بلوچ لبریشن آرمی ءِ جارکشّ جیئند بلوچ ءَ ماں رسانکدر ءَ وتی شِنگ کُرتگیں جارے ءِ تہ ءَ گُوشتگ کہ بلوچ لبریشن آرمی ءِ سرمچاراں گوستگیں شپ ءَ کیچ ءِ ھَند زامران ءَ سادیم ءِ دَمگ ءَ زورگیریں پاکستانی لشکر ءِ یک پانگسے ءِ سر ءَ اُرشے کُرتگ۔
آئی ءَ گُوشتگ کہ سرمچاراں گوں نوکیں سِلاھاں اُرش کرتگ دژمن ءِ دو کارندہ کُشتگ انت ھمے وڑ کم چہ کم سئے کارندہ زَدگ کرتگ اَنت۔
جارکشّ ءَ گُوشتگ کہ بلوچ لبریشن آرمی اے اُرش ءِ زمّہ واری ءَ منّیت۔ داں وتن ءِ آجوئی ءَ مئے اُرش برجاہ بنت۔
بلوچ لبریشن آرمی ءِ فدائی زالبول اُرشکار مروچی ماں تربت ءَ گلزمین ءِ میار کنگ بیتگ –
تربت ءَ شمبے ءِ روچ ءَ پاکستانی پوج ءِ یک گچینی کاروانے ءِ وتکش اُرش ءِ نشانگ کنوکیں بلوچ لبریشن آرمی ءِ زالبولیں اُرشکار سمعیہ قلندرانی ءِ نماز جنازہ دشتی بازار ءِ مانشجاہ ءَ وانینگ بیتگ اَنت-
نماز جنازہ آل پارٹیز کیچ ءِ گوستگیں کنوینر ءُ جمعیت علما اسلام ءِ اُستانی کسان کمک سرکماش خالد ولیدسیفی ءَ وانینتگ –
نماز جنازہ ءَ جماعت اسلامی کیچ ءِ امیر ءُ آل پارٹیز کیچ ءِ کنوینر غلام یاسین بلوچ، پیپلز پاٹی ءِ رھشون قدیر اھمد، تربت سول سوسائٹی ءِ کنوینر گلزار دوست ءَ ھوار بازیں مردماں بھر زرتگ-
زانگ بہ بیت شمبے ءِ روچ ءِ ساھت دو ءَ چاکر اعظم چوک تربت ءَ یک زالبولے ءَ پاکستانی چیریں ادارھانی یک کاروانے ءِ سر ءَ اُرش کتگ-
اُرش ءِ زمہ واری بلوچ آجوئی لوٹوکیں سلاہ بندیں گل بی ایل اے ءَ من اتگ ات ءُ گوشتگ ات کہ اے اُرش بی ایل اے مجید بریگیڈ ءِ فدا-ی سمعیہ قلندرانی بلوچ ءَ سرجم کتگ –
بی ایل اے ءِ نیمگ ءَ شنگ کنگ بیتگیں درشان ءَ گوشگ بیتگ کہ گل ءِ جارکش جیئند بلوچ ءَ گوشتگ ات کہ اے فدائی اُرش مجید بریگیڈ ءِ بھادر فدائی شھید سمعیہ قلندرانی بلوچ پنام ءِ سمو ء عبید قلندرانی ءَ کتگ ءُ آئی ءَ کمکاری دروشم ءَ بریگیڈ ءَ پیش کتگ ءُ مروچی آئی ءَ دشمن ءِ سر ءَ سوبمندیں فدائی اُرش کتگ ءُ وت ءَ بلوچ راجدپتر ءَ نمیران کتگ –
درشان ءَ گوشگ بیتگ کہ بیست ءُ پنچ سالیگیں سمعیہ قلندرانی ءِ کار ءُ کسب اھوالکاری بیتگ ءُ آ پنچ سالاں داں بلوچ لبریشن آرمی ءِ میڈیا ونگ ءَ وتی پرز ءَ پیلو کنگ بیتگ ءُ آئی ءَ بی ایل اے ءِ میڈیا ونگ ءَ را مھکم کنگ ءِ واستا جوانیں کرد پیلو کرتگ اَنت-
