TBP Balochi

روکپتی بلوچستان ءِ دمگ ایرانشھر ، کسرکند ،سیب ءُ سوران ءَ سَے مردم جتا جتائیں تیرگواریاں کُشگ بیتگ اَنت-

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ ناشناسیں مردماں تیرگواری کنان ءَ یک مردمے کُشتگ-

کُشگ بیتگیں مردم ءِ پجار سِی سالی ئیں فاروق بلوچی زردکوھی ء شریف جھمنند خیر آباد نایگون ایرانشھر ءِ نام ءَ زانگ بیتگ –

اھوالانی رد ءَ فاروق ءِ سر ءَ ناشناساں ھما وھد ءَ اُرش کتگ کہ آ کمالزدہ میتگ ءَ وتی گاڑی ءِ توک ءَ اوشتوک بیتگ ءُ سلاہ بنداں تیرگواری کتگ ءُ زدگ ءُ چریشی ءَ پد آ ھاتم انبیا نادراہ جاہ ءَ برگ بیتگ ءُ اود ءَ وتی ساہ داتگ اَنت-

زانگ بہ بیت فاروق ءِ برات فرھاد سَے ھپتگ ءَ پیسر ناشناساں جتگ ءُ ٹپیگ کتگ کہ داں انگت ءَ آ نادراہ جاہ تھتیگ اِنت-

ھمے وڑ ءَ کسر کند ءَ سلاہ بندیں مردماں تیرگواری کنان ءَ یک مردمے کُشتگ-

کشگ بیتگیں مردم ءِ پجار آرش رائیسی ءِ نام ءَ زانگ بیتگ- آ ساربوگ ءِ جھمنند گوشگ بوگ ءَ اِنت-

ھمے وڑ سیب ءُ سوران ءَ سلاہ بندیں مردماں تیرگواری کتگ ءُ یک مردمے کُشتگ-

اھوالانی رد ءَ کشگ بیتگیں مردم ءِ پجار فرامرز پسکوھی ء علی ءِ نام ءَ زانگ بیتگ ءُ آ دھستان سرسورہ بخش پسکوہ ءِ جھمنند اِنت-

آجوئی ءِ کِشک – مائیکل کولنز

جنرل مائیکل کولنز ءِ نبشتگیں رَہ نوِشت

اولی در، چارمی بھر

اگست، 1922

رجانکار: حکیم بلوچ

دی بلوچستان پوسٹ

لیکہ ءِ تہ ءَ بدلی ءِ بُنکی سوب آئی ءِ تہ ءَ برجاھیں یکشلی اِنت، پہ گوستگیں 700 سالاں ھواریں جھد ھمے بیتگ کہ انگریز چہ آئرلینڈ ءَ در کنگ بہ بنت۔ پہ اے مکسد ءِ سومبندی ءَ، پُر ایمنیں تھی دیمروی ھم ڈالچار کنگ بوت اَنت، ءُ بازیں مُز کہ آیانی جتا جتائیں مکسد اَت اَنت، آیانی درستیں تھر بُڈینگ کپت اَنت ءُ یکجاھیں گھگیری ءِ کوشستانی بھر بئیگ کپت، کہ آ کوشست چہ انگریزاں تاکت ءِ پُلگ ءُ در کنگ اَت۔ ھمے ھاسیں ھواریں جھد نوں آسر ءَ سر بیتگ۔ بلے ایشی ءَ پد ھم ھواریں مکسدانی گِرگ ءَ پہ یکجاھیں دروشم جھد کنگ المی اِنت۔ انگریزیں ھاکمانی در کنگ ءِ شپدیمیں کار نوں آسر بیتگ۔ نوں پدمنتگیں گئیلک آئرلینڈ ءِ اَڈ کنگ ءِ جوانیں کارے بندات کنگ ءِ وھد اِنت۔ پہ اِیشی ءَ مارا تھنا پہ نام یکجاھی پکار نہ اِنت، بلکیں شھگانیں یکجاھی یے پکار اِنت۔

