TBP Balochi

دی بلوچستان پوسٹ

سمو، منی دزگُوھار
سمو منی لج ءِ پھاز
سمو منی چم ءِ چراگ
سمو درکیت،چہ گِس ءَ
بند ایت بمب ءَ سینگ ءَ
اوشتیت دُژمن ءِ راھے
سرا گوں بچکندگاں
کنت تباہی پہ دُژمن ءَ
سمو منی لاڑیں گوھار
کس ءَ نہ اَت چوشیں گُمان
نہ کرزاں تی جزبگ ءَ
زاناں کہ تو زمین
ءِ درد ماراِتگ
زاناں تو دیستگ
سیما پہ گریوگ ءَ
سمو منی شیرزالیں گوھار
تو پنت زرتگ چہ
براتیں برگیڈ ءَ
تو دیستگ شاری
جنگ ءِ پِڑ ءَ گوں
ھِمت ءُ توکل ءَ
پہ زمین ءِ موکگ ءَ،
تو کربان کتگ وت ءَ
تو نچاراِتگ وتی زند
کسانوکیں تو نہ جیڑ اِتگ
پہ وت ءَ سمو منی دوستیں
دزگوھار

سمعیہ قلندرانی کے بیتگ ؟

دی بلوچستان پوسٹ گچینی

24 جون, 2023ء، شمبے ءِ روچ ءَ، بلوچستان ءِ شھر تربت ءَ یک مزنیں ءُ با دلگوش وئیلے دیم ءَ اتکگ، کہ ایشی ءَ سرجمیں دمگ ءِ تہ ءَ وسواسیں ودی کُت۔ بلوچ لبریشن آرمی ءِ مجید بریگیڈ ءِ دومی زالبولیں پدائی ءَ پاکستانی پوج ءِ یک کاروانیں وتکُشیں تراکے ءَ نشانگ کُتگ اَت۔
 
بلوچ لبریشن آرمی (بی ایل اے )، بلوچستان ءِ آجوئی ءِ جد ءُ جھد ءَ مشگولیں درستایں گیشتر پُرکاریں سلاہ بندیں گلءَ، زیت اُرش ءِ زمہ واری من اتگ ءُ گُشتگ کہ مجید بریگیڈ ءِ زالبولیں پدائی سمعیہ قلندرانی بلوچ ءَ اے اُرش کُتگ۔

مجید بریگیڈ بی ایل اے ءِ ھما ھاسیں بُنزہ اِنت کہ آ چُشیں پدائی اُرش کنگ ءِ تہ ءَ بلدی دار ایت۔
 
بی ایل اے ءِ جارکش جیئند بلوچ ءَ اے ھم گُشتگ کہ اُرش پاکستان ءِ چیریں ادارگانی مزن واکداراں بروکیں پوجی کاروان ءِ سر ءَ کنگ بیتگ اَت، کہ چہ تربت بالی پَٹ ءَ انٹر سروسز انٹیلیجنس ءِ بُن دوار ءَ روگ ءَ بیتگ۔
 
بنداتی اھوالانی رد ءَ، کاروان ءِ سر ءَ بیتگیں اُرش ءِ ترندی سک باز بیتگ ءُ اُرش ءِ آسر ءَ کاروان ءَ مزنیں تاوان رس اتگ۔ بلے، پاکستانی کانود برجاہ داروکیں ادارگاں، گوں پاکستانی پوج ءِ کارندھاں ھوار سرجمیں ھنکین انگیر کُتگ اَت۔کہ اِیشی ءِ سوب ءَ تاوان ءُ مرتگیں مردمانی کساس ءِ درگت ءَ دلجمیں اندازگ جنگ نہ بیتگ۔

واکدارانی نیمگ ءَ رسانکدراں دیگ بیتگیں بنداتی اھوالانی رد ءَ، شمبے ءِ نیم روچ ءَ تربت ءِ چاکر اعظم چارراہ ءِ سر ءَ یک زالبولی ءَ پوجی کاروان وتکُشیں تراکے ءَ نشانگ کُتگ۔
 
