TBP Balochi

میان اُستمانی جانسلامتی گل ڈاکٹرز ود آوٹ بارڈرز ( ایم ایس ایف) ءَ گوشتگ کہ آئی ءِ ٹیم ءِ سر ءَ جنگ آماچیں ھند سوڈان ءِ بنجاھی شھر خرطوم ءَ اُرش کنگ بیتگ-

ھال سر کنوکیں ادارہ اے ایف پی ءِ رد ءَ آدینگ ءِ روچ ءَ بیھار دیان ءَ گوشتگ کہ آ سوڈان ءِ بنجاھی شھر ءَ کار کنوکیں لھتے نادراہ جاھاں وتی کار ءَ مھتل کت کنت-

جانسلامتی ءِ مپتی ادارہ ءَ یک درشانے ءَ گوشتگ کہ پشمبے ءِ روچ ءَ سلاہ بندیں مردماں ایم ایس ایف ءِ ھژدہ ملازم ھما وھد ءَ جتگ اَنت ءُ کُشگ ءِ بیھار داتگ اَنت آ خرطوم ءَ ترک ھسپتال ءَ سامان برگ ءَ بیتگ اَنت-

ایم ایس ایف ءَ گوشتگ ترکش ھسپتال زرباری خرطوم ءَ داں انگت ءَ پچین دو نادراھاں جاھاں چہ یکے –

درشان ءَ گوشگ بیتگ کہ ھردوکیں ھسپتال شھر ءِ ھنچیں دمگے ءَ اَنت کہ اود ءَ نیم پوجی ریپڈ سپورٹ پورس ءِ زیر کنٹرول ءَ اِنت- پانزدہ اپریل ءَ سوڈان ءِ ریگولر پوج پرکار اِنت-

دو جرنلانی سروکی ءَ برجمیں جنگ ءَ کم چہ کم سَے ھزار مردم کُشگ ءُ سی ءُ سَے لک مردم بے لوگ بیتگ اَنت – بنجاھی شھر خرطوم ءِ ھواری ےَ دارفور ءِ روکپتی دمگاں بازیں جنگ ءُ چوپ گندگ بیتگ اَنت-

جنیوا ءَ ھستیں ڈاکٹرانی گل ءَ گوشتگ کار کنوکانی سر ءَ گوشتگ سوڈان ءَ جاڑیگیں باسک توپگ گندانک ءُ لٹ ءُ کُٹ کنگ بیتگ اَنت-

درشان ءِ رد ءَ اے اُرش ھما وھد ءَ بیتگ کہ وھدیکہ کارکنوکیں مردم ترک ھسپتال ءِ نیمگ ءَ روگ ءَ بیتگ اَنت، سلاہ بندیں مردماں مئے ڈرائیوراں چہ یک ڈرائیورے دزگیر کتگ ءُ آ یل کنگ ءَ پیسر کشگ ءِ نزیک ءَ برتگ ءُ آیاں مئے گاڑی ھم دز اتگ-

ڈاکٹرانی گوشگ اِنت اے وئیل ءَ پد ھسپتال ءَ کار کنگ جیڑہ جوڑ کرتگ-

ایم ایس ایف ءَ گوشتگ کہ آ میان اُستمانی گلاں چہ یکے آ اے وھد ےَ خرطوم ءَ جاڑیگ اِنت-

ھندوستان ءِ اُستان منی پور ءَ زالبول ءَ دگ ءِ سر ءَ برھنگ کنگ ءُ ترینگ ءُ زوراکی کنگ ءِ بنجاھی جرمکار ءِ لوگ ماندارگ بیتگ-

برتانیہ ءِ ھال سرکنوکیں ادارہ روئٹرز ءِ رد ءَ منی پور پولیس ءِ یک کلانیں آپیسر ھیمنت پانڈے ءَ گوشتگ کہ دمگی زالبولاں بنداتی ءَ بنجاھی جرمکار ءِ لوگ سنگ جتگ ءُ پد ءَ آئی ءِ لوگ ءِ لھتے بھر آس داتگ اَنت-

