TBP Balochi

اوگانستان ءِ تالبان سرکار ءَ زمین چنڈ ءَ سانمند بوتگیں مردمانی ھاتر ءَ پاکستان ءِ کمک ءِ منگ ءَ انکار کتگ – چریشی ءَ ھردو ھمساھگیں ڈیھانی جاورانی نگیگی گندگ بیت –

اوگانستان ءَ گوستگیں ھپتگ ءَ اتکگیں زمین چنڈ ءَ کم چہ کم دوھزار مردم بیران بوتگ انت ءُ بازیں میتگے سانمند بوتگ انت ءُ آئی ءَ پد چارشمبے ءِ روچ ءَ پدا زمین چنڈ بوتگ کہ چریشی ءَ گیشتر تاوان بوتگ انت –

پاکستان ءِ نگران سر وزیر ءَ ھما دمان ءَ کمک دیگ ءِ ھاتر ءَ ریسکیو ءُ ریلیف ٹیم دیم دیگ ءِ جار جتگ بلے کابل ءِ نیمگ ءَ انکار کنگ بوتگ ءُ کمکی مڈی تنی وھدی اوگانستان ءَ سر نہ بوتگ انت –

چوش کہ ھردو ڈیھانی واکدارانی نیمگ ءَ اے گپ تنی وھدی تچک کنگ نہ بوتگ بلے ھمے گوشگ بیت کہ ھردو ڈیھ یکے دومی ءَ گوں وش نہ انت ءُ نگیگں جاوراں تالبانی نیمگ ءَ کمکی مڈی زورگ ءَ انکار کنگ بوتگ –

سروزیر انورالحق کاکڑ ءَ ایکس ءَ پوسٹ داتگ کہ کمک ءِ نہ زورگے سوب؟

رسانکدری ھالانی رِد ءَ تالبانی برزی تبک ءِ واکداری ءَ وتی نام زاھر نہ کتگ ءُ گوشتگ کہ پاکستان ءِ سر وزیر انورالحق کاکڑ ءَ چاگردی ترامجاہ ایکس ءَ یک پوسٹ ءَ کمک ءِ انکار کنگ ءِ سوب –

اے جیڑہ راستی ءَ روکپتی اوگان ءِ سوبہ ہرات ءَ 6.3 زمین چنڈے پد بندات بوتگ – اسلام آباد ءَ زمین چنڈ ءَ پد جار جتگ کہ کہ آ سانمندیں مردمانی ھاتر ءَ زمستان ءِ ھاتر ءَ کارمرز بووکیں پنچ ھزار تمبو، پانزدہ ھزار کمبل، وردنی سامان، درمان ءُ ڈاکٹرانی یک ٹولی ءَ ھوار ٹرانسپورٹ بالگردے دیم دنت –

پاکستان ءِ نیشنل ڈیزاسٹر منیجمنٹ ءِ اتھارٹیءَ کمکی مڈی تیار کتگ انت ءُ سرجمین ھال سرکاری ویب سائٹ ءَ داتگ –

آئی ءِ لھتے اداراں پد کاکڑ ءَ چاگردی ترامجاہ ایکس ءَ ٹاہ داتگ کہ اے کمک اوگان سرکار ءِ گوشگ پد ءَ دیم دیگ بوگ ءَ انت –

بلے تالبانانی گوشگ انت ما ھچ چشیں لوٹ نہ کتگ آیانی گوشگ انت درملکی کمک ءِ ھاتر ءَ تنی وھدی تچکی لوٹ نہ کتگ –

رسانکدری ھالانی رِد ءَ تالبانی سرکار ءِ واکدارے ءِ گوشگ انت کہ چشیں ھچ وڈیں لوٹ کنگ نہ بوتگ ءُ مئے سرکار ءَ گوں مزاک کنگ بیت –

وھدیکہ پاکستانی کمک ءِ انکار کنگ ءِ سوب جست کنگ بوتگ گڈا تالبان اگدہ دارے گوشگ ات پاکستان ءِ سروزیر ءَ بے نپیں درشان ءِ داتگ آئی ءَ پاکستانی رھشون گوشتگ کہ اوگانستان ءِ درگت ءَ ھر وھد ءَ کہ درشان ءِ دیگی بیت گڈا پہ ھوش اکل –

دومی نیمگ ءَ یک پاکستانی کارمندے ءَ تالبان رھشون ءَ چہ جست گپتگ کہ پرچا اسلام اباد ءِ کمکی مڈی اوگانستان ءَ سر بوتگ نہ کنت؟

