TBP Balochi

کیچ ءِ دمگ ڈی بلوچ ءِ ھند ءَ پوج ءَ پانگس ءِ نزیک ءَ دستی بمب ءِ شوھاز کتگ ءُ بے پکار کُتگ –

گیشیں ھالانی رِد ءَ ڈی بلوچ ءَ ایف سی ءِ 106 ونگ ءِ پانگسے نزیک ءَ یک بمبے دست کپتگ کہ پولیس ءِ اسپیشل برانچ ءُ بمب ڈسپوزل سکواڈ ءِ ٹولی بے پکار کتگ –

پولیس ءِ رِد ءَ اے وھد ءَ پولیس ءَ ابید ایف سی ءُ دگہ کانودی ادارھانی کارمند ھم ساڑی بوتگ انت –

سربوتگیں ھالانی رِد ءَ بلوچستان ءِ دمگ بولان ءَ پاکستانی پوج ءِ یک کارمندے ءَ وت ءَ وت تیر ءِ جتگ ءُ وتکشی کُتگ –

اے وتکشی ءِ وئیل بولان ءِ دمگ مچ ءَ بوتگ وھدیکہ وتکشی کنوکیں کارمندے پجار ندیم بگٹی ءِ نام ءَ بوتگ –

تنی وھدی وتکشی کنگے سوب زانگ نہ بوتگ کہ کجام سوب ءَ وتکشی کتگے ءُ ناکہ واکدارانی نیمگ ءَ اے درگت ءَ چیزے گوشگ بوتگ –

زانگ بہ بیت اے دمگ بلوچستان ءِ ھما دمگانی تہ ءَ ھوار انت کہ ادا بلوچ آجوئی لوٹوکیں سلاہ بندیں گل مدامی پوج ءِ سر ءَ اُرش کن انت –

بلوچستان ءَ وھد وھدے سر ءَ پوجی کارمندانی وت کُشی ءُ تچگ ءُ رؤگے ھال کائنت –

گوستگیں ماھ ءَ چہ آواران ءَ ھم پوجی کارمندے ءِ وتکشی ءِ ھال اتکگ ات اشی ءَ ابید کیچ ءُ دگہ ھند ءُ دمگاں ھم اے وڈیں ھال اتکگ انت –

گوستگیں سال ءَ کیچ ءِ دمگ دشت ءَ یک کارمندے ءَ وتی ایندگہ پوجی کارمندانی سر ءَ تیرگواری کتگ ات ءُ کُشتگ اِت انت –

بلوچستان ءِ تیابدپی شھر گوادر ءَ چار مردم آوار جنگ ءَ پد بیگواہ کنگ بیتگ اَنت-

بیگواہ بیتگیں مردمانی پجار جبار ء اسلم ، فاروق، الطاف ءُ کمبر ءِ ناماں زانگ بیتگ اَنت-

اھوالانی رد ءَ پوج ءَ جبار ءَ ھوار شش مردم دزگیر کنگ ءَ پد دو یل داتگ اَنت ءُ چار کس داں انگت ءَ گار ءُ بیگواہ اَنت-

زانگ بہ بیت گوستگیں روچ ءَ سروزیر پاکستان شھباز شریف ھم گوادر ءِ تر ءُ تاب ءَ بیتگ –

بلوچستان ءَ ھوار پاکستان ءِ دگہ جاھاں بلوچ ورنایانی آوار جنگ ءُ بیگواہ کنگ ءِ درچانی توک ءَ گیشی گندگ ءَ اتکگ اَنت ءُ گوستگیں روچاں اسلام آباد ءَ دو نودربر آوار جنگ ءَ پد بیگواھی ءُ پد ءَ یل کنگ ءُ پد ءَ ھمے ڈول ءَ گوستگیں روچ ءَ سندھ ءِ بنجاھی شھر کراچی ءَ دو مردمانی آوار جنگ ءِ ٹاہ سی ٹی ڈی ءَ داتگ ات-

سی ٹی ڈی ءِ رد ءَ ھردوکیں مردمانی سیادی بلوچستان ءَ پرکاریں سلاہ بندیں گل بلوچ لبریشن آرمی ءَ اِنت –

بلوچ اسٹوڈنٹس ایکشن کمیٹی نال ھنکین ءِ نیمگ ءَ “بلوچستان کتاب کاروان ” ءِ نام دو روچی کتابی مراگھے برجم دارگ بوتگ کہ مروچی سوبمندی ءَ گوں آسر بوتگ –

اے کتابی مراگہ ءَ نودربر ءُ ماسٹراں ھوار ھر تک ءُ پھناتاں سیادی داروکیں مردماں بھر زرتگ ءُ وتی دلدوستیں کتاب زرتگ انت –

