TBP Balochi

مراکش ءِ واکدارانی رد ءَ کوہ ءِ اطلس ءَ آیوکیں زمین چنڈ ءِ آسر ءَ کم چہ کم دو سد ءُ نود ءُ شش مردم بیران بیتگ اَنت ءُ یک سد ءُ پنجاہ ءُ سَے زدگ بیتگ اَنت-

مراکش ءَ آدینگ ءِ شپ ءَ شش اشاریہ ءَ ٹک ھشت ءِ ترندیں زمین چَنڈے اتکگ بیگگ چریشی ءِ سبب ءَ بازیں مردمانی بیرانی پدر کنگ بوگ ءَ اَنت-

سرکاری ٹی وی ءَ وزارت داکلہ ءَ گوشتگ کہ کم چہ کم دوسد ءُ نود ءُ شش بیرانی ءُ یک سد ءُ پنجاہ ءُ سَے زدگ بیتگ اَنت-

ھال سر کنوکیں ادارھانی رد ءَ زمین چنڈ ءِ بنجل مراکش ءِ زربار ءَ کساس ھپتاد کلومیٹر ءِ دوری ءَ کوہ ءِ اطلس ءَ بیتگ – اے گوریچانی افریقہ ءِ سبب ءَ برز برزیں جمپانج ءُ مراکش ءِ یک گچینی سواد جاھے ءِ نزیک ءَ اِنت-

زمین چنڈ ءِ سما تیابدپی شھر رباط، کاس بلانکا ءُ الصویرہ ءَ ھم سما کنگ بیتگ –

بازیں کچے ءَ شھریانی ماڑی کپتگ انت ءُ تاوان اش بیتگ -بنجاھی شھر رباط ءَ بازیں کچے ءَ مردماں دگانی سر ءَ وتی ساہ زرتگ ءَ تر ءُ تابی مردمانی دیم ھم رباط ءَ اِنت-

مراکش ءِ شھریاں تامر بند شنگ کنان ءَ گندگ بیت اِنت کہ لھتے کپتگ ءُ زمین ءِ سر ءَ ھاک بیتگ اَنت ءُ ایشی ءِ ھواری ءَ راجدپتری شھر مراکش ءَ ھم تاوان بیتگ-

تر ءُ تابی مردمانی تامر بند ھم گندگ بنت اِنت کہ مردم شھر ءِ ھوٹلاں درکپگ ءَ انت-

روکپتی شھر مراکش ءَ دو سد کلو میٹر ءِ دوری ءَ روکپتی نیمگ الصویرہ ءَ ھم یک لوگے ءَ چہ ٹیلی پون ءِ گون ءَ اے ایف پی ءَ گوں گیشیں تاوان نہ بیتگ اَنت ءُ بلے رش ءُ کش سک باز اِنت ءُ ما زمین چنڈ ءِ وھد ءَ مردمانی واؤزار اشکتگ انتاے

ناسرجمیں اھوالانی رد ءَ سوشل میڈیا ءَ پوسٹاں گوشگ بوگ ءَ اِنت بازیں ماڑی کپتگ بیتگ اَنت ءُ بیرانی گمان پدری گیش بوگ ءِ گمان اِنت-

چہ مراکش ءَ یک کارندے ءِ گوشگ اِنت مراکش ءِ زرباری ھنداں بازیں مردم مرتگ اَنت-

روکپتی بلوچستان ءِ دمگ زرآباد ءَ یک ورنایے ءَ وتکشی کتگ ءُ وتی زند ھلاس کتگ-

وتکشی کتگیں ورنا ءِ پجار بیست ءُ سَے سالی ئیں سجاد ء دوستین جھمنند گرکان ءِ نام ءَ زانگ بیتگ بیتگ-

اھوالانی رد ءَ سجاد ءَ مروچی وتی زند ءِ پریشانی سبب ءَ وتی زند ھلاس کتگ بیتگ-

روکپتی بلوچستان ءَ اے دابیں وئیلانی اھوال باز کم دیم ءَ کاینت ءُ کساسی رنگ ءَ گندگ بنت-

