TBP Balochi

وائس فار بلوچ مسنگ پرسنز ءِ نیمگ ءَ بیگواھیں مردمانی یل کنائینگے ھاتر ءَ شال ءَ روانک ءِ کشگ بوتگ ءُ پریس کلب ءِ دیم ءَ زھرشانی کنگ بوتگ –

زھرشانی ءَ دگہ پاٹی، نودربرگلانی باسکاں ھوار ھر تک ءُ پھناتاں سیادی داروکیں مردماں بھر زرتگ –

زھرشانی ءَ بیگواھیں مردمانی کھول، نیشنل پاٹی ءِ رھشون ءُ وائس فار بلوچ مسنگ پرسنز ءِ سرکماش نصراللہ بلوچ ءَ تران کنان ءَ گوشتگ زورانسری آوار جنگ بوتگیں مردمانی جیڑہ روچ پہ روچ گیش بوان انت، ھچ چُشیں گِسے نہ بچ اِتگ کہ چہ اودا کسے آوار جنگ ءُ بیگواہ کنگ نہ بوتگ –

آئی ءَ گوشتگ کہ بیگواھیں مردمانی یل کنگ ءِ درچ اُشتاتگ وھدیکہ بلوچستان بازیں ھند ءُ دمگاں گوستگیں ماہ ءَ چِل ءَ گیش مردم زورانسری آوار جنگ ءُ بیگواہ کنگ بوتگ انت – ما چہ ریاست ءَ لوٹ کن ایں کہ بیگواھیں مردم یل کنگ بہ بنت تانکہ آھانی کھول چہ اے وداراں بہ رک انت –

زھرشانی ءَ چہ شال ءَ زورانسری آوار جنگ بوتگیں جمیل احمد سرپراہ ءِ لوگبانک ءَ تران کنان ءَ گوشتگ کہ منی لوگواجہ ءَ ھشت سال انت کہ زورانسری آوار جنگ ءُ بیگواہ کنگ بوتگ اے میان ءَ ما ھر وڈیں جھد کتگ بلے ھنگت منی لوگواجہ زاھر کنگ نہ بوتگ –

زھرشانی ءَ ھواریں چہ ھزدار ءَ سیادی داروکیں سائرہ بلوچ ءِ گوشگ ات کہ آئی ءَ پنچ سال انت کہ وتی براتانی ودار ءَ نشتگ – اے پنچیں سالاں آئی ءَ ھما زوراکی دیستگ انت کہ بیگواھیں مردمانی کھولاں گند انت – نوں ریاست ءَلوٹیت کہ اے زوراکیاں ھلاس بہ کنت ءُ مئے دوستیگیں مردماں مارا بہ دنت –

مروچیگیں زھرشانی ءَ چہ نیوکاہان شال ءَ زورانسری آوار جنگ بوتگیں مزنیں کچے ءَ مری بلوچانی کھولاں بھر زرتگ ءُ گوشتگ کہ آھانی دوستیگیں مردماں بازیں سالے بیت کہ پوج ءَ آوار جتگ ءُ بیگواہ کتگ انت کہ ھنگت یل کنگ نہ بوتگاں –

بیگواھیں مردمانی کھولانی گوشگ ات کہ ریاستی ادارھاں اے وھدی مزنیں کچے ءَ بلوچ ءِ گسانی چراگ زورانسری آوار جتگ ءُ بیگواہ کتگ انت، آھانی مردم دگانی سر ءَ در اتکگ پریات کنگ ءَ انت کہ مئے دوستیگیں مردم یل کنگ بہ بنت بلے آھانی گوشداروک نیست ءُ ناکہ اے ملک ءِ کانودی ادارھاں چہ اے زلم ءُ زوراکیاں پرک کپیت کہ سالانی سال بلوچانی سر ءَ برجاہ انت –

شال ءِ درنگاز کنوکاں چہ سرکار ءُ انسانی ھکانی ادارھاں گوں لوٹ کتگ کہ آ بلوچستان ءَ برجاھیں زورانسری آوارجنیانی گر ءُ دار ءَ بہ کن انت ءُ بیگواھیں مردماں یل بہ کنائین انت –

درنگاز کنوکانی گوشگ ات کہ مروچی بلوچ ھچ جاہ پھریز نہ انت آ بلوچستان بہ بیت یا بلوچستان ءَ ڈن نوں جاور چوش انت کہ ھما ورنا کہ پنجاپ ءِ زانشجاھاں ساڑی انت آ ھم یک یک ءَ آوار جنگ بوگ ءَ انت – اگاں اے سنگینیں انسانی ھکانی بگیری دارگ نہ بوت گڈا اشی ءِ برورد بیمناک بنت –