آئرشانی ھمک سیت، آئرش زندمان ءِ ھمک کَنڈگ، کارجاھی، باپاری، ربیدگی ءُ چاگردی بھر وتی درشان ءَ بہ کن اَنت ءُ ڈیھ ءِ دیمروی ءَ وتی توار ءَ ھوار بہ کن اَنت، اے ھواریں تہ ءَ توار سرکار ءَ ھوار باپاری ءُ کارجاھی تکانی پجیگ یکیکی کوشست ھم المی اَنت۔ بلے اے المی اِنت کہ آ وتی لیکھانی درشانی ءَ گوں وتی اَسَر مندی ءَ کارمرز بہ کنت، یک دومیگ ءِ ھلاپ ءَ ناں بلکیں پہ یکجاھی ءُ ھمکاری ءَ۔ ءُ وتی ھاسیں مکسدانی دیمروی ءِ ھاتر ءَ، آ بائد اِنت ھواریں آئرش راجی پجار ءِ دروشم ءِ چیدگ ءِ پد ءَ ھوارکاری بہ کن اَنت۔ ءُ ھمے لیکہ ءِ سر بیگ ءِ ھاتر ءَ ءُ ھاس اے وھد ءِ تہ ءَ، ھواری ءُ جمھوری رد ءَ گچین بیتگیں راجی سرکار ءِ وپاداری ءُ کمک بئیگ لوٹ ایت۔ کم چہ کم ایمنی ءُ لس پرمان ءِ برجاہ دارگ ءَ آئی ءِ کمک کنگ بہ بیت، کانود ءِ رد ءَ زندمان ءُ مڈیانی رکینگ ءِ اگبال، مردمی، پاٹیانی ءُ نیکرائی آجوئی کہ کانود ءِ رد ءَ وتی درشان ءَ کُت بہ کن اَنت۔ ھمے ھاتر ءَ ما گُشیں کہ اے گام کہ ایمنی ءِ برجاہ دارگ ءِ ھاتر ءَ زیرگ بیتگ اَنت زوراکیں نہ اَنت۔ اے گام آجوئی ءِ جھد ءَ سرجمی ءِ نیمگ ءَ بروکیں گامانی دروشم ءَ گِندگ ءَ کائنت، کہ ھما گوستگیں سرامداں دیر کنان اَنت، دانکہ مھکم ءُ زِرنگیں بُنھشت ایرکُت بہ کن اَنت کہ آیانی سر ءَ نوکیں آئرلینڈ ٹھینگ بہ بیت۔ ھما مردم کہ پرمان ءَ برجاہ دارگ اَنت، (ھما نہ کہ آیاں ایشی ءَ تاراج کنگ ءِ کوشست کُتگ)، ھما آئرش راجگری پھازوک اَنت۔

راستیں آئرلینڈ ءَ گوں وپاداری مئے لیکہ ءِ رد ءَ یک راستیں آئرلینڈ ءِ ٹھینگ ءَ پہ ھوار بوّگ ءَ گوں بندوک اِنت، نانکہ درملکی راجکاریں فارمولھانی دروگیں ھدایانی دیمھونیانی دروشم ءَ تباہ کاری ءُ کُوکار ءُ جّگا ءِ تہ ءَ اِنت۔ لیکہ داں ھما وھد ءَ کارآمد ءُ پائدگ مند نہ اِنت دانکہ اے مئے ھستیں راہ ءَ رژناہ مہ کنت، اگاں نہ اے تھنا یک وتسریں جزبگیں، ءُ بدراہ کنوکیں وسیت اِنت۔ ما درستاں گوں آئی ءَ وپادار بئیگی اِنت کہ ھما مئے راجی لیکہ اِنت — شائریں سرگشتنانی آئرلینڈ، ءُ باندات ءِ آئرلینڈ کہ یک روچے جوڑ بیت — ھما وڑ ءَ کہ مئے ڈیھ بیتگ ھما الکاپیں دروشم ءَ، یک برے پد ءَ بیت کنت، ءُ سرجمیں آجوئی ءِ دروشم ءَ کہ آ تھنا وت وتی تہ ءَ یک مزنیں گھتری ءُ شرتری اِنت۔ پرچہ کہ اے لیکہ داں انگت یک راستی یے نہ اِنت، مارا گوں ایشی ءَ وپادار بوّگی اِنت، ءُ اِیشی ءِ ھاتر ءَ مئے وپاداری گوں اے گپ ءَ بندوک اِنت کہ ما وتی جند ءِ تہ ءَ ءُ وتی اھد ءَ اِیشی ءَ یک راستی یے جوڑ بہ کنیں۔ اے آجوئی ءِ منگ کہ مارا ادا ءُ انی رس اتگ، اے راستیانی منگ اِنت ءُ راجی لیکہ ءَ گوں وپادار بئیگی اِنت، انچُش کہ ما گوں اے لیکہ ءِ گِرگ ءِ ھاتر ءَ جوانیں کردگاری گامگیج زیریں۔ ما آجوئی ءِ نِکان دزگپتگ، ءُ اے آجوئی ءَ کارمرز کنان ءَ یک راستیں آئرلینڈ یے ءَ دروری آئرلینڈ ءِ دروشم ءَ ٹھینگ ءِ ھمک کوشست ءَ گوں ایمانداری ءَ کنیں کہ ھمائی نزیک ءَ چہ نزیک تَر بہ بیت۔ مارءَ داں انگت نہ رس اِتگ، ءُ نانکہ اے وھد ءَ رات کنت، ( ھتمن پہ وتی راستی لیکہ ءَ پہ وتی ھاسیں ءُ پرارزشتیں شئے آنی ندر کنگ ءَ ابید رست نہ کنت)۔ راجکاریں راج مستری۔