بلوچستان ءِ بنجاھی شھر شال ءَ بیگواھیں مردمانی پانکجیں گل وائس فار بلوچ مسنگ پرسنز ءِ دراجکشیں زھرشانی بنجل ءَ مروچی پنچ ھزار ءُ یک سد ءُ شست ءُ سَے روچ سرجم بوتگ انت –

مروچی بی ایس او ءِ گوستگیں سرکماش مہیم خان بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ یک ھپتگے ءِ میان ءَ دوازدہ ءَ گیش زورانسری آوار جنگ بوتگیں مردم دروگیں میڑاں کشگ بوتگ انت کہ آیانی تہ ءَ گیشتریں مردمانی نام مئے بیگواھیں مردمانی لڑءَ ھوار بوتگ انت –

آئی ءَ گوشتگ کہ پاکستان وتی گزر ءُ لٹ پُل ءِ ھاتر ءَ انسانی ھکانی لگتمالی ءَ ھچ چک ءُ پد نہ بیت ءُ زورانسری آوار جنگ بوتگیں مردمانی درگت ءَ میان استمان ءِ درشاناں پادانی چیر ءَ کنگ ءُ بلوچ چکچینی پالیسی ءَ سر ءَ اوشتوک انت –

آئی ءَ گوشتگ کہ پاکستان ءِ جوڈ بوگ چہ ھما اولی روچ ءَ پہ بلوچ ءَ ھترھے بوتگ بلے ھمے وڈا ھما اولی روچ ءَ بگر ھاسکر گوستگیں یک دھکے ءَ پاکستان میان استمانی ایمنی ءَ پہ ھم ھترھے جوڈ بوتگ نوں اے ناکہ پہ بلوچ ءَ بلکنہ سرجمیں جھان ءَ پہ جیڑھے جوڈ بوتگ –

ماما قدیر بلوچ ءَگوشتگ کہ پاکستان انسانی ھکانی لگتمالی ءَ درساں دیم ءَ انت پاکستانی پوج ایردستیں بلوچستان ءَ ھوار سندھ ءَ ھم انسانی ھکانی لگتمالی ءَ کنگ ءَ انت ءُ دومی نیمگ ءَ وتی لاپ ءَ جوڈ کتگیں مزھبی گنوکاں رودینگ ءُ مزن کنگ انت تانکہ سرجمیں جھان ءَ ناشرکاری ءِ نرسری جوڈ بہ کنت –

ناشناسیں مردماں چہ ھرنائی ءَ شال ءَ روکیں دگ زیارت ءِ ھند مانگی ژڑبابا ءِ ھند ءَ اشکراں لوڑیں چار ٹرکانی سر ءَ تیرگواری کتگ ءُ آیانی ٹائر اش بسٹ کتگ اَنت-

تیرگواری ءِ وئیل شال ھرنائی ءَ مانگی ءُ لھتے جاھاں ھر ڈولیں روانی بند کنگ بیتگ اَنت-

سلاہ بندیں مردماں تیرگواری کتگ ءُ ٹرک تاوان داتگ اَنت ءُ اُرش ءَ دگہ جانی تاوان نہ بیتگ اَنت-

زانگ بہ بیت اے دابیں اُرش بلوچستان ءَ زمہ واری بلوچ آجوئی لوٹوکیں سلاہ بندیں گلاں من اتگ اَنت بلے داں انگت ءَ اے اُرش ءِ زمہ واری کس ءَ پہ وت ءَ نہ زرتگ اَنت-

