TBP Balochi

متحدہ عرب امارات ءِ گولڈ مارکیٹساں گوستگیں سَے ھپتگانی وھد ءَ یک گرامے سھر ءِ نھاد یازدہ نیم درھم ءِ کمی اتکگ بیتگ-

الامارات الیوم ءِ رد ءَ سھر ءِ نھاد یکشل ءَ سَے ھپتگانی توک ءَ جھلی ءِ دیمپان اِنت گوستگیں ھپتگ ءِ گڈسر ءَ جتا جتائیں سھرانی نھادانی توک ءَ نیم یا دو درھم کمتری اتکگ –

گوستگیں سَے ھپتگانی توک ءَ کمتری نھادانی توک ءَ یازدہ ءُ نیم درھم اتکگ بیتگ اَنت-

شورومز ءِ زمہ وارانی گوشگ اِنت یکشل ءَ سَے ھپتگانی تہ ءَ سھر ءِ تہ ءَ کمتری ءِ آیگ ءَ پد پر کنوکیں سھر ءُ سکھانی زیروکانی تہ ءَ گیشی اتکگ –

آیانی گوشگ اِنت لھتے مردم وتی زرانی بچینگ ءَ سکہ زیرگ ءَ اَنت ءُ لھتے مردم سھر ءِ نھاد ءِ توک ءَ کمی آیگ ءِ سبب ءَ نپ چست کنگ ءُ پر کنوکیں سھر زیرگ ءَ اَنت-

اوگانستان ءِ تالبان ءَ ایران ءِ سر ءَ را کڈنی کتگ کہ ھردوکیں نیمگاں سپارتکاری ءِ دروشم ءَ جیڑاہ ءَ گیش ءُ گیوار بہ کنت-

اوگانستان ءِ وزارت ھارجہ ءِ نائب جارکش ھاپز زیا اھمد ءَ عرب نیوز ءَ گوں گوشتگ کہ ما ھمساھگیں ڈیھ ءِ گون ءَ وتی سیادی ءَ ھراب کنگ نہ لوٹ ایں-

مئے ایران ءَ ھوار درستیں ھمساھگیں ڈیھاں گوں ھمے دزبندی اِنت کہ آ ھمک جیڑہ ءَ سپارتکاری ءِ گون ءَ گیش ءُ گیوار بہ کن اَنت-

زانگ بہ بیت گوستگیں شمبے ءِ روچ ءَ اوگانستان ءُ ایران ءِ سیمسری لشکرانی جنگ ءَ یک تالبان آپیسر ءُ دو ایرانی سیمسری پھزدار کشگ بیتگ اَنت-

ھردوکیں نیمگانی پھزداراں تیرگواری ءِ بنداتی بھتام یکے دومی ءَ جتگ بیتگ- اوگانستان ءِ ھلمند دریا ءِ آپانی سبب ءَ جیڑہ ءِ بندات ءَ پد سیمسرانی وئیل پیش اتکگ ات –

ھلمند دریا چہ اوگانستان ءَ ایران ءِ رودراتکی ھلکاں کپ ایت کہ اے ھند ءَ کشت ءُ کشاری ءِ بنجل اِنت – مولمی سٹ ءُ بدلیانی توک ءَ ھردوکیں ڈیھاں ڈکالی ءِ دیمپانی اِنت-

اوگان وزارت ھارجہ ءِ جارکش ھاپز زیا اھمد ءَ گوشتگ جنگ ءُ چوپاں پد دمگ ءَ سارت ءُ ایمنی اتکگ، اسلامی امارت جنگ ءَ دراج کش دیگ ءِ ھک ءَ نہ اِنت-

بلے جنگانی بارو ءَ ھردوکیں نیمگ ءَ سرجمی ءَ اھوال دیم ءَ نیتکگ اَنت-

ھمے ماہ ءِ بندات ءَ ایرانی سروک ابراھیم رئیسی ءَ تالبان ءَ را بیھار داتگ ءُ گوشتگ کہ آپ ءِ ھک ءُ ھواریں ھلمند ءِ کور ءِ آپ رویشت ایران ءِ ھک ءِ مسام سال نوزدہ سد ءُ ھپتاد ءُ سَے ءَ مسام بندی بیتگ-