اگاں مارا آ رس اتگ اَت ھم، پد ءَ ھم اے المی نہ اِنت کہ ما وتی راستیں مکسد — یک گائلک آئرلینڈے ءِ نیمگ ءَ ترندی ءَ گوں جُنزگ لوٹ ایت۔ اگاں ما اے زند ءِ تہءَ شئے ءِ گرگ لوٹ ایں گُڑا مارا گواچن ءَ گوں راست بوّگ لوٹ ایت، مارا گوں وتی لیکہ ءَ ایماندار بوّگ لوٹ ایت، اگاں ما کجام ھم لائکیں چیزے دست ءَ آرگ لوٹیں۔ آئرلینڈ کہ گوں آئی ءَ ما ایمانداریں، کہ آئی ءِ ھاتر ءَ ما ستک داریں ءُ وپاداریں، آ ھما لیکھی آئرلینڈ اِنت، اِیشی ءِ بزانت ایش اِنت کہ پہ آئی ءَ مدام جھد کنگ ءَ مدام شئے ءِ ھست اِنت۔ راستیں ستک میلو ڈرامائی دروشم ءَ بجگ اگاں کجام دروگیں شئے ءِ ھاتر ءَ وتی ندر کنگ ءِ تہ ءَ نہ اِنت، یا اگاں ھشکیں دانک ءُ رسمی کارانی ھاتر ءَ، کہ ھالیک اَنت، ءُ کہ آ بیت کن اَنت، بلے ھما لوگ کہ نوک روپگ ءُ سمبھینگ بیتگ کہ ایشی ءِ تہ ءَ بھت بدتریں شیتان پُترتگ اَنت۔ مئے اوست ءُ واھگانی ترندیں سوبمندی ءِ ھاتر ءَ راستیں گمانانی ھاتر ءَ مھکمیں گام، سنگینیں کوشست، یک سنگ ئے سر ءَ سنگ ءِ ایر کنان ءَ ماڑی ءِ ٹھینگ ءِ کوشست ءِ بہ بیت کہ آ راستیں ءُ دروری نمونگ ءِ رد ءَ بہ بیت اِنت۔

اے پئیم ءَ، گوستانک ءِ سرگشتناں گوں وپاداری ءِ پجیگ ءَ، ءُ باندات ءِ ھیالاں گوں ما وتی زمانگ ءَ ھرچی کہ کُت کنیں، اگاں اے تھنا روچے یک کسانیں بھرئے ءَ چہ گیشتریں کار ءِ دروشم ءَ چارگ بہ بیت گُڑا اے گیشتر ھاس ءُ مزن شان جوڑ بیت اِنت۔ اے ھما جاہ اِنت کہ اود ءَ مئے آئرش تب، گوست ءِ مھکمی، گوست ءُ باندات ءِ مزنی ءِ پدریں مارشت، زاتی دیم ھونی ءِ ھاتر ءَ جریدگی، وتی پدریچانی سر ءَ باور ءُ پھر، یک بیبدلیں کردگار ءِ پیلو کُرت کن اَنت، اگاں آ وتی پگری ءُ اکلاکی تاکت ءِ تہ ءَ پدراہ بہ بنت، ءُ ایرجیگی ءُ بے کردی ءِ ھما نزوریاں دیر بہ کُن اَنت کہ آ بازیں اھد ءَ چہ آیانی سر ءَ لڈگ بیتگ اَنت۔ راج ءَ آیانی راستیں ءُ الکاپیں کردار پیش دارگ بہ بیت: وتی دلیری، مھکمی، پدارھیں گشادیں پھم، وری راجی لیکہ ءِ ھذمت ءَ پہ آیانی پھر ءُ شان بوّگ انُچش کہ مئے سوب مارءَ پرمائیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کیریبئن ءَ ھیٹی ءَ امریکہ ءِ جھمنندیں نرس ءُ آئی ءِ زھگ آوار جنگ بیتگ اَنت امریکہ ءِ مھکمہ ھارجہ ءِ گوشگ اِنت آ ھیٹی ءِ واکداراں گوں رھوت ءِ توک ءَ اِنت-