آئی ءَ گوشتگ کہ کابل ناں ھئو کنگ ءَ ناکہ اناں –

پاکستان ءُ اوگان ءِ نگیگیں جاور

پاکستان ءُ اوگانستان ءِ میان ءَ ھمے زوتاں جاور نگیگ بوتگ انت ـ پاکستان ءِ سرکار ءِ نیمگ ءَ 1.7 ملین اوگانیاں تاں یک نومبر ءَ ملک ءَ در کنگے مھلت ءَ جاور گیشتر نگیگ بوتگ انت –

تالبان رھشوناں اسلام آباد ءِ اے پیسلہ ءِ سر ءَ ترندی نگد کتگ ءُ ھمے گوشتگ کہ وتی پیسلہ ءِسر ءَ چمشانک ءِ بہ دنت اے ھم گوشتگ کہ چریشی ءَ ھر دو نیمگانی سیادی ءَ مزنیں تاوان ءِ رست کنت –

دومی نیمگ ءَ پاکستان ءِ گوشگ انت کہ گڈی رمس 1.4 ملین سرکاری رجسٹر بوتگیں باھوٹی ءُ ھشت لک ءَ گیش اوگانی پجار کارڈ ءِ واھندانی واست ءَ نہ انت کہ ملک ءِ تہ ءَ کانودی نشتگ انت –

بلوچ یکجھتی کمیٹی ءَ بیگواھیں سیاسی باسک راشد حسین زورانسری آوار جنی ءُ کھول ءِ نیمگ ءَ ماں شال ءَ بوؤکیں مراگش ءِ پلامرزی ءَ وتی شنگ کرتگیں درشانے ءِ تہ ءَ گوشتگ کہ راشد حسین مروچیگ ءَ چہ پنچ سال ساری ماں دبئی ءَ در کانودی آوار جنگ بوتگ ءُ پدا پاکستان ءِ دست ءَ دیگ بوتگ وھدیکہ پاکستان ءِ دست ءَ دیگ ءَ پد آئی ءِ ھچ ھال اھوال نیست – آئی ءِ کھول ھچ ءَ سرپد نہ انت کہ آ ھست ءُ سلامت انت یا ناں کہ وت یک کانودی ءِ بگیری دارگ انت – راشد حسین اے وھدی بندیگ ءُ بازیں ازیت ءِ سگگ انت ءُ ریاستی ادارہ آئی زاھر کنگ ءَ نہ انت ءُ درکانودی آ بیگواہ کنگ بوتگ –

جارکش ءَ گوشتگ کہ راشد حسین ءِ زورانسری آوار جنی ءَ نوں کساس پنچ سال سرجم بوتگ انت – اے میان ءَ آئی ءِ کھول ھاسکر آئی ءِ مات ءَ بلوچستان ءَ ھوار سرجمیں پاکستان ءِ تہ ءَ وتی زھرشانی نبشتہ کنائینتگ انت – بلے بژنی گپ ھمیش انت کہ زورانسری آوار جنی ءَ پد ھنگت زاھر کنگ بوگ ءَ نہ انت – زھرشانی ءَ نندانکاں ھوار کھول ءَ آئی ءِ یل کنائینگے ھاتر ءَ درسیں راہ کارمرز کتگ انت، آمیدگس ءِ دروازگ ٹُک اِتگ انت، برزی تبک ءِ واکداراں وتی پریات سرکتگ بلے اے درسیں کانودی راھانی کارمرزی ءَ پد ھم یک بیگناھے مردمے بندیگ انت کہ بلوچستان ءَ انسانی ھکانی لگتمالی ءَ پدر کنت – بیگواھیں مردمانی کھول مدامی ھمے گپ ءَ جنگ ءَ انت کہ آیانی دوستگیں مردم اگاں درکانودی کارے کتگ گڈا آمیدگس ءَ آرگ ءُ سزا دیگ بہ بنت بلے بدبھتی ءَ ریاست زورانسری آوار جنی ءَ وتی سلاہ ءِ کارمرز کنگ ءُ بلوچستان ءَ ھلوچ کنگ ءِ پالیسی ءِ سر ءَ روان انت –

