TBP Balochi

بلوچستان ءَ زورانسری آوار جنی ءِ نشانگ کنگ بیتگیں سے مردم یک کنگ بیتگ اَنت وتی لوگاں سر بیتگ اَنت وھدے کہ دگہ یک ورنایے زورانسری آوار جنگ بیتگ-

گیشیں ھالانی رِد ءَ مروچی سُھب ءَ پاکستانی پوج ءَ کیچ ءِ دمگ تمپ دازن ءَ پیرجان نامیں مردمے ءِ دکان ءَ بیڑبرتگ ءُ ساڑی ئیں میران ء عبدالوھاب جھمنند دازن تمپ آوار جتگ ءُ وتی ھمراھی ءَ برتگ –

دومی نیمگ ءَ بلوچستان ءِ دمگ نوشکی ءَ چہ پاکستانی پوج ءِ دست ءَ آوار جنگ ءَ پد بیگواہ بیتگیں عاطف ء محمد حنیف جمالدینی گوستگیں روچ آجو بوتگ ءُ لوگ ءَ سر بیتگ –

عاطف رودینی گوستگیں ماہ ءَ 25 مئی ءِ شپ ءَ نوشکی جنگل ءَ چہ پوج ءَ آوار جنگ ءَ پد وتی ھمراھی ءَ برتگ کہ گوستگیں روچ دیم ءَ اَتکگ ءُ یل کنگ بیتگ وھدے کہ گوستگیں سال ءَ دسمبر آئی ءِ برات سفیان پوج ءَ زورانسری آوار جتگ کہ تنی وھدے دیم ءَ آرگ نہ بیتگ-

عاطف رودینی ءِ نزیکیں مردمے ءِ یل بوگ ءِ گپ راست کتگ-

ھمے وڑ 13 اگست 2022 ءَ بلوچستان ءِ دمگ آواران ءِ ھند چہ جھاؤ ءَ آوار جنگ ءَ پد زورانسری جنی نشانگ کنگ بیتگیں اعظم بلوچ ء جمیل احمد گوستگیں روچاں پوج ءِ واکداراں آئی ءِ پت ءُ دگہ سیادانی دست ءَ داتگ اَنت-

زانگ بہ بیت بیگواھیں مردمانی کھول ءِ گل وائس فار بلوچ مسنگ پرسنز ءِ رِد ءَ بلوچستان ءِ جتاجتائیں دمگاں چہ ھمکروچ مردماں پوج بیگواہ کنگ ءَ اِنت بلے لھتے مردم ءِ یل کنگ پد دگہ مردم بیگواہ کنگ بیتگ-

دومی نیمگ ءَ 2018 ءَ پوج ءِ دست ءَ بولان ءِ دمگ چہ انڈس چلھڑی ءَ لشکر کشی ءِ وھد ءَ بیگواہ کنگ بیتگیں حاجی عزیز ء محمد قاسم سمالانی پنچ سال ءَ پد آجو بیتگ ءُ لوگ ءَ سر بیتگ-

عزیز سمالانی ءِ ھمراہ بولان لشکر کشی ءِ وھد ءَ بیگواہ بیتگیں مردم انگت بیگواہ ءَ اِنت دیم ءَ آرگ نہ بیتگ-

بلوچستان ءِ بنجاھی شھر شال ءَ پریس کلب ءِ دیم بیگواھیں مردمانی پانکجنیں گل VBMP ءِ زھرشانی برجاہ، زھرشانی بنجل ءَ مروچی پنچ ھزار ءُ شست ءُ دو روچ سرجم بوتگ انت، چہ تربت ءَ سیاسی ءُ چاگردی رھشون یلان زامرانی، اللہ بخش بلوچ، نوربخش بلوچ ءُ مجاہد ءَ ھوار دگہ مردماں بنجل ءَ اتکگ ءُ بیگواھیں مردمانء کھول ءِ گوم ءَ دلپدردی درشان اِتگ –

