانداراں جعفر احمد، گلزار احمد، طاھر، الطاف، شیر احمد، عبدالنبی، حافظ سلیمان، حافظ حبیب، غلام نبی ءُ داؤد ھوار اَنت-

زانگ بہ بیت گوستگیں روچ ءَ پوجی آپریشن ءِ میان ءَ پاکستانی پوج ءَ ڈاکٹر شاہ جھان آوار جتگ ناشناسیں جاھے ءَ برتگ وھدے کہ آئی ءِ لوگ ھم مانداشتگ-

ھمے وڑ شوآپ ءِ ھند سر ءَ یک لوگے ءِ سر ءَ مارٹر گولہ لگگ ءَ چہ زالبول ءُ چُکاں ھوار چار مردم ٹپی بیتگ اَنت آیانی تہ ءَ بی بی ذاکرہ ،بی بی شفیقہ، حافظ طاھر ءُ یک سالی ئیں جنکو نادیہ ھوار اَنت-

بلوچستان ءِ دمگ پنجگور ءَ یک مردمے پاکستانی لشکر ءَ دزگیر کتگ ءُ بیگواہ کتگ۔

اھوالانی رد ءَ بیگواھیں مردم ءِ پجار عالم ء صوالی ءِ نام ءَ زانگ بیتگ ءُ پیر جھلگ ءِ نندوک ءُ کار ءُ کسبے ڈرائیوری اِنت۔

دمگی مردمانی گشگ اِنت کہ عالم ءَ چےکان ءِ دمگ ءِ ڈیزل بازار ءَ چہ یک سلاہ بندیں گلے ءَ دزگیر کتگ کہ دمگی مردماں پاکستانی لشکر ءِ کمک ءَ کنوکیں ” ڈیتھ اسکواڈ“ ءَ دے انتے ۔ پد ءَ ھمے ھال ھم دیم ءَ اتکگ کہ اے مرد پاکستانی لشکر ءِ دست ءَ دیگ بیتگ ۔

ھال سر کنوکیں ادارہ اے پی ءُ اے ایف پی ءِ ھال رسانکدر ءَ ھال داتگ کہ امریکہ ءِ صدر ڈونلڈ ٹرمپ ءِ پریس ڈنر ءَ تیرگواری ءَ پد صدر ٹرمپ ءَ را ایمنیں جاھے ءَ سر کنگ بوتگ۔

روئٹرز ءِ رد ءَ صدر ٹرمپ ءَ اے وئیل ءَ پد گْوشتگ کہ من شور داتگ کہ اے مراگش برجاہ بہ بیت بلے اے پیسلہ کانون تپاسکار کنوکیں ادارگ کن اَنت۔

وھدے کہ روئٹرز ءِ ھال رسانکی ادارگ ءَ چہ بنشون ءِ رد ءَ ھال داتگ کہ اے وئیل ءَ پد یک ملزمے دزگیر کنگ بوتگ۔

ایسوسی ایٹڈ پریس ءِ رپورٹ ءِ رد ءَ بنداتی ھالانی رد ءَ ھچ وڑیں تاوان ءِ ھال نہ بیتگ بلے کانون ءِ گر ءُ دار کنوکیں کارندھے ءَ گْوشتگ کہ ارش کنوک ءَ تیرگواری کتگ۔

واکدار ءِ رد ءَ اے وئیل ھال ءِ دپ ءَ بوتگ کہ اود ءَ ٹرمپ ءُ دگہ مھمان ھوار بوتگ انت بلے اے گپ زوت پدر نہ بوتگ کہ اے وئیل راستی ءَ چے بوتگ۔

بلوچستان ءِ جتاجتائیں دمگ کیچ ءُ ھاران ءَ پاکستانی پوج ءُ پولیس ءِ تیرگواری ءُ مارٹر آس دیگ ءِ آسر ءَ دو زالبول ءُ چُکاں ھوار پنچ مردم ٹپی بیتگ اَنت-