منی پور ءِ دمگ کانگیو ءَ کساس دو ماہ ءِ اِنت کہ اود ءَ نسلی جیڑہ ءِ وھد ءَ چار مئی ءَ کوکی زومی برادری ءِ یک میتگے ءِ سر ءَ اُرش کتگ بیتگ اود ءَ سلاہ بندین مردماں زالبول برھنگ کتگ ءُ دگ ءِ سر ءَ ترینتگ ءُ یک مردمے کُشتگ-

پولیس ءِ رد ءَ اے اُرش ءَ چار جرمکار دزگیر کتگ انت ءُ آمیدگس ءَ یازدہ روچ ءِ واستا جسمانی ریمانڈ ءِ ھاتر ءَ روان داتگ اَنت-

پولیس آپیسر ھیمنٹ پانڈے ءَ بنجاھی جرمکار ءِ لوگ ءِ ماندارگ ءَ پد گوشتگ کہ ما زالبولاں گوں دزبندی کن ایں پر ایمنیں رنگے ءَ زھرشانی بہ کن اَنت – پرچاکہ جاورھال پیش ءَ چہ ھراب اَنت ءُ ما آیانی زھر ءَ سرپد بیت کن ایں-

زانگ بہ بیت گوستگیں دوماہ ءَ منی پور ءَ برجاھیں نسلی جیڑہ ءَ داں انگر ءَ یک سد ءُ بیست ءُ پنچ مردم مرتگ اَنت ءُ جنگ ءُ چوپاں لڈ ءُ بار کرتگیں مردمانی کساس چل ھزار ءَ سر بیتگ اَنت-

دو زالبولانی تامر چارشمبے ءَ سوشل میڈیا ءَ گندگ بیتگ ءُ چریشی ءَ پد ھندوستان ءِ ھمک شھر ءَ زھر ءِ درشان بندات بیتگ-

بینگلور ءَ بیوکیں زھرشانی ءَ ھزاراں مردماں بھر زرتگ ءُ اود ءَ یک بینرے ءَ نبشتگ کہ زالبول جنگ ءِ میدان ءَ نہ اِنت –

کلکتہ ءَ زھرشانی ءَ ھواریں نودربر ردھیکا برمان ءَ روئٹرز ءَ گوں گوشتگ کپ ما اے زانگ لوٹ ایں پولیس ءَ پرچا دیراں کاروائی کتگ؟ آئی ءَ سرپدی بیتگ کہ زالبول ءِ گون ءَ زیادھی بوگ ءَ اِنت آ برھنگ کنگ بوگ ءَ اِنت آ دگ ءِ سر ءَ ترینگ بیگ ءَ اِنت-

بلوچستان ءَ بیوکیں وتکشی ءِ وئیلانی درگت ءَ بلوچستان ءِ سرکار ءُ انسانی ھکانی گلاں ھوار راجدوست بے تواری ءَ گندگ کاینت – وتکشی ءِ سر ءَ مھلوک ءِ نا اُمیتی ءِ گندگ ءَ کیت اِنت، اود ءَ اے وئیلانی سر ءَ تچک ءَ گپ کنگ ءَ ابید اے دابیں وئیلاں بدنامی ءِ رنگ ءَ دیگ ءُ وئیلانی چیردیگ ءِ جھد ءَ اَنت-

دی بلوچستان پوسٹ ءِ یکجاہ کتگیں کچ ءُ کساسانی رد ءَ ھمے سال ءِ بنداتی ششماھی ءِ وھد ءَ وتکشی ءِ 29 وئیلانی اھوال اتکگ اَنت، ایشانی توک ءَ 11 زالبول ءُ 18 مردین ھوار اَنت-

ٹی بی لی ویژول اسٹوڈیو ءِ انفوگرافکس ءَ بلوچستان ءَ سر بیتگیں اھوالِ وتکشی ءِ جیڑھانی سر ءَ ھمے سال ءِ ششھانی ردوم ءُ مھلوک ءِ پٹ ءُ پول یکجاہ کتگ اَنت-

ڈیٹا ءِ رد ءَ وتکشی ءِ وئیلاں بیران بیتگین 11 زالبول ءُ 18 مردین ھوار اَنت کہ ایشانی توک ءَ 13 ءَ داں 28 سال ءِ اُمر ءِ زالبول ءُ مردین ھوار اَنت-

