TBP Balochi

بلوچستان ءَ دو روچانی میان ءَ دو جون دست کپتگ انت کہ پجار کنگ بوگ ءَ انت –

گیشیں ھالانی رِد ءَ بلوچستان ءِ دمگ پنجگور وشبود ءَ پولیس تانہ ءِ نزیک ءِ کئور ءَ دمگی مردماں یک مردمے ءِ جون ءِ دست کپتگ کہ آئی ءِ جان ءَ تیرانی ٹپ پر انت –

پولیس ءَ جون دست گپتگ ءُ نادراھجاہ ءَ سر کتگ ءُ گیشیں پٹ ءُ پول برجاہ انت –

ھمے وڈ گوستگیں روچ ءَ بلوچستان ءِ دمگ مستونگ ءَ ھم یک جون ءِ دست کپتگ کہ پدا رند ءَ پولیس ءَ گوشتگ ات کہ اے نشھی ءِ بوتگ وھدیکہ واکدارانی نیمگ ءَ آیانی پجار تنی وھدی زاھر کنگ نہ بوتگ انت –

بلوچستان ءَ ھمے ماہ ءِ چاردہ روچانی میان ءَ جتا جتائیں ھند ءُ دمگاں پنچ مردمانی جون دست کپتگ انت کہ پہ پجار ءِ ھاتر ءَ نادراھجاہ ءَ برگ بوتگ انت بلے پدا ھم تنی وھدی آیانی پجار کنگ نہ بوتگ انت –

ھمے ماہ ءَ دست کپتگیں جونانی تہ ءَ شش جنوری تربت پھٹانی کور ءِ یک باگے ءَ جون ءِ دست کپتگ آئی ءَ یک روچے ساری پنجگور ءُ ھاران ءِ جتا جتائیں ھنداں دو جون دست کپتگ انت کہ واکداراں دست گپتگ ءُ پجار ءِ ھاتر ءَ سینٹر ءَ برتگ انت –

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں کیچ ءِ میتگ دازن تمپ ءَ گومازی ءِ دوراھی ءَ برجاھیں پاکستانی پوج ءِ پانگس ءِ سر ءَ اُرش کُرتگ۔

جارکش ءَ گْوشتگ کہ شمبے ءِ شپ ءِ ھشت ءُ نیم ءَ دُژمنیں پوج چہ نزیک ءَ گوں نوکین ءُ ٹوھیں سلاھاں نشانگ کُرتگ، چہ ایشی ءَ دژمن ءِ یک کارمندے مُرتگ ءُ یکے ٹپی بیتگ۔

جارکش ءَ گْوشتگ بلوچستان لبریشن پرنٹ اے اُرش ءِ زمہ واری ءَ منّ ایت ءُ کول کنت کہ پاکستان ءِ زورگری ءِ بگیری ءَ سرمچارانی تُرندین ءُ سَسّائی اُرش داں سرڈگار ءِ آجوئی ءَ برجاہ بنت۔

بلوچستان ءِ دمگ آواران ءِ ھند جھاؤ ءَ ناشناسیں سلاہ بندیں مردماں پاکستانی پوج ءِ کاروان سر ءَ اُرش کتگ-

گیشیں ھالانی رِد ءَ جھاؤ ءِ دمگ سیڑ ءَ مروچیگیں سھب ءَ ناشناسیں سلاہ بندیں مردماں پاکستانی پوج ءِ کاروان سر ءَ اُرش کتگ-

اِھوالکارانی رِد ءَ اُرش ءَ پوج ءَ جانی تاوان چست کنگ کپتگ وھدے کہ اُرش ءَ پد وئیلجاہ ءَ بالگرد سر بیتگ اَنت-

واکدار نیمگ ءَ انگت درشان دیم ءَ نیتکگ ءُ نانکہ اُرش زمہ واری دگہ گلے ءَ منّ اِتگ-

زانگ بہ بیت گوستگیں روچ ءَ کیچ ءِ دمگ بلیدہ ءَ پاکستانی پوج سر ءَ یک اُرشے ءَ پنچ کارندہ مرتگ کہ آئی ءِ زمہ واری بلوچستان لبریشن فرنٹ ءَ زرتگ اَت-