گیشیں ھالانی رِد ءَ پاکستانی پوج ءَ مروچی ھاران ءِ دمگ لجے انگیر ءَ کتگ آپریشن کتگ – شوآپ ءِ ھند سر ءَ پوج ءَ آبادی ءِ سر ءَ مارٹر گولہ آس داتگ چریشی ءِ آسر ءَ بی بی ذاکرہ، بی بی شفیقہ، حافظ طاہر ءُ یک سالی ئیں چُک نادیہ سک ٹپی بیتگ اَنت وھدے کہ تراک ءَ چہ لوگ ءَ ھم تاوان رس اِتگ-

اِھوالکار ءِ رِد ءَ ٹپّیانی جاور ناگیگ اَنت ، چہ لجے ءَ آپریشن ءِ میان ءَ پاکستانی پوج ءَ ڈاکٹر شاھجان زورانسری بیگواہ کتگ وھدے کہ آئی ءِ لوگ مانداشتگ-

ھالانی رِد ءَ لجے ءِ جتاجتائیں دمگ پوج ءِ انگیر ءَ کتگ، کواڈ کاپٹر ءُ ڈرون بالگرداں بُرز بالی ءَ گندگ بیتگ اَنت وھدے کہ پوج ءَ جتاجتائیں نیمگاں مارٹر گولہ آس داتگ-

ھمے وڑ کیچ ءِ بُنجاھی شھر تربت پولیس ءِ تیرگواری ءِ آسر ءَ یک زالبولے ٹپی بیتگ-

پولیس ءِ رِد ءَ جوسک ءِ دمگ ناکہ بندی ءِ میان ءَ یک شکی ئیں گاڑی ءِ اوشتگ ءِ اشارہ کتگ، بلے ڈرائیور ءَ گاڑی نہ اوشتارینتگ چریشی ءَ پولیس ءَ رندگیری کتگ-

رندگیری ءَ پد سلالہ بازار ھند سر ءَ پولیس ءَ تیرگواری کتگ گاڑی ءِ ٹائر تراکینتگ اَنت، چریشی ءِ آسر ءَ گاڑی ءَ سوار یک زالبولے، حاجی عبدالواحد ءِ لوگ بانُک گل جان جھمنند پنجگور ءَ تیر لگّ اِتگ ءُ ٹپی بیتگ-

نادُراھجاہ ءِ رِد ءَ زالبول ءِ باسک ءَ چہ سر لگّ اِتگ ءُ آئی ءِ جاور ھترہ ءَ چہ ڈن گوشگ بیگ ءَ اِنت-

پولیس ءِ گوشگ اِنت کہ گاڑی ءَ سواریں مردم دزگیر کتگ اَنت، وھدے کہ گاڑی ءَ چہ منشیات دزکپگ ءِ ٹاہ ھم جنگ بیتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست پنچ اپریل 2026 ءَ ھُزدار ءِ دمگ زاوہ ءَ دُژمنیں پوج ءِ کاروان ھما وھد ءَ سنگر گپتگ ءُ نشانگ کتگ وھدے آ یک بُنجلے ءَ چہ دومی بُنجل ءِ نیمگ ءَ روگ ءَ بیتگ اَنت- سرمچاراں پیسر ءَ چہ چیرکتگیں ریموٹ کنٹرول آئی ای ڈی (IED) ءَ چہ تُرندیں تراکے کتگ، چریشی ءِ آسر ءَ پوج ءِ گاڑی سرجمی ءَ تباہ بیتگ- اے اُرش ءَ گاڑی ءَ سوار دو کارندہ جاہ پہ جاھی مرتگ اَنت ءُ دو سکا ٹپی بیتگ اَنت-