اے کتابی مراگہ نال ءِ دو جتاجتائیں جاھاں برجم دارگ بوتگ انت ءُ اے کتاب مراگہ ءِ بندات بیست ءُ شش جولائی ءَ بوتگ ءُ اولی روچ ءَ بزاں بیست ءُ شش جولائی بوائز ھائی اسکول نال ءِ دیم ءَ برجم دارگ بوتگ ءُ دومی روچ بیست ءُ ھپت جولائی ءَ ماں گریشہ سکینڈری اینڈ ھائی اسکول سریج ءَ برجم دارگ بوتگ –

زانگ بہ بیت بلوچستان کتاب کاروان بلوچ نودربر گل ”بلوچ اسٹوڈنس ایکشن کمیٹی” ءِ کتابی مراگہ کمپئین یے کہ وھد وھد ءِ سر ءَ زانشجاہ ءُ دگہ جاھاں برجم دارگ بوگ ءَ انت – بلوچستان کتاب کاروان ءِ مول بلوچستان ءِ تہ ءَ کتاب وانی ءَ دیمروئی دیگ تانکہ کتاب وانگ ءِ یک دودے ودی بہ بیت اِنت –

مراگہ ءِ اکس

روکپتی بلوچستان ءَ سَے گونڈو آپ ءَ کپتگ ءُ بیران بیتگ اَنت، تیرگواری ءَ یک ورنایے بیران بیتگ، ایرانی لشکر ءَ تیرگواری کتگ ءُ یک مردمے کُشتگ ءُ ایشی ءَ ھوار زاھدان ءِ جھمنند ماں نرماشیر ءَ تیل کشی ءِ کار ءَ وئیل ءِ آماچ بیتگ ءُ بیران بیتگ-

سر بیتگیں ھالانی رد ءَ روکپتی بلوچستان ءِ تیابدپی شھر بندر عباس ءَ سَے جنک آپ ءَ کپتگ ءُ بیران بیتگ اَنت –

بیران بیتگینانی پجار دوزادہ سالی ئیں نادیا یوسفزئی ، چاردہ سالی ئیں نائلہ یوسفزئی ھردوک گوھار اَنت اھمد ءِ چُک اَنت ءُ طبسین نھبندان بندر عباس ءِ جھمنند اَنت ءُ شانزدہ سالی ئیں نائلہ قلندرانی ء ابراھیم جھمنند سیب سوران ءِ نام ءَ زانگ بیتگ –

ھرسئیں آپ ءَ بڈ اتگ ءُ بیران بیتگ اَنت ءُ ھرسئینانی لاش کشگ بیتگ ءُ کھولانی گور ءَ رسینگ بیتگ اَنت-

ھمے وڑ ءَ گوستگیں روچ ءَ ایرانشھر ءَ سیکورٹی پورس ءَ یک گاڑی یے داشتگ ءُ لطیف عبدالزئی ء ابراھیم نامیں مردمے ءِ پیشانیگ ءَ تیر جتگ ءُ کشتگ –

اھولانی رد ءَ سَے گاڑیانی سر ءَ ایرانشھر ءِ ھند آزم آباد ءَ تیرگواری کتگ ءُ دو گاڑی والا بچ اتگ ءُ سیمی گاڑی کہ لطیف ءِ سر ءَ تیرگواری کتگ ءُ کشتگ –

ھمے وڑ ءَ روکپتی بلوچستان ءِ دمگ دشتیاری ءَ ناشناسیں مردماں تیرگواری کتگ ءُ یک ورنایے کشتگ-

کشگ بیتگیں ورنا ءِ پجار بھزاد گلامی ءِ نام ءَ زانگ بیتگ کہ آ ناشناسیں پرپٹ سواریں مردماں تیر جتگ ءُ کشتگ –

ھمے وڑ ءَ ما کرمان ءِ ھند نرماشیر ءَ زاھدان ءِ جھمنندیں تیل کشے وئیل ءِ آماچ یتگ ءُ بیران بیتگ-

تیل کش ءِ پجار اھمد ناروی ءِ نام ءَ زانگ بیتگ کہ آئی ءِ گاڑی وئیل ءِ آماچ بیتگ ءُ بیران بیتگ-

روکپتی بلوچستان ءَ ھمک روچ اے دابیں وئیل روچ پہ روچ گندگ ءَ آیگ ءَ اَنت کہ اود ءَ مردم تیرانی آماچ یا دگ ءِ وئیل ءِ آماچ بنت ءُ وتی زند ءَ چہ زبھر بنت –

