TBP Balochi

بلوچستان ءِ دمگ کیچ ءَ پاکستانی پوج لشکر کشی کنگ ءَ اِنت، دمگ ءَ گن شپ ھیلی کاپٹرانی آیگ بندات اِنت، ءُ دمگ ءَ تراکانی توار ھم اشکنگ بیتگ اَنت-

دمگی مردماں ٹی بی پی ءَ گوں گپ کنان ءَ گوشتگ کہ مروچی سھب ءَ پاکستانی پوج ءَ بلیدہ ءُ زامران ءِ کوھی دمگاں لشکر کشی بندات کتگ- چم دیستگیں مردمانی گوشگ اِنت بازیں ھیلی کاپٹر برز ءَ بال ءَ گندگ بیتگ اَنت-

دمگی مردمانی گوشگ اِنت ھمے وھد ءَ دمگ ءَ تراکانی توار ھم اشکنگ بیتگ اَنت ءُ تیرگواری کنگ ھم بیتگ اَنت-

واکدارانی نیمگ ءَ اے درگت ءَ تنی وھدی دگہ اھوال دیم ءَ نیتکگ اَنت-

پہ انساپ ءَ جنگ، ھزدار شھدربرجاہ ءِ نودربرانی زھرشانی ءُ دزگیری

ٹی بی پی گچینی

ھزدار یونیورسٹی آف انجینئرنگ اینڈ ٹیکنالوجی ءَ سئے شمبے ءِ روچ ءَ ھما وھد ءَ نگیگیں جاورھال ودی بیت اَنت، وھدے پولیس ءَ ھوار فرنٹیئر کور (ایف سی) ءِ کارندھاں شھدربرجاہ ءِ کیمپس انگر کُت ءُ بازیں زھرشانی کنوکیں نودربر دزگیر کُت اَنت، کہ آ وتی زنگاں سانمدیں توار ءِ دیگ ءِ ھاتر ءَ یک جاہ مُچ بیتگ اِت اَنت۔

شھدربرجاہ ءَ ھستیں نودربر گل گرینڈ اسٹوڈنٹس الائنس(BUETK)ءَ سئے شمبے ءِ روچ ءَ چکاسانی بائیکاٹ کنان ءَ شھدربرجاہ ءِ واکدارانی سر ءَ بھتام جنان ءَ گُشتگ کہ آ چکاس کنٹرولر ءِ دیر کنگ وتی سوگند ءَ بج اتگ اَنت۔ کنٹرولر ءِ سر ءَ شھدربرجاہ ءِ کیمپس ءَ نودربرانی ءُ ھاس جِنکیں نودربرانی بلیک میل کنگ ءِ بھتام بیتگ۔ نودربرانی یک ھاسیں مچی ءِ پہ زھرشانی ءَ یکجاہ بیتگ اَت۔ کہ آیاں کنٹرولر ءِ کَشَگ، کیمپس ءُ ھاسٹلاں چہ گیر زلوری کیمرھانی دیر جنگ، اسکالرشپسانی برجاھی، نودربرانی مچیانی سر ءَ جتگیں بندش ءِ ھلاسی، ءُ ٹیوشن فیس ءِ تہ ءَ کمی ءِ لوٹ کُتگ اَت۔

اھوالانی رد ءَ شھدربرجاہ ءِ واکداراں کانود برجاہ داروکیں ادارگاں گوں زھرشانی کنوکیں نودربرانی گِر ءُ دار کَنگ ءِ لوٹ کُتگ۔ پولیس ءُ ایف سی ءِ بازیں گاڑیاں شھدربرجاہ انگر کتگ اَت کہ ایشی ءِ آسر ءَ بازیں نودربر دزگیر کنگ بیتگ اَنت، کہ آیاں گوں بدسلوکی کنگ بیتگ، زور گاڑیاں مان کنگ ءُ برگ بیتگ اَنت۔ داں انگت دزگیریں نودربرانی جاورھال پدر نہ اِنت۔

شپ ءَ دیرءَ نودربرانی ءُ شھدربرجاہ ءِ واکدارانی نیام ءَ ترانکاری ءِ درچ بندات بیتگ اَت، البت نودربراں وتی ھمراھیں نودربرانی یل بئیگ ءَ داں زھرشانی ءِ برجاہ دارگ ءِ جزم کُتگ ات۔

