TBP Balochi

بیگواھیں مردمانی پانکجنیں گل وائس فار بلوچ مسنگ پرسنز ءِ ماں شال پریس کلب ءِ دیم زھرشانی برجاہ، زھرشانی بنجل ءَ مروچی پنچ ھزار ءُ نود ءُ چار روچ سرجم بوتگ انت، مروچی بار کونسل ءِ سیکریٹری چنگیز، حئی بلوچ، محمد امین مگسی ایڈوکیٹ ءَ ھوار دگہ مردماں بنجل ءَ اتکگ ءُ دلپدردی درشان اِتگ –

وی بی ایم پی ءِ کمک سرکماش ماما قدیر بلوچ ءَ گوشتگ کہ زورگپتیں بلوچستان ءِ تہ ءَ درسیں ادارہ، پوج ءُ چیریں ادارھانی دیم ءَ بے وس انت، آ پارلمنٹ بیت شر یاکہ آمیدگس، رسانکدر، واکدار یا ایندگہ ادارہ – اے زورگیر ءِ بُت ءِ بھر انت ءُ آئی سھارگ دیگ ءَ راج دژمنی ءَ چک ءُ پد نہ بنت چریشی ءَ اے جاوراں بلوچانی ژانگولیں جون ءُ آیانی شھیدی ءِ وئیل دیم ءَ کائنت –

آئی ءَ گوشتگ بلوچ جنین ءُ مردین زورانسری آوار جنگ ءُ زنداناں بندیگ کنگ بوگ ءَ انت ءُ آیاں ازیت دیگ بوگ ءَ انت کسانیں زھگ تیرآماچ کنگ بوگ ءَ انت – زانتکار ءُ سیاسی باسک تیر آماچ کنگ بوگ ءَ انت – زالبولانی کم شرپی ءُ بلوچ ءِ ننگ ءُ ناموس ءِ لگتمالی ھمک روچ برجاہ انت – بلوچ ءِ شرپ داریں زالبول ریاستی درندگی ءِ آماچ انت – یکجاھیں کبر ھم در آیگ ءَ انت –

ماما ءِ گوشگ ات کہ اے دابیں بلاھیں وئیل بوتگ انت کہ چار ماتانی تاسُکیں بچ ریاستی پوج ءِ ماٹر گولہ آنی زد ءَ اتگ انت سرجمیں ھند ءِ ننگ ءُ ناموس لگتمال کنگ بوتگ انت – آیا اے زوراکی نہ انت، آیا اے اسلامی کانودانی رِد ءَ انت – آیا بلوچانی جان ءِ ھچ ارزشت نیست؟ آیا اشاں اے کارانی کنگ ءِ ھک اسلام ءَ داتگ؟ زاناں بلوچ زالبول مسلمان نہ انت کہ آ کشندہ ٹولی ءُ چیریں ادارھانی گوشگ ءِ پد ءَ کم شرپ کنگ بوگ ءَ انت؟

ماما قدیر بلوچ ءَ گوشتگ کہ اے ھنچیں چالباز انت کہ لس مردم رد کپ انت بلے نوں آیانی ڈال نہ گرد انت نوں راج ءِ تہ ءَ سبچ اتکگ – اے دلاراں زندگ بوگ ءِ ھچ ھک نیست کہ ایمنی لوٹوکیں گسانی نشاندھی ءَ کن انت ءُ زورانسری آوارجنی ءَ آیانی ھمراہ بنت یا ایمنی لوٹوکانی ھالاں آیاں سر کن انت ءُ اودے سرجمیں نقشہ ءَ آیاں دئینت –

بلوچستان ءِ دگانی سر ءَ یک ماھے ءِ میان ءَ سَے سد ءُ سِی ءُ نُھ وئیل بوتگ انت چہ اے وئیلاں بیست ءُ ھپت مردم بیران ءُ یک ھزار ءُ نود ءُ پنچ زدگ بوتگ انت –

