TBP Balochi

بلوچستان ءَ ھار ءِ آدُراھی

ٹی بی پی شونگال

بلوچستان ءِ جتاجتائیں دمگاں بشامی ھورانی درچ برجاہ اِنت چریشی ءَ بازیں شھرانی تہ ءَ ھار ءِ جاورھال ودی بیتگ انت۔ چہ یکشلیں ھوراں بولان، نائی گاج، تَلی، مولا، لھڑی ءُ رخشاں کور ءَ مزنیں کچے ءَ آپ اَتکگ ءُ ھار ءِ آپ ءِ سوب ءَ کِشار بُڈاتگ اَنت، بازیاں لوگ ڈُراتگ اَنت، کور ءَ مزنیں کچے ءَ آپ ءِ آیگ ءِ سوب بازیں راہ بند بیتگ اَنت ءُ ھزارانی کچ ءَ مھلوک پچیں آزمان ءِ چیر ءَ زند گوازینگ ءَ لاچار اَنت۔

ھار ءَ بازیں دگ بُرتگ اَنت ءُ بلوچستان ءِ سندھ ءُ پنجاب ءَ گوں زمینی رھوت پرُشتگ۔ بولان ءِ کور ءِ ھار ءَ آپ ءِ آیگ ءَ پد سندھ ءُ پنجاب ءَ گوں رھوت پرُشتگ۔ پنجرہ پل ءِ پرشگ ءَ چہ ھزارانی کچ ءَ گاڑی ءُ مردم بولان ءَ گَٹ اتگ اَنت۔

نصیر آباد، جھل مگسی، سبی، ماشکیل، واشک، ھاران ءُ پنجگور ءَ ھار ءَ مزنیں تاوانباری یے کُتگ ءُ بازیں ھانواد سانمند بیتگ اَنت۔ بازیں بان کپتگ اَنت ءُ بازیں دمگانی تہ ءَ ناتوام ءُ ھرابیں مواداں گوں جوڑ کُتگیں ڈیم پرُشتگ اَنت۔ ترندیں ھارانی سوب ءَ داں اَنگت پنچ مردم بیران بیتگ اَنت۔

بلوچستان ءَ بیتگیں گوستگیں سال ءِ ھار ءِ تاوانباریاں چہ مردماں داں اَنگت درکپت نہ کُتگ ءُ سرکاری ٹاھاں ابید ھم آ داں انگت کمک ءِ راھچار اَنت۔ ھزارانی کچ ءَ کھول بے لوگ اَنت ءُ یک سالے گوزگ ءَ پد ھم پچیں آزمان ءِ چیر ءَ زند گوازینگ ءَ اَنت۔ ھب ءُ بولان ءَ ھاری آپ ءَ بُڈاتگیں بند داں انگت اڈ کنگ نہ بیتگ اَنت ءُ بلوچستان ءِ گیشتر دمگانی دگ ھم ھار ءَ بُرتگ اَنت۔

لس تکانی رد ءَ بلوچستان ءَ جنگانی تہ ءَ کارمرز کنگ ءَ پہ آسراتی ءِ کمی نہ اِنت بلے چہ ھار ءَ سانمندیں مردم گوستگیں سالے ءَ چہ کمک ءِ راھچار اَنت ءُ سرکار تھنا بٹاکانی ھد ءَ بندوک اِنت۔ گوستگیں سالے تاوانباریاں چہ در نہ کپتگ اِت اَنت کہ انیگیں ھار ءَ سانمندانی جنجالانی تہ ءَ گیشی آورتگ ءُ سرکارکی نادلگوشی ءِ سوب ءَ ھار ءَ سانمندیں مردمانی جنجال ھمک روچی رد ءَ گیشتر بیان اَنت۔

اے المی اِنت کہ بلوچستان سرکار ءُ نیشنل ڈیزاسٹر مینجمنٹ اتھارٹی جار سانمندانی پد ءَ آباد کَنگ ءِ کار ءَ زیت سرجم بہ کن اَنت ءُ چہ ھار ءَ رکینگ ءِ ھاتر ءَ شاھگانیں پالیسی یے اڈ بہ دے اَنت۔

