TBP Balochi

سربوتگیں ھالانی رِد بلوچستان ءِ دمگ ڈیرہ بگٹی ءَ پاکستانی پوج ءَ کماشے ءَ ھوار چار مردم زورانسری آوار جتگ ءُ بیگواہ کتگ انت، چہ بارکھان ءَ ژانگولیں جون ءِ دست کپتگ –

گیشیں ھالانی رِد ءَ پاکستانی پوج ءَ ڈیرہ بُگٹی ءَ گِسے ءِ سر ءَ بیڑ برتگ دو مردم زورانسری آوار جتگ ءُ بیگواہ کتگ انت، آوار جنگ بوتگیں مردمانی پجار احمد علی ء روشن بگٹی ءُ ھپتاد سالی کماش وڈیرہ روشن بگٹی ءِ ناماں بوتگ انت –

اھوالکار ءِ رِد ءَ پاکستانی پوج ءَ گوستگیں شپ ءِ ادار سَے ءَ سوئی بالی پٹ ءِ نزیک ءَ ہوتکانی میتگ ءَ بازیں گسے ءِ سر ءَ بیڑ بُرتگ وھدیکہ پاکستانی پوج وڈیرہ روشن ہوتکانی گِس ءَ ھم مانریتکگ ءُ اودا زھگ ءُ زالبول لٹ شاپ کتگ انت توپک ءِ زور ءَ وڈیرہ روشن ءُ آئی ءِ زھگ احمد علی کہ لیوز ءَ کار انت زورانسری آوار جتگ ءُ گوں وت برتگ انت –

اشاں ابید پاکستانی پوج ءَ وڈیرہ روشن ءِ گِس ءَ چہ دو پرپٹ، دو گرانھادیں گوانکو، یک لیسنی پُروش توپکے ءُ زالبولانی سُھر ھم دُز اِتگ ءُ برتگ انت –

دومی نیمگ ءَ بلوچ نیشنل مومنٹ (بی این ایم) ءِ انسانی ھکانی ادارہ پانک ءِ گوشگ انت کہ ھشت جولائی ءُ ھژدہ جولائی پاکستانی پوج ءَ چہ سوئی ءَ دگہ دو مردم آوار جتگ ءُ بیگواہ کتگ انت کہ ھنگت گار انت – بیگواھیں مردمانی تہ ءَ طارق ء سفر خان بگٹی جمعہ ء الہ الدین بگٹی ھوار انت – طارق ھشت جولائی ءُ جمعہ ھژدہ جولائی ءَ آوار جنگ بوتگ انت –

دومی نیمگ ءَ چہ بارکھان ءَ یک مردمے ءِ ژانگولیں جونے ءِ دست کپگ ءِ ھال انت – بلوچستان ءَ دو روچانی میان ءَ اے سیمی ژانگولیں جون انت کہ دست کپگ انت کہ آھانی تہ ءَ یکے ءِ پجار ھنگت نہ بوتگ –

مروچی دست کپتگیں جون چہ بارکھان ءِ دمگ عیشانی ءِ کوہ ءَ دست کپتگ کہ آئی ءِ پجار اللہ بخش ء توکلی ءِ ٹک مسوری ءِ نام ءَ بوتگ -.

دمگی مردمانی گوشگ انت کہ اللہ بخش ، بشک عیشانی گارنانی شوانگے بوتگ کہ ماھے ءَ ساری بیگواہ بوتگ ءُ مروچی آئی ءِ جون دست کپتگ – دمگی واکدار گیشیں پٹ ءُ پول کنگ ءَ انت –

زانگ بہ بیت گوستگیں روچ ءَ نوشکی ءُ دالبندیں ھم دو ژانگولیں جونانی دست کپگ ءِ ھال سربوتگ ات کہ آھانی تہ ءَ یکے ءِ پجار ھنگت کنگ نہ بوتگ –

چارشمبے ءِ شپ ءَ کیچ ءِ بنجاھی شھر تربت ءَ ایف سی ءِ چیل پوسٹ ءِ سر ءَ اُرش کنگ کنگ بیتگ-