بی وائی سی ءَ وتی درشان ءِ گڈسر ءَ بلوچ راج ءَ گوں لوٹ کتگ کہ ماں شال ءَ بوؤکیں مراگش ءَ بھر بہ زور انت – بیگواھیں راشد حسین ءِ زورانسری آوار جنی ءِ بگیری ءَ آئی ءِ کھول ءِ نیمگ ءَ ھمے ماہ ءِ پانزدہ اکتوبر ءَ ماں شال ءَ پریس کلب ءِ دیم ءَ مراگش ءِ برجم دارگ بوگ ءَ انت کہ اودا راشد حسین زورانسری آوار جنی ءَ ھوار بلوچستان ءَ انسانی ھکانی لگتمالی ءِ بگیری ءَ ھر تک ءُ پھناتاں سیادی داروکیں مردم وتی ھیالانی درشانی ءَ کن انت – درسیں انسان دوست ھاسکر بلوچ راج ءَ گوں دزبندی انت کہ آ بیگواھیں راشد حسین ءِ کھول ءِ جھد ءَ گوں ھمراھداری بہ کن انت ءُ آیانی توار جوڈ بہ بنت –

سربوتگیں ھالانی رِد ءَ بلوچستان ءِ دمگ آواران ءَ ناشناسیں مردماں پاکستانی پوج ءِ کاروان ءِ راہ ءِ سر ءَ تراکناکیں شورہ کل کُتگ ءُ یک گاڑی ءِ نشانگ کتگ –

پوج آواران ءِ دمگ کولواہ کنیچی ءُ ہوٹان ءِ میانی دمگ ءَ نشانگ کنگ بوتگ –

اھوالکار ءِ رِد ءَ بمب اُرش ءَ یک گاڑی ءَ سک باز تاوان رستگ ءُ آئی ءَ سواریں درسیں کارمند مُرتگ ءُ زدگ بوتگ انت –

تنی وھدی سرکاری واکدارانی نیمگ ءَ اے اُرش ءِ درگت ءَ ھچ گوشگ نہ بوتگ – زانگ بہ بیت آواران ءَ ھوار بلوچستان ءِ ایندگہ ھند ءُ دمگاں پاکستانی پوج ءِ سر ءَ بوتگیں اُرشاں گیشتر بلوچ آجوئی لوٹوکیں سلاہ بندیں گل من انت بلے تنی وھدی اے اُرش ءِ زمہ واری ھچ گل ءَ نہ منّ اِتگ –

پانزدہ روچ ءَ پیسر راجن پور ءِ ٹرائیبل دمگ تمن گورشانی ءَ پاکستانی پوج ءَ مردماں زورانسری یک جاھے ءَ مُچ کتگ ءُ گْوشتگ اَنت کہ دمگ ماڑی ، موضع گروزان ، دراژتھل موضع چمبھڑی ، موضع لوٹ لٹ شم ، کھلچاس ءُ ریکانی گھور ءِ ھند ءِ سرجمیں دمگ ھالیگ کنگ بہ بنت ءُ مردم اے دمگاں یل بکن اَنت پرچاکہ پاکستان پوج یک میزائل تجربہ کنت-

اے دمگانی مردم دمگ ءَ لڑ ءَ بار کنگ ءَ نہ منّگ اَنت ما وتی بُنکی دمگاں یل کنگ ءِ ھاتر ءَ ساڑی نہ ئے پرچاکہ مارا تُرس اِنت کہ دمگ ءِ یل کنگ ءَ پد مارا دوبر اے دمگاں روگ ءَ نیل اَنت-

دمگ یل کنگ ءِ نہ منّگ ءَ پاکستان پوج ءِ کارندہ آیاں بیھار دیگ ءَ اَنت کہ اگاں پانزدہ روچانی تہ ءَ دمگ ھالیگ کنگ نہ بیت گُڑا دمگی مردم وتی جانی مالی تاوانانی زمہ وار وت بنت-

دمگی مردمانی گْوشگ اِنت کہ آ اے سارتی ءَ وتی لوگاں یل کن اَنت مال دلوتاں کجا بہ بر اَنت؟ اے دمگاں سارتی پیسر ءَ بندات بیت ءُ اگاں پڑے دمگاں لڑ ءُ بار ھم بکن ایں گُڑا اینچوکیں مزنیں میتگانی واستا دلسیاھی گیش بنت-

زانگ بہ بیت راجن پور ءِ تمن گورشانی ءَ دو ھزار ھژدہ ءَ ھم بارغ پھواد ، مرنج ، گزبوڑ ، دراگل ماڑی ، کلیری تھل ، ساؤڑی گھور ءُ جوپھ پھواد ءَ ھم میزائل تجربہ کنگ بیتگ چریشی ءِ اود ءِ لَس مھلوک تُرندیں مالی تاوان چست کنگ کپتگ-

