بلوچستان ءِ دو جتاجتائیں دمگاں پاکستانی پوج ءُ پولیس ءِ تیرگواری ءُ مارٹر آس دیگ ءَ دو زالبول ءُ چُکاں ھوار پنچ مردم ٹپی

بلوچستان ءِ جتاجتائیں دمگ کیچ ءُ ھاران ءَ پاکستانی پوج ءُ پولیس ءِ تیرگواری ءُ مارٹر آس دیگ ءِ آسر ءَ دو زالبول ءُ چُکاں ھوار پنچ مردم ٹپی بیتگ اَنت-

گیشیں ھالانی رِد ءَ پاکستانی پوج ءَ مروچی ھاران ءِ دمگ لجے انگیر ءَ کتگ آپریشن کتگ – شوآپ ءِ ھند سر ءَ پوج ءَ آبادی ءِ سر ءَ مارٹر گولہ آس داتگ چریشی ءِ آسر ءَ بی بی ذاکرہ، بی بی شفیقہ، حافظ طاہر ءُ یک سالی ئیں چُک نادیہ سک ٹپی بیتگ اَنت وھدے کہ تراک ءَ چہ لوگ ءَ ھم تاوان رس اِتگ-

اِھوالکار ءِ رِد ءَ ٹپّیانی جاور ناگیگ اَنت ، چہ لجے ءَ آپریشن ءِ میان ءَ پاکستانی پوج ءَ ڈاکٹر شاھجان زورانسری بیگواہ کتگ وھدے کہ آئی ءِ لوگ مانداشتگ-

ھالانی رِد ءَ لجے ءِ جتاجتائیں دمگ پوج ءِ انگیر ءَ کتگ، کواڈ کاپٹر ءُ ڈرون بالگرداں بُرز بالی ءَ گندگ بیتگ اَنت وھدے کہ پوج ءَ جتاجتائیں نیمگاں مارٹر گولہ آس داتگ-

ھمے وڑ کیچ ءِ بُنجاھی شھر تربت پولیس ءِ تیرگواری ءِ آسر ءَ یک زالبولے ٹپی بیتگ-

پولیس ءِ رِد ءَ جوسک ءِ دمگ ناکہ بندی ءِ میان ءَ یک شکی ئیں گاڑی ءِ اوشتگ ءِ اشارہ کتگ، بلے ڈرائیور ءَ گاڑی نہ اوشتارینتگ چریشی ءَ پولیس ءَ رندگیری کتگ-

رندگیری ءَ پد سلالہ بازار ھند سر ءَ پولیس ءَ تیرگواری کتگ گاڑی ءِ ٹائر تراکینتگ اَنت، چریشی ءِ آسر ءَ گاڑی ءَ سوار یک زالبولے، حاجی عبدالواحد ءِ لوگ بانُک گل جان جھمنند پنجگور ءَ تیر لگّ اِتگ ءُ ٹپی بیتگ-

نادُراھجاہ ءِ رِد ءَ زالبول ءِ باسک ءَ چہ سر لگّ اِتگ ءُ آئی ءِ جاور ھترہ ءَ چہ ڈن گوشگ بیگ ءَ اِنت-

پولیس ءِ گوشگ اِنت کہ گاڑی ءَ سواریں مردم دزگیر کتگ اَنت، وھدے کہ گاڑی ءَ چہ منشیات دزکپگ ءِ ٹاہ ھم جنگ بیتگ-