واکدارانی رد ءَ بالی پٹ ءِ نزیک ءَ ایف سی ءِ چیک پوسٹ ءِ سر ءَ راکٹ اُرش کنگ بیتگ ایشی ءِ توار دور دور ءَ اشکنگ بیتگ –

وئیل ءَ پد پوج ءَ دمگ ءَ تیرگواری کتگ ءُ راہ ءُ در بستگ اَنت ءُ ترندیں پٹ ءُ پول کتگ اَنت-

زانگ بہ بیت گوستگیں شپ ءَ ایشی ءَ پیش تربت ءِ دمگ آبسر ءَ پاکستانی پوج ءِ ٹریننگ سینٹر ءِ ھم سلاہ بندیں مردماں نشانگ کتگ ءُ پشت مانداتگ –

دمگی مردمانی رد ءَ اُرش ءِ تراک ءُ تیرگواریانی توار اشکنگ بیتگ اَنت-

ایشاں ابید گوستگیں شپ ءَ تربت ءَ ھم ناشناسیں مردماں تیرگواری کرتگ ءُ دو مردم کشتگ اَنت-

تیرگواری ءَ چہ بیران بیتگیں مردمانی سیادی کراچی ءِ گوشگ نوگ ءَ اِنت کہ آیانی پجار نور الھی ء انوبکر ءُ استاد نعیم ءِ ناماں زانگ بیتگ اَنت-

پولیس ءِ رد ءَ تیرگواری ءِ وئیل چاہ سر کراس ءَ پیش اتکگ کہ ھردوک کار واش سروس ءَ پیش کہ وئیل ءں درگت ءَ دگہ سرپدی نہ بیتگ-

سربوتگیں ھالانی رِد ءَ کیچ ءِ بنجاھی شھر تربت ءِ دمگ آپسر ءَ ناشناسیں مردماں ایف سی ٹریننگ سنٹر ءِ سر ءَ اُرش کتگ –

ھمود ءَ ساڑی ایں گواھانی رِد ءَ اُرش ءِ میان ءَ سک باز تیرگواری ءُ تراکانی توار اشکُنگ بوتگ –

بلے تنی وھدی اُرش ءَ ھچ وڈیں تاوانانی ھال دیم ءَ نہ اتکگ ءُ ناکہ اُرش ءِ زمہ واری منگ بوتگ –

بلوچ سلاہ بندیں گل بلوچ لبریشن ٹائیگرز ءِ جارکش میران بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مروچی سھب ءَ بلوچستان ءِ دمگ ڈیرہ بگٹی ءَ سوئی ءِ ھند رئیس توخ ءُ کش ءُ گوری ھند ءُ دمگاں مزنیں پاکستانی پوج ءَ لشکر کشی بندات کتگ –

جارکش ءَ گوشتگ کہ بی ایل ٹی ءِ سنگتاں لس مردمانی پھازگ ءَ پہ دمگ ءِ تہ ءَ شُتگ ءُ پوج ءِ اُرش بے سوب کُتگ – سرجمیں روچ ءَ برجاھیں میڑ ءَ دھ کارمند کُشتگ انت ھالانی رِد ءَ دوازدہ زدگ ھم بوتگ انت وھدیکہ بی ایل ٹی ءِ سنگتاں دو پوجی گاڑی ھم دستگیگ کُتگ ءُ مانداشتگ انت –

میران بلوچ ءِ گوشگ ات کہ بلوچ راج ءِ پھازگ ءَ پہ ھر سنگر ءَ دژمن ءِ گوم ءَ میڑ ءَ مدامی ساڑی انت –