ھمے وھد ءَ گل ءِ سرکماش نصراللہ بلوچ ءُ کمک سرکماش ماما قدیر بلوچ بنجل ءَ ساڑی بوتگ انت –

بنجل ءَ اتکگیں رھشوناں باوست کنان ءَ گوشتگ کہ بلوچستان ءَ استانی زوراکی چہ ھما اولی روچ ءَ بگر تاں روچ مروچی برجاہ انت بلے لھتے ماہ بیت اِنت کہ اشی ءِ تہ ءَ گیشی گندگ ءَ اتکگ – بلوچ ورنا زورانسری آوار جنگ بوگ ءَ انت زنداناں بندیگ کنگ ءُ آھانی سرا درانسانی زوراکی کنگ بوگ ءَ انت کہ آھانی تہ ءَ گیشتریں مردم ھما وھد ءَ بیران بنت ءُ پدا آھانی ژانگولیں جون چگل دیگ بنت یا دروگیں میڑ ءَ سلاہ بندیں مردمے نام دیگ بیت ءُ نمیران کنگ بنت –

ماما قدیر ءِ گوشگ ات کہ بلوچستان ءَ چہ زلم زوراکیاں دلسیاہ بؤکیں بازیں مردمے وتکشی کنگ انت ھنچوش کہ ھمے زوتاں آواران ءَ سیادی داروکیں پرائیوٹ وانگ جاھے نجمہ دلسرد کُتگ کہ آ یک ریاستی مکبرے ءَ ترسینتگ ءُ بیھار داتگ چریشی ءَ آئی ءَ وتکشی کتگ بلے اے وتکشی ءِ نہ انت پرچا کہ اے ترسینگ بوتگ ءُ کشگ بوتگ ، کشندہ ریاست ءِ سرپرستی ءَ مرچی ھم سربازار گردگ ءَ انت ءُ آئی ءِ گس ءِ مردماں بیھار دیگ انت –

ماما قدیر ءَ گوشتگ کہ ریاست نوک آبادی لٹ پُل ءِ پالیسی بے سوب بوگ ءَ کندگ ءُ نوں نوکیں شور بندی ٹھینگ ءَ انت –

بلوچ چاگرد ءِ کندیل، شھید سَبا دَشْتیاری

نبشتہ کار: امجد بیکس

دی بلوچستان پوسٹ

البت ماں کوڑھیں دُنیا ءَ ھرگیمُرتگیں ءُ وابیں چاگرد لیکھی ، زانتکاریں ءُ کواسیں مردماں چہ واب ءَ ٹوھینتگ ءُ پاد کُرتگ ، دیم پہ روژنائیں بانداتے ءَ سرکُرتگ ۔ یک چاگردے چہ تھاری ءَ کَشگ، لس مھلونک ءِ مجگانی تہ ءَ سما (شعور) ، اِلم ءُ زانت، آگھی دیوک ءُ راہ ء راست ءَ بروک کواس ءُ رھشون بوتگ اَنت ۔ ھمے داب ءَ شھید سَبا دَشْتیاری ءَ وتی زند پہ بلوچ چاگرد ءِ دیمروئی ءَ ندر کت ۔ آئی ءِ لوٹ ءُ واھگ ھمے بوتگ ۔ مئے راج وتی ماتی زُبان ءَ بہ وان ات ءُ وتی ماتی زُبان ءِ ارزشت ءَ بزانت ۔ مئے راج ءُ چاگرد چہ تھاری ءَ در بَہ اِت ، روژنائیں چاگردے بِہ بیت ، آجو ءُ وتواجاہ بِہ بیت ۔ بلے بُندپتر ءُ راجدپتر اے وڑیں کواس ءُ زانتکاراں مُدام یات کن اَنت ۔

شھید سبا گوش اِیت کہ:
“نہ زاناں چونیں اُمیتاں ھیاتاں”
“من ءَ کہ دیر اِنت کُشتگ جند ءِ براتاں”

