TBP Balochi

امریکہ ءِ ریاست ٹیکساس ءَ بیگواہ بیتگیں بچک ھشت سال ءَ پد بیست ءُ پنچ سالی ءِ مرد واتر زندگی ءَ اتکگ بلے اے کس ءَ سرپدی نیست اِنت اینکس سال ءَ کجا بیتگ ءُ چونے گوازینتگ اَنت-

امریکہ ءِ ٹی وی این بی سی ءِ رپورٹ ءِ رد ءَ ٹیکساس سنیٹر فار مسنگ ءَ گوشتگ کہ ھوسٹن ءَ سیادی داروکیں روڈی فاریس گمانی رنگ ءَ یک مھکمیں جاھے ءَ بیتگ ءُ اے ساھت ءَ ھسپتال ءَ آئی ءِ جاندراھی بوگ ءَ اِنت بلے اے گوشگ نہ بیتگ کہ آئی ءِ جیڑہ چی اِنت –

واکدارانی رد ءَ روڈی فاریس شش مارچ دوھزار ءُ پانزدہ ءَ ھما وھد ءَ چہ لوگ ءِ نزیک ءَ بیگواہ بیتگ کہ آ وتی کُچکانی گون ءَ گام جنگ ءَ بیتگ –

ھردوکین کُچک جتا جتا ابید پٹھ ءُ ساداں لوگ ءَ سر بیتگ اَنت بلے روڈی فاریس نیتکگ، فاریس ءِ اُمر آ وھد ءَ ھژدہ سال بیتگ، ءُ آئی ءِ بیگواھی ءَ ھچ سرپدی نہ رس اتگ-

روڈی ءِ لوگ ءِ مردمانی گوشگ ات کہ آ یکدم بِر بری ءِ آماچ بیتگ گیشتر ھما وھد ءَ پرپٹ ءِ سر ءَ وئیل بوگ ءَ آئی ءَ وتی مستریں برات ءِ مرگ چماں وت دیستگ ات-

فاریس ءِ بیگواہ بوگ ءَ پد آئی ءِ لوگ ءِ مردمانی نیمگ ءَ یک پٹ ءُ پولے برینڈا پیراڈئز ءِ کمکے زرتگ بیتگ کہ چریشی ءَ اپریل دوھزار ءُ پانزدہ ءَ گوشگ بیتگ آئی ءَ روڈی وتی چمان ء وت دیستگ مرگ ءَ –

آئی ءِ برات آئی ءِ جوانترین سنگت بیتگ ءُ آئی ءِ گون ءَ ھنچیں وئیل گوستگ انت کسے ءِ گون ءَ مہ گوزات –

لوگ ءِ مردماں آئی ءَ را لیب ءُ گوازی ءِ سکین داتگ بلے آ لس زھگانی پیم ءَ نہ بیتگ چریشی ءَ آئی ءِ کھول ءِ مردم پکر مند بیتگ اَنت ءُ وھد ءِ گوزگ ءَ پد ھم اے سلسلگ کم نہ بیتگ –

برینڈا پیراڈئز ءِ رد ءَ آئی ءِ کھول باز مشکلانی دیمپان اِنت ءُ بیتگ بلے یک ماتے وتی زھگ ءِ جاورانی بارو ءَ پسو لوٹ ایت اِنت –

اے درگت ءَ ھچ سرپدی نہ بیتگ روڈی فاریس ھشت سالاں کجا بیتگ ءُ چون واتر اتکگ –

پاکستان ءِ انٹرنیشنل ایئرلائنز (پی آئی اے) چہ لاھور ءَ دیم پہ ٹورنٹو ءَ روکیں بالیگ تکنیکی ھرابی ءِ سبب ءَ چہ روس ءَ واترینگ بیتگ ءُ لاھور ءِ بالی پٹ ءَ نادینگ بیتگ-

دوشمبے ءِ روچ ءَ پی آئی اے ءِ جارکش ءَ یک درشانے ءَ گوشتگ کہ چہ لاھور ءَ دیم پہ ٹورنٹو ءَ رؤکیں بالیگ پی کے 797 بال ءِ وھد ءَ تکنیکی ھرابی ءِ سبب ءَ بالیگ ءِ دیم واترینگ بیتگ ءُ لاھور ءِ بالی پٹ ءَ نادینگ بیتگ-

جارکش ءِ گوشگ اِنت روس ءَ بالیگ ءِ ھائیڈرالک ءِ وارننگ ءِ نشانی ءَ پد کپتان ءَ بالیگ ءِ دیم ترینتگ ءُ پاکستان ءَ کتگ –