درساں چہ گیش این 25 وندر ءُ لسبیلہ ءَ اے وئیل بوتگ انت – میڈیکل ایمرجنسی رسپانس سنٹر 1122مرک ءِ نیمگ ءَ جون ءِ ماھے درسیں وئیلانی کچ ءُ کساس شنگ کنگ بوتگ –

رپورٹ ءِ رِد ءَ وندر لسبیلہ ءِ ھند ءَ یکسد ءُ ھپت دگ ءِ وئیل بوتگ انت چریشی ءِ سوب ءَ یکسد ءُ بیست ءُ چار مردم زدگ بوتگ انت کہ میڈیکل ایمرجنسی رسپانس سنٹر 1122 وندر ءُ ٹیارہ سینٹر ءِ جانسلامتی ٹولیاں وت ءَ وئیل جاہ ءَ سر کتگ ءُ درمان کتگ انت –

شنگ کنگ بوتگیں رپورٹ ءِ رِد ءَ بلوچستان ءِ مستریں شھدگ این 25 لکپاس، مستونگ، کلات، باغبانہ ھزدار، درکالہ ھزدار، کوراڑو ھزدار ٹیارو، لسبیلہ وندر، لسبیلہ سرنان، پشین، چمن، چمن این 50 زیارت کراس، پشین۔ نسائی، قلعہ سیف اللہ۔ شنکئ، قلعہ سیف اللہ۔ بدین زئی، ژوب۔ مانیخو، شیرانی۔ این 85 گدر، سوراب۔ این 65 گوکورٹ، کچھی۔ بختیار آباد، سبی۔ کیٹل فارم، جعفر آباد۔ اور این 70 مختار، لورالائی ھوار انت –

روکپتی بلوچستان ءِ دو جتا جتائیں جاھاں ایرانی لشکر ءَ سَے آوار جنگ ءَ پد بیگواہ کرتگ اَنت-

گیشیں اھوالانی رد ءَ دو روچ پیش روکپتی بلوچستان ءِ بنجاھی شھر زاھدان ءَ دو ورنا آوار جنگ ءَ پد بیگواہ کرتگ اَنت-

آوار جنگ بیتگیں مردمانی پجار بیست ءُ سالیگیں غفور ریکی ءُ بیست ءُ یک سالیگیں بلال ریکی ءِ ناماں زانگ بیتگ اَنت کہ ھردوک زاھدان ءِ جھمنند گوشگ بوگ ءَ اَنت –

اھوالانی رد ءَ غفور ءُ بلال سیکورٹی لشکر ءَ ابید جرم ءَ بلوار کشاورز زاھدان ءَ دزگیر کتگ ءُ برتگ انت ءُ آیانی کھولاں ھم دیستگ اَنت ءُ ایشاں ابید ھم آیانی درگت ءَ سیکورٹی پورس ءَ وت ءَ بے دلگوش کتگ –

ھمے وڑ ءَ سرباز ءَ ھم یک مردمے آوار جنگ ءَ پد بیگواہ کرتگ –

بیگواہ کنگ بیتگیں مردم ءِ ہجار داد مھمد ایراندوست ء اسماعیل جھمنند نوت سرباز ءِ نندوک گوشگ بوگ ءَ اِنت-

زانگ بہ بیت روکپتی بلوچستان ءَ زھرشانیانی پژدر ءَ زاھدان ءِ نامی ءُ سنی گل ءِ سروک مولوی عبدالحمید ءِ کوشکاری ءِ چن ءُ لانچ ءُ مردمانی بیگواھیانی تہ ءَ گیشی گندگ ءَ ایگ اِنت –

بلوچستان ءِ بنجاھی شھر شال ءِ کوچگی ھند ءَ سلاہ بندیں مردماں پاکستان ءِ استان پنجاب ءِ جھمنندیں مردمے آوار جتگ ءُ بیگواہ کتگ-

ٹی بی پی ءِ اھوالکار ءِ رد ءَ شال ءَ بیتگیں وئیل گوستگیں بیگاہ ءِ وھد ءَ شال ءِ کوچگی ھند زرغون شابان ءَ پکنک ءِ کنگ ءَ پنجاب جھمنندیں یک مردمے آوار جتگ ءُ گون وت برتگ-

آوار جنگ بیتگیں مردم پنجاب ءِ ھند ملتان ءِ جھمنند گوشگ بوگ ءَ اِنت ءُ آئی ءِ نام ءِ درگت ءَ گیشی اھوال آیگ ءِ ودار اِنت-

چم دیستگیں مردماں ٹی بی پی ءَ گوں گپ کنان ءَ گوشتگ کہ سلاہ بندین مردمانی بازیں کچے ناگتی اے جاہ ءَ سر بیتگ اَنت ءُ جاہ اش انگیر کتگ- چم دیستگیں مردمانی رد ءَ سلاہ بندیں مردماں درستیں مردم یک یک کتگ انت ءُ پد ءَ یک مردمے گون وت برتگ ات-

واکدارانی نیمگ ءَ اے درگت ءَ دگہ وئیل دیم ءَ نیتکگ اَنت-

زانگ بہ بیت لھتے روچانی توک ءَ پنجاب ءِ جھمنندیں دومی مردم اِنت بیگواہ بوگ ءَ اِنت ایشی ءَ پیش زیارت ءِ ھند منگی ڈیم ءَ رھیم یار ھان ءِ جھمنندین سعید سلاہ بندیں مردماں آوار جتگ ءُ برتگ ات-

آ گپتگیں مردم ءِ گرگ ءِ زمہ واری بلوچ لبریشن آرمی ءَ من اتگ ات-

زانگ بہ بیت اے ھند ءُ دمگاں بلوچ لبریشن آرمی ءِ جنگولاں دگ بند کگگ اَنت ءُ گاڑیانی پٹ ءُ پول کتگ ءُ اے وھد ءَ بیست ءِ کچ ءَ اشکر بروکیں گاڑی مانداشتگ ءُ تیرگواری کتگ ءُ تاوان داتگ انت-

سوشل میڈیا پلیٹ پارم ٹوئٹر ءِ نیمگ ءَ گوشگ بیتگ کہ زوت کارمرد کنوک ٹویٹ ڈیک ءِ کارمرد کنگ ءَ منانک دیگ ءُ گوزگ لوٹ ایت-

برتانیہ ءِ ھال سرکنوکیں ادارہ ڑوئٹرز ءِ رد ءَ ٹوئٹر انتزامیہ ءِ اے ھم گوشگ اِنت کہ ٹویٹ ڈیک کنگ ءِ کارمرد ءِ درگت ءَ بیوکیں دگری سِی روچانی توک ءَ دیم ءَ کیت اِنت-

ٹوئٹر انتزامیہ ءِ یک گچینی ٹویٹے ءَ گوشتگ کہ ٹویٹ ڈیک کنگ ءِ ورژن دیم ءَ نوکتر کنگ بیت اِنت ءُ ایشی ءَ لھتے فیچر ھوارینگ بنت-

بلے اے راست کنگ نہ بیتگ کہ ٹوئٹر کارمرد کنوک ٹویٹ ڈیک نوکیں یا کوھنیں ورژناں کارمرد کنگ ءَ زر گر ایت اِنت-

اگاں ٹویٹ ڈیک ءِ کارمرد کنگ ءَ زر گرگ بیت اِنت گڑا ایشی ءَ چہ ٹوئٹر ءِ کٹ ءُ کمائی توک ءَ بازیں گیشی یے اتک کنت اِنت-

دنیا ءِ سیر ترین مردمانی لڑاں ھواریں ایلون مسک پیسر ءَ ھم اشتھاریانی زراں چہ سیری ءِ جھد ءَ اِنت –

ٹویٹ ڈیک پلیٹ پارم ءَ یک جوانتریں گپے ایش اِنت کہ پیسر ءَ ایشی ءَ مپت ءَ ھلائینگ ءَ بیتگ اَنت کہ گیشتر باپاری مردماں کارمرد کتگ ءُ کہ ایشی ءِ سبب اے بیتگ باپاری مردماں چیز بہ آسانی ءَ دگہ دگہ جاھاں آشکار کتگ اَنت-

ٹوئٹر ءِ نیمگ ءَ چست کنگ بیتگیں گامگیج ایلون مسک ءِ اے درشان ءَ پد لھتے روچاں رند اتک کہ ایشی ءَ آئی ءَ گوشتگ ات کہ ھردوک راستین ءُ نا راستین اکاونٹسانی تہ ءَ پوسٹس ءِ کساس کم کنگ بیت اِنت- اے گامگیج ءِ مول ءُ مراد ڈیٹا اسکریپنگ ءُ سسٹم ءَ گڑبڑی ءِ دارگ اِنت-

پلیٹ فارم ءِ نیمگ ءَ اے جار ءَ کارمرد کنوکانی لیکہ دیم ءَ اتکگ اَنت زانتکارانی گوشگ اِنت کہ ایشی ءَ ٹوئٹر ءِ نوکیں سی ای او لنڈا یاکارینو ءَ تاوان بیت اِنت کہ آئی ءَ گوستگیں ماہ ءَ اگدو وتی دستاں زرتگ –

ایلون مسک ءَ اے ھم گوشتگ کہ کارمرد کنوک وتی اکاؤنٹانی راست کنگ ءَ جتا رنگ ءَ ھشت ڈالر دیگ کپ ات انت ءُ ادارھانی لڑاں ھلوکیں اکاؤنٹاں ادارہ ھمک ماہ یک ھزار ڈالر دیگ کپ ایت اِنت-

بلوچستان ءِ تیاب دپی دمگ گوادر ءَ نُھ سال ساری پاکستانی پوج ءِ دست ءَ زورانسری آوار جنی ءَ پد بیگواھیں عظیم دوست ءِ یل نہ کنگ ءِ بگیری ءَ مروچی زھرشانی کنگ بوتگ –

صدف ھوٹل ءَ بگر تاں پریس کلب گوادر ءَ درنگاز کنوکاں اوگام جنان ءَ زورانسری آوار جنی ءِ بگیری ءَ نارہ جتگ –

زھرشانی روانک ءَ عظیم دوست ءِ کھول ءَ ھوار ایندگہ بیگواھیں مردمانی کھول ءُ سیاسی ءُ چاگردی باسکاں بھر زرتگ –

روانک ءَ درنگاز کنوکاں عظیم دوست ءَ ھوار درسیں بیگواھیں مردمانی یل کنائینگ ءِ ھاتر ءَ نارہ جتگ ءُ رورانسری آوار جنی ءِ دارگ ءِ لوٹ کتگ -.

روانک ءَ بھر زوروکیں مردمانی گوم ءَ تران کنان ءَ عظیم دوست ءِ گھار رخسانہ بلوچ ءَ گوشتگ کہ مروچی مئے ودار ءَ نُھ سال پرگوستگ بلے منی برات عظیم دوست ھنگت ازیت جاھاں بندیگ انت – اے نُھ ایں سال پہ منی واست ءَ ھما دردناکیں ساھت بوتگ انت کہ منی زند ءَ ھوار منی کھول زند سرجمی ءَ بدل کتگ –

آئی ءَ گوشتگ کہ اے نُھیں سالاں ما ھچ وڈیں وشی نہ دیستگ منی پیرزالیں مات شپ ءُ روچ وتی زھگ ءَ یات کنت – اے نُھیں سالاں مئے گس ءَ ائید نہ اتکگ – ھر وھد ءَ کہ ائید ءِ وشیانی روچ کئیت ھمے سما بیت کہ مئے ٹپاں کسے واد پریچگ ءَ انت پرچا کہ ھر یکے ائید ءَ وتی کھول ءِ گوم ءَ شاتکامی کنت بلے مئے اے روچ دگانی سر ءَ گوز انت –

