TBP Balochi

بلوچستان ءِ بنجاھی شھر شال، کیچ،ھزدار ءُ گوادر ءَ تیرگواری ءُ دگہ وئیلاں پنچ مردم بیران بیتگ اَنت-

گیشیں اھوالانی رد ءَ کیچ ءِ دمگ مند سورو ءَ تپر ءِ گون ءَ یک مردمے ءَ شکیل مراد نامیں مردمے کُشتگ-

کُشگ بیتگیں مردم ءِ سیادی مند ءِ ھند ھوزئی ءَ اِنت-

چہ ھزدار ءَ اھوال اَنت کہ زھری ءَ تیرگواری ءَ یک مردمے بیران بیتگ –

تیرگواری ءِ وئیل ءِ زمین ءِ جیڑہ ءِ سر ءَ بیتگ کہ اود ءَ مشک سرآپ ءِ ھند ءَ لھڑی ٹک ءِ دو ٹولیانی میان ءَ زمین ءِ جیڑہ ءِ سر ءَ تیرگواری کنگ بیتگ ءُ چریشی ءَ چہ عزیز اللہ ء شاہ مراد بیران بیتگ-

ھمے وڑ ءَ شال ءِ دمگ کیچی بیگ ءَ شھید چوک اسٹریٹ ءَ ناشناسیں مردمانی تیرگواری ءَ یک مردمے بیران بیتگ-

دومی نیمگ ءَ چہ گوادر ءَ یک لاشے دزکپتگ –

اھوالانی رد ءَ گوادر میرین ڈرائیو ءَ پدی زر ءَ یک مردمے ءِ لاش دزکپتگ کہ آئی ءِ پجار مھمد بخش ء حسین ءِ نام ءَ زانگ بیتگ ءُ مجاھد واڑ گوادر ءِ جھمنند گوشگ بوگ ءَ اِنت-

بلوچستان ءِ دمگ ڈیرہ بگٹی ءِ ھند زین کوہ ءَ گیس ویل نمبر شش ءُ نُھ ءِ دو گیا پائپ لائن مروچی سھب ءَ تراکناکیں شورواں گوں ناشناسیں مردماں نشانگ کتگ ءُ چریشی ءَ پد گیس ءِ سپلائی مھتل بیتگ-

دومی نیمگ ءَ زین کوہ ءِ دو جاھاں پوج ءِ سر ءَ ناسرجمیں اھوالانی رد ءَ ھم تراکانی اھوال بیتگ اَنت-

ھالانی تہ ءَ گوشگ بیتگ کہ یک تراکے ءَ پوجی گاڑی نشانگ کنگ بیتگ ءُ گاڑی ءَ تاوان بیتگ ءُ دومی تراک ھما وھد ءَ بیتگ کہ پوج پند ءَ روگ ءَ بیتگ ءُ چریشی ءَ چہ پوج نشانگ کنگ بیتگ-

ھردوکیں اُرشاں پوج ءَ جانی ءُ مالی تاوانانی ھال ھست اِنت بلے داں انگت ءَ اے اُرشانی زمہ واری ھچ کس ءَ پہ وت ءَ نہ زرتگ-

بلوچ لبریشن ٹائیگرز ءِ جارکش میران بلوچ ءَ رسانکدر ءَ شنگ کتگیں یک درشانے ءِ تہ ءَ گْوشتگ کہ گوستگیں روچ ءَ بلوچ سرمچاراں ڈیرہ بگٹی ءِ دمگ سوئی ءِ ھند گو ءَ یک بیڑے ءَ آئی ایس آئی ءِ شش چاریگ دزگیر کتگ اَنت – اے سرجمیں مردم تچکی ءَ پاکستان ءِ سلکاریں چیریں ادارہ آئی ایس آئی ءِ ھاتر ءَ کار کنگ ءَ بیتگ اَنت- دزگیریں چاریگانی تہ ءَ یکے ءِ برات آئی ایس آئی ءِ کیپٹنے ءُ یکے ءِ برات آئی ایس آئی ءُ جھلی اپیسرے-

