TBP Balochi

نامداریں ٹیکنالوجی کمپنی گوگل ءَ کارمرد کنوکانی واستا نوکیں فیچرے دیم ءَ آرگ بندات کتگ چریشی ءَ کارمرد کنوکانی پاس ورڈ ءَ ابید نی پاس کی ءَ وتی اکاونٹاں لاگ ان کت کن اَنت-

ویب سائٹ دی ویرج ءِ رد ءَ گوگل ءَ نی وتی کامرد کنوکانی ھاتر ءَ پاس ورڈ ھلاس کتگ ءُ پاس کی ءِ اسراتی دیم ءَ آورتگ چریشی ءَ تیز ءُ مھکم ءُ ابید پاس ورڈ ءَ کارمرد کنوک وتی پن، فیس لاک یا فنگر پرنٹ ءَ وتی اکاونٹ ءَ شت کن اَنت-

چہ دَہ اکتوبر ءَ گوگل ءَ کارمرد کنوکاں گوگل اکاونٹساں روگ ءَ پاس کی ءِ جوڑ کنگ گوشتگ-

اود ءَ گوگل ءِ ایوکیں باندات ءِ واستا پاس کی سرجمیں دنیا ءَ لاگ ان کنگ ءَ سٹیندرڈ ءِ جوڑ کنگ ءِ واستا جیڑگ ءَ اِنت ءُ ھمود ءَ کمپنی ءِ گوشگ اِنت پاس ورڈ نی ھم مئے زند ءِ بھر بیت اِنت کہ ایشی ءِ گوشگ ایش اِنت کارمرد کنوکانی واھگ کجام اِنت آ گوگل اکاونٹ ءَ وتی پاس ورڈ ءَ ایر کت کنت یا ایشی ءَ ابید ھم آئی ءِ گور ءَ پاس کی ءِ کارمرد کنگ ءِ آپشن ھست بیت اِنت-

پاس کی بنکی دروشم ءَ یک ھنچیں سسٹمے کہ مئے موبائلاں اتھنٹیکیشن میتھڈز چوشکہ پن ،فنگر پرنٹ یا فیس لاک ءَ ھوار بیت اِنت ایشی ءِ کمک ءَ ما وتی اکاونٹاں پچ کت کن ایں-

اے نوکیں فیچر ءِ آیگ ءَ پد نی ما گوگل اکاونٹساں پاس ورڈ ءَ ابید پاس کی ءِ گون ءَ ھم شت کن ایں-

گوگل ءَ گوستگیں سال ءَ پاس کی ءِ فیچر وتی نوکیں پراڈکٹس ءِ دیم ءَ آرگ ءَ گشتگ چریشی ءَ ورک اسپیس ءُ کلاؤڈ اکاونٹساں ھوار ویب ءَ گوگل کروم براؤزر ھوار اَنت-

ایشی ءَ ابید بازیں دگہ ویب سائٹس ءُ ایپلی کیشنزاں ھم پاس کی ءِ آسراتی کمک کنت اِنت-

درملکی رسانکدراں سربوتگیں ھالانی رِد ءَ ھمے زوتاں چہ پراھگ ءَ اسکائی ڈائیو کنوکیں یکسد ءُ چار سالی امریکی زالبول بیران بوتگ – پیرزالیں ڈوروتھی ہوفنز ءَ سینزدہ ھزار ءُ پنچ سد فُٹ ءَ برز دور کُتگ ءُ درسیں مھلوک ھیران کتگ ات –

آئی ءِ بیرانی ھبر آئی ءِ نزیکیں مردم جو کونینٹ ءَ راست کتگ ءُ گوشتگ کہ ڈوروتھی یک شمبے ءِ شپ ءَ وپسگ ءَ پد دوشمبے ءِ سھب ءَ پاد نہ اتکگ –