تمن گوشانی ءَ میزائل تجربہ ءَ پد مزنیں کچے ءَ وبائی نادُراھی تُرندی ءَ شنگ ءُ تالان بوان اِنت ءُ اے دمگاں الاج ءِ ھاتر ءَ آسراتی نہ بیگ ءِ سبب ءَ دمگ مردم گیشتر دلسیاھی ءِ دیمپان اَنت-

دمگی مردمانی گْوشگ اِنت کہ مروچی پاکستان پوج ءِ داتگیں پانزدہ روچ سرجم بنت ءُ سک دلسیاھیں کہ اگاں آیاں چہ میتگ ءَ چہ لڑ ءُ بار کنائین اَنت گُڑا آ سک دلسیاھی ءِ دیمپان بنت-

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءَ گوشتگ کہ بلوچ لبریشن آرمی ءِ گچینی ونگ اسپیشل ٹیکٹیکل آپریشنز اسکواڈ (ایس ٹی او ایس) ءَ یک چیریں بیڑے ءَ زورگریں پاکستانی پوج ءِ یک سوبیدارے ءَ ھوار دو کارندہ دزگیر کتگ اَنت-

جارکش ءَ گوشتگ کہ بی ایل اے ءِ سرمچاراں چار شمبے ءِ روچ ءَ بولان ءِ ھند مارگٹ ءِ مزن شھدگ ءَ راہ بستگ ءُ بس ءَ سپر کنوکیں پاکستانی پوج ءِ سوبیدار مھمد خان ءُ سپاھی عبدالرشید پجار کنگ ءَ پد دزگیر کتگ اَنت-

جیئند بلوچ ءَ گوشتگ کہ اے بیڑ بلوچ لبریشن آرمی ءِ اسپیشل ٹیکٹیکل آپریشنز اسکواڈ (ایس ٹی او ایس) ءَ بی ایل اے ءِ انٹیلجنس ونگ ءَ سرکرتگیں چیریں اھوالانی تہ ءَ کتگ-

آئی ءَ دیمتر ءَ گوشتگ کہ پٹ ءُ پول ءِ وھد ءَ ھردوکیں کارمنداں من اتگ کہ ھردوک پاکستانی پوج ءِ کارمند انت ءُ موکلاں پد واتر آیگ ءَ اَنت ءُ اے دزگیر کتگ اَنت-

آئی ءَ گوشتگ دزگیر کتگیں سوبیدار مھمد خان ء فیض مھمد جھمنند نزام آباد تونسہ شریف ءُ ڈیرہ گازی خان گوشتگ ءُ جست ءُ پرس ءِ وھد ءَ آئی ءَ 1981 ءَ پاکستانی پوج ءِ فرنٹیئر کور سبی اسکاوٹس ءَ بھر زرتگ- نوزدہ سال ءَ پوج ءَ ھوار بیگ ءَ سبی،ھرنائی ءُ ھاران ءَ رائفلز 89 ونگ ءَ ماشکیل ءَ بستار ءِ سوبیدارے ءَ بیتگ-

آئی ءَ دیمتر ءَ گوشتگ مھمد خان ءَ گیش مب اتگ کہ آئی ءَ جتاجتائیں پوسٹنگزاں پد اے وھد ءَ آ زوگریں پوج ءِ گیس فیلڈ سیکورٹی ءَ سوبیداف زرگون گیس فیلڈ ءَ داروک اِنت –

آئی ءَ گوشتگ کہ دزگیر کتگیں دومی کارندہ عبدالرشید ء میوہ فقیر جھمنند ہغلہ تونسہ شریف ڈیرہ گازی خان ءَ جست ءُ پرس ءِ وھد ءَ من اتگ کہ آ زورگریں پوج فرنٹیئر کور سبی اسکاوٹس ءَ دارگ بیتگ – آئی ءَ من اتگ کہ زرگون گیس فیلڈ ءَ زورگریں پوج ءِ ظفر پوسٹ ،حبیب پوسٹ، ڈبل فور، توقیر پوسٹ ءَ دارگ بیتگ –

آئی ءِ گوشگ ات کپ عبدالرشید ءَ اے من اتگ آ سوبیدار مھمد خان ءِ ھمراھی ءَ بستار ءِ سیکورٹی ءَ دارگ بیتگ ءُ آ دزگیر کتگ-