صباء لٹریری فیسٹیول پنجگور

نبشتہ کار: زینب بلوچ

دی بلوچستان پوسٹ

اے یک پدّریں راستی یے کہ استیں ءُ زندگیں راجانی زندمان ءُ زند ءِ گواھی ءَ ھما راجے لبزانک ءُ زبان دے اَنت۔ زبان ءُ لبزانک نہ ایوک ءَ راج ءُ آئی ءِ پدریچ گواھی دنت بلکیں ھما راجے دُود ءُ ربیدگ، دودمان، راجی تب ءَ آوار نِندگ ءُ پاد آیگ ءِ کُلیں دروشم ءَ پدر کنت اِنت، ھما راجاں کہ روایت آوار وتی دودمان داشتگ اَنت مروچی ھما راج دگنیائے نکشہ تہا استیں راج منّگ ءُ زانگ بنت ایں۔ بلوچ ءِ زبان ءُ لبزانک دگنیا ءِ ایندگہ راجانی ڈول ءَ وتی تب ءُ دودمان ءِ جھگیری کنت اِنت۔

سید زھور شاہ ھاشمی گوشیت:
“گال نام منی، نام تئی، نام ھدا ءِ
بے گال ءَ من ءُ تو ءُ ھُداوند مُجان گار”

بلوچ ءِ مکجیں ڈیھ ءِ سر ءَ بلوچی لبزانک ءُ زبان ءُ آئی گالانی ءِ دارگ ءُ رکینگ ھمک بلوچ نودربر، زانتکار، نبشتہ کار ءُ کواساں آوار دھکان ءُ لس مھلوک ءِ پرز اِنت، اگاں ھمے لبزانک ءُ زبان ءَ ما وتی گالانی تہ ءَ کارمز مہ کن ات، گراں آوھد دور نہ ات کہ من ءُ تو بے گال ءَ وھدے دنز ءُ مُجان گار ءُ بیگواہ بہ بہ ایں۔

ھمک زبان ءَ لھتے انچیں بنشتہ کار ءُ شائر ودی بنت کہ آھانی مزن شانی ءُ پلسپہ داں کرنے ءَ گیرآرگ بنت ایں، بلوچ چاگرد ءِ تہ ءَ صباء دشتیاری ھما پلسپہ ءِ نام ءِ کہ آئی ءِ پگر ءُ سسا بلوچ ءِ آھوکیں پدریچ ءُ نودربرانی ءِ ھاتر ءَ یک تچکیں رژنائی یے، صباء ھما مزن شانی استاد بوتگ کہ آئی ءَ وتی واھشت پہ بلوچ ءِ باندات ءُ دیمروئی ءِ ھاتر ءَ کربان کتگ انت، صباء وت پہ مرادانی سپر ءَ رھادگ بوت بلے آئی ءِ رُوک کتگ ایں قندیل انگت ءَ بلوچ راج ءِ تہ ءَ بلان اِنت اے بلوچ ءُ آئی ءِ آھوکین پدریچ ءِ زمہ واری اِنت کہ گوں مچی ءَ ھمے رژنائی ءُ آئی ءِ کد ءُ بالاد چہ وھدے دنز ءُ مجان بہ رکین ایت۔

پنجگور ءِ توک ءَ کْوھنیں پگری مردماں چاگرد ءِ تہ ءَ بلائیں سانے دور داتگ اے روایتانی ءِ ساھگ ءَ چاگرد ءِ تہ ءَ زالبول گیش توان بھر کنگ بیت۔ اِد ءَ اے گپ پدر کنگ لوٹ ایت کہ سوبمندی راج داں ھما وھد ءَ سوبمند بیت نہ کنت وھدیکہ آئی ءِ راجکاری، زانشتی ءُ پگری رم ءَ گوں مردین ءَ زالبول اوں ھمگام مہ بیت، ڈاکٹر ماہ رنگ ءُ پوزیہ بلوچ ءِ گوں مھمان آوار پنجگور ءَ آیگ پہ پنجگور ءِ مھلوک ءُ چاگرد ءِ زالبولانی ھاتر ءَ یک مزنیں دادے، وھدے لوٹ ات ھمیش اِنت کہ اے جھد کہ بندات کنگ بوتگ برجاہ دارگ بہ بیت ءُ یکشل ءَ دیم ءَ برگ بہ بیت دانکہ پنجگور ءِ زالبول گوں ایندگہ تبک ءِ مردماں راجکاری ءِ پڑ ءَ آشوبی بیار ایت دانکہ آھوکیں وھد ءَ آ وتی سیت ءُ نپانی گچینی وت کُت بہ کن انت۔