واکدارانی رد ءَ پولیس ءِ گاڑی ھم اُرش ءِ زد ءَ اتکگ اَت، کہ ایشی ءِ سوب ءَ یک پولیس کارندہ ءِ مُرتگ ءُ زالبولیں کانسٹیبل ءَ ھوار دو مردم ٹپی بیتگ اَنت۔ البت، ھندی رسانکدراں گُشتگ اَت اُرش ءِ راستیں اھوال انگت آیگ پشت کپتگ اَنت۔
 
بی ایل اے ءِ جارکش جیئند بلوچ ءَ بنداتی اھوال رد کنان ءَ گُشتگ کہ نانکہ نزیک ءَ گوزوکیں پولیس ءِ گاڑی ءُ نا آئی ءَ سواریں پولیس کارندہ نشانگ کُتگ اَنت۔ آئی ءَ پاکستانی پوجیانی پولیس گاڑی ءِ تہ ءَ اُرش ھوار بئیگ ءِ بھتام جتگ۔ کہ آ اُرش ءِ وھد ءَ دگہ دومی نیمگ ءَ روگ ءَ بیتگ اَنت ۔
 
یک روچے ءَ پد، یک ھندی پولیس کارندہ ءَ ھم اے ھال راست کُتگ کہ اُرش ءَ پد پوجی کارندھانی نیمگ کورکائی تیرگواری کنگ بیتگ کہ چریشی ءَ پولیس کارندہ مُرتگ ءُ ٹپی بیتگ اَنت۔
 
سمعیہ بلوچ ءِ زندمان ءِ یک دروشمیں
 
سمعیہ قلندرانی بلوچ پنام ءِ سمّو ، 17 اگست 1997 ءَ بلوچستان ءِ دمگ خضدار ءِ توتک بازار ءَ قلندرانی ٹکے یک لوگے ءَ ودی بیتگ۔
 
2011ء ءِ فروری ءَ، وھدیکہ توتک ءَ پوجی بیڑ ءِ نیام ءَ بازیں لوگانی جھمنند بیگواہ کنگ بیتگ اِت اَنت، آئی ءِ کھول ھم پاکستانی ڈیھ ءِ زوراکیانی برپارو نشانگ جوڑ بیتگ اَت۔
 
البت، توتک آپریشن ءِ بازیں سالاں پد، 18 سال ءِ امبر ءَ سمعیہ ءَ بلوچ لبریشن آرمی ءَ ھوار بیگ ءِ پیسلہ کُتگ اَت۔
 
بلوچ لبریشن آرمی ءِ رد ءَ، سمیعہ ءِ بی ایل اے ءِ تہ ءَ ھواری یک ھاسیں وئیلے ءِ سوب ءَ نہ بیتگ، بلکیں گُشگ بیت اِنت کہ اے یک سمائی ءُ زانشتی ءُ سرپدیں پیسلہ ءِ بیتگ، اے پیسلہ آئی بلوچستان ءِ جاورانی بابت ءَ جھلانکیں سرپدی، راجی سمائی ءِ پھتہ ءُ مھریں زردال ءُ پگر ءِ سوب بیتگ۔
 
 سمعیہ جوانیں زانشت داروکیں بیتگ، آئی سیادی گوں اھوالکاری ءِ کَسب ءَ بیتگ، آ داں پنچ سالاں گوں بلوچ لبریشن آرمی ءِ رسانکدری تک ءَ وتی زمہ واریاں پیلو کنگ ءَ بیتگ ءُ ھمے نیام ءَ بی ایل اے میڈیا ونگ ءَ مھکم ءُ سانمند جوڑ کنگ ءِ تہ ءَ وتی زانتکاری ءُ زھنی لائکی جوانی ءَ گوں کارمرز کُتگ اَنت۔
 
آتی ءِ وتی زندمان ھم بلوچ جُنز ءَ گوں جھلانکیں وڑی ءَ بندوک بیتگ۔ آ پدائی ریحان بلوچ ءِ دشتار بیتگ، کہ آئی ءَ 2018 ءَ دالبندین ءِ نزیک ءَ چینی انجنیرانی سر ءَ پدائی اُرش کُتگ اَت،ءُ بی ایل اے ءِ سروگانیں رھشون، جنرل اسلم بلوچ ءِ نشار بیتگ۔
 