آئی ءِ گوشگ ات کہ ریاست مارا گوشت کنت کہ منی پیرزالیں کماش ءُ مئے کھول ءَ کجام کتکاریانی سزا دیگ بوگ ءَ انت؟ مروچی کساس ھر یک گِسے ھمے آس ءِ تہ ءَ سُچگ ءَ انت – پرچاکہ ھچ چُشیں گس ءِ نیست کہ اودا یک گھارے ءِ برات، زالے ءِ لوگواجہ، ماتے ءِ چمے چراگ، پتے ءِ پیری ءِ اسا یا یک زھگے ءِ سر ءَ پتے ءِ ساھگ پچ گرگ نہ بوتگ – برات ءِ یل کناءینگے ھاتر ءَ ھر وڈیں دروازگ ٹُک اِتگ، زھرشانی کتگ، نندانکاں نشتگیں ءُ چہ اے ریاست ءَ لوٹ کُتگ کہ منی برات زاھر کنگ بہ بیت اگاں آئی ءَ جرمے کتگ آمیدگس ءَ آرگ بہ بیت ءُ سزا دیگ بہ بیت – ما ھمے جست ءَ کنگ لوٹیں مارا پرچا اے وڈ ازیت دیگ بوگ ءَ انت؟

آئی ءَ گوشتگ کہ من چہ اے ریاست ءَ وتی پیرزالیں مات ءِ وشیاں لوٹاں، ھدایا بہ چارے منی برات ءَ واتر کن ات منی کھول ءَ ھوار درسیں بیگواھیں مردمانی کھولاں چہ اے دردناکیں ودار ءَ آزات بہ کن ات عظیم دوست ءَ ھوار درسیں بیگواھیں مردم یل کنگ بہ بنت –

رخسانہ دوست ءَ گوشتگ کہ منی برات عظیم دوست ءَ کجام جرم کُتگ کہ آئی ءِ جست ءُ پُرس نُھ سال گوزگ ءَ پد ھم سرجم نہ بوتگ انت؟ آئی ءَ آمیدگساں پیش نہ کنگ منی برات ءِ بے گناھی ءَ زاھر کنت – اگاں کسے ھمے ماریت ما چہ وتی دوستیگیں مردمانی لوٹ ءَ دزکش بہ ایں گڈا اے آیانی وھم گمان انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ کولواہ ءَ پاکستانی پوج ءِ سر ءَ بوتگیں اُرش ءِ زمہ واری منّ اِتگ ءُ گوشتگ کہ اے اُرش ءَ پاکستانی پوج ءِ میجرے ءَ ھوار شش کارمند مرتگ انت ءُ بازینے زدگ بوتگ انت –

جارکش میجر گوھرام بلوچ ءِ رِد ءَ بی ایل ایف ءِ سرمچاراں کیچ ءَ پیسر ءَ دگ بستگ ءُ پاکستانی پوج ءِ پرپٹانی کاروان ءِ سر ءَ اُرش کتگ –

جارکش ءِ رِد ءَ سرمچاراں اے اُرش کولواہ ءِ بلور ءُ سگک ءِ میان ءَ تِنّگ ءَ زورگریں پوج ءِ ھپت پرپٹانی کاروان ءِ سر ءَ کُتگ- کاروان ءَ ھواریں دیم ءَ دو پرپٹ ترندیں اُرش ءِ زد ءَ آتکگ اَنت، وھدے کہ پشت ءِ پرپٹ ھم نشانگ کتگ اَنت۔ چریشی ءَ شش کارمند جاہ پہ جاہ مرتگ ءُ بازینے زدگ بوتگ زدگ بوتگ انت مرتگینانی تہ ءَ ثاقب نامیں یک میجرے ھم ھوار اِنت – اے اُرش ءِ تامر ءَ زوت شنگ کنگ بیت اِنت –

میجر ءِ رِد ءَ اے دمگ سی پیک شوربندی دگ سیکشن M8 ءِ بوگ ءِ سوب ءَ بازیں پوجی زوراکیانی زد ءَ اِنت۔ پھازداری ءِ نام ءَ ھمک روچ لشکرکشی ءِ نام ءَ مردم دلسیاہ کنگ بوگ ءَ اَنت – چریشی ءَ دمگی مردم پہ لڈ ءُ بار کنگ ءَ لاچار اَنت – پاکستانی پوج ءِ مول ھمیش اِنت بلوچستان ءِ دمگی مردماں ھلاس بہ کنت ءُ بلوچ ءِ مڈیانی ارزانی ءَ لٹ ءُ پل بہ کنت –

