TBP Balochi

بالی وڈ ءِ نامی ئیں تامر ویلکم ءِ سیمی بھر ءِ بنداتی ٹریلر شنگ کنگ بیتگ آئی ءِ نام ’ ویلکم ٹو دا جنگل ‘ ایر کنگ بیتگ بلے اے رندی نانا پاٹیکر ایشی ءِ بھر نہ اِنت –

ویلکم ءِ نام ءَ جوڑ بیتگیں گوستگیں دو تامراں نانا پاٹیکر بنجاھی کاسٹ ءِ بھر بیتگ-

سَے شمبے ءِ روچ ءَ یک مراکشے ءِ وھد ءَ یک اھوالکارے ءَ آئی ءَ را جست گپتگ کہ آ ویلکم ٹو دا جنگل ءِ پرچا بھر نہ اِنت آئی ءِ پسو دیان ءَ نانا پاٹیکر ءَ گوشتگ کہ من اے تامر ءِ بھر نہ آں آیاں گمان بیت اِنت ما باز کوھن بوتگ اِنت-

نانا پاٹیکر وویک اگنی ھوتری ءِ تامر دا ویکسین وار ءَ گندگ بیت اِنت آئی ءَ وویک اگنی ھوتری ءِ نیمگ ءَ سٹک کنان ءَ گوشتگ آئی ءَ سما نہ بیت اِنت باز کوھن بوتگ اِنت آئی ءَ من ءَ تامر ءَ ھوار کتگ-

نانا پاٹیکر ءَ می ٹو ءِ مھم ءِ درگت ءَ ھالانی توک ءَ بیتگ وھدیکہ ازمکار تنوشری دتا ءَ ٹاہ داتگ کہ ازمکار آئی ءَ ترسینگ ءَ انت-

اے بھتام ءَ پد نانا پاٹیکر باز کم تامراں گندگ بیتگ – تامر دا ویکسین وار ءِ ٹریلر ءِ دیم ءَ آیگ ءِ مراکش ءَ آئی ءَ درور دیان ءَ گوشتگ تامر انڈسٹری ءِ کجام ھم در بند کنگ نہ بیت اِنت اگاں ترا شر کار کنگ کپ ات انت-

تامر ویلکم ٹو دا جنگل دسمبر دوھزاد ءُ بیست ءُ چار ءَ شنگ بیت اِنت ءُ ایشی ءِ کاسٹ ءَ اکشے کمار، سنجء دے، ارشد وارثی، دیشا پٹنی، روینا ٹنڈن، لارا دتا ءُ پاریش راول ھوار اَنت-

افریقہ، ایشیا ءُ چہ لاطینی امریکہ ءَ آیوکیں سدانی کچ ءَ پناہ گزینانی کہ ایانی توک ءَ سرجمیں کھول ھوار اَنت اے وھد ءَ امریکہ ءِ ریاست کیلیفورنیا ءَ پترگ ءَ میکسیکو ءُ امریکہ ءِ میان ءَ سیمسر ءِ سر ءَ دراجیں لین اوشتوک اَنت-

ھال سر کنوکیں ادارہ روئٹرز ءِ رد ءَ کیلیفورنیا ءَ سنا ڈیاگو ءِ نزیک ءَ اے وڑیں ندارگ ھمے سال ءِ مئی ءَ گندگ ءَ اتکگ کہ اود ءَ سدانی کچ ءَ مردم مُچ بیتگ اَنت-

کمکی باسک ءُ انسانی ھکانی واستا کار کنوکیں دو ڈیھانی سیمسراں جنوکہں بیریئرز ءِ میان ءَ جاڑیگیں پنازگزینانی واستا وردنی ورگ داتگ بیتگ-

کمکی باسکاں امریکہ ءِ کسٹمز ءُ بارڈر ءِ پروٹیکشن ءِ نیمگ ءَ اجازت بیتگ کہ پناہ گزینانی ھواری ءَ ھواریں زھگاں جتا جتائیں وردنی دیگ بہ بیت اِنت-