میتگ

نبشتہ کار: سیپ بلوچ

دی بلوچستان پوسٹ

مدتے ءَ رند هما میتگ ءَ من واتر ات آں کہ زندگی ءِ ایردستیں کسانی گْوازینتگ اَت ، آ وهد ءَ مئے هلک ءَ مئے چار ءُ پنچ لوگ اِت انت ، زندگی ءُ زندمان هما داب ءَ ات کہ پیشگاهانی ایراپ ءَ زندگی ءَ بیرک جتگ ات ءُ دمبال اَت ، گوات ءِ شیکگاں ملار ات میتگ ، هما میتگ کہ شپ ءَ شپ ءِ نام نزانتگ اَت ، مئے لیب جاه ءُ لیب جاه ءِ کارست ماه بانک ، کہ مئے میتگ ءِ زیبائی ءَ اَت ، همک دمان ءَ کہ زندگی ءَ ملوری ءِ برمشاں چیهانٹ اِت ، گڑا ماه بانک ءِ پیشگاه ءَ زندگی ءِ بیرک اڑ اتگ اَت ، ما دائم بیرک ءِ چیرگ ءَ نشت ءُ لیب کت-

مرچی یازده سال ءَ پد میتگ ءَ واتر اِت آں میتگ سک مزن اِت ، لوگ پیسری جاه ءَ نہ ات انت مردماں وتی رنگ ءُ دْروشم مٹ کتگ ات هرکس ءَ وتی پیشگاه دیوارانی تہ ءَ کتگ ات ، جتاجتائیں میتگانی مردماں اتکگ ءُ جاگہ کتگ ات هچ کس کسیگی نہ اِت –

همے کہ گندان ءِ سرون ءَ چم کپت آں داں هما پیشگاه کہ زندگی ءِ بیرک درتکگ اَت درچک هشک ءُ ویران اِت انت لوگ ڈِر اِتگ اِت انت ءُ کَرگین ءِ یک دارے مِکّ اَت ءُ لوگانی دپ ءِ واب جاهیں ڈیکی چُنڈ چُنڈ اِت انت، من پرپٹ داشت ءُ وهدے ندارگ ءَ لگ اِت آں زندگی ءِ گوستانک ءَ هیالانی مهری ءَ سپر کُت ءُ یازده سال پشت شت آں کہ ، ماهبانک ءِ لوگ چتو زیبا اِت انت ءُ دائم گوں وشیں کندگ ءُ ٹهکاں میتگ ءِ سرازرتگ اَت ، شپانی شپ نیادی ءُ همساهگانی هیال ءُ دلگْوش ءَ پہ میتگ ءِ شرتریں جنین اَت همے کہ کسے نادراه بوت یا سیر ءُ وشی ءِ درستانی ساری ءِ لڑ ءَ ماهبانک ءِ بچکندانی توار اَت-

مرچی کہ چم ماں ماهبانک ءِ لوگاں کپتاں داں کس گندگ ءَ نہ اتک ، یک هنچیں بیچاڑی ءِ دل ءِ روتگاں دجگ ءَ لگ ات ، کہ بئے سماه بوتاں اے تیوگیں هلک ءِ زیبائی چماں پُرشت ءُ نگاه کور بوتاں داں من پرپٹ ککے جت ءُ جنزان بوتاں کہ گْوستانک ءِ پترے یک دگہ گسے هست ات کہ پشتی نیمگ ءَ ات ءُ پجاروکے ات ، داں من همود ءَ وت ءَ سر کُت مردماں یکبرے چو بے انا ءَ چار اِت بلے منی اندر ءَ جست آژنا ات کہ اے مردمے بیت من درستاں ساری همے جست ءَ ئِے کن آں ماهبانک کجا اِنت ؟ داں من اوشتاتگ اِت آں ڈنا پیرزالے من ءَ هیرت هیرت ءَ چارگ ءَ لگ اِت ، ءُ من دْروت ءُ دْراهی ءَ پیسر جست کت کہ ماهبانک کجا اِنت ؟ لڈ اتگ شتگ جاگهے بلکیں؟-

