TBP Balochi

مستونگ ءَ سلاہ بندیں مردماں تیرگواری کنان ءَ لیویز ءِ یک کارندھے کشتگ-

گیشیں اھوالانی رد ءَ پشمبے ءِ روچ ءَ بلوچستان ءِ دمگ مستونگ ءِ شھر ءَ بسانی ھڈہ پڑی گنج ءَ ناشناسیں پرپٹ سواریں مردماں تیرگواری کتگ ءُ عبدالظاھر ء ھاجی غلام مھمف بنگلزئی تیرگواری کتگ ءُ کشتگ-

تیرگواری ءِ زد ءَ دگہ دو مردم عطر شاہ ء ظھور شاہ جھمنند کردگاپ ءُ عبدالخالق ء عبدالقیوم مینگل زدگ بیتگ اَنت-

دمگی انتزامیہ وئیل جاہ ءَ سر بیتگ ءُ لاش ءُ زدگ بیتگیں مردم اش چست کتگ ءُ شھید نواب غوث بخش میموریل ھسپتال ءَ برتگ انت ئے ءُ پولیس ارشکارانی پٹ ءُ پول ءَ کنگ ءَ اِنت-

سے جولائی 2015 ءَ پاکستانی پوج ءِ دست ءَ زورانسری آوار جنگ بیتگیں عظیم دوست بلوچ ءِ گھار رخسانہ دوست ءَ گْوشتگ کہ مارا اے بگش اَنت کہ مارا کجام گپ ءِ سزاہ ءَ دیگ ءَ اَنت-

آئی ءَ گْوشتگ کہ منی برات سے جولائی 2015 ءَ چہ گوادر بیگواہ کنگ بیتگ کہ تنی وھدے بیگواہ ءَ اِنت- برات ءِ زورانسری آوار جنی ءَ پد ما زھنی نادُراہ جوڑ بیتگیں ءَ منی مات برات ءِ ودار ءُ گم ءَ چہ نادُراہ جوڑ بوتگ ءَ مئے لوگ وشی ءِ جاہ ءَ درد، تکانسری ءُ ھرسّانی ھار اِنت-

آئی ءَ گْوشتگ کہ نی منی برات ءِ زورانسری آوار جنی ءِ نُھ ءِ سال دْراجیں مُدتے سرجم بوتگ، اے نُھیں سال ما چون گْوازینتگ اَنت کہ کس باور کُت نہ کنت ، مئے دوستناک سلامتی ءَ چست کتگ ءُ مارا آ پہ سلامتی لوٹ اِیت-

آئی ءَ گْوشتگ کہ ما وتی برات عظیم دوست بلوچ ءِ پہ سلامتی یل کنائینگ ءِ ھاتر ءَ باندا آدینگ روچ ھشت ستمبر ءَ بلوچ وائس فار جسٹس ءَ چہ ھمگرنچ کنگ ٹوئٹر “X” ءَ یک کمپین برجم دار ایں، من سرجمیں انسان دوستیں مردماں گوں دزبندی کناں آ کمپین ءَ بھر بزور اَنت منی برات ءِ یل کنائینگ ءِ ھاتر ءَ توار چست بکن اَنت-

بلوچستان ءِ دمگ کیچ ءِ تھسیل مند ءَ پاکستانی پوج ءَ یک ورنایے زورانسری آوار جنگ ءَ پد ناشناسیں جاھے ءَ برتگ-

گیشیں ھالانی رِد ءَ پرندوشی مند ءِ دمگ کسٹم بازار ءَ پاکستانی پوج بیڑبرتگ ءُ پت ءُ چُک لَٹ ءُ کُٹ کتگ اَنت آوار جتگ اَنت ءُ کمو رند ءَ پت یل کتگ ءُ چُک انگت بیگواہ ءَ اِنت-

زورانسری آوار جنگ بیتگیں ورنا ئے پجّار مھیم جان ء علی اکبر نام ءَ چہ بیتگ-

زانگ بہ بیت بلوچستان ءَ جتاجتائیں دمگاں زورانسری آوار جنی ءِ رپورٹ نکش بوگ ءَ اَنت دومی نیمگ ءَ بیگواھیں مردمانی ھاتر ءَ توار چست کنوکیں گل وائس فار بلوچ مسنگ پرسنز ءِ شُدکُشیں ھڑتالی بُنجل برجاہ ءَ اِنت-