یات بہ بہ اِت کہ پاکستان پوج ءِ ھمگرنچیں ادارہ آئی ایس پی آر ءَ بلیدہ ءِ اُرش ءُ بیرانیانی پدری رسانکدر ءَ شنگ کتگ-

بلوچستان ءِ دمگ کیچ ءَ پاکستانی پوج ءَ یک ورنایے زورانسری آوار جتگ ءُ بیگواہ کتگ اَنت-

بیگوہ کنگ بیتگیں ورنا ءِ پجّار اسماعیل ء جمعدار محمد بخش نام ءَ چہ بیتگ-

اِھوالکارانی گْوشگ اِنت کہ ورنا تمپ ءِ دمگ کوھاڈ ءِ جھمنندیں کہ گوستگیں روچاں شپ ءِ وھد ءَ پوج ءَ بیڑبرتگ ءُ آوار جتگ چریشی ءَ پد اا بیگواہ اِنت-

زانگ بہ بیت بلوچستان ءَ زورانسری آوار جنی ءُ چُکچینی ءِ بگیری ءَ بلوچ یکجھتی کمیٹی گوستگیں دو ماھاں چہ نندانک جتگ ھمود ءَ بلوچستان ءَ زورانسری آوار جنی ءِ دْرچ یکشلہ برجاہ ءَ اَنت-

ریاستی ادارھانی ڈالچاری

ٹی بی پی شونگال

بلوچ جنگ ءِ دارگ ءِ ھاتر ءَ جوڑ کنگ بیتگیں شوربندی ءُ ڈیھی زوراکیاں چہ سانمند بیتگیں بازیں کھولانی نندانک اسلام آباد پریس کلب ءِ دیم ءَ برجاہ اِنت، بلے ریاستی ادارگ زورانسری بیگواھیں مردمانی یل کنگ ءَ ابید ڈالچاری ءِ درشان کنگ ءَ اَنت ءُ ھما مردم کہ بلوچستان ءَ راجکاریں جھدکارانی زورانسری بیگواھی ءُ کوشکاری ءَ ھوار اَنت، آ بلوچ لانگ مارچ ءِ بگیری ءَ کارمرز کنگ بئیگ ءَ اَنت۔

بلوچستان ءِ نام کپتگیں ڈیتھ اسکواڈ کہ بلوچ راجکاریں باسکانی زورانسری بیگواھی ءُ کوش، دزی ءُ ڈنگی ءُ پہ لب بیگواہ کنگ ءَ ھوار اَنت کہ ایشانی بگیری ءَ بلوچستان ءِ مھلوک مدام زھرشانی کنگ ءَ اَنت، آیانی ھلاس کنگ ءَ ابید بلوچ راج ءِ راستیں توارانی نِزور ءُ ھلاس کنگ ءُ آیانی دیم ءَ سنگر جوڑ کنگ ءِ ھاتر ءَ ھمے کارست دیم ءَ آرگ ءُ سرجمی ءَ کمک ءُ پلامرزی دیگ بیگ ءَ اَنت۔

بلوچ لانگ مارچ ءِ بندات ءَ چہ پرایمنیں زرمبشت ءِ دارگ ءِ ھاتر ءَ جتائیں پندل سازگ بئیگ ءَ اَنت۔ جیڑھانی گیوار کنگ ءِ نیمگ ءَ پیش گامی نہ کنگ ءُ ترانکاریانی کارجاور ءِ برجاہ نہ دارگ ءَ جنجالانی تہ ءَ گیشی کئیت۔ زورانسری بیگواھیں مردمانی کھولانی لوٹ پاکستان ءِ وتی جِند ءِ رھبند ءِ رد ءَ اَنت ءُ آیانی لوٹانی سرجم کنگ ءَ پہ گامگیج زیرگ ءَ گوں جیڑہ گیوار کنگ بیت کنت۔

بلوچ لانگ مارچ تھنا داں اسلام آباد ءَ بندوک نہ اِنت بلکیں بلوچستان ءِ جتاجتائیں شھراں چہ زرمبشت ءِ پلامرزی ءَ ھزارانی کچ ءَ مھلوک دراتکگ ءُ گوں آیاں یکجائی ءِ درشان کنگ ءَ اَنت ءُ میان استمانی جھان ءَ ھم بلوچستان ءَ بیوکیں زوراکیانی آسری ءِ ھاتر ءَ توار چِست بئیگ ءَ اَنت۔