اے وئیل امریکہ ءِ سرکار ءِ گوشگ ءَ ھما گامگیج ءَ لھتے روچ پیش دیم ءَ اتکگ بیتگ کہ امریکہ ءَ نیزگاری ءِ گیش بوگ ءُ پھریزگ ءَ ڈیھ ءَ گیر زروری اسٹاف ڈیھ ءَ یل کنگ ءِ ھکم داتگ ات
مسیھی ءِ یک کمکی ٹولی ایل روئی ھیٹی ءَ وتی ویب سائٹ ءَ گوشتگ کہ نرس ایلکس ڈروسین ول ءُ آئی ءِ زھگ پشمبے ءِ روچ ءِ سھب ءَ ھیٹی ءِ بنجاھی شھر پورٹ او پرنس ءِ نزیک ءَ آوار جنگ بیتگ اَنت-

آوار جنگ بیتگیں نرس اے کمکی ٹولی ءَ سیادی داروکیں ڈائریکٹر ءِ زال اِنت-

ھال سف کنوکیں ادارہ اے ایف پی ءِ رد ءَ ٹولی ءَ گوشتگ کہ مات ءُ زھگ ءَ ایل روئی کیمپس ءَ مئے کمیونٹی ءِ منسٹری ءَ وتی کرد ءَ پیلو کنگ بیتگ اَنت-

یل روئی ٹولی ءَ گوشتگ کہ ایلکس یک باز کمکار ءُ مھر کنوکیں مردمے بیتگ ءُ آئی ءَ ھیٹی ءِ وتی لوگ سرپد بیتگ ءُ آئی ءَ ھیٹی ءِ مردمانی گون ءَ سک مھر بیتگ-

زانگ بہ بیت ھیٹی ءَ بدنامیں زمانگ ء گینگ 400 مازوو امریکہ ءَ سیادی داروکیں عیسائی مبلغینانی آوار جنگ ءَ ھوار بیتگ –

روکپتی بلوچستان ءِ بنجاھی شھر زاھدان ءَ یک بندیگیں مردمے پاھو دیگ بیتگ –

پاھو دیگ بیتگیں مردم ءِ پجار چِل ءُ سَے سالی ئیں بیداللہ گورگیج ء آقا مھمد ءِ نام ءَ زانگ بیتگ –

اھوالانی رد ءَ بید اللہ ایرانی سال چاردہ سد ءَ نشہ ءِ باپاری ءِ بھتام ءَ دزگیر کنگ بیتگ ءُ ایرانی انکلاب ءِ آمیدگس ءَ آئی ءِ سر ءَ پاھو ءِ ھکم داتگ بیتگ-

اھوالانی رد ءَ بید اللہ ءِ کھول ھال دیگ نہ بیتگ ءُ پیسر ءَ آ پاھو ءِ ساد ءَ گٹگیر کنگ بیتگ-

اھوالانی رد ءَ گوستگیں روچ ءِ سھب ءَ بید اللہ ءِ پاھو دیگ ءَ پد آئی ءِ کھول اھوال دیگ بیتگ کہ بیا ات وتی مردم ءِ لاش ءَ دستیگ بہ کن ات-

زانگ بہ بیت روکپتی بلوچستان ءَ مردمانی یکشلیں پاھو دیگ ءِ درچ بازیں وھداں چہ برجاہ اَنت ، انسانی ھکانی گلانی نیمگ ءَ یکشل ءَ ایران ءِ اے کارنامہ ءِ سر ءَ ایرادی ھست اَنت-

سربوتگیں ھالانی رِد ءَ بلوچستان ءِ دمگ نوشکی، ڈیرہ مراد جمالی، ڈیرہ بگٹی، پنجگور ءُ ھب ءَ تیرگواری ءُ دگہ وئیلاں زھگے ءَ ھوار ھپت مردم بیران بوتگ انت-

گیشیں ھالانی رِد ءَ نوشکی ءَ ناشناسیں سلاہ بندیں مردماں دو مردم تیرباران کُتگ ءُ کشتگ انت –

تیرگواری ءِ وئیل نوشکی ءَ بس اڈے ءِ سر ءَ بوتگ – پولیس ءِ گوشگ انت کہ بیران بوتگیں مردمانی پجار بابو حمید ماندائی ءُ شفقت ءِ ناماں چہ بوتگ انت –