سر بیتگیں ھالانی رد ءَ روکپتی بلوچستان ءِ دمگ نیکشھر ءَ ایرانی لشکر ءَ دو ورنا آوار جنگ ءَ پد ناشناسیں جاھاں برتگ اَنت-

گیشیں اھوالانی رد ءَ آوار جنگ بیتگیں مردمانی پجار نوزدہ سالی ئیں مھمد حسن صدیقی ء نواب ءُ کامران صدیقی ء چاکر جھمنند چاھان نیکشھر ءِ نام ءَ زانگ بیتگ اَنت-

زانگ بہ بیت روکپتی بلوچستان ءَ مھلوک ءِ آوار جنگ ءُ بیگواہ کنگ ءِ درچ روچ پہ روچ گیش بوان اِنت کہ چریشی ءِ سبب ءَ اود ءَ مردمانی دلاں گیش ترس ودی بوگ ءَ اَنت-

بلوچستان ءِ بُنجاھی شھر شال ءِ دمگ اغبرگ ءَ کاؤنٹر ٹیرارزم ڈیپارٹمنٹ ( سی ٹی ڈی ) ءِ گوں ناشرکاراں تیرگواری رِد برجاہ بیتگ- کُشگ بیتگیں سرجمیں مردمانی سیادی گوں گلے ءَ اِنت-

جنگ بیتگیں مردم پولیس ءَ کانود اَڑ دیوکیں ادارھانی نشانگ کنگ ءَ ھوار بیتگ اَنت-

سی ٹی ڈی ءَ کُشک بیتگینانی کارمرزی ئیں لوگ ءَ وتکش جیکٹ ، پنچ دستی بمب ءُ تراکناکیں شوراں ھوار دگہ ساز ءُ سامان دزکپگ ءِ ٹاہ جتگ-

سی ٹی ڈی گوشگ رِد ءَ جنگ بیتگیں مردمانی سیادی چہ ٹی ٹی پی ءَ اِنت-

بلوچستان ءَ سی ٹی ڈی ءِ بیڑ شکی بنت، اشی ءَ ساری ھم سی ٹی ڈی ءِ میڑ رسانکدر ءُ دگہ نیمگاں چہ دروگ پدر بیتگ اَنت-

اے بیڑاں جنگ بیتگیں گیشتر بیگواھیں بلوچاں چہ بوتگ اَنت وھدے لھتے نیکراھیں پارٹیانی دستگیں مردماں جنگ ءِ منّانک ھم دزکپتگ اَنت-

گوستگیں روچاں واشک بسیمہ ھم ھمے وڑیں وئیلاں جنگ بوتگیں مردمانی تہ ءَ دو ءِ پجّار پیسر ءَ چہ بیگواھیں مردماں چہ بیتگ اَنت

مصر ءِ بنجاھی شھر قاھرہ ءِ رودراتکی ھند حدائق القبہ ءَ چار تبک ءِ ماڑی یے کپتگ ءُ چریشی ءَ یکیں ٹک ءِ چار مردم بیران ءُ پنچ زدگ بیتگ اَنت-

عکاظ روتاک ءِ رد ءَ زدگ بیتگیں مردم نزیکیں ھسپتال ءَ سر کنگ بیتگ انت ءُ ماڑی ءِ کپگ ءِ سبب پٹ ءُ پول کنگ بوگ ءَ اَنت-

وئیل ءَ پد قاھرہ سیکیورٹی پورس ءُ کمشنری ءِ واکدار وئیل جاہ ءَ سر بیتگ اَنت – ماڑی ءِ دیولانی چیر ءَ چیر تر اتگیں مردمانی شوھاز ءَ مزنیں مشینانی کمک زورگ بیتگ اَنت-

بنداتی ھالانی تہ ءَ گوشگ بیتگ وئیل سھب ءَ مھلہ پیش اتکگ ھما وھد ءَردم واب بیتگ اَنت کمکی مردماں سَے مردم کش اتگ انت ءُ آ نزیک ءِ ھسپتال ءَ سر کتگ اَنت-

پبلک پراسیکیوشن آفس ءَ گوشتگ کہ اسرمندیں جاہ ءِ پٹ ءُ پول کنگ بیت اِنت ءُ ایشی ءِ سبب زانگ بنت اِنت ءُ رپورٹ ءِ واستا انجیئرنگ کمیٹی ءِ دارگ بیتگ –