زانگ بہ بیت بی ایل اے مجید بریگیڈ ءِ دومی زالبول اِنت کہ فدائی کنگ اِنت – ایشی ءَ پیش کیچ ءَ سیادی داروکیں شاری ءَ کنفیوشس انسٹی ٹیوٹ ءِ چینی کارندھانی سر ءَ کراچی یونیورسٹی ءَ نشانگ کتگ اَنت-
بلوچ یکجھتی کمیٹی کراچی ءِ ڈپٹی آرگنائزر عبدالوھاب بلوچ، وائس فار بلوچ مسنگ پرسنز ءِ جنرل سکریٹری سمی دین بلوچ ءَ ایچ آر سی پی ءِ راجی لیبر کانفرنس ءَ بھر زرتگ ءُ زورانسری آوارجنیانی درگت ءَ وتی ھیال درشان اِتگ انت –
اے وھد ءَ ایچ آر سی پی ءِ چیئرمین اسد اقبال بٹ، ایگزیکٹیو ڈائریکٹر حسین نقی، جنرل سکریٹری خلیق احمد، وائس چئیرمین قاضی خضر حبیب، سندھ کونسل ءِ ممبر سعید بلوچ، ایدھی فاؤنڈیشن ءِ فیصل ایدھی، سیاسی ورکرز زاہد بگٹی، کے بی بلوچ، مجتبی شبیر بلوچ، رؤف روفی ءُ دگہ بازیں مردمے ساڑی بوتگ انت –
بلوچ یکجھتی کمیٹی کراچی ءِ ڈپٹی آرگنائزر عبدالوہاب بلوچ ءَ سمی دین ءِ ھمراھی ءَ ھرتک ءُ پھناتاں سیادی داروکیں مردمانی گوم ءَ دزبندی کتگ کہ ائید ءِ روچ ءَ زورانسری آوار جنگ بوتگیں مردمانی یل کنائینگ ءِ ھاتر ءَ زھرشانی ءَ بھر بہ زور انت –
آئی ءَ گوشتگ کہ بیست ءُ ھشت جون ءَ سمی ءِ پت ڈاکٹر دین محمد بلوچ ءِ زورانسری آوار جنی ءَ چاردہ سال سرجم بوگ ءَ انت – اے چاردھیں سالانی میان ءَ سمی دین ءَ وتی پت ءَ ھوار ایندگہ بیگواھیں مردمانی ھاتر ءَ ھر وڈیں جھد کتگ، وتی پت ءُ ایندگہ بیگواھیں مردمانی یل کنائینگے ھاتر ءَ کمیشن ءِ بھر بوتگ، ھروڈیں کانودی راہ وتیگی کتگ تانکہ مئے دوستیگیں مردم یل کنگ بہ بنت –
سمی دین ءِ گوشگ ات کہ آئی ءِ اے جھد ءَ درسیں انسان دوستانی کمک ءُ ھمراہ داری المی انت ءُ بیا ات اے ائید ءِ وتی وشیانی تہ ءَ.چیزے ساھت بہ کش ات ءُ مئے گمانی شریدار بہ بہ ایت – ھمے وڈ کہ اے عید کربان انت ھمے وڈ مئے ائیدانی وشی کربان کنگ بوتگ انت –
سمی دین ءُ عبدالوہاب بلوچ ءِ گوشگ ات کہ اے مھکمیں توار ءَ چدوگیشتر مھکم کنگے ھاتر ءَ شمے ھمراھداری اشی ءَ چدوگیشتر مھکم تر کنت –
بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب ” ءَ شنگ کرتگیں درشان ءِ تہ ءَ آواران ءُ ناصر آباد ءَ پاکستانی پوج ءِ سر ءَ بوتگیں ھردو اُرشانی زمّہ واری منّ اِتگ ءُ گوشتگ کہ آواران ءَ پوج ءِ کاروان ءِ تراکناکیں شوروانی نشانگ کُتگ چریشی ءَ چار کارمند مُرتگ ءُ بازینے زدگ بوتگ انت –
جارکش ءِ رِد ءَ سرمچاراں بیست ءُ ھپت جون ءِ بیگاھے ادار شش ءِ نزیک ءَ سرمچاراں آواران ءِ دمگ پیراندر ءَ غلاموئی میتگ ءِ نزیک ءَ پاکستانی پوج تراکناکیں شوروانی نشانگ کتگ – اے اُرش ٹرکے ءِ سر ءَ کنگ بوتگ کہ آئی ءَ سواریں نائب سوبیدار اقبال، لانس نائیک حاجی محمد ءَ ھوار چار کارمند ھما دمان ءَ مرتگ انت ءُ بازینے زدگ بوتگ انت – اے اُرش ءِ تامر زوت شنگ کنگ بیت انت –
جارکش ءَ گوشتگ کہ بیست ءُ ھپت جون ءِ شپ ءِ ادار نُھ سرمچاراں کیچ ءِ دمگ ناصرآباد ءَ آرمی بنجل ءِ نزیک ءَ شُتگ ءُ آئی ءِ سر ءَ راکٹ گولہ آس داتگ راکٹ گولہ بنجلے تہ ءَ کپتگ انت چریشی ءَ پوج ءَ جانی ءُ مالی تاوان رستگ –
میجر گوھرام ءَ وتی درشان ءِ تہ ءَ دیمتر ءَ نبشتگ کہ سی پیک روٹ ءِ سوب ءَ پھازگی نام ءَ مردم دلسیاہ کنگ ءُ آھاں در پہ در کنگ انت، آھانی سر ءَ زوراکی کنگ بوگ ءَ انت اشانی بگیری ءَ وتی کارانی تہ ءَ ترندی کاریں – بلوچستان ءِ تہ ءَ ھچ وڈیں شوربندی بلوچ راج ءِ مرزی ءَ ابید وتی آسر ءَ سر بوتگ نہ کن انت –
آئی ءَ گوشتگ کہ بلوچستان ءِ تہ ءَ مدامی پاکستانی پوج ءِ سر ءَ اُرش بوگ ءَ انت ءُ ھمک روچ تاوان بار بوگ ءَ انت آ وتی بنجلانی تہ ءَ ھم پھریز نہ انت بلے پاکستانی پوج ءِ جارکش آئی ایس پی آر گوں وتی دروگیں درشانانی وتی بے سوب بوتگیں پوج ءِ ھوسلہ دیگے جھد انت –
جارکش ءَ گڈسر ءَ گوشتگ کہ بی ایل ایف اے اُرشانی زمّہ واری ءَ منیت ءُ اے اُرش بلوچستان ءِ آجوئی ءَ تاں برجاہ مان انت –
بلوچ راج دوستیں رھشون میر عبدالنبی بنگلزئی ءَ وتی درشانے ءِ تہ ءَ گوشتگ کہ پدائی نمیرانیں سُمیہ کلندرانی ءَ سلام ءُ سھرچکیں دروت ندر کن ایں – آئی ءَ گوشتگ کہ زورگیریں پاکستان ءِ بگیری ءَ سمیہ بلوچ ءِ دیمھونی بلوچستان ءِ آجوئی جھد ءَ رژن ءِ بکشیت –
آئی ءَ گوشتگ من بلوچ راجی آجوئی ءِ سپاھیانی تمردی ءُ دیمھونیاں دروت ندر کناں – اے دیمھونی بلوچ راج ءِ آجوئی ءَ پہ وشیں ھبرے –
روکپتی بلوچستان ءِ دمگ سرباز ءَ ٹریفک پولیس ءِ تیرگواری ءَ دو کس زدگ بیتگ اَنت، شھریانی زھرشانی کنان ءَ پولیس ءِ گاڑی مانداشتگ –
اھوالانی رد ءَ سرباز ءِ ھند کلات ءَ ٹریفک پولیس ءَ یک مساپر کشیں گاڑی ءِ گپتگ ءُ اود ءَ پولیس ءَ مردم پٹ ءُ پول کتگ ءُ پد ءَ دپ جاکی بیتگ ءُ چریشی ءَ پولیس ءَ تیرگواری کتگ ءُ دو کس زدگ کتگ اَنت-
اھوالانی رد ءَ پولیس ءِ تیرگواری ءَ پد مھلوک برانز گپتگ ءُ پولیس ءِ گاڑی اش مانداشتگ ءُ دمگ ءَ راہ ءُ درش بند کتگ اَنت –
اھوالانی رد ءَ کلات ءَ پولیس ءِ کارگس ءِ دیم ءَ بازیں کساسے ءَ مردماں زھرشانی بندات کتگ ءُ شھر ءِ دگانی سر ءَ مشکل ءُ جیڑہ ودی کتگ اَنت-
اھوالانی رد ءَ ایشی ءَ ھوار ھوار کلات ءِ پھل ءِ سر ءَ ھم شھریاں زھرشانی کنان ءَ ٹائر مانداشتگ اَنت ءُ روگ ءُ آیگی مھتل کتگ اَنت-
پاکستان ءِ اُستن خیبر پختونواہ ءِ ھند بٹ ھیلہ ءَ ناشناسیں مردم یک لوگے ءَ مانرتگ ءُ چریشی ءَ نُھ مردم کُشگ بیتگ اَنت-
اردو نیوز ءِ رد ےَ بٹ ھیلہ ءَ لوگی جیڑہ ءِ سبب ءَ تیرگواری ءَ سَے زالبولان ھوار نُھ مردم کُشگ بیتگ اَنت-
پولیس ءِ رد ءَ اے وئیل بٹ خیلہ ءِ میتگ بگردرہ ءَ سَے شمبے ءِ شپ ءَ وئیل پیش اتکگ – تیرگواری ءَ سَے زالبول ءُ شش مردین کُشگ بیتگ اَنت ءُ لاش پوسٹ مارٹم ءِ واستا بٹ خیلہ ءِ ھسپتال ءَ برگ بیتگ اَنت-
پولیس ءِ رد ءَ تیرگواری کنوکیں مردم کُشتگیں مردمانی سیاد اَنت ءُ اے وئیل لوگی جیڑہ ءِ سبب ءَ پیش اتکگ –
اسسٹنٹ کمشنر بٹ خیلہ شکیل اھمد خان ءِ رد ءَ وئیل سیاداری ءِ گوشگ بوگ ءَ اِنت – خیبرپختونخوا ءِ نگراں سر وزیر مھمد اعظم خان ءَ وئیل ءِ سر ءَ گامگیج زیران ءَ پٹ ءُ پول کنگ ءِ ھکم ءُ جرمکارانی دزگیر کنگ ءِ ھکم داتگ-
نگراں سروزیر ءَ سانمندیں کھولانی گون ءَ پدردی درشان کتگ ءُ آئی ءَ گوشتگ کہ جرمکاریں مردم ھچبر کانون ءِ دست ءَ بچ ات نہ کن اَنت –
چاردہ سال ءِ اَنگریں دیدوک “
گُلاب ءِ پُلّیں سمیا شورھاں بنداِیت
نبشتہ کار: گنی ھیات
دی بلوچستان پوسٹ
رژنائی ءِ ھاتر ءَ بلوچ ءَ سانکل ءُ مُھریں زمزیل پرْوشگی اَنت اے سانکلاں ھما کوھپروش ءُ مزن جگر ءُ سوھوئیں انسان پرْوش اَنت کہ ھمُک رنگیں توپان اِش گواز کُرتگ اَنت ھما آشک اے تھاری ءَ بام ءِ رژنائی ءَ ودین اِیت کہ آ گوں وتی آشک ءَ ایمان دار اَنت مھر گوں زمین ءَ آشنا اِنت زمین ءِ اشک ءَ درداں گوں کُمار اَنت ۔