نمیرانیں پروپیسر سبادشتیاری ءَ را ھُمائیون مُبارکی ءَ یک گُلگدارے گپتگ ءُ جُست کن اَنت ئِے کہ شُما چہ بُندر ءَ کُج ءِ جَھمند اِت ۔ سبادشتیاری پَسو دنت کہ ما بُندر ءَ رودراتکی بلوچستان بیلہ ءِ جَھمند بوتگ اِیں پد ءَ مئے کھول ماں دشتیاری ءَ یوسپزئی میتگ ءَ شُتگ ءُ جھمند بوتگ انت ءُ مئے کُٹوم ھم یوسُپزئی اِنت ، رند ءَ مئے بُن پیروک چہ دشتیاری ءَ لَڈ ءُ بار کن اَنت بِہ کراچی ماری پور ءَ کَیت ءُ مارا سَے سَد سال بیت کہ کراچی ماری پور ءَ نِشتگ اِنت ۔

واجہ شھید کندیل سبا دشتیاری 2 ستمبر 1953 ءَ ماری پور ءَ ودی بوتگ ۔ آئی ءِ پَنام گُلام ھُسین اَت ءُ آئی ءِ گُلنام سبادشتیاری اَت بلے گُلام ھُسین آئی بُن پیروک ءِ نام ھم بوتگ ءُ آئی آریپیں پِت ءِ نام مھمد اُسمان(محمدعثمان) اَت ۔ آئی ءَ وتی بُنگیجی وانگ چہ نیاآبادلیاری ءِ جمال پرائمری اسکول ءَ 1965 ءَ در بُرت ، میٹرک چہ اوکھائی میمن ھائی اسکول ءَ 1971 ءَ سرجم کُرت ءُ انٹرمیڈیٹ چہ ایس ایم کامرس کالج ءَ 1973 ءَ سرجم کُرت ۔ پد ءَ آئی 1976 ءَ چہ “الجامعتہ الاسلامیتہ” مُدرسہ ءَ نیکراھی زانت دربُرت ءُ ھمے زمانگ ءَ پرائیویٹ ءَ بی اے (B.A) ھم کُرت۔ ءُ اے میان ءَ چہ “خانہ فرھنگ” ءَ پارسی زبان دربُرت ءُ سند گپت ۔ رند ءَ آئی ءَ پرائیویٹ ءَ ایم اے( M.A) اسلامیات ءِ تہ ءَ 1978 ءَ سرجم کُرت ۔

1974 ءَ داں 1980 ءَ سبا ءَ ماں لیاری ءَ یک وانگجاھے ءَ اُستادے ءِ بستار ءَ وانینتگ، 1979 ءَ آئی ءَ چہ کراچی مزن شھدربرجاہ (یونیورسٹی) ءَ پی ایچ ڈی ءِ واست ءَ داکلہ زُرت بلے اے نیام ءَ آئی ءِ پی ایچ ڈی ءِ سُپروائیزر بیران بیت ءُ پد ءَ آئی ءَ ماں بلوچستان مزن شھدربرجاہ شال ءَ لیکچراری ءِ نوکری رَس اِیت ءُ آ چہ کراچی ءَ ماں شال ءَ روت، ھمے وڑ ءَ آئی ءِ پی ایچ ڈی ءِ واب ناسرجم بیت ۔ البت آ بلوچستان مزن شاھدربرجاہ ءَ اسلامیات ڈپارٹمنٹ ءَ داں سی سال ءَ “پلسپہِ اسلام”وانین اِیت ۔

شھید سبا دشتیاری یک کواس ءُ زانتکار، تچک ءُ راست گُشیں انسانے بوتگ ۔ آئی ءَ پہ بلوچی زبان ءُ لبزانک ءِ دیمروئی ءِ واست ءَ شپ ءُ روچ جد ءُ جُھد کُرتگ ۔ آئی ءِ بازیں کتابے چاپ ءُ شِنگ بوتگ کہ آ چوش اَنت :
1.فلسفہ اسلام و یونان 2.گُلکار ءُ چَکنکار 3.بلوچی زبان ءِ آکبت (2جلد) 4.مطالعہ فلسفہ 5.ھون ھوشام 6.گُنگدامیں سر زمین 7.اَنگریں واھگ 8.بے تواری ءِ دریا 9.ترانگانی بُنزہ 10.نمدیانی دروت 11.آس ءُ آسیب 12.سید ھاشمی, فن و شخصیت 13.بلوچی زبان ءُ لبزانک(3جلد) 14 آگھی ءِ واب
15.بلوچی سرٹیفیکیٹ کورس-