قاھرہ کمشنر میجر جنرل خالد عبدالعال ءَ تباہ بیتگیں ماڑی ءِ دیوالانی چست کنگ ءُ مردمانی کشگ ءُ نادراہ جاہ ءِ سرکنگ ءِ ھکم داتگ-

آئی ءَ تباہ بیتگیں ماڑی ءِ چارگ ءَ گچینی ءِ ٹیم ءِ دارگ ءِ ھکم ھم داتگ-

چاگردی گھبودی ءِ وزارت ءَ مروکانی کھولانی واستا یک مردمے ءَ شست ھزار مصری پونڈ دنت اِنت-

زانگ بہ بیت گوستگیں ماہ ءَ ھمے دمگ ءَ پنچ تبکی ماڑیے کپتگ ات کہ چریشی ءَ نُھ مردم بیران ءُ یکے زدگ بیتگ ات-

سر بیتگیں ھالانی رد ءَ ناشناسیں مردماں تیرگواری کنان ءَ ایرانی لشکر ءِ دو کارندہ کشتگ اَنت-

تیرگواری ءِ وئیل نوک آباد تپتان ءَ پیش اتکگ کہ اود ءَ یک دمکے ءَ ایرانی لشکر ءِ دو کارمند تیرگواری کتگ ءُ کشتگ اَنت-

کشگ بیتگیں کارندھانی پجار مھمد میرشکار رئیس ادارہ پشتیبانی ءُ رضا فسنقری ءِ ناماں زانگ بیتگ اَنت-

کشوکاں تیرگواری کنگ ءَ پد پشت مانداتگ ءُ شتگ اَنت- ناسرجمیں اھوسلاں وئیل سَے مردمانی بیرانی ءِ ھال بیتگ –

اھوالانی رد ءَ اُرشکاراں کشگ بیتگیں کارندھانی سلاہ ھم دستیگ کتگ ءُ گون وت برتگ اَنت-

بلوچستان لبریشن فرنٹ ءِ جارکش میجر گوھرام بلوچ ءَ گوشتگ سرمچاراں ھاران ءِ البت ءَ برجاھیں پاکستانی لشکر ءِ پانگس ءِ سر ءَ اُرش کُرتگ ءُ جانی ءُ مالی تاوان داتگ۔

بی ایل ایف ءِ جارکش ءَ گوشتگ اے اُرش سَے شمبے ءَ پنچ ستمبر ءِ شپ ءِ دہ ءَ بیتگ کہ چہ ایشی ءَ پاکستانی لشکر ءِ البت ءَ برجاھیں پانگس گوں ٹوھیں سلاھاں نشانگ کتگ۔ اُرش ءَ زورگریں لشکر ءَ جانی ءُ مالی تاوان بیتگ۔

آئی ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ داں بلوچستان ءِ آجوئی ءَ دُژمن ءِ دُرسیں نپ ءُ سیتانی سر ءَ مئے اُرش برجاہ بنت اِنت۔

روکپتی بلوچستان ءِ بنجاھی شھر زاھدان ءَ ناشناسیں مردماں تیرگواری کتگ ءُ یک ورنایے کشتگ-

گیشیں اھوالانی رد ءَ زاھدان ءَ ناشناسیں مردماں تیرگواری کتگ ءُ کامبیز مھمدآنی ء عبدالعزیز جھمنند زاھدان کشتگ-

اھوالانی رد ءَ کامبیز سعدی میتگ ءَ تیرگواری کنگ ءُ کُشگ بیتگ-

تیرگواری ءُ کوش ءِ سبب زانگ نہ بیتگ ءُ نانکہ کوشوکانی بارو ءَ دگہ اھوال دیم ءَ اتکگ اَنت-

زانگ بہ بیت روکپتی بلوچستان ءَ وھد وھد ءِ سر ءَ مردم نشانگ کنگ ءُ کشگ بوگ ءَ اَنت بلے آیانی کوشکار تنی وھدی گرگ ءُ دیم ءَ آرگ نہ بیتگ اَنت-

