TBP Balochi

بلوچ نیشنل مومنٹ ءِ گوستگیں سرکماش خلیل بلوچ ءَ فدائی سمیعہ بلوچ ءَ را سھر چکین دروت ندر کتگ ءُ گوشتگ کہ زندگی ءِ شوھاز ءَ مرگ ءِ امبازگ گلامیں راجانی زندگ بوگ ءِ مانزمانی اِنت-

چاگردی ترامجاہ ٹوئٹر ءَ وتی یک درشانے ءَ آئی ءَ گوشتگ کہ مرگ ءِ پیسلہ ءَ پکر ءُ سنچ داروکہں ڈیھ ءُ زمین ءِ آشکے کت کنت-

آئی ءَ دیمتر ءَ گوشتگ کہ ڈیھ ءِ بانک سمیعہ بلوچ ھمایاں چہ یکے بیتگ ماتیں زمین ھاکانی وشبواں تھنا سما کن اَنت بلکیں آئی ءِ واستا وتی زند ءَ کربان کن اَنت ءُ نمیران بنت اِنت-

دومی نیمگ ءَ ٹوئٹر ءَ سمیعہ بلوچ ءَ را ستاشانی ءُ آئی ءِ پلامرزی ءَ سیمی روچ ءَ ھم جتا جتائیں پکراں بندوکیں مردمانی کامرد کنگ بیتگیں ھیش ٹیگ سمیعہ دی لیجنڈ ٹرنڈ ھل اتگ –

سمیعہ بلوچ اے وھد ءَ بلوچستان ءَ ھوار دگہ پھناتاں سما کنوکیں چاگردی ءُ ترامجاھانی کارمرد کنوکانی سرھال جوڑ بیتگ –

آئی ءَ جتا جتائیں تک ءُ پھناتان بندوکیں مردم دروت ءُ آئی ءِ ستاشانی ءَ کنگ ءَ اَنت-

امریکہ ءِ سروک جوبائیڈن ءَ گوشتگ کہ روکپتی ڈیھ روس ءِ نیم پوجی ویگنر ءِ باگیان ءَ ھچ سیادی نیست اِنت-

فرانسیسی ھال سر کنوکیں ادارہ اے ایف پی ءِ رد ءَ جوبائیڈن ءِ گوشگ ویگنر ٹولی ٹولی ءَ ماسکو نیمگ ءَ پیش گامی کنگ ءِ دارگ ءِ ھاتر ءَ ھچ آسر ءَ درنیتکگ اَنت –

آئی ءِ گوشگ اِنت ما گوستگیں ھپتگ ءَ جاورھال ءُ ایشی ءَ روس ءُ یوکرین ءِ واستا چار ءُ ٹپاسی کنگ ءَ اَنت آئی ءِ گوشگ اِنت انوگیں وھد ءَ جاورھالانی نیمگ ءَ روگ ءَ اَنت –

آئی ءَ گوشتگ کہ آ ءُ روکپتی ھمسنتی ءِ میان ءَ رھوتی ءَ اَنت ءُ آئی ءَ یوکرینی سروک والدیمیر زیلنسکی ءَ گوستگ امریکہ ءِ پلامرزی ءِ مھکمی ءِ کنگ اِنت –

روس ءَ ھرچی بیت اِنت امریکہ یوکرین ءِ پھریزگ ءُ دمگی وت واجھی ءِ پلامرزی ءِ کنگ اِنت – امریکہ ءِ سروک اے سازشانی نگاھاں رد کنگ ءِ باگیانی تہ ءُ روکپت دزمانجن اِنت –

آئی ءَ گوشتگ کہ یورپی لیڈرانی زوم ءِ گپ کنگ ءُ آئی ءِ تپاک اِنت ءُ ما روسی سروک ولادیمیر پوتن موہ نہ دات اِنت ایشی ءِ بھتام روکپت ءُ نیٹو ءَ بہ جن اِت – اے باگی روسی نزام ءِ ھلاپ ءَ جد ءُ جھد بھر بیتگ –