دی بلوچستان پوسٹ ءِ یکجاہ کتگیں جیڑھانی رد ءَ ھمک ھپتگ ءَ وتکشی ءِ یک کیسے ءِ دیم ءَ آیگ کہ آبادی ءِ تہ ءَ 100000 ءَ 0.135 درسد ریکارڈ کنگ بیتگ –

وتکشی ءِ وئیلانی تہ ءَ 2 تیزاب ءُ زھر وری، 12 پاھو، 10 ناپجاریں دروشم ھمے وڑ 4 ءَ وت ءَ وت تیر جتگ ءُ وتی زند ھلاس کتگ ایشانی سبب نیزگاری، لوگی جیڑہ، لوگی لٹ ءُ کٹ ءُ گمانی رنگ ءَ ریاستی لشکر ءُ بیم دیوکیں مردمانی نیمگ ءَ چم پروشگ ھوار اَنت-

شش ماھانی توک ءَ وئیلاں درستاں گیش سانمندیں ھند گڈانی، ھب چوکی، کوھلو، نوشکی، شال، تربت، چاگی، دالبندین، کچھی، کیچ، ھزدار، پنجگور، آواران، ڈیرہ بگٹی، دکی ءُ گوادر ھوار اَنت-

دی بلوچستان پوسٹ ءَ وتکشی ءِ اے وئیلانی پٹ ءُ پول ءَ بازیں مشکلانی دیمپانی کنگ کپتگ، بازیں جاھاں راستگیں وئیلانی بوگ ءَ ابید لوگانی وتکشی ءِ وئیل پیش اتکگ اَنت رھوت کنگ ءَ مردم رد کن اَنت ءُ مرگ ءَ نادراھی پدر کن اَنت یا ناگتی دے اَنت ءُ ھمے داب ءَ دور ءُ دراجیں ھند ءُ دمگاں دامگی اھوالانی نہ بوگ ءَ بازیں وئیل دیم ءَ آیگ ءَ نہ اَنت-

وتکشی ءِ بازیں وئیلاں ریاستی لشکر ءُ گمانی رنگ ءَ سرکاری پلامرزی ءَ ھلوکیں سلاہ بندین مردمانی نیمگ ءَ بلیک میلنگ ھوار اَنت، اے وئیلانی تہ ءَ بے روزگاری ءُ دگہ مازگی جیڑہ درستاں سر بُر اَنت-

زانگ بہ بیت بلوچستان ءَ سر بیتگیں اھوالانی وتکشی ءِ جیڑہ المی اِنت کہ 100 درسد سرجمیں مہ بنت پرچاکہ دور ءُ دراجیں ھنداں سر بوگ ءَ بازیں جیڑھانی دیمپانی ءُ دامگی اھوالانی نہ بوگ ءِ پژدر ءَ گمان بیت اِنت وئیلانی سرجمی اھوالان چہ کمتر بہ بنت-

بلوچستان ءِ دمگ نسیر آباد ءَ تیرگواری ءَ مات ءُ زھگ بیران بیتگ اَنت-

گیشیں اھوالانی رد ءَ نسیر آباد ءِ دمگ گوٹھ موندر ءَ سلاہ بندیں مردماں تیرگواری کرتگ ءُ مات ءُ زھگ کُشتگ اَنت-

اھوالانی رد ءَ وئیل زمین ءِ جیڑہ ءِ سر ءَ پیش اتکگ کہ اود ءَ سلاہ بندیں مردماں تیرگواری کرتگ ءُ مات ےُ زھگ کشتگ اَنت-

پولیس بنشون ءِ رد ءَ وئیل ءَ پد تیرگواری کنوک تچگ ءُ روگ ءَ سوبمند بیتگ اَنت ءُ لاش پولیس ءَ چست کتگ ءُ نادراہ جاہ ءَ رسینتگ اَنت ءُ جرمکارانی پٹ ءُ پول پولیس ءَ بندات کتگ-

پشتون تھپز مومنٹ بلوچستان ءِ رھشون زبیر آغا شاہ ءِ رد ءَ گل ءِ دو ھمراہ ناشناسیں مردماں آوار جتگ ءُ لٹ ءُ کُٹ کنگ ءَ پد یل کتگ اَنت-

آئی ءِ رد ءَ گوستگیں شپ ءَ ژوب ءَ ناشناسیں مردماں گل ءِ دو سنگت آوار جتگ ءُ سرکاری دفتر ءَ بند کتگ اَنت ءُ اود ءَ ترندیں لٹ ءُ کُٹانی نشانگ کنگ بیتگ اَنت ءُ آ ژوب ءَ آل پارٹیز ءِ نندانک ءَ بھر زیرگ ءِ درگت ءَ جست گرگ بیتگ اَنت-

پی ٹی ایم ژوب ءَ وئیل ءِ پژدر دیان ءَ گوشتگ کہ باسک سالار خان ءُ ننگیال پشتون ءِ سر ءَ ریاستی ادارہ نیمگ ءَ ناوشیں لٹ ءُ کُٹ ءُ بیھار دیگ ءَ ھمینکس ایر بہ جن ئے کم اِنت-

آئی ءَ گوشتگ کہ ژوب ءَ شیرانی ءَ گوستگیں ناشرکاری وئیلاں پی ٹی ایم ءِ سنگتاں ریاستی زُلم ءُ زوراکیانی ھلاپ ءَ یک ھواریں گھگیری ءِ ریاستی ادارھاں ایر برت نہ کتگ، ریاستی ادارہ اے دابیں زوراکیاں پی ٹی ایم ءِ سیاسی باسکاں وتی گھگیری ءَ چہ دزکش کت نہ کنت-

سر بیتگیں اھوالانی رد ءَ روکپتی بلوچستان ءِ دمگ دشتیاری ءَ گاڑی ءِ ٹکر ورگ ءَ دو کس بیران ءُ سَے زدگ بیتگ اَنت-

اھوالانی رد ءَ دشتیاری کلانی ءَ یک تیل کشیں گاڑی ءِ کپتگ ءُ چریشی ءَ دو کس بیران ءُ سَے زدگ بیتگ اَنت-

بیران بیتگیں مردمانی پجار نیاز تباسیدہ ء حسین جھمنند رودیگ دشتیاری ءُ شعیب کلمتی ء دادشاہ جھمنند ریمدان ءِ ناماں زانگ بیتگ اَنت ءُ دگہ سَے زدگینانی پجار دیم ءَ نیتکگ اَنت-

اھوالانی رد ءَ روکپتی بلوچستان ءَ تیل کشیں مردم یکشل ءَ دگ ءِ وئیلانی آماچ بوان اَنت ءُ چریشی ءَ اود ءَ بازیں ورناہ وتی جان ءُ ساھاں زبھر بوگ ءَ اَنت-

زانگ بہ بیت روکپتی بلوچستان ءَ ھمک روچ اے دابیں وئیل پیش آیگ ءَ اَنت ءُ اے وئیلانی گر ءُ دار تنی وھدی نہ بیتگ اَنت –

اود ءَ لس سیاسی ءُ چاگردی مردمانی گوشگ اِنت کہ روکپتی بلوچستان ءَ مھلوک ءَ ھاسیں روزگار ءِ نہ بوگ ءَ مردم اے جان کُشیں روزگار ءَ وتی ساہ ءُ سراں ببا دیگ ءَ اَنت-

کُجا سَپر کَنے

شائر:بَرانز بلوچ

دی بلوچستان پوسٹ

سَر داں پاداں پِر نہ بِت کُجا سَپر کَنے
داں نہ پولءِ جِند ءَ وت کُجا سَپر کَنے

ہَر کُجا بِگند بیپار ءِ ، بے سَماءِ بلوچ ءِ
وتی کے جِند ءَ ، اِڈت کُجا سَپر کَنے

اے دو پوستیں کالب آں لَگوش بچار
آ کِشک نو کُجا سَر اِنت کُجا سَپر کَنے

ہَر کُجا دَپی بَٹاک اَنت ، بِگند بِیٹک آں
داَں اے بے سَمائی اَست کُجا سَپر کَنے

ہر کَسءَ بِگند وتا لیک اِت شیوار ءُ شَر
دانکہ مَن ، مَنا دَر نہ بِت کُجا سَپر کَنے

ھَمے چَپءُ چِوٹیں سیاستءَ دَرا بَرانز
راستی ءَ داں کَد چُنت کُجا سَپر کَنے

امریکہ ءِ گیشیں جنگی ءُ ھزارانی کساس ءَ پوجی ھیلکاری ءِ کنوکیں لشکر ءَ میانجی ءَ روان دیگ اِنگ کہ اود ءَ آ باپاری آپی جھازانی گرگ ءَ ایران ءِ جھداں بے سوب کت بہ کنت-