یات بہ بیت کہ نودربراں یک ماھے ءَ ساری ءَ مزنیں کچے ءَ وتی زھرشانیانی درانگازی کُتگ اَت کہ اود ءَ ایندگہ لوٹانی پجیگ ءَ آیاں چکاس کنٹرولر ءِ کَشَگ ءِ لوٹ کُتگ اَت، نودربراں کنٹرولر ءِ سر ءَ سلکاری ءُ بلیک میلنگ ءَ ھوار بئیگ ءِ بھتام جتگ اَت۔ آ زھرشانی ھما وھد ءَ ھلاس بیت وھدے چکاس کنٹرولر ءَ یک ماھے ءِ تہ ءَ وتی اگدہ ءَ چہ درکنگ ءِ کول کنگ بیتگ اَت۔

بد بھتی ءَ نودربرانی لوٹ ءِ سرجم بئیگ ءَ ابید ماہ سرجم بیت۔ چکاس کنٹرولر کہ آئی ءِ ھلاپ ءَ نودربراں زھرشانی کُتگ اَت داں انگت شھدربرجاہ ءِ گُڈی چکاسانی نگاہ داری ءَ کَنگ ءَ اِنت۔ دروھگ ءُ بے امیتی ءِ مارشتانی پجیگ ءَ نودربراں یک برے پدءَ زھرشانی ءِ کِشک گِپتگ بلے اے رندءَ آیاں دزگیری ءُ زندان ءُ بندیگ جاھانی دیمپانی کنگ کپتگ۔

جتائیں گلاں بلوچستان یونیورسٹی آف انجینئرنگ اینڈ ٹیکنالوجی ءِ تہ ءَ پرایمنیں زھرشانی کنوکانی گیر کانودی دزگیری ءِ تُرس ءِ درشان کُتگ ءُ گُشتگ کہ زھرشانی ھمک شھری ءِ بُنکی اگبال اِنت۔ وھدیکہ نودربر چہ آیانی اگبالاں زبھر کنگ بنت گُڑا آیانی یکیں راہ زھرشانی ءِ دروشم ءَ وتی ھیالانی درشان کنگ اِنت۔ دگہ یک نودربریں گل بلوچ اسٹوڈنٹس ایکشن کمیٹی (بساک) ءَ BUETK ءِ تہ ءَ نودربرانی دزگیری ترُندی ءَ گوں ایر جتگ۔

گل ءَ پر ایمنیں نودربرانی ھلاپ ءَ تاکت ءِ ترندیں کارمرزی ءِ سر ءَ ترُس ءِ درشان کُتگ، ءُ بلوچستان ءِ شھدربرجاھانی تہ ءَ بلیک میلنگ، شِدت ءُ گیر کانودی دزگیریانی ءِ تالانی ءِ پدر کَنگ ءِ کوشست کُتگ۔

بساک ءَ اپسوز ءِ درشان کنان ءَ گُشتگ کہ بلوچستان ءِ شھدربرجاہ بے کساس جیڑھانی آماچ اَنت۔ کہ ایشانی سوب ءَ ادارگ وانگی سال ءِ گیشتر وھداں داں بند بنت۔ نودربر ءُ اُستاد (وانینوک) وتی جائزیں لوٹانی گون ءَ مدام دگانی سر ءَ درکپ اَنت بلے آیانی دزبندی کسی گوش ءَ سر نہ بنت۔ آئی ءِ گشگ اَت کہ گپ ءُ تران ءَ ابید پرگینگی سرکار ءُ دمگی واکدار تاکت ءِ کارمرزی ءِ کمک ءَ زیر اَنت۔

بساک ءَ بلوچستان یونیورسٹی آف انجینئرنگ اینڈ ٹیکنالوجی ءِ نودربرانی گون ءَ یکجاھی ءِ درشان کنان ءَ درستیں جائزیں لوٹانی منگ بوگ ءَ داں وتی پلامرزی ءِ برجاہ دارگ ءِ کئول کُتگ۔ آیاں گُشتگ کہ زھرشانی بُنکی اگبال اِنت ءُ تاکت ءِ کارمرزی ءَ گوں بگیر داریں لیکہ ءِ زورپر دیگ ءِ کردگار ءَ ترندی ءَ گوں ایر جنیں۔ داں منگ نامہ ءِ سر ءَ وتی پلامرزی ےَ برجاہ داریں-