پاکستانی پوج ءُ چیریں ادارھانی دست ءَ چہ ھاران ءَ زورانسری آوار جنگ بوتگیں دھ سالی زھگ کفایت اللہ ءِ بیگواھی ءَ پنچ سال ءُ چہ اوتھل ءَ آوار جنگ بوتگیں بی این ایم ءِ رھشون محمد رمضان ءَ بیگواھی ءَ سینزدہ سال سرجم بوتگ انت کہ ھنگت گار ءُ بیگواہ انت –

سال دوھزار دھ ءِ بیست ءُ پنچ جولائی ءَ چہ اوتل ءِ سَے راھی ءَ پاکستانی پوج ءِ دست ءَ زورانسری آوار جنگ بوتگیں مھمد رمضان ءِ زھگ علی حیدر ءَ وتی پِت ءِ زورانسری آوار جنی ءِ سیزدہ سال سرجم بوگ ءَ ماں چاگردی ترامجاہ ٹویٹر ءَ نبشتگ کہ منی پِت محمد رمضان ءِ زورانسری آوار جنی ءَ مروچی سیزدہ سال سرجم بوتگ انت –

آئی ءَ نبشتگ کہ پہ پِت ءِ یل کنائینگے ھاتر ءَ مئے کھول ءَ گوستگیں سیزدہ سال اِنت کہ یکشل ءَ جھد کنگ ءَ اِنت – ءُ وی بی ایم پی ءِ ھمراھی ءَ چہ شال ءَ بگر داں اسلام آباد ءَ روانک کش اِتگ ءُ شال ءِ دراجکشیں زھرشانی نندانک ءَ ھم ھوار بوتگ ایں –

علی حیدر ءَ دیمتر ءَ نبشتگ کہ آئی ءَ زھرشانی ءِ درسیں راہ کارمرز کرتگ اَنت، بلے سیزدہ سال ءِ گوزگ ءَ پد ھم انگت ءَ پِت دیم ءَ آرگ نہ بوتگ-

آئی ءَ گوشتگ کہ اے سیزدھیں سال منی کھول ءَ گوں کجام درداں گوں گوازینتگ اَنت کس گمان کرت نہ کنت – آئی ءَ ھر تک ءُ پھناتاں سیادی داروکیں مردمانی گوم ءَ لوٹ کتگ کہ پت ءِ زورانسری آوار جنی ءِ بگیری ءَ توار چست بہ کن انت-

چہ ھاران ءَ سیادی داروکیں دھ سالی زھگ کفایت اللہ بیست ءُ پنچ جولائی سال دوھزار ءُ ھژدہ ءَ زورانسری آوار جنگ بوتگ –

بیگواھیں کفایت اللہ ءِ کھول ءِ نیمگ ءَ آئی ءِ زورانسری آوار جنی ءِ بگیری ءَ وھد وھدے سر ءَ زھرشانی ءُ روانک کشگ بوتگ ءُ سال دوھزار بیست ءُ یک ءِ دسمبر ءِ ماہ ءَ ھاران ءَ پریس کلب ءِ دیم ءَ ادارکی شدکشیں زھرشانی بنجلے ھم جنگ بوتگ ءُ آئی ءِ یل کنگ ءِ لوٹ کنگ بوتگ –

زانگ بہ بیت کفایت اللہ بلوچ سال دوھزار ھژدھے گیچین کاریانی روچ ءَ چہ ہولنگی راسکوہ پولنگ اسٹیشن ءَ ناشناسیں مردماں آوار جتگ-

دومی نیمگ ءَ بیگواھیں مردمانی پانکجنیں گل وائس فار بلوچ مسنگ پرسنز ءَ محمد رمزان ءِ زورانسری آوار جنی ءَ سینزدہ سال سرجم بوگ ءَ ماں چاگردی ترامجاہ ٹویٹر ءَ بیست ءُ شش جولائی ءَ کمپئینے برجم دارگے جار جتگ –

وی بی ایم پی ءَ وتی جار ءِ تہ ءَ گوشتگ کہ محمد رمضان ءِ زورانسری آوار جنی ءَ مرچی سیزدہ سال سرجم بوتگ انت – علی حیدر ءُ آئی گھاراں پہ وتی پِت ءِ آجوئی ءَ ایمنی جھد کنان ءَ ورنا بوتگ اَنت، بلے آھاں تنی وھدی انساپ نہ رستگ –