پیرزال اجکہ ات بلے هچ وڑیں پسہ ئِے نہ دات چو درامد ءَ چارگ ات
من ءَ بلے دگہ جنینے اتک ءُ من ءَ گوشت ئِے بیا تگرد ءَ نند هنچو لگ ایت چہ دیر ءَ پیداک ئِے ، من اتک ءُتگرد ءَ نشت آں جستاں منی باتن چو سهرچکیں تیر ءَ سمب سمب کتگ ات داں جنین ءَ آپ آؤرت نشت کہ جست کن آں من کے آں ،؟ داں من یکبرے پد ءَ وتی جست درائینت ءُ گوشت ماهبانک ءِ هنکین چے ءَ چو سنٹ کپتگ ءُ پیشگاه ئِے ویران اِنت؟
جنین ءَ پسہ دات کہ ماهبانک سئے سال بیت بیران بیتگ ؟ ماهبانک ءِ گْور ءَ کینسرے ریشے در اتکگ بلے گوں دری مردماں گپ ئِے کُت نہ کتگ ماهبانک ءِ پیشگاه ءَ چشیں مردمے نہ بوتگ کہ ماهبانک ءَ بہ بارت ءُ شهرے ءَ الاج بہ کنت داں سئے سال همے ٹپ ءُ ٹوریں بدن ءَ لونجان بوتگ کس ءَ سوابی جست نہ کتگ کہ داں گڈی ءَ بیران بوتگ-

اے گپانی اشکنگ ءَ رند منی جبین ءَ آسے لگ اِت کہ چمانی ارسان شکل میسینت داں من در اتک آں داں من ءَ کسے جست بہ کنت کہ من کے آں، روچ ایر بُک اتگ ات کہ من گوں آیگی پاداں پرپٹ زرت ءُ در اتک آں-

داں همے سماه کُت کہ اگاں ما گوستانک ءُ لڑ اتگیں پیشگاهاں اناگهی واتر کُتیں بلکیں مرچی سبزگیں درچکے نہ مُرت بلے هیپ کہ زندگی چتو لیب دارین ایت-

چوناها چاگرد زئیپ اِنت چاگرد ءِ چپ ءُ چوٹیں دریگانی تہ ءَ باید اِنت کہ چمشانک دیگ بہ بیت هرچ هما میتگ کہ ویران کنگ بوتگ یا مردماں لهتیں پیشگاه همود ءَ یل کتگ ماں شهراں شتگ باید انت داں هدے ءَ دستا ئِے بِیت بہ واتر ایت ءُ گوستانکے ءِ کسهاں بہ شوهاز ایت زندگی ءِ زئیپیں کهولاں کہ بیوسی کوریں میتگاں نشتگاں آیانی هال ءَ بروت ءُ بہ پرُس ایت کہ زندگی ءِ یاتانی پشت کپتگیں مڈی انت ، مرچی کہ زندگی ءَ یازده سال واتر وت ءَ هنکین ءَ سر کُت داں باز ‌دردیگیں بیتاں ، چنچو درد ءُ دور زرتگ ات کہ کسانی ءِ لیب جاهیں هنکین اش بلکیں درمان بکنت بلے هنکین ءَ گیشتر ٹپ چونڈ اِت انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ ڈیرہ بگٹی ءِ دمگ سوئی رئیس توخ ءَ پاکستانی پوج ءِ لشکر کشی برجاہ –

اھوالکار ءِ رِد ءَ ایف سی ءَ دمگی مردمانی گساں بیڑ برتگ ءُ ایف سی ءِ پہ دیم تیرگواری ءَ بازیں مال ءُ دلوت ءِ مُرتگ انت وھدیکہ بازیں دمگی دھکانکار زدگ بوتگ انت کہ آھانی تہ ءَ زھگ ءُ.زالبول ھم ھوار انت –

ھالانی رِد ءَ اے وھدی ایف سی مزنیں کچے ءَ دمگ ءِ تہ ءَ ساڑی انت ءُ دمگی مردمانی سر ءَ تیرگواری ءُ بمبگواری کنگ ءَ انت –