جارکش ءَ گوشتگ دگہ یک کاروائی ءَ سرمچاراں بیست چار اپریل 2026 ءَ نوشکی ءِ دمگ ملّ ءَ پولیس تھانہ ءِ سر ءَ اُرش کتگ آ دستیگ کتگ ءُ اود ءَ ھستیں ھال اھوالی سسٹم ناکاراہ کتگ اَنت- پولیس کارندھاں پیسر ءَ چہ کڈن کتگ اَنت کہ آ گھگیری ءَ چہ پھریز بہ کن اَنت، بلے آیانی نیمگ ءَ چہ گھگیری کنگ ءِ جُھد ءَ کاروائی کنگ بیتگ چریشی ءَ یک پولیس کارندہ ٹپی بیتگ اَنت-

جارکش ءَ گوشتگ ھمے وڑ بیست چار اپریل 2026 ءَ سرمچاراں ھاران شھر ءَ پاکستانی پوج ءِ ھیڈکوارٹر اُرش ءَ گرنیڈ لانچر ءَ چہ نشانگ کتگ- سرمچاراں پُشت ماں پُشت بازیں گولھے آس داتگ کہ وتی نشانگ ءَ کپتگ اَنت، چریشی ءِ آسر ءَ دُژمنیں پوج ءَ جانی ءُ مالی تاوان چست کنگ کپتگ-

جارکش ءَ گوشتگ اشی ءَ اَبید بیست سے اپریل 2026 ءَ بی ایل ایف ءِ سرمچاراں ھُزدار ءِ دمگ زاوہ ءِ ھند سر ءَ شال – کرچی بُنجاھی شھدگ سر ءَ سرجمی ءَ ناکہ بندی کتگ- سرمچاراں سنگر گر بیتگ اَنت سے کلاکاں تاں شھدگ ءِ سر ءَ ھرچ وڑیں پوجی، شکی ئیں سُر ءُ پُر چارتگ ءُ اسنیپ چیکنگ کتگ- اے میان ءَ گاڑیانی پٹ ءُ پول کتگ اَنت لَس مسافر گاڑی پوجی، چاریگ ءُ رسد آروکیں مردم پٹ ءُ کت بہ کن ایں- اے ناکہ بندی ءِ مول ءُ مراد دمگ ءَ سرمچارانی مستری ءِ مزبوت کنگ بیتگ-

جارکش ءَ گُڈی ءَ سرجمیں اُرشانی زمہ واری منّ اِتگ اَنت-

بلوچ یکجھتی کمیٹی کراچی ءِ آرگنائزر فوزیہ بلوچ کراچی پولیس ءَ گوں وتی کھول ءِ ھمراھی ءَ دزگیر کتگ۔ آ وتی زورانسری بیگواھیں برات داد شاہ بلوچ ءِ پچ گرگ ءِ ھاترا کراچی پریس کلب ءِ دپ ءَ زھرشانی کنگ ءَ شتگ۔

شمبے ءِ روچ ءَ وھدے کہ آ وتی برات ءِ زورانسری ءَ بیگواہ کنگ ءِ ھلاپ ءَ توار چست کنگ ءِ ھاترا پریس کلب ءِ دپ ءَ سر بوتگ گڑا کراچی پولیس ءَ کارروائی کت ءُ فوزیہ بلوچ ءُ آئی ءِ کھول ءَ ھوار ھپت مردم دزگیر کتگ انت۔

بنشون ءِ رد ءَ دزگیریں مردم ناشناسیں جاھے ءَ برگ بوتگ اَنت ءُ اے وھد ءَ ھاندان ءُ چاگردی تک اے وئیل ءِ سر ءَ زھر ءِ درشان کنگ ءَ اَنت۔

داد شاہ بلوچ کہ فوزیہ بلوچ ءِ برات اِنت 21 اپریل 2026 ءَ چہ وتی لوگ ءَ زورانسری ءَ بیگواہ کنگ بوتگ ءُ انگت آئی ءِ بابت ءَ ھچ وڑیں ھال ءُ اھوال دست نہ کپتگ۔