وتگڑیں پندل سازیاں گوں بن گپتگیں جیڑہ ءُ زوراکی ءُ ایردستیانی بگیری ءَ چست بیوکیں توارانی دارگ باوری نہ اِنت۔ پاکستان ءِ سرپانکیں سرکار ءِ وزیرانی وتساچیں درشاناں ابید لانگ مارچ ءِ واکداراں گوں ترانکاری کنگ ءَ گوں جنجال گیواری ءِ نیمگ ءَ جُنز ات کن اَنت، بلے بنکی گپ ایش انت کہ پاکستانی ادارگ بیواگواھیں مردماں ءُ ڈیتھ اسکواڈز ءَ جیڑہ ءِ نہ بلکیں پالیسی ءِ سرپد بنت، ھمے مائینڈ سیٹ ءِ سوب ءَ، اے گپ باور کنگ نہ بیت کہ چون اے جیڑہ گیش ءُ گیوار کنگ بیت اِنت۔

آھنیں بانُک ( آئرن لیڈی)

نبشتہ کار: داکتر جلال بلوچ

بلوچی رجانک: هسابجار

دی بلوچستان پوسٹ

” اے منی زمین انت ءُ اشی ءِ وارس هم مناں -” اے گال هما بلوچیں زهگ ئیگ انت کہ آئی ءَ هوش ءُ ماش بیئگ ءَ پیش وتی پت ءِ ژانگلیں لاش دیستگ – داکتر مهرنگ بلوچ ، کامریڈ گپار بلوچ ءِ نہ تُرسیں جنک ، ماں دُژمن ءِ زندان ءَ آئی ءِ چماں چم ئےِ سک داتگ انت ءُ گوں مُهکمی ءَ بُرز ءِ داتگیں گپ ئےِ جتگ انت – ( چہ کتاب ” عورت اور سماج ” ءَ زُرتگ ) اے هاک انچیں کشاری ئیں هاکے کہ اشیا همک دور ءَ انچیں کارست ودی کتگ کہ آهانی کُتگیں کارانی گندگ ءَ انچو سما بیت کہ گُش ئے یک دیهہ ءُ پریانی ( اساطیری ) داسپانے وانگ ءَ آں ، آئی ءِ تہ ءَ اے کارستاناں همینچُک زور مزن کتگ ءُ پیشداشتگ کہ اے ترا ” دیوی ” ءُ ” دیوتا ” گمان بنت -جیڑگی گپے کہ بانداتیگیں وانوک کہ انیگیں اے کارستاناں چتور ماریت – اراں آ اے کارستانی بابت ءَ وانگ ءَ پد چہ وت ءَ سهت ءُ دمان اے جست ءَ نہ کنت کہ چو چتور بیت کنت کہ هما راجمان کہ اُود ءَ بلاه بلاهیں سردار ءُ زردار کہ آهاناں سرکاری هر وڑیں کُمک هم گوں ، آ یا آهانی پت ءُ پیرُک زورگیر ءِ وزیر ءُ گزیر هم بیتگ انت ( سک دیر مہ رو بلکیں انیگیں همے بند ءُ بست ” نظام ” ، پاکستان ءِ زورگیری ) چہ پُشت ءَ هپت دهکاں وتی کُرشیانی سر ءَ بہ بنت ءُ راجمانی تهت ءِ سر ءَ زورگیر ءِ داشتگیں ٹولی چہ کرناں نندوک بہ بیت – نی تو بُگش چُشیں چاگردے ءِ تہ ءَ کسے شیریں ماهکانی یے چتور تالان کُت کنت کہ چہ اے رُژن ءَ پہ کوراں راه ءِ شوهاز کنگ چتور گران نہ بیت – ءُ آ هم یک لس بلوچی لوگے ءِ یک ورنائیں جنکے کتاب ءِ همک یک گالردے ءِ وانگ ءَ پگر کنت کہ اے وڑ چوں بیتگ پرچا کہ آ ساهرے هم نہ بیتگ کہ گوں چُوپے دراهیں کارئےِ بیتگ انت تا آ چونیں زورے بیتگ کہ اے کارست ءَ وهد ءِ پرون ءُ آئی ءِ کلیں همکار ءُ همراهانی کلیں ٹگی ءُ ٹوری جهان ءِ تہ ءَ نشتگیں همک مردم ءِ دیم ءَ پدّر کتگ انت – مهرنگ ءِ اهد ءِ زوراکیانی داسپان ءَ کة وانیت الم آ پگر کنت کہ چشیں جاوراں مدام بچکندگ ءِ تہ ءَ چتور بیت کنت ، چہ کودکی ءَ چوره بیگ ءُ اشیا پد هزاراں کهولانی درد ماں دل ءَ ، ناں راه بچار نا موسم بس یکوئی دیم پہ منزل ءَ جُنزاں کن – راستے بلے باور کنگ — الم باور کنگی یے نہ انت – ءُ همے دابیں بے باوریں کارپدانی پد ءَ اے هستی جتا لیکگ بنت – انچو کہ ما اُستا کاوا ءِ بابت ءَ وانیں چو چتور بیت کنت کہ یک بلوچیں استاکارے ” زهاک ” ( گُڈی پیشدادی هاکم ) ءِ وڑیں بلاهیں زوراوریں هاکم ءَ پروش دنت ، یا رُستم ءِ کسہ ءَ بچار —اُستا کاوا ، رُستم ، چُش کہ بانڑی ، مائی بیبو ءُ گل بی بی ءِ وڑیں کارستانی وانگ ءَ پد من ءَ هم باور نہ بیتگ ءُ گوں وت ءَ گشتگ کہ اے بس آزمانکی داسپان ءُ کسہ انت چد ءُ دیم اے هچ نہ انت – بلے مرچی کہ مهرنگ ءَ گنداں اے گپانی سر ءَ من ءَ دلجمی ءَ باور انت کہ اناں لورستان ءِ لوڑیگ کاوا یا کاوا آسن کار ءِ جهد هم راستے ات ، رُستم سیستانی هم پردوسی داسپان یک زندگیں کارستے ، مائی بیبو مئے گوستانک ءَ وژنام کنگ ءِ بُنکی کارست انت ، چہ هانی ءِ برکت ءَ تُرک ءِ لشکر ءَ پروش وارت ، اگاں بانڑی مہ بیتیں تا سوری آنی بیگری ءَ مگلانی لشکر ءِ سوبمندی یک وابے بیتگ ءُ منتگ ات ، گُل بی بی سیمسری شیرزال آئی ءَ وتی وهد ءِ چہ دُرستاں گزبانکتریں مردم جنرل ڈائر هم لاچار کُت کہ آئی ءِ دلیری ءِ داسپان ءَ بہ نویس ایت – اے وڑیں سداں کارست بلوچ ءِ ماتیں زمین ءِ دلبند ءَ رُستگ ءُ رپتگ ءُ همیشانی کتگیں کارانی پد ءَ گوستانک نہ تهنا زندگ انت بلکیں چہ هماهانی کهولاں مروچی هم مردم ودی بیگ ءَ انت ءُ چہ آهاں جوان تر ، هو چہ آهاں جوان تر کنگ ءُ پیشدارگ ءَ انت – کہ مرے زمانگ ءِ زهاک پہ زوراکی کنگ ءَ وتی مٹ وت انت ، بلے چہ اشیا ابید مهرنگ ءِ وڑیں هستی مُهکمی ءَ اُوشتگ ءِ چهرے ” استعاره جوڑ بیتگ-