جو کونینٹ چوناھا وت یک نرس یے ءُ آ لھتے سال ساری ڈورروتھی ءَ دچار کپتگ بوتگ ءُ آئی ءَ آ وتی بَلک گوشتگ توار پر جتگ – آئی ءِ گوشگ انت کہ ڈوروتھی ھژار ءِ بوتگ ـ آ چشیں جنینے نہ بوتگ کہ نیمروچ ءَ بہ وپسیت ءُ مراگشے ءَ مہ روت –

دوروتھی ءَ یک اکتوبر ءَ اوٹاوا ءَ اسکائی دائیو شکاگو ءَ سینزدہ ھزار ءُ پنچ سد فُت برز دور کتگ ات ءُ جھان پیرزال تریں اسکائی ڈائیو ءِ ریکارڈ ءِ تہ ءَ وتی نام نبشتہ کنائیں اِتگ ات –

اسکائی ڈائیو کنگ ءَ پد یکسد ءُ چار سالی زالبولے گوشگ ات کہ “امر بس یک نمبرے “

اسکائی ڈائیو شکاگو ءُ امریکہ ءِ پیراشوٹ ایسوسیشن ءَ ھم شمبے ءِ روچ ءَ آئی ءِ بیرانی ھبر راست کتگ ءُ گوشتگ کہ ڈورتھی بیرانی سک باز دلپدرد انت مارا آئی ءِ سر ءَ پھر انت کہ وتی نام اسکائی ڈائیو تہ ءَ نبشتہ کنائیں اِتگ –

سر بیتگیں اھوالانی رد ءَ روکپتی بلوچستان ءِ دمگ جالک ءَ ناشناسیں مردماں تیرگواری کتگ ءُ سَے مردم کشتگ ءُ زدگ کتگ اَنت-

گیشیں اھوالانی رد ءَ گلشن آباد ءَ ھواریں دمگ جالک ءَ ناشناسیں سلاہ بندیں مردماں تیرگواری کتگ ءُ دو مردم کشتگ اَنت ءُ یکے زدگ کتگ –

کُشگ بیتگیں مردمانی پجار یاسر رئیسی ء مھمد ءُ اسماعیل رئیسی ء شکر ءُ زدگ بیتگیں مردم ءِ پجار علی بدو ء سلطان ءِ نام ءَ زانگ بیتگ-

اھوالانی رد ءَ اے مردم نانوائی بزانکہ نگن جاہ ءِ دیم ءَ ناشناسیں مردمانی تیرگواری ءَ بیران بیتگ اَنت –

وئیل ءِ بارو ءَ دگہ گیشیں سرپدی دز نہ کپتگ اَنت-

سربوتگیں ھالانی رِد ءَ مروچی نیمروچ ءِ وھد ءَ پاکستانی پوج ءَ یک ورنایے زورانسری آوار جتگ ءُ بیگواہ کتگ-

گیشیں ھالانی رِد ءَ چارشمبے ءِ روچ ءَ نیمروچ ءِ وھد ءَ پاکستانی پوج ءُ چیریں ادارھانی کارمنداں تمپ ءِ بازار ءَ دکانے ءَ بیڑ برتگ ءُ زوراکی کنان ءَ یک ورنایے آوار جتگ ءُ بیگواہ کتگ – آوار جنگ بوتگیں ورنایے پجار عبدالحق ء حفیظ جھمنند تمپ دازن ءِ نام ءَ چہ بوتگ –

زانگ بہ بیت اے کھول ءِ یک مردمے سال دوھزار چاردہ ءَ ھژدہ مارچ ءَ چہ بلوچستان ءِ بنجاھی شھر شال ءَ زورانسری آوار جنگ بیگواہ کنگ بوتگ آئی ءِ نام اسد بلوچ انت ءُ عبدالحق ءِ ناکو انت کہ روچ مروچی گار ءُ بیگواہ انت آئی ءِ کھول کمیشن ءَ ھم شتگ شال ءُ کراچی ءَ پہ آئی ءِ یل کنائینگ ءِ ھاتر ءَ زھرشانی ھم کتگ بلے روچ مروچی آئی ءِ ھچ ھال اھوال نیست –