جارکش جیئند بلوچ ءَ گوشتگ کہ بلوچ لبریشن آرمی دزگیر کرتگیں کارمنداِ گیشیں جست ءُ پرس کنگ ءَ اِنت آ بلوچ راجی آمیدگس ءَ پیش کنگ بنت ءُ آیانی بارو ءَ گڈی پیسلہ کنگ بیت اِنت-

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ کیچ ءِ ھند تُمپ ءُ بھمن تُربت ءَ سرمچاراں پاکستانی ریاست ءِ سیتانی سر ءَ دو جتائیں اُرشاں پاکستانی لشکر ءُ زورگر ءِ بندساچی چِست ءُ ایر نشانگ کُرتگ اَنت۔

جارکش ءَ گوشتگ تمپ ءَ کلات ءِ سر ءَ پاکستانی لشکر نشانگ کُرتگ ءُ بھمن تربت ءَ یک ھوار دگے ( لنک روڈ) ءَ کار کنگ ءَ بیتگیں بندساچی شرکت ءِ مشین ءُ سامان مانداشتگ اَنت۔دومی اُرش پاکستانی ریاست ءِ لُٹ ءُ پُل ءُ سیاسی شوربندیانی بےسوب کنگ ءَ بیتگ کہ پاکستان بندساچی چِست ءُ ایرانی نام ءَ بلوچستان ءَ وتی زورگری شوربندیاں آسر کنگ لوٹ ایت۔

آئی ءَ گوشتگ چار شمبے ءُ پنچ شمبے ءِ میانی شپ ءِ ھشت ءَ سرمچاراں تمپ ءَ کلات ءِ سر ءَ برجاھیں پاکستانی لشکر ءِ پانگس گوں راکٹاں نشانگ کُرتگ۔ چہ نزیک ءَ نشانگ کنگ بیتگیں راکٹ پاکستانی لشکر ءِ پانگس ءِ سر ءَ کپتگ اَنت کہ چہ ایشی ءَ زرگریں پاکستانی لشکر ءَ جانی ءُ مالی تاوان بیتگ۔اے اُرش پہ دُژمن ءَ یک بیھارے کہ آ بلوچستان ءَ پہ دلجمی وپت نہ کنت۔مئے چم آئی ءِ ھمک سُر ءُ پُرانی سر ءَ سَک اَنت،ھمک کارمند ءُ ھمک پانگس ءِ سر ءَ ما کجام وھد ءَ بہ لوٹ ایں نشانگ کُرت کن ایں۔

میجر گوھرام بلوچ ءَ گوشتگ بی ایل ایف ءِ دگہ ٹولی یے ءَ کہ آیاں پاکستانی لشکر ءِ بندساچی چِست ءُ ایرانی گِر ءُ دار کنگ ءِ زمہ واری دیگ بیتگ، چار شمبے ءُ پنچ شمبے ءِ میانی شپ ءِ ھپت ءُ نیم ءَ بھمن تُربت ءَ پاکستانی لشکر ءِ بندساچی شرکت ایپ ڈبلیو او ءِ یک شوربندی یے ءِ بگیری ءَ کار کُرتگ ءُ ایپ ڈبلیو او ءِ شریداریں ٹیکدار ءِ بندساچی مشین ءُ سامان مانداشتگ اَنت۔ اے مشین ءُ سامان بھمن ءُ ڈی بلوچ ءِ میان ءَ ھوار دگ (لنک روڈ) ءِ جوڑ کنگ ءَ کارمرز کنگ ءَ بیتگ اَنت۔

آئی ءَ گوشتگ بلوچستان ءَ پاکستانی لشکر دیمروئی ءِ نام ءَ چہ اے شوربندیاں سیاسی سیت زورگ لوٹ ایت۔ ھندی ڈیکہ داراں گوں تُرندی ءَ کڈن کن ایں کہ آ پہ زر ءِ لَب ءَ اے شوربندیانی بھر جوڑ مہ بنت اگاں نہ گڑا چو مدامی ئیں وڑ ءَ مالی تاوانانی دیمپان بنت۔ بلوچ راج ءَ اے گپ یات دارگ لوٹ ایت کہ زورگِر ایردستانی دیمروئی دیگ ءَ آیانی ڈیھ ءَ دستیگ نہ کنت۔ ما چہ راجی وتواکی، وتواجھی ءُ چہ آجوئی ءَ زبھر کنگ بیتگیں ءُ نوں دگ جوڑ کنگ ءُ پیشدارگ لوٹ اَنت کہ آ بلوچ ءِ ھمدرد اَنت، بلے آیانی واھگ پہ لشکرکشیاں راھانی جوڑ کنگ ءُ مئے آبادی سانمند کنگی اَنت۔