روئٹرز ءَ اکس شنگ کنان ءَ پیش داشتگ کہ اے مردم امریکہ ءِ سیمسری پورس ءِ کش ءُ گوراں اوشتاتگ انت ءُ آ ایاں سرپدی دیگ ءَ انت-

امریکہ ءِ فرینڈز سروس کمیٹی ءَ انسانی ھکانی وکیل ایڈریانا جاسو ءَ گوشتگ کہ پناہ گزہنانی گیش بوتگیں کچ ءَ ما گندگ ءَ اِنت آ گوستگیں ھپتگ ءِ سَے شمبے ءُ چار شمبے ءَ بندات بیتگ اَنت-

ایڈریانا جاسو ءَ گوشتگ کہ مئی ءِ ماہ ءَ زانگ ءَ پر امیت بیتگ اِنت کمکی ایجنسیانی کمک ءَ پناہ گزیناں زوت دیم ءِ منزل ءَ سر کن ایں بلے جاورھال چوش بوت کہ داں انگت ءَ سدانی کچ ءَ مردم دو ڈیھانی سیمسر ءِ میان ءَ جنجالانی یا بیریئرز ءِ تہ ءَ جاڑیگ اَنت-

امریکہ ءَ کرونا ءِ آیگ ءُ پد ڈیھ ءَ پناہ گزینانی ایگ ءَ ٹائٹل 42 ءِ نام ءَ رھبندے جوڑ کتگ ات کہ ھمے سال ءِ مئی ءَ ھلاس کنگ بیتگ-

اے وھد ءَ بازیں کچے ءَ افریقہ، ایشیا ءُ لاطینی امریکہ ءَ ھزارانی مردم جوانتریں زند ءِ شوھاز ءَ اَنت ءُ امریکہ ءَ گیر کانونی رنگ ءَ پترگ ءِ جھد ءَ اَنت-

ایڈریانا جاسو ءَ پناہ گزینانی مُچی ءَ میان اُستمان ءِ گیر سرکاری نیاد ءِ واتسا اکٹھ نامینتگ ءُ گوشتگ کہ اے مردم سرجمیں چہ اتکگ اَنت-

اد ءَ مردم چہ کیمرون ءَ اتکگ اَنت ‌، روکپتی چہ افریقہ، اد ءَ مردم چہ کولمبیا ءُ اتکگ اَنت، پیرو، ایکواڈور ءُ میکسیکو ءَ اتکگ اَنت-

آئی ءَ گوشت ما ایشیا ءِ گیش بوتگیں پناہ گزین اد ءَ دیستگ اَنت کہ ایشانی توک ءَ گیشتر ویتنام ءَ اِنت-

افریقہ ءِ ڈیھ چہ گھانا حسن حمزہ ءَ لھتیں ھپتگانی توک ءَ اتکگ آیاں سفر برازیل ءِ راہ ءَ بندات کتگ-

حسن حمزہ ءَ گوشتگ اے ھچ آسان نہ اِنت افریقہ ءِ زند باز مشکل اِنت شما زان ات ما وتی بچینگ ءَ تچگ ءَ اِنت-

بلوچستان ءِ دمگ چہ شاھرگ ءَ ھال اِنت کہ یک مردمے پاکستانی چیریں ادارھانی کارندھاں دزگیر کنگ ءَ پد بیگواہ کتگ-

گیشیں ھالانی رِد ءَ دلیلو ء وشو جھمنند شاھرگ، ھرنائی ءَ پاکستانی چیریں ادارھانی کارندھاں سے روچ ءَ ساری شاھرگ ءِ راہ چہ زورانسری آوار جتگ ءُ انگت بیگواہ ءَ اِنت-