آئی ءَ گوشتگ دوشمبے ءَ ما ھمسنتی ءَ دوبر رھوت بیت اِنت بکء آئی ءَ اے نہ گوشتگ اے کجام رھشونان گپ کنت-

جوبائیڈن ءَ شمبے ءِ روچ ءَ فرانسیسی سروک ایمانویل میکخواں، جرمن چانسلر اولاف سکولز ءُ برتانیہ ءِ سروزیر رشی سوناک ءَ شَور ءُ سلاہ کتگ –

دی بلوچستان پوسٹ

ھون شموریں زلپاں کتاراں سمو ءِ
بیڑ ملاریں اشک ءِ سھاراں سمو ءِ

پُل پدائی ھُل سباھی چاڑ ءِ وتن
شورہ بندیں جیگ نگاراں سمو ءِ

شارل سمل باجن پھراں جنگانی
اوست چکاریں کشک بھاراں سمو ءِ

زور نہ منتہ وھد ھلاس انت بدواہ ءِ
آس شلوکیں کوہ ءُ ھساراں سمو ءِ

درد شِتہ ما واب زمین ءَ میتاپ انت
کوش ءِ زیمر گام ءُ شھاراں سمو ءِ

شیر تلائیں پگر ءِ مجیداں جی باتیں
گرند گروکیں ٹھک ءُ تواراں سمو ءِ

امیریں مُلک ءِ واھند بوگ ءَ ابید ھم مروچی ما کجا انت، مئے گور ءَ چی ھست – پدائی سُمیہ کلندرانی بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءَ گوستگیں روچاں پاکستانی پوج ءِ “ہائی ویلیو” چیریں ادارھانی کارمندانی سر ءَ جند ندری کنوکیں زالبول نمیرانیں پدائی سُمیہ بلوچ ءِ تامری درشان شنگ کُتگ –

پدائی سُمیہ کلندرانی بلوچ ءَ وتی تامری درشان ءِ تہ ءَ گوشتگ کہ درساں پیش سرڈگار ءِ درسیں منی برات ءُ گھاراں سلام، مروچی من شمارا درساں کلوہ ءِ دیگ لوٹ آں ما درست زان ایں کہ زند درستاں دوستر انت بلے زند مول، سرڈگار ءُ کار ءَ چہ مستر بوت نہ کنت – وھدیکہ سرڈگار ءِ گپ کئیت گڈا مارا وتی زاتی زند ءُ ھیش ءُ آرام دراہ یل کنگی انت پرچا کہ ما گلام انت ءُ ھر ھما کہ گلام بیت آئی ءِ ھچ وڈیں زندے نہ بیت – مروچی مارا درساں یکجاہ بوگ ءُ اے گلامی زمزیل پروشگی انت اے زوراکیانی بگیری ءَ وتی توار چست کنگی انت –

آئی ءَ گوشتگ کہ مروچی من اوشتاتگ انت من لوٹاں بانداں مناں چہ پد دگہ ھزاراں گھار منی پُشت ءَ بُوشت انت ءُ ما وتی دژمن ءَ ھمے پیش بہ داریں کہ بلوچ راج یک بھادریں راجے ءُ آ کدی پدکنز نہ بیت انت – دژمن ھمنچو تاکتور بہ بیت ما پدکنز نہ بہ ایں –

سُمیہ کلندرانی ءَ دیمتر ءَ گوشتگ کہ منی برات ءُ گھاراں مئے گور ءَ اشی ءَ ابید دگہ ھچی راہ ءُ در پشت نہ کپتگ – مروچی مئے راج ھنچیں جاورھالانی تہ ءَ گوزگ انت کہ مئے مات ءُ گھار دراہ مئے دیمءَ انت اشی ءَ ابید ھم ما وتی درگت ءَ ھیال ءُ پگر بہ کنیں وتی زات ءِ درگت ءَ پگر بہ کن ایں گڈا اے بے سنچی ءِ بیت اے ھما نمیرانیں سرانی گوم ءَ ناھکی ءِ بیت کہ آھاں ماتیں سرڈگار ءَ پہ وتی ھون داتگ انت –