تالبان ءِ سرکار ءِ آیگ ءَ پد ھردوکیں ڈیھانی تہ ءَ آپ ءِ جیڑہ ءَ ھوار ھوار دگہ جیڑھاں ھم سر کش اتگ-

ایشی ءَ پیش اوگان ءُ ایرانی سیمسری پھزدارانی میان ءَ جنگ ءُ چوپ بیتگ اَنت، ھمے داب ءَ ایران ءَ اوگانی میار بندانی جیڑہ ءِ سر ءَ تالبان ءَ ھم اے جیڑاہ ءِ سر ءَ گپ جتگ بیتگ-

ایرانی سرکارء نیوز ایجنسی ارنا ءِ رد ءَ ایرانی وزیر داکلہ اھمد واھدی ءَ گوشتگ انی سیمسر ءَ ھچ جیڑہ نیست اِنت انی جاور شر اَنت-

ایران ءِ سیمسر ءَ ھواریں اوگان ءِ ھواریں استان نمروز ءِ پولیس ءِ جارکش گل مھمد ءَ گوشتگ جاور شر اَنت-

پولیس ءِ جارکش ءں رد ءَ ایران ءِ سیمسراں انی ھچ جنگ ءُ چوپ نیست اِنت امن ایمنی اِنت –

لبنان ءِ بنجاھی شھر بیروت ءُ سعودی عریبین ایئرلائنز ( السعودیہ) ءِ یک کارندھے بالی پٹ دگ ءَ آوار جنگ ءَ پد بیگواہ کنگ بیتگ، زر ءِ لوٹ کنگ بوگ ءَ اِنت –

عرب نیوز ءِ رد ءَ لبنانی وزیر ھارھہ بسام مولوی ءَ گوشتگ کہ آ سعودی ءِ شھری ءِ آوار جنگ ءَ پد لبنانی سکیورٹی پورسز ءِ گون ءَ رھوت ءَ ایں ءُ اے جیڑاہ ءَ چارگ ءَ ایں-

آئی ءَ گوشتگ کہ من اے جیڑاہ ءِ سر ءَ بیروت ءَ سعودی ءِ سپیر ولید بخاری ءِ گون ءَ یکشل ءَ رھوت ءَ ایں ھم –

لبنانی رسانکدر ءِ بنداتی اھوالانی رد ءَ شمبے ءُ یکشمبے ءِ میانی شپ ءَ بیروت ءُ بالی پٹ دگ ءَ روکیں یک دگے ءَ سعودی ءِ شھری آوار جنگ بیتگ –

الاخباریہ ءِ رپورٹ ءِ رد ءَ آوار جنوکاں بیروت ءِ زرباری ھند ءَ یک ٹیلی فونکے ءَ کلوھے دیم داتگ –

آوار جنگ بیتگیں سعودی شھری بیروت ءَ سرکاری ایئرلائن السعودیہ ءِ ملازمے – لشکری پوشاکاں آوار جنوکاں دو گاڑی پیسر ءَ دمگ ءَ جاڑیگ بیتگ اَنت-

بسام مولوی ءَ ٹویٹ ءَ گوشتگ کہ لبنانی سرزمین ءِ سر ءَ مشکلانی دیمپان کنوک ھروھد ءَ درملی آجو کنگ ءَ چمانی توک ءَ بنت ءُ کار کنگ ءَ اَنت-

آئی ءَ گوشتگ کہ ھرچی بیتگ چریشی ءَ چہ لبنان ءَ وتی عرب براتاں گون ءَ سیادی سانمند بیت کنت – جرمکار ترندیں سزا دیگ بنت-

العریبہ نیٹ ءِ رد ءَ بیگواہ بیتگیں سعودی شھری گڈی بر ءَ بیروت ءِ بنجاھی ھند البیال ءَ کمپلیسک ءِ نزیک ءَ گندگ بیتگ، آ یک دراجیں مدتے ءَ لبنان ءَ نندوک بیتگ-

بنداتی اھوالانی رد ءَ سعودی شھری وتی گاڑی ءِ ھمراھی ءَ سھب ءِ وھد ءَ آوار جنگ بیتگ کہ ا عرمون ءَ دیم پہ وتی لوگ ءَ روگ ءَ بیتگ – آوار جنوکاں آئی ءِ سر ءُ مانسرانی توک ءَ نگاہ ایر کتگ بیتگ اَنت-

