TBP Balochi

پاکستانی لشکریاں چہ کراچی ءَ بلوچستان ءِ جھمنندیں دو مردم دزگیر کنگ ءَ پد بیگواہ کُتگ اَنت وھدیکہ یک مردمے چہ شال ءَ بیگواہ کنگ بیتگ۔

چہ کراچی ءَ بیگواہ بیتگیں مردمانی پجار طفیل ء شیر محمد جھمنند مند کیچ ءُ دینار ء محمد اقبال جھمنند پروار مشکے ءِ ناماں چہ بیتگ اَنت۔

بیگواہ بیتگیں دینار لشکریاں کراچی مرشد نادراھجاہ ءَ چہ دزگیر کُتگ وھدیکہ طفیل چہ آغا خان نادراھجاہ ءِ دیمءَ چہ ھما وھدءَ دزگیر کُتگ وھدیکہ آ مسیت ءَ نُماز وانگ ءَ پد واتر بئیگ ءَ بیتگ۔

دومی نیمگ ءَ کراچی ءِ بلوچ گیشتری دمگ لیاری ءَ چہ اھوال اَنت کہ گوستگیں یک ھپتگءَ چہ پاکستانی لشکریاں بیڑ بندات کُتگ ءُ لوگ پہ لوگ پَٹ ءُ پول برجاہ اِنت، البت ھمے نیام ءَ ھچ پئیمیں دزگیری ءِ ھال دیما نئیتکگ۔

دومی نیمگ ءَ سربیتگیں اھولانی ردءَ نوزدہ جولائی ءِ شپ ءَ ادار یک ءَ شال ءِ ھنکین جامعہ عمر بادیزئی پشتون آباد ءَ سی ٹی ڈی ءِ کارندھاں بیڑ بُرتگ ءُ خاران ءِ جھمنند حافظ اورنگزیب سرپرہ دزگیری ءَ پد بیگواہ کُتگ۔

گیشتریں اھولانی ردءَ سئے شمبے ءِ بیگاہ ءَ جامعہ عمر بادیزئی پشتون آباد ءِ مدرسہ ءَ دیما پیش اتکگ کہ آودہ سی ٹی ڈی کارندھاں بیڑ بُرتگ حافظ اورنگزیب سرپرہ ء بہادر خان سرپرہ ابید آمیدگسی پرمان دزگیر کنگ ءَ پد بیگواہ کُتگ۔

زانگ بہ بیت کہ حافظ اورنگزیب سرپرہ یک حافظ القرآن ءُ قاری اِنت کہ پشتون آباد ءِ ھمے مدرسہ ءَ نیکراھی زانشت دیگ ءَ اَتکگ بیتگ۔

حافظ اورنگزیب ءِ سیادی خاران شھرءِ قلعہ محلہ ءَ چہ اِنت۔

ھندوستان ءِ سانمندیں رودراتکی استان منی پور ءَ دو زالبولانی برھنگ کنگ ءُ ترینگ ءِ ھلاپ ءَ بازیں کچے ءَ زھرشانی کنگ ءَ پد نندانک جنگ بیتگ ءُ ھواریں دراھیں مردماں دزگیر کنگ ءِ لوٹ کنگ بیتگ –

ھال سر کنوکیں ادارہ ایسی سی ایٹڈ پریس ءِ رد ءَ شمبے ءِ روچ ءَ دیگ بیتگیں نندانک ءُ کساس پانزدہ ھزار مردماں بھر زرتگ-

زھرشانی ءَ نیکراھی ءُ زالبولانی گلانی رھشوناں تران کرتگ، اُستان ءِ سروزیر بیرن سنگھ ءَ را ءَ دزکش کنگ ءِ لوٹ کنگ بیتگ اَنت-

منی پور ءَ مئی ءِ ماہ ءَ دو زالبولانی ناوشیں وئیل ءُ دیم ءَ اتکگ اَنت – چریشی ءَ تامر بندے دیم ءَ اتکگ ات کہ اود ءَ لس مردماں زالبولانی گُد کش اتگ ءُ بازار ءَ ترینتگ ءُ ھمے وھد ءَ آ دز جنگ ءَ ھم گندگ بنت اِنت-