پاکستان ءَ پی آئی اے ءِ سرجمیں انجینیئرنگ بیس جاڑیگ اَنت اود ءَ کوالیفائی انجینیرز بالیگ ءِ چار ءُ ٹپاس ءَ کن اَنت ءُ ھرابی ءَ دورے کن اَنت-

پی آئی اے ءِ جارکش ءِ رد ءَ بالیگ دارگ بیتگ ءُ آئی ءِ مساپر دگہ دگہ بالیگاں بھر ءُ بانگ کنگ بیتگ اَنت-

بالیگ یکشمبے ءُ دو شمبے ءِ میانی شپ ءَ چہ لاھور ءَ چست بیتگ ءُ ٹورنٹو ءِ واستا بال کنان بیتگ-

بلوچ زالبول ءُ سرمچاری

نبشتہ کار: سمیر بلوچ

دی بلوچستان پوسٹ

ھستیں جُھد کساس بیست ءُ سئے سالے پند ءَ بُران ءُ روان انت دیم پہ آجوئی ءِ منزل ءَ ءُ کس نزانت کہ بلوچ راج اے سپر ءَ دِگہ چُنت سالاں بُر ایت ءُ وتی منزل ءَ سر بیت اِنت وھدیکہ آجوئی ءِ اے سپر کہ بندات بیت سرجمیں بلوچستان ءِ جوان سالیں ورنا ءُ کماشاں بھر زُرت ءُ وتی وتی ھلک ءُ میتگاں بِگر تاں مزنیں شھر ءَ سپر کنان ءُ کُلیں بلوچ راج ءَ را سرپد کُت کہ اے جُھد ءِ مول ءُ مُراد چی انت ءُ بلوچ ءِ باندات گوں آجوئی ءَ بندوک انت ءُ اے جُھد بلوچ راج ءُ گُلزمین ءِ آجوئی ءِ ھاتر ءَ دیم پہ وتی منزل ءَ سر گِپتگ ءُ بائد ھرچ بلوچ وتی ھک ءَ اد ءَ بہ کنت ءُ اے جُھدے وڑے نا وڑے ھمراہ داری ءَ بہ کنت-

آ وھدیکہ اے جُھد ءِ بندات بیت آ وہدی اے جُھد ءَ بلوچ کماش ءُ ورنایاں وتی کوپگ ءَ کُت دومی نیمگ ءَ ھمے کماش ءُ ورنائیں بلوچانی مات ءُ گوھاراں وتی ھک گوں لوگی کاراں ادا کُت۔ ھرچ میتگے ءَ کہ کسان کسانے دیوان بیت اے مات ءُ گوھاراں ھمے سیاسی سرکلانی چاہ ءُ آپ ءُ سوبارگ ءُ شام ءِ ھڈ کنگ ءِ زمہ گوں بیتگ۔ بلے ایشاں چہ کس اے جُھدے سرزاھراں بزاں ھمے دیوان ءَ پہ باسک گون نہ بیتگ انت پرچہ کہ آ وھد ءَ اے سیاسی زانت یاکہ اے زانگی بیّگ ءَ ھم بازیں سیاسی سروک یا کہ باسک زالبولانی جُھد ءَ ھوار بیگ ءَ مناسب سرپد نہ بیتگ اَنت، بلے بیت ھما کہ بلوچ چاگرد ءَ یاکہ یک زرمبشی چاگردے ءِ تہ ءَ بیت اِنت،بلوچ زالبولاں اول سرا روانکاں بھر زُرت ءُ پد ءَ زھرشانیانی تہ ءَ نارہ جت،اے بندات ات کہ بلوچ زالبولاں وتی پاد بلوچ آجوئی ءِ سیاست ءِ تہ ءَ دوّر داتگ اَنت ءُ جُھد ءَ وتی بھر مان کُتگ ءُ اے گپ منارینتگ کہ بلوچ زالبول ھم وتی برات ءُ کماشانی وتی سرمچارانی ءُ سیاسی سروکانی ھمراہ انت ءُ ھمگام انت۔ وھدیکہ شھید کریمہ ءَ کہ بلوچ اسٹوڈنٹس آرگنائزیشن ءِ پِڑا وتی سیاسی سپر بنا کُت آئی ءَ بلوچ چاگرد ءِ بنیاد سُرینت۔ آئی ءَ کہ بلوچ زالبولانی ھمراھی ءَ بلوچ ورنایانی سروکی کُت آ وھد ءَ کس ءَ اے گپ گمان ءَ ھم نہ ات کہ یک بلوچ زالے بلوچ اسٹوڈنٹس آرگنائزیشن ءِ سروکی کنگ ءَ انت ءُ چوں مہ بیت اے باندا انچیں بلوچ زالبولیں سرمچارے بلوچ راج ءَ بہ دنت کہ آ بلوچ زالبول سرمچارانی سروکی بکن انت، ماں اے گپ وَ مار اتگ کہ بلوچ زالبول کہ سیاست ءَ بھر زور ایت آ بس سیاست کنت، بلے اے گپ کسی گمان ءَ نہ بیتگ کہ بلوچ زالبولے توپنگے چِست کنت ءُ بلوچ سرمچارانی ھمراہ بیت اِنت. اے گپ ءَ کئے رد کُت کنت کہ یک زالبولے آجوئی ءِ سیاست ءَ ھوار بہ بیت ءُ دیم تِرا یاگی مہ بیت؟ یاکہ سرمچارے مہ بیت؟ دِگہ گپے ایش انت کہ وھدیکہ ریاست ءَ جُھد ءِ سر ءَ اُرش کُت ءُ گراونڈ ءَ موجودیں توامیں سیاسی باسک کماش ءُ ورنا ھزارانی ھساب ءَ بندیگ کُت انت ھزارانی ھساب ءَ شھید کُت انت ءُ پشت کپتگیں ورنا ءُ کماش درانڈیھ بیت انت ھمے وھد ءَ بلوچ راجی سیاست ھمے زالبولاں چوں سریگ ءَ وتی سرا کُت ءُ دیم پہ آجوئی ءِ منزل ءَ سپر کنگ بندات کت۔ مروچی ھمے زالبول کہ وتی سیاسی سِنچ ءَ سرزمین ءِ ھاتر ءَ سرا ندر کنت ءُ دومی نیمگ ءَ آئی ءِ قربانی ءِ سر ءَ ھما ورنا ءُ کماش کہ آھانی بندات کُتگیں جُھد ھمے شیرزالاں کوپگ ءَ کُتگ ءُ وتی کسان سالیں زند ءَ ندر کنگ ءَ انت،ایراد گر اَنت کہ زالبول ءَ جنگے پِڑا ھوار مہ کن ات۔ منی زانت ءَ اے زالبولانی سیاسی سِنچ ءُ آھانی پہ بلوچ جُھد ءِ ھاتر ءَ داتگیں قربانیانی سرا سوال چِست کنگ ءُ آھاں چہ بلوچ ورنا ءُ کماشاں چہ کم تِر سرپد بیّگ انت۔ چاکر رندے پیمیں زوراکیں سردار کہ بلوچ زالے بزاں بانڑی ءَ داشت نہ کنت وھدیکہ آ اپس ءَ سوار بیت ءُ دیم پہ ھند ءِ فوج ءَ جنگ ءَ روت گُڑا انوگیں چاکر کجا اے بلوچ زالبولاں داشت کن انت کہ سداں سالانی ایشانی آشوبی ماِرشت ءُ وتی جِند ءِ منارینگ ءِ اسد انچو گِرّستگ کہ آ ریاست ءِ سر ءَ وت کوشی ءَ سر گِپتگ انت آئی ءَ چتور مہ کن کن ئے؟ من ءَ دیریگیں واقعاتے گیر ات،ھُدا مرزی استاد رسول بکش دینارزئی ءَ گُشت، ھما مردم آجوئی ءِ لوٹ ءَ بہ کنت کہ آ وتی لوگ ءَ وتی زالبولاں آجوئی دات کنت۔ آجوئی لوٹ ارزان انت بلے دیگ گِران انت۔

ھما سنگت کہ اے گپ ءَ گُش انت بلوچ زالبول بائد وت کوُشی کنوکیں گّلانی بھر مہ بنت آ اے گپ ءَ سرپد بہ بنت انسانی ھکانی ٹھینوکیں اے سردیں مُلک ورلڈ وار اول میان ءَ وت ھمے وڑا جُھد کُتگ وھدیکہ آھانی سرزمین کبزاگیری ءِ سیمسراں رس اتگ۔ دومی گپ اِش انت کہ ماں بلوچ کسی جوابدے نہ انت ماں ھمے ملکانی سبب ءَ مروچی اے رستریں ریاست ءِ غلام انت، ءُ آجوئی ءِ جنگ ءَ انت۔

گُڈسرا ھمے گُشاں کہ ماراں اے گپ سرپد بیگ لوٹ ایت کہ ماں ھما راج ءُ سرزمین انت کہ “AI” زمانگ ءَ گُلام انت ایشی ءِ ایش انت کہ مئے کِرا وھد نیست ءُ وھد ءِ نیستی ءِ مانا اِیش انت کہ ھرچی دستا بیت بکن ءُ وت ءَ چہ اے گلامی ءَ آجو بہ کن –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سَمّو بولان ءِ دپتر اِنت

شائر: بَرانز بلوچ

دی بلوچستان پوسٹ

سَمّو مھر ءِ مَکتب اِنت
سَمّو آک ءِ وشبو
سَمّو مُھکمیں سَنگرانی زینت ءُ بَراہ
سَمّو زَانش ءِ مئے کتاب
سَمّو توکل ءِ مَڑاھانی
سَمّو ، شاری ءِ دَروشم اِنت
سَمّو یاسمین ءُ اِزگُل اِنت
سَمّو ھَستمان ءِ چیدگ انت
سَمّو رشن ءِ بانداتے سَمین
سَمّو آشوب ءِ گواڑخ
سَمّو توکلیں جَنگانی
سَمّو اَسلمی کاروان ءِ نشان
سَمّو مھر ءِ مَکتب اِنت
سَمّو اَوست ءِ سَبا
سَمّو پُر آشوبیں چَمن
سَمّو کِشک ءُ پَندانی پَد ءُ رَند
سَمّو کُلبری بھاریں زید ءِ نشان
سَمّو بولان ءِ دَپتر انت
سَمّو مئے دلانی پھر ءُ شان
سَمّو شال ءِ زیبائی دَروشم
سَمّو بلوچستان ءِ تو
سَمّو بلوچستان ءِ تو
سَمّو مئے مھر ءِ مَکتب
سَمّو مھر ءِ مَکتب انت

روکپتی بلوچستان ءِ جتا جتائیں جاھاں دو کس کُشگ بیتگ اَنت ءُ یک لاشے دزکپتگ –

سر بیتگیں ھالانی رد ءَ روکپتی بلوچستان ءِ دمگ نیکشھر ءَ ناشناسیں مردماں تیرگواری کنان ءَ یک مردمے کشتگ –

کُشگ بیتگیں مردم ءِ پجار اختر ایرانپناہ ء اسماعیل جھمنند سورکمب کنارک ءِ نام ءَ زانگ بیتگ –

اھوالانی رد ءَ اختر گوستگیں شپ ءَ دگہ ھمراھانی ھواری ءَ دیم پہ نیکشھر ءَ اتکگ بیتگ ءُ ناشناسیں مردماں تیرگواری کتگ ءُ کُشتگ-

ھمے وڑ ءَ میرجاوہ ءَ ناشناسیں مردماں یک مردمے کُشتگ-

اھوالانی رد ءَ میرجاوہ ءَ ناشناسیں مردماں تیرگواری کنان ءَ جاوید ریگی ء ناصر جھمنند میرجاوہ ءِ نام ءَ زانگ بیتگ-

اھوالانی رد ءَ جاوید گوستگیں روچ ءَ سرجنگل ءَ تیرجتگ ءُ زدگ کتگ ءُ پد ءَ نادراہ جاہ ءَ برگ بیتگ ءُ پد ءَ آئی ءَ ساہ داتگ اَنت-

ھمے وڑ ءَ چھبار ءَ یک لاشے دزکپتگ-

اھوالانی رد ءَ روکپتی بلوچستان ءِ دمگ چھبار ءَ یک کماشیں مردمے ءِ لاش دزکپتگ –

دزکپتگیں لاش ءِ پجار پنجاہ ءُ دو سالیگیں ادریس حسینی ء مھمد سالہ جھمنند سراوان ءِ نام ءَ زانگ بیتگ-

اھوالانی رد ءَ ادریس چار روچ ءَ ساری چہ وتی لوگ ءَ دراتکگ بیتگ ءُ گوستگیں روچ ءَ آئی ءِ لاش یک شپانکے ءَ دیستگ بیتگ –

تنی وھدی آئی ءِ بیرانی درگت ءَ دگہ اھوالانی بارو ءَ گیشیں سرپدی نہ بیتگ اَنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشانے ءِ تہ ءَ کیچ جوسک ءَ پوج ءِ سر ءَ بوتگیں دزبمب اُرش ءِ زمّہ واری منّ اِتگ ءُ گوشتگ کہ اے اُرش ءَ یک کارمندے زدگ بوتگ –