کھول ءَ دلیلو ءِ زورانسری آوار جنی ءِ تُرس درشان کتگ ءُ یل کنائینگ ءِ لوٹ کتگ-

زانگ بہ بیت سے روچانی تہ ءَ ڈیرہ بگٹی ءَ یک درزنے ءَ گیش مردم زورانسری آوار جنی ءِ نشانگ کنگ بیتگ-

گوستگیں سَے روچ انت کہ ڈیرہ بگٹی ءَ مزنیں کچے ءَ لشکر کشی برجاہ انت، تنی وھدی بازیں مردمے زورانسری آوار جنگ ءُ بیگواہ کنگ بوتگ انت، وھدیکہ مروچی شال ءِ کور کماندار آصف غفور ءُ آئی جی ایف سی ھم ڈیرہ بگٹی ءَ شتگ انت –

راجدوست ھمے گمان کنگ ءَ انت کہ اے اپسرانی ڈیرہ بگٹی ءَ روگ ھمے زاھر کنت کہ اے لشکر کشی ءِ تہ ءَ گیشی کار انت –

ڈیرہ بگٹی ءَ لشکر کشی پرچا بوگ ءَ انت؟

گوستگیں روچاں ھژدہ ستمبر ءَ ناشناسیں سلاہ بندیں مردماں جانی بیڑ ءِ ھند ءَ سپرے ءَ رؤکیں ھژدہ مردم داشتگ انت کہ آیانی پجار کنگ ءَ پد شش مردم ھما وھد ءَ آوار جتگ انت وھدیکہ آ چہ ڈیرہ بگٹی ءَ دیم پہ سبی ءَ رؤگ ءَ بوتگ انت –

آوار جنگ بوتگیں مردمانی درگت ءَ چہ رسانکدراں ھمے ھال شنگ بوتگ کہ اے مردم فٹبالر انت –

سرکار ءِ گوشگ:
سرکار ءِ گوشگ انت کہ اے لشکر کشی پہ آوار جنگ بوتگیں مردمانی یل کنائینگ ءِ ھاتر ءَ کنگ بوگ ءَ انت –

بلے پدا ھم راجدوست ھمے گوشگ انت کہ اے لشکر کشی ءَ پوج لس مھلوک ءَ نشانگ کنگ ءَ انت، وھدیکہ لشکر کشی ءِ میان ءَ پوج ءَ مزنیں کچے ءَ مردم زورانسری آوار جتگ ءُ بیگواہ کتگ انت –

اے کئیا آوار جتگ انت؟

ڈیرہ بگٹی ءَ پاکستانی پوج ءُ آئی ءِ کمکار ءُ سرکاری ادارھانی سر ءَ اُرش کنوکیں گل ” بلوچ لبریشن ٹائیگر ” ءَ رسانکدراں وتی شنگ کرتگیں درشانے ءِ تہ ءَ گوشتگ کہ اے آوار جنگ بوتگیں شش ایں مردم آئی ایس آئی ءِ ایجنٹ انت ءُ ما آوار جتگ انت –

جارکش ءَ وتی درشان ءِ تہ ءَ گوشتگ کہ رسانکدراں ھما کہ فٹبالر گوشگ بوگ انت راستی ءَ آ آئی ایس آئی ءِ چاریگ انت کہ آیاں ڈیرہ بگٹی ءِ تہ ءَ دست گوشیں مردم آوار جتگ ءُ آیانی شھید کنگ ءَ اشانی دست تچکی ءَ مان انت –

اے وھدی ڈیرہ بگٹی ءَ چی بوگ ءَ انت؟

گوستگیں سَے روچ انت کہ ڈیرہ بگٹی ءَ پراھگ ءَ جنگی بالگرد تر ءُ گرد کنگ ءَ انت وھدیکہ دومی نیمگ ءَ پوجی کاروان ھم آیگ ءَ انت ءُ بازیں جاھاں پوج ءِ نیمگ ءَ پٹ پول کنگ بوگ انت –