بلوچ اسٹوڈنٹس ایکشن کمیٹی ءَ صباء لٹریری فیسٹیول ءِ نام بُنگیج کتگیں مراگش پہ پنجگور ءِ لس مھلوک ءِ ھاتر ءَ یک بلائیں سوگات ئے۔ اے مراگش ءَ مات ءُ گوھار ءُ نودربرانی بھر زورگ چہ ھمے پدر اِنت کہ پنجگور مھلوک کْوھنیں پگر ءِ منوگر نہ اِنت بلکیں آ ھم صباء ءِ ھما رُوک کتگیں کندیل ءِ رندگیری ءِ کنگ ءِ ھاتر ءَ جاڑیگ اِنت، اے ڈولیں مراگش، دیوان ءُ راجکاری وھد ءِ زلورت اِنت، دانکہ نودربرانی توک ءَ ھمے جیڑگ ودی بہ بیت ایں کہ آ راجکاری ھوار تلوانی بھر جوڑ بہ بنت ءُ راج ءَ یک شوکیں سپرے نیمگ ءَ رھادگ بہ کن اَنت۔

بلوچ اسٹوڈنٹس ایکشن کمیٹی جھد ستا کرز ایت۔ بائیدیں اے ڈولیں زرمبشت ءِ ھمے رِدم ءَ دارگ بہ بیت ایں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ ھُزدار ءُ مشکے ءَ دو مردم بیگواہ کنگ بوتگ انت ءُ شال ءَ یکے آجو بوتگ-

گیشیں ھالانی رِد ءَ ھُزدار ءِ تھسیل وڈھ ءِ دمگ وھیر شادین ءِ جھمنند حافظ شبیر احمد ء عطاءاللہ چہ ھُزدار ءَ بیگواہ ءَ اِنت-

ھالانی رِد ءَ شبیر احمد ھُزدار ءِ یک دمگی ماربل شرکتے ءَ کار بوتگ ءُ دو ستمبر 2023 ءَ شرکت ءَ چہ کار ھلاس کُتگ لوگ ءَ روگ ءَ بوتگ بلے لوگ ءَ سر نہ بیتگ-

ھمے وڑ آواران ءِ تھسیل چہ مشکے ءَ سے ءُ چار جون ءِ میانی شپ ءَ پاکستانی پوج ءَ یک ورنایے آوار جتگ ءُ بیگواہ کتگ کہ انگت بیگواہ ءَ اِنت دیم ءَ آرگ نہ بیتگ-

بیگواہ بیتگیں ورنائے پجّار ابراھیم ء عید محمد نام ءَ چہ بیتگ-

دمگی اِھوالکارانی رِد ءَ ھمے ورناہ مشکے ءِ دمگ گجلی ءِ جھمنندیں ءُ پاکستانی پوج ءَ دوھزار ھژدہ ءَ وتی بُنکی ھنکین ءَ چہ لڑینتگ ءُ گجر ءَ جھمنند بوگ ءَ لاچار کتگ ، وھدے نی آ آوار جتگ ءُ بیگواہ کتگ-

دومی نیمگ ءَ بیست ھشت اگست ءَ چہ شال ءِ دمگ منیر احمد سریاب دگ ءَ زورانسری آوار جنگ بیتگیں محمد حسن بنگلزئی گوستگیں روچ ءَ آجو بیتگ ءُ وتی لوگ ءَ سر بیتگ-

زانگ بہ بیت مھمد حسن بنگلزئی ءِ یل کنائینگ ءِ ھاتر ءَ آئی ءِ کھول ءَ وتی زھرشانی نکش کنائینتگ اَنت رسانکدر ھم آئی ءِ درگت ءَ توار چست کنگ بیتگ-