ھال سر کنوکیں ادارہ ایسوسی ایٹڈ پریس ءَ امریکہ ءِ واکدارانی درور دیان ءَ گوشتگ وزیر دفاع لائیڈ اسٹن ءَ پشمبے ءِ روچ ءَ یو ایس ایس باتان ایمفیبیئس ریڈینس گروپ ءُ بیست ءُ ششمی میرین ایکسپیڈیشنل یونٹ ءَ ھلیجی دمگاں برجم دارگ ءِ منگ نامہ داتگ ریڈی نیس گروپ ءَ سَے آپی جھازانی ھواری اِنت – چریشی ءَ اُرش کنوکیں جھاز باتان ھم ھوار اِنت، آپی تر ءُ تاباں روکیں یونٹ لس کساسی دوھزار ءُ پنچ سد ءِ کساسی ءَ بیت اِنت-

یک درشانے ءَ امریکہ ءِ سینٹرل کمانڈ ءَ گوشتگ کہ اے روک ءُ اود ءَ دارگ دمگ ءَ زری ھنداں ٹریفک ءِ روانی ءِ گیشتر جوانتری ءِ جوڑ کنگ ءِ کمک ءَ کنت اِنت-

درشان ءَ گوشگ بیتگ کہ آپی جھازانی نام گوشگ نہ بیتگ اَنت بلے امریکہ ءِ واکداں پوجیانی سر ءُ پرانی سر ءَ گپ نہ کنگ ءِ شرت ءَ ھواریں یونٹانی بارو ءَ گپ جتگ-

باتان ءِ ھواری ءَ اے گروپ ءَ دو دگہ جنگی آپی جھاز یو ایس ایس میسا وردے ءُ یو ایس ایس کارٹر ھال ھم ھوار اَنت – اے گروپ ءَ ھمے ماہ ءَ وتی سپر ما ورجینیا ءِ ھند نارپولک ءَ زری ھند ءَ بندات کتگ –

داں پشمبے ءِ روچ ءَ اے سرپدی نہ نیتکگ کہ اے آپی جھاز ھلیج ءِ زر ءَ دار اَنت یا ناں –

اے جنگی آپی جھازانی دیم دیگ ءِ جار ءَ پیسر لھتے ھپتگاں امریکہ ءِ آپی جھاز یو ایس ایس تھامس ھڈنر ءُ بازیں ایف 35 ءُ ایف 16 جنگی جھاز دمگ ءَ روان دیگ بیتگ اَنت-

ایران ءِ سر ءُ پرانی پسھی ءَ بازیں ھپتگاں امریکی ءِ اے 10 جنگی جھاز جاڑیگ اَنت-

ایران ءَ ھمے ماہ ءَ ’ آبائے ھرمز‘ ءِ نزیک ءَ دو ائل ٹینکرانی دزگیری ءِ جھدے کتگ کک ایشانی توک ءَ یکے ءِ سر ءَ تیرگواری کنگ بیتگ –

جنگی جھازانی مول ءُ مراد آبی راھگوزیاں کارمرد بیتگیں باپاری جھازانی پھزداری اِنت ءُ ایران ءِ واستا اڑانگ ودی کنگ ءَ دمگ ءَ پوج ءِ گیش ءَ چہ گیش جاڑیگ کنگ بیت اِنت-

سینٹرل کمانڈ ءِ سروک جنرل ایرک کوریلا ءَ گوشتگ کہ گیشیں لشکر دمگ ءَ مئے شریداریں ڈیھ ءُ میان اُستمانی باپار کارانی پھزداری اِنت ءُ میان اُستمانی رھبندانی دارگ ءَ آئی ءِ رھبندانی منگ اِنت ءُ دمگ ءَ ایرانی سر ءُ پراں دار ایت اِنت-