بی ایل اے ءِ جارکش ءِ رد ءَ، سمعیہ ءِ 21 سال ءِ اُمبر ءَ مجید بریگیڈ ءِ ھاتر ءَ وتی واھشت ءِ پد ءَ وتی ھزمتانی دیگ ءَ پیسلہ کُتگ اَت، ءُ پیسلہ ءِ سر ءَ اوشتوک بیتگ ، ءُ آ شمبے ءِ روچ ءَ سوبمندیں پدائی اُرش کنان ءَ بلوچ راجدپتر ءِ تہ ءَ ابدمان بیتگ۔
 
سمعیہ بلوچ ءِ اے گام ءَ آ بلوچ گھگیری ءِ تہ ءَ یک مزن ءُ ھچ بر بے ترانگ نہ بیوکیں کارست ءِ جوڑ کُتگ، کہ بلوچستان ءِ آجوئی ءِ جد ءُ جھد ءِ تہ ءَ یک مزنیں ھند ءِ زانگ بیت۔
 
 بلوچستان ءِ سلاہ بندیں گھگیری ءِ تہ ءَ زالبولانی مٹ بیوکیں کارست
 
بلوچستان ءِ سلاہ بندیں گھگیری ءِ راجدپترئے تہ ءَ یک نَرَسانیں بدلی ءِ گندگ ءَ پیداک اِنت، یک وھدے اَت کہ زالبول راجی جُنز ءِ تہ ءَ تھنا کمککاری کرد ءِ پیلو کنگ ءَ بیتگ اَنت، بلے نا جنین مردینانی سرگشتنی کردانی تہ ءَ پاد ایر کنگ ءَ اَنت۔ سمعیہ بلوچ ءِ نیمگ ءَ کنگ بیتگیں پدائی اُرش، بلوچستان ءِ آجوئی ءِ جد ءُ جھد ءِ یک پرارزشتیں کَنڈگ اِنت، کہ اِش نہ تھنا اَڑ ءِ ترندی ءَ پدر کنگ ءَ اَنت بلکیں سلاہ بندیں گھگیری ءِ تہ ءَ جنین آدمانی ودوکیں کرد ءَ ھم زاھر کنگ ءَ اِنت۔
 
گوستگیں سال ءِ اپریل ءَ بی ایل اے ءِ مجید بریگیڈ ءِ اولی جنینیں پدائی، شاری بلوچ، ءَ کراچی شھدربرجاہ چینی شھریانی سر ءَ یک وتکُشیں اُرشے کُتگ اَت، آ وھد ءَ، بازیں مردماں شاری ءِ ھمے کردءَ بلوچ آجوئی ءِ جُنز ءِ تہءَ یک برے ودی بیوکیں سرپد بئیگ ءَ اِت اَنت۔ بلے، سمعیہ بلوچ ءِ انیگیں اُرش ءَ پیش داشتگ کہ آ گُمان رد بیتگ۔
 
بلوچ لبریشن آرمی ءِ جارکش جیئند بلوچ ءَ وتی انیگیں درشانے تہءَ سدکی داتگ کہ نوں بازیں جنین مجید بریگیڈ ءِ بھر اَنت، کہ وتکُشیں اُرشانی ھاتر ءَ ساڑی اَنت۔

“زورگیریں پاکستان ءُ آئی ءِ ھمکار چین، بلوچستان ءِ آجوئی ءَ نہ من اَنت ءُ زیت ءَ زیت چہ بلوچستان ءَ در بہ کپ اَنت، اگاں نہ بی ایل اے ءِ ترندیں اُرشانی ھاتر ءَ ساڑی بہ بنت۔”

گوستگیں روچءَ، بلوچ لبریشن آرمی ءَ وتی رسانکدری چینل ءِ سر ءَ یک تامرے شنگ کُتگ اَت کہ اشی تہ ءَ مجید بریگیڈ ءِ بازیں زالبولیں باسک بریگیڈ ءِ پوشاک ءُ وتکُشیں ویسٹ گور ءَ گندگ بنت۔
 