مهرنگ نہ یوکا پہ وتی راج ءَ یک رُژنائیں گُمبدے جوڑ بیتگ بلکیں اے ماهکانی ءِ تالانیں رُژن ءَ همک راج وتی منزلانی راهاں گندگ ءَ انت پمشکا آ دمگ ءِجهمندیں بلوچ ، پٹان ، سندی داں اے هد ءَ کہ دگہ زباناں هم هما زیمر ءِ توار کہ گوشاں کپ ایت آهانی تہ ءَ گیشتر مهرنگ ءِ نام گرگ بیگ ءَ انت ءُ اے اهد ءَ اے شرپ بس مهرنگ ءِ بهت ءَ کپتگ کہ همک بزگ ءُ لگتمال ناز کنت پہ مهرنگ ءَ – یک نیمگے لگتمالیں راج ءُ مردم دوستیں ٹولی ءُ ادارگ مهرنگ ءِ جهد ءَ ساڑایگ ءَ انت تا دومی نیمگ ءَ زورگیریں ریاست ءِ سرجمیں ادارگ ءُ لشکر ( مشینری ) چہ یک جنین زهگے ءِ شر بیم آماچ انت -همے بیم ءَ آ دل ءَ کپتگ ، پمشکا آئی ءِ همک کرد پہ آئی ءَ زهر جوڑ بیان انت آ تُری سرپراز بگٹی ءِ چیزے روچ ساری ءِ داتگتگیں درشان بہ بنت یا جان اچکزی ءِ هپتوں درشان ، یا اے ملک ءِ چہ درستاں مستریں تاجدار انوارلهک کاکڑ ءِ بهمنتگی ، اشاں ابید لشکری ادارگانی کُشنده ٹولیانی مردماں آئی ءِ دیم پہ دیم ءَ نادینگ کہ بلکیں نزور بہ بیت بلے کجا — اُود ءَ وَ دگہ اجبیں تماشہے بنا بیتگ کہ پہ آهانی ملنڈ کنگ ءَ بس انت کہ نی لاهوری شکورے ءَ هم رئیسانی ءِ چادر مانپوشتگ ءُ پہ اشیا ندریگ بیوکیں اشی ءِ زردیں رسانکدر کہ اے جیڑه ءَ سیاه ءُ تهاریں کوٹیانی تہ ءَ چگل دیگ ءِ وتی وسانی زور جت بلے اشی ءِ همک رپک همائی ءِ جند ءِ گُٹ ءَ لوپ بیت انت – او مهرنگ ! ( پُلّ ) تو مروچی اے وتگڑیں ریاست ءِ اسلی دروشم جهان ءِ دیم ءَ پدر کُت ءُ جهان سرپد کت کہ اے راج هاکمی ءِ لائک نہ انت –

گُش انت کہ اگاں لیکہ ءُ پگر مُهکم بہ بنت هر نیمگ ءَ در کپ ئے سوبمندی تئی گامانی چُکگ ءَ گوں دل ءِ جهلانکاں تئی وش اتکی ءَ چہ تو پیسر اُود ءَ نندوک بیت ءُ پہ تو وداریگ بیت – اد ءَ هم همے وڑ بوت اے آهنیں بانُک ” آئرن لیڈی ” ءَ هر کجا دیم بہ ترینتیں مردم شیداه بوتگ ات انت ءُ آئی ءِ سر ءَ پُل اش ریتکگ ات – اے سرجمیں پند ءِ اکس ءُ تامُر هما ندارگاں کہ پیشدارگ ءَ انت اشانی گندگ ءَ برے برے تا انچش گمان بیت کہ مهرگڑ ءِ یک ” دیوی ” یے مردمانی درد ءُ رنجانی درارو ءُ درمان ئےِ گوں ءُ آهانی تہ ءَ هوار انت ءُ مردم پہ آئی ءِ ادارُکے ءِ گندگ ءَ بے سبر انت ، بے سبری پرچا مہ بیت ، زورگیر ءِ زوراکیانی سوب ءَ هر کس همے سرپد بیتگ ات کہ زوراکیانی اے جمبر همینچک بز انت کہ روچ هم درا بیت نہ کنت – جاورهال تا بلکیں انچش ات انت کہ برتانیا ءِ زمانگ ءَ بهر ءِ تہ ءَ بهر کنگ ءُ راجی بزگی چہ هزابے ءَ کم نہ انت بلے اے نہ بیتگین یا سکیں گرانیں کار ءَ انینا دیوی نزاناں چونیں نامے بدیاں اے ماهکان ءَ منی دل ءَ مهرنگ وت شریں کہ آ چہ انیتا دیوی ءَ گیشتر زانگ بیت ءُ کتگیں کار هم ” اساطیری ” داسپانانی دیویاں شر تر ءُ مستر انت – کہ نی اے آهیں بانک ءَ سرجمیں بلوچ راج یکیں رد ءَ کمایگ ءَ هوار دمگ ءِ بزگ ءُ لاچارناں هما رُژن بکش اتگ کہ چہ اشیا کور هم وتی منزل ءَ دیست کن انت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اسلام آباد نندانک ءِ سیمی فیز ءَ گوستگیں روچ ءَ بلوچستان ءِ دمگ نصیر آباد ءُ کراچی ءِ دمگ لیاری ءَ زھرشانی ءُ روانک کشگ بوتگ ءُ مروچی حب ءُ آواران ءِ دمگ جاؤ ءَ زھرشانی ءُ روانک کشگ بوتگ کہ اودا مزنیں کچے ءَ زھگ ءُ زالبولاں ھوار ھر تک ءُ پھناتاں سیادی داروکیں مردماں بھر زرتگ –