دمگی مردمانی رِد ءَ ڈیرہ بگٹی ءُ سوئی اے وھدی پوج ءِ انگر انت وھدیکہ پوج ءَ تنی وھدی مزنیں کچے ءَ مردم آوار جتگ ءُ بیگواہ کتگ انت کہ آیانی تہ ءَ یازدہ مردمانی پجار کنگ بوتگ انت –

آوار جنگ بوتگیں مردمانی تہ ءَ دمگی شائر عزیز بگٹی ، سلیمان بگٹی، حاجی میاں خان، نوجوان علی بخش، پٹھان، ہاشم بگٹی، بابل بگٹی، یعقوب بگٹی، کریم بگٹی، مصطفٰی بگٹی ءُ بجار بگٹی ھوار انت –

ھمے گوشگ بوگ ءَ انت کہ آوار جنگ بوتگیں مردمانی کچ سک باز انت بلے دمگ ءِ تہ ءَ برجاھیں لشکر کشی ءُ پوج ءِ انگر ءِ سوب ءَ ایندگہ مردمانی پجار تنی وھدی کنگ نہ بوتگ –

لشکر کشی ءِ میان ءَ پوج ءُ سلاہ بندانی میان ءَ میڑے ھال ھم اتکگ انت –

دومی نیمگ ءَ بلوچ لبریشن ٹائیگر ءِ جارکش ءَ گیس پائپ ءُ پوج ءِ کاروان ءِ سر ءَ بوتگیں ارشانی زمہ واری منّ اِتگ، وھدیکہ سرکار پوج ءِ سر ءَ بوتگیں اُرشانی درگت ءَ ھچ گوشگ ءَ نہ انت بلے گیس پائپانی سر ءَ بوتگیں اُرشانی ھبر راست بوتگ انت –

بلوچستان ءِ دمگ چہ ڈیرہ بگٹی ءَ پاکستانی پوج ءَ دگہ چار مردم زورانسری آوار جنگ ءَ پد بیگواہ کنگ بیتگ اَنت-

بیگواہ بیتگینانی پجّار یعقوب ء شاہ مور بگٹی، کریم ءُ مصطفٰی ء غلام رسول بگٹی ءُ بجار ء حاجی سبزل بگٹی ناماں چہ بیتگ اَنت-

اے مردم گوستگیں شپ ءَ سوئی ءِ جتاجتائیں دمگاں چہ آوار جنگ ءُ بیگواہ کنگ بیتگ اَنت-

زانگ بہ بیت کہ گوستگیں سے روچاں چہ ڈیرہ بگٹی ءَ مزنیں کچے ءَ لشکر کشی برجاہ ءَ اِنت، لشکر کشی ءِ میان ءَ بازیں مردمے زورانسری آوار جنی ءِ نشانگ کنگ بیتگ اشانی تہ ءَ لھتے ءِ پجّار بیتگ ءُ لھتے ءِ پجّار انگت نہ بیتگ اَنت-

مراکش ءَ آدینگ ءِ شپ ءَ کوہ اطلس ءَ آیوکیں زمین چَنڈ ءَ بیران بیتگیں مردمانی کچ کساس دوھزار ءُ نُھ سد ءَ سر بیتگ اَنت ءُ کساس دوھزار ءُ پنچ سد ءِ کچ ءَ زدگ بیتگ اَنت –

ھال سر کنوکیں روئٹرز ءِ رد ءَ یک کرنے ءَ پیش ڈیھ ءَ اتکگیں درستاں گیش تباہ کنوکیں زمین چَنڈ ءِ سبب ءَ شھری نی ترس آماچ اَنت آیاں چارُمی شپ ڈن ءَ گوازینتگ –

دومی نیمگ ءَ مراکش ءِ سرکار تباہ آماچی ءِ بوگ ءَ ابید ھم ڈیھ ءَ آئی ایم ایف ءُ ورلڈ بینک ءِ نیاد ءَ برجم دارگ لوٹگ ءَ اِنت –