اے تامر ءِ تہ ءَ، سمعیہ ءَ اردو زبان ءِ تہ ءَ وتی گُڈی کلو داتگ۔ آئی ءَ گُشتگ کہ زرداریں سرڈگار ءِ واھند بئیگ ءَ ابید ھم، بلوچ مھلوک چہ زانشت ءَ دیر دارگ بیتگ اَنت ءُ آیانی ورناہ وتی زند ءَ ڈیھی بندیگ جاھانی تہ ءَ گوازینگ ءَ اَنت۔ آئی ءَ گُشتگ ءَ آئی کرد تھنا ھمے دروشمیں دیمھونیانی بندات اِنت ءُ آئی ءَ باور اِنت کہ راستیں کِشک ءِ سر ءَ اِنت، ءُ آئی ءَ چہ بلوچ راج ءَ جد ءُ جھد ءَ ھوار بئیگ ءِ دزبندی کُتگ۔

سرگُشتنی دروشم ءَ، بلوچستان ءِ آجوئی ءِ جُنز ءِ تہ ءَ زالبولانی کرد پلہ مرزی ءُ چیدگی کچ ءَ بیتگ، وھدیکہ پرکاریں جنگی کرد بازیں ھد ئے ءَ داں رد سرپد بیگ بیتگ۔ البت، سمعیہ ءُ شاری بلوچ ءِ ارشاں ھمے رھبند پرشتگ اَنت، ءُ اے گُشتگ کہ زالبول تھنا اے جد ءُ جھد ءِ بھر نہ اَنت بلکیں سلاہ بندیں گھگیری ءِ تہ ءَ بنجاھی کارست ءِ پیلو کنگ ءَ اَنت۔

لس پَدگَرد
 
سمعیہ بلوچ ءِ اُرش ءَ پد، چاگردی رسانکدر ءِ سر ءَ لس پَدگَرد ءِ چاران ءَ اے گُشگ بیت کنت کہ بلوچ مھلوک ءَ آئی ءَ نمیرانی گوں باز راسدیم ءُ دلبڈی دیوکیں دروشم ءَ زُرتگ۔ اے پَدگَرد ھاس ٹوئٹر ءَ گندگ بیتگ، کہ آودہ ھیش ٹیگ #SumaiyaTheLegend لھتے ادارانی تہ ءَ مستریں ٹرینڈزانی تہ ءَ ھوار بیتگ۔ اے ھیش ٹیگ بلوچستان ءِ آجوئی ءِ جُنز ءَ بندوکیں باسک ءُ پلہ مرزانی نیمگ ءَ چہ بندات کنگ بیتگ، کہ آیاں ایشی ءَ کارمرز کنان ءَ سمعیہ بلوچ ءَ پہ ستاشانی ءُ دروت ندر کُتگ۔
 
گیشتر ھبناکیں گپ ایش اِنت کہ اے ھیش ٹیگ تھنا سلاہ بندیں گلانی پلہ مرزاں داں بندوک نہ بیتگ، بلکیں ایشی ءَ جتائیں لیکھی ٹولیاں گوں سیادی داروکیں مردم ھم سانمند کُتگ اَنت۔ کارمرز کنوکاں سمعیہ بلوچ ءِ دلیری ءَ دیمھونی ءَ ساڑا اتگ۔

“بلوچ زالبول اولی سرپ ءِ سر ءَ”
 
بلوچستان ءَ برجائیں اَڑ ءُ کُڑ ءِ سُر ءُ پُری پِڑا، زالبولانی سَھرائی یکشل ءَ ودان اِنت۔ اے بدلی ءِ دروشم شاری بلوچ ءُ سمعیہ بلوچ ءِ دلیریں ارشانی تہ ءَ گندگ ءَ پیداک اَنت۔آیانی ھمراہ داری ءَ ھندی سرگشتناں سرینتگ ءُ ایر کُتگ اَنت ءُ اے جد ءُ جھد ءِ تہ ءَ جنسی کردارانی نوکیں پجارانی در پچ کُتگ اَنت۔
 