آزمانک :سیاسی پناه

نبشتہ کار :هسابجار

دی بلوچستان پوسٹ

” چے هالیں ؟”هیریں پل ! شما هال کن ات -“مئے هال وش انت ، هال شمئے نیمگ ءَ انگت ، اِشکُنگ ءَ تو پہ سیاسی پنا گرگ ءَ انچو کہ بالی پٹ ءَ رستگ ئے وت ءَ گنوک کرتگ ، راستے ؟” ناں ناں اے گپ سیاهیں دروگے ، ترا کئے ءَ گُشتگ ؟” من ءَ کئے ءَ گُشتگ آ گپ ءَ بِلّ ! بلے وهدے تئی اجبیں سُر ءُ پُر اش دیستگ انت ترا تب زانتے ءَ بُرتگ اش ، داکتر ءَ تئی چار ٹپاس ءُ گوں تو گپ ءُ تران کنگ ءَ پد گشتگ کہ هو اے راستی ءَ گنوک انت – اشی ءِ جبین ءَ یک انچیں تُرسے ءَ جاگہ کرتگ کہ هر وردی والا ئےِ گند ایت اشی ءِ دل ءَ همیش انت نی منی کُشگ ءَ پیداک انت ءُ هردیں بالگردے ءِ توار بیت تہ وت ءَ چیر دیگ ءِ جهد ءَ کنت ءُ چہ داکتر ءِ گپاں پد ترا بے جُست ءُ پرس ءَ زُرتگ اش -” تئی گور ءَ شور انت -” من ” مهرجان ءَ اتگاں شما یورپ ءَ ئیش کنگ ءَ ات ، ما نودشنز ءَ دلے گوات ءَ دی انت -“هاں گنداں سک شُور انت -” شور ءَ بل گپ ءَ گار مکن واجہ !” کجام گپ ءَ ؟ تو هوں یارے ئے ; اے وڑا کہ بوتیں سک شر ات بلے اے درست دروگ انت من زاناں ترا اے همئے مُلّا ءِ چک مِنّورلهک ءَ گشتگ کہ اد ءَ نام ئےِ گزی انت ءُ مُلّا دلبود ءَ زگری انجمن ءِ کارڈے چہ زگری انجمن ءِ نیمگ ءَ داتگ – اود ءَ مال ءُ مت ئےِ زگریانی کُشگ بوتگ ءُ تالبانے ، اد ءَ واجہ ءَ وت ءَ چہ منورلهک ءَ گزی کرتگ ءُ مُلّا ءِ کمک ءَ وت ءَ زگری یے کرتگ ئےِ ءُ نشتگ گوں وتی کهول ءَ ئیش کنگ ءَ انت – من زاناں ترا همیشی ءِ جند ءَ گُشتگ – “اناں وسر ءَ مہ گش – واجہ مُلّا دلبود وت وتی پرکہ ءِ کشندهاں چون کُمک کنت ؟ ” ملا وت کوشارینت اش کنت ، زیارت ءِ سرا سی سی ٹی کیمره جنائینت کنت پہ سرمچارانی نشان کنگ ءُ آهانی گرائینگ ءَ دلّاری کرت کنت اے کار ءَ کرت نہ کنت ؟” آنگُر من نزاناں بلے من ءَ زگری یا نمازی یے ءَ نہ گشتگ – گُڑا پکا ترا همئے لاپگاراں چہ یکے ءَ گشتگ کہ ملک ءَ مال ءُ مت اش چرس ءُ بنگ ءُ تریاک کنگ بوتگ اد ءَ پہ وتی ئیش ءُ نوش ءِ هاتر ءَ وت ءَ انکلابی اش کرتگ ءُ چہ سیاسی پارٹیاں کاگد اش گپتگ ءُ گوں وتی جن ءُ چکاں نشتگ ءُ پد ءَ همے سیاسی پارٹیاں ڈوبار انت -” اناں ، اناں ، اناں — ” گڑا ترا کئے ءَ گُشتگ ؟ تو وت وَ پرشتہے نہ ئے ءُ ناں کہ واجہ هدا ئے ; اے شپ ءِ نپس ءَ منی مس تو سور کرتگ انت – وسر ءَ اتکگ ئے کہ تو وت ءَ گنوک کرتگ – من ءَ وت ءَ گنوک کنگ ءِ هاجت نیست پرچا کہ من ءَ هرکس زانت – ” هرکس ؟ ” هو هرکس — داں اے چیزے سیاسی لاپ گار هم کہ ملک ءَ بگر داں اد ءَ بلوچ راجی جنز اش وتی لاپ کرتگ ءُ اد ءَ همے راجی جنز ءِ برکت ءُ شهیدانی نام ءَ اتکگ ءُ گوں وتی تورُم ءَ نشتگ انت وهدے کہ روانک ءُ مُچی یے بیت تہ یکے هم در ءَ نہ بیت – چہ شهیدانی چوروانی هکاں مہ چُٹات انت – ” چے چے —! تو وَ جزباتی ئے سنگت ! ترا هیر انت ، تو چو کرت ؟ ” مرگ ئےِ گُشی چو کرت ، هرام — گڑا منی پُشت ءَ چیا دروگ بند ئے کُ— -” ها ها ها ها راست انت اول ءَ من ءَ باور نہ بوت بلے نوں من زاناں کہ اے گپ تُری هرکس ءَ کرتک راستے -” چتور راستے باریں ، تئی دل ءَ من گنوکے آں منی یاداشت شُتگ ؟” منی دل ءَ گنوک ءَ اے هم یات بیت کہ ( من ءَ مہ کُش ات ، من ءَ مہ کُش ات دو دُز ءِ دیم ءَ مرد ءِ موبائل ئےِ دور دات ءُ تک ) هما گپ ءَ بکن ترا براهیت – تو وت زاناں کجام زهم جتگ کہ نازاکیں مردماں وسر ءَ ڈوبارگ ءَ ئے – دگہ گنوکی کجام انت ؟ ” سکیں پوکے ئے تو -” پوک تئی جند انت ، بلاهیں ٹَرّ ءَ وت ءَ گنوک کرتگ کہ من ءَ پنا بہ دی انت ءُ من یورپ ءَ بہ ننداں آڈال -” اسل ءَ ترا زهر کئیت پمشکا تو چشیں دروگ بندگ ءَ ئے کہ اے شتگ انت من پشت کپتگاں ، ایوک ءَ تو نہ ئے بازینے ماں مزن هور ءَ همے آس ءَ سُچگ ءَ انت ترا میار نیست اے یک تبی جیڑهے جوڑ بوتگ هر کس وتی وڑ ءَ جُشگ ءُ سُچگ ءَ انت – سُچ گُڑاکو بے آس ءَ – ترا یک سوجے دیاں اگاں تئی گور ءَ دگہ نیمون نیست چو پلانی ءِ وڑا وت ءَ بگاهے بکن ءُ پد ءَ بگاهاں هچ تُوت ءُ کِچ پِرنیست دمان ءَ زور انت ئےِ – بلے گندئے بہ گُش انت بیا ترا ٹسٹ کنیں ها ها ها ها اے بلاهیں شتنگاں چہ یکے چو تاجُک ءِ کروس ءَ ترا پِرّ بہ سیٹ ایت بزاں مزتگ ئے -” من ءَ آیگ ءِ هاجت نیست منی کار اد ءَ وت شراانت من شمے وڑا نہ تراتگ شو نہ کرتگ ، وتی ملک ءَ هم شُت کناں ءُ اد ءَ مُلکی مردمے هم لوٹائینت کناں، شما اد ءَ جنز ءِ سر ءَ بارے بوتگ ات – بلے شریں کہ شُتگ ئے کم چہ کم شمئے همے ویزهانی زر بچ انت بلکیں پہ پارٹی ءَ دگہ گهتریں ڈکے گر انت – شمئے روگ وَ شر انت – بلے یار مردم وت ءَ گنوک کنت ها ها ها ها ؟ ” مرگ ء گُشیت گنوک کنت ، پدا تو گُش ئے کہ داکتر ءَ گشتگ هو اے گنوک انت – یکے وَ اِش کہ اے گوں تو هرکس ءَ گشتگ سیاهیں دروگے ءُ دومی اِش کہ گنوک ءَ چیز چتور یات بنت – اگاں من گنوکاں گڑا من ءَ چتور یات بیت کہ من وهدے بالی پٹ ءَ ایر اتکاں من لوٹ ات کہ رُمب بلّے روت من رند ءَ رواں وت ءَ دست ءَ دیاں – وهدے من پہ وتی پشت گیج ءَ پسیل پٹ ات ءُ یکے ءَ پُتر اتاں کہ آپ دستے کناں داں رُمب بروت پدا پهیکی ءَ وت ءَ دست ءَ دیائنیاں – من کہ پوی ءَ پترتاں تہ پوئی ءَ نل مان نیست پہ دیم شودگ ءَ من سک کند ات زان ئے چیا ؟ ملایانی سر ءَ کہ ملا چتور وت ءَ گوں ٹیشو پیپر ءَ ٹهینت کن انت –