بلوچستان ءَ زورانسری آوار جنیانی درچ یکشل ءَ برجاہ انت، چشین روچ ءِ نیست کہ بلوچستان ءَ مردم زورانسری اوار جنگ ءُ بیگواہ کنگ بوگ ءَ نہ انت – گوستگیں شپ ءَ تمپ دمگ گومازی ءَ بلوچی زبان شائر اختر عمر زھگ آوار جنگ بوتگ ات کہ ھنگت بیگواہ انت کہ آئی ءَ بیست چار ادار پر نگوستگ انت کہ یک دگہ ورنایے آوار جنگ بیگواہ کنگ بوتگ – بیگواھیں مردمانی پانکجنیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءِ رِد ءَ اے وھدی سرجمین بلوچستان ءَ کساس پنجاہ ھزار گیش مردم آوار جنگ ءُ بیگواہ کنگ بوتگ انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتئی آفیشل ٹیلی گرام چینل ھکل ءَ شنگ کرتگیں درشانے ءِ تہ ءَ سرمچار سنگت مسعود احمد ءِ اکس شنگ کرتگ ءُ گوشتگ کہ سنگت گوستگیں روچ ءَ کارے ءِ میان ءَ اناگتی وئیلے آماچ بوتگ ءُ نمیران بوتگ –

جارکش ءَ وتی درشان ءِ تہ ءَ گوشتگ کہ ھشت اکتوبر دوھزار ءُ بیست ءُ سَے ءِ شپ ءَ پنجگور ءِ دمگ کہن زنگی ءَ بی ایل اے ءِ سرمچار سنگت مسعود پنام بالاچ کارے ءِ ھاتر ءَ تراک ناکیں شورو (آئی ای ڈی) جوڈ کنگ ءَ بوتگ کہ اناگت ءَ شورو ترک اِتگ انت ءُ سنگت نمیران بوتگ –

جارکش ءَ گوشتگ کہ نمیرانیں سنگت مسعود احمد ء محمد عثمان عیسئی کہن زنگی پنجگور ءِ نندوک بوتگ کہ آئی ءَ سالے ءَ گیش بوتگ کہ بی ایل اے ءَ بندوک بوتگ – آ یک تمرد ءُ کاری ایں سرمچار ءِ بوتگ کہ آئی ءِ کمی مدامی مارگ بیت –

آئی ءَ گوشتگ کہ آجوئی جھدے اے گرانیں راہ ءَ سرمچار گوں تمردی ءَ نادراھی ءُ وئیلانی دیمپانی ءَ کن انت – اے راہ ءَ وئیلانی دیمپانی بوتگیں سنگتانی ھما شرپ ءُ جاہ انت ھما کہ دژمن گوم ءَ جنگ دیان ءَ سنگت نمیران بنت – بی ایل اے درسیں شھیدیں سنگتانی ستک ستاشانی ءَ کنت ءُ اے کول ءَ کنت کہ نمیرانیں سرانی مکسد ءَ برجاہ داریت –

جارکش ءَ وتی درشان ءِ تہ ءَ دیمتر ءَ گوشتگ کہ بی ایل اے ءِ سرمچاراں گوستگیں شپ ءَ کلات ءَ مڈی بروکیں ٹرک ءِ مانداشتگ –

جارگش ءَ گوشتگ کہ گوستگیں شپ ءَ کلات ءِ دمگ منگچر چاربوز ھند ءَ مادن ءِ لٹ پُل کنوکیں ٹرالرے سر ءَ اُرش کتگ ءُ آ مانداشتگ –