چریشی ءَ پد لبنان ءَ جاڑیگیں سعودی ءِ سپارت ھانہ ءَ شنگ بیتگیں درشان ءَ گوشگ بیتگ آئی ءِ بیگواھی ءِ ھال آئی ءِ کھول ءُ سیاد ءُ وارسانی نیمگ ءَ اتکگ اَنت-

سپارت ھانہ ءِ گوشگ اِنت اے درگت ءَ سعودی شھری ءِ بیگواھی ءِ سر ءخ لبنان ءِ مزنیں سکیورٹی ادارھاں گوں رھوت بوگ ءَ اِنت ءُ ایشی ءِ گیش ءُ گیوار ءَ کنگ ءَ اِنت-

زند اکیڈمی نوشکی ءِ چیردستی ءَ بلوچی ءُ براھوئی زبان ءِشائر ءُ.لبزانت کفایت کرار ءِ سالروچ ءِ درگت ءَ ماں پریس کلب ءَ ستاشانی ءِ مراگش ءِ برجم دارگ بوتگ –

ماھتاک بلوچی زند ءِ ایڈیٹر یار جان بادینی ءَ مراگش ءَ تران کنان ءَ گوشتگ کہ کفایت کرار یک شائرے ءِ بوگ ءَ ھوار ھوار یک شاھزانت، سیاستدان ءُ چاگردی باسک ءِ بوتگ – آئی ماں نوشکی ءِ تہ ءَ تھنا راسکوہ ادبی دیوان ءِ بنھشت ایر نہ کتگ بلکنہ آئی ءَ نوشکی ءُ کش ءُ گوراں زانت ءُ زانشت ءِ دیمروئی ءَ کار کتگ –

گوستگیں ڈسٹرکٹ ایجوکیشن ءِ آپسر جمیل احمد مینگل ءَ گوشتگ کہ کفایت کرار زھینیں نودربرے بوتگ، آئی گوں زانت ءَ باز نزیکی بوتگ ، آئی ءَ پہ بلوچی ءُ براھوئی زبان ءِ دیمروئی ءَ سک باز کار کتگ کہ مروچی آھانی برورداں ما بُرگائیں ورنایاں لوٹیت کہ آ کفایت کرار ءِ کتاباں بوان انت –

ستاشانی مراگش ءَ ڈاکٹر عالم عجیب نزیر بلوچ، طیب یلانزئی وحید عامر لطیف الملک بادینی، پروفیسر عزیز احمد جمالدینی ءَ ھم تران کتگ ءُ کفایت کرار دروت ندر کتگ –

مراگش ءَ غمخوار حیات ءِ کفایت کرار ءِ درگت ءَ نبشتگیں کتاب ” کفایت کرار کڑدگشاد” ءِ دیمدرائی ھم کنگ بوتگ –

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل ایف ءِ سرمچاراں بیست ھشت مئی ءِ بیگاہ ءِ ساھت ھپت ءَ کیچ ءِ دمگ تمپ بالیچہ ءَ پاکستانی پوج ءِ یک بُنجلے ءِ سر ءَ اُرش کتگ-

آئی ءَ گْوشتگ کہ سرمچاراں بُنجل ءِ روکپتی سنگر نزیک ءَ چہ راکٹ ءُ وتکاریں مزنیں سلاھاں نشانگ کتگ – راکٹ سنگر ءُ بُنجل ءِ تہ ءَ کپتگ ءُ تُرندی ءُ ترکّ اِتگ-

جارکش ءَ گْوشتگ کہ اے اُرش ءَ دُژمن پوج ءَ مزنیں کچے ءَ جانی ءُ مالی تاوان چست کنگ کپتگ-

جارکش ءَ دیمتر ءَ گْوشتگ کہ تیرگواری ءُ راکٹ اُرشانی پسّہ ءَ زورگریں پوج ءَ وتی پروش ورگ ءِ سوب ءَ میتگانی سر ءَ تیرگواری کتگ-

آئی ءَ گْوشتگ کہ دُژمنیں پوج ءَ میتگ ءَ بُنجل ءُ چوکی جوڑ کتگ مردماں سیاسی ، چاگردی زندمان نگیگ کتگ- وھدے کہ بی ایل ایف ءِ نشانگ بلوچ راج ءِ وتواجھی ءُ وشھالیں مانزمان اِنت-