آئی ءَ گوشتگ کہ وائس فار بلوچ مسنگ پرسنز زورانسری آوار جنگ بوتگیں محمد رمضان ءِ زھگانی گون ءَ پہ ھمدردی کنگ ءَ بیست ءُ شش جولائی ءَ شپ ءِ ادار ھشت ءَ بگر داں دوازدہ ءَ ٹویٹر ءَ #ReleaseRamzanBaloch کمپینے برجم دار ایت –

وی بی ایم پی ءَ سیاسی پارٹی، نودربر گلاں ھوار ھر تک ءُ پھناتاں سیادی داروکیں مردماں گوں لوٹ کرتگ کہ آ اے کمپین ءَ شریں وڑے ءَ بھر بزور اَنت ءُ محمد رمضان ءِ زھگانی توار جوڑ بہ بنت-

بلوچستان لبریشن فرنٹ ءَ وتی ھمراھیں سرمچار دوستین بلوچ ءِ شھیدی ءَ دروت ءُ گوادر ءَ بیتگیں بمب اُرش ءِ زمہ واری من اتگ-

بی ایل ایف ءِ جارکش میجر گوھرام بلوچ ءَ گوشتگ کہ بیست ءُ دو جولائی ءَ پاکستانی پوج (لیویز) ءِ گون ءَ دیم پہ دیمی بیتگ چریشی ءَ سرمچار دوسین میروانی ء ریاض پنام ءِ میرک جنگ ءِ وھد ءَ شھید بیتگ ءُ شھید دوستین ءَ سھر چکیں دروت اِنت-

جارکش ءَ گوشتگ کہ پاکستانی پوج ءِ دمگی لشکر بیمناکیں رنگے ءَ نشانگ کنگ بنت اِنت – بلوچ آجوئی ءِ جھد ءِ ھلاپ ءَ کار کنوکیں تُری آ پولیس، لیویز ءُ کجام ھم ادارہ بہ بیت آ پھل کنگ نہ بیت اِنت-

میجر گوھرام بلوچ ءَ گوشتگ کہ آواران ءِ دمگ مالار ءَ سرمچار یک چیریں تَر ءُ تابے ءَ بیتگ انت ءُ ھمے وھد ءَ پاکستانی دمگی لشکر لیویز ءَ گوں دُچار کپتگ اَنت- دشمنیں لشکر ءِ کارندھاں سرمچارانی سر ءَ اُرش کتگ، دوستین بلوچ ءَ دشمنین لشکر ءِ گون ءَ بھادری ءَ جنگ کنان ءَ پشتکنزی کتگ ءُ وت شھید بیتگ ءُ وتی دگہ ھمراھے سلامتی ءَ درکتگ اَنت-

آئی ءَ گوشتگ کہ بلوچستان ءَ پاکستانی پوج ءُ ابید دگہ لشکر ھمک وھد ءَ گل ءَ سرپد کتگ اَنت کہ آ دشمنیں پاکستان ءِ گوشتکاری ءَ یل بہ کب اَنت- اے مردم تچک ءَ سرمچارانی رنگیری ءُ اُرش کنگ ءَ دزمانجن اَنت ءُ اے دابیں مردمانی گون ءَ دشمن ءِ ڈولیں رویش آیگ بیت اِنت – ھر ھما مردم کہ پوج ءِ بھر جوڑ بیتگ ءُ راجی آجوئی ءِ جھد ءِ ھلاپ ءَ دشمن ءِ کمکاری ءَ کنگ ءَ اَنت آیاں ترندیں جنگانی دیمپانی کنگ کپ ایت اِنت – کولواہ وئیل ءَ ھواریں درستیں مردم ترندیں سزا دیگ بنت اِنت-

دومی نیمگ ءَ گوھرام بلوچ ءَ تیابدپشی شھر گوادر ءَ آبادکارانی سر ءَ بیتگیںن اُرش من اتگ-

آئی ءَ گوشتگ گوادر ءَ پنجاپی کمکارین آبادکار ءِ سر ءَ دزبمبے چگل داتگ-

آئی ءَ گوشتگ کہ چریشی ءَ پنجاپی چاریگ زائد انساری ءِ گون ءَ دگہ دمگی ورنا زدگ بیتگ اَنت-

