TBP Balochi

چہ بلوچستان ءَ پاکستانی پوج ءَ یک مردمے دزگیر کنگ ءَ پد بیگواہ کرتگ، ھمے وڑ دگہ دو مردم یل کتگ اَنت-

بیگواہ بیتگیں مردم ءِ پجار نصیر احمد ء فقیر محمد جھمنند مشکے جھلواری ءِ نام ءَ زانگ بیتگ-

کھول ءِ رد ءَ نصیر احمد پوج ءَ کسانیں ائید ءِ دَہ روچ ءَ پد چہ تربت ءَ دزگیر کتگ کہ آئی ءِ راستیں ھال نی کھول ءَ شنگ کتگ-

دومی نیمگ ءَ آواران ءِ دمگ چہ مشکے ءَ ھال اِنت بیست ءُ دسمبر دوھزار ءُ ھژدہ ءِ شپ ءَ پاکستانی پوج ءَ لوگ ءَ بیڑ برتگ ءُ ھاشم ء رسول بخش نامیں مردمے دزگیر کتگ بیتگ کہ بازیں وھداں بندیگ بیگ ءَ پد پوج ءَ بیست ءُ سَے جولائی دوھزار ءُ بیست ءُ سَے ءَ یل کتگ-

ھمے وڑ ھاران ءَ گوستگیں روچ ءَ بیگواہ بیتگیں حافظ اورنگزیب ھم یل بیتگ ءُ وتی لوگ ءَ سر بیتگ-

بلوچستان ءِ جتا جتائیں جاھاں ھور ءُ توپانانی تباہ کاریاں شش مردم بیران ءُ سیزدہ زدگ بیتگ اَنت-

بلوچستان ءِ شھراں توپانی ھوراں ھار ملانی جاور اَنت-

سر بیتگیں اھوالانی بسیمہ ءُ آئی ءِ کوچگی ھند پتک ھور ءُ ھاراں تباھی کرتگ، توپانی ھار شھر ءِ آبادی ءَ مان رتکگ ءُ چریشی ءِ سبب ءَ بازیں لوگ، دکان ءُ ھوٹل کپتگ اَنت-

ایشی ءَ ابید ھورانی آپاں جھلگیں آپداناں کشت ءُ کشار ھم تاوان داتگ اَنت –

آواران ءِ ھند ءَ ھور ءِ گوارگ ءَ کور ءِ آپ گیش بیتگ ءُ پھزداری بند ءِ برگ ءِ گمان اِنت –

گوستگیں روچ ءَ دو جتا جتائیں جاھاں دو لاش دزکپتگ اَنت-

اھوالانی رد ءَ روکپتی بلوچستان ءِ بنجاھی شھر زاھدان ءَ یک لاشے دزکپتگ –

اھوالانی رد ءَ زاھدان ءِ ھند نصرت آباد ءَ یک ورنایے ءِ تیر جتگیں لاش دزکپتگ-

دزکپتگیں لاش ءِ پجار علی اکبر شاہ بخش ء اسماعیل جھمنند گلوگاہ زاھدان ءِ نام ءَ زانگ بیتگ-

اھوالانی رد ءَ علی اکبر چِل ءُ نُھ روچ پیش ماں دو ھمراھانی ھمراھی ءَ چھبار ءَ دیم پہ زاھدان ءِ روگ ءِ وھد ءَ ایرانشھر ءِ ھند کمربندی ءَ سلاہ بندیں مردماں آوار جتگ ءُ گون وت برتگ-

اھولانی رد ءَ علی اکبر ءِ لاش گوستگیں ھپتگ ءَ دز کپتگ ءُ آئی ءِ لاش چست کنگ ءُ ھسپتال ءَ برگ بیتگ ءُ اود ءَ آئی ءِ ڈی این اے ٹیست ءَ سرپدی رس اتگ کہ اے مرد ءَ کساس ماھے بیت اِنت کہ کُشگ بیتگ-

زانگ بہ بیت گوستگیں روچ ءَ ھاش ءَ ھم یک لاشے دزکپتگ ات کہ آئی ءِ پجارھمد صدیق ءِ نام ءَ زانگ بیتگ ات-

اے مردمانی بیگواہ کنگ ءُ آیانی بیگواہ کنوکانی بارو ءَ دگہ ھاسیں سرپدی نہ بیتگ اَنت-