جاورھالانی بارو ءَ سرپدہ دیوکانی گوشگ اِنت کہ مراکش ءِ سرکار لوٹ ایت آ شیڈول ءِ رد ءَ اکتوبر ءَ میان اُستمانی مالیاتی پنڈ ءُ ورلڈ بینک ءِ سالگشت ءِ نیاد ءَ بہ دار ایت – اے درچ ءَ دان انگت ءَ پلان ءِ ھچ وڑیں دگری نیست اِنت-

آئی ایم ایف ءُ ورلڈ بینک ءَ بیوکہں نیاد ءِ سر ءَ مراکش ءِ بنگپ ءِ در ءَ گپ جنگ نہ من اتگ ءُ گوشتگ کہ انی اے دویں ادارھانی لیکہ ءُ دلگوش زمین چنڈ ءَ بیتگیں تباھی ءُ کمکی کارانی سر ءَ اِنت-

آئی ایم ایف ءُ ورلڈ بینک ءِ نیاد ءَ سال دوھزار ءُ بیست ءُ یک ءَ بیگی بیتگ بلے کورونا وائرس ءِ سبب ءَ دوکاں مھتل کتگ بیتگ-

آئی ایم ایف ءُ ورلڈ بینک ھمک سَے سال ءَ وتی نیاداں دیمروحی کرتگیں ڈیھاں برجم دار اِت اِنت کہ اود ءَ شریں زرکاری ءُ مھکمیں سرکار بہ بیت اِنت-

اسپین ،برتانیہ، متھدہ ارب امارات ءُ گتر ءِ ٹیم کوہ اطلس ءَ رک اتگیں مردماں شوھاز کنگ ءَ اَنت-

سرکاری ٹی وی ءِ رد ءَ مراکش ءِ سرکار ءَ دگہ ڈیھاں کمک ءِ پیش کنگ ءَ من ات انت-

شش اشاریہ ٹکش ھشت ءِ زمین چنڈ ءَ سھریں ریک ءَ جوڑ بیتگیں لوگ دارتگ اَنت ءُ چریشی ءَ لوگ تبای بیتگ انت ءُ کوچگ ءُ ھندان مردم چیریں وتی مردمانی ودار ءَ اَنت-

طنمیل ءِ میتگ ءَ کساس ھمک لوگ پروشتگ اَنت ءُ اود ءَ مردم بے لوگ اَنت-

پنچاہ ءُ نُھ سالی ئیں مھمد الحسن ھمے وھد ءَ ورگ ورگ ءَ بیتگ کہ زمین چنڈ اتکگ – زمین چنڈ ءِ وھد ءَ آئی ءِ سی ءُ یک سالی ئیں زھگ لوگ ءَ دراتکگ بلے ھمساھگانی لوگ ءِ چھت کپتگ آئی ءِ سر ءَ-

مھمد الحسن ءَ گوشتگ کہ آئی ءَ وتی زھگ ءِ شوھاز کتگ بلے آئی ءَ زندگی ءَ نہ رس اتگ-

زمین چنڈ ءِ وھد ءَ مھمد الحسن وتی لوگی ءُ جنکیں زھگ ءِ گون ءَ لوگ ءَ بیتگ ءُ آ بچ اتگ- مراکش ءِ لشکر ءِ گوشگ اِنت کمکی کار بوگ ءَ اَنت ڈیھ ءَ مردمانی واستا آپ ،ورگ ءُ تمبو ءُ کمبل بھر کنگ بوگ ءَ اَنت-

نیدر لینڈز ءِ یک آمیدگسے ءَ دوشمبے ءِ روچ ءَ پاکستان ءِ انٹرنیشنل ٹیم ءِ گوستگیں کرکٹر خالد لطیف ءَ اسلام ءِ سر ءَ ایراد گروکیں اسمبلی ءِ باسک گیرٹ وائلڈرز ءِ کوش ءِ سٹک جنگ ءِ جرم ءَ دوزادہ سال ءِ سزا دیگ بیتگ-