پاکستان ءِ بنجاھی شھر اسلام آباد ءَ مروچی سھب ءِ ساھت ھپت ءَ پاکستانی پوج ءَ ھاسٹل ءَ بیڑ برتگ ءُ اود ءَ وانوکیں دو نودربر دزگیر کنگ ءَ پد گون وت برتگ اَنت-

بیگواہ بیتگیں نودربرانی پجار جواد ء اقبال جھمنند سنگانی سر تربت ءُ زید ء عبدالرسول جھمنند پسنی گوادر ءِ ناماں زانگ بیتگ اَنت-

زورانسری آوار جنگ بیتگیں زاھد آربٹ کالج اسلام آباد ءَ ھمے زوتاں پارگ بیتگ ءُ قائد اعظم یونیورسٹی ءَ داکل بوگ ءَ شتگ ءُ ھمے وڑ جواد قائد اعظم یونیورسٹی ءِ الیکٹرانکس ڈیپارٹمنٹ ےُ وانگ ءَ بیتگ –

زانگ بہ بیت بلوچ نودربرانی زورانسری ءِ وئیل سرجمیں پاکستان ءَ آیگ ءَ اَنت ایشی ءَ پیش اسلام آباد ءُ دگہ شھراں پاکستانی پوج ءَ بازیں بلوچ نودربر دزگیر کنگ ءَ پد آوار جتگ ءُ بیگواہ کتگ اَنت-

بلوچستان ءَ گوستگیں لھتے روچاں زورانسری آوار جنیانی تہ ءَ گیشی اتکگ انت چریشی ءِ ھلاپ ءَ مروچی وائس فار بلوچ مسنگ پرسنز ءَ شال ءَ زھرشانی کنگ ءِ جار پرینتگ-

متھدہ ارب امارات ءِ کسان سروک، سروزیر ءُ دبئی ءِ ھاکم شیخ مھمد بند راشد المکتوم ءَ دوشمبے ءِ روچ ءَ عراق ءِ اپس سواریں جنک ءَ را اپس ٹیکی داتگ –

عرب نیوز ءِ رد ءَ عراق ءِ ھشت سالیگین جنک لانیا فاخر ءَ وتی اپس ءِ ناگتی مرگ ءَ آئی ءَ لاپ لیٹ جتگ ءُ گریتگ ءُ اے تامبر شمبے ءِ روچ ءَ چاگردی ترام جاھاں شنگ بیتگ –

دبئی ءِ ھاکم شیخ مھمد بند راشد المکتوم ءَ چاگردی ترامجاھاں اے تامر دیستگ ءُ اے جنکوی ءِ گون ءَ پدردی درشان کتگ-

عراق ءِ جنکو لانیا ءَ آئی ءِ پت ءَ ھما وھد ءَ شوکیں اپسے ٹیکی داتگ بیتگ آ پنچ سال ءِ اُمر ءَ بیتگ لانیا وتی اپس جسنو ءَ بے کساس مھر کتگ-

لانیا ءَ وتی گریوگ ءِ تامر ءَ گوشتگ کہ منی اپس نادراہ بیتگ ءُ آئی ءِ جاندراھی ءِ سرجمیں جھد کتگ انت بلے آئی ءَ انگت ءَ ساہ داتگ اَنت-

تامر بند ءَ لانیا گریوگ ءُ جسنو ءَ وتی درستاں نزیک تریں سنگت گوشگ اِنت ءُ من ترا ھچ بر بے ھیال نہ کن آں-

متھدہ عرب امارات ءِ سرکاری نیوز ایجنسی ءِ رپورٹ ءَ تچک کنگ بیتگ دبئی ءِ ھاکم شیخ مھمد بن راشد المکتوم ءَ اپس سوار ھیلکاری بنجل ءَ عراق ءِ جنہ لانیا فاخر ءَ ھیلکاری دیگ ءُ آئی ءِ کرد ءَ دیم ءَ برگ ءُ دومی زھگاں ھم اپس سوار کت کنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب” ءَ شنگ کرتگیں درشان ءِ تہ ءَ کولواہ ءَ تیر آماچ کنگ بوتگیں شاکر ءِ کوش ءِ زمہ واری منّ اِتگ ءُ گوشتگ کہ اے مرد ریاستی چاریگ ءِ بوتگ –

بی ایل ایف ءِ جارکش میجر گوھرام بلوچ ءِ رِد ءَ کولواہ ءِ ھند ڈنڈار ءَ دُژمنیں پوج ءِ یک نزیکیں چاریگے شاکر ء ھسین سرمچاراں دزگیری ءَ پد کشتگ –