جارکش ءَ گوشتگ کہ رسانکدر ءَ اشاں پُٹبالر پیشدارگ ءَ اَنت بلے اِش آئی ایس آئی ءِ پُرکاریں چاریگ اَنت کہ ڈیرہ بگٹی ءَ بے میاریں مردماں چست کنائینگ ءُ شھید کنائینگ ءَ تچکی ءَ ھوار اَنت-

میران بلوچ ءَ گْوشتگ کہ دہ ستمبر ءِ سُھب ءَ پاکستانی پوج ءَ زین کوہ، سوئی ءُ اُوچ ءِ کش گوریں دمگاں مزنیں کچے ءَ لشکر کشی بندات کتگ کہ سرجمیں روچ ءَ برجاہ بیتگ- زین کوہ ءِ کوھی دمگ ءَ پاکستانی پوج ءِ کارندھانی سر ءَ بی ایل ٹی ءِ سرمچاراں ھما وھد ءَ اُرش کتگ وھدے آ لشکر کشی ءَ دلگوش بوتگ اَنت پوج ءِ بازیں کارندھے کُشتگ ءُ ٹپی کتگ اَنت وھدے کہ اے جنگ ءُ چوپ ءَ پاکستان پوج ءِ سے بمب اتم گواریں بالگردانی کُمک ھم گون بیتگ ءُ اشانی تہ ءَ یکے سرمچاراں نشانگ کتگ ءُ آئی ءِ درگت ءَ ھال اِنت کہ آ سوئی ءِ بُنجل ءَ سر بوگ ءَ ساری کپتگ ءُ تباہ بوتگ-

بی ایل ٹی ءِ جارکش گوشگ اِنت کہ یکجاھی ھساب ءَ اے لشکر کشی ءَ ھشت بمب گواریں بالگرد بھر زورگ ءَ اَنت کہ آیاں مزنیں کچے ءَ کارندہ جتاجتائیں دمگاں ایر گپتگ اَنت ءُ اے وھد ءَ اے دمگاں ساڑی اَنت-

آئی ءِ گْوشگ اِنت کہ ھما جاگھاں لشکر کشی کنگ بوگ ءَ اِنت اے جاھانی سر ءَ بی ایل ٹی ءِ نیمگ ءَ تیاری کنگ بیتگ ءُ دُژمنیں لشکر ھرچ وڑیں پیشگامی ءِ پسّہ دیگ بیت-

سر بیتگیں اھوالانی رد ءَ ایرانی آمیدگس ءِ ھکم ءَ روکپتی بلوچستان ءَ دگہ یک بندیگیں مردمے پاھو دیگ بیتگ-

پاھو دیگ بیتگیں مردم ءِ پجار بیست ءُ سَے سالی ئیں سعید سنجرانی ء حنیف جھمنند زاھدان ءِ نام ءَ زانگ بیتگ –

سعید سنجرانی گوستگیں روچ ءَ بیرجند ءِ زندان ءَ پاھو دیگ بیتگ –

سعید سنجرانی ایرانی سال 1399 ءَ ماں نشہ باپاری ءِ بھتام ءَ دزگیر کنگ بیتگ ءُ چریشی ءَ پد آئی ءِ سر ءَ ایرانی انکلابی آمیدگس ءَ پاھو دیگ ءِ ھکم داتگ بیتگ-

روکپتی بلوچستان ءَ گوستگیں روچانی توک ءَ اے چارومی مردم اِنت کہ پاھو دیگ بوگ ءَ اِنت کہ چِد ءُ پیسری روچ ءَ زاھدان ءِ زندان ءَ سَے کس پاھو دیگ بیتگ اَنت کہ آیانی توک ءَ دو کسانی پجار نہ بیتگ اَنت بلے یکے ءِ پجار مھمد ناروی ءِ نام ءَ زانگ بیتگ ات کہ آ زاھدان ءِ جھمنند ات-