یک انسانے کہ پہ زمین ءِ اشک ءَ درستیں چیزاں ماندار اِیت وتی واھشتاں کوش اِیت ءُ وت ءَ بے تماہ کنت تھنا زمین ءِ رَکینگ ءَ یاکہ وت بندیگ بیت گوں مُھریں سانکلاں سالانی سال ازیت کاٹ اِیت “ یاکہ کھول ءُ ھمبل ءُ سنگتان مدامی رَکست کنت ابدمان بیت ۔
“ھونانی شھکور تچ اَنت پُل شیکو گوں گومازاں وَر اَنت “
“آشک زمین ءِ سَمّو اِنت اِشک ئِے گوں ریھان ءَ ھمدپ اِنت”
پدمنتگیں راجانی زندمان چوناھا ھمے رنگ ءَ بیت پرچا کہ آھاں پھازوک ءُ نگھپان ئِے نیست یک راجے ءَ پھازوک ءُ نگھپان مہ بیت گڑا آئی ءِ سر ءَ زورمند ءُ تیارتریں مردم زوراکی کن اَنت آئی ءَ نزور ءُ بے زور ءُ کم ھاٹیگ کن اَنت یک راجے کہ نزور ءُ بے ھاٹیگ بہ بیت گڑا آ ھمُک روچ لَٹانی دیم پان بیت ءُ روچے یک دروشمے ءَ آ راج را لپاش اَنت شھمات کن اَنت ” شما وت ھم اے چیزاں نگد بہ کن اِت ءُ بچار اِت ھمُک روچ مات ءُ گوھارانی دپ پچ اِنت ءُ ھیسکارگانی توار ءَ جبین ءَ دَرد چست بنت ءُ جگر آپ بنت ءُ چو زھریں تیزاپ ءَ اندر ءَ ایر کپ اَنت ۔
بیا یک بَرے کِسہ دین جان ءِ ءُ آئی ءَ ھما سنگتانی اَنت کہ آ دین جان ءِ پند ءِ مسافر اَنت چاردہ ءُ دوازدہ سال اِنت پہ راج ءَ ءُ کوم ءَ اِزیت بوگ ءَ اَنت درد کاٹگ ءَ اَنت ھمینکس درد کہ دین جان گوں سنگتاں کاٹگ ءَ اِنت ھمینکس آئی ءِ لوگبانُک گوں دوئیں جنکاں انگریں آس ءَ پیلوشگ ءَ اَنتاے زندمان ءِ راستیں کِسّہ اِنت اے چاردہ سال ءِ ودار اَنت اے درد ءُ اندوہ اَنت کرنیگیں ءُ شون بستگیں چمّانی ھرس دین جان ءِ جنکانی انارکانی سر ءَ شیپگر اَنت ۔
ھمے شپگپتگیں ھرس اَنت پہ بدوائیں لگوریں دژمن ءَ کھر ساز بنت ءُ ھجگیں بالاد ءَ شورہ بندیں آسگواریں بدن جھان ءَ سَر ءَ زیریت ءُ جاک ءُ سلوات کنت ، بلے اے چاردھیں سالاں کِساس بہ کن اَنت سنگ ءُ شاھیم ءَ بہ تُور اَنت کہ چُنت تھکُشیں درد ماں ھجگیں بالاد ءَ لپاشتگ ، چینکس آسگواریں شورہ تو پہ زور اے بدن ءَ جاگہ داتگ ۔