ازمی ھساب ءَ نمیرانیں سبا دشتیاری ءِ دل دوستیں پڑ آزمانکاری بوتگ ،آئی ءَ 1983 ءَ ماں بلوچی زُبان ءَ آزمانکاری بُنگیج کُرتگ۔ آئی ءِ اولی آزمانک ماھتاک سوگات ءَ “لوگانی بانکان” ءِ نام ءَ ءُ دومی آزمانک “آزگیں ٹپ” ءِ نام ءَ شِنگ بوتگ ۔ آئی ءِ سیمی آزمانک ماھتاک اُلُس ءَ 1984 ءَ “لولی” ءِ نام ءَ چاپ بوتگ ۔ رند ءَ شھید سبا دشتیاری ءِ آزمانکانی سَے کتاب چاپ ءُ شِنگ بوتگ کہ آئی ءِ اولی آزمانکی کتاب “ھون ھوشام” 1994 ءَ دومی “ترانگانی بُنزہ ” 2001 ءَ سیمی “آس ءُ آسیب” 2006 ءَ چاپ ءُ شنگ بوتگ اَنت۔

شھید سبادشتیاری بلوچی ءِ اولی آزمانکار اِنت کہ فیمننزم ءِ سر ءَ آزمانک نویس اِتگ آئی ءِ آزمانکانی ھند ءُ جاگاہ بلوچستان ءُ کراچی اِنت، آئی آزمانکانی بُنگپ بلوچ زالبولانی معاشی، چاگردی، جنسی، سیاسی، نشا، ناوانندگی، مزھبی ، رشوت ءُ دگہ بازیں بُنگپ اَنت ۔

سبا دشتیاری گواچن نویسے بوتگ ءُ بلوچ چاگرد ءِ راستی درانگاز اِتگ ءُ دیم ءَ آؤرتگ ۔ آئی ءِ آزمانک گیشتر ڈنی جیڑہ بزاں Extrovert بُنگپ ءِ سر ءَ نویستگ ۔ آئی ءِ آزمانکانی تکنیک : سادہ بیانیہ تکنیک ، وت جوڑگی تکنیک، گَپ ءُ رپَیّ تکنیک ءُ دگہ بازیں ھم تکنیک ءَ نویس اِتگ ۔ سبا ءِ آزمانکانی زُبان تچک ءُ سادگیں زبانے اِنت بلے اردو زُبان ءِ سان گندگ ءَ کَیت ءُ آئی ءِ آزمانکانی تَہ ءَ کارستانی بالادکشی باز گندگ ءَ کئیت ۔

شَھمیریں سبادشتیاری چہ اسکول ءِ زمانگ ءَ ماں اردو زُبان ءَ شائری بُنگیج کن اَنت ۔ وھدیکہ آ بلوچستان مزن شھدربرجاہ شال ءَ وانینگ ءَ بیت ءُ آئی ءَ را واجہ ابداللّہ جان جمالدینی شائری ءِ باروا سر ءُ سوج کن اَنت، دلبڈی ءُ سکیں دنت ۔ رند ءَ ماں شائری ءِ تھرانی بابت ءَ سبا ءِ کتاب “گُلکار ءُ چَکنکار ” 1990 ءَ چاپ ءُ شنگ بیت کہ پہ بلوچی زُبان ءِ نودربر ءُ شائراں سک ارزشت دار اِیت چہ ایشی ءَ ابید آئی ءِ شائری ءِ کتاب “گنگدامیں سرزمین” ھائیکو ءِ کتاب اِنت کہ بلوچی ءِ ھائیکواں ءَ نزآؤرتگ ءُ یکجاہ کُرتگ اَنت، سیمی “آگھی ءِ واب” آئی ءِ شائری کتاب اِنت کہ چہ زند ءَ رند 2015 ءَ سیدھاشُمی ریفریفرنس کتابجاہ چاپ ءُ شِنگ کن اَنت کہ اے کتاب ءِ تہ ءَ سبا ءِ دستونک ، لَچہ ءُ ھائیکو ھوار اَنت ۔