زانگ بہ بیت مئی ءِ ماہ ءَ منی پور اُستان ءَ دو نسلی ٹولیانی میان ءَ جنگ ءُ چوپ ءَ داں انگت ءَ یک سد ءُ سی مردم بیران بیتگ اَنت-

اے زھرشانی اُستان ءِ بنجاھی شھر امپھال ءَ چہ شست ءُ پنچ کلو میٹر زربار ءَ یک میتگے چورا چند پور ءَ کنگ بیتگ –

زھرشانی ءَ بازیں مردمے ءَ بھر زرتگ ءُ ایشانی توک ءَ زالبولانی یک مزنیں کچے ھم ھوار بیتگ- منی پور ءَ دو ماھانی توک ءَ وت ماں وتی جنگانی دیمپانی اِنت-

ریاست ءَ مسیھی کوکیوں ءِ نیمگ ءَ آیانی آبادی ءِ دمگ ھندواناں سرکاری چیردستی ءَ زمین ءِ زیرگ ءِ اجازت ءُ گچینی شرپ دیگ ءِ ھلاپ ءَ زھرشانی بندات بیتگ کہ نی اے گیش دراج کش بیتگ-

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشانے ءِ تہ ءَ بلوچستان ءِ دمگ بولان ءُ ھرنائی ءَ پاکستانی پوج، پہ پوج ءَ راشن سرکنوکیں گاڑی ءُ موبائیل ٹاور ءِ سر ءَ بوتگیں اُرشانی زمہ واری منّ اِتگ ءُ گوشتگ کہ اے اُرشاں یک کارمندے مُرتگ ءُ دو زدگ بوتگ انت –

جارکش جیئند بلوچ ءِ رِد ءَ بی ایل اے ءِ سرمچاراں بولان ءِ دمگ پیراسمائیل ءِ ھند منصور ٹاپ ءَ زورگیریں پوج ءِ پانگس ءَ آپ سر کنوکیں ٹریکٹر تراکناکیں شوروانی نشانگ کُتگ ، تراک ءَ ٹریکٹر ءَ تاوان رستگ وھدیکہ آئی ءِ ڈرائیور زدگ بوتگ –

جارکش ءِ رِد ءَ سرمچاراں تراک ءَ پد ھمے جاہ ءَ آؤکیں پاکستانی پوج ھم تراکناکیں شوروانی نشانگ جوڈ کتگ چریشی ءَ یک دژمن کارمندے ھما دمان ءَ مُرتگ ءُ یکے زدگ بوتگ –

بی ایل اے ءِ جارکش جیئند بلوچ ءِ رِد ءَ سرمچاراں ھمے سال ءِ بیست ءُ یک جولائی ءِ شپ ءَ ھرنائی ءَ چیرلٹ ءِ نزیک ءَ برجاھیں ٹاورے ءِ چیر ءَ تراکناکیں شورہ کل کُتگ ءُ تباہ کتگ، اے ٹاور زورگیریں پوج ءِ پانگسے نزیک ءَ پہ پوجی کارانی ھاتر ءَ مک کنگ بوتگ –

جارکش ءِ رِد ءَ بی ایل اے ھر سَئیں اُرشانی زمہ واری ءَ منیت، زورگیریں پوج ءُ آئی ءِ کمکارانی سر ءَ اُرش برجاہ مان انت –

کیچ ءِ دمگ مند ءِ جھمنند بیگواھیں سمیر احمد ء صابر احمد ءِ زھگ ہانی سمیر ءَ رسانکدراں وتی شنگ کرتگیں درشانے ءِ تہ ءَ بُرزی تبک واکدار ءُ ادارھاں گوں لوٹ کتگ ءُ گوشتگ کہ منی پت ءَ دھ سال انت ریاستی ادارھاں گون انت آ یل کنگ بہ بیت ءُ مارا چہ اے دردانکیں زند ءِ تہ ءَ رکینگ بہ بیت –