ھانگ کانگ ءُ چین ءِ ٹیکنالوجی ءِ بنجل سر پد بوکیں زرباری شھر شینزن ءَ ھور ءَ ھپتاد ءُ یک سالی ئین ریکاڈ پروشتگ کپ اود ءَ توپان ےِ سبب ءَ ھمک روچی ئین زند سانمند بیتگ-

ھال سرکنوکیں ادارہ اے ایف پی ءِ رد ءَ آدینگ ءِ روچ ءَ چین ءَ سرکاری رسانکدر ءَ گوشتگ سال نوزدہ سد ءُ پنجاہ ءُ دو ءَ داں انگت ءَ چد ءُ پیسر چوشین گورانی توپان ءُ تباھی نہ بیتگ-

مھکمہ موسمیات ءِ رد ءَ ھوراں داں انگت ءَ بازیں ریکاڈ پروشتگ اَنت-

پشمبے ءِ بیگاہ ءِ ساھت پنچ ءَ آدینگ ءِ سھب ءِ ساھت شش ءَ داں شینزن ءِ کش ءُ گوراں دو سد ءُ دو ملی میٹر یا ھشت انچ ھور ریکاڈ کنگ بیتگ –

ھمے وڑ ءَ کم چہ کم ھور ءِ آپ چار سد ءُ شست ءُ نُھ ملی میٹر یا ھژدہ انچ ءَ مُچ بیتگ- زری توپان ءِ سبب ءَ ھانگ کانگ ءُ شینزن ءِ شھری انتزامیہ ءِ کارگس ءُ باپاری بنجل بند کنگ بیتگ اَنت-

واکدارانی رد ءَ زری توپان ءِ آیگ ءَ یک ھپتگے پیسر ھم شھری سرپد کنگ بیتگ اَنت ھور ءِ سبب ءَ پبلک ٹرانسپورٹ کنگ بیتگ انت ءُ آ لوگاں نندگ ءُ وتی پھریزی ءِ ھیال ءَ بہ کن اَنت-

شینزن ءِ شھر یک کروڑ ءُ ھپتاد ءُ ھپت لک ءِ آبادی اِنت کہ اود ءَ مھکمہ ءَ اژدری کمکانی جار جتگ بیتگ ءُ شھری چہ لوگاں در مہ کپ اَنت-

واکداراں توپان ءَ پیسر ھم ترندی ءِ ٹائیفون ءِ وارنگ داتگ بیتگ چریشی ءِ سر ءَ چین ءِ سرکاری رسانکدر ءَ گوشتگ ات کپ اے چہ ھولائی ءَ داں ھانگ کانگ ءَ تالان بیت اِنت ءُ زری لمباں لینڈ فال کنت اِنت-

ھانگ کانگ ءِ موسمیات ءِ رسد جاہ ءَ سرپدی داتگ کہ ساؤلا ءِ ھند ءَ زری جاھاں سد کلو میٹر ءِ تہ ءَ داں اتک کنت اِنت ءُ چریشی ءِ سبب ءَ وکٹوریہ ھاربر کش ءُ گور ءِ توپان ءِ چولانی توک ءَ اتک کن اَنت-

مھکمہ ءِ موسمیات ءَ گوشتگ ات کہ شھر ءَ سنگینیں جاورھال ودی بوت کن اَنت-

ھانگ کانگ ءَ سال دوھزار ءُ ھژدہ ءَ ٹائفون منگکھٹ شھر ءَ ٹکر جتگ ات ءُ سَے سد ءَ گیش مردم زدگ بیتگ ات اَنت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں وتی یک درشانے ءِ تہ ءَ گْوشتگ کہ مئے سرمچاراں مروچی سبی ءَ زورگریں پاکستانی پوج یک بمب اُرشے ءَ نشانگ کتگ-