تنی وھدی وئیل ءِ درگت ءَ سرجمیں ھال نہ اتکگ انت بلے ھمے گوشگ بوگ ءَ انت حمید گوست ءَ بلوچ آجوئی لوٹوکیں سلاہ بندیں گلے ءَ گوں بندوک بوتگ کہ پدا رند ءَ پوج ءِ دیم ءَ آئی ءَ وتی سلاہ دور داتگ انت ءُ باجو بوتگ –

ھمے وڈ ڈیرہ مراد جمالی ءَ سلاہ بندیں مردمانی تیرگواری ءَ یک مردمے بیران بوتگ –

اے وئیل ڈیرہ مراد جمالی ءَ بانیڑی ءَ پولیس گس ءِ نزیک ءَ بوتگ کہ سلاہ بندیں مردماں یک مردمے تیر باران کتگ ءُ کُشتگ – ، بیران بوتگیں مردم ءِ جون پہ اژدری چار ءُ ٹپاس کنگ ءَ نادراھجاہ ءَ برگ بوتگ ءُ پد کھول ءِ دست دیگ بوتگ –

چہ بلوچستان ءِ باپاری شھر ھب ءَ ھال انت کہ پولیس کارمندے ءَ وتی سر ءَ وت پٹرول پراِتکگ ءُ وت ءَ مانداشتگ – وتکشی کنوکیں کارمندے پجار سپاھی عبدالحمید انت –

وئیل ءَ پد ھما دمان ءَ پولیس کارمند نادراھجاہ ءَ سر کنگ بوتگ بلے آئی ءَ درد نہ سگ اِتگ ءُ بیران بوتگ –

دومی نیمگ ءَ چہ کیچ ءَ ھمے ھال آیگ انت کہ مروچی ادار چار ءَ تربت ءَ کیچ کور ءَ جان شودگے میان ءَ چاردہ سالی زھگے آپ ءَ بُک اِتگ ءُ بیران بوتگ آئی ءِ پجار ظہور احمد ء نبی بخش ءِ نام ءَ بوتگ کہ آپسر ءِ نندوک انت –

ھمے وڈ ڈیرہ بگٹی ءِ دمگ پیرکوہ ءَ ھم یک مردمے آپ ءَ کپتگ ءُ بیران بوتگ- بیران بوتگیں مردمے نام ندیم بلوچزھی اِنت-

دومی نیمگ ءَ پنجگور ءِ دمگ پیرے جھلگ ءَ مردمے ءِ دہ روچ کوھنیں جونے دز کپتگ –

ھالانی رِد ءَ بیران بوتگیں مردمے پجار سفر خان ء رسول بخش اِنت کہ آ مستونگ ءِ ھند دشت ءِ جھمنند اِنت ءُ سادے آئی ءِ گُٹ ءَ لوپ بوتگ ءُ درچکے ءَ درنجوک بوتگ –

ھمے گوشگ بوگ ءَ اِنت کہ جون دہ روچ پیسری یے، کوش ءِ سوب انگت زانگ نہ بوتگ

متھدہ عرب امارات ءَ سیادی داروکیں ماہ ءِ سر ءَ روکیں سلطان النیادی ءَ امارات ءُ سعودی عرب ءِ نیمگ ءَ ماہ ءِ سر ءَ روگ ءِ مشن ءِ دیم ءَ آرگ ءَ گامگیج ءَ عرب ڈیھانی نیمگ ءَ یک نوکیں دورے –

عرب نیوز ءِ رد ءَ انٹرنیشنل اسپیس اسٹیشن ءَ گپ جنوکیں گچینی گلگدارے ءَ سلطان النیادی ءَ گوشتگ کہ آئی ءِ واستا یک پھری گپے لہ آ برز ءَ بال ءِ دنیا ءَ گام ایر کنوکیں بنداتی ارب اِنت کہ آئی ءِ رندپداں درست آیگ ءَ اَنت کہ ایشانی توک ءَ شھزادہ سلطان بن سلمان ، مھمد فارس ءُ حمزہ المنصوری ھوار اَنت-

سعودی عرب ءَ سیادی داروکیں شھزادہ سلطان برز ءَ بال ءِ سپر ءَ اولی عرب برز بال بیتگ کہ آئی ءَ نوزدہ سد ءُ ھشتاد ءُ پنچ ءَ امریکہ ءِ برز بال شٹل ’ ایسی ٹی ایس 51 جی‘ءِ سر ءَ مشن ءِ واستا رھادگ بیتگ – ھمے وڑ ءَ مھمد فارس برز بال ءَ روکیں دومی برز بال اِنت کہ عرب ءُ اولی شامی اِنت کہ آئی ءَ نوزدہ سد ءُ ھشتاد ءُ ھپت ءَ سویوز ٹی ایم تھری ءِ سر ءَ میر ھلائی اسٹیشن ءِ سپر کتگ بیتگ – ھمزہ المنصوری برز بالانی توک ءَ اولی اماراتی اِنت کہ آئی ءَ سال دوھزار ءُ نوزدہ ءَ انٹرنیشنل اسپیس اسٹیشن ءَ ھشت روچ گوازینتگ-