آئی ءَ گوشتگ گوں پاکستان ءِ گچینکاریانی نزیک بیگ ءَ اے وڑیں کار تیز کنگ بیتگ اَنت داں مردم ریپینگ ءُ گوں وت کنگ بہ بنت۔بلوچستان ءَ دیمروئی جان دُراھی ءُ زانشتی بھرگ ءَ گندگ نہ بیت، ایوک ءَ زانشتی تک ءَ ھچ دلگوش دیگ بیگ ءَ نہ اِنت کہ راجانی دیمروئی ءِ کلیت اِنت۔ بلے دگانی جوڑ کنگ ءِ سر ءَ زور دیگ بیگ ءَ اِنت داں کہ بلوچ ءِ مڈیانی دستیگ کنگ آسان بہ بیت۔ انچوش کہ انگریزاں ریل ءُ ٹیلی گراپ ءِ دام چیر کُرتگ ءُ وتی ھیلہ ءُ سیاسی سیت سرجم کُرتگ اَنت۔ھمے وڑ ءَ پاکستان ھم چین ءِ کمک ءَ بلوچستان ءَ موبائل ٹاور ءُ دگانی جوڑ کنگ ءَ زور دیگ ءَ اِنت۔سیت ھما اَنت کہ زورگریں انگریز ءِ بیتگ اَنت۔ ھژدری اِنت کہ مردم اے شوربندیانی گْواچنی چھرگاں سرپد بہ بنت کہ پہ بلوچ راجی ھستی ءَ تُرسناک اَنت۔

میجر گوھرام بلوچ ءَ گوشتگ بلوچستان لبریشن پرفٹ اے اُرشانی زمہ واری ءَ منّ ایت۔ داں زورگریں پاکستان چہ بلوچستان ءَ در نئیت،اے اُرش دیمتر ءَ گوں تُرندی ءَ برجاہ بنت۔

اسرائیل ءَ غزہ ءَ وتی لشکر ءِ مانرچگ ءِ ھاتر ءَ پیسر ءَ اود ءَ جھمنندین مردماناں گوشتگ کہ آ آیوکیں بیست ءُ چار ادارانی توک ءَ زرباری دمگ ءَ بہ رو اَنت-

ھال سرکنوکیں ادارہ روئٹرز ءِ رد ءَ میان اُستمان ءِ جارکش سٹیفانے دوجارک ءَ وتی درشان ءَ گوشتگ اسرائیل ءِ لشکر ءَ میان اُستمانی ادارہ ءَ آدینگ ءِ سھب ءَ ھال سر کتگ غزہ ءِ گوریچانی دمگ ءَ نندوکیں یازدہ لک مردماں زربار ءِ نیمگ ءَ روگ ءِ مھلت داتگ-

روئٹرز ءِ رد ءَ اسرائیل ءِ لشکر ءَ اے بیھار ءِ بارو ءَ دگہ گہ دیم ءَ نیاؤرتگ اَنت- اسرائیل ءَ غزہ ءِ سیمسراں وتی ٹینکانی آرگ بندات کتگ ءُ ھمے داب ءَ جیٹ جھازانی گون ءَ بمبگواریں برجاہ اِنت-

گوستگیں شمبے ءِ روچ ءَ فلسطین ءِ سلاہ بندیں ٹولی حماس ءِ نیمگ ءَ اسرائیل ءِ سر ءَ ھزارانی ھساب ءَ راکٹ گواری ءَ پد غزہ ءِ سر ءَ بمبگواری ءَ پنچ سد زھگاں ھوار پانزدہ سد ءَ گیش مردم مرتگ اَنت-

میان اُستمان ءِ جارکش ءِ رد ءَ میان اُستمانی ادارہ بازین کچے ءَ شھریاں دومی جاہ ءَ برگ انسانی ھلاسی ءَ پدر کنگ ءَ اِنت-

درشان ءَ گوشگ بیتگ کہ میان اُستمان اے دابیں ھکماں واتر زؤرگ ءِ دزبندی ءَ کنت اِنت کہ چہ پیسر ءَ برجاھیں تباھی ءِ دارگ ءِ جاور ودی بیت کن اَنت-