سی ءُ ھپت سالی ئیں لطیف ءِ جاڑیگ نہ بوگ ءَ اے سزا دو ھزار ءُ ھژدہ ءَ یک آن لائن ویڈیو پوسٹے ءَ گوشدارینگ بیتگ اَنت اے ویڈیو ءَ آئی ءَ گوشتگ ات کہ ھرکس ھالینڈ ءِ کانون ساز وئلڈرز کش ایت آ آئی ءَ بیست ءُ یک ھزار یورو بزانکہ بیست ءُ دو ھزار ڈالر داد دنت اِنت-

وائلڈرز ءِ نیمگ ءَ پیغمبف اسلام ءِ (خاکوں) ءِ دیمپانی ءِ جھد ءَ پد آئی ءَ یک تامر بندے پوسٹ کتگ ات-

پریزائڈنگ جھ، جی وربیک ءَ آمیدگس ءَ را گوشتگ ات کہ آئی ءِ ھیال ءِ یکین کنگ مُشکل نہ اِنت دنیا ءِ کجام ھم مسٹر وائلڈرز ءِ کُشگ ءَ دلگوش دات کتگ ات-

آئی ءَ گوشتگ ات کہ ملزم ءَ اے زانتگ ات ءُ آئی ءِ کال ءَ وائلڈرز ےَ کُشگ ءِ ھیال ءِ سکین داتگ بیتگ-

اے گپ ءِ گمان باز کم اِنت کہ لطیف وتی سزایاں بہ گوازین ایت پرچاکہ داں انگت ءَ اے سرپدی نہ بیتگ آبکجا اِنت –

ڈچ واکداراں آئی ءَ را رھوت کنگ باز رند ءَ جھد کتگ دانکہ آئی ءَ چہ کیس ءِ بارو ءَ جست ءُ پرس کنگ بہ بیت اِنت – بلے آ ایشی ءَ سوبمند نہ بیتگ آئی ءَ چہ پاکستان ءَ کانون ءِ کمک لوٹ اتگ بلے آ داں انگت ءَ ایشی ءَ رگڑگ ءَ اِنت-

بلوچستان ءِ دمگ چہ مستونگ ءُ پنجگور ءَ پاکستانی پوج ءِ دست ءَ یکے بیگواہ کنگ بیتگ ءُ یکے چہ پنجگور ءَ آجو بیتگ-

کھول گْوشگ رِد ءَ غلام حیدر ء کرم خان نیچاری جھمنند کوھک مستونگ دہ ستمبر ءَ پاکستانی پوج ءَ لوگ سر ءَ بیڑبرتگ ءُ لَٹ کُٹ ءَ پد وتی ھمراھی ءَ برتگ کہ انگت بیگواہ ءَ اِنت-

ھمے وڑ ھژدہ جنوری 2019 ءَ چہ کراچی پاکستانی پوج ءِ دست ءَ آوار جنگ بیتگیں پنجگور ءِ جھمنند یوسپ بلوچ ء ٹھیکدار شھید یونس آجو بوتگ ءُ وتی لوگ ءَ سر بیتگ-

کھول رِد ءَ دْراھیں مَدتے ءِ بیگواھی ءَ پد آ آجو بیتگ-

ایشیاء کرکٹ کپ ءَ انڈیا ءَ جوانی ءَ گوازی کنان ءَ 357 رنانی ٹارگٹ ایر کتگ کہ ٹارگٹ ءِ پروشگ ءَ پہ پاکستان ءِ سرجمیں لیبیاں بس یکسد ءُ بیست ءُ ھشت رن جوڈ کتگ ءُ دراہ آؤٹ بوتگ انت ـ کپٹن بابر آعظم ءَ ھوار پاکستان ءِ ایندگہ لیبیاں ھچ وڈ ءَ مزنیں اسکور جوڈ کتگ نہ کتگ –

