TBP Balochi

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مروچی کیچ ءِ دمگ سامی ءَ سی پیک دگ سر ءَ زورگریں پاکستانی پوج کاروان ءِ یک چیرکتگیں بمب اُرشے ءَ نشانگ کتگ-

جارکش ءَ گْوشتگ کہ مئے سرمچاراں گشکور، سامی پنڈوکی کور ھند سر ءَ سی پیک دگ سر ءَ دُژمنیں پوج ءِ چار گاڑیانی ھواریں کاروان ءِ یک گاڑی یے ریموٹ کنٹرولڈ بمبے ءَ نشانگ کتگ، تراک آسر ءَ دو دُژمنیں کارندہ ھما دمان ءَ مرتگ اَنت ءُ کم چہ کم چار کارندہ ٹپی بیتگ اَنت وھدے کہ گاڑی سرجم ءَ تباہ بیتگ-

جارکش ءَ دیمتر ءَ گْوشتگ کہ بلوچ لبریشن آرمی ءِ سرمچاراں یازدہ جنوری 2024 ءَ یک بیڑے ءَ بلیدہ ءِ دمگ گِلی ءَ زورگریں پاکستانی لشکر ءِ واستا راشن بروکیں گاڑی داشت ءُ راشن وتی دستیگ کتگ اَنت- دمگی مردمانی بوگ ءِ سبب ءَ ڈرائیور کڈن کتگ ءُ یل کتگ اَنت-

بی ایل اے اشی ءَ ساری ھم دمگی مردم کڈن کتگ اَنت کہ آ دُژمنیں پوج ءَ راشن پُجّارینگ ءَ پھریز بکن اَنت- اگاں ناں آ وتی جانی ءُ مالی تاوان زمہ وار وت بنت-

جارکش ءَ گْوشتگ کہ بلوچ لبریشن آرمی اے دوئیں اُرشانی زمہ واریاں منّ اِیت اے کول کنت کہ زورگریں پوج ءِ سرجمیں ءَ دراھگ ءَ تاں مئے اُرش برجاہ بنت-

بلوچ چکچینی ءُ زورانسری آوار جنی بگیری ءَ برجاھیں اسلام آباد ءِ نندانک ءِ پلامرزی ءَ مروچی بلوچستان دمگ مند، تمپ، کھڈان، منگوچر، گوادر ، پسنی ،اورماڑہ ءُ جیونی گڈانی ءَ زھرشانی ءُ روانک کشگ بوتگ انت –

بلوچ یکجھتی کمیٹی ءِ نیمگ ءَ بلوچ چکچینی ءِ بگیری ءَ برجاھیں اے زرمبشت ءِ سیمی فیز ءَ بلوچستان ءِ جتا جتائیں ھند ءُ دمگاں زھرشانی روانک کشگ بوگ انت ءُ ھمے درچ ءَ برجاہ داران ءَ مروچی ھم بلوچستان ءِ تیاب دپی دمگاں ھوار دگہ ھند ءُ دمگاں زھرشانی ءُ روانک کشگ بوتگ کہ اودا مزنیں کچے ءَ زھگ ءُ زالبولاں ھوار مردم دگانی سر ءَ در اتکگ ءُ بلوچ چکچینی ءُ زورانسری آوار جنی ءِ بگیری ءَ نارہ جتگ ءُ زھرشانی کتگ –

زانگ بہ بیت بلوچ چکچینی ءِ بگیری ءَ بلوچ یکجھتی کمیٹی ءِ نیمگ ءَ برجاھیں اے زرمبشت ءُ اسلام آباد ءِ نندانک ءَ مروچی پنجاہ ءُ چار روچ سرجم بوتگ انت – اے درگت ءَ بلوچ یکجھتی کمیٹی ءِ جارکش ءَ چاگردی ترامجاھاں وتی درشانے ءِ تہ ءَ گوشتگ کہ مروچی اے زرمبشت ءَ پنجاہ ءُ چار روچ سرجم بوتگ انت ، زوراکیانی بگیری ءَ مئے جنگ برجاہ انت، گھگیری ءِ برانز چست بوتگ انت مئے راج ءِ زالبول گھگیری ءِ چیدگ جوڈ بوتگ انت کہ آیان ھر وڈیں اڈاندانی دیمپانی کتگ ءُ زوراکیانی بگیری ءَ دیم ءَ انت –

جارکش ءَ گوشتگ کہ اے زرمبشت بلوچانی نمائندگ انت ءُ ریاست ءِ نیمگ ءَ بلوچانی سر ءَ زوراکی ءُ چکچینی ءِ ھلاس کنگ ءِ ھاتر ءَ انت – مئے یکجاھیں گھگیری برجاہ انت بے شک اے زرمبشت ءَ ما سوبمند بہ ایں –

کیچ ءِ بنجاھی شھر تربت ءَ گوستگیں سوبائی وزیر اصغر رند ءِ گِس ءِسر ءَ دزبمب اُرش ءِ کنگ بوتگ –

پولیس ءِ رِد ءَ ناشناسیں مردماں اوورسیز کالونی تربت ءَ پیپلز پاٹی ءب امیت وار ءُ گوستگیں سوبائی وزیر میر اصغر رند ءِ گِس ءِ سر ءَ دزبمب ءِ چگل داتگ کہ گِس ءِ پیشگاہ ءَ کپتگ ءُ ترک اِتگ چریشی ءَ اصغر رند ءں برات شہباز زدگ بوتگ –

اُرش ءَ پد پوج ءَ دمگ انگیر کتