نکسل واد Naxalite زرمبشت ءِ بنھشت ءُ رُدوم
نبشتہ کار: نبیل نود
دی بلوچستان پوسٹ
جنگ کہ بندات بیت نہ لوگاں دریگے پش کپ ایت نے کہ ماں دیوالاں پہ ساھگے۔ مردمانی ھمرائی ءَ دگ ءُ میتگ ھم درانڈیھ بنت ، چم وتی وابانی گندگ ءَ پراموش باں ، دل وتی دوستگیں چیزاں بے ھیال کنت، ھر گور ءَ نھینگیں ھون ءُ دْرشتگیں جونانی کَسہ بیت ، کسے پہ وتی ساہ ءِ پھریزگ ءَ تچ ایت کَسے پہ وتی ھاک ءِ ، تئی زمین کہ زوراکے ءِ دست ءَ ایرجیگ بیت پہ تو جنگ ءَ اَبید ھچ چشیں راہ ءُ درے نہ مانیت کہ چرائی ءَ تو وتی زمین ءَ دوبر چہ آئی ءِ دست ءَ پچبِگر ءُ آجو بہ کن ئے ۔ پَریشی ءَ ترا ھر ھما دیمونی ءُ تاوانانی پُر کنگ ءَ ساڑی بوھگی اِنت کہ یک ایردستیں راجے ءَ دیگ کَپنت ، آ تُری کجام ھم دروشم ءَ بہ بنت۔
زورآور ءِ بگیری ءَ ایردستیں راجانی ھزاراں زرمبشت تئی چَمانی دیما گْوز ایت ، باز ءَ وشیں روچانی مستاگ زیت بھت ءَ کپتگ اَنت ، باز ءَ وتی تراولانی کُبلیں سما آپ کُتگ اَنت تنیگتا آیاں ایمنیں سھبانی وشیں سمین نسیب ءَ نہ کپتگ ۔ اے راھے ھر مساپر ءَ ھمے ھیال گْور بہ بیت کہ من اے آگھیں واب ءِ موکگ ءَ کہ در کپتگ اَنت ایشی ءِ ڈیسانی دیم ءَ وتی ھر دوستگیں چیز ءِ دیمونی دیگے سکت ءُ ھاٹیگ بہ داراں ۔ بازیں زرمبشت کہ چست بیتگ اَنت مرچی آ وھد ءِ مُج ءُ لوڑانی آدینک ءَ گبار اَنت ۔ زرمبشے کہ سوبمَنْد بیتگ یا کہ وتی واھگانی پیلو کنگ ءَ بے سوب بیتگ اے وتی توک ءَ وت دراجکشیں بنگپ اَنت ۔ ما ھمے زرمبشتانی رِد ءَ بہ چاریں یک سھرا ءُ پجارتگیں نامے کہ مارا نکسل واد زرمبشت ءِ نام ءَ گندگ ءَ کیت۔
نکسل واد کمیونسٹ آشوبْیانی زرمبشت ءِ نام اِنت آئی ءِ بنگیج 25 مئی 1967 روایرشتی بنگال ءِ شَھر دارجلنگ ءِ کوچگ ” نکسل باڑی ” ءَ چہ بیت ۔ وھدے کہ دھکان زمیندارانی بَگیری ءَ زھرشانی ءَ بنت آیانی لوٹ ھمے بیت کہ مئے زمین زوراک ءُ زمینداراں چہ پچگرگ ءُ مارا دوبر دیگ بہ بنت ھمے روچ ءَ بنگال پولیس زھرشانی کنوکانی سرا تیرگواری کنت ءُ ھمے آسر ءَ 9 زالبول ءُ یک زھگے بیران بیت اِنت-
روایرشتی بنگال ءَ زُلم آماچیں پوریاگر ، دھکان کار ءُ لگت مالیں مھلوک کامریڈ چارو مجمدار ءِ سرپانیءَ سرکار ءُ پولیس ءِ بگیری ءَ پاد کاینت، مجمدار ءِ ھیال ءُ لیکہ ھمے بیت کہ استانی رھبند ھندوستان ءِ پوریاگر ءُ دھکانانی جاور ءُ بے دزرسْیانی زمہ وار اَنت ۔ اے زوراکی ایردستیانی بگیری ءَ یک سلاہ بندیں آشوبے ءِ درکار اِنت مروشی ھمے جنز ءَ نکسل باڑی بغاوت ءِ نام ءَ ماں جھان ءَ پجارگ ءُ زانگ بیت ھمے بغاوت ءِ سَروکی ءَ یک ھَندی پوریاگر ٹولی “سلیگوری گروپ” ءِ کنت۔