بلوچ یکجھتی کمیٹی ءَ اے امل تُرندی ءَ ایر جتگ ءُ چہ ریاستی واکداراں لوٹ کتگ کہ زوت فوزیہ بلوچ ءُ آئی ءِ برات ءَ یلہ بہ کن اَنت۔ بی وائی سی ءَ چہ میاں استمانی انسانی ھکانی گلاں ھم اپیل کتگ کہ آ انسانی ھکانی لگتمالی ءِ پاکستانی واکداراں ھساب بہ کن اَنت۔

بلوچستان ءِ دمگ چاگی ءِ ھند دالبندین ءَ سلاہ بندیں مردماں کنٹرول کنگ ءَ پد تھانہ ءُ ریسٹ ھاؤس سوتکگ انت۔

اے وئیل گوستگیں شپ ءَ دالبندین ءِ چتر جاہ ءَ بوتگ کہ اود ءَ پولیس ءِ کارندہ دزگیر کنگ بوتگ انت ءُ آیانی سلاہ ھم دزگرگ بیتگ انت ءُ ریسٹ ھاؤس ءَ اوشتاتگیں سئے ٹریلر گاڑی ءُ یک مشنری یے سوچگ بوتگ انت۔

ایشی ءَ چہ پیسر ڈھاڈر ءُ نوشکی ءَ اُرشانی تہ ءَ تھانہ ءُ دگہ سرکاری ماڑی ھم نشانگ جوڑ کنگ بیتگ اَنت۔

ڈھاڈر ءَ پولیس ءِ کارندہاں رسانکدر ءَ گوں تران کنان ءَ گْوشتگ کہ تھانہ ءِ سر ءَ مزنیں کساسے ءَ سلاہ بنداں اُرش کتگ ۔ آیاں گْوشتگ کہ اے اُرش ءَ کم چہ کم یک پولیس کارمندے بیران ءُ چار ٹپیگ بوتگ اَنت۔

پولیس ءِ کارندہ ءِ رد ءَ اے اُرش ءِ سبب ءَ تھانہ ءِ دپ ءَ اوشتاتگیں گاڑی ھم تاوان بوتگ اَنت۔

دومی نیمگ ءَ آدینگ ءِ شپ ءَ نوشکی ءِ دمگ مل ءَ ناشناسیں سلاہ بندیں مردماں تھانہ ءِ سر ءَ اُرش کتگ۔

نوشکی انتزامیہ ءِ یک کارندھے ءَ گشتگ کہ 30 ءِ نزیک ءَ سلاہ بندیں مردماں پولیس اسٹیشن ءِ سر ءَ اُرش کتگ کہ ایشی ءِ تہ ءَ یک پولیس کارمندے ٹپی بوتگ۔ آئی ءَ گْوشتگ کہ پسھی کاروائی ءِ سبب ءَ اُرش کنوک تھانہ ءِ تہ ءَ رؤگ ءَ بے سوب بوتگ اَنت۔

دومی نیمگ ءَ کلات ءِ دمگ زاوہ ءَ گوستگیں شپ ءَ پاکستانی پوج ءِ بم ڈسپوزل اسکواڈ ھما وھد ءَ نشانگ کنگ بیتگ آ یک آئی ای ڈی ءِ بے سوب کنگ ءَ مُچ بیتگ انت-

تراک ءِ آسر ءَ پورسز ءَ جانی ءُ مالی تاوانانی دیمپان بوگ ءِ ھال انت بلے داں انگت ءَ واکداراں ھچ وڑیں اھوال سر نہ کتگ انت-

پاکستانی لشکر ءِ دست ءَ زورانسری بیگواہ کنگ بوتگیں سمیر صابر ءِ مات بیران بوتگ۔

یات بہ بیت کہ سمیر صابر 2013 ءَ پاکستانی لشکر ءَ چہ کیچ ءِ دمگ مند ءَ زورانسری ءَ بیگواہ کتگ ءُ 13 سال ءِ گوزگ ءَ ابید ھم انگت بیگواہ اِنت۔ آئی ءِ مات ءَ زھرشانیاں بھر زرتگ ءُ تاں آمیدگسانی دروازگ ھم ٹُکّ اِتگ اَنت بلے بازیں جھد ءُ کوشست ءَ پد مات چہ اے دگنیا ءَ رکست بوتگ۔