سبا ءِ شئیرے کہ :

“وشی ءَ گون ءُ سَکی ءَ ھمراہ نہ بنت”
“زر چنیں ھمبل ھچ کسی دوزواہ نہ بنت “

شھید سَبا ءَ پہ بلوچ چاگرد ءُ بلوچی زُبان ءِ دیمروئی ءِ ھاتر ءَ “سید ھاشُمی ریفرنس کتابجاہ” ءِ بُنھشت ماں ملیر کراچی ءَ ایر کُرتگ-

شھید سَبا ءَ پہ بلوچ چاگرد ءُ بلوچی زُبان ءِ دیمروئی ءِ ھاتر ءَ “سید ھاشُمی ریفرنس کتابجاہ” ءِ بُنھشت ماں ملیر کراچی ءَ ایر کُرتگ ءُ پہ اے گرانیں کار ءِ واست ءَ بازیں جُھد ءُ جپاھے کَش اِتگ ۔ بلوچی زُبان ءِ اولی لبزبلد کہ سیدھاشُمی ءِ “سید گنج ” اِنت کہ سید ءِ زند ءَ چاپ نہ بوتگ بلے سبا ءِ جُھدانی برورد ءَ چاپ ءُ شنگ بیت بلوچ راج ءِ دیم ءَ آرگ بیت ۔ سبا چہ بلوچی زبان دوست نمیرانیں سید ھاشُمی ءَ سک اسرمند بوتگ ءُ دومی چہ واجہ اَبداللّہ جان جمالدینی ءَ ھم اسرمَنْد بوتگ ، آئی ءَ سید ءُ جمالدینی ءَ را وتی پِگری ءُ روھانی اُستاد گُشتگ ۔سبا ءَ پہ بلوچی زُبان ءِ دیمروئی ءَ شَپ ءُ روچ جُھد کُرتگ کہ آئی ءَ را 1 جون 2011 ءَ دژمناں گونڈلیں تیرانی آماچ کُرت ءُ شَھید کُرت ۔ آئی ءِ کبر ماں میوہ شاہ کبرستان کراچی ءَ اِنت ۔

ھر چاگرد ءِ کہ دیمروئی ءِ واست ءَ ءُ چہ تھاری ءَ کشگ ءُ روژنائی ءِ برگ ءِ واست ءَ کہ شھپگریں ءُ لیکھی انساناں جَد ءُ جُھد کُرتگ گُڑاں دُژمن ءُ بدواھاں آئی ءَ را زوت بیران ءُ نمیران کُرتگ ۔ مرچی شھید سَبا دَشْتیاری، چہ جسمانی درگت ءَ چہ ما چہ جُتا اِنت بلے لیکھی ، پکری ھساب ءَ مئے ھمراہ اِنت ۔ آئی ساچتگیں آزمانک ءُ شائری، پنت ءُ سوج مارا جْوانیں درس ءَ دینت کہ ما وتی اے وڑیں کواس ءُ زانتکار، ساچشتکارانی روچ ءَ برجم بہ دار اِیں ءُ آیانی لیکھہ ، لوٹ ءُ واھگاں بِہ پھم اِنت ءُ بِہ زان اِیں اگاں ما چہ وتی زانتکار ءُ کواسانی روچ ءَ بیگانگ بَہ اِیں گُڑاں ما روچ ء رھمی چہ تھاری ءِ دَنز ءُ مُجاں اَندیم بَہ اِیں ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ دمگ بلیدہ ناشناسیں سلاہ بندیں مردماں پھازگی لشکر ءِ پانگسے ءِ سر ءَ اُرش کُتگ، اُرش ءَ دو پوجی کارمند مرتگ انت ءُ بازینے زدگ بوتگ انت –