مئی 1967 چارو مجمدار ءُ جنگال نامیں دھکانے ءِ سروکی ءَ “سلیگوری گروپ” پولیس چوکی سرکاری ماڑی ءُ زمیندارانی سر ءَ چیرجنگی اُرشاں بُنگیج کن اَنت۔ جولائی 1967 ءَ ھندوستانی سرکار پولیس ءِ بےسوبیءَ پَد سلیگوری گروپ ءِ پروش دیگ ءِ ھاتر ءَ پہ فوجی کمانڈواں دیم دنت ھمے لشکرکشی ءَ جنگال سنتھال، علی گورکھا ءُ تری باہنی کانو ءُ سلیگوری گروپ ءِ بازیں سَریں رھشون جَنئگ بنت ءُ مجومدار چیرزمین بیت۔ پد ءَ1971 ءِ انگریں وھد ءُ پاساں steeplechase campaign دگہ یک لشکرکشی ءِ بندات کنت ھمے لشکرکشی ءَ کساس بیست ھزار کَچ ءَ نکسلیانی ھونریچی ءَ کنت-
بلے دشمن آئی ءِ چاروگری ءَ کنت چو ساھگ ءَ آئی ءِ پُشت ءَ تچیت کہ اے دمان ءُ آ دمان ءَ منی دست ءَ بِیت اِنت ۔
یک جولائی 1972 ءَ آئی ءِ ھالرسانی ھمراہ ءَ دزگیر کناں تَاں آ کامریڈ ءِ جاہ ءِ دَرانی نشاندھی ءَ کنت ھمے روچ ءَ کلکتہ ءِ چیریں جاھے ءَ دزگیر کنگ بیت ءُ روایرشتی بنگال ءِ نام دپیں کیز لاز بازار تھانہ بَرگ ءُ بندیگ کنت بیت۔
28 جولائی 1972 آئی ءِ مَرگ ءِ ھبر چو سبزیں بازارے ءَ ماں آس ءَ تَریت ۔ ھندوستان ءِ سرکار ھمے جیڑ ایت کہ کامریڈ چارو ءِ مَرگ ءَ گوں اے لیکہ ءُ جُنز ھم ساہ دینت گوں بلے اے ھبر پَھک ءَ وتی چَپ اِنت چیا کہ ما دنیا ءُ جھان ءِ جنزانی تہ ءَ چاریں کہ جنزانی مستریں سرپان ءُ رھشون جَنگ بوتگ اَنت بلے لیکہ ءُ جنز وتی جاہ ءَ نہ سُریتگ اَنت ، لیکہ ءُ جنزانی مستریں سرچمگ کہ مُھکمیں گَل بنت تہ پردانی رَوگ ءَ آیاں گوں چشیں بلائیں تاوان نہ رسیت ، مھکمیں رھبند ءُ گلاں گوں جنز وتی گڈی وابانی نیمگ ءَ داں وتی گڈی سرپان ءَ گوں جنزوک بنت-
کامریڈ دارو مجمدار ءِ مَرگ ءَ پد ھم نکسل واد وھد ءِ گوانزگ ءَ گوں ھونانی لیلواں چِیک وران کنت ، سریکاکولم ءِ مَرگ ءَ بِگر گرین ہَنٹ (greenhunt یک لشکر کشی ءِ کہ ھندوستانی پوجیانی نیمگ ءَ چہ 2009 نکسلیانی سر ءَ کنگ بیت اِنت) ءُ سلواجدوم ءَ دَرا ءُ کامریڈ کشن ءِ مَرگ ءَ تَہ بْیا ھچ چشیں زور پہ آیانی ھلاس کنگ ءَ کار ءَ نیتکگ اَنت-
ماو نواز Maoist ءُ نکسل جنگجو Naxalite اسل ءَ اے دویں یکیں جُنز ءِ دو نام اَنت اے جنز چین ءِ رھشون ماؤ زے تنگ mao Zedong ءِ منوگر اِنت۔ پمشکا اِشاں ماوویسٹ، ماو نواز باغی یا ماؤ وادی گُشنت ۔ اِشاں Naxalite نسکل پمشکا گُشنت کہ نکسل وادی باڑی کُوچگ ءَ چہ اے زرمبشت ءِ بُنگیج بیتگ۔
ھندوستان ءِ ھما ریاستاں کہ اودا نکسل زرمبشت چست اِنت آئی ءَ Red Corridor گُشنت اشی ءِ تہ ءَ 28 ریاست ءُ 160 زِلّہ ھَوار اَنت آیانی تہ ءَ آندھرا پردیش، بِہار، چھتیس گڑھ، جھاڑ کھن، مدھیہ پردیش، روایرشتی بنگال، مہاراشٹرا ، اڈیسہ، تلنگانہ ءُ اُترپردیش نام گون اَنت-
مُچانکی دروشم ءَ اے یاگیانی کَچ ءُ کساس بیست ھزار ءَ بُرز چِل ھزارءِ نزیک ءَ سر اِنت۔ نودربرانی آیگ ءُ اے زرمبشت ءِ بھر بوھگ گوں یکشل ءُ تیزی ءَ گوں برجاہ اِنت اِشانی سلاھانی تہ ءَ آئی ڈی بمب ، دستی بمب ، شاٹ گنز، کلاشنکوف، رائیفلز دگے وتکاریں سلاہ ھوار اَنت-