جارکش ءِ رِد ءَ زورگریں پاکستانی پوج ءِ چاریگ شاکر سرمچاراں دوازدہ جولائی ءَ دزگیر کرتگ، دُژمنیں پوج ءِ کمکار آجوئی جھد ءِ بگیری ءَ میارباری ءِ منّگ ءَ پد آ ھبدہ جولائی ءَ مرگ ءِ سزا دیگ بوتگ –

جارکش ءِ رِد ءَ اے ریاستی چاریگ ءَ سک دیر اِنت کہ کار ءَ بیتگ، بیست ءَ گیش سرمچاریں سنگتانی نمیرانی ءَ گوں بوتگ ءُ اشی ءَ ھوار بازیں کچے ءَ لشکرکشیاں تچکی ءَ دُژمنیں پوج ءِ کمک کار بوتگ –

آئی ءِ رِد ءَ پہ چیزے زر ءَ اے چاریگ چنچو مردمانی زورانسری آوار جنگ ءَ ھوار بوتگ ءُ پد ءَ دزگیری ءَ آئی وتی درسیں میارباری منّ اِتگ اَنت – آئی ءِ ٹولی ءِ تیوگیں سرپدی گل ءِ کِر ءَ ھست اَنت۔ اے چاریگ ءِ تامربند زوت شنگ کنگ بیت –

بی ایل ایپ ءِ جارکش میجر گھرام ءِ رِد ءَ گل گوں بلوچ راج ءَ لوٹ کنت کہ آ پاکستانی پوج ءُ آئی کمکارانی ھمراھداری ءَ مہ کن اَنت ءُ چہ اے وڑیں مردماں وت ءَ دور بہ دار اَنت- کجام مردم دُژمن ءَ کمک کنت آ پھِل کنگ نہ بیت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل “ھکل” ءَ شنگ کرتگیں درشان ءِ تہءَ گوشتگ کہ سرمچاراں مرچی شال ءَ اسپینی دگّ ءَ کبزہ گیریں پاکستان ءِ پولیس کارمندانی یک کاروانے گوں چیر کُرتگیں تراکناکیں شورھاں نشانگ کرتگ –

جارکش ءَ گوشتگ کہ اے اُرش ءَ یک کارمندے مُرتگ ءُ چار زدگ بوتگ انت وھدیکہ یک پرپٹے ءَ سک باز تاوان رَستگ –

جیئند بلوچ ءَ گوشتگ کہ اُرش ءَ پد کبزہ گیریں پوج ءَ ھمے دمگے چپ ءُ چاگرد وتی انگر ءَ کتگ انت ءُ رسانکدراں وتی تاوانانی چیر دیگ ءِ جُھد کتگ –

جارکش ءَ گوشتگ کہ بلوچ لبریشن آرمی اے اُرش ءِ زمّہ واری ءَ منّیت ءُ کبزہ گیریں پوج ءُ آئی ءِ ھمراہ ءُ ھمکارانی سرا اُرش گوں مُھکمی ءَ برجاہ بنت –

کے انت نی من ءَ کل بہ کنت؟

نبشتہ کار : بِنتُل بلوچ

دی بلوچستان پوسٹ

منی ساہ ءَ چار روچ بیت کہ منی بالاد ءَ چہ سستگ، جتا بوتگ، چار روچ اِنت من یک جنگلے ءِ تہ ءَ دور دیگ بوتگ اَنت، منی جون نوں سڈگ ءَ اِنت، منی جون ءَ ھدائی لیلوک، جانور ورگ ءَ اَنت، منی جون ء چہ بوہ ھم پیداک اِنت، ھئو من کُشگ بوتگ آں۔

لالا تئی روگ ءَ پد من وت ءَ دور ندات من چارت اگاں من وت ءَ تھت ءُ نیپادانی باھوٹ بکناں گعا منی دویں گھارُک ءُ آجزیں مات ءَ کہ سمبالیت،؟ لالا تئی گستائی ءَ تئی جتائی ءِ گم ءَ من دل ءِ سیر ءَ وتی نگاھاں چہ دو ترمپ ارس ھمے ھاترا ریتک نہ کت کہ مات ءُ گھار گیشتر دلوارگ بنت-