بلوچستان یونیورسٹی آف انجینئرنگ اینڈ ٹیکنالوجی ءَ بیتگیں وئیل جتائیں وئیلے نہ اِنت، ھمے پئیمیں وئیل جتاھیں شھدربرجاھاں ھم دیم ءَ اَتکگ اَنت۔ ھاسیں پئیماں ستمبر 2019 ءَ یونیورسٹی آف بلوچستان ءَ ھم انچیں وڑیں جیڑھے دیم ءَ اَتکگ اَت، کہ اود ءَ شھدربرجاہ ءِ لھتے واکداراں لاچاریں نودربرانی اکس ءُ تامر اڈ کُتگ اِت اَنت کہ آ بلیک میل کنگ بہ بنت۔ آ وئیل ءَ مزنیں کساسے ءَ زھر ءُ گم ءِ ودی کُتگ ءُ بلوچستان شھدربرجاہ ءَ ھستیں سلکاری ءُ بلیک میلنگ ءِ ربید پدر کُتگ اَت۔

بلوچستان ءِ شھدربرجاہ گیشتر لشکرجاھانی دروشم ءَ دے اَنت کہ اود ءَ کیمپسانی تہ ءَ ءُ ڈن ءَ فرنٹیئر کور ءِ گاڑیاں گشت کنان ءَ گندگ بنت۔ ھاسیں پئیماں بلوچستان شھدربرجاہ کہ آ وتی گیٹ ءُ کیمپس ءِ تہ ءَ ایف سی کارندھانی ھستی ءِ سوب ءَ نامدار اِنت۔ نودربر ءُ دگہ مردمانی شھدربرجاہ ءَ پترگ ءَ مزنیں گھگیری ءِ دیمپانی کنگ کپتگ اَت، آیاں نہ تھنا اسٹوڈنٹ کارڈ بلکیں پجار کارڈ جم پیشدارگ کپتگ اَنت۔ بازیں وھداں نودربراں پھازگی لشکریانی دست ءَ لٹ شاپی ءُ شِدت ءِ نشانگ کنگ بیت اِنت۔ گیشتر ایش کہ دری تاکت شھدربرجاہ ءِ جیڑھانی تہءَ پدراھیں دروشمی ءَ دزمانجنی کُن اَنت ءُ داں ادا کہ کیمپس ءُ ھاسٹلانی بازیں نودربر ھم زورانسری بیگواھیانی آماچ کنگ بیتگ اَنت۔

گوزوکیں وھدے پجیگ ءَ جاورھال گیشتر نگیگ بیان اَنت۔ یات بہ بیت چشیں وھداں کہ انڈیا ءُ پاکستان ءِ نیام ءَ کرکٹ ءِ گوازی بنت ایشی ءِ ھمرائی ءَ مزنیں کساسے ءَ پھازگی لشکری ھم شھدربرجاہ ءِ ڈن ءَ آرگ بنت۔ اے پدگرد ستمبر 2022 ءَ ایشیا کپ ءِ فائنل کرکٹ گوازی ءَ سری لنکا ءِ دست ءَ پاکستان ءِ پروش وری ءِ سر ءَ نودربرانی پُرجزبگیں مراگشاں پد ودی بیت، کہ اِیشی ءَ پھازگی لشکری زھرناکی داتگ اَنت ءُ آیاں چہ شال ءَ درزنانی کساس ءَ نودربر دزگیر کُتگ اِت اَنت۔

بلوچستان ءَ نودربرانی زندمان بازیں سکیانی دیمپان اَنت۔ نودربر ءُ اُستادانی زھرشانیانی سوب ءَ شھدربرجاہ گیشتریں وھداں بندش ءِ آماچ بنت کہ چریشی ءَ وانگی سُر ءُ پُر سانمند بنت۔ داں انچوکا کہ کسانیں جیڑھانی سر ءَ شھدربرجاہ ءِ واکدار فرنٹیئر کور ءَ لوٹارین اَنت کہ اے یک ھترناکیں وئیلے ءُ بلوچستان ءَ تاکت ءِ کارمرزی ھمروچی کسہ جوڑ بیتگ۔ جاورھال یکشلی ءَ گوں گیشتر نگیگ بوان اَنت کہ آودہ نودربر پھازگی لشکریانی ھستی ءَ ابید کرکٹ ءِ لئیب ھم چارت نہ کن اَنت۔