بلے پدا ھم تنی وھدی سرکاری واکدارانی نیمگ ءَ اے درگت ءَ ھچ وڈیں درشان دیگ نہ بوتگ – چہ سوئی سربوتگیں ھالانی رِد ءَ تنی وھدی پوج ءَ مزنیں کچے ءَ دمگ وتی انگر ءَ کتگ دو نیمگی تیرگواری ءِ ھم ھال آیگ انت –

سربوتگیں ھالانی رِد ءَ بلوچستان ءِ دمگ ڈیرہ بگٹی ءَ ناشناسیں مردماں ایف سی ءِ کارمندانی سر ءَ اُرش کُتگ، اُرش ءَ یک کارمندے مرتگ ءُ سَے زدگ بوتگ انت –

اُرش ڈیرہ بگٹی ءِ دمگ سوئی رئیس توخ ءَ بوتگ – اھوالکار ءِ رِد ءَ پوج اے دمگ ءَ لشکر کشی ءَ دلگوش بوتگ کہ سلاہ بندیں مردماں اُرش کتگ –

واکداراں اُرش ءِ ھبر راست کتگ ءُ گوشتگ کہ اے اُرش ءَ یک کارمندے مرتگ ءُ سَے زدگ بوتگ انت مُرتگیں کارمندے پجار سپاھی ناصر خان نام ءَ بوتگ –

ارش ءِ زمہ واری تنی وھدی ھچ گل ءَ نہ منّ اِتگ –

بلوچستان ءَ وتکُشی ءِ روِشت

نبشتہ کار: زھیر بلوچ

دی بلوچستان پوسٹ

انچو کہ ما شُما سرپدیں بلوچ گُلزمین زوراکانی زیردست انت۔ اے زورگری ءَ بلوچ ءِ چاگرد، زندمان کار ءُ کَسب ءُ بلوچ راج ءِ مجگ ءِ سر ءَ باز سان دور داتگ۔ گوستگیں ھپتاد ءُ پنچ سال انت کہ زورگریں اِستان ءَ بلوچ ڈیھ وتی چنگلانی چیرا کُتگ ءُ بلوچ ءِ چُکچینی ءَ کنگ ءَ اِنت۔ اے چُکچینی روشت ءِ تہ ءَ زورگِریں لشکر وتی سرجمیں زور ءَ کارمرز کنگ ءَ انت۔

اے رِد ءَ زورگریں لشکر بمب ءُ ٹوپاں ھوار زورآنسری آوارجنی، کُشگ ءُ دور دیگ، تُرس ءُ پاتراپ، لب ءُ لالچ، نشہ ءُ سلکاری، نوک آبادکاریں وانگی روشت ءُ مجگی ازیتانی سلاھاں کارمرز کنگ ءَ انت۔ زورگِر ءِ اے دُرسیں کارپدانی آسر ءَ بلوچ چاگرد ءُ بلوچ ءِ زندمان سرجم ءَ تباہ کُتگ۔

مرچی باندا ما شُما گندگ ءَ ایں کہ بلوچستان ءَ وت کُشی ءِ روشت ءُ وئیلانی تہ ءَ ھمُک روچ گیشی پیداک انت۔ اے رِد ءَ گیشتر وانِندگ ءُ ورناہ مارا گندگ ءَ کاینت کہ وت کُشی کنگ ءَ انت۔ چُشیں روچ ءِ نہ گوز ایت کہ بلوچستان ءِ کجام دمگے ءَ یک ناں یک مردمے وتکُشی نہ کنگ ءَ اِنت۔ نوں جُست ایش انت کہ بلوچستان ءِ تہ ءَ ورناہ ءُ نودربر چی ءَ وتکُشی کنگ ءَ انت؟ ایشی ءِ مستریں سبب زیردستی ءُ نوک آبادکاریں روشت انت کہ بلوچ راج ءَ را مجگی گُلام ءِ جوڑ کتگ۔ پد ءَ بلوچستان ءَ کار ءُ روزگاری جیڑا ءَ ھوار وانگی جیڑا ءُ نشہ ءِ جیڑا ھم روچ پہ روچ چہ زورگِر ءِ نیمگ ءَ گیش ودان اِنت۔ دنیا ءِ تہ ءَ ازگارتریں سرزمین ءِ واھُند مرچی پہ چُنڈے نان ءَ وازمندگ اِنت۔دومی نیمگ ءَ زورگریں لشکر ءَ یک انچیں تُرسے بلوچستان ءِ تہ ءَ ودی کتگ کہ بلوچ راج وتی گِس ءِ تہ ءَ ھم ایمن نہ انت۔ لج ءُ ناموس ءِ پامالی بلوچ زالبولانی زورآنسری آوارجنی ءُ کمشرپی ھمُک روچ گیش بوان انت۔ھمے سبب انت کہ نون بلوچستان ءَ مردین ءَ ھوار زالبول ھم وتکُشی کنگ ءَ انت-