انڈیا ءِ سوبمندتریں بالر کلدیپ یادو بوتگ کہ آئی ءَ ھشت اوورانی تہ ءَ بیست ءُ پنچ رن داتگ ءُ پاکستان ءِ پنج لیبی واپس دیم داتگ انت –

کولمبو بوتگیں گوازی ءَ انڈیا ءَ اولسر ءَ بیٹنگ کنان ءَ دو وکٹانی تاوان ءَ سَے سد ءُ پنجاہ ءُ شش رن جوڈ کتگ کہ پاکستانیاں سِی ءُ دو اووراں بس یکسد ءُ بیست ءُ ھشت رن جوڈ کتگ –

اے گوازی ءَ پاکستان ءِ بس چار لیبی ڈبل فگر جوڈ کت کتگ، فخر زمان ءَ بیست ءُ ھپت رن جوڈ کتگ، افتخار احمد ءُ آغا سلیمان ءَ بیست ءُ سَے ءُ بیست ءُ سَے جوڈ کتگ ءُ آیانی تہ ءَ کپٹن کپٹن بابر آعظم ءَ بس دھ رن جوڈ کتگ کہ آ پانڈیا ءَ آؤٹ کتگ –

بھارت ءِ نیمگ ءَ بنداتی چار بیٹس میناں جوانیں گوازی پیش داشتگ – کہ آیانی تہ ءَ شبھمن گل ءَ پنجاہ ءُ ھشت رن جوڈ کتگ ءُ کپٹن روہت شرما ءَ ھم جوانی ءَ پنجاہ ءُ شش رن جوڈ کتگ –

ھمے وڈ ویرات کوہلی ءَ سنچری کتگ ءُ یکسد ءُ بیست ءُ دو رن جوڈ کتگ ءُ ناٹ آؤٹ بوتگ ءُ کے ایل راہول ءَ ھم سنچری کتگ ءُ یکسد ءُ یازدہ رن جوڈ کتگ – پاکستان ءِ نیمگ ءَ شاداب خان ءُ شاہین آفریدی جوڈ بوتگ انت کہ آیاں یک یک وکٹ ءِ گپتگ –

بلوچستان لبریشن فرنٹ ءِ جارکش میجر گوھرام بلوچ ءَ چاگردی ترامجاہ ٹیلی گرام ءَ شنگ کتگیں درشان ءِ تہ ءَ گوشتگ کہ سرمچاراں گل ءِ اھوتی ھالے ءِ سر بیگ ءِ بنیاد ءَ کار کُرتگ ءُ پاکستانی لشکر ءِ چریک سناء اللہ دیدگ پنام گرنیڈ ء نسرت اللہ‘ ءِ سر ءَ اُرش کُرتگ ءُ کُشتگ۔

جارکش ءَ گوشتگ سناء اللہ پنام گرنیڈ پیش ءَ یک بلوچ آجوئی دوستیں سلاہ بندیں گلے ءِ باسک بیتگ بلے دُژمن ءِ دیم ءَ سلاہ ءِ چگل دیگ ءَ پد راجدروھی کاراں ھوار بیتگ۔گْوستگیں سال ءَ ھم سرمچاراں نشانگ کُرتگ اَت بلے انگت چہ وتی ردیں کاراں دزکش نہ بوت۔

آئی ءَ گوشتگ دیر اِنت کہ اے مردم ءِ کارانی سر ءَ پر بی ایل ایپ ءِ سرمچارانی چم سَک بیتگ اَنت،سرمچاراں شمبے نوہ سمبر ءَ کیچ ءِ ھند دشت ءَ شئے زنگی ءُ جنگل بازار ءِ میانجی ءَ تیر جتگ ءُ کُشتگ۔آ چہ پاکستانی لشکر ءِ بُنجل ءَ گند ءُ نند کنگ ءَ پد واتر چہ تربت ءَ دشت ءَ آھگ ءَ بیتگ۔