جارکش ءِ رد ءَ اسرائیل ءِ لشکر ءِ ھکم میان اُستمان ءِ دراھیں اسٹاف ءُ آئی ءِ چیردستی ءَ شیلٹرز،وانگجاہ، جانسلامتی جاہ ءُ کلینکس ھم لاگو کنگ بیتگ اَنت-

روئٹرز ءَ میان اُستمان ءِ نیویارک مشن ءَ اے ھکم ءِ پٹ ءُ پولکاری ءِ سر ءَ رھوت کتگ بلے سرجمی ءَ.پسو نہ رس اتگ-

ھماس ءِ نیمگ ءَ اسرائیل ءِ سر ءَ اُرش ءَ گوستگیں ھپتگ ءَ چہ داں انیگ ءَ یک ھزار ءُ سَے مردم بیران بیتگ اَنت کہ اے ڈیھ ءِ واستا راجدپتری بیرانی ءِ مستریں اُرش اِنت-

غزہ ءِ آبادی بیست ءُ سَے لک اِنت کہ اود ءَ اسرائیل ءِ اُرشاں بازیں کچے ءَ تباھی ود اتگ اَنت-

روکپتی بلوچستان ءَ جتاجتائیں جاھاں تیل کشیں پنچ مردم بیران بیتگ اَنت ءُ یکے زدگ بیتگ-

گیشیں اھوالانی رد ءَ روکپتی بلوچستان ءِ دمگ راسک ءَ دگ ءِ وئیلے ءَ تیل کشیں سَے مردم بیران بیتگ اَنت-

اھوالانی رد ءَ تیل کشانی گاڑی وئیل ءِ آماچ بوگ ءَ پد گاڑی ستکگ اَنت ءُ چریشی ءَ سَے مردم ستکگ ءُ بیران بیتگ اَنت-

وئیل ءَ بیران بیتگیں مردمانی پجار زانگ نہ بیتگ اَنت وئیل راسک ءَ ھواریں ھند پیشن ءَ پیش اتکگ کہ اود ءَ گاڑی ءِ وئیل ءِ آماچ بوگ ءَ سَے مردم مرگ ءِ ارجان بیتگ اَنت-

ھمے وڑ ءَ روکپتی بلوچستان ءِ بنُپور ءَ یک وئیلے ءَ یک مردمے بیران بیتگ –

بیران بیتگیں مردم ءِ پجار عیسی بامری ء داد مھمد جھمنند زھکلوت بلوچستان ءِ نام ءَ زانگ بیتگ-

ھمے وڑ ءَ سراوان ءُ ھاش ءَ ھم یک مردمے وئیل ءِ آماچ بوگ ءَ پد بیران بیتگ-

بیران بیتگیں مردم ءِ پجار عبدالباسد ء شیمرود جھمنند زاھدان ءِ نام ءَ زانگ بیتگ-

اھوالانی رد ءَ عبدالباسد ءِ گاڑی یک تیل کشیں گاڑی ءَ گوں ٹکرے وارتگ ءُ چریشی ءَ عبدالباسد بیران بیتگ-

ھمے وڑ ءَ روکپتی بلوچستان ءِ دمگ ریگان ءَ تیل کشیں گاڑی ءَ گوں یک گاڑی ءَ ٹکر جتگ ءُ اود ءَ یک مردمے زدگ بیتگ –

زدگ بیتگیں مردم ءِ پجار نہ بیتگ ءُ وئیل ءَ پد زدگ بیتگیں مردم نادراہ جاہ ءَ برگ بیتگ-

زانگ بہ بیت روکپتی بلوچستان ءَ ھمک روچ تیل کشیں گاڑی وئیل ءِ آماچ بوان اَنت چریشی ءَ چہ مردمانی جان ءُ ساہ زوال بوگ ءَ اَنت-

سربوتگیں ھالانی رِد ءَ کیچ ءِ دمگ بلیدہ ءُ تمپ ءَ پاکستانی پوج ءَ زوراکی کنان ءَ سَے مردم آوار جتگ ءُ بیگواہ کتگ انت –

گیشیں ھالانی رِد ءَ مروچی سھب ءَ پاکستانی پوج ءَ بلیدہ ءِ دمگ میناز بیڑ برتگ ءُ چُک ءُ زالبول لٹ کٹ کتگ انت دو ورنا زورانسری آوار جتگ ءُ بیگواہ کتگ انت –