جارکش ءَ گڈسر ءَ وتی درشان ءِ تہ ءَ گوشتگ کہ بی ایل اے اے اُرش ءِ زمہ واری ءَ منیت ءُ کلات ءَ ھوار بلوچستان ءِ ایندگہ ھند دمگانی پاکستانی پوج ءِ ھمراھداری کنوکیں کمپنی ما پیش ءَ ھم مکن کتگ انت کہ بلوچستانی مڈیانی لُٹ پُل ءِ موکل کس ءَ دیگ نہ بیت اگاں اے درچ دارگ نہ بوت گڈا اشانی بگیری ءَ ترندیں گامگیج زورگ بیت انت –

سربوتگیں ھالانی رِد ءَ مروچی چارشمبے ءِ شپ ءَ ناشناسیں سلاہ بندین مردماں بولان ءِ دمگ مارگٹ ءَ دگ بستگ ءُ گاڑی پٹ پول کتگ انت –

اھوالکار ءِ رِد ءَ پٹ پول ءِ میان ءَ سلاہ بندیں مردماں پاکستانی پوج ءِ اپسرے گوں ھمراہ ءَ.دزگیر کتگ ءُ گوں وت برتگ –

اپسرے دزگیری ءَ پد مزنیں کچے ءَ پوج ھمے جاہ ءَ اتکگ ءُ سر بوتگ انت جست پد بندات کتگ – بلے تنی وھدی اشی ءِ زمہ واری ھچ گلاں نہ زرتگ –

چم دیستیں گواھانی رِد ءَ سلاہ بندیں مردماں یک پرپٹ ءِ ھم دست داتگ کہ آ نہ اوشتاتگ گڈا آیاں پاداں تیر جتگ ءُ چریشی ءَ آ زدگ بوتگ –

زانگ بہ بیت مارگٹ ءُ کش ءُ گوری ھند ءُ دمگاں چدوپیسر پاکستانی پوج ءِ سر ءَ بوتگیں اُرشانی زمہ واری بلوچ لبریشن آرمی ءَ منّ اِتگ انت –

گوستگیں سَے روچ ساری ھم پاکستان منرل اینڈ ڈویلپمنٹ کارپوریشن ءِ منیجر بمب اُرشے ءِ نشانگ کنگ بوتگ کہ چریشی ءَ آ ھما دمان ءَ مُرتگ ات ءُ آئی ءِ ھمراہ زدگ بوتگ ات –

پی ڈی ایم سی منیجرے سر ءَ بوتگیں اُرش ءِ زمہ واری بی ایل اے ءَ منّ اِتگ ات –

گوستگیں سال ءَ ھرنائی ءَ بلوچ لبریشن آرمی ءِ سرمچاراں ھمے وڈ دگ بستگ ءُ پاکستانی پوج ءِ دو کارمند دزگیر کتگ اِتاں وھدیکہ پوج ءَ لشکر کشی کتگ ات گڈا ھمے میان ءَ پوج ءِ بالگردے ھم جنگ ءُ چگل دیگ بوتگ ات –

اشی ءَ پیش بی ایل اے ءِ سرمچاراں پاکستانی پوج اپسر کرنل لئیق گوں ھمراھے ءَ دزگیر کتگ ءُ پدا کُشتگ ات –

شال ءُ کش ءُ گور ءِ ھند ءُ دمگاں چدوپیسر باز براں پنجاپ ءِ جھمنند آوار جنگ بوتگ انت –

بلوچ وائس فار جسٹس ءَ ھزدار ءِ جھمنندیں مھمد ء مھمود ءُ عاصم ء مھمد اعظم ءِ یل کنائینگ ءِ لوٹ کتگ ءُ گوشتگ کہ اے ورنا ھمے سال ءِ نوزدہ جون دوھزار ءُ بیست ءُ سَے ءخ چہ کراچی ءَ رینجرز ءُ چیریں ادارھاں آوار جتگ ءُ بیگواہ کتگ اَنت کہ داں انگت ءَ بیگواہ اَنت – مھمد ءُ عاصم سرجمی ءَ یل کنگ بہ بنت ءُ ایشانی کھول دردناکیں درد ءَ چہ چُٹینگ بہ بنت-