سربوتگیں ھالانی رِد ءَ گوستگیں روچ ءَ بلوچستان ءِ جتا جتائیں ھند ءُ دمگاں تیرگواری ءُ دگہ وئیلاں سرجمی ءَ شش مردم بیران ءُ چار زدگ بوتگ انت وھدیکہ چار جون دست کپتگ انت –

گیشیں ھالانی رِد ءَ بلوچستان ءِ دمگ پشین ءَ دو ٹولیانی میان ءَ تیرگواری ءِ وئیل ءَ سَے مردم بیران بوتگ انت وھدیکہ تیرگواری ءِ وئیل ءَ پد دمگ ءِ جاور نگیگ انت –

تیرگواری ءِ وئیل کلی کربلا بائی پاس ءَ بوتگ – وئیل گوستگیں ایم پی اے سید لیاقت آغا ءُ سید ابدالرب آغا ءِ زھگانی میان ءَ وت ماں وتی جیڑوے سوب ءَ بوتگ –

دومی نیمگ ءَ ڈیرہ مراد جمالی ءَ منگولی تھانہ ءِ نزیک ءَ گوٹھ میراں بخش جنجی ءَ زمینی جیڑوے ءِ سر ءَ چنجنی ٹک ءِ وت ماں وتی جنگ ءُ چوپ ءُ تیرگواری ءَ محمد بلال چنچنی بیران بوتگ ءُ آئی ءِ برات غلام حیدر چنجنی سک باز زدگ بوتگ –

وئیلے ھال ءِ سر بوگ ءَ منگولی پولیس ءَ شُتگ ءُ تیرگواری ءَ ھواریں کتکار دزگیر کتگ انت ءُ بیران ءُ زدگ بوتگیں مردم ڈیرہ مراد جمالی سیول نادراھجاہ ءَ سرکتگ انت کہ اودا اژدری چار ءُ ٹپاس ءَ.پد جون کھول ءِ دست ءَ داتگ انت –

دگہ تیرگواری ءِ وئیلے کیچ ءِ بنجاھی شھر تربت ءَ گمشاد ھوٹل ءِ دیم ءَ بوتگ کہ ناشناسیں سلاہ بندیں مردماں پنجاپ ءِ جھمندے ءِ سر ءَ تیرگواری کُتگ –

تیرگواری ءَ پنجاپ ءِ جھمنند غلام یاسین ءَ ماں گردن ءَ تیر وارتگ ءُ سک باز زدگ بوتگ کہ ھما دمان ءَ نادراھجاہ ءَ برگ بوتگ – وئیل ءِ درگت ءَ گیشیں سرپدی نہ رستگ کہ کجاب سوب ءَ جنگ بوتگ –

بلوچستان ءِ دمگ کلات ءَ کراچی تاں شال ءَ رؤکیں شھدگ ءِ سر ءَ ٹریکٹرے ءَ گوں گاڑی ءَ ڈیک وارتگ چریشی ءَ گاڑی ءَ سواریں دو مردم زدگ بوتگ انت، وئیل ءَ پد ٹریکٹر ڈرائیور تتکگ ءُ زدگ بوتگیں مردم نادراھجاہ ءَ سر کنگ بوتگ انت -.

بلوچستان ءِ دمگ پشین ءَ ھمے ھال آیگ ءَ انت کہ لیویز ءِ واکداراں چہ بوستان ءَ کسانیں زھگے ءِ ژانگولیں جونے دست کپتگ کہ آئی ءِ پجار حافظ محمد عباس ء صلاح الدین انت کہ بوستان ریگئی ءَ دینی وانگ جاھے نودربر یے –

پولیس ءَ جون دست گپتگ ءُ نادراھجاہ ءَ سرکتگ اے درگت ءَ گیشیں پٹ ءُ.پول برجاہ انت –

ھمے وڈ کیچ ءِ بنجاھی شھر تربت ءَ شاہ زئی ھوٹل ڈنک ءِ نزیک ءَ لٹ کُٹ کتگیں جونے دست کپتگ کہ آئی ءِ پجار جمال ء جھانگیر جھمنند ژوب ءِ نامءَ چہ بوتگ –

اھوالکارانی رِد ءَ اے مرد چار شمبے ءِبیگاہءَ چہ ماشاء اللہ ھوٹل ءِ نزیک ءَ سلاہ بندیں مردماں آوار جتگ ءُ گوں وت برتگ ءُ پدا پنچ شمبے ءِ شپ ءَ عشاء نماز ءِ وھد ءَ آئی ءِ جون شاہ زئی ھوٹل ءِ نزیک ءَ سوراب کئور ءَ دور داتگ – آئی ءِ جون ءَ لٹ کٹ ءِ نشان پر انت – پہ گیشیں پٹ پول ءِ ھاتر ءَ نادراھجاہ ءَ برگ بوتگ –