جارکش ءِ رِد ءَ مئے سرمچاراں گوستگیں شپ ءِ ادار ھشت ءُ نیم ءَ تربت ءِ دمگ جوسک ءَ پاکستانی پوج ءِ پانگسے ءِ سر ءَ دزبمب اُرش ءِ کُتگ –

میجر ءِ رِد ءَ دزبمب پانگس ءِ تہ ءَ کپتگ ءُ ترک اِتگ چریشی ءَ یک کارمندے زدگ بوتگ –

جارکش ءِ رِد ءَ اے اُرش ءِ زمّہ واری ءَ بی ایل ایف منیت ءُ بلوچستان ءِ آجوئی ءَ تاں دژمن پوج ءِ سر ءَ مئے اُرشانی درچ برجاہ مانیت –

کُشوک ترا کدی اِنساپ نہ دنت

نبشتہ کار: کوھؔی بلوچ

دی بلوچستان پوسٹ

مرچی کُلیں دُگنیا زانت ءُ سرپد اِنت کہ بلوچ پہ وتی زمین ءِ رکینگ ءَ، وتی ننگ ءُ ناموس ءِ رکینگ ءَ ھر ھما جاہ ءَ رؤت کہ کَسّی گُمان ءَ ھوں نہ اِنت، بلوچ پہ وتی گُلزمین ءِ رکینگ ءَ کدی بی چک ءُ پد نہ بوتگ ءُ نہ کہ بیت اِنت-

پاکستانی ھونواریں سپاھی ھر روچ بلوچ ءِ لوگ ءَ ماندارگ ءَ اِنت، بلوچ ءِ بچّ آں چہ لوگ ءَ چی بارت ءُ پد ءَ آئی ءِ جون ءِ ماں جنگل ءَ چگل دنت ءُ آئی ءِ گور ءَ یک توپنگے دنت ءُ پد ءَ اکس ءِ کشی ایت ءُ رسانکدر ءَ دنت کہ من مرچی (دہشتگرد) ءِ کُشتگ، اے ھما بلوچ انت کہ پہ وتی گار ءُ بیگواھیں براتاں توار اِش چِست کُتگ، اے ھما بلوچ انت کہ پہ وتی مات ءُ گُوھارانی ننگ ءُ ناموس ءِ رکینگ ءَ توار اِش چِست کُتگ وھدے کہ آئی ءَ گوں سرمچار ءُ سرمچنڈ آں ڈیک وارتگ گُڑاں آئی ءَ وتی بھر بُرتگ ءُ الم تاوانے وارتگ-

مرچی یک جُست ءِ چہ بلوچ راج ءَ، تئی گار ءُ بیگواہ کنوک کے اِنت..؟ ءُ من تو چہ کہ اِنساپ لوٹگ ءَ ایں…؟ من تو وھدے کہ زاناں ءُ سرپد آں کہ منی ءُ تئی گار کنوک، منی ءُ تئی زمین ءِ سرائے نِندوک کے اِنت، منی ءُ تئی ننگ ءُ ناموس ءِ پادمال کنوک پاکستان ءُ پاکستان ءِ ھونواریں سپاھی انت گُڑا چہ دگانی سر ئِے نِندگ ءُ کوکار کنگ ءَ چے شرتِر وَ ھمیش اِنت دیم پہ دیم جنگ بکن آں ءُ وتی ھکّ ءَ پَچّبِگراں-

مرچی چنچو بلوچ گار ءُ بیگواہ اِنت؟ مرچی چِنچو بلوچ ءِ جون کپتگ؟ مرچی کُجام بلوچ ءَ را اِنساپ دیگ بوتگ؟ مرچی بلوچ ءِ جنگ کُجا سر اِنت؟ مرچی پہ بلوچ ءِ زُبان ءِ گار کنگ ءَ دُژمِن چے چے کنگ ءَ اِنت…؟ مرچی پہ منی ءُ تئی زُبان ءِ گار کنگ ءَ چونیں پندل اِش ساز اِتگ….؟ کدی تو اے جنگ وتیگ کُتگ….؟ کدی تو وتی رھشُون وتیگ کُتگ آں….؟ وھدے کہ من ءُ تو اے جنگ ءَ وتیگ نکن آں گُڈّ ءَ درامد کدی بی پہ من ءُ تو جنگ نہ کنت، اے گپ ءَ یاداشت بِکن کہ ھرچی کن ئِے اول وت بکن، چہ دِگرئے توار کنگ ءَ چی شرتِر اِنت کہ وتی توار وُت بہ بو-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