سنڈے ٹائمز ءَ یک شنگ بیتگیں رپورٹے ءِ رد ءَ اسلامی ناشرکاریں دوست نی برتانیہ ءِ سلامتی ءِ واستا مستریں ترس اَنت ءُ ایشی ءِ درگت ءَ وزیر داکلہ سویلا بریورمین ھمے ھپتگ ءَ سرپدی دنت اِنت-

عرب نیوز ءِ رد ءَ سویلا بریورمین ءَ ھمے ھپتگ ءَ ناشرکاری ءِ درگت ءِ سر ءَ گامگیج زیرگ ءَ کانٹیسٹ ءِ دوبر بندات کنگ ءِ جار ءَ جنت اِنت – سَے شمبے ءِ بندات بوھوکیں کانٹیسٹ ءِ چار ءُ ٹپاس ءِ رد ءَ اسلامی ناشرکاریں دوست برتانیہ ءِ چیریں ادارہ ایم آئی 5 ءِ کیسزانی سَے مزنیں بھر اَنت-

سنڈے ٹائمز ءِ رپورٹ ءِ رد ءَ برتانیہ ءِ ناشرکاری ءِ گر ءُ دار کنوکیں پورس اے وھد ءَ کساس 800 کیسانی پٹ ءُ پول ءَ کنگ ءَ اِنت ءُ دوھزار ءُ بیست ءُ دو ءَ ناشرکاری ءِ درگت ءَ یک سد ءُ شست ءُ نُھ مردم دزگیر کنگ بیتگ اَنت-

وزیر داکلہ سویلا بریورمین ءَ وتی تران ءَ اسلامی ناشرکار یک مزنیں ترسے گوشتگ ءُ ایشی ءِ توک ءَ ناشرکاری گیش بوت کنت اِنت ءُ ایشانی پٹ ءُ پول کنگ ءُ دزگیر کنگ اژدری اِنت-

بلوچستان ءِ دو جتا جتائیں جاھاں یک مردمے بیگواہ ءُ بیگواھیں مردم ءِ لاش دزکپتگ –

ڈیرہ بگٹی ءَ پاکستانی پوج ءَ یک مردمے آوار جنگ ءَ پد بیگواہ کرتگ-

گیشیں ھالانی ڈیرہ بگٹی ءِ ھند سوئی پالی پٹ ءِ نزیک ءَ یک لوگے ءَ پاکستانی پوج ءَ منشی ء روشن ھوتکانی آوار جتگ ءُ بیگواہ گون وت برتگ –

زانگ بہ بیت منشی ءِ روشن ءُ آئی ءِ برات اھمد علی پیش ءَ پوج ءَ آوار جتگ ءُ گون وت برتگ ءُ روشن بگٹی یل کتگ ءُ بلے اھمد علی داں انگت بیگواہ اِنت ءُ گوستگیں منشی آوار جتگ ءُ بیگواہ –

ھمے وڑ ءَ کیچ ءِ دمگ ھوشاپ ءِ ھند روتکان ءَ دوشمبے ءِ سھب ءَ شاکر ء ھسین ءِ لاش دزکپتگ-

دمگی مردمانی رد ءَ اے مرد دکاندارے بیتگ ءُ دو روچ پیسر ناشناسیں آوار جتگ ءُ گون برتگ –

لاش لیویز کارندھاں چست کتگ ءُ بنداتی پٹ ءُ پول ءَ اے مرد ءَ تیر جنگ ءُ کشگ بیتگ –

کولواه، ملا اِزَم ،ءُ وتگڑیں سیاست

نبشتہ کار: سیپ بلوچ

دی بلوچستان پوسٹ

لبز ءِ کولواه زبان ءَ کیت مردم جیڑگ ءَ کپ ایت بلے وهدے کولواه ءِ مردم ءُ کولواه ءِ دودانی تہ ءَ وهدے کیت گوستانک ءَ چار ایت ءُ مرچی ءَ اجب گندگ ءَ کیت کہ چیا ءُ چتو ؟ بلوچستان ءِ تہ ءَ اگاں هورت چاری بہ کن ئے کولواه هما جاه گچین کنگ بیت کہ بلوچ ءِ راجدپتری ڈس اِنت ، کولواه ءَ سدانی کساس ءَ هنچیں کوهنیں هنکین کلات دمب ءُ مانش گندگ ءَ کیت کہ اد ءَ چنچوکیں کسهے درپ اِنت ، اے یک راجدپتری پولکارے بیت وت سما کت کنت بلے اد ءَ کس اهت نہ کنت پرچا گپ دونیمگی ءَ روت-