دومی نیمگ ءَ بلوچستان ءَ برجاھیں بشی ھئور ءُ ھاراں مالی تاوان ءَ ھوار ھوار مردماں جانی تاوانانی دیمپانی ھم کنگ کپگ ءَ انت – چہ پنجگور ءَ بازیں ھئورانی سوب ءَ یک مردمے ھار ءَ برتگ ءُ بیران بوتگ وھدیکہ گرندے ءِ کپگ ءَ یک دگہ مردمے ءِ بیرانی ءِ ھال انت –

ھمے وڈ کیچ ءِ دمگ تمپ ءَ ھم ھار ءَ برتگیں یک مردمے ءِ جون دست کپتگ ءُ پہ پجار ءِ ھاتر ءَ تربت نادراھجاہ ءَ سرکنگ بوتگ –

دومی نیمگ ءَ زامران ءِ کوھی دمگاں ھار ءَ برتگیں گاڑی ڈرائیور ءِ جون دست کپتگ کہ آئی ءِ پجار شمبے ءِ نام ءَ بوتگ ءُکلگ ءِ جھمنند انت –

بلوچستان ءِ بازیں ھند ءُ دمگاں شیواری جار جنگ بوتگ کہ بیست ءُ چار ءُ ھپتاد دو کلاکانی میان ءَ چدوگیشتر ھئور ھار بوت کنت کہ اودا پیش ءَ ھم چہ ھئوراں تاوان بوتگ –

این ڈیم ایم اے ءِ رِد ءَ کیچ، ھزدار ءُ جھل مگسی ءَ گوستگیں بیست ءُ چار ادارانی میان ءَ ھئور ءِ سوب ءَ بازیں وئیلاں سَے مردم بیران بوتگ انت –

این ڈی ایم اے ءِ نیمگ ءَ شنگ کنگ بوتگیں ایڈوائزری ءِ رِد ءَ بلوچستان ءِ دمگ لورلائی، کلات، سبی، مکران ءُ نصیر آباد ءَ بشی ھئورانی سوب ءَ بیست ءُ چار ادارانی میان ءَ توپانی جارو بنت ءُ ڈیرہ غازی خان ءَ ھم توپان آیگ ءِ ھترہ است انت اے ھم گوشگ بوتگ کہ چہ کابل کئور ءَ ھم توپان اتک کنت –

این ڈی ایم اے گوشگ انت کہ کلات، ھزدار، لسبیلہ، آواران، کیچ، گوادر، پنجگور، ھاران، نوشکی، واشوک، مستونگ، سبی، نصیرآباد، ژوب، شیرانی، بارکھان، موسیٰ خیل، کوھلو، جھل مگسی، لورالائی، زیارت، کوئٹہ، چمن، پشین، قلعہ عبداللہ ءُ قلعہ سیف اللہ ءَ دیمتر ءَ بزاں بیست ءُ چار ءَ چی ھپتاد ءُ دو ادارانی میان ءَ ھئور ءُ ھار بازیں جاھاں توپان ءِ گمان انت –

این ڈی ایم اے بلوچستان ءِ گوشگ انت کہ گوستگیں بیست ءُ چار ادارانی میان ءَ گس ءُ گروک ءِ کپگ ءَ یک زھگے ءَ ھوار سَے مردم بیران بوتگ انت ءُ دوسد گساں تاوان رستگ –

دیمتر ءَ گوشگ بوتگ کہ بلوچستان ءَ نوزدہ جون ءَ بگر تاں ھنوں ھئورانی سوب ءَ دھ مردم بیران بوتگ انت –

پی ڈی ایم اے ءِ رِد ءَ بلوچستان ءِ دگہ ڈیھاں گوں رؤگ آیگ ءِ راہ پچ کنگ بوتگ انت –

دمگی واکدارانی رِد ءَ پنجگور ءَ نیوان پسکول ءُ پاردان ڈیمانی آپ گوستگیں سَے روچاں بوتگیں ھئورانی سوب ءَ برز ءَ اتکگ چریشی ءَ میتگاں آپ آیگ ءَ انت –

دومی نیمگ ءَ دی بلوچستان پوسٹ ءِ اھوالکار ءِ گوشگ انت کہ گوستگیں روچ ءَ پنجگور ءَ کئور ءِ آپ برگ ءَ مردم بیران بوتگ انت ءُ پنجگور ءِ دومی دمگاں رؤگ آیگ ءِ سرجمیں راہ ءُ در بند انت –