پولش ءِ سروزیر ءَ گوشتگ بیلاروس ءَ روس ءِ نیم پوجی ادارہ ویگنر ٹولی ءَ ھواریں سد ءَ گیش پوجی کارندہ پولینڈ ءِ سیمسراں شتگ اَنت-

امریکہ ءِ ھال سر کنوکیں ادارہ اے پی ءِ رد ءَ شمبے ءِ روچ ءَ پولش سروزیر میتیوز موراویکی ءَ اھوالکاراں گوں تران کنان ءَ گوشتگ کہ ویگنر ءِ پوجی پولینڈ ءِ سیمسر سووالکی گیپ ءِ نزیک ءَ سر بیتگ اَنت-

آئی ءَ اھوالکاراں گوں تران کنان ءَ گوشتگ کہ جاور گیش ترس ءِ ناگیگی ءِ دیمپان اَنت-

آئی ءَ گوشتگ کہ اے گمانی رنگ ءَ پولینڈ ءِ زمین ءِ سر ءَ بائبرڈ اُرشانی نیمگ ءَ یک گامگیجے-

پولینڈ یورپی یونین ءُ نیٹو ءِ باسکے ءُ آئی ءَ وتی رودراتکی سیمسر ءَ روس ءِ ھواریں ھلک بیلاروس ءَ پھزداری ءِ ترس اِنت –

اے ترس ءِ گمان ھما وھد ءَ گیش بیتگ کہ وھدیکہ یاگی بیتگیں نیم پوجی ویگنر ءِ کارندہ بیلاروس ءَ سر بیتگ اَنت-

گوستگیں لھتیں سالانی توک ءَ پولینڈ ءُ بیلاروس ءِ سیمسری جاورھال ناوش اَنت – ایشی ءِ مستریں سبب ءَ میان جی ءُ افریقہ ءَ آیوکیں مردم دیم پہ یورپی یونین ءَ روگ ءُ پولینڈ ءُ لتھوانیا ءِ سیمسر ءَ رس اَنت-

پولینڈ ءِ سر ءَ روس ءُ بیلاروس ءں سر ءَ را بھتام جتگ کہ اے ڈرانڈیھ بیتگیں مردمانی سبب ءَ اے ڈیھ ءَ لپاشگ لوٹ ایت-

پولینڈ ءِ سرکار ءَ پناہ گزینانی پترگ ءُ ھائبرڈ جنگ ءِ یک مشکلے گوشتگ ءُ ایشی ءِ سر ءَ آئی ءَ بیلاروس ءِ ھواریں سیمسر ءَ یک برزیں دیوالے ھم جوڑ کتگ-

لیاری ءَ نندوکیں آواران ءِ جھمنند بختاور بلوچ ءِ گوشگ انت کہ پاکستانی پوج آیاں دلسیاہ کنگ ءَ انت – بیست جولائی ءَ پوج ءَ گِس ءَ بیڑ برتگ ءُ آیانی گوانکو ءُ ایندگہ چیز دستیگ کتگ انت –

آئی ءَ گوشتگ کہ من یک چاگردی باسکے آں بلے پوج برے ھنرے سازیت ءُ آیاں دلسیاہ کنت – پوج ءَ مزنیں کچے ءَ گِس ءَ بیڑ برتگ مات ءَ ھوار ایندگہ مردم کم شرپ کتگ ءُ گِس ءَ اتکگیں مھمانانی درگت ءَ وڈ وڈیں جُست کُتگ –

آئی ءَ گوشتگ کہ بُنکی ءَ ما بلوچستان ءِ جھمنند انت، مئے سیاد ءُ وارس پہ الاج ءِ ھاتر ءَ کراچی ءَ کائنت گڈا مئے گس ءَ دار انت بلے پوج ءُ چیریں ادارھانی کارمند اے چیز ءَ شری ءَ سرپد ءُ زان انت بلے ھنگت مارا دلسیاہ کنگ ءَ انت –