پد ءَ من ءَ اے هم شری ءَ یات انت کہ اولی روچ ءَ منی رجانکار ءِ نیاهگ ءِ سوب ءَ من ءَ بالی پٹ ءِ مساپرانی ودارجاه ءَ راه دیگ بوت – وهدے من اود ءَ سر بوتاں داں دکان ءُ بار کل بند انت انگت روچ جهل بیگاه ات – من کہ جست کرت انت گُشت اش شپ انت بے وهد انت پمشکا بند انت – من هیراں بوتاں کہ اے چونیں ملکے کہ روچ انگت بُرز انت ءُ اے گشگ ءَ انت شپ انت ءُ من سک تونیگ اتاں – گڑا من ءَ گُشت اش کہ پسیل ءَ آپ بور –

من ءَ اے هم یات انت کہ وهدے اندگہ سُهب ءَ کہ رجانکار اتک منی لنککانی نشان گرگ بوت انت ءُ جُست ءُ پرس ءَ پد کہ من ءَ بندیں گاڑی ءَ کنگ بوت ءُ گاڑی همے بالی پٹ ءِ تہ ءَ کمیں تر ءُ پر تر کنگ ءَ پد سے ءُ چار آهنی دروازگاں پُتراں داں من ءَ جیل ءِ تہ ءَ برگ بوت – جیل کج ءَ بلے مردم بند ات وتی منشا ءَ ناں تر ات کرت ءُ ناں ورگ ئےِ وارت کرت جهل بیگاه کہ بوت گشت اش نو شپ انت همک نو ءُ نیم ءَ کہ روچ انگت سک بُرز ات ، کوٹی ءَ کنگ بوتاں ءُ کوٹی چہ ڈن ءَ کبل کنگ بوت داں اندگہ روچ ءَ هشت ءُ نیم ءَ کہ روچ سک بُرز ات – همے بے سریں وهد ءُ پاس کہ روچ ءِ همراه نہ ات انت من ءَ شر یات انت – پد ءَ بندی اے نہ بوت وهدے منی سینگ ءِ برانزبُت ( Xsry) ءَ اشاں ٹِکے دست کپت گُڑا بندی هما بوت – همد ءَ من ءَ وتی بیگواهیں همبل سک گیر اتک انت کہ آ کجام ازاب ءَ بتت تنک ءُ تهاریں کوٹیانی تہ ءَ انت ءُ ناں روچ گند انت ءُ ناں الکاپیں وَردے ، لٹ ءُ کُٹ ءُ درنجگ چونیں چونیں ازاب سگگ ءَ انت -هید ءَ جان شود انت ءُ بوٹ ماں جان ءَ چو موراں تچ انت ءُ پیشاپ ءُ هون هوار انت ، جان شُشت نہ کن انت – در باب ء آیاں منی اے تنک ءُ رُژناہیں کوٹی کہ اشی ءِ تہ ءَ یک دو تبکی آهنی تهتے ات ءُ گونڈیں کباٹے جانشود ءُ پوئی ءُ یک ٹی وی یے گوں دریں زبانانی چینلاں ءُ گونڈوکیں پریجے اوون ءُ بجلی ءِ جگے ، تهت ءُ ٹی وی ءِ میان ءَ بس یک گونڈیں کرسی یے ءِ جاگہ ات ءُ تنکیں دمکے پہ درایگ ءَ پُترگ ءَ – روچ ءَ روچ ءِ برانز تہ ءَ اتک انت ءُ شپ ءَ لیٹ هست ات . بلے منی دل ءَ انگت کیامت ات -یک گنوکے ءَ هینجک چیز ءُ پد ءَ هینچک وهد ءِ گوزگ ءَ پد چون یات بنت ؟ من دلوارگ هما وهد ءَ بوتگاں هر دیں کہ اے تنکیں بندی جاه ءَ کہ چہ سینگ ءِ برانزبُت ءَ ٹکے ءِ بوگ ءَ پد من ءَ ماں کوٹی ءَ شپ ءُ روچ کبل کنگ بوت ، چہ اے بندی جاه ءَ پَشت چہ کوٹی ءِ کانچ ءِ دریگ ءَ هما دیم ءُ زندان ءِ سیم جتگیں بُرزیں دیوال ءَ آ دست همے کہ سهب بوت تہ بے برمشیں زندے بنا بوتگ ات – ناں توارے ناں چڑکہ ءُ برمشے ، اے نزیکیں ندارگ چو میلانی دوری یے ءَ دیم ءَ در ءَ ات درجکانی سُرگ ءَ گوات ءِ گمان بوتگ ات ءُ مرگانی نندگ ءُ بال کنگ ءَ چُری چُری ءُ کپوتانی درچک ءِ شاهانی سر ءَ داں دیراں نندگ ءَ کوکوانی گمان – ماتے ءَ چک سیکل ءِ پینگو ءَ کتگ ات روگ ءَ ات مات ءِ یکوی سر ءَ پینگو ءِ گور ءَ برگ ءَ همے گمان کرتگ ات کہ چک گریوگ ءَ بیت مات ئےِ ساڑینگ ءِ جهد ءَ بیت ءُ مردمانی چہ گاڑیاں کچکانی ایرگیج ءُ درچکانی چیر ءَ برگ ءُ کمیں ترینگ ءُ روتاب ءَ گردینگ ءَ پد گاڑیاں کنگ ءُ روگ ءَ کچکانی گیت دارینگ ءِ گمان کرتگ ات – کانچ ءَ آدیم یک پُرتاهیریں زندے جنزان ات ءُ کانچ ءَ اے دیم ماں اے تنک ءُ رُژناهیں کوٹی ءَ بید ءِ لیٹ ءُ لهتیں همے ساماں یک ابیتکی ات کہ من ءَ چہ تہ ءَ ورگ ءَ ات ءُ من گوں دریگ ءِ کانچ ءِ امیت ءَ سهبانی ندارگانی باهوٹ ات انت – هزابی هما وهد ءَ گیش بوت کہ سگریٹ هلاس بوت انت ءَ منی موبائل هم پچگرگ بوتگ ات –