چہ آوران ءِ دمگ مشکے نوکجو شادینزئی ءَ ھال آیگ انت کہ کئور ءَ توپانی آپ ءِ آیگ ءِ سوب ءَ یکیں کھول ءِ بیست ءُ پنچ مردم گار انت –

دمگی مردمانی گوشگ انت کہ گوستگیں روچ ءِ ادار سَے ءَ کئور ءِ ھار ءَ پد اے مردم گار انت کہ آیانی تہ ءَ زھگ ءُ زالبول ھم ھوار انت –

زانگ بہ بیت کہ اے کئور دیم ءَ روت مشکے کئور ءَ ھور بیت –

پاکستان ءِ پرکنگ سندھ ءِ بنجاھی شھر کراچی ءَ کاؤنٹر ٹررازم ڈیپارٹمنٹ (سی ٹی ڈی) ءَ بلوچ لبریشن آرمی ءِ دو باسکانی دزگیری ءِ ٹاہ داتگ –

سی ٹی ڈی ءِ جارکش ءِ رِد ءَ دزگیر کنگ بوتگیں مردمانی گور ءَ دُزاتگیں پرپٹ دستیگ کتگ انت ءُ آھانی سیادی چہ بی ایل اے ءَ انت –

جارکش ءِ رِد ءَ شھر ءِ بازیں شک ایں دمگاں وھد وھد ءِ سر ءَ آپریشن کتگ اے پٹ پولی آپریشن تھانہ موچکو ءُ سعید آباد ءِ نزیک گوریں دمگ بس ٹرمینل، نیول کالونی ءُ رئیس گوٹھ ءَ کنگ بوتگ انت –

آپریشن ءِ میان ءَ شست ءُ چار شکی ایں مردم تلاش ایپ ءِ کمک ءَ پٹ پول کنگ بوتگ انت، پٹ پولی آپریشن ءِ میان ءَ سی ٹی ڈی ٹولی ءَ دو کتکار چہ رئیس گوٹھ ءَ دزگیر کتگ انت کہ آھانی گور ءَ دو دُزاِتگیں پرپٹ در اتکگ کہ تھانہ گزری ءُ تھانہ ٹیپو سلطان ءَ دُزی کنگ بوتگ انت – کتکار پہ گیشیں پٹ پول ءَ سینٹر ءَ دیم دیگ بوتگ انت –

بلے تنی وھدی سی ٹی ڈی ءَ دزگیر کتگیں ھردو مردمانی پجار زاھر نہ کتگ ءُ ناکہ بی ایل اے ءَ اے درگت ءَ درشان ءِ داتگ –

زانگ بہ بیت چیزے روچ انت کہ کراچی ءِ بازیں ھند ءُ دمگاں بلوچ ورنایانی زورانسری آوار جنی ءِ ھال اتکگ انت –

پاکستان ءِ بنجاھی شھر اسلام آباد ءَ زورانسری آوار جنگ بیتگیں دو بلوچ ورنا یل بیتگ اَنت-

اسلام آباد ءَ بیست ءُ پنچ جولائی ءَ یک ھاسٹلے ءَ پاکستانی لشکر ءِ دست ءَ آوار جنگ بیتگیں دو نودربر جواد ء اقبال جھمنند سنگانی سر تربت ءُ زید ء عبدالرسول جھمنند پسنی گوادر یل بیتگ اَنت-

آیانی نزیکیں مردماں ھال راست کتگ ءُ گوشتگ کہ دویں نودربت گوستگیں شپ ءَ آسلام آباد ءَ یل کنگ بیتگ اَنت بلے دگہ اھوال دیم ءَ نیتکگ اَنت-

زانگ بہ بیت بلوچ نودربرانی زورانسری آواریانی اھوال سرجمیں پاکستان ءَ بوگ ءَ اَنت – ایشی ءَ پیش اسلام آباد ءُ دگہ شھراں پاکستانی پوج ءَ بازیں بلوچ نودربر دزگیر کنگ ءَ پد بیگواہ کتگ اَنت-

بلوچستان ءَ گوستگیں لھتے روچانی توک ءَ بیگواھیانی توک ءَ گیشی گندگ ءَ اتکگ-

زورانسری آوار جنی ءِ گیشی ءُ بیگواھیانی ھلاپ ءَ گوستگیں روچاں شال ءَ وائس فار بلوچ مسنگ پرسنز ءِ چیردستی ءَ یک روانکے کشگ بیتگ ءُ زھرشانی کنگ بیتگ-