آئی ءَ دیمتر ءَ گْوشتگ کہ بی ایل ایف اے اُرش زمہ واری ءَ منّ اِیت ءُ بلوچستان ءِ وتواجھی ءَ تاں دُژمنیں پوج سر ءَ اے وڑیں اُرش برجاہ بنت-

شال ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی ءَ مروچی ءَ پنچ ھزار ءُ پنجاہ ءُ نھ روچ سرجم بوتگ انت – مروچی بی ایس او پجار ءِ سرکاش زبیر بلوچ ءُ کمک سرکماش بابل بلوچ ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ پاکستان ءُ آئی ءِ لٹ پُل کنوکیں پوج انسانیت ءَ نیست ءُ نابود کنگ لوٹ انت کہ راج ءِ رکینگ ءُ بنکی انسانی ھکانی پھازگ ءِ توار جوڈ بوتگ انت –

آئی ءَ گوشتگ کہ پُرایمنیں جھد ءِ سر ءَ بندش جنگ بوتگ، بلوچ سیاسی باسک آوار جنگ ءُ زنداناں بندگ کنگ بوتگ ءُ درانسانی ازیت دیگ بوتگ انت – بکُش چگل دئے پالیسی رِد ءَ ژانگولیں جون چگل دیگ بوگ ءَ انت – زھگ ءُ زالبول ھم چریشانی زوراکیاں نہ رک اِتگ انت – پاکستانی پوج بید ترس ءَ کسانیں زھگ زالبولاں شھید کنگ ءَ انت وتی داشتگیں کشندہ ٹولیانی کمک ءَ دزی ڈنگی، آوارجنگ ءُ ملام گتگ کُشت کوش ءِ برجاہ داشتگ – دومی نیمگ ءَ بلوچ سیاسی باسکانی توار ءَ بے رھمی ءَ گوں ایرموش کنگ ءَ انت –

آئی ءَ گوشتگ کہ سامراجی لٹ پُل ءِ مولانی گرگ ءِ ھاتر ءَ پاکستان ناکہ تھنا میان استمانی رھبند لگتمال کتگ انت بلکنہ انسانی ھکانی ھاتر ءَ توار چست کنوکیں زانتکار، ادیب، اھوالکار ءُ انسانی ھکانی منوگر ءُ سیاسی باسک ھم زوراکی ءِ نشانگ جوڈ کتگ انت – بلوچ راجی زانتکار پروفیسر صبا دشتیاری نمیران کنگ بوتگ – بلوچ راج ءَ اے زلم زوراکیانی بگیری ءَ ھر تک ءُ پھناتاں سیاسی دروشن ءَ توار چست کتگ –

پنجگور نرسنگ کالج ءِ نودربراں پہ کالج ءِ ھاتر ءَ ماسٹر، اسکالرشپ ءِ بندش، وانگ جاہ ءَ وین دیگ ءُ آپ جیڑہ ءِ سر ءَ زھرشانی کنان ءَ وتی لوٹ زرتگ ءُ ڈپٹی کمشنر ءِ کارگس ءَ سرکتگ –

آھاں وتی لوٹانی ھک ءَ نارہ جتگ ءُ چہ سرکار ءَ لوٹ کتگ کہ کالج ءِ جیڑہ گیشگیوار کنگ بہ بنت – ایڈیشنل ڈپٹی کمشنر ءِ باور کنائینگ ءَ پد نودربراں وتی زھرشانی داں ھپتگے ءَ مھتل داشتگ –

زانگ بہ بیت پنجگور ءِ نرسنگ کالج ءَ نودربر زورگ بوگ ءَ انت بلے وانگے ھچ وڈیں نزام نیست، نودربر سھب ءَ رؤ انت ءُ گرم ءَ وتی گساں واتر بنت – آھانی اسکالر شپ ھم دارگ بوتگ انت نودربر پہ ٹیکسی ءِ باڈوانی دیگ ءَ دلسیاہ انت کالج ءِ اے جاورھالاں نودربر چہ زانت ءَ زبھر انت ءُ مچگی دلسیاھی ءِ آماچ انت –

زھرشانی ءَ سول سوسائٹی ءَ سیادی داروکیں فہد آصف سلاہ الدین، منیر احمد پیرامیڈکس ءِ سیدی کریم، بہرام قادر ءُ دگہ مردم ھم ساڑی بوتگ انت –