اے رِد ءَ بازیں درور مئے دیم ءَ ھست انت کہ بلوچ زالبول زورگریں لشکر ءُ آئی ءِ داشتگیں کاسگ چٹانی زوراکی ءِ آماچ بوگ ءَ انت۔ اے رِد ءَ ھمے زوتاں چہ آواران ءَ نجمہ بلوچ ءِ درور مئے شمئے دیم ءَ انت کہ پہ وتی بلوچی گیرت ءِ رکینگ ءِ ھاتر ءَ وتکُشی کُت یے۔ چُشیں درور بلوچستان ءَ سک باز ھست کہ ھمُک روچ چُشیں وئیل بوگ ءَ انت۔ باز مردم وَ تُرس ءُ بیم ءِ آماچ بنت ءُ وتی بلوچی اِزت ءِ ھاتر ءَ بیتوار بنت ھستیں وھد ءَ بلوچستان ءِ سرجمیں وانگجاہ زورگریں لشکر ءَ وتی بُنجل ءُ پانگس جوڑ کتگ انت۔ بلوچستان ءِ مزن شاھدربر جاہ ءَ بگِر دانکہ وانگ جاھاں درا پھگ لشکری بُنجل جوڑ بوتگ انت۔ ھمے سبب ءَ بلوچ نودربر تُرس ءِ آماچ انت آ تُپنگ ءِ ساھگ ءَ ونت نہ کنگ ءَ انت۔

دومی نیمگ ءَ بلوچستان ءِ وانگ جاہ ءُ شاھدربر جاھاں زورگریں ریاست ءِ وانگی نِزام ءَ بلوچ نودربر مجگی نادُراہ کتگ انت۔ چی ءَ ھودا نودربر تُرس ءُ بیم ءُ آماچ کنگ بنت نودربرانی توار ایرموش کنگ بیت۔ آھانی بُنکی لوٹ لگتمال کنگ بنت اگاں توار چست بکن انت گُڑا دزگیر کنگ ءُ وانگ جاہ ءَ در کنگ بنت۔ ھمے وڑا یک دگہ مزنیں جیڑایے ما گندگ ءَ ایں کہ بلوچ نودربرانی فکر ءُ سوچ مرچاں بس ڈگری گِرگ ءُ گیش چے گیش لمبر گِرگ ءِ ریس ءَ لگ اتگ انت۔ اگاں کسے ءَ ڈگری نہ رس ایت یا لمبر ءِ کم بنت گُڑا مجگی نادُراہ بیت ءُ وتا ملامت کنت۔ چیاکہ مرچی کس پہ زانت ءُ زانگ ءِ ھاتر ءَ وانگ ءَ نہ انت بلکیں بس ڈگری ءُ نوکری گِرگ ءُ زَر ءِ کماھگ ءِ پُشت ءَ کپتگ۔

