اسرائیل ءِ نیمگ ءَ غزہ ءِ سر ءَ برزی ءُ زمینی بیڑانی توک ءَ ترندی،انٹرنیٹ سروس بند

اسرائیل ءِ نیمگ ءَ غزہ ءِ سر ءَ ترندیں بمبگواری ءِ سبب ءَ انٹرنیٹ ءُ فون سروس آسراتی بند بیتگ انت چریشی ءَ پد اود ءُ بیست ءُ سَے لکھ مردمانی گون ءُ دگہ دنیا ءِ مردماں رھوتی بند بیتگ-

ھال سر کنوکیں ادارہ ایسوسی ایٹڈ پریس ءِ رد ءَ اسرائیل ءِ لشکر ءَ گوشتگ زمینی کاروائیاں گیش کنگ ءَ ایں ایشی ءُ چہ گمان ھمے بیت اِنت اسرائیل دمگ ءَ زیردست کنگ ءَ نزیک ءَ سر بیتگ-

آدینگ ءِ روچ ءَ غزہ ءِ شھر ءَ بازیں برزی اُرشاں پد انٹرنیٹ سروس، مونائل ءُ فون سروس بند بیتگ اَنت ءُ میان اُستمان ءِ گپ ریڈ کریسٹ ءِ نیمگ ءَ ھم آپریشن روم ءُ درمان کتگینانی گون ءَ رھوتی بند بیتگ-

ریڈ کریسنٹ ءَ اے گمان پدر کتگ کہ فون سروس ءِ بند بوگ ءَ پد سانمندیں مردم ایمبولینس سروس ءُ رھوت کت نہ کن اَنت ءُ دگہ گلاں ھم وتی ٹیمانی گون ءَ رھوتی نہ بیتگ انت-

اسرائیل ءِ پوج ءِ جارکش ریئر ایڈمرل ڈینیئل ھگاری ءَ گوشتگ کہ زمینی لشکر غزہ ءِ کاروائیاں گیش کنگ اِنت ءُ جنگ وتی نشانگ کتگیں جاہ ءَ سرجمی ءِ تاکت ءَ دیم ءَ روان اِنت-

اسرائیل ءَ حماس ءِ سر ءَ زمینی کاروائی ءَ پیسر غزہ ءِ سیمسراں ھزارانی کچ ءَ پوجیانی دارگ بندات کتگ-

آدینگ ءِ روچ ءَ اسرائیل ءِ وزیر دفاع ھوو گیلٹ ءَ لھتے درملکی اھوالکارانی گون ءَ گپ کنان ءَ گوشتگ کہ غزہ ءِ سر ءَ زوت یک تراج کش ءُ مشکلیں زمینی کاروائی یے بندات بوگ ءَ اِنت-

آئی ءَ گوشتگ کہ حماس ءِ نیمگ ءَ کل کتگیں سرنگانی ھلاس کنگ ءُ دراجیں وھدے لگ ایت بلے کم کساس دروشمیں جنگے دیراں داں چَل ایت-

آٹی ءِ گمان سَے ھپتگاں برجاھیں ترندیں جنگ ءَ پد یک دگہ دورے ءِ جنگ بندات بیت اِنت کہ ھچبر ھلاس مہ بیت اِنت-

اسرائیل ءَ گوشتگ کہ آئی ءِ مول ءُ مراد غزہ ءَ حماس ءِ سرکار ءُ اسرائیل ءِ بیھارانی سنچ دارگ ءِ ھلاس کنگ اِنت بلے اے منگ نہ ءُ زانگ کنگ نہ بیتگ کہ اسرائیل وتی مول ءُ لوٹانی گرگ ءَ چنکدر سوبمند بیت اِنت-

دومی نیمگ ءَ اسرائیل ءِ سرکار ءِ گوشگ اِنت آ بیست ءُ سَے لکاں ھواریں فلسطین ءِ شھر ءِ سر ءَ سرکار کنگ ءِ واھگ ءَ نہ دار ایت-

فلسطین ءِ واکدارانی رد ءَ غزہ ءَ بیران بیتگیں مردمانی کساس 7 ھزار ءُ سَے سد ءَ گوستگ اَنت ءُ انگیر ءِ سبب ءَ شھر ءَ وردنی ساز ءُ سامانی کمکی اِنت ءُ میان اُستمان ءَ گوشتگ بازیں مشکلانی سبب ءَ کمکی کاراں کُت نہ کن ایں-

پشمبے ءِ روچ ءَ غزہ ءِ وزارت جانسلامتی ءَ بیران بیتگیں مردمانی کساس شنگ کنان ءَ گوشتگ سَے ھزار گیش زھگ ءُ یک ھزار ءُ پنچ زالبول کُشگ بیتگ اَنت-