کَس پہ شوک بدن ءَ شورہ نہ بند ایت وش وابیں جھان ءَ رُکست نہ کنت اے ھمے دیستگیں واب ، ودارانی رھسراں چیرگِپتگیں دیدوک، جُتاھیانی رنج ءُ تَھکُشیں اندوہ ءُ بلوچ ءِ ھون ریچیں زندمان ءِ راستی کِسہ اِنت کہ تو بدواھیں دژمن ءَ پہ بلوچ راج ءَ را بلوچستان ءِ ھمُک گدان ءَ آس بُند داتگ ، ورنائیں بَچ پیر ءُ آجزیں مات، لاڈوکیں جنک ، مھناھیں گُھار ، تنگوھیں براس ،کاڑیں دشتارانی جگر بند پُول اِتگ اَنت ، اے اکسانی دروشم ءَ پریمانی تہ ءَ کِسہ کنت –
اے ھما ھوشامیں ھلاھوشیں جاگھے زندانی بیا کنت ءُ جاگھے روپان روان کنت گند ءُ گسڈاں لیپگ کنت دور اِش ھترمال کنت کہ ٹُکّر ءِ ما روکپت ءَ تُکّر ءِ ما رودرتک ءَ ھون نوشی ھینّار شان اِیت ” اے کھر سازیں زمانگ ءِ مردم دین جان ءِ جُھد ءَ شموشتگ اَنت پہ بندیگیں زمین ءِ پَدجنگ ءَ آئی ءَ اے جُھد گرانبھائیں کِِشک گچین کُرتگ اَت اے کِشّک ءِ مساپر ھر پیمیں سکّیاں گوں دوچاری اوپار کن اَنت گار ءُ بیگواہ بنت یاکہ کچّلیں زھراں نوش اَنت ابدمان بنت ۔
اے جنگ بلوچاں اے ھاتر ءَ بندات نہ کُرتگ کہ ما مَرگ ءُ زندان ءَ چَہ بہ رکّیں ءُ زندگ بہ بہ اِیں“ بلکیں اے جنگ ءِ بُندریں ھکّیگیں پلسپہ اِش اِنت کہ ما زورگریں دژمن ءِ ھِلاپ ءُ بگیری ءَ بھادُری ءُ دلیری ءِ گون ءَ مُھکمی ءَ وتی آؤکیں پدریچ ءِ میراس ءِ ارادہ مزاھمت ءُ کربانی ءِ جزبہ ءَ سرشاری ھر اھد ءِ بلوچ راجدپتر ءَ زندگ مان اِیت” دین جان ھما جھد ءِ ھُنڈالیں روتگ اِنت کہ سَر ءُ شاھانی تاک زرد چگر اِتگ اَنت ءُ چَہ درچک ءَ رِیچ اَنت گوات اِش روپ اِیت ءُ یک جاگہ کمائین ایت “دین جان تو سکّیں گران بھائیں انسان ءِ اِت ئے ، تو جُھد کُت پہ بزگیں راج ءِ بزگی ءَ ، بلوچ راجدپتر ءَ مدام تئی ءُ تئی جنکانی سمّی ءُ مھلب ءِ جُھد یات کنگ بیت “سمّی ءُ مھلب منی گور ءَ چُشیں لبز نیست کہ من شمئے دوئیں گھارانی درداں درشان بہ کن آں بلے شمئے دوئین گھارانی جھد ءُ جزبگ ءَ دروت ندر کن آں شما ھردوک دین جان ءِ جنک کسانی ءَ بگر دانکہ روچی مروچی بلوچ راج ءِ ھرچ جیڑگ ءِ سرا گوں براس ءُ گُھاراں ھم کوپگ اِت مروچی شمے ابا چاردہ سال اِنت ٹارچر سیلانی تہ ءَ پہ بلوچان اِزیت برداش کنگ ءَ اِنت ۔