آئی ءَ گوشتگ کہ مروچی مئے گور ءَ چینچو درور ھست انت اشی ءَ ابید ھم ما کمے دیما رؤیں پدا ما ھمے گوش ایں کہ مارا نوں بس انت ما چدوگیش دیمھونی دات نہ کن ایں، اناں منی برات ءُ گھاراں اناں! اے کربانی ءِ نہ انت اے ھچے نہ انت اے بس بندات انت مارا دیمتر ءَ دگہ باز کربانی دیگی انت – مئے گور ءَ کمے چیز کہ بیت آ ھم مارا کربان کنگی انت – مارا تاں ھما وھد ءَ کربانی دیگی انت تانکہ مئے راج آجو نہ بیت انت – مارا وتی دژمن پیش دارگی انت کہ بلوچ ءِ چُک دلیر انت ءُ آ پہ وتی ڈیھ ءَ اشتات کن انت، جنگ کت کن انت ءُ وتی دژمن ءِ دیم ءَ اشتات ءُ آھاں چم پیش داشت کناں – مروچی من پہ وتی سرڈگار ءِ ھاتر ءَ وت ءَ کربان کنگ ءَ آں، من ھمے امیت ءَ داراں کہ باندا شما دیم ءَ کائے، شما وت ءَ کربان کن یے پرچاکہ اے جنگ، اے جھد چہ مارا کربانی لوٹیت –

جند ندری کنوکیں سُمیہ کلندرانی ءَ گوشتگ کہ مئے برات بیگواہ کنگ بوگ ءَ انت ، مئے مات ءُ گھار دگانی سر ءَ در پہ در انت، آھانی ناں جاھے ھست ءُ نا گس ، مئے گور ءَ ناکہ شریں وانگجاھے ھست – یک بلاھیں امیریں سرڈگارے ءِ واھند بوگ ءَ ابید ھم مروچی ما کجام جاہ انت، مئے گور ءَ چی ھست – مئے گور ءَ ناں وانگجاھے ھست، ناں زانت ھست ھچ نیست – پرچا! پرچا مارا چہ زانت ءُ زانشت ءَ دور دارگ بوگ ءَ انت ھمے واست ءَ کہ ما راستی ءَ زانت مہ کن ایں – بلے ما وتی دژمن ءَ اے ثابت کن ایں ءُ پیشداریں کہ مارا تو چہ زانت ءُ زانشت ءَ ھمینچو دور بہ دار بلے ما زان ایں کہ مارا وتی راج کجام وڈا آجو کنگی انت –

آئی ءَ گوشتگ کہ مئے گور ءَ مروچی بس ھمے یکیں راہ پشت کپتگ اشی ءَ ابید مئے گور ءَ دگہ ھچی راہ ءُ در نیست –

آئی ءَ گوشتگ کہ مارا وتی جنگ وت برجم دارگی – ھچ وڈیں ڈیھ نہ ایت ءُ مئے ڈیھ ءَ آجو نہ کنت ، ھچ کس مئے سر ءَ رھم نہ کنت ھرچی کنگی انت مارا وت ءَ کنگی انت – وتی چماں پچ کن ات ، بچار ات کہ مئے گوم ءَ چی بوگ ءَ انت، کجام زوراکی بوگ ءَ انت –

سُمیہ کلندرانی ءَ گوشتگ کہ منی اے گپ ھما وھد ءَ کہ شمارا سر بنت من شمے میان ءَ نہ باں، بلے مناں باور انت کہ اے جھد، اے جنگ دیمروئی کنت، شما اشی ءَ دیم ءَ بر ات پرچا کہ ما راستی ءِ سر ءَ انت – مارا وتی چم پچ کنگی انت ءُ وتی دژمن چارگی انت – مئے دژمن مارا چہ تاکتور تر انت بلے ما راستی ءِ سر ءَ انت تاں ھما وھد ءَ مئے گور ءَ جزبہ ھست آ مارا ھچ کُت نہ کنت –