جارکش ءَ گْوشتگ کہ سبی ءِ شھر ءَ لونی دگ ءِ نزیک ءَ ورلڈ بینک ءِ پراجیکٹ پھازوکی ءَ اوشتوکیں پاکستانی پوج کارندھانی سر ءَ دستی بمب ءَ گوں اُرش کتگ، تراک ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ دیمتر ءَ گْوشتگ کہ مئے گل اے اُرش زمہ واری ءَ منّ اِیت- زورگریں پاکستانی پوج ءِ بلوچستان ءَ چہ دراھگ ءَ تاں مئے اُرش برجاہ بنت-

بلوچ لبریشن آرمی ءِ جارکش جیئند بلوچ ءَ شنگ کتگیں یک درشانے ءِ تہ ءَ گْوشتگ کہ مئے سرمچاراں پنجگور ءُ تربت ءَ دو جتائیں اُرشاں زورگریں پاکستانی پوج نشانگ کتگ، اُرشاں پنچ دُژمن ءِ کارندہ ٹپی بیتگ اَنت-

جارکش ءَ گْوشتگ کہ بی ایل اے ءِ سرمچاراں گوستگیں شپ ءَ پنجگور ءِ دمگ راھی نگور ءَ سی پیک دگ سر ءَ برجاھیں زورگریں پاکستانی پوج ءِ یک چیک پوسٹے نشانگ کتگ-

جیئند بلوچ ءَ گْوشتگ کہ سرمچاراں پوسٹ سر ءَ گرنیڈ لانچر ءَ چہ بازیں گولھے آس داتگ، تراکانی آسر ءَ کم چہ کم سے دُژمنیں کارندہ ٹپی بیتگ اَنت ءُ دُژمن ءَ گیش مالی تاوان چست کنگ کپتگ-

آئی ءَ دیمتر ءَ گْوشتگ کہ بلوچ لبریشن آرمی ءِ سرمچاراں دو ستمبر ءِ شپ ءَ یک بیڑے ءَ تربت ءِ دمگ جوسک ءَ زورگریں پاکستانی پوج ءِ یک چوکی ءِ دستی بمب اُرش ءَ نشانگ کتگ ، تراک ءَ دو دُژمنیں کارندہ ٹپی بیتگ اَنت-

گُڈی ءَ جارکش ءَ گْوشتگ کہ بلوچ لبریشن آرمی اے دوئیں اُرشا ی زمہ واری ءَ منّ اِیت – مول مراد ءَ تاں زورگریں پوج ءُ آئی ءِ ھمکارانی سر ءَ مئے اُرش برجاہ بنت-

سر بیتگیں اھوالانی رد ءَ روکپتی بلوچستان ءِ تیابدپی شھر بندر عباس میناب ءَ ایرانی لشکر ءَ تیل ڈپوانی سر ءَ بیڑ برتگ ءُ اود ءَ جاگہ سوتکگ انت-

گیشیں اھوالانی رد ءَ ایرانی لشکر ءَ میناب ءِ ھند کلاھی ءِ زر ءِ لمب ءَ بیڑ برتگ ءُ اود ءَ مھلوک ءِ تیل جاہ ءُ کایک مانداشتگ اَنت ءُ ھرچی آئی ءَ گون وت برتگ اَنت-

اھوالانی رد ءَ پولیس ءُ گچینی پورس ءَ بازیں کچے ءَ دمگ ءَ بیڑ برتگ ءُ اود ءَ چوکی وتی جوڑ کرتگ ءُ تیل باپاری جاھ مانداشتگ اَنت-

شنگ بیتگین تامرانی تہ ءَ گندگ بیت اِنت کہ اود ءَ جاگہ ءُ تیل جاہ بُن اَنت ءُ مھلوک آس ءِ توسگ ءَ دلگوش اَنت-

اھولانی رد ءَ لشکر ءَ بازیں مردمے ھم دزگیر کتگ ءُ گون وت برتگ انت کہ آیانی پجار ءُ دگہ نامانی زانگی دیم ءَ نیتکگ اَنت-

اھوالانی رد ءَ تیل ءِ باپاری کنوکیں مردماں بازیں کچے ءَ مالی تاوانانی دیمپانی کنگ کپتگ کہ آیانی مال ءُ مڈی درست بُن گپتگ اَنت-