کراچی ءِ دمگ لیاری ءِ نندوک ءَ گوں دی بلوچستان پوسٹ ءِ اھوالکار ءِ گوم ءَ تران کنان ءَ گوشتگ کہ ھر ھما وھد ءَ کہ چہ بلوچستان ءَ مئے گور ءَ مھمانے یا سیاد ءُ وارس ءِ کئیت گڈا ریاستی کارمند مئے گس ءَ بیڑ بر انت مارا ترسین انت ءُ ھتاکہ نادراھانی رپورٹ ءَ ھم لوٹ انت –

بختاور گوشگ انت کہ گوستگیں شپ ءَ پوج ءَ یکبرے پدا مئے گِس ءَ بیڑ برتگ ءُ پٹ پول کتگ – کستریں برات لٹ شاپ کُتگ ءُ مناں کُشگ ءِ بیھار داتگ ءُ ھمے جست ءِ کُتگ کہ تو کدی وتکش اُرشے کنے، پریس کلب ءَ پرچا روے؟

آئی ءَ گوشتگ کہ پوج ءَ یک گھنٹہ ءَ تاں جُست ءُ پرس کُتگ ءُ پدا گِس ءِ دراھیں سامان لنگ ءُ لانگ کُتگ انت ءُ مناں ھمے گوشتگ کہ ماھل بلوچ ءَ تئی نام داتگ ءُ آ تئی گِس ءَ ھم اتکگ بوتگ –

بختاور بلوچ ءِ گوشتگ کہ من ماھلءَ نہ زاناں ءُ ناکہ منی گِس ءَ اتکگ اے وڈیں کاراں پوج مارا تُرسینگ لوٹیت –

آئی ءَ گوشتگ کہ پوجی کارمنداں ھمے گوشتگ کہ چہ چمن ءَ اتکگیں زالبولے تو وتی گِس ءَ چیر داتگ بلے اے دراہ دروگ ءُ وتگڑیں الزام انت –

زانگ بہ بیت کراچی ءَ نندوکیں بلوچ مدامی ھمے گپ ءَ جنگ ءَ انت کہ پوج شپ ءِ نھنگام ءَ گِساں بیڑ بارت ءُ آیاں دلسیاہ کنت بازیں مردمے ھمے گوشگ انت کہ پوج ءِ اے وڈیں رویشت ءَ آ ماژگی نادراھی ءِ آماچ بوان انت –

چہ کراچی ءَ بلوچانی ھند ءُ دمگاں زورانسری آوارجنیانی ھال ھم مدامی آیگ انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل ھکل ءَ شنگ کرتگیں درشانے ءِ تہ ءَ تربت ءُ پنجگور ءَ بوتگیں اُرشانی زمہ واری منّ اِتگ ءُ گوشتگ کہ اے اُرشاں پاکستانی پوج ءِ چاریگے ءَ ھوار دو کارمند مرتگ انت ءُ دو زدگ بوتگ انت –

جارکش جیئند بلوچ ءِ رِد ءَ بی ایل اے ءِ سرمچاراں بیست ءُ ھپت جولائی دوھزار ءُ بیست ءُ سَے ءِ شپ ءَ تربت ءَ گمشاد ھوٹل ءِ نزیک ءَ اُرشے ءَ پاکستانی پوج ءِ پنجاپ ءِ جھمنندیں چاریگ گلام یاسین ءَ کشتگ – اے مرد ءَ دیر اِنت کہ وتی دروشم مٹ کرتگ ءُ پہ زورگریں پوج ءَ چاریگی ءِ کار ءَ کنگ ءَ بوتگ –

جارکش ءَ گوشتگ کہ بی ایل اے تربت شھر ءُ کِر ءُ کشانی ھوٹل ءُ کوٹیانی واھنداں کڈن کنت کہ آ اے وڑیں مردماں جاگہ مدے اَنت، اگاں نہ وتی جان ءُ مال ءِ تاوان ءِ زمہ وار وت اَنت –