لیکہے بنیاد ءَ نکسل زرمبشت سوشلسٹ ، مارکسسٹ ءِ لیکہ یے منوکگر اِنت ماؤزے تنگ، کارل مارکس، جوزف اسٹالن ، چی گویرا ءُ فیڈیل کاسٹرو ءَ وتی راھے راہ شناسْیں چیدگ سرپد بنت ءُ ھمایانی کَشتگیں کِشکانی دل ءَ گام جنان ءُ جنزان اَنت۔
ماؤ باگیانی اوتاک چھتیس گڑھ ءُ جھاڑ کنڈ ءِ جنگلانی تہ ءَ اَنت ، وتی چپ ءُ چاگرد ءَ اِیشاں باردوی سُرنگ کل کُتگ پرچا کہ اے جنگل اَنچش سْیاہ ءُ تھار اَنت اشانی پٹ ءُ پولگ پہ دژمن ءَ ارزان نہ انت ۔ ھر ھپتگانی تہ ءَ وتی سنگراں بدل کناں پمیشکا اِیشانی جاھ ءِ ڈس ءُ پولگ انچش اِنت کہ جون ءُ جولائی ءِ ماھاں روچ ءَ چم سک دیگ ءُ چارگ اِنت ۔
پَد ءَ جنگانی سوبین ءُ بے سوب بوھگ ءِ یک مزنیں دستے زمینی جغرافیائیگ اِنت۔ پمیشکا کوہ ءُ جنگل جنزانی ھما المی ئیں بھر اَنت اَبید ءِ اشانی بوھگ ءَ جَنگانی باج بَرگ سک ءَ گِران اِنت-
نکسل باگیانی درستاں چہ سوبین تِریں ’حکمت عملی‘ دژمن ءِ دَگ ءُ موٹلانی نَزی گْوراں بارودی سُرنگ چیر کنگ ءُ دومی گوں مزنیں کساسے ءَ لشکر ءِ راھانی سر ءَ سنگر گِرگ ءُ آیانی سر ءَ ٹوپ ءُ بمباں گوں ٹوھیں اُرش کَنگ ئیگ اِنت ، آ باز بَرا وتی دزگیر بیتگیں ھمراھانی یل کنگ ئِے ھاتر ءَ ریاست ءِ کیز ءُ آمد گِسانی سر ءَ اُرش ھم کن اَنت-
دژمن ءِ اُرشاں چہ رَکگ ئے ھاتر ءَ آیانی دگہ سوبمَنْدیں گامگیجے یکشل ءَ سُر پُر کَنگ ئیگ اِنت۔ آ سک باز ٹولیانی تَھا بَھرءُ بانگ اَنت ءُ آیانی جتا جتائیں جاہ ءُ روٹ بنت کہ پابندی ءِ گون ءَ مٹ ءُ بدل بوھگ ئِے توک ءَ اَنت۔
آیاں وتی وردن ءُ وراک ءُ تمبو مُدام بَڈا اَنت جاھے کہ جَلاں ھمود ءَ وتی بنجل کناں لھتے ساھت پَد اے جاھ ءَ بدل کناں ءُ دگہ نیمگے ءَ پہ رھادگ بنت۔ ایشانی ھمرائی ءَ زالبولیں باگی ھم گوناں کہ وتی کچ ءُ کساس ءَ کار کَننت گوں ھر جاہ کہ المی بوت وت ھم جنگانی تہ ءَ دژمن ءِ دیم ءَ چو مُھکمیں تْرشت ءَ اوشت اَنت-
یکشل ءَ سُرپُر ءُ یکیں جاہ ءَ بُنجل نہ کنگ ئِے سوب ءَ آیانی سر ءَ سوبمَنْدیں اُرش کنگ اِنچو ارزان نہ اِنت ۔ آ چہ چیرجنگی رپک ءُ ھُنرانی سوھویں مردم اَنت ءُ وتی جنز ءَ گوں ھمے کساس ءَ ایماندار انت۔ تنیگت ءَ وتی دژمن ءِ آیاں بیست ھزار ءِ کَچ ءَ سپائی کُشتگ ءُ ریاست ءَ را بے کساس تاوان ءِ دیمپان کُرتگ مرچی پَنچ ءُ شش دَھک ءِ گْوزگ ءَ پد اوں نکسل باڑی زرمبشت وتی منزل ءَ پہ روان اِنت چہ زیک ءَ مرچی گیش زورآور ءُ مُھکم اِنت بلکیں میان استمانی سوشلسٹ جنزانی ویرانی پَد اوں مروشی سبز اِنت۔
سُھریں بیرک ھر گوزوکیں وھد ءَ گوں آزمان ءِ بُرز ءُ بلندیں بالاد ءَ گوں سلام ءُ دروتی اِنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