گوستانک ءَ در بیا ئِے ءُ مرچیگ ءَ چمشانک بہ دے ئے گڑا کولواه ءَ نشتگیں مردمانی گْور ءَ بئید ءِ جاه نماز ءُ بُرکہ ئیں کهول ءُ مزهبی ئیں مردماں دگہ هچ گندگ ءَ نہ ایت ، کولواه ءِ تهے نشتگیں مردم کہ هست اَت انت هنچو گندگ بیت کہ هنچوش اَنت نہ زندگ انت نہ مرتگ انت مرچی یازده سال ءَ رند من وهد ءِ کولواه ءَ اتکگاں هرچیز ءَ گنداں آئی ءِ چهره مٹ بیتگ یازده سال ءَ ساری من نہ گوشاں کولواه ءَ تاریک دان بیتگ بلے ، همے گوشاں کہ مردمے یکے دومی ءِ گِس دپ ءَ هال پرسی ءَ شتگ مرچی اے اوں هلاس انت-

مَریستان ءَ بہ گر داں پاهو ءَ اے دمگ ءِ هما بلوچ بیتگ اَنت کہ اِلم ، زانت شهور ءَ ابید ، اے مردماں بلوچی هنچیں پوشاکے گور ءَ بیتگ کہ پہ در ءَ اهتگیں بلوچاں تُنیگ بیتگ اَنت ، مرچی کہ دوبر پاداں همے هندانی دنزاں پہ زهیر ئِے کتگ ات لهتیں پچیں میتگ اَنت سرکپتی پہ سرجناں بیت آں داں چاراں کہ نہ آ جنین گندگ بنت نا کہ آ مرد ، هما جنین کہ مردمے ءِ دیم ءَ کپتگ اَنت لوگانی تهےکیدی جوڑ کنگ بیتگ انت پیر مرد دهکان بزگر وهد ءِ گندگ ءَ اتکگ انت ، آ درو دارج ریش ءُ ملاه جوڑ بیتگ اَنت لوگ چار دیواریانی تہ ءَ کتگ انت ، کس کسی نزدیک ءَ نہ روت- نوں من کسانیں سپرے ءِ کسہ ءَ کن آں ، من همے دمگے لوکل گاڈی ءِ گوں کمو دیم ءَ رهادگ اِت آں کہ گاڑی ءَ میتگے ءَ دور کُت کہ لهتیں سواری اَنت زوران اش ، داں پسیلے ءِ دپا اوشتات کہ جنین ءِ بلاهین جُلے ءِ تہ ءَ ات گونگی ءَ اتک ءُ گاڑی ءِ سیٹ ءَ نشت دو مرد اے کش ءُ آ کش ءَ نشت انت کہ مهرم اَنت ئِے-

سک دیر بوتگ ات اے هلک من شموشتگ ات بلے جیڑگے ءَ گوں یات ءَ کپتاں کہ هو، من گوں سنگتے ءَ سال یات نہ بیت بلے یازده دوازده سال ساری سپرے ءَ چہ اتک آں سک تنیگ اِت آں همے میتگ ءَ اتک آں چار پنچ لوگ اِت انت کہ مئے آیگ ءَ گوں جنین ءِ در اهت ءُ مارا بُرت ئِے لوگ ءَ آپ ءُ نان دات ئِے داں ما وتی گرم سارت کت ءُ در شت آنت بلے مرچی کہ اے هلک دیست اجبیں رنگے ءَ ات هچ گمان نہ بوت کہ بلوچ ءِ سرڈگارے جهمنندیں مردم انت-