بساک ءِ کونسل سیشن ءُ مئے زمہ واری

نبشتہ کار: فوزیہ بلوچ شاشانی

دی بلوچستان پوسٹ

درستاں چہ پیسر من اے گُشگ لوٹ آں  کہ اگاں من مرچی چیزے نبشتہ بِہ کن آں یا چیزے بِہ جیڑ آں ، ھورت چاری ءُ راست گندی کُت بِہ کن آں یا ھمے چیزانی کنگ ءِ جُھد ءَ بِہ کن آں گُڑا بزان ھمے بساک ءِ برورد اِنت کہ من ءَ اے راہ ءُ کِشک ءِ مُساپرے کُتگ ئِے ۔ من ءَ راستیں ءُ مادنیں راجدوستی ءِ تچکیں سر ءُ سوج داتگ ئِے من چَہ ھمے ھمبل ءُ بیلاں دربُرتگ ءُ ھیل کُتگ ، من ءَ سوج دیگ بوتگ کہ اے راہ ءَ چِنچو جیڑاہ ءُ جنجال ھست ءُ بیت مردُم چنچو تکانسُر بیت ، ھما کہ راجدْروہ ءُ راجی بدواہ بنت یا درامدیں بدواہ بنت آ ھمے راہ ءِ دیم ءَ چِتور ڈنگر بنت مارا چونیں نگیگیں جاورانی دیمپان کن اَنت ۔ مارا چون لاچار ءُ بزگ ءُ بے وس کن اَنت یا کنگ ءِ بے سوبین جُھد کن اَنت اے دْرست من چہ ھما سنگت ءُ دوست ءُ ھمراھاں دربُرتگ کہ شپ ءُ روچ نہ زان اَنت پہ راجی دیمروی ءَ زھمت کَشگ ءَ اَنت ھمے جیڑگ ءَ اَنت چِتور ما وتی راج ءَ چَہ اے سِلیں دْراھی ءَ بِہ پھریز ایں ۔ ھمے ترامگیج ءَ کہ  نام ءِ بساک اِنت ،
بساک ءِ پجار ؟-

بساک بلوچ نودربرانی یک گَلے کہ ، بلوچ اسٹوڈنٹس ایکشن کمیٹّی ءِ نام ءَ زانگ بیت  (بساک) بلوچ نودربرانی ھما ترامگیج اِنت نودربرانی ھر وڑیں جیڑہ ءُ جنجالاں گوں نودربراں ھمدل ءُ ھمدست ءُ ھمکوپگ اِنت ۔ مُدام ساڑی ءُ جاڑی اِنت ، چوں کوہ ءَ مِکّ اِنت ءُ اوشتاتگ ، آ بلوچ نودربرانی وانگی یا زانگی جیڑہ بہ بنت یا نادراھی ءُ آوارجنی ، یا  تنگدستی ، یا سِل ءُ سِلکاری ءُ زُبان ءُ راجدوستی ، یا چاگردی ءُ مُلکی ، کُجام وھد ءَ کُجام نہ گیگی ءَ ھمراہ ءُ ھمدست بوتگ ءُ ھست اَنت ، دیم ءَ ھم بیت ، اے کاروان روان کنت داں وتی گُڈی مِنزل ءَ بساک ءَ وتی سَے ماھی ئیں  تاک نوشت وتی ماتی زُبان بلوچی ءُ براھوئی ءَ چاپ ءُ شنگ  کُتگ اَنت، پہ وتی آیوکیں پدریچ ءَ ( گام ) ھم یک وانگی تاکے کہ بلوچی ءُ براھوئی ءَ نبشتہ کنگ ءُ شنگ بیگ ءَ اِنت ، اے زھگانی تاک ءِ نام ءَ زانگ بیت ۔ گام ھم سے ماہ ءِ سر ءَ شنگ کنگ بیت ، بلوچستان کتاب کاروان ءِ نام ءَ بلوچستان ءِ بازیں جاگھاں سنگتاں بساک ءِ نام ءَ  کتابی مراگہ ھم جَتگ اَنت –