پاکستانی پوج آئی ایس پی آر ءَ اُرش ءِ ھبر راست کتگ ءُ گوشتگ کہ سلاہ بندیں مردماں سانگوان پوجی پانگِس ءِ سر ءَ اُرش کُتگ اُرش ءَ دو کارمند 34 سالی سپاھیگ حسنین اشتیاق جھمنند ڈی جی خان ءُ 27 سالی سپاھیگ عنایت اللہ جھمنند جھل مگسی مُرتگ انت –

آئی ایس پی آر ءِ رِد ءَ کلیئرنس آپریشن بندات کنگ بوتگ –

زانگ بہ بیت بلوچستان ءِ دمگ بلیدہ ءُ ایندگہ ھند ءُ دمگاں پاکستانی پوج ءِ سر ءَ بوتگیں اُرشانی زمہ واری گیشتر بلوچ آجوئی لوٹوکیں سلاہ بندیں گل منّ اِتگ انت بلے تنی وھدی اے اُرش ءِ زمّہ واری ھچ گل ءَ نہ منّ اِتگ –

گوستگیں شپ ءَ ناشناسیں سلاہ بندیں مردماں بلوچستان ءِ دمگ ھرنائی ءَ اشکر بروکیں ٹرکانی سر ءَ اُرش کتگ ءُ تاوان داتگ انت –

گیشیں ھالانی رِد ءَ گوستگیں شپ ءَ ناشناسیں سلاہ بندیں مردماں مزنیں کچے ءَ ھرنائی ءِ ھند زرد آلو ءَ شھدگ بستگ ءُ سرجمی ءَ بند کتگ –

اھوالکار ءِ رِد ءَ دگ ءِ بندگے میان ءَ سلاہ بندیں مردماں اشکر بروکیں ٹرکانی سرا اُرش کُتگ ءُ کم چہ کم چِل ٹرکانی ٹیر تراکیں اِتگ انت –

زانگ بہ بیت اے ھند ءِ نزیک ءَ کم.چہ کم دو پوجی پانگس ھست انت –

دمگی اھوالکار ءِ رِد ءَ سلاہ بندیں مردماں سرجمیں شپ ءَ بنجاھی شھدگ بند کتگ ءُ گاڑی چیک ءُ تان کتگ انت ءُ چِل ٹرکانی ٹئیر تیر جتگ ءُ تراکیں اِتگ انت –

دمگی اھوالکار ءِ رِد ءَ شال ھرنائی شھدگ ءَ ھر پنچ کلومیٹر ءَ پوجی پانگس ھست انت بلے ھنگت اے وڈیں وئیل دیم ءَ آیگ انت –

آئی ءَ گوشتگ کہ پاکستانی پوج ایف سی اشکرانی یک ٹنے ءِ سر ءَ دوسد ءُ بیست کلدار گرگ ءَ انت بلے اے دابیں وئیل پھازگی لشکر ءِ بے سوبی ءَ پدر کنت –

زانگ بہ بیت گوستگیں سالے ستمبر ءِ ماہ ءَ بلوچ سلاہ بندیں گل بی ایل اے ءَ پاکستانی پوج ایف سی ءِ دو کارمند دزگیر کتگ اِت انت وھدیکہ ھمے کارمندانی ھاتر ءَ ریسکیو آپریشن ءِ میان ءَ بی ایل اے ءَ پوجی بالگرد ءِ ھم جتگ ءُ چگل داتگ ات –

بالگرد ءِ جنگ ءُ کپگ ءَ سواریں پائلٹ میجر محمد منیب افضل، پائلٹ میجر خرم شہزاد، نائیک جلیل، صوبیدارعبدالواحد ءَ ھوار دو سپاھی مرتگ اِت انت –