جارکش ءَ دیمتر ءَ وتی درشان ءِ تہ ءَ گوشتگ کہ مروچی سھب ءَ بی ایل اے ءِ سرمچاراں پنجگور ءِ ھند چتکان ءَ زورگریں پاکستانی پوج ءِ بنجل ءِ پھازداریں پانگس ءِ سر ءَ گرنیڈ لانچر ءِ باز گولہ آس داتگ ءُ نشانگ کرتگ – اُرش ءِ آسر ءَ دُژمنیں پوج ءِ یک کارمندے مرتگ ءُ کم چہ کم دو کارمند زدگ بوتگ انت –

جارکش ءَ گڈسر ءَ وتی درشان ءِ تہ ءَ گوشتگ کہ اے ارشانی زمہ واری بی ایل اے منّیت ءُ کول کنت کہ زورگریں پوج ءُ آئی شریدارانی سر ءَ اُرش گوں ترندی ءَ برجاہ مان انت –

بلوچستان شھدربرجاہ ءِ جنکانی ھاسٹل ءَ سِلیں آپ ءِ ورگ ءَ بازیں نودربرے نادراہ بوتگ انت کہ نادراھجاہ ءَ برگ بوتگ انت –

بلوچستان شھدبرجاہ ءَ جنکانی ھاسٹل ءَ سِلیں آپ دیگ بوتگ ، آپ ءِ ورگ ءَ بازیں نودربرانی جاور نگیگ بوتگ انت کہ پہ جاندراھی ءِ ھاتر ءَ نادراھجاہ ءَ برگ بوگ ءَ انت –

اے وڈیں جاورانی تہ ءَ شھدربرجاہ ءِ واکدارانی ساڑی نہ بوگ ءَ نودربر ءُ آھانی سنگت سک باز دلسیاہ شک ءِ تہ ءَ دور داتگ انت – نودربراں لوٹ کتگ کہ اے جیڑہ زوت گیشگیوار کنگ بہ بیت –

بلوچستان شھدربرجاہ ءِ جنکانی ھاسٹل ءَ ساپیں آپ ءِ ندیگے سر ءَ نودربراں واکدارانی سر ءَ تنکید کتگ ءُ گوشتگ کہ واکدارانی نادلگوشی ءِ سوب ءَ ھاسٹلاں نندوکیں نودربرانی جانسلامتی ھترہ ءِ تہ ءَ انت –

آھاں چہ شھدربرجاہ ءِ واکداراں گوں لوٹ کتگ کہ اے جیڑوے گیشگیوار ءَ زوت گامگیج بہ زور انت ءُ تانکہ گیشیں تاوان مہ بیت –

بلوچستان ءِ دمگ کلات ءُ گوادر ءَ ھال اِنت کہ دو جتا جتائیں تکانی وئیلاں دو مردم بیران بیتگ اَنت-

گیشیں اھوالانی رد ءَ آدینگ ءُ شمبے ءِ میانی شپ ءَ ناشناسیں مردماں نیمرگ کھنڈ ءَ تیرگواری کنان ءَ حبیب الرھمان ء گلام سرور ساسوی جھمنند نیمرگ کُشتگ –

لیویز ءَ لاش دستیگ کتگ ءُ ھسپتال ءَ رسینتگ اود ءَ اژدری چار ءُ ٹپاساں پد لاش کھول ءِ دست ءَ دیگ بیتگ ءُ گیشیں پٹ ءُ پول انتزامیہ کنگ ءَ اِنت-

دومی نیمگ ءَ تیابدپی شھر گوادر ءَ ھال اِنت گورنمنٹ گرلز ھائی اسکول ملا بند گوادر ءُ ڈوھریہ اکیڈمی ءِ ھواریں کبرستان یک ھپتگے ءَ کوھنیں لاشے دزکپتگ-