بلوچستان ءِ تہ ءَ وتکُشی ءِ گیش بوگ ءِ روشت باز بژنیگیں گپے۔ اے درگت ءَ مئے لبزانکی ءُ زانتکاریں مردماں ، سیاسی ءُ چاگردی جھدکاریں سنگتاں گامگیج زورگ لوٹ ایت وتی راج ءِ ورناہ سوج ءُ سر کنگ لوٹ انت دانکہ آ وتکُشی ءَ چے وتا دور بدار انت۔دومی من بلوچ مات ءُ پِتاں گوں ھم دزبندی کن آں کہ وتی چُکاں وھد بدی اِت آھانی گپ ءَ گوشبدار اِت ءُ آھانی دلبڈی ءَ بکن اِت۔ چیاکہ باز مردم وتی لوگ ءِ تہ ءَ ھم زھنی ازیت ءِ آماچ بنت۔ لوگ ءِ تہ ءَ زھنی تاھیر نہ گند انت۔ مارا شمارا وتی لوگ وتی چاگرد ءُ وتی گلزمین پلگارگی انت۔ وتی راج ءِ رُژنائیں باندات بلوچ ورنا ءُ نودربراں پلگارگی انت۔ اے سرجمیں بلوچ راج ءِ جیڑا اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ ژوپ ءَ سلاہ بندیں مردماں پوجی بنجل ءِ سر ءَ اُرش کتگ، اُرشکار ءُ پوج ءِ میان ءَ ترندیں جنگ ءُ چوپ برجاہ –

اے وھد ءَ ژوپ ءِ شھر ءَ کسان ءُ مزنیں سلاھانی تیرگواری ءُ تراکانی توار اشکنگ بوگ ءَ اَنت- دمگی واکدارانی گوشگ اِنت تیرگواری ءَ پنچ شھری زدگ بیتگ اَنت-

کمشنر ژوب ڈویژن سعید عمرانی ءَ اُرش ءِ ھال راست کنان ءَ رسانکدراں گوشتگ کہ راکٹ اُرش ءُ تیرگواری ءِ سبب ءَ سکیورٹی لشکر ءِ چار کارندہ ءُ چار لس شھری زدگ بیتگ اَنت، آ ٹپانی درمانی ءَ سول ھسپتال ءَ برگ بیتگ اَنت-

آئی ءِ رد ءَ پوج ءُ دگہ لشکری ادارہ چھاونی ءِ تہ ءَ پٹ ءُ پول کنگ ءَ اَنت ءُ پولیس ءُ لیویز لشکر ھم شھریانی کمک ءَ ساجو اَنت ءُ وتی پوزیشناں جاڑیگ بہ کن اَنت-

ڈپٹی کمشنر ءِ رد ءَ آپریشن ءَ پوجی ھیلی کاپٹر ھم کارمرد بوگ ءَ اِنت-

یک دگہ کارندھے ءَ نام ءِ پدر نہ کنگ ءَ گوشتگ ’ بنجاھی بنجل ءِ سر ءَ مزنیں اُرشے کہ ایشی ءِ ھلاپ ءَ بیڑ برجاہ اِنت شش پوجی کارندہ زدگ بیتگ اَنت بازینانی مرگ ءِ ھم ھال اَنت دو یا سَے اُرشکار جنگ بیتگ اَنت ‘-

سول ھسپتال ءِ واکدارانی رد ءَ جتا جتائیں ھنداں سیادی داروکیں پنچ ٹپیگ آرگ بیتگ اَنت ایشانی یک زالبول ءُ دو زھگ ھوار اَنت-

واکدارانی رد ءَ زدگ بیتگیں زالبول ءِ جاور ناگیگی ءَ چہ ڈن اَنت آ گیشیں ٹپانی درمانی ءَ شال ءَ برگ بیتگ –

لشکری بنشونانی نیمگ ءَ داں انگت ءَ وئیل ءِ بارو ءَ ھچ درشان دیم ءَ نیتکگ اَنت بلے اُرش ءِ زمہ واری تھریک جھاد پاکستان ءَ پہ وت زرتگ-

دمگی مردمانی رد ءَ تیرگواری ءِ وئیل شپ ءِ ساھت دو بج ءَ بندات بیتگ ءُ داں سھب ءِ پنچ ءَ برجاہ بیتگ ءُ پد ءَ لھتے اداراں پد بندات بیتگ-