من چہ کسانی ءَ ھاموشیں چُکے بوتگ آں اگاں من گپے جتگ گڑا منی توار انچو جھل بوتگ کہ دیم ءِ مردم ءَ اِش نہ کُتگ بلئے لالا تئی بیگوائی ءَ پد منی توار انچو بُرز بوت کہ تیوگیں دنیا ءَ اُش کُت -لالا تو سرپدئے کہ بے تو ما چِنچو بزگ بوتگ اِنت، زندگی ءِ ھر ھمک واھگ ءُ تماھاں تئی بیگواھی ءَ پد مارا انگرانی سر ءَ کتگ، درد،رنج بے وسی ءِ دم نہ توسیں زوراکی ءَ منی ابرم ءِ دراھیں مارشت پہ وڑے برتگ انت، ھردیں کہ بلوچستان ءِ کُنڈے ءَ لاشے ءِ دست کپگ ءِ ھال کہ اش کتگ گڑا زندمانی نہ بوتگیں، جیڑگ، ھیال، مارشت درست پہ ترا بوتگ انت اے دمان ءِ دردانی وھد ءَ درشان کت نہ کن اَنت بلئے ھمنچو گشاں ناں مارا آزمان ءَ زرتگ ناکہ زمین ءَ –

لالا تو گپے زان ئے باریں چنچو وھد اِنت من مات ءَ را اے ھال ھم نداتگ ات کہ ورنایے ئِے لاش ماں سیول اسپتال ءَ پہ پجار ءِ ھاترا ایر اِنت اُفففف بلئے من سرپد ات اَنت لالا بنی آدم چِنچو وت پرست انت گندئے ناں؟-

بلئے ھردیں کہ دست ھدا ءِ درا ٹال کت انت تاں گشت اے لاش تئی مبات، تاں ناگت ءَ ھیال اتک ءُ جیڑ ات اے لاش ھم بلوچ ئیگ بیت اِنت، براتے، زھگے، پتے انچو کہ مرچی من پہ ترا جیڑگ ءَ آں باریں دگہ چنت گھار، مات ، چو منی وڑا وتی برات، پت ءُ زھگاں نالگ ءَ انت، ھمئے جیڑگانی تہ ءَ نگاھاں چہ ارس شپگران بوت اَنت، تاں ھمے دردانی کارستاں تاں من ءَ وھد ءَ باز بے واب کتگ ات، لالا تئی گار ءُ بیگواھی ءِ گم ءَ مات ءَ چہ کوڑھیں دنیا یلہ دات ءُ وتی ابدی جاہ ءَ شت، داں گڈی وھد ءَ ہھم آئی ءِ زبان ءُ لنٹاں بس تئی نام ات کہ منی زھگ ءَ بیار ات، منی چک بے میار انت ، منی ورناہ بے گناھے، بلئے بژن لالا مات ءَ وتی مرگ ءِ وھد ءَ ہم ترا نہ دیست، لالا جان مات ءِ روھگ ءَ پد پمن لوگ، ایمنی ءُ کرا ھمے دگ ءَ چار راہ بوتگ اَنت کہ روچ ءُ شپ پوسٹرانی دست ءَ کنئگ ءُ اوگام جنگ ءَ گوازینت ،منی اوگامانی توار باز ءَ اوپار کُت نہ کُت ءُ من ءَ ھم بیگواہ کُت اِش بیگوائی ءِ سیئمی روچ ءَ من جنگلے ءَ دور دیگ بوت آں کہ انگت منی جون کپتگ، لالا !کسے ھست کہ تئی شارُل ءَ ھاک ءِ میار بکنت؟-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کلات ءَ سلاہ بندیں پرپٹ سواراں تیرگواری کتگ ءُ پت ءُ زھگ کشتگ اَنت-

گیشیں اھوالانی رد ءَ کلات ءِ کوچگی ھند بشمی ءِ ھند ءَ ناشناسیں پرپٹ سواریں مردماں تیرگواری کتگ ءُ دو مردم زدگ کتگ انت کہ اود ءَ زدگ بیتگیں مردم ڈی ایچ کیو ھسپتال ءَ برگ بیتگ اَنت ھردوکاں ٹپ نہ سگ اتگ ءُ بیران بیتگ اَنت-

بیران بیتگیں مردمانی پجار میر جان ء پیر جان ءُ آئی ءِ زھگ علی اکبر جھمنند شیشہ ڈگار ءِ ناماں زانگ بیتگ اَنت-

پولیس ءِ بازیں کارندہ وئیل جاہ ءَ سر بیتگ اَنت ءُ روگ ءُ آیگی راہ اش بستگ اَنت اُرشکارانی پٹ ءُ پول اش بندات کتگ –