بلوچستان ءِ دمگ ڈیرہ بگٹی ءِ جتاجتائیں دمگاں لشکر کشی برجاہ، ھالانی رِد ءَ تھسیل سوئی ءَ چہ پاکستانی لشکر ءَ دگہ چار مردم زورانسری آوار جنگ ءَ پد بیگواہ کتگ، آیانی پجّار لوٹا بگٹی ءُ آئی ءِ برات دین مھمد ء جوانسال بگٹی ، شریپ ء گوس بگٹی ءُ پاروک ء ابراھیم بگٹی ناماں چہ بیتگ-

ھمے وڑ پنچمی ءِ حاجی میاں خان ء صالح بگٹی کہ عدل خان کالونی ءِ جھمنند اِنت ءُ پی پی ایل شرکت ءِ کاردار ءِ مروچی سُھب ءَ پاکستانی پوج ءَ آوار جتگ ءُ گوں دگرانی ھمراھی بیگواہ کتگ اَنت-

زانگ بہ بیت کہ ڈیرہ بگٹی ءَ مزنیں کچے ءَ لشکر کشی برجاہ ءَ اِنت ، وھدے کہ جتاجتائیں دمگاں پوج ءُ سلاہ بندیں مردمانی میان ءَ جنگ ءُ چوپ ءِ ھم ھال اِنت-

دمگی مردمانی گْوشگ رِد ءَ کہ سُھب ءَ چہ بُرز ءَ بمب گواریں بالگردانی بال بُرزی ھم برجاہ ءَ اِنت ءُ بازیں دمگان لوگانی سر ءَ بمبگواری کتگ ءُ نشانگ کتگ اَنت، چریشی ءِ آسر ءَ جانی تاوان ءِ ھال اِنت-

بلے انگت سرکاری واکدارانی نیمگ اے درگت ءَ درشان شنگ نہ کتگ بلے دومی نیمگ ءَ پاکستان ءِ نگران وزیر داخلہ سرفراز بگٹی ءَ یک درشانے ءِ تہ ءَ گوشتگ کہ ما اے لشکر کشی شش ایں پُٹبالر لیبیانی یل کنائینگ ءِ ھاتر ءَ بندات کتگ-

بلوچ لبریشن ٹائیگرز ءِ جارکش میران بلوچ ءَ رسانکدراں وتی شنگ کرتگیں کسانیں درشانے ءِ تہ ءَ گوشتگ کہ ڈیرہ بگٹی ءِ دمگ زین کوہ، سوئی ءُ ڈیرہ بگٹی ءِ شھر ءَ اے وھدی پاکستانی پوج ءِ شست گاڑیانی کاروان ھمراھے شش بالگرد ءَ مانریتکگ ءُ لشکر کشی ءَ انت –

بی ایل ٹی ءِ جارکش ءَ گوشتگ کہ جتا جتائیں جاھاں بی ایل ٹی ءِ سلاہ بندانی میڑ گوں آیاں برجاہ انت، سرجمیں ھال دیمتر ءَ رسانکدر ءَ.شنگ کنگ بنت –

دومی نیمگ ءَ پاکستان ءِ نگران وزیر داخلہ ءَ لشکر کشی ءِ ھبر راست کتگ ءُ ٹاہ داتگ چہ ڈیرہ بگٹی ءَ آوار جنگ بوتگیں شش فٹبال ءِ لیبیانی یل کنائینگ ءَ لشکر کشی کنگ بوگ ءَ انت –

آئی ءَ گوشتگ کہ ڈیرہ بگٹی ءِ دمگ سوئی ءَ آوار جنگ بوتگیں یل کنائینگے کوشست ءَ کنگ ءَ انت –

آئی ءَ گوشتگ کہ سرجمیں دمگ انگر ءَ کتگ آوار جنگ بوتگیں مردمانی ھاتر ءَ لشکر کشی بوگ ءَ انت ءُ گوستگیں روچ ءَ پھازگی ادارہ ھکم دیگ بوتگ انت کہ آیانی یل کنائینگ ءَ گامگیج بہ زور انت –