اے بدلی بلوچستان ءَ آجوئی جد ءُ جھد ءِ باندات ءِ راہ ءَ سانمند کنگ ءِ لائکی داریت۔ زالبولانی سلاہ بندیں گھگیری ءَ ھواری، جد ءُ جھد ءَ نوکیں ساہ ءُ توان دات کنت۔ بلے دومی نیمگ ءَ، اے ھستیں راجکاری زیدر ءَ گیشتر کَش ءُ مانکشی ءَ دور دات کنت۔
 
تربت ءِ وئیل ءَ بلوچستان ءِ آجوئی ءِ جد ءُ جھد ءِ دپتر ءَ تہ ءَ نوکیں درے پچ کُتگ۔ اے وئیل ءِ دراج پندیں سان ھم داں انگت سرجمیں وڑا پدر ھم بیت نہ کن اَنت۔
 
بلے یک راستی ءِ کہ ھاسیں وڑ ءَ پدر ءَ اِنت: بلوچ زالبولانی سلاہ بندیں جد ءُ جھد ءَ برجاھیں ھواری ءِ اھد اے دمگ ءَ راستی ءَ بندات بیتگ۔ سمعیہ بلوچ ءِ پدائی اُرش کہ اے وڑیں دومی اُرش ءِ بستار ءَ دار ایت، بلوچ زالبولانی اولی سرپ ءَ ھواری ءَ نی one-off incident گُشگ ءُ ڈالچار کنگ اگاں رد کنگ باوری نہ اِنت۔

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلیگرام چینل ھکل ءَ شنگ کرتگیں درشانے ءِ تہ ءَ گوشتگ کہ مئے سرمچاراں گوستگین شپ ءَ ھرنائی ءَ مادن برؤکیں گاڑی تباہ کتگ انت ءُ ڈپٹی کمشنر ءِ کاروان نشانگ کتگ وھدیکہ یک شکی ایں مردمے دزگیر کتگ –

جارکش ءَ گوشتگ کہ بی ایل اے ءِ سرمچاراں گوستگیں شپ ءَ ھرنائی ءِ نزیک ءَ زیارت ءِ دمگ منگی ڈیم ءَ بنجاھی شھدگ بستگ ، سرمچاراں ھمے میان ءَ پاکستان ءِ سوبہ ءِ پنجاپ ءِ دمگ رحیم یار خان ءِ جھمنندیں شکئی ایں مردمے ھم دزگیر کتگ کہ چہ آئی ءَ جست پُرس برجاہ انت –

آئی ءَ گوشتگ کہ سرمچاراں گوستگیں شپ ءَ بنجاھی شھدگ سرجمی ءَ بند کتگ وھدیکہ مادن بروکیں کساس بیست گاڑی مانداشتگ ءُ تیرگواری کتگ ءُ تباہ کتگ انت –

جیئند بلوچ ءَ گوشتگ دومی نیمگ ءَ سرمچارانی یک دگہ ٹولی ءَ ھمے دمگ ءَ گوزوکیں ڈپٹی کمشنر ہرنائی ءِ محمد عارف زرکون ءِ کاروان ءِ سر ءَ ھم اُرش کتگ –

آئی ءَ گوشتگ کہ بی ایل اے ءَ اے گپ پیسر ءَ تچک کتگ کہ زورگیریں پوج ءِ کمک کار وتی جان ءُ مال ءِ زمہ دار وت انت – گڈی رند ءَ ما ھمے سال ءِ یک مئی ءَ وتی درشان ءِ تہ ءَ گوشتگ کہ اشکرانی چات ءِ مزور ءُ ٹیکدار زورگیریں پوج ءِ چاریگری، راشن سرکنگ ءُ واٹر سپلائی جنگ ءُ آھاں آپ دیگ ءَ وت ءَ بہ پھریز انت –

گڈسر ءَ آئی ءَ گوشتگ کہ بی ایل اے اے اُرشانی زمہ واری ءَ منیت ءُ زورگیریں پوج ءُ آئی ءِ کمککارانی سر ءَ مئے اُرش برجاہ مان انت –

جی پہ شھموکیں پِدائی سمّو

سلال سمین

جی پہ شھموکیں پِدائی سمّو ءَ سُھریں دروت
رھبر ءُ رھشونیں راجءِ سوھو ءَ سُھریں دروت