اے گپ ھم شموشگی نہ اَنت کہ ھمے بزگیں راج ءُ گُلامیں بلوچانی ھاتر ءَ بلوچستان وتواجھی ءِ ءُ زمین ءِ پدجنگ ءَ بلوچ ءَ ھمُک پیمیں دیمونی دیگ اژدری اِنت یکّے دوازدہ سال ءُ چاردہ سال ءَ دین جان ءُ زاکر جان ءَ برستگیں سانکلاں سڈین اِیت ءُ یکے پہ راج ءَ ھچ پیمیں دیمونی ءَ چَکّ ءُ پد نہ بیت ۔
اے جُھد نو گوں بچک ءُ جنگ ءُ پیر ءُ ورناھاں بندوک نہ اَنت اے جُھد ءَ را ھرچ پمیں بلوچ درکار اِنت مردین ءُ جنین یکے برابر پہ بندیگیں ھاک ءِ پدجنگ ءَ پشت ءَ نہ کنز اَنت ۔
اے کِشک ھما روچی گودی شارُل ءَ گچین کُرتگ اَت بلوچ جنین ئِے شُون داتگ اَنت کہ من ءَ چَہ پَد اے دروازگ پہ ھر ھما بلوچ زلبول ءَ پچ اِنت آ بلوچ جنین آدم ءُ مردین آدم ءِ ھم برابری گپ کنت ۔
بلے مروچی چار زال کیت ءُ ھمے گپ ءَ کنت کہ اے جنگ ءَ جنین آدماں گوں ھوار مہ گیج اِیت پرچا جنین زاناں مردین آدمان نزور تر ءُ کمتر اَنت یا شما بلوچ جنیناں انسان سرپد نہ بہ اِت بلوچ جنین آدم ونت کُرت کنت کاروبار ءُ[ بزنس] کرُت کنت جنگ پرچا کُرت نہ کنت؟
اے جنگ ءَ گوں جنین ءُ مردین ءَ ھچ سرکار نیست اے گپ ھما روچی گودی شارُل ءَ گیشینتگ اَت کہ مردین آدم کہ جنگ کنت گڑا بلوچ جنین آدم گِس ءَ نہ نند اِیت منجاری نہ کنت یانکہ چوڑیاں نہ شلیکین ایت۔ مروچی دوبر شارُل ءِ کشتگیں کیچ ءِ چنال گودی سمیا کلندرانی بلوچ گوں تالکاریں ھوناں سیر آپ کُرتگ ءُ اوگام جنان ءَ گْوشت کہ من رپتگاں پہ نوکیں پدریچ ءِ وشھالی ءُ زندمانی ءِ شوھازگ ءَ پہ سرڈگار ءِ موکگ ءَ منی واھگ اَت زندگی مَرگ ءَ پَد بھار ءِ آشناھی ءَ سر ءَ دیاں باں پہ آجوئی ءِ دْرپشناکیں استالی ءَ ترپاں باں پہ مدامی ءَ ھمُک کودکیں زھگی ءَ دیدوکاں آشنائیں چمّاں من روک باں ۔
سمیا گودی مَرگ ءَ پَد ھر وھد بلوچ راجدپتر ءَ نمیران بوت بلوچ نوجوان ءُ ورناھاں ھمے پیگام دنت کہ سکّیں بلائیں جنجالانی تہ ءَ ڈنگر چکّین کِشّک ءِ پشت کِنزگ ءُ سرجھل کنگ جاگہ ءَ ما سکرات ءِ پیم ءَ راستی ءِ ھاتر ءَ وتی زندگی ءِ پرواہ نہ داشت زندگی بے بائیں سوگات ءِ پہ آجوئیں راج ءَ بلے گُلامیں راج ءَ گرمیں شھماتے ھمے واست ءَ کہ گُلام ءَ ھچ ھبر نیست ھرچی کبزہ گیر ءُ زورگیر بہ لوٹ اِیت ھما رنگ ءَ گُلام ءَ کنگی اِنت ۔