سوڈان ءِ سپارتی اھوالانی رد ءَ اود ءَ پوج ءَ جنگ بندی ءِ درگت ءَ گپ ءُ تران ءِ درچ داشتگ، چریشی ءَ پد یک رندے پد ءَ گمان بوگ ءَ اِنت کہ اود ءَ جنگ ءُ جدال بیت اِنت –

ھال سرکنوکیں ادارہ روئٹرز ءِ رد ءَ سوڈانی پوج ءِ نیمگ ءَ حریف پیراملٹری ریپڈ سپورٹ پورس ( آر ایس ایف) ءِ گون ءَ گپ ءُ تران مئی ءَ بندات بیتگ چریشی ءَ لس مردمانی پھریزگ ءِ ھاتر ءَ تیرگواری بندی ءِ سر ءَ تپاکی کنگ بیتگ ات بلے ایشی ءَ ابید ھم بازیں براں اے رھبند لگتمال کنگ بیتگ –

پوج ءُ آر ایس ایف ءَ پیش سَے شمبے ءِ روچ ءَ ھلاس بوکیں پنچ روچی جنگ بندء ءِ مسام ءِ سر ءَ تپاک کتگ ات-

ھردوکانی میان ءَ تہ ءَ کپوکیں سعودی عرب ءُ امریکہ اے مسام ءِ چیردستی ءَ کنگ ءَ بیتگ اَنت – آیانی گوشگ اِنت کہ ھردوکانی نیمگ ءَ لگتمالی کنگ بیتگ اَنت-

سعودی عرب ءُ امریکہ ءِ گوشگ اِنت جنگ بندی ءَ ابید ھم لگتمالی کنگ بیتگ اَنت سوڈان ءَ گٹیں مردمانی تہ ءَ کساس بیست لک مردماں کمکی ساز ءُ سامان رسگ اِنت –

سوڈان ءَ برانز گپتگیں جنگ ءِ سبب ءَ کساس چاردہ لک مردماں وتی لوگ یل کنگ کپتگ اَنت کہ ایشانی توک ءَ سَے لک مردم ھما اَنت ھمساھگیں ڈیھاں اتکگ بیتگ اَنت –

سوڈان ءِ بنجاھی شھر ھرتوم ءَ ھوار بازیں شھران دزی ءُ ڈنگی ءِ ویل دیم ءَ انت ءُ آپ ءُ بجلی ھم نیست اِنت-

چریشی ءَ بازیں نادراہ جاھاں ھم آسراتی نادزرس اِنت –

میان استمان ءِ کمکی گل، سپارت ھانہ ءُ سرکاری گچیجی کارگس بندرگاہ ءُ سر کنگ بیتگ اَنت سوڈان ءِ شپنگ آپریشنز ءَ، اود ءَ ڈیھ ءِ جاور دگہ جاھانی جاوراں گھتر اَنت-

ھندوستان ءُ چین ءِ میان ءَ اے ناوشی بازیں وھداں چہ ناوشی ءِ دروشم ءَ گندگ ءُ پیداک اِنت کہ ھردوکیں ڈیھانی میان ءَ یک ناوشی ءِ دروشم ءَ یکشل ءَ مانشان اتگ-

امریکہ ءِ ھال سرکنوکیں رسانکدر ءَ گوشتگ کہ چین ءُ ھندوستان ءَ ھردوکاں یکے دومی ءَ وتی وتی ڈیھ ءَ اھوالکار کش اتگ اَنت –

آئی ءِ گوشگ اِنت کہ ھندوستان ءَ جاڑیگیں چین ءِ گڈی دو اھوالکارانی ویزہ مدت نہ کتگ اَنت –

ھردوکیں چینی اھوالکارانی سیادی چینی سرکاری رسانکدر ءَ اِنت –

ھمے ڈول ءَ چین ءَ ھم ھندوستان ءِ اھوالکارانی کاگدی نمائندگی رد کتگ ءُ ھردوکیں ڈیھانی میانی ءَ ناوشی ءِ دروشم ءَ گندگ بنت-