میجر گوھرام بلوچ ءِ رِد ءَ ما چین ءَ ھمے بیھار ءَ دے ایں کہ اے سی پیک ءُ بلوچستان ءَ آدگہ شوربندیانی باپاریاں تاوان دئیں – آ اے بلوچ چکچینی ءَ پاکستان ءَ کمک کنگ ءَ یل بہ کن اَنت۔ بلوچستان ءِ تہ ءَ ھچ وڑیں شوربندی چہ بلوچ راج ءِ رزا ءَ ابید سوبمند بوت نہ کن انت –

امریکہ ءِ ریاست ٹیکساس ءَ بیگواہ بیتگیں بچک ھشت سال ءَ پد بیست ءُ پنچ سالی ءِ مرد واتر زندگی ءَ اتکگ بلے اے کس ءَ سرپدی نیست اِنت اینکس سال ءَ کجا بیتگ ءُ چونے گوازینتگ اَنت-

امریکہ ءِ ٹی وی این بی سی ءِ رپورٹ ءِ رد ءَ ٹیکساس سنیٹر فار مسنگ ءَ گوشتگ کہ ھوسٹن ءَ سیادی داروکیں روڈی فاریس گمانی رنگ ءَ یک مھکمیں جاھے ءَ بیتگ ءُ اے ساھت ءَ ھسپتال ءَ آئی ءِ جاندراھی بوگ ءَ اِنت بلے اے گوشگ نہ بیتگ کہ آئی ءِ جیڑہ چی اِنت –

واکدارانی رد ءَ روڈی فاریس شش مارچ دوھزار ءُ پانزدہ ءَ ھما وھد ءَ چہ لوگ ءِ نزیک ءَ بیگواہ بیتگ کہ آ وتی کُچکانی گون ءَ گام جنگ ءَ بیتگ –

ھردوکین کُچک جتا جتا ابید پٹھ ءُ ساداں لوگ ءَ سر بیتگ اَنت بلے روڈی فاریس نیتکگ، فاریس ءِ اُمر آ وھد ءَ ھژدہ سال بیتگ، ءُ آئی ءِ بیگواھی ءَ ھچ سرپدی نہ رس اتگ-

روڈی ءِ لوگ ءِ مردمانی گوشگ ات کہ آ یکدم بِر بری ءِ آماچ بیتگ گیشتر ھما وھد ءَ پرپٹ ءِ سر ءَ وئیل بوگ ءَ آئی ءَ وتی مستریں برات ءِ مرگ چماں وت دیستگ ات-

فاریس ءِ بیگواہ بوگ ءَ پد آئی ءِ لوگ ءِ مردمانی نیمگ ءَ یک پٹ ءُ پولے برینڈا پیراڈئز ءِ کمکے زرتگ بیتگ کہ چریشی ءَ اپریل دوھزار ءُ پانزدہ ءَ گوشگ بیتگ آئی ءَ روڈی وتی چمان ء وت دیستگ مرگ ءَ –

آئی ءِ برات آئی ءِ جوانترین سنگت بیتگ ءُ آئی ءِ گون ءَ ھنچیں وئیل گوستگ انت کسے ءِ گون ءَ مہ گوزات –

لوگ ءِ مردماں آئی ءَ را لیب ءُ گوازی ءِ سکین داتگ بلے آ لس زھگانی پیم ءَ نہ بیتگ چریشی ءَ آئی ءِ کھول ءِ مردم پکر مند بیتگ اَنت ءُ وھد ءِ گوزگ ءَ پد ھم اے سلسلگ کم نہ بیتگ –

برینڈا پیراڈئز ءِ رد ءَ آئی ءِ کھول باز مشکلانی دیمپان اِنت ءُ بیتگ بلے یک ماتے وتی زھگ ءِ جاورانی بارو ءَ پسو لوٹ ایت اِنت –

اے درگت ءَ ھچ سرپدی نہ بیتگ روڈی فاریس ھشت سالاں کجا بیتگ ءُ چون واتر اتکگ –