کولواه هما جاه بوتگ کہ اد ءَ مردم میار جلی ءَ اتکگاں ، اد ءِ مردم نان دئی ءَ نامدار بوتگ انت ، اد ءِ مردماں وتی سانگ ءُ سیراں ، هنچیں تماشاه کتگ کہ بیست بیست روچ دهل ءُ چاپ ءُ سرنا بیتگ ، اد ءَ ده ده بیست بیست هلکانی مردم یکین سیر بیتگ یا پرس یکجاه بوتگ ءُ کار اش کتگ ، اد ءَ مردماں گسے ءِ بندگ ءَ بہ گر داں ڈگارانی کار ءُ شوم ءَ هشر کتگ بلے مرچی درست ، گار ءُ بیگواه انت ،هرکس وتی گس ءَ داں هلاس اِنت همساهگے بہ مر ایت کسے ڈنا در نہ روت کسان کسانیں هلک ، چو شهرے رسم ءُ دودانی هساب ءَ جوڑ کتگ ءُ زهگ زالبول زندانی کتگ انت ، اے گپ ءَ درامد ءِ بیهار ترس ءُ یا ملاهانی کارتوت بگش آں ، ملاه مردم ءَ پانسی دے انت بلے راستی ایش اِنت کہ اد ءَ دود رسم رواجانی مستریں دشمن اد ءَ وتگڑیں دودانی آؤرگ ءُ جاگہ دیگ مردماں مزهبے نام ءَ رد دیگ ملاهاں وتی بلاهیں پندے آسر کتگ-

بلوچی دود رسم ءُ رواج ، بلوچ ءِ بنکی چیز درو هلاس کنگ بیتگ اَنت ، بلوچ چہ بلوچی پشک ءَ کش اتگ ارب ءِ کندوره گور ءَ داتگ ، مردماناں دوزه ءِ ترس ءُ جنت ءِ لالچ داتگ ءُ رسم ءُ رواج مردم گیری بلوچی درو هلاس کتگ ، بیگهان ءُ شپ ءَ بلوچی کسہ ءُ ساز گار کتگ ، پزائل ءِ آمال ءِ کسہ گوشدارینگ بنت ، مردم یکے دومی ءِ مهرم ءُ نا مهرم جوڑ کتگ انت کس کسی نیمگ ءَ شت نہ کنت همساهگ همساهگے ءِ گس ءَ نہ روت نا مهرم گوشگ بیت ، گڑا اے درستانی زموار ملاه گوشگ مہ بنت گڑا ، مردم رد بیت-

دومی نیمگ ءَ وتگڑیں سیاستے آؤرتگ جاگہ داتگ هما سیاست کہ بلوچ ءِ چک چینی ءَ هچ راه ءُ درے پشت نہ گپتگ ، مردم هنچو رد داتگ انت کہ یکیں گسے دو مردماں دو ٹولیاں بهر کرتگ انت ، یک برات ءِ دومی برات ءِ کش ءَ نہ نند ایت کہ منی پاٹی ءِ مردم نہ اِنت ، اسکول وانگ جاه بند انت ، همک میتگاں اربی وانینگ بوگ ءَ انت زبان ءِ راستیں گپ کنوک سدے تہ ءَ یکے گندگ ءَ نہ ایت ، هوٹل دکان ءُ ڈگارانی سرا اگاں دو مردم یکجاه انت گڑا گپ ارب ئیگ انت-

وتگڑیں رسم ءُ رواجاں هنچو رواج زرتگ کہ کولواه ءَ پشت کپتگیں زبان دوست ءُ ادبی مردم ءِ بئیت گنوک گوشگ بیت ، اگاں چشیں مردم هست گڑا دیری تتکگ چہ اد ءَ اگاں پہ گنوکی بیت سر کپتی کس دیوان ءُ گپ ئِے نہ کنت کہ گنوک ئے-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوادر ءُ ھزدار ءَ پیش اتکگیں دو جتا جتائیں وئیلاں زھگے ءَ ھوار دو مردم بیران ءُ یک مردمے زدگ بیتگ-

ھزدار ءِ دمگ سناڑی ءِ ھند ءَ ٹریکٹر ءَ یک زھگے لگت داتگ ءُ کُشتگ-

ھمے وڑ ءَ بلوچستان ءِ تیابدپی شھر گوادر ءِ ھند جیونی کراس ءَ دو گاڑیانی ٹکر ورگ ءَ یک مردمے بیران ءُ یکے زدگ بیتگ-