وھدیکہ بلوچ ریپبلکن پاٹی ءِ جارکش شیر محمد بگٹی ءَ چاگردی ترامجاہ ایکس ءِ تہ ءَ نبشتگ کہ پاکستانی پوج ءَ ڈیرہ بگٹی ءِ دمگ سوئی ءُ اُچ ءِ دمگ گنڈوئی، سوناری مٹ، سردار پتی، بشک، ڈیم ءُ لگڑ داون ءَ پوج ءَ مزنیں کچے ءَ لشکر کشی بندات کت ءُ جنگی بالگرد اے ھند ءُ دمگاں بمبگواری کنگ ءَ انت –

دومی نیمگ ءَ اھوالکارانی گوشگ انت کہ ڈیرہ بگٹی ءِ دمگ سوئی ءِ نزیک ءَ بلوچ سرمچار ءُ پاکستانی پوج ءِ میان ءَ ترندیں میڑ ھال آیگ ءَ انت –

روکپتی بلوچستان ءِ جتا جتائیں ھنداں جتا جتائیں وئیلاں سَے مردم بیران بیتگ اَنت ءُ یکے زدگ بیتگ-

گیشیں اھوالانی رد ءَ روکپتی بلوچستان ءِ دمگ دلگان ءَ ناشناسیں مردماں یک مردمے کارچ جتگ ءُ کشتگ-

اھوالانی رد ءَ ناشناسیں مردماں دلگان ءَ بیست ءُ دو سالی ئیں مسعود ھوتی ء شاہ دوست کارچ جتگ ءُ زدگ کتگ بیتگ کہ آ زدگیں جاوراں ایرانشھر ءِ نادراہ جاہ ءَ برگ بیتگ ءُ آئی ءَ اود ءَ وتی ساہ داتگ اَنت-

ھمے وڑ ءَ روکپتی بلوچستان ءِ دمگ دوست مھمد بازار ءَ ایرانی لشکر ءَ یک کشین گاڑی ءِ سر ءَ تیرگواری کتگ ءُ چریشی ءَ یک مردمے بیران بیتگ-

بیران بیتگیں مردم ءِ پجار علی سوپی ءِ نام ءَ زانگ بیتگ کہ آ ایرانی لشکر ءَ تیرگواری کتگ ءُ چریشی ءَ چہ آ بیران بیتگ-

ھمے وڑ ءَ سراوان ءَ دگ ءِ وئیل ءَ یک تیل کشے بیران ءُ یکے زدگ بیتگ-

بیران بیتگیں مردم ءِ پجار مھسن توتازئی ء اسلام ءُ زدگ بیتگین ءِ پجار مھدی توتازئی جھمنند کریم آباد زاھدان ءِ ناماں زانگ بیتگ اَنت-

روکپتی بلوچستان ءَ ھمک روچی ئیں نہ اوشتوکیں وئیلاں بازیں ھسابے ءَ مردمانی جان ءُ ساہ روگ ءَ اَنت بلے اے درگت ءَ سرکاری تکاں گامگیج زورگ ءَ ھچ پیم ءَ گندگ بوگ ءَ نہ اَنت-

بلوچستان ءِ دمگ چہ ڈیرہ بگٹی ءَ لشکر کشی ءُ سلاہ بندانی میان ءَ جنگ ءُ چوپ ءِ ھال اِنت وھدے کہ لشکر کشی ءِ وھد ءَ پوج ءَ بازیں مردمے آوار جتگ ءَ تنی وھدے دو مردم ءِ پجّار بیتگ اَنت-

بیگواہ بیتگیانی پجّار عزیز بگٹی ءُ سلیمان بگٹی ناماں چہ بیتگ اَنت- اے مردم گوستگیں شپ ءَ ڈیرہ بگٹی ءِ دمگ چہ آدل کالونی ءَ آوار جتگ اَنت-