اسلام آباد ءَ بلوچ چکچینی ءِ بگیری ءُ زورانسری آوار جنگ بوتگیں مردمانی یل کنائینگ ءِ ھاتر ءَ برجاھیں نندانک ءِ سیمی فیز ءَ بلوچ درنگاز کنوکانی پلامرزی ءَ بلوچستان ءَ ھوار کراچی ءُ دگہ دمگاں نلوچ یکجھتی کمیٹی ءِ چیر دستی ءَ زھرشانی ءُ روانک درچ برجاہ انت –

زھرشانی روانک نندانکاں زھگ ءُ زالبولاں ھوار سیاسی باسک ءُ نودربراں مزنیں کچے ءَ بھر زرتگ، درنگاز کنوکاں بلوچ چکچینی ءِ بگیری ءِ ترندیں نارہ جتگ چہ ھاکماں لوٹ کتگ کہ اسلام آباد ءَ برجاھیں بیگواھیں مردمانی کھول ءِ نندانک ءِ لوٹ منگ بہ بنت –

گوستگیں روچ ءَ آدینگ ءَ بلوچستان ءِ دمگ نصیر آباد، ڈیرہ مراد جمانی ءَ مزنیں کچے ءَ مردم چی وتی گساں در اتکگ ءُ بیگواھیں مردمانی ھک ءَ روانک ءِ بھر جوڈ بوتگ انت – دومی نیمگ ءَ کراچی لیاری ءَ ھم مزنیں کچے ءَ مردم دگانی سر ءَ در اتکگ انت ھمے میان ءَ سندھ پولیس ءَ آیانی دارگ ءِ ھاتر درنگاز کنوکانی زھرشانی سامان ءُ اسپیکر گوں وت برتگ انت –

گڈی ھالاں تاں سندھ پولیس ءَ پانزدہ درنگاز کنوک دزگیر کتگ ءُ بندیگ کتگ انت –

ھمے وڈ مروچی ھب ءُ بلوچستان ءِ جنگ زدگیں دمگ آواران جاؤ ءَ ھم اسلام آباد نندانک ءِ پلامرزی ءَ مردماں زھرشانی کتگ ءُ روانک کش اِتگ کہ اودا مزنیں کچے ءَ مردماں بھر زرتگ ءُ اسلام اباد نندانک ءِ ریاستی ادارھانی نیمگ ءَ درگان درگان کنگ ءُکھولاں دلسیاہ ءُ زھرشانی ءِ دارگ ترندی ءَ گوں ایرجتگ ءُ چہ سرکار ءَ لوٹ کتگ کہ بلوچ نندانک زورانسری آوار جتگیں مردمانی کھولانی شرپ ءَ بہ کن انت ءُ آیانی درد ءَ بہ مار انت آیانی دوستیگیں مردماں یل بہ کن انت –

بلوچ چکچینء بگیری ءَ بلوچ یکجھتی کمیٹء زھرشانی درچ ءَ پنجاہ روچ سرجم بوتگ انت کہ آیاں سرجمیں جھان ءَ دلبڈی رستگ وھدیکہ بلوچ یکجھتی کمیٹی ءَ وتی زھرشانیانی سیمی فیز ءَ بلوچستان ءَ ھوار سرجمیں جھان ءِ بلوچاں اے زھرشانی درچ ءِ بھر زورگ ءِ دزبندی کتگ کہ گوستگیں بازیں روچاں بلوچستان ءَ ھوار کینیڈا، امریکہ ءُ یورپ ءِ جتا جتائین دمگاں برجاہ انت –

بلوچ یکجھتی کمیٹی ءِ جار پد ءَ گوستگیں روچاں بلوچستان ءِ دمگ کیچ ءِ کوچگی ھند دشت ڈڈے ءَ ھم ورنایانی نیمگ ءَ زھرشانی ءُ روانک کشگ بوتگ ءُ بیگواھیں مردمانی یل کنگ ءِ لوٹ کتگ –