آئی ءَ گوشتگ کہ منی پت سمیر احمد پنچ مئی سال دوھزار سینزدہ ءَ چہ مند ءَ زورانسری آوار جنگ بوتگ کہ ھنگت بیگواہ انت – اے میان ءَ مارا بس دروگیں تسلہ دیگ بوتگ بلے راستی ءَ ھچ کنگ نہ بوتگ ما چہ پاکستانی ادارھاں گوں لوٹ کن ایں کہ منی پت ءَ زاھر بہ کن انت ءُ یل بہ کن انت –

آئی ءَ گوشتگ کی باندا شپ ھشت ءَ بگر تاں دوازدہ ءَ آن لائن مہم ءِ چلائینگ انت اشی ءِ تہ ءَ بھر بہ زور ات ءُ سمیر بلوچ ءِ وش سلامتی یل کنائینگ ءَ وتی کرد ءَ پیلو بہ کن ات –

وڈھ ءَ برجاھیں ناگیگی

ٹی بی پی شونگال

بلوچستان ءِ کلات دمگ ءِ بنجاھی شھر ھزدار ءِ وڈھ ھنکین ءَ چہ گوستگیں یک ماھے ءَ جاورھال ناگیگ اَنت۔ مینگل ٹک ءِ سردار اسد مینگل ءُ بلوچستان نیشنل پارٹی ءِ سروک سردار اختر مینگل ءُ دومی نیمگ ءَ شفیق مینگل یک دومیگ ءِ بگیر ءَ سنگر بند اَنت ءُ میڑانی تہ ءَ مزنیں سلاھانی آجوئیں کارمرزی برجاہ اِنت۔ ترندیں میڑانی سوب ءَ وڈھ ءِ مھلوک گَٹ اِتگ اَنت ءُ شال – کراچی مزن شھدگ ءِ ھند ءَ چہ گاڑیانی رپت ءُ آمد سرجمی ءَ بند بیتگ اَنت۔

بلوچستان نیشنل پارٹی ءِ بھتام اِنت کہ شفیق مینگل چیریں ادارگانی پرمان ءِ پد ءَ سردار اختر مینگل ءَ نزور کنگ ءِ جھد کنگ ءَ اِنت۔ بی این پی ءَ شفیق مینگل ءِ بگیر ءَ سرجمیں بلوچستان ءَ پرگ بند ءُ تھتگ بندیں ھڑتال کُتگ ءُ بلوچستان سرکار ءُ ٹکی مسترانی کوشستاں ابید ھم وڈھ ءَ ناگیگی یکشلی ءَ گیشتر بوان اِنت ءُ شفیق مینگل ءِ مردم کوٹ مینگل ءَ سرداراختر مینگل ءِ لوگ ءَ گوں راکٹاں نشانگ کنگ ءَ اَنت۔

بلوچستان ءِ سیاسی پاٹیانی مدامی بھتام اِنت کہ پاکستانی چیریں ادارگاں بلوچ جنگ ءِ دارگ ءِ ھاتر ءَ چہ دو ھزار ءُ ھشت ءَ سرجمیں بلوچستان ءَ ڈیتھ اسکواڈ اڈ داتگ اَنت، کہ آ بازیں سیاسی باسکانی زورانسری بیگواھی ءُ کوشانی تہ ءَ ھوار اَنت ءُ چہ ھمیشاں یک ڈیتھ اسکواڈے شفیق مینگل ءِ مستری ءَ اَڈ دیگ بیتگ کہ آ ’مسلح دفاع‘ بلوچستان ءُ حق نا توار ‘ءِ نام ءَ زانگ بیت اِنت۔ بلوچستان ءَ ڈیتھ اسکواڈ ھمینکس تاکتور اَنت کہ آ ریاست ءِ تہ ءَ وت ریاست ءِ کرد ءَ پیلو کنگ ءَ اَنت۔