پد ءَ من ءَ گشگ بوتگ ات هردیں کسے چہ دروازگ ءِ ٹنگ ءَ کہ ترا ورگ دنت تہ ماسک ءَ الم بہ جن ءُ من دلترک اتاں کہ نو بس منی واتری انت – سیمی روچ ءَ بچک دابیں جنکے ءَ دروازگ ءِ دریگ بوتک ءُ من ءَ آئیسکریمے دات ئےِ ءُ گُشت ئےِ کہ اے آئیسکریم ءَ بور وتی کوٹی ءَ پلگار کن ءُ اُورداں بند – من پہ تُرس ءُ لرز جُست کرت کہ من ءَ کج ءَ برانت – اشیا پیش من ءَ کاگدے سر بوتگ ات کہ چیزے وهد برداشت کن گوما تاوان بکن ما جهد کنیں ترا زوت دگہ لوکیشنے ءَ بہ بریں ، اود ءَ هچ زاهر نہ ات کہ کج ءَ ءُ اے بچک دابیں جنک ءِ زبان ءِ سرپد نہ بوگ ءَ من مُرت ءُ زندگ نہ بوتاں – من جست کرت کہ کج ءَ برات من ءَ آئی ءَ گُشت اوتریپو ” من دلترک بوتاں ءُ منی دپ ءَ دراتک ایئرپورٹ ءَ -” گڑا —؟ گڑا چے ؟دیم ءَ چے بوت ؟ ” گوں یک گنوکے ءَ چے بہ بیت ؟ ” من وت نزاناں —! ” چتور تو نزان ئے ؟ آهاں ترا منی گنوک بوگ ءِ هال داتگ ات دیم ءِ گپ اش هم گشتگ انت گون -“

” اناں گومن کس ءَ هچ نہ گشتگ – چتور هچ نہ گشتگ ، گشگ ءَ الم گشتگ اش نی تو منی دپ ءَ پچ کنگ لوٹ ئے – ” پو انگت تئی دپ پچ نہ انت بزاں ؟ سُهبگین ئے رپٹگ ءَ ئے – ” شر گڑا نی نہ رپٹاں – ” اناں گپ کن ، گڑا تئی کار بوت انت ، پد ءَ ترا کج ءَ بُرت اش ؟ ” وش انت منی پون ءِ چارج هلاس انت من ءَ واب ءَ هم گپتگ ءُ سُهبی مهلا پادایگی انت -“

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