بساک ءِ لوٹ چے اِنت ؟ چوناھیگا بازیں زانتکارانی گْوشگ اِنت کہ مردُم روچ پہ روچ دیمروئی کنت آئی ءِ لوٹ ءُ واھِشت ھم گوں آئی ءِ ھمراھی ءَ بدل ءُ سَدل بْیاں بنت ، ما ھم اے گپ ءِ منّوگر ایں کہ ما ھم ھمے مردُم ءُ مھلوک ءِ بِھرے ایں ، من سرپد باں بساک ءَ را گوں وھد ءُ جاورانی ھمراھی ءَ  بدل بیگ لوٹ اِیت ، اگاں آ وتی تہ ءَ بدلی آؤرت مہ کنت اوشت ءِ آماچ بیت ءُ دیم ءَ روگ ءَ واک ءُ بودناکی ءُ ھاٹیگ نہ بیت ئِے ، بچار بساک یک سْیاسی ترامگیجے ، آئی لیکہ ( idealogy ) نیشنلزم راجدوستی اِنت، راجدوستی ءَ زمین، زُبان ، دود ءُ ربیدگ ، چَپ ءُ چاگرد ءِ سَجھیں لوٹ ءُ گرز کاینت ، تو کہ راجدوستی ءِ گپ ءَ کن ئے یا ترا پہ راج ءَ مِھر ءُ ھُب ءُ واھگ بیت گُڑا ھر وڑیں جیڑہ ءُ شَری ءُ ھرابی ، نزورئی ءُ دیمروئی ، تئی ھیال ءُ پگر ءُ سسا بنت ، تئی کار ءُ کِسب ءُ جُھد ءِ بھر بنت تئی گپ ءُ ترانانی ، بُنگپ بنت ، اگاں سِلکاری بیت تو ھمے بُنگپ ءَ ایر کن ئے چون اے کار بِنا بوتگ پرچا بوتگ چون گیش ءُ گیوار کنگ بیت یا چون گیش ءُ گیوار بہ کن انت ئِے ،ھمے رانگ ءَ دیمروئی ءُ شَرکاری یے بیت ھمے بُنگپ ایر کنگ بیت ما چِتور اے کار شَر کُتگ دیم ءَ گیشتر چِتور انگت شَرتر کنگی اِنت ، بزان مُدام پہ کارانی گیگ ءُ گْور  کنگ ءُ دیم ءَ روگ ءِ جُھد چو کہ مئے چاگرد سک پدمنتگیں چاگردے ، ھر نیمگ ءَ ما پَشت کَپتگ اِیں ، پمیشکا مئے چاگرد ءَ انگت وانگ ءُ زانگ ءَ را ھم ھچ ارزِشت نیست مارا ھمے مردُم چِتور سرپد کنگی اَنت کہ وتی زھگانی زندمان ءَ یک وشیں ءُ آسراتیں زندمانے ءَ بِہ وانین ایان ، اے وڑیں جیڑھانی سر ءَ گپ ءُ تران کنگ ءُ ایشانی راست ءُ تچکیں راہ ءِ شوھاز کنگ ءُ گامگیج زیرگ مئے بساک ءِ مستریں لوٹ ءُ کِسب اِنت ۔ اے دْرستیں سر ءُ سوجاں یک دلپھکیں ترامگیجے کُت کنت آ مرچی بساک ءِ دْروشُم ءَ مئے دیم ءَ ساڑی انت ءُ کنگ ءُ مارا پیش دارگ ءَ اِنت مِھر ءُ دوستی ، سَگ ءُ اوپار ، جھل گندی ءُ دِیر گندی ، اے سرپدی ترا مُدام بساک ءِ پتر ءَ گندگ بنت-

کونسل سیشن چے یے ؟ چوناھیگا کونسل سیشن ءِ مُراد ھمیش اِنت چَہ بُنزہ ءَ بگر داں بُنجاہ ءَ  بْیا ھر باسک ءِ ھیال ءُ پگر ءُ گپ تران ءِ گوشدارگ ءُ آئی ءِ ھیال ءُ پگر ءُ منّانکانی سر ءَ  تپاسگ ءُ پگر کنگ پہ دیمروئی ءَ نوکیں گامگیج زُورگ دو سال ءِ کار ءُ کارپدانی سر ءَ ھیال ءُ پگر کنگ نزوریانی کم کنگ ءُ جْوانیں راہ ءُ دَر ءِ شوھاز کنگ ، دْرستیں باسکاں وتی ھیال ءُ پگر ءِ درشان کنگ ءِ یک جْوانیں موھے دیگ ، چیزے چَہ آئی ءَ سرپد بیگ ءُ چیزے سرپد کنگ ، یکیں پتر ءَ نندگ ءُ یک نوکیں دْروشُمے ءَ باسک ءُ کاربنداں گچین کنگ ءُ کارانی موہ دیگ ءُ زمہ واری کنگ گَل ءِ پیسری کارانی ھُورتچاری کنگ ، نوکیں کاراں بِہ شور ءُ سَلا کنگ، چَہ باسکانی گچین کنگ ءَ پد نوکیں بُنجاہ ءِ گوں نوکیں ھنکین ءُ بُنزھاں دیم ءَ آرگ ءِ نام کونسل سیشن اِنت ۔