زمین ءِ اِشک ءَ زمین زادگ ءِ سرپد ءُ پوہ بوت کُرت کنت ھما آشک کہ زمین ءِ اِشک ءَ جھان ءِ درستیں واھشتاں زور اِیت ءُ کبر کنت ۔
گُلاب ءِ پُلّ ءَ ما گوں آشکی نہ کُرت
کُتگ ما اِشک زمین ءَ ھاک ءَ بوسہ دات ۔
ھستیں وھد ءِ آشک ھر دوکّیں آشنان اَنت ما آ اھد ءَ تھنا کتابی کِسہ ونت ءُ گاجیل کُرتگ اَنت ھستیں وھد ءِ آشکانی داستان مئے دیم ءَ اَنت ریھان جان ءِ گودی سمیا بلوچ ءِ ھر دوک زمین ءِ شیدا سرمگیں ھاک ءَ گوں بندوکیں راج ءِ وارساں وتی زندمانی ھمُک واھگ کشت ءُ کَل کُرتاں گوں شورھاں بستاں نازُکیں بدن آسگواریں گرند پہ دژمن ءِ کبر ءِ کوچگ ءَ چَکّ ءُ پد نہ بوتاں ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
بلوچستان ءِ دمگ کیچ ءَ پاکستانی لشکریاں بیڑ بُرتگ ءُ یک مردمے بیگواہ کُتگ۔
سربیتگیں گالانی بلوچستان ءِ دمگ کیچ ءَ پاکستانی لشکریاں یک لوگے سرءَ بیڑ بُرتگ ءُ یک مردمے زورانسری آوار جنی ءَ پد ناشناسیں ھنداں بُرتگ۔
زورانسری بیگواھی ءِ آماچ بیتگیں مردمے پجار شکور ء نور جان ءِ ناماں چہ بیتگ کہ آ تمپ ءِ بازار پل آباد کسانو ءِ جھمنند اِنت۔
اھوالانی گُشگ اِنت کہ پاکستانی لشکریاں 25 جون ءِ شپ ءَ لوگے سرءَ بیڑ بُرتگ ءُ ھمے مردم دزگیر کنگ ءَ پد بیگواہ کُتگ، کہ چریشی ءَ پد آئی درگت ءَ ھچ پئیمیں اھوال نیست اَنت۔
بلوچستان ءِ دمگ کیچ ءَ گوستگیں شپءَ سلاہ بندیں مردماں یک اُرشے تہءَ پاکستانی لشکریانی بنجل نشانگ کُتگ، اُرش ءِ جانی تاوانانی ھال اِنت۔
اھوالکاراں ٹی بی پی ءَ گُشتگ کہ اے اُرش دوشی شپءَ زامران ءَ سادیم ءِ ھندءَ کنگ بیتگ کہ چہ آودہ ترندیں تیرگواری ءُ تراکانی توار اِش کنگ بیتگ اَنت۔
اھوالانی ردءَ لشکریانی جانی تاوان ءِ دیمپانی کنگ کپتگ۔ اُرش ءَ پد لشکریانی مزنیں کچے ھندءَ سربیتگ، البت داں انگت واکدارانی نیمگ ءَ اے بابت ءَ ھچ پئیمیں اھوال دیما نئیتکگ اَنت۔
ھمے ماہءَ زامران ءِ ھند لد ءَ سلاہ بندیں مردماں پاکستانی لشکریانی بنجل ءِ سرءَ اُرش کُتگ اَت اے اُرش ءَ پد پاکستانی پوج ءِ جارکش آئی ایس پی آر ءَ دو کارندھانی کُشگ بئیگ ءِ ھال راست کُتگ اَت۔
ھما اُرش ءِ ذمہ واری بلوچ لبریشن آرمی ءَ من اتگ اَت البت گوستگیں شپ ءَ بیتگیں اُرش ءِ ذمہ واری داں انگت ھچ گل ءَ نہ من اتگ۔