زانگ بہ بیت سال دو ھزار ءُ بیست ءَ چین ءُ ھندوستان ءِ سیمسراں جنگ ءَ دلرنجی ءِ توک ءَ گیشی اتکگ اَنت – چین ءَ ھم ھندوستان ءَ بیوکیں جی 20 نیاد ءَ بائیکاٹ کتگ –

روکپتی ءُ روداتکی بلوچستان ءِ ھواریں دمگ پیشن ءَ ایرانی لشکر ءَ تیرگواری کنان ءَ دو مردم کُشتگ اَنت-

اھوالانی رد ءَ روکپتی بلوچستان ءِ دمگ پشین راسک ءَ ایرانی لشکر ءَ تیرگواری کتگ ءُ دو مردم کُشتگ انت ءُ یکے آوار جتگ ءُ برتگ –

اھوالانی رد ءَ کُشگ بیتگیں مردمانی تہ ءَ یکے ءِ پجار ھیدر جدگال جھمنند رادو دشتیاری ءِ نام ءَ زانگ بیتگ ءُ دومی کس ءِ پجار تنی وھدی نہ بیتگ-

زانگ بہ بیت روکپتی بلوچستان ءَ ایرانی لشکر ءِ تیرگواری ءَ مردمانی بیرانی ءُ آئی ءِ دستاں آوار جنیانی ھال یک مدتے ءَ گیش گندگ بوگ ءَ اَنت، سیاسی مردم ایرانی سرکار ءِ سر ءَ ایراد گرگ ءَ اَنت –

بلوچستان ءِ دمگ کیچ ءَ یک زالبولے ءَوتکشی کتگ زندمان وتی دستاں چہ ھلاس کتگ –

گیشیں ھالانی رِد ءَ کیچ ءِ بُنجاھی شھر تربت ءِ ھند آبسر بلوچی بازار ءَ یک زالبولے ءَ وتکشی کتگ ءُ وتی زندمان وتی دستاں چہ ھلاس کتگ-

وتکشی کنوکیں زالبولے ءِ پجّار سمی ء علی حیدر نام ءَ چہ بیتگ ءُ مردمانی گْوشگ ءِ رِد ءَ سمی پنچ چُکانی مات بیتگ – وتکشی ءِ سوب انگت زانگ نہ بیتگ-

ھمے وڑ تربت ءِ جھمنندیں اِھوالکاراے ءِ رِد ءَ تربت ءَ یکیں ھپتگ ءَ اے وتکشی ءِ دومی وئیل اِنت کہ بوگ ءَ اِنت اشی ءَ ساری مولابخش نامیں ورنایے ءَ وتکشی کتگ – بلے کھول نیمگ ءَ چہ آئی ءِ نادُراھی سوب دیگ ءَ اَنت ، بلے گیشتریں مردماں اے گپ راست کتگ کہ ورناہ ءِ مرگ نادُراھی ناں بلکیں وتکشی ءِ وئیلے-

زانگ بہ بیت بلوچستان ءِ جتاجتائیں دمگاں ھمے یکیں سال ءَ مزنیں کچے ءَ وتکشی ءِ وئیل رپورٹ نکش کنگ بیتگ اَنت آیانی تہ ءَ زالبول ھم ھوار اَنت ءُ گیشتریں وتکُشیانی وئیل کیچ ءَ نکش کنگ بیتگ اَنت-

زانگ بہ بیت چیزے روچ ساری آواران ءِ دمگ گیشکور ءَ ھم یک نجمہ نامیں ٹیچرے ءَ وتی گُٹ سادے مان کتگ اَت ءُ وتکُشی کتگ اَت آئی ءِ وتکشی ءِ سوب لیویز کارندہ بوتگ اَنت کہ آ مدام دلسیاہ کتگ اِت دانکہ آ لاچار بوتگ ءُ وتکشی کُتگ ئِے –