بساک بلوچ نودربرانی دومی گَل اِنت کہ چَہ بی ایس او آزاد ءَ پد داں سیمی کونسل سیشن ءَ سر بوتگ ، آ دگہ نودربر گَل نیمراہ ءَ بے ھاٹیگ بوتگ اَنت ، اے سنگت ءُ دوستانی جھد ءِ برورد اِنت ، اے آیانی آپ داتگیں درچک اِنت کہ ما ءُ شما ساھِگ ءَ نشتگیں ، نوں ایشی ءِ چارگ ءُ چیٹگ مئے ءُ شمئے زمہ واری  اِنت ، مئے کوپگاں اِنت کہ ما چون کن ایں ، سیراپ ءُ توانگر کن اِیں یا تُناپ ءُ ھُشک کن ایں ئِے ، نوں مئے ءُ شمئے بزانکہ باسکانی زمہ واری چے اِنت ؟
ما درستاں چہ پیش ترامگیج ءِ رھبند (constitution ) ءَ وان ایں ءُ سرپدی زور ایں ، چہ ادارہ ءِ زمہ واراں رھبند ءِ سرپد بوگ ءَ رند ما چار ایں کہ اے رھبند ءِ کُلیں نبشتہ کُتگیں چیزانی سر ءَ عملی کار بوگ ءَ اِنت اگاں ناں ؟ من ءَ ترا یا لَس مردُم ءُ نودربراں مئے کُتگیں کار ءُ کاربند داں کُجام ھد ءَ سِیت ءُ نپ دیگ ءَ اَنت یا نُکس ءُ تاوان ، اے گوں دلگوشی ھُورتچاری ءَ مارا چارگ ءُ تپاسگ لوٹ اَنت چَہ ترامگیج ءِ پُشت ءَ چُنت سنگت ءُ دوست ءَ دربُرتگ ءُ دیمروئی کُتگ آیانی مارِشت داں کُجام ھد ءَ رَس اِتگ آ چنچو زانتکار ءُ سسّا  بوتگ اَنت آیانی تبزانتی داں کُجا سربوتگ ، اے مارا چارگ ءُ تپاسگی اِنت، مارا گوں وتی گَل ءُ راج ءَ وتی زمین ءُ چاگرد ءَ گوں وتی درد ءُ اندوھاں دلپھک ءُ مِھروان بیگی اِنت ھر وھد ءَ وت ءَ  ساڑی کنگی اِنت مُدام چَہ دْرستاں پیش جُھد کنگی اِنت کہ من چَہ آدگہ باسکاں پیش وت ءَ کارجاہ ءَ سر بِہ کن آں من ھچ گَل ءِ کار ءَ پشت مہ کَپ آں ،  گَل ءِ دیوان بہ بنت یاکہ گَل ءِ کار بہ بنت من مُدام اولی مردُم بِہ بہ آں ، اولی سرپ ءَ گندگ بہ بہ آں گُڑا ما گوں راج ءُ گَل ءَ مِھروان بوت کن اِیں-

اُمیت اِنت کہ سنگتانی جُھد رنگ کاریت ، کاروان روچے الم ءَ منزل ءَ سر بیت بس مئے دُعا اِنت کونسل سیشن سوبمند بات سنگت گوں وتی جُھد ءَ جُنزان بات اَنت، بلوچ راجدوست بات اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اوگانستان ءُ ایران ءِ میان ءَ جنگ ءُ چوپ گوستگیں ھپتگ ءِ گڈسر ءَ ھما کساس ءَ گیش بیتگ کہ یک سیمسری چوکی ءِ نزیک ءَ کساس سَے مردم مرتگ انت ءُ بازینے زدگ بیتگ اَنت-