ھالانی سر بوگ ءَ پولیس ءَ لاش چِست کتگ ءُ ھسپتال ءَ رسینتگ، پولیس ءِ رد ءَ میڈیکپ ٹیم لاش ءَ پوسٹ مارٹم کنت ءُ ایشی ءَ پد رپورٹ شنگ کنگ بیت اِنت ءُ لاش ءِ کل ءُ کسارت ءِ انتزامیہ کنگ بیت اِنت-

ناشریں جھانی گل داعش ( آئی ایس) ءَ گوشتگ شام ءِ بنجاھی شھر دمشق ءَ زرباری بیوکیں یک بمب تراکے ءَ آئی ءِ دست بیتگ چریشی ءَ چہ کم چہ کم شش مردم بیران ءُ بیست زدگ بیتگ اَنت-

ھال سرکنوکیں بنجل اے ایف پی ءِ رد ءَ پشمبے ءِ روچ ءَ اے بمب تراک دمشق ءَ سیدہ زینب ءِ ادیرہ ءِ نزیک ءَ بیتگ کہ شام ءِ درستاں نامان تریں شیعہ زیارت جاہ ءَ –

تراک ءَ عاشورا یک روچے ءَ پیش کنگ بیتگ – ٹیلی گرام ءَ یک درشانے ءَ داعش ٹولی ءَ گوشتگ کہ آئی ءِ لھتے جنگولاں شامی سرکار ءُ چاریگانی دمگ ءَ پھریزوکانی ملیشیائی ءِ نیمگ ءَ ترندیں پھزداری پروشتگ ءُ تراک کتگ –

درشان ءَ گوشتگ کہ آ شیعہ زائرین ءَ مُچی ءِ وھد ءَ یک بمبے پرپٹے ءَ بستگ پارک کنگ ءُ تراک ءَ سوبمند بیتگ –

دمشق ءِ واکداراں عاشورہ ءِ وھد ءَ ترندیں پھزداری کتگ اَنت اے ادیرہ ءَ شیعہ اسلام ءِ درستاں جوانتریں جاھاں زانگ بیت اِنت اود ءَ ھزارانی مردم زیارت ءِ واستا کاینت-

آدینگ ءِ روچ ءَ ھمے کلوہ ءَ داعش ءُ آئی ایس اے ٹاہ داتگ کہ ھمے دمگ شیعہ زائرین ءِ بروکانہ یک بسے نشانگ کتگ چریشی ءَ کم چہ کم دو مردم زدگ بیتگ اَنت ءُ گاڑی تباہ کتگ –

سرکاری رسانکدر ءَ یک سیکورٹی کارندھے ءِ درور دیان ءَ گوشتگ کہ سَے شمبے ءَ شام ءِ بنجاھی شھر ءَ ھمے دمگ ءَ یک کارے ءَ بیوکیں بمب تراکے ءَ دو شھری زدگ بیتگ –

نا ایوک ءَ شام ءَ بلکیں عراق ءَ ھم شیعہ زائریانی آئی ایس یا داعش ٹولی ءِ ناشرانی اُرشانی نشانگ کنگ بیتگ –

بلوچستان ءِ دمگ ھزدار ءِ ھند آڑنجی ءَ دل ءُ لاپ ءَ داں نُھ مردم بیران بیتگ اَنت-

ھزدار ءِ ھند آڑنجی ، جھلڑ ، بھورو ، آڑنینجی مسجد سینڑہ ، مسجد کفتاری ماس ، ھراڑک ءَ ھوار دگہ ھنداں دل ءُ لاپانی سبب ءَ داں انگت ءَ زالبول ءُ زھگاں ھوار نھ مردم بیران بیتگ اَنت-

آڑینجی ءَ کھیرو ءِ ھند ءَ سَے مردم ، ڈھائی بدرنگ ءَ یک مردمے ، سیٹھاری گھورو ءَ سَے مردم ، جھلڑ ءَ دو مردم بیران بیتگ اَنت-

بیران بیتگیں.مردمانی پجار عبدالجبار دینار زئی ، عبدالکبیر عمرانی ءِ جنک ، مھمد عمر عمرانی ءِ جنک ءَ ھوار دگہ مردم ھوار اَنت-