بلوچ آجوئی لوٹوکیں سلاہ بندیں گل بلوچستان لبریشن پرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب ” ءَ شنگ کرتگیں درشانے ءِ تہ ءَ کیچ بلیدہ ءَ پاکستانی پوج ءِ سر ءَ بوتگیں اُرش ءِ زمہ واری منّ اِتگ ءُ گوشتگ کہ اے اُرش ءَ پوج ءِ پنچ کارمند مرتگ انت –

جارکش میجر گوھرام بلوچ ءِ رِد ءَ سرمچاراں کیچ ءِ ھند گلی بلیدہ ءَ پاکستانی پوج ءِ دو گاڑی ءُ شش پرپٹانی ھواریں کارواں گوں چیر کُرتگیں شورھاں نشانگ کُرتگ، کاروان ءَ ھواریں یک گاڑی یے زد ءَ اتکگ ءُ سرجم ءَ تباہ بیتگ۔ چہ ایشی ءَ گاڑی ءَ سواریں پنچ کارمند ھما جاہ ءَ مُرتگ ءُ میجرے ءَ ھوار دو کارمند زدگ بیتگ انت – سرمچاراں کاروان ءِ آدگہ گاڑی ءُ پرپٹ گوں وتکار ءُ نوکیں سلاھاں نشانگ کُرتگ اَنت –

میجر ءِ رِد ءَ آدینگ ءُ شمبے ءِ میانی شپ ءِ سَے ءَ سرمچاراں یک کارشونی ءُ گل ءِ اھوتی ھالے ءِ بنیاد ءَ دژمن ءِ کارمند باز تاوان بار کُرتگ اَنت –

جارکش ءِ رِد ءَ جنگی ءُ سَسّائی کارشونیاں سلاہ بندیں سرمچارانی اُرشاں دُژمن بِھ منتگ، لاچار ءُ بے وس اِنت کہ ارباں مشین ءُ ٹیکنالوجی ءِ کارمرد کنگ ءَ ابید وت ءَ چہ اُرشانی رکینگ ءَ بے سوب اِنت ءُ اے ھمے گپ ءِ منّانک اِنت کہ دژمن ءَ ھمک پِڑ ءَ سَسّائی پروش وارتگ –

جارکش میجر ءَ وتی درشان ءِ گڈسر ءَ گوشتگ کہ بلوچستان لبریشن پرنٹ اے اُرش ءِ زمہ واری ءَ منّ ایت ءُ کول کنت کہ داں بلوچستان ءِ آجوئی ءَ دژمن ءَ ھر پِڑ ءَ پروش دئیں-

بلوچ اسٹوڈنس ایکشن کمیٹی ءِ نیمگ ءَ نوکیں سال ءِ درگت ءَ سرجمیں بلوچستان ءَ “بلوچستان کتاب کاروان” نام ءَ کتابی میڑہ برجاہ انت –

بساک ءِ نیمگ ءِ بندات کنگ بوتگیں اے کتابی میڑہ مروچی سیزدھمی روچ ءَ ھم برجاہ بوتگ ـ اے کتابی میڑہ ءَ بلوچستان ءِ جتا جتائیں ھند ءُ دمگاں برجاہ انت –

گوستگیں سَے روچانی میان ءَ کلات، خضدار، پسنی، پیشُکان، بل نگْور دشت، شاپُک، ھیرونک، تجابان، سبی، کولپور، مچھ، بھاگ ناڑی بولان، بارکھان، کوہلو، نوکنڈی ءَ ھوار دگہ دمگاں کتاب میڑہ برجم دارگ بوتگ انت کہ اودا جنک ءُ بچکیں نودربر، زانتکار، استاد، چاگردی مردماں ھوار ھر تک ءُ پھناتاں سیادی داروکیں مردماں اسٹالانی سر ءَ اتکگ وتی دوستیگیں کتاب زرتگ انت –

بساک ءِ جارکش ءِ رِد ءَ بلوچستان کتاب کاروان کساس بلوچستان ءِ ھر کنڈ ءَ سربوتگ وھدیکہ اے کمپئن آؤکیں وھداں ھم برجاہ بیت انت ءُ باند ءَ سوراب ءَ کتابی میڑہ جنگ بیت انت –