سلطان النیادی اے وھد ءَ سَے امریکہ ءِ جھمنند ءُ سَت روس ءِ جھمنندیں ھلا بازانی ھمراھی ءَ میان اُستمانء ھلائی اسٹیشن ءَ شش ماہ ءِ سپر ءَ اِنت-

سلطان النیادی ءِ برز ءِ سپر کنوکانی توک ءَ دومی اماراتی اِنت ءُ اسپیس واک چُشکہ برز ءَ چِل گامی اولی عرب دنیا ءِ برز بال اِنت-

آئی ءَ وتی ھلائی مشن ءِ بارو ءَ گپ کنان ءَ گوشتگ کہ ھلائی پٹ ءُ پول ءَ دیم ءَ برگ ءِ واستا انسانی جھدانی بھر مند بیگ ءِ واستا اسٹیشن ءَ شش ماہ ءِ گوازینگ گچینی اَنت اے عرب دنیا ءِ واستا الم یک نوکیں دورے بیت اِنت-

سعودی عرب ءُ متھدہ عرب امارات ءِ ٹیکنالوجی ءُ جانسلامتی پٹ ءُ پول ءِ ھواری ءَ وتی وتی ھلائی بنجلاں زرکاری کنگ ءَ اَنت-

سعودی ھلائی ایجنسی ءِ بنھشت چار سال ءَ پیش شاھی پرمان ءِ ھکم ءَ کنگ بیتگ دانکہ راھداری جیڑہ ، پٹ ءُ پول ءُ ڈویلپمنٹ ءُ میان استمانی زرکاری ءِ لس کمپنیاں گیش بہ کن اَنت-

ڈیھ ءِ سرکاری پوڑی ءَ ھلوکیں ھلائی نیاد ءَ دیم ءَ ارگ ءُ دنیا ءِ بازیں ھلائی ایجنسء ، ھلاباز کمپنی ، ءُ گچینی شھدربرجاھانی گون ءَ وتی کمک ءَ دیم ءَ مسامی بیتگ-

ھمے سال ءِ بیست ءُ دو مئی ءَ سعودی عرب ءَ سیادی داروکیں ریانہ برناوی ءَ ھلا ءِ سپر کتگ ءُ اولی عرب زالبول بوگ ءِ راجدپتر نکش کتگ ھمے وڑ سعودی فائٹر پائلٹ علی القرنی ءَ لس مشن ءِ سر ءَ انٹرنیشنل اسپیس اسٹیشن ءِ سپرے کتگ-

ھمے وڑ ءَ سال دوھزار ءُ ھبدہ ءَ متھدہ عرب امارات ءِ نائب سروک ءُ سر وزیر شیخ مھمد بن راشد المکتوم ءَ ھما وھد ءَ نائب سپریم کمانڈر ءُ انیگیں شیخ بند زاید النھیان ءِ ھواری ءَ ھلا بازی ءِ نیاد دیم ءَ آورتگ-

امارات ءِ اولی ھلائی مشن ءِ واستا سلطان النیادی ءِ گچین کنگ ءَ چار ھزار امیدواراں گچین چِتگ –

النیادی ءَ ھمے اُمیت درشان کنان ءَ گوشتگ کہ آ عرب ھلابازی ءَ آیوکیں پدریچ ءَ سانمند کنت اِنت ءُ میانی دنیا ءِ واستا ھلائی نیادانی نوکین روچ ءُ رژن ءِ تالانی ءَ دیم ءَ بران کن ایں-