درشان ءَ گوشگ بیتگ کہ انسانی ھکانی گلانی بے تواری ءَ چہ بلوچستان ءَ انسانی ھلاسی ءِ مزنیں ترسے ودی بیتگ اگاں انسانی ھکانی بے تواری ھمے داب ءَ برجاہ بیت اَنت گڑا ریاستی ادارہ بلوچ راج ءَ چہ بنچک ءَ ھلاس کنت اِنت-

آئی ءَ گوشتگ ریاستی چیریں ادارہ ءُ پوج ءَ وتی جنگ ءُ دسر دیگ ءِ پالیسی یکشل ءَ برجاہ داشتگ زورانسری آوار جنگ بیتگیں مردمانی لاشانی ھواری ءَ دروگیں میڑ ءِ نام ءَ بیگواھیں مردم کُشگ بوگ ءَ اَنت-

درشان ءَ گوشگ بیتگ کہ ھمے سال ءَ شال ءَ دو برات یکیں لوگ ءَ دزگیر کنگ بیتگ اَنت ءُ ایشانی توک ءَ یک براتے ءِ پجار مھمد شفیع بنگلزئی ءظ نام ءَ زانگ بیتگ کہ آ بیست ءُ شش اگست ءَ زورانسری آوار جنگ بیتگیں یوسف نیچاری ءِ ھمراھی ءَ دروگیں میڑ ءِ نام ءُ کشگ بیتگ ءُ سی ٹی ڈی ءَ یک پریسے شنگ کتگ ءُ آ سلاہ بندین گلاں گوں بندوک کتگ کہ اے سک ءَ ناگیگیں کارے – بے گناہ ءُ لس مردماں چہ لوگاں چست کنگ ءُ پد ءَ آیاں کُشگ ءُ ناشرکار گوشگ اِنت-

درشان ءَ گوشگ بیتگ کہ دروگیں میڑ ءِ نام ءَ کُشگ بیتگیں مھمد شفیع ءِ برات سلیمان بنگلزئی ءِ ھمراھی ءَ آوار جنگ بیتگ کہ داں انگت ءَ بیگواہ اِنت ءُ آئی ءِ زند ءِ واستا ترس اِنت ءُ انسانی ھکانی گلاں گوں دزبندی اِنت کہ سلیمان بنگلزئی ءَ سلامتی ءَ یل کنگ ءِ واستا کرد ءَ پیلو بہ کن انت-