عرب نیوز ءِ رد ءَ ھنچش گمان بیت اِنت اے جنگ ءُ چوپ ءِ سبب ھردوکیں ڈیھانی میان ءَ آپ رویشت ءِ جیڑاہ اِنت کہ ھکانی وت ما وتی تہ ءَ اِنت-

یکشمبے ءِ روچ ءَ میڈیا رپورٹسانی تہ ءَ گندگ ءَ کیت اِنت ایرانی ءُ اوگانی سیمسری لشکر ءِ میان ءَ جنگ ءُ چوپ ءَ کمی اتکگ ھردوکیں ڈیھ جنگ ءُ چوپ ءِ کم کنگ ءِ ھاتر ءَ وت ماں وت نشتگ ءُ جیڑہ ءِ گیشینگ ءِ جھد ءَ اَنت –

زانتکارانی گوشگ اِنت اے دمگ ءِ ڈیھانی تہ ءُ گچینتر اوگانستان ھچ جیڑہ ءَ گشینت نہ کنت اے دابیں جنگ ءُ چوپانی بندات توپک ءِ سر ءَ بیت اِنت ھنچش کہ ایران ءَ بیتگیں ساسولی سیمسری چوکی کہ گوستگین ھپتگ ءَ گندگ بیتگ – بلے اے جنگ ءِ ھلاسی ھم دمگی ٹک ءُ سروکانی نیمگ ءَ ھمگرنچ بیگ ءَ بیت اِنت-

اے سیمسری جنگ ءُ چوپ ایرانی سروک ابراھیم رئیسی ءِ درشان ءَ لھتے ھپتگ پد پیش اتکگ چریشی ءَ آئی ءَ تالبان ءَ را بیھار داتگ لہ آ ھواریں کور ھلمند ءَ پہ ایران ءَ آپ ءِ بند کنگ لگمتالی ءَ مہ کنت- ھما داب ءَ کہ نوزدہ ھپتاد ءُ سَے ءَ یک مسامے ءَ گوں تپاک کنگ بیتگ-

ھلمند ءِ کور یک ھزار کلومیٹر ءِ دراجی ءَ اِنت کہ اوگانستان ءُ ایران ءِ بنجر رودراتکی دمگاں آپ تاپ کنت، کابل ءِ نیمگ ءَ بجلی ودینوک ءُ زمینکاری ءَ سیراپی کنگ ءِ ھاتر ءَ تھران ءَ گمی گمان اِنت-

ایران ءَ لھتے سالاں آپ ءِ کم بوگ ءِ دیمپانی اِنت اے درچ ءَ سال دوھزار ءُ بیست ءُ یک ءَ دھکانکارانی زھرشانی ودیتگ اَنت-

ایران ءِ مولم شناس ءَ گوشتگ کہ یک کساسے ءَ ڈیھ ءَ نود ءُ ھپت درسد ڈکالی ءِ دیمپانی اِنت-

ھلمند ءِ آپ ءِ بھر ءُ بانگی ءِ جیڑاہ ھژدہ مئی ءَ اوگانستان ءِ ھستیں وزیر ھارجہ امیر خان متقی ءُ ایرانی ھم درور حیسن امیر عبداللھیان ءِ میان ءَ گپ ءُ تران بیتگ-

شمبے ءِ روچ ءَ یک رندے پد ءَ امیر متقی ءَ کابل ءَ ایرانی سفیر حسن کاظمی ءَ گون گند ءُ نند کتگ ءُ جیڑہ ءَ ھوار ھردوکیں نیمگانی گھتری ءَ ٹپاسی کتگ –

اوگان ءِ وزارت ھارجہ ءِ جارکش ءَ ٹوئٹر ءَ نبشتگ کرتگ کہ وزیر ھارجہ ءَ اے گوشتگ کہ ھردوکیں نیمگانی دلرنجیاں گپ ءُ تران ءُ دیوان ءِ سر ءَ گشینگ بیت اِنت –

تالبان نوزدہ سد ءُ ھپتاد ءُ سَے مسام ءِ سر ءَ اوشتوک اِنت ءُ بلے اوگانستان ءِ ڈکال ھم ڈالچار کنگ نہ بیت اِنت-