اِشک اجّکّہ اِنت پہ تئی جِند ندری سسّا ءَ
شارُل ءِ پِگرانی چیدگ منّو ءَ سُھریں دروت

رُستگیں جنگانی توکل ، اسلمی جُنزانی ھکّل
رِتکگیں ھونانی مِسکیں وشبو ءَ سُھریں دروت

اِشک زیبائی پہ زاناں سر بیت شیدائیں ریھان
گلزمین چاڑانی لاڑیں ھانو ءَ سُھریں دُروت

اے امیر ءِ گُڈی تیرءِ ھم توار ءَ زِندگ داریت
روکناکیں شورھانی بالو ءَ سُھریں دُروت

باج بُرتگ جِند ندراں پہ وتّن مرچی سمؔین
ھاک ءِ شیدا ءُ تمردیں جنگجو ءَ سُھریں دُروت

شائر: سمّاک مرید

دی بلوچستان پوسٹ

ماہ آدینک ءِ بُکچہ ءَ کُدان، سمّو یے سُران
جنگ زدگ گریوگے آزمان، سمّویے سُران

زمین آزارے وپتگ، لوٹیت توکلیں بار
سیہ مار ٹپ ءُ ٹوریں شگان، سمّویے سُران

بالاد چنالاں دنت ،کیچ ءَ ھپت رنگی ایں
پہ آشوب گوں لاڈیاں روان، سمّویے سُران

ھنڈال بنت مجید ءِ شاگ، ساوڈ اھدانی
جنگ ءِ درْنز، آواز ءِ بان، سمّویے سُران

مہلب شانیں سمین، پلّانی درْد اَت آبلہ
داں ھونی پشنگ بنت کمپان، سمّویے سُران

پِدا بنت گوں واھگاں ، گوں جنزگاں پدائی
چاچا ءِ سُرمگ شاری ءِ گُشان ،سمّویے سُران

شیراک آں کوہی سر ٹُلّ، درویش آں پدانک
آبشاراں جنگانی ریحان ، سمّویے سران

سمّو

شائر: نوتک آشکان دشتی

دی بلوچستان پوسٹ

سمو اے کوھاں برْمش اِتگ
ھردیں کہ تو جنگانی زیبائیں سرے مانپوشتگ
بُرزیں ھسارانی دل، تئی پیشانی ءِ ھاکانی دَنزاں کپتگ اَنت
بولان ءِ سِرین جھل اِنت پہ تو پَھرانی اِھوالاں بہ زیر
پہ تئی زمین ءِ بوسگاں چاڑ ءُ ملار بنگاں چِتگ
کوھانی برْمش جنگاں چِتگ
سمو نی مَپلد نوک بنت
اِسپیتیں پُٹ ورناھی ءِ دَھلانی تیجاراں چن اَنت
شھم اَنت کاٹارانی زِہ
سبز اَنت جنگولانی ھُل
تیرانی سوھانیں سراں ورناہ دوبر سوھان کن اَنت
جنگ ءَ تئی نام ءَ دیاں

روکپتی بلوچستان ءِ دمگ سراوان ءَ سلاہ بندیں مردماں تیرگواری کنان ءَ سیمسری یک کارندھے کُشتگ-

گیشیں اھوالانی رد ءَ سراوان ءَ سیمسری ھند ءَ ناشناسیں مردماں پاسگاہ ءِ شانزدہ یک سد ءُ سِی ءُ میل ءَ تیرگواری کرتگ ءُ یک کارندھے کُشتگ-

کُشگ بیتگیں کارندہ ءِ پجار حسن قورزائی جھمنند ھامون ءِ نام ءَ زانگ بیتگ –

بیتگیں وئیل ءِ بارو ءَ دگہ سلاہ بندانی درشانی ھم دیم ءَ نیتکگ اَنت ءُ نانکہ سرکاری تکاں اے وئیل ءِ درگت ءَ دگہ گپ دیم ءَ اتکگ بیتگ اَنت-

زانگ بہ بیت گوست ءَ ھم سراوان ءِ سر ءُ پیچاں ایرانی لشکر نشانگ کنگ بیتگ ءُ آیانی زمہ واری ھم ھچ گل ءَ پہ وت ءَ نہ زرتگ اَنت-