نْدر پہ نمیرانیں شائر ءِ آشوب واجہ ابّا ئے نام ءَ

شاعر: علی جان

دی بلوچستان پوسٹ

دْروت

سلام ءُ دروت بابا
منی وش بھتی اِنت کہ تئی اھد ءَ گوں تئی دست رودیں پُل ئے رنگ ءُ وشبواں چہ سر ریچ اوں
سلام کن کمبر ءَ بابا
بگُش اشتاپی روگ ءَ تئی اڑینتگ باز کار پُشت ءَ
بگُش کس ئے تئی پیشداشتگیں راھانی انگت ءَ مُساپر اِنت
گوں جُھد ءَ انگت بندوک اِنت
سمیر جان ءَ بِگر گُب ئے
اسد ءَ گٹے پاچ لاپ ءَ
بہ نازین عاقل ءَ کمو
شفیع محمد ءَ کُنت کن
ءُ وارس شیھو ءَ گیشتِر
کماش (نصیر کمالان) ءَ رند ءَ وش اھت کن
زُبیر جان وت تچان کیت ترا امبازاں زور ایت یل نہ دنت ءُ گریت
ھنیپ ئے ارس بنت ایں چم
چہ آ دیما چہ شاکر دنت آواز ئے
شُمارا چون اِنت مرچی بابا اتک ءَ ارس ءُ لِمپ ئے ڈے
ھمے گپ ءَ دُراہ کند اَنت
گُڑا صدیق ءُ یوسپ وت گُشاں بابا اِدا واٹ نے
گُڑا سک کندوکائی بیت
گُش ایت ماما (انور صاحب خان) من گُشت ءَ ساری ءَ کازی کہ بیت سک کوچرائی بیت
میاں داد گُش ایت اھو یار
ساجد جان بچکند ایت ءُ دراھین ایت، بابا ایشاں بِل منگیر ءَ بیا کُل تئی ودار اَنت
شپی نورخان ئے میپل اِنت، تئی یار ئے
نواب اکبر، نواب ھیربکش ھمودا تئی ودار ءَ اَنت
کریمہ بانُک گُشت بابا ءَ زو بیارے
فدائی شاری، سُمیعہ، جنرل اسلم ءُ ھمبل اوں ساڑی اَنت
ھمودا بیا
ھمودا مجلس ءَ جم کن
بلوچستان ئے بچ ءُ شیر زالاں یک یک ءَ دروت ءُ دراھی کن
وتی پرزنداں ءُ بیلاں یک یک ءَ زور امبازاں گُلائیش کن
بدے ھالاں زمین ءُ آجوئی جنگ ئے
تھوراں تِنگ ءُ زاہ دے فوج ءَ پنجاب ئے
بلوچستان ءَ گوں دستونکاں کما لبزانی بالاد ءَ
شھیدیں سرمچاراں گوں بکن دیوان
تو بھشت ءَ ئے
تو نمیران ئے

روکپتی بلوچستان ءَ ھواریں دمگ اُستان خراسان ءَ بندیگیں بلوچے پاھو دیگ بیتگ –

گیشین اھوالانی رد ءَ اُستان خراسان ءَ تربت حیدریہ زندان ءَ بندیگین یک بلوچے پاھو دیگ بیتگ-

پاھو دیگ بیتگین مردم ءِ پجار امام بخش گورگیج ء زمان خان جھمنند زاھدان ءِ نام ءَ زانگ بیتگ-

اھوالانی رد ءَ امام بخش لھتیں سالاں پیش ماں تربت حیدریہ شھر ءَ نشہ باپاری ءِ بھتام ءَ آوار جمگ بیتگ ءُ یک سالے ءَ پیش داد گاہ انقلاب ءَ آئی ءِ سال ءَ پاھو ءِ ھکم داتگ ءُ آ پاھو دیگ بیتگ-

اھوالانی رد ءَ امام بخش ءِ کھول آئی ءِ گڈی دیدار ءَ ماں گوستگیں روچ ءَ شتگ اَنت ءُ آئی ءِ گڈی دیدار اش کتگ-

زانگ بہ بیت روکپتی بلوچستان ءَ ھوار ایران ءِ دگہ اُستاناں ھمے سال ءَ کساس نود ءُ ھشت بلوچ پاھو دیگ بیتگ اَنت کہ آیانی توک ءَ چار زالبول ھوار اَنت –

بلوچستان ءِ بنجاھی شھر شال ءَ برجمیں دیوان ءَ بی ایس او ءِ بیست ءُ یکمی کونسل سیشن ءَ بالاچ قادر چیئرمین نامینگ بیتگ ءُ صمند جنرل سیکرٹرء نامینگ بیتگ-

گیشیں اھوالانی رد ءَ بی ایس او ءِ بنجاھی کونسل سیشن آسر بیتگ ءُ بالاچ قادر بنجاھی سروک ءُ صمند بلوچ سیکریٹری جنرل دارگ بیتگ –

ھمے وڑ ءَ پتر ءِ آدگہ نذیر بلوچ سینئر وائس چیئرمین، عامر نزیر جونیئر وائس چیئرمین، مقبول بلوچ سینئر جوائنٹ سیکریٹری، ابوبکر بلوچ جونیئر جوائنٹ سیکریٹری ءُ شکور بلوچ انفارمیشن سیکریٹری دار بیتگ اَنت-