دومی نیمگ ءَ ڈیرہ بگٹی ءِ تھسیل سوئی ءِ دمگ گنڈوئی، سوناری مٹ، سردار پٹی، اوچ ءِ دمگ بشک، ڈیم، لاغر داوان ءَ ھوار جتائیں دمگاں پاکستانی پوج ءَ یک بلاھیں لشکر کشی ءِ بندات کتگ چریشی ءَ ھشت بمب گواریں بالگرد بھر زورگ ءَ اَنت، بازیں لوگے بمباری کتگ ءُ تباہ کتگ اَنت چریشی ءَ جانی تاوان ھال اِنت-

سوئی ءِ نزیک ءَ چہ سلاہ بندیں مردم ءُ پاکستانی پوج ءِ میان ءَ جنگ چوپ ءِ ناسرجمیں ھال اِنت، بلے تنی وھدے دمگ ءَ لشکر کشی ءِ برجاھی ءِ سبب ءَ راست کنگ ءَ دلسیاھی دیمپانی اِنت وھدے کہ اے درگت ءَ چہ واکدارانی نیمگ ءَ درشان شنگ نہ بیتگ-

زورانسری آوار جنگ بیتگیں عبدالحمید زھری ءِ جنک سعیدہ حمید ءَ گوشتگ منی پت عبدالحمیدہ زھری ءِ زورانسری آوار جنگ ءَ روچ پہ روچ گیش بوان اِنت، چریشی ءِ سبب ءَ ما مازگی نادراھی ءِ آماچ اِنت، منی پت عبدالحمید دَہ اپریل دوھزار ءُ بیست ءُ یک ءَ سندھ پولیس ءِ کمک ءَ چیریں ادارھانی کارمنداں دستگیر کتگ ءُ روچ ء مروچی ءَ داں بیگواہ اِنت مارا ھچ سرپدی دیگ بوگ ءَ نہ اِنت ءُ کجا اِنت چی ھال ءِ توک ءَ اِنت-

آئی ءَ گوشتگ منی پت ءَ ھچ کجام ھم سیاسی ءُ نیکراھی پاٹیاں ھچ سیادی نیست اِنت ابید جرم ءَ منی پت دزگیر کنگ بیتگ ءُ بیست ءُ نُھ ماھاں ناشناسیں زنداناں بندیگ اِنت –

سعیدہ حمید ءَ گوشتگ منی پت ءَ سلامتی ءِ یل کنگ ءِ ھاتر ءَ دوازدہ ستمبر ءِ بیگاہ ءِ ھپت ءَ داں شپ ءِ دوازدہ ءَ داں ایکس ءَ یک کمپینے برجم دارگ بیتگ – آئی ءَ گوشتگ دراھیں سیاسی ءُ چاگردی مردم، اھوالکار، انسانی ھکانی زمہ وار ءُ چاگردی ترامجاہ کارمرد کنوکاں دزبندی اِنت آ اے کمپین ءَ بھر زیر اِت ءُ منی پت ءِ سلامتی ءَ یل کنگ ءِ واستا توار چست بہ کن ات-

زانگ بہ بیت عبدالحمید زھری ءِ یل کنگ ءِ واستا بلوچ وائس فار جسٹس ءُ آئی ءِ کھول ءِ گون ءَ ھواری ءَ دوازدہ ستمبر ءَ ایکس ءَ کمپین ھلائینگ ءَ اِنت –

بلوچستان ءِ دمگ ژوب ءَ دگ ءِ یک وئیلے ءَ زالبول ءُ زھگاں ھوار بیست مردم زدگ بیتگ اَنت-

وئیل ژوب ءَ ڈی آئی خان شھدگ درازندہ ءِ ھند سرہ خاورہ ءَ پیش اتکگ – کہ اود ءَ چہ شال ءَ دیم پہ پشاور ءَ روکیں مساپر بریں بس ءِ بریک ھراب بوتگ اَنت چریشی ءَ پیماز ءَ لوڑیں ٹرکے ءَ ٹکرے جتگ-

وئیل ءَ ھشت زھگ، چار زالبولاں ھوار بیست مردم زدگ بیتگ اَنت-

زدگ بیتگیں مردمانی تہ ءَ ھپت کسانی جاور ناگیگ گوشگ بیتگ اَنت-