مسلح دفاع بلوچستان، جھالاوان عوامی پینل ءُحق نا توار شفیق مینگل ءِ مستری ءَ قلات ھنکین ءُ ھاسیں پئیماں ھزدار ءَ ڈیھی ادارگاں چہ گیشتر تاکت دار اَنت۔آ گمانی پئیم ءَ پہ لب بیگواہ کنگ، زورانسری بیگواھی ءُ کوشکاری ءِ بے کساسیں وئیلانی تہ ءَ ھوار بیتگ اَنت۔ لیویز لشکریانی دارگ ءِ سر ءَ وئیل جاہ ءَ ساڑی ایں نھ لیویز کارندھانی کوش ءَ ھم ھوار اَنت۔ سندھ پولیس ءِ جے آئی ٹی ارزی ءِ رد ءَ شفیق مینگل ءِ سیادی گوں لشکر جھنگوئی ءَ ھم ھست اِنت ءُ شکارپور اُرش، کہ آئی تہ ءَ شست ( 60 ) مردم کُشگ بیتگ اَت ھما وتکُشیں ارشکار ءَ وڈھ ءَ باھوٹی دیگ بیتگ اَت ءُ شفیق مینگل ءِ مردماں آ داں شکار پور ءَ سرکُتگ بیتگ ات۔

بلوچستان ءِ پارلیمانی پاٹی جتاھیں وھداں ڈیتھ اسکواڈانی ھلاپ ءَ پاکستان ءِ پارلیمان ءُ زھرشانیانی تہ ءَ توار چست کنان اَنت بلے بلوچستان ءَ داں ھما وھد ءَ ڈیتھ اسکواڈانی بگیری ءَ مھکمیں زرمبشت ءِ جُنزینگ گرام بیت دانکہ پارلیمانی پاٹی اے ڈیتھ اسکواڈزاں وتی پاٹیانی تہ ءَ باھوٹی دیگ بند نہ کن اَنت، تُری آ گمانی ڈیتھ اسکواڈ ءِ مستر قلات ءَ کوھی خان مینگل ءُ قمبر خان مینگل بہ بنت، مشکے ءَ علی حیدر محمد حسنی بہ بیت، مستونگ ءُ شال ءَ نور احمد بنگلزئی بہ بیت یا اگاں کیچ ءَ راشد پٹھان ءُ میر ھوتمان بہ بنت۔

یک دمگے ءَ ڈیتھ اسکواڈ ءِ بگیری ءُ دومی دمگ ءِ ڈیتھ اسکواڈ ءَ پاٹی ءِ تہ ءَ باھوٹی دیگ ءِ سوب ءَ اِیشانی ھلاسی باوری نہ اِنت۔ پارلیمانی پاٹیاں ابید کجام ھم تپاوت ءَ ڈیھی ڈیتھ اسکواڈ ءِ بگیری کنگ لوٹ ایت تھنا گُڑا بلوچستان ءِ ڈیتھ اسکواڈانی بگیری ءَ جُنز مھکم بیت کَنت۔

ڈیھی ادارگاں ھم سرپد بیگ لوٹ ایت کہ ڈیتھ اسکواڈ کارمرز کنگ ءَ گوں سیاسی جُنز ھلاس بیت نہ کن اَنت ءُ بلوچ راجی اگبالانی دیگ ءَ ابید بلوچستان ءِ جیڑہ گیوار نہ بنت اِنت۔

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وی بی ایم پی ءِ زھرشانی برجاہ، وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ یکسد ءُ سیزدہ روچ سرجم بوتگ انت – مروچی چہ شال ءَ سیاسی باسک نور محمد بلوچ، محمد اکرم بلوچ، عبدالقیوم بلوچ ءَ ھوار دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچ پرزندانی ژانگولیں جون، بمبگواری ءِ آماچیں ویرانیں میتگ، گام گامے سر ءَ زورگیریں پوج ءَ بلوچ سرڈگار ھونیں کُتگ – بلوچستان ءِ جتا جتائیں ھند ءُ دمگانی تہ ءَ پاکستانی پوج ءَ وتی ناشرکاری گیش کتگ ءُ گچین کاری ءِ تیاری ءَ ھوار ھوار بلوچ راج نشانگ کنگ بوگ ءَ انت –