انڈونیشیا ءَ سولاویسی جزیر ءِ زر ءَ یک بوجیگے بڈ اتگ کم چہ کم پانزدہ مردم بیران بیتگ اَنت ءُ نوزدہ مردم بیگواہ اَنت-

فرانسیسی ھال سرکنوکیں ادارہ اے ایف پی ءِ رد ءَ دوشمبے ءَ انڈونیشیا ءِ سرچ اینڈ ریسکیو ایجنسی ءَ دمگی گارکس ءَ یک درشانے شنگ کتگ ءُ گوشتگ کہ یکشمبے ءِ نیم شپ ءِ گوزگ ءَ پد بوجیگ بڈ اتگ کہ ایشی ءَ چِل مردم سوار بیتگ اَنت-

درشان ءِ رد ءَ شش مساپر رکینگ بیتگ اَنت ءُ جاندراھی ءِ واستا نزیکیں ھسپتال ءَ برگ بیتگ اَنت ءُ بوجیگ ءِ بڈگ ءِ سببانی پٹ ءُ پول برجاہ اِنت-

زرباری رودراتک ءَ سولاویسی ءِ شجر کیندری ءَ ریسکیو ایجنسی ءِ سروکھمد عرفہ ءَ یک درشانے ءَ گوشتگ کہ نوزدہ مردمانی پٹ ءُ پول برجاہ اِنت کہ ایشی ءِ واستا شش ٹیم دارگ بیتگ اَنت-

ھبدہ ھزار جزائر ءَ ھواریں زرباری رودراتکی جزیرہ ءَ زر ءَ وئیلانی پیش آیگ نوکیں گپے نہ اِنت دوھزار ءُ ھژدہ ءَ سماٹرا جزیرہ ءَ دنیا ءِ توک ءَ درستاں مستریں جھلانکی چِلاں چہ یکے ایشی ءِ توک ءَ یک بوجیگے بڈ اتگ ءُ ایشی ءَ یک سد ءُ پنجاہ مردم ءَ گیش مردم بیران بیتگ اَنت-

گوستگیں سال ءِ مئی ءِ ماہ ءَ یک فیری ءَ کہ ایشی ءَ ھشت سد مردم سوار بیتگ اَنت، رودراتکی نوسا ٹینگگار ءِ استان ءِ نزیک ءَ جھلیں جاہ ءَ پس اتگ داں دو روچاں ھمود ءَ پس اتگ بیتگ بلے اد ءَ ھچ جانی تاوان نہ بوتگ-

شال پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ یکسد ءُ چاردہ روچ سرجم بوتگ انت – مروچی پی ٹی ایم ءِ عبدالقیوم کاکڑ، سلطان ءُ دگہ مردماں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءِ تہ ءَ پاکستانی پوج ءَ زورانسری آوار جنیانی تہ ءَ گیشی آرتگ –

آئی ءَ گوشتگ کہ زورانسری آوار جنیانی بگیری ءَ مارا دیر انت کہ اے دراجکشیں پُرایمنیں جھد ءَ کنگ ءَ انت بلے میان استمانی انسانی ھکانی ادارگ پاکستانی زوراکیانی دیم ءَ بے وس ءُ ھچ گوشگ ءَ نہ انت –

آئی ءَ گوشتگ کہ بیست ءُ پنچ جولائی ءَ زورانسری آوار جنیانی بگیری ءَ پریس کلب ءِ دیم ءَ روانک ءِ کشگ بیت – مردماں گوں دزبندی انت کہ بھر بہ زور انت انسانیت ءِ بگیری ءَ پوج ءِ کتکاریانی بگیری ءَ توار چست بہ کن انت –

آئی ءَ گوشتگ کہ پاکستان ءِ زورگری ءَ بگر تان روچ مروچی پاکستان بلوچ، پشتون ءُ سندھی راج ءَ ایردست کنگ ءِ جھد ءَ انت – برے دیمروئی ٹاھاں گوں برے گند ءُ نند ءُ برے زوراکیءُ لشکرکشیاں زورانسری اوار جنگ بوتگیں بلوچ، پشتو ءُ سندھی سیاسی باسکاں نشانگ کنگ، ءُ لس مھلوک ءِ سر ءَ بمبگواری کنگ –

سربوتگیں ھالانی رِد ءَ بلوچستان ءِ دمگ آواران ءَ پاکستانی پوج ءُ بلوچ آجوئی لوٹوکیں سلاہ بندانی میان ءَ میڑے بوتگ –

آجوئی لوٹوکیں سلاہ بند ءُ پاکستانی پوج ءِ میان ءَ اے میڑ آواران ءِ ھند مالار ءَ بوتگ، اھوالکار ءِ رد ءَ ھردو نیمگاں جانی تاوان ءِ ھال انت –

بلے تنی وھدی اے میڑ ءِ درگت ءَ پوج ءِ واکدارانی نیمگ ءَ ھچ وڈیں درشان دیگ نہ بوتگ ءُ ناکہ بلوچ آجوئی لوٹوکیں سلاہ بندین گلاں اے درگت ءَ اھوال شنگ کتگ –

سر بیتگیں اھولانی رد ءَ روکپتی بلوچستان ءِ دمگ ھاش ءَ دیم پہ زاھدان ءَ روکیں پولیس کارندھانی سر ءَ ناشناسیں مردماں اُرش کتگ ءُ چار پولیس کارندہ کشتگ اَنت-

سرکاری اھوالانی رد ءَ چار پولیس کارندھانی پجار مھدی اللہ پور، رضا اسماعیلی، مھمد رضا شیخی ءُ حسن وحیدی ءِ ناماں زانگ بیتگ اَنت-

زانگ بہ بیت چہ ھاش ءَ چل ءُ پنچ کلو میٹر ءِ دوری ءَ ناشناسیں مردماں اُرش کتگ ءُ چار پولیس کارندہ کشتگ اَنت ءُ دگہ یک مردمے زدگ کتگ –

وئیل ءَ پد لاشانی چست کنگ ءَ ھیلی کاپٹر ھم وئیل جاہ ءَ سر بیتگ ءُ لاش اش چست کتگ ءُ دیم پہ زاھدان ءَ برتگ انت ئے –

تنی وھدی اے وئیل ءِ زمہ واری ھچ گل ءَ پہ وت ءَ نہ زرتگ ءُ روکپتی بلوچستان ءَ اے دابیں وئیل گوست ءَ ھم پیش اتکگ بیتگ اَنت-

سر بیتگیں اھوالانی رد ءَ روکپتی بلوچستان ءِ بنجاھی شھر زاھدان ءَ بیگواہ بیتگیں ورنا ءِ لاش مروچی دزکپتگ-

بلوچ کمپعن فعالین ءِ رد ءَ زاھدان ءَ بیگواہ بیتگیں ورنا مھمد صدیق شھنوازی ءِ لاش ماں ھاش ءُ زاھدان ءِ میان ءَ دزکپتگ-

بلوچ کمپعن فعالین ءِ رد ءَ مھمد صدیق شھنوازی ماں گوستگیں آدینگ ءَ زاھدان ءَ بیگواہ کنگ بیتگ ءُ مروچی آئی ءِ لاش دزکپتگ-

اھوالانی رد ءَ مھمد صدیق ء مولوی حسین جھمنند ھاش گوستگیں آدینگ ءَ بیگواہ کنگ بیتگ ءُ آئی ءِ تیر جتگیں لاش ماں ھاش ءُ زاھدان ءِ میانی دمگ دجنگ ءَ دزکپتگ-

اھوالانی رد ءَ آئی ءِ لاش ءُ تیرانی ٹپ پر اَنت ءُ کساس ھمے گمان بوگ ءَ اِنت کہ گوستگیں روچ ءَ جنگ ءُ کُشگ بیتگ-

آئی ءِ بیگواھی ءُ کوش ءِ بارو ءَ دگہ اھوال دیم ءَ نیتکگ اَنت-

سر بیتگیں اھولانی رد ءَ روکپتی بلوچستان ءِ دمگ ھاش ءَ تیرگواری ءَ پولیس ءِ سَے کارندہ بیران بیتگ اَنت ءُ دگہ یک مردمے زدگ بیتگ-

تیرگواری ءِ وئیل ھاش ءَ چل ءُ پنچ کلومیٹر دوری ءَ پیش اتکگ کہ اود ءَ ناشناسیں مردماں تیرگواری کتگ ءُ سَے پولیس کارندہ کشتگ اَنت ءُ دگہ یک مردمے زدگ بیتگ –

سرکاری تکاں تنی وھدی اے درگت ءَ اے درگت ءَ اھوال دیم ءَ نیتکگ اَنت بلے شنگ بیتگیں اکسانی توک ءَ پولیس کارندھانی لاش گندگ بنت اِنت-