سرمچارے ءِ زندگ بوگ

نبشتہ کار : شیردل بلوچ

دی بلوچستان پوسٹ

انچوش گوش اَنت، شھید نہ مرتگ ءُ زندگ اَنت، آیانی سسا تاں جھان ھست اِنت مان ایت ءُ وت گیر آرگ بنت، ھمُک شھید ءِ زند چہ آئی ءِ شھید بوگ ءَ ھون ءِ پِٹّے گلزمین ءَ کپگ ءَ رند بندات بیت، کردار ئِے گندگ ءُ دیم ءَ کاینت، شھیدے ءِ نام راجدپتر ءَ پہ ابدی مان بیت، بامردی ءِ کردار تاریک ءِ بھرے بنت، پہ ایدگراں رھشونی ءَ پَشت کپ اَنت، بنی آدم ءَ را چوناھا یکروچے ءَ مرگی اِنت، وتی دائمی جاہ ءَ روگی اِنت، جْوانیں کردار ءِ ھُدابند ھچبر نہ مر ایت، نمیران بیت، گڑا انسان ءَ را جْوانیں کردار مرگ ءَ رند زندگ کن اَنت، نام ئِے گرگ بیت، پہ سرڈگار ءُ راج ءِ پھازگ ءِ واستا کولیگ بوتگیں پُسگ دائمی گیر آرگی اَنت، انچوش گوش اَنت، شھیدانی مرگ ءُ رِتکگیں ھون راج ءَ را زندمان بکشا ایت، ھما راج دنیا ءِ تہ ءَ گار بنت کہ آ چہ وتی شھیدانی داتگیں دیمھونیاں شموشکار اَنت، شھیدانی گیر آرگ سسا، ھمگرنچی ھمک کس ءِ کومی زمہ واری ءُ زندگیں راجانی زندگ بوگ ءِ چیدگ زانگ بیت۔ من انچیں تمرد ءُ مھروانیں زمین زادگے ءِ بابت ءَ وتی ھیال ءَ درشان کنگ ءَ آں، آئی ءِ کردار ءِ سرجمیں کسہ ءِ آرگ انچوش آسانی ءَ نبیسگ بوت نہ کنت، اگاں کسے چہ وتی ءُ وتی کٹھم ءِ زاتی ئیں واھشتاں کربان بہ کنت، آ پہ راج ءِ وشیاں کولیگ بہ بیت گڑا ھمائی ءِ سسا منّگ بیت ءُ ھرچ مردم ءِ واھگ بیت ءُ آ وت ابدمان بیت،گڑا چہ ھمایاں یکے نمیرانیں سنگت ءُ راج ءِ پُسگ” آرپ جان پنام شکاری بلوچ اِنت، انچیں سوھوئیں سنگتے بوتگ ھرچ سنگت ءَ را گیر کیت، اگاں آ گوں سنگتاں یکجاہ سپرے ءَ رپتگ، گڑا واھگ ئِے ھمے بوتگ سپر دْراج بہ بیت، وش اِنت چہ آئی ءِ مسکرائی ءُ کندگ ءُ ٹھکانی توار ءَ سپر ءِ دَمبرانی دور اُوشتاتگ ءُ پہ ھبکائی چار اِیت، کدرت ءَ چونیں ازیمیں انسانے ٹھینتگ…؟ چنکس گرانیں ڈبہ کوپگان ئِے زُرتگ اَنت، مرگ ءِ دیم ءَ کنزان ءُ انگت، ھچی پریشانی ئِے نیست اَت، انگت دیواناں چاپ ءُ ھندگ اِنت، آجوئی ءِ جنگ ءِ پڑ ءَ انچیں پُر آشوبی ئیں سنگت ءِ ھمراھداری لوٹ اِیت، دلساپی گرانیں سپر ءَ پند ءَ آسان کنت ءُ مردم ءَ دمبرگ ءَ نیل اِیت۔ بہ گند ئے کہ من ” آرپ جان پنام شکاری پیسر ءَ نہ دیستگ اوں اگاں دیستگ گڑا پجاروکی ئِے نہ بوتگ آں، بلے!! دو ھزار پانزدہ ءُ شانزدہ ءَ رند شَرّ دیستگ ءُ پجاروک ئِے بوتگ آں، مُدام کہ دیستگ اَت بچکندگ ءَ اَت، وشدل ءُ مسکرائی تبیں سنکتے اَت، دلیر ءُ مھکمیں انسانے اَت، توک ءَ ئِے اُوپار کنگ ءِ ھاٹیگ باز ھست اَت، پہ ھمُک سنگت ءَ مھروان اَت۔