جارکش ءَ گوشتگ سناء اللہ ءِ بابت ءَ گل ءَ پٹ ءُ پول کُرتگ کہ آ میاربار بیتگ، چہ ایشی ءَ راجی میاربارے لیکگ ءُ آئی ءِ بگیری ءَ کار کنگ ءِ شور کنگ بیتگ۔مدام سلاہ بند بیتگ ءُ سرمچارانی بگیری ءَ پاکستانی لشکر ءِ لشکرکشی ءُ کاراں ھوار بیتگ۔ سیاھجی ءُ مزن بند ءَ پاکستانی لشکر ءِ لشکرکشیاں گندگ بیتگ، سرمچارانی اوتاگاں اُرش کنگ ءِ میان ءَ آ راجی مڈیانی لُٹ ءُ پُل کنگ ءُ ماندارگ  ءَ ھوار بیتگ۔ آئی ءَ وتی تامُربند ءُ اکس مردماں پیش داشتگ اَنت ءُ ناز کُرتگ۔

آئی ءَ گوشتگ پہ پاکستانی لشکر ءِ آسراتی ءَ چاریگی ءُ جنگی پِڑ ءَ جنگ کنگ ءَ ابید سناء اللہ چاگردی دگہ سلکاریاں ھوار بیتگ۔منشیات ءِ کاروبار ءُ بلوچ شھیدانی مانشانی کم منگِھ کنگ ءِ میار آئی ءِ سر ءَ سابت بیتگ۔

جارکش ءَ گوشتگ شھید ابداللہ ء رسول بکش جھمنند جمک ءِ شھید کنگ ءُ بلوچ راجی آجوئی ءِ باسکانی زور بیگواہ کنگ ءَ ھوار بیتگ۔ پِدائی شھید نوید (اسلم) ءِ جنازہ ءِ نماز ءِ سر ءَ پہ مردمانی نشان کنگ اتکگ ءُ  پاکستانی لشکر ءِ نیمگ ءَ سرمچارانی بگیری ءَ کارانی بھر بیگ ءِ میار ءَ گل ءِ شورانی بنیاد ءَ کُشگ بیتگ۔

میجر گوھرام بلوچ ءَ گوشتگ دگہ یک اُرشے ءَ بلوچستان لبریشن فرنٹ ءِ سرمچاراں 10 ستمبر ءَ یکشمبے ءِ روچ ءِ سَے ءَ وتگڑیں سیمسر (گولڈسمتھ) ٹٹ ءِ پھریزگ ءَ برجاھیں پاکستانی لشکر ءِ پانگس ءِ سر ءَ اُرش کُرتگ ءُ زروگریں پاکستانی لشکر ءِ یک کارمندے کُشتگ۔

آئی ءَ سرمچاراں کیچ ءِ ھند مند ءَ ھمزھی ءِ بند ءَ کاسگانی کور ءَ برجاھیں پاکستانی لشکر ءِ پانگس ءِ سر ءَ گوں اسنائپر توپک ءَ نشانگ کُرتگ ءُ یک کارمندے کُشتگ۔

جارکش ءَ گوشتگ بلوچستان لبریشن فرنٹ ریاست ءِ چریک ءُ دُژمنیں لشکر ءِ کارمند ءِ کوش ءِ زمہ واری ءَ منّ ایت ءُ بلوچ راج، چاگرد ءُ آجوئی زْرمبشت ءِ بگیری ءَ پُرکاریں ریاست ءِ دُرسیں چریکاں کڈن کنت کہ شَر بہ بنت۔بی ایل ایف بلوچ راجی سیتانی پھریزگ ءَ چوشیں مردمانی گرگ ءُ سزا دیگ ءَ برجاہ دار ایت۔