جند ندری کنوکیں زالبول پدائی سُمیہ کلندرانی ءِ اے شش ملٹ ءِ تامری درشان ءِ تہ ءَ دگہ زالبول ھم گندگ بنت کہ آ سلاہ بند ءُ آھاں وتکش جیکٹ گور ءَ انت –

اے درگت ءَ بی ایل اے ءَ ھم وتی درشان ءِ تہ ءَ گوشتگ کہ بلوچ لبریشن آرمی مجید برگیڈ ءِ تہ ءَ بازیں بلوچ زالبولاں ھوار سدانی کچ ءَ پدائی دژمن ءِ سر ءَ کھر جوڑ بوگ ءُ اُرش ءَ ساجو انت – زورگیریں پاکستان ءُ آئی ءِ کمکار چین بلوچ ءِ آجوئی ءَ بہ منّ انت ءُ زوتاں زوت چہ بلوچستان ءَ در بیا انت اگاں ناں گڑا بی ایل اے ءِ ترندتریں اُرشانی ھاتر ءَ وت ءَ ساڑی بہ کن انت-

زانگ بہ بیت بلوچ لبریشن آرمی “جند ندری” مجید برگیڈ ءِ اے دومی بلوچ زالبولیں پدائی اُرشکار انت ـ چدو پیسر کیچ ءِ جھمنند نمیرانیں پدائی شاری بلوچ ءَ ماں کراچی ءَ چینیانی سر ءَ کُتگ بوتگ –

بلوچ آجوئی لوٹوکیں رھشون رحیم ایڈوکیٹ بلوچ ءِ گوشگ انت کہ بلوچ زالبول پہ بلوچستان ءِ آجوئی جھد ءِ درسیں سنگرانی تہ ءَ وتی ساڑی بوگ ءَ پدر کنگ ءَ انت-

آئی ءَ چاگردی ترامجاہ ٹویٹر ءَ وتی ٹویٹ ءِ تہ ءَ نبشتگ کہ منی زھگ سمیہ کلندرانی ءَ سلام، نمیرانیں سمُیہ، شاری ءُ لمہ کریمہ ءِ دیمھونیاں پدر بیت کہ بلوچ زالبول بلوچستان ءِ آجوئی جھد ءں درسیں سنگرانی تہ ءَ وتی ساڑی بوگ ءَ پدر کنگ ءَ انت –

آئی ءَ گوشتگ کہ اے دیمھونی بس یک زات، نسل ءُ ٹک ءَ تاں بندوک نہ انت –

سویڈن ءَ رولت کوسٹر ءِ وئیل ءَ یک مردمے بیران بیتگ، نُھ مردم زدگ بیتگ اَنت ءُ چریشانی توک ءَ یک زھگے ھوار اِنت-

برطانیہ ءِ ھال سر کنوکیں ادارہ روئٹرز ءِ رد ءَ وئیل اسٹاک ھوم شھر ءَ گرونا لنڈ ءَ تر ءُ تابی جاہ ءَ پیش اتکگ –

چم دیستگیں رولر کوسٹر ترگ ءِ وھد ءَ پٹری ءَ لگوشتگ ءُ سواریں مردم زمین ءَ کپتگ اَنت-

پارک ءِ چیف ایگزیکٹیو جان ایریکسن ءَ وئیل ءَ پد پریس کانفرنس ءَ گوشتگ کہ مروچی گرونا لنڈ ءَ پرس ءِ روچ اِنت کہ مئے جاہ ءَ ھنچیں وئیل پیش اتکگ ءُ رولر کوسٹر ءَ پٹڑی ءَ لگوشگ ءَ پد یک مردمے بیران بیتگ ءُ ایشی ءَ ابید نُھ مردم زدگ بیتگ اَنت-