ماما قدیر بلوچ ءَ گوشتگ کہ بلوچستان ءِ تہ ءَ پاکستان ءِ ناشرکاری ءُ بلوچ ءِ چکچینی گیش بوان انت بلے میان استمانی رسانکدر ھچ گوشگ ءَ نہ انت وھدیکی اقوام متھدہ ءَ ھوار ایندگہ میان استمانی ادارہ وتی زمہ واریاں پیلو کنگ ءَ نہ انت –

آئی ءَ گوشتگ کہ مشکے، آواران ، مکران کلات، ڈیرہ بگٹی کوہلو مستونگ ءَ ھوار سرجمیں بلوچستان ءَ پاکستان ءِ نیمگ ءَ بلوچ ءِ چُکچینی ءُ ناشرکاریانی درچ یکشل ءَ برجاہ انت بلے بلوچستان ءِ تہ ءَ پاکستان ءِ نیمگ ءَ برجاھیں بلوچ چکچینی ءُ بلوچ راج ءِ بگیری ءَ ناشرکاریانی گر ءُ دار ءَ اقوام متھدہ وتی کرد ءَ پیلو کنگ ءَ نہ انت کہ پدردی گپ یے –

آئی ءَ گوشتگ کہ بلوچستان ءَ برجاھیں پاکستان ءِ ناشرکاری بلوچ چکچینی ءِ درچ یے بلوچ راج ءَ پاکستان ءِ زورگیری ءِ بگیری ءَ راجی زرمبشت مھکم کتگ کہ اے پہ ناشرکاری کاری ءُ بلوچ پرزندانی نمیرانی ءَ ھلاس کنگ نہ بیت بلکنہ دیمھونی دیگ ءَ زرمبشت چدوگیشتر مھکم تر بوان بیت –

سربوتگیں ھالانی رِد ءَ بلوچستان ءِ دمگ کیچ ءَ پاکستانی پوج ءَ شپ ءِ نھنگام ءَ بیڑ برتگ ءُ یک ورنایے زورانسری آوار جتگ ءُ بیگواہ کتگ –

آوار جنگ بوتگیں ورنایے پجار راشد ء جلیل نام ءَ بوتگ کہ آ تمپ ءِ دمگ گومازی ءِ جھمنند انت –

اھوالکار ءِ رِد ءَ ورنا دوشی شپ پاکستانی پوج ءَ گومازی ءَ چہ جندے گس ءَ زورانسری آوار جتگ ءُ بیگواہ کتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ زوراکیانی درچ یکشل ءَ برجاہ انت – بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءِ رِد ءَ بلوچستان ءَ ھچ چُشیں ھند ءُ دمگ ءِ نیست کہ آ چہ پاکستانی پوج ءِ زوراکیاں رک اِتگ تنی وھدی سرجمیں بلوچستان کساس پنجاہ ھزار ءَ گیش مردم آوار جنگ ءُ بیگواہ کنگ بوتگ انت –

سربوتگیں ھالانی رِد ءَ بلوچستان ءِ دمگ بولان ءَ ناشناسیں مردماں پاکستانی پوج ءُ آئی ءَ راشن سرکنوکیں گاڑی تراکناکیں شوروانی نشانگ جوڈ کتگ انت –

گیشیں ھالانی رِد ءَ مروچی شمبے ءِ روچ ءَ بولان ءِ دمگ پیر اسمائیل ءَ منصور ٹاپ ءِ ھند ءَ پد ماں پد دو بمب تراک کنگ بوتگ انت، اھوالکار ءِ رِد ءَ اے تراکاں پاکستانی پوج ءُ آئی ءَ راشن سر کنوکیں گاڑیانی سر ءَ کنگ بوتگ انت –

اھوالکار ءِ رِد ءَ ھردو اُرشاں جانی ءُ مالی تاوان ءِ گمان کنگ بیت انت بلے تنی وھدی واکدارانی نیمگ ءَ اے درگت ءَ ھچ وڈیں درشان دیگ نہ بوتگ-

زانگ بہ بیت کہ اے دمگاں گیشتر بلوچ آجوئی لوٹوکیں سلاہ بندیں گل اُرش کن انت بلے اے اُرشانی زمہ واری ھچ گل ءَ نہ منّ اِتگ انت –