وائس فار بلوچ مسنگ پرسنز ءِ چیردستی ءَ برجاھیں بیگواھیں مردمانی ھاتر ءَ زھرشانی بنجل ءَ مروچی پنچ ھزار ءُ یازدہ روچ سرجم بوتگ انت – مروچی چہ گوادر ءَ سیاسی ءُ چاگردی باسک ماجد بلوچ، خیر محمد بلوچ، منظور بلوچ ءُ دگہ مردماں بنجل ءَ اتکگ ءُ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ ات کہ بلوچستان ءِ تہ ءَ پاکستانی آرمی ءُ چیریں ادارھانی زلم ءُ زوراکیاں ھر یک مردمے سرپد انت کہ کجام وڈ وت ءَ مسلمانی پوشاک ءِ تہ ءَ چیر داتگ ءُ ھمک روچ بلوچ ورنا ءُ کماشاں آوار جنگ انت آھانی ژانگولیں جوناں چگل دیگ انت – زلم ءُ زوراکیانی ھنچیں داستان کہ آھانی اشکُنگ ءَ مردمانی جان ءِ پُٹ پِژر انت – یک روچے ءِ تہ ءَ ڈیرہ بگٹی ءَ کساس سِی مردم زورانسری آوار جتگ انت –

ماما قدیر بلوچ ءَ گوشتگ کہ مروچی بلوچ ھم ھمے گوستانکی ناروائی ءُ زلم ءُ زوراکیانی آماچ انت وتگڑیں دانشور ھم زورگیری ھک ءَ گپ جنگ ءَ انت – مروچیگیں نوکتریں دور ءِ تہ ءَ وتگڑیں زورگیر ءِ زانتکارانی ھمراھی ءَ مئے دیسی زانتکارانی وتی پیش دارگ، نرگسیت، انفرادیت لوٹوک چاگردی ترامجاھاں گندگ بنت –

ماما قدیر بلوچ ءَ گوشتگ کہ وڈھ ءِ جیڑو ءَ سر ءَ وڈھ ءِ مینگل ٹک ءَ گوں دزبندی انت کہ وتی وت ماں وتی جیڑو ءَ بلوچی رسم ءُ رواجانی رِد ءَ گیشگیوار بہ کن انت – اے جیڑو ءَ تاوان بس بلوچ انت ءُ پائدگ دژمن ءَ رسگ ءَ انت -.

ماما قدیر بلوچ ءَ گوشتگ کہ بلوچ راج ءَ پیش ءَ جنگی جاورانی تہ ءَ انت خان آف قلات میر سلیمان داود جان ءَ گوں دزبندی انت اے جیڑھے گیشگیوار ءَ راج ءِ رھشون ءُ ملایانی کمیٹی ءِ اڈ بہ دنت ءُ وت ما وتی جنگ ءَ ھلاس بہ کنت پرچا کہ پیشی ردیانی دوبر کنگ ءُ راج ءَ جنگ ءِ تہ ءَ دور دیگ ءِ سکت بلوچ ءَ نیست –

روکپتی بلوچستان ءَ دو ورنا آوار جنگ ءَ پد بیگواہ کنگ بیتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ لس پوشاکی مردماں یک لوگے ءُ بیکراھی وانگ جاہ ءَ بیڑ برتگ ءُ نودربرے ءَ ھوار دو مردم آوار جتگ ءُ بیگواہ کتگ اَنت-

آوار جنگ بیتگیں مردمانی پجار امیدکاشانی ء دوست مھمد جھمنند زاھدان ءُ یاسین موسیزئی ءِ ناماں زانگ بیتگ اَنت –

اھوالانی رد ءَ ایشانی توک ءَ امید چہ وتی جند ءِ لوگ ءُ یاسین نیکراھی وانگ جاہ ءَ اوار جنگ ءُ بیگواہ کنگ بیتگ –

اھولانی رد ءَ گوستگیں روچاں ھم زاھدان ءَ دالعلوم نیکراھی وانگ جاہ ءَ ناسر نامیں یک نودربرے آوار جنگ ءُ بیگواہ کنگ بیتگ ات-

روکپتی بلوچستان ءَ وھد وھد ءِ سر ءَ گر ءُ بندیانی درچ یکشل ءَ برجاہ اَنت کہ اے وئیل ھما وھد ءَ گیش بوتگ اَنت کہ گوستگیں سال ءَ ماھو نامیں جنکے ءِ گون ءَ پولیس ءِ زوراکیاں پد بیوکیں زھرشانیانی پژدر ءَ گیشتر گندگ اتکگ اَنت-