اھوالکار ءِ رِد ءَ پوج ءَ سھبی بانگواہ ءَ ادار چار ءَ میناز محمد ءِ میتگ ءَ پیر بخش ءِ گِس ءَ بیڑ برتگ زوراکی کنان ءَ آئی ورنائیں زھگ نسرم ء پیربخش ءُ پزیر ءِ غنی آوار جتگ ءُ بیگواہ کتگ انت –

اھوالکار ءِ رد ءَ پیڑ ءِ میان ءَ پوج ءَ گِس ءَ ساڑی ایں زھگ ءُ زالبول لٹ کُٹ کتگ انت ھردو ورنا آوار جتگ ءُ بیگواہ کتگ انت –

دومی نیمگ ءَ کیچ ءِ دمگ تمپ گومازی ءَ مروچی پدا پاکستانی پوج ءُ چیریں ادارھانی کارمنداں دکانے ءَ بیڑ بُرتگ ءُ ورنایے آوار جتگ –

اھوالکار ءِ رِد ءَ پاکستانی پوج ءُ چیریں ادارھانی کارمنداں مروچی مگرب ءِ وھد ءَ گومازی ءَ دکانے ءَ بیڑ برتگ ءُ غفار ء صادق زورانسری آوار جتگ ءُ گوں وت برتگ –

اھوالکار ءِ رِد ءَ اے کھول ءِ یک ورنایے گوستگیں روچ ءَ ھم آوار جنگ ءُ بیگواہ کنگ بوتگ کہ آئی ءِ پجار چاکر ء اختر عمر ءِ نام ءَ چہ بوتگ کہ ھنگت بیگواہ انت –

زانگ بہ بیت بلوچستان ءِ جتا جتائیں ھند ءُ دمگان پاکستانی پوج ءِ لشکر کشیانی درچ یکشل ءَ برجاہ انت – ھچ چشیں ھند ءُ دمگ ءِ نیست لشکر کشیاں سانمند نہ انت ـ گوستگیں دو روچانی میان ءَ بلوچستان ءَ شش مردم آوار جنگ ءُ بیگواہ کنگ بوتگ انت ـ وھدیکہ شال مارگٹ ءُ زرغون ءَ پوج ءِ لشکر کشی ءُ بالگردانی شیلنگ ھم ھال انت –

شال ءُ بولان ءِ ھند ءُ دمگاں پاکستانی پوج ءِ نیمگ ءَ لشکر کشی کنگ بوگ ءَ انت، اے لشکر کشی ءَ جنگی ءُ دگہ بالگرد ھم بھر زورگ ءَ انت –

ھالانی رِد ءَ پاکستانی پوج ءَ مروچی بنجاھی شھر شال ءِ نزیکیں دمگ زرغون ءُ مارگٹ ءَ ھوار بولان ءِ جتا جتائیں ھند ءُ دمگاں لشکر کشی بندات کتگ –

دمگی اھوالکارانی رِد ءَ لشکر کشی ءَ پوجی بالگرداِ بھر زرتگ وھدیکہ بازیں جاھاں شیلنگ کنگ ءَ گندگ بوتگ انت – پوج ءَ بازیں راھے در ءِ بستگ –

دمگ ءِ انگر بوگ ءِ سوب ءَ جانی تاوان ءِ تنی وھدی ھچ ھال اھوال نیست –

زانگ بہ بیت گوستگیں شپ ءَ سلاہ بندیں مردماں مزنیں کچے ءَ بولان ءِ دمگ مارگٹ ءَ دگ بستگ ءُ گاڑی پٹ پول کتگ انت ـ سلاہ بندیں مردماں پٹ پول ءِ میان ءَ یک نان کمیشنڈ اپسرے گوں دگہ ھمراھے ءَ دزگیر کتگ ءُ گوں وت برتگ –

زانگ بہ بیت مارگٹ ءِ کش ءُ گوری ھند ءُ دمگاں چدوپیسر پاکستانی پوج ءِ سر ءَ بلوچ آجوئی لوٹوکیں سلاہ بندیں گل بی ایل اے ءَ اُرش کتگ بوتگ –

سَے روچ ساری مارگٹ ءِ نزیک ءَ پی ایم ڈی سی پروجکٹ ءِ منیجر بمب اُرشے ءِ نشانگ کنگ بوتگ ات کہ ھما دمان ءَ مرتگ ات ءُ آئی ءِ ھمراہ زدگ بوتگ ات –

پی ڈی ایم سی ءِ سر ءَ بوتگیں اُرش ءِ زمہ واری بی ایل اے ءَ منّ اِتگ ات –