وئیل ءِ ھال ءِ سر بیگ ءَ ایمبولینسز، فائر بریگیڈ ءِ گاڑی پارک ءِ نیمگ ءَ روگ ءَ گندگ ءَ بیتگ اَنت ءُ ھیلی کاپٹرز برز ءَ بال کتگ اَنت-

پولیس ءِ گوشگ اِنت وئیل ءِ پٹ ءُ پول بندات کتگ، پولیس ءِ رد ءَ زدگ بیتگیں مردم ھسپتال ءَ سر کنگ بیتگ اَنت چریشانی توک ءَ سَے کس زدگ بیتگ اَنت-

گرونا پارک چیف ایگریکٹیو ایریکسن ءِ گوشگ اِنت کہ یک سد ءُ چل سال ءَ کوھنیں پارک پولیس ءَ پٹ ءُ پول ءِ ھاتر ءَ یک ھپتگے ءِ واستا بند کتگ ٹ

پارک ءِ جارکش ءَ گوشگ اِنت رولر ءَ کوسٹر چاردہ مردم سوار بیتگ اَنت دومی بھر ءَ پٹری ءَ ءُ کوسٹر دیم ءَ شتگ کہ ٹریک اوشتات بیتگ –

روکپتی بلوچستان ءِ دمگ راسک ءَ ناشناسیں مردمانی تیرگواری ءَ یک مردمے بیران بیتگ-

گیشیں اھوالانی رد ءَ روکپتی بلوچستان ءِ دمگ راسک ءَ ناشناسیں مردماں تیرگواری کنان ءَ اھسان آبادیان ء ملک مھمد وتی کارجاہ ءَ کُشتگ –

اھوالانی رد ءَ اھسان ءَ دگہ زاتی دشمنی ءُ دگہ جیڑہ نہ بیتگ بلے ناشناساں تیرانی آماچ کتگ ءُ کشتگ-

زانگ بہ بیت روکپتی بلوچستان ءَ یکشل ءَ اے دابیں کوش برجاہ اَنت کہ اود ءَ مردم یکشل ءَ چوشین وئیلانی دیمپانی کنگ ءَ اَنت-

اھوالانی رد ءَ اود ءَ نا کشوک زانگ بنت ءُ ناکہ آیانی ھلاپ ءَ سرکار چوشین ھاسیں گامگیجے ءِ زورگ ءَ گندگ ءَ کیت اِنت-

اے دابیں وئیلانی سبب ءَ دمگی مردمانی تہ ءَ گیش ترس ءُ جنجال ودی بوگ ءَ گندگ ءَ آیگ ءَ اَنت-

روکپتی بلوچستان ءَ دو بندیگیں بلوچ پاھو دیگ بیتگ اَنت –

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ دو بندیگیں بلوچ پاھو دیگ بیتگ اَنت-

پاھو دیگ بیتگیں مردمانی پجار مھسن گمشادزئی ء ھاجی کریم جھمنند چشمہ زیارت زاھدان ءُ اسھاک انشینی جھمنند ریگ ملک میرجاوہ ءِ ناماں زانگ بیتگ اَنت-

اھوالانی رد ءَ مھسن ایرانی سال سیزدہ سد ءُ نود ءُ یک ءَ زاھدان ءَ گرگ بیتگ –

اھوالانی اسھاک انشینی ایرانی سال سیزدہ سد ءُ نود ءُ نُھ ءَ نشہ باپاری ءِ بھتام ءَ گرگ بیتگ ٹ

زانگ بہ بیت روکپتی بلوچستان ءَ بندوکیں مردم یکشل ءَ پاھو دیگ بوگ ءَ اَنت کہ آیانی تہ ءَ گیشتریں مردم نشہ باپاری ءِ پژدر ءَ دیگ بوگ ءَ اَنت –