آرپ جان پنام شکاری بلوچ ءِ مکھیں مات وتی تنگھیں بچ ءِ گڈی جاہ ءَ شُتگ اَت، گڑا تامرے شنگ اَت، شیرزال ءِ گپّاں نزوری مان نیست اَت، شھیدیں بچ ءَ را سِتک شانی پدر کتگ ءُ پھربندگ ءَ اَت، گڑا انچیں ماتانی گپّ مان راجدپتر ءَ پَشت کپ اَنت، پہ لگوراں شگان اَنت ءُ بامردانی جزبگ اَنت، زندگیں راجانی اُوست اَنت، آجوئی ءِ مستاگ بنت، چُشیں گیرتمَنْدیں ماتانی راج ءُ بچانی سرڈگار ءَ را جھان ءِ ھچ وڑیں زوراکے پہ دائمی کبزہ ءَ داشت کرت نہ کنت، زوراکی ءِ سْیاھیں شپ الم ءَ یکروچے آسر بنت ءُ آجوئی ءِ رُژنائیں بام ءِ روچ سر کش اِیت، سرڈگار ءِ شھیدانی دیمھونی ءِ مُز ءَ بلوچ راج ءَ آجوئی رس اِیت۔

آرپ جان ءُ آئی ءِ ھمراھانی جدائی راج ءُ سنگتاں تور اِتگ، ٹوھیں تاوانے زانگ بیت، سرمچارے ءِ زندگ بوگ زورگریں ڈیھ ءِ مرگ زانگ بیت، بلے۔۔! پہ راجی آجوئی ءِ گرگ ءَ لج ءُ ننگ ءِ پھازگ ءَ پدریچ ءِ وشھالی ءَ سر کولیگ کنگ ءُ ھون ریچگ المی اِنت ءُ دیمروی ءِ زامن اَنت۔

نمیرانیں رھشون چیرمیں گلام مھمد گوش ایت: ”دراھیں نادراھیانی الاج آجوئی اِنتایردستی دراھیں نادراھیانی روتگ زانگ بیت“ ایردستی ءِ روتگ ولگوج کنگ ءَ راج ءَ یکمشت بوگ لوٹ اِیت۔شھیدانی ارمان پیلو کنگی اِنت ۔

نمیرانیں: آرپ جان پنام شکاری ، آسمی وپا پنام شھداد ، سیٹ ابدلسمد پنام دینار ، شھمیرجان پنام سپرھان ، جاود جان پنام اُمرجان ، الی جان پنام کمک بلوچ ءُ سوچکان ءُ سرڈگار شھیداں سھریں دروت ندر کناں ۔

آجوئی زندگ بات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ کیچ دمگ ءِ بنجاھی شھر تربت ءَ لشکریانی نیمگ ءَ جتگیں بُتگیِر ءُ موبائل ٹاور ءِ سرءَ سلاہ بندیں مردماں اُرش کُتگ۔

اھوالانی ردءَ گوستگیں شپ ءَ تُربت ءِ ھند ڈنُک ءَ پاکستانی پوج ءِ نیمگ ءَ جنگ بیتگیں بُتگیِر ءُ یوفون موبائل شرکت ءِ ٹاور ءِ سرءَ ناشناسیں سلاہ بندیں مردماں مزنیں سلاھاں گوں اُرش کُتگ ءُ تاوان داتگ اَنت۔

زانگ بہ بیت ھمے دمگانی تہءَ لشکریانی سرءَ یکشلیں اُرشاں پد گوستگیں ماہ ءَ لشکریاں ھمے ھنداں سئے مزنیں بُتگیِر جتگ اِت اَنت۔

بُتگیِرانی جنگ ءَ پد ھندی مردماں اے کرد وتی زاتی زند ءُ وتی اِھوت ءِ تہءَ دزمانجنی سرپد بیتگ اَت ءُ وتی زھرشانی ھم درشان کُتگ اَت البت بُتگیِر پدا ھم دیر کنگ نہ بیتگ اَنت۔

راسک ءَ آوار جنگ بیتگیں ورنا گوستگیں روچ ءَ یل بیتگ ءُ وتی گس ءَ سر بیتگ-

روکپتی بلوچستان ءِ دمگ راسک ءَ ایرانی چیریں ادارھانی دست ءَ آوار جنگ بیتگیں ورنا یل بیتگ ءُ وتی لوگ ءَ سر بیتگ –

یل بیتگیں ورنا ءِ پجار حسین آسکانی ء بابو ءِ نام ءَ زانگ بیتگ ءُ چراگان راسک ءِ نندوک اِنت –

اھوالانی رد ءَ حسین آسکانی چار ماہ ءَ ماں زاھدان ءِ زندان ءَ بندیگ بیتگ ءُ گوستگیں روچ ءَ زمانت ءِ سر ءَ یل کنگ بیتگ –

اھوالانی رد ءَ حسین آسکانی چار ماہ ءَ پیش ما راسک ءَ دگہ نودربرانی ھواری ءَ آوار جنگ بیتگ ءُ پد ءَ آ دگہ مردم یل بیتگ اَنت بلے حسین داں چار ماہ ءَ زندانی بیتگ-