زانگ بہ بیت بلوچستان ءَ جاندراھی ءِ آسراتی ءِ نہ بوگ ءِ سبب ءَ اود ءَ مردمانی جان ءُ ساہ روگ ءَ اَنت –

اود ءَ دومی نیمگ ءَ ھور ءُ ھاراں مردم بازیں مشکل ءُ جیڑھانی دیمپان اَنت ھمود ءَ نادراھیانی گم ءِ ساھیل ھم مردمانی سر ءَ کپگ ءَ گندگ بنت-

بلوچستان ءِ دمگ پنجگور ءِ ھند چتکان ءَ مروچی سھب ءَ ناشناسیں مردماں پاکستانی پوج ءِ بنجاھی بنجل نشانگ کتگ-

دمگی مردمانی رد ءَ اُرش ءِ وھد ءَ ترندیں تیرگواری ءُ تراکانی توار اشکنگ بیتگ انت-

ھالانی رد ءَ اُرش ءَ پوج ءَ جانی تاوانانی دیمپانی کنگ کپتگ- بلے واکدارانی نیمگ ءَ داں انگت ءَ اے درگت ءَ اھوال نیتکگ اَنت-

زانگ بہ بیت اے دمگ ءَ بلوچ سلاہ بندیں گل پرکار اَنت بلے داں انگت ءَ اے اُرش ءِ زمہ واری کس ءَ نہ زرتگ-

روکپتی بلوچستان ءِ جتا جتائیں ھنداں ایرانی لشکر ءِ تیرگواری ءَ کسان سالیں جنکوے زدگ بیتگ ءُ سلاہ بنداں تیراری کنان ءَ دو مردم کشتگ اَنت ءُ یکے زدگ کتگ –

سر بیتگیں اھوالانی رد ءَ ایرانی لشکر ءَ روکپتی بلوچستان ءِ دمگ ایرانشھر ءَ یک رھگوزی گاڑی ءِ سر ءَ تیرگواری کتگ ءُ اود ءَ یک کسان سالیں جنکوے زدگ کتگ –

زدگ بیتگیں جنکو ءِ نام رحیمہ درازئی ء عبدالجلیل جھمنند سراوان ءِ نام ءَ زانگ بیتگ-

اھوالانی رد ءَ رحیمہ وتی کھول ءِ ھمراھی ءَ دیم پہ ایرانشھر ءَ روگ ءَ بیتگ کہ اود ءَ ایرانی لشکر ءَ گاڑی ءِ سر ءَ تیرگواری کتگ ءُ چریشی ءَ چہ آ زدگ بیتگ-

اھوالانی رد ءَ ایرانی لشکر لس گاڑیاں ھمے داب ءَ نشانگ کنت ءُ آیانی سر ءَ تیرگواری کنت اِنت –

ھمے وڑ ءَ سراوان ءَ دگہ دو جتا جتائیں وھداں تیرگواری ءَ دو کس بیران ءُ یک مردمے زدگ بیتگ-

اھوالانی رد ءَ سراوان ءِ ھند آسپیچ ءَ سلاہ بندیں مردماں تیرگواری کتگ ءُ یک براتے کُشتگ ءُ دومی برات زدگ کتگ –

کشگ بیتگیں برات ءِ پجار عمران برکزئی ءُ بھمن باکزئی ءِ ناماں زانگ بیتگ اَنت کہ ھردوک قادر بخش چک اَنت ءُ سراوان ءِ نندوک اَنت-

ھمے وڑ ءَ سراوان ءَ منصور نوتیزئی ء ھاجی خان جھمنند کناربست کوھل بخش مھرگان سراوان ءِ نام ءَ زانگ بیتگ-

زانگ بہ بیت روکپتی بلوچستان ءَ اے سال ءَ ایرانی لشکر ءُ ناشناسیں سلاہ بندیں مردمانی تیرگواریاں داں انگت ءَ 243 کشتگ اَنت-