زانگ بہ بیت بلوچستان ءَ بیگواھیں مردمانی بازیں پت ءُ مات وتی چکانی شوھازگ ءِ وھد ءَ بیران بوتگ اَنت ، وھدیکہ بیگواھیں مردمانی درگیجگ ءِ ھاتر ءَ زھرشانیانی وھد ءَ ھما ندارگ گندگ بوتگ اَنت کہ بیگواھیں مردمانی پت ءُ مات بے ھوش بوتگ اَنت ۔

دو دھک ءَ بلوچستان ءَ بیگواہیں سیاسی جھدکارانی کھول چہ مات ءُ پتاں ھم ھوار گم ءُ پریشانی ءِ سوب ءَ وڑ وڑیں جیڑھانی آماچ اَنت۔

بیگواھیں مردمانی کھول وتی نزیکیں مردمانی بیگواہ کنگ ءِ لوٹ کنگ ءِ ساھت ءَ چہ سرکار ءَ لوٹ کنگ ءَ بوتگ اَنت کہ اگاں آیانی نزیکیں مردماں ھرچ وڑیں جرمے کتگ گڑا آ آمیدگس ءَ پیش کنگ بہ بنت ءُ سزا دیگ بہ بنت۔ البت اے وڑ ءَ سالانی سال کہ آ گار ءُ بیگواہ بوتگ اَنت ءُ سرجمیں کھولاں ءَ رنج ءُ گمانی دیمپانی انت۔

بلوچستان ءَ راجدوستیں پاٹی ءُ انسانی ھکانی گل انسانی ھکانی لگتمالی ءُ زورانسری بیگواھی ءِ زمہ وار پاکستانی لشکر ءَ لیکگ ءَ اَنت۔

بلوچستان ءِ دمگ کچھی ءِ ھند ڈھاڈر ءُ نوشکی ءَ سلاہ بندیں مردمانی نیمگ ءَ چہ اُرشانی ھال اِنت-

ڈھاڈر ءَ پاکستانی پوج ءُ سلاہ بندیں مردمانی میان ءَ تُرندیں میڑ ءِ آسر ءَ کم چہ کم دو پولیس کارندہ بیران وھدے کہ سے ٹپی بیتگ اَنت-

اِھوالکار ءِ رِد ءَ سلاہ بندیں مردماں اُرش کتگ چریشی ءَ پد دوئیں نیمگاں چہ تُرندیں تیرگواری ءِ رِد برجاہ بیتگ- وئیل ءِ میان ءَ سلاہ بندیں مردماں ڈھاڈر ءَ برجاہ نادرا کارگس ھم مانداشتگ، چریشی ءَ چہ ماڑی ءَ تاوان رس اِتگ-

دومی نیمگ ءَ نوشکی ءَ ھم ناشناسیں سلاہ بندیں مردمانی نیمگ ءَ چہ نوشکی مل تھانہ ءِ سر ءَ اُرش ءِ ھال اِنت-

دمگی اِھوالکار ءِ رِد ءَ اُرش ءِ آسر ءَ یک پولیس کارندھے ٹپی بیتگ، چریشی ءَ آ نوشکی نادُراھجاہ ءَ برگ بیتگ-

تنی وھدے ھچ وڑیں سرکاری ادارھانی نیمگ چہ ءَ سرجمیں ھال دیم ءَ نیتکگ ءُ نانکہ جانی ءُ مالی تاوان ءِ پدری بیتگ-

زانگ بہ بیت کہ اشی ءَ ساری ھم بلوچستان ءِ جتاجتائیں دمگاں اے وڑیں وئیلاں رپورٹ بیتگ اود ءَ بلوچ آجوئی لوٹوکیں بُنجاھی شھدگانی ءُ دمگاں دستیگ کتگ اَنت-

جھل مگسی ءَ پاکستانی پوج ءَ یک ورنایے آوار جنگ ءَ پد ناشناسیں جاھے ءَ برتگ، پت ءِ یل کنگ ءِ لوٹ

بلوچستان ءِ دمگ جھل مگسی ءِ جھمنند سعید لاشاری ءِ رِد ءَ آئی ءِ چُک فھد چہ گنداواہ شھر ءَ ایف سی ءُ سی ٹی ڈی کارمنداں آوار جتگ ءُ وتی ھمراھی ءَ برتگ-

بیگواھیں فھد حسین ءِ کھول ءَ آئی ءِ زورانسری آوار جنی ھال رسانکدر ءَ شنگ کتگ گوشتگ کہ بیست یک اپریل ءَ کساس ساھت دو ءَ گنداواہ شھر ءَ ورنا ایف سی ءُ سی ٹی ڈی کارندھاں آوار جنگ ءَ پد ناشناسیں جاھے ءَ برتگ-

سانمندیں کھول ءِ رِد ءَ فرنٹیئر کانسٹیبلری انٹیلیجنس یونٹ 151 ونگ گنداواہ ءِ کارندہ ءُ سی ٹی ڈی دگہ ادارھانی کارندھانی ساڑی ءَ چہ کاروائی کنان ءَ فھد حسین بلوچ آوار جتگ-

کھول ءِ گوشگ اِنت کہ اے میان ءَ دو سول گاڑی ھم کارمرز کنگ بیتگ آیانی تہ ءَ یک سیاہ رنگیں سرفے ھوار بیتگ-

کھول ءَ گْوشتگ کہ ورنا ابید چشیں وارنٹے یا کانودی کاگداں چہ برتگ، وھدے کہ کاروائی ءَ لوگ ءَ ساڑی دگہ مردمانی سر ءَ ھم زوراکی کتگ ءُ بیھار داتگ اَنت-

کھول ءِ گوشگ رِد ءَ وئیل ءَ پد آ پولیس اسٹیشن ءَ ایف آئی آر نکش کنگ جھد کتگ، بلے پولیس ءَ آ بیست چار کلاکاں پد آیگ ءَ گْوشتگ اَنت-

فھد حسین بلوچ ءِ یل نہ کنگ ءَ کھول ءِ تہ ءَ ترس ودی بیتگ، آیا ھکومت ءُ ھمگرنچیں ادارھاں چہ لوٹ کتگ کہ ورنا ءَ زوت یل بہ کن اِت دیم ءَ بیار اِنت ءُ اگاں آئی ءِ سر ءَ بھتامے ھست گُڑا کانود ءِ ھساب ءَ آمیدگس ءَ پیش بہ کن اِت-

کھول ءَ گوشتگ کہ آ انساپ ءِ لوٹ ءُ وتی چُک ءَ پہ سلامتی آیگ ءَ تاں کانودی ءُ جمھوری راہ ءَ گچین کنت-

ھمے وڑ بیست چار اپریل 2026 ءَ پنجگور ءِ دمگ کاٹاگری ءَ ڈیتھ اسکواڈ ءِ کارندھاں اسد اللہ ء محمد جان نامیں ورنایے آوار جتگ ءُ بیگواہ کتگ-

اسد اللہ ڈیتھ اسکواڈ کارندھاں چہ آئی ءِ دکان ءَ آوار جتگ ءُ بیگواہ کتگ-

دومی نیمگ ءَ بیست یک اپریل 2025 ءَ چہ کیچ ءِ دمگ بلیدہ میناز ءَ آوار جنگ بیتگیں زکریہ ء ھاسمی مروچی بزاں 24 اپریل 2026 ءَ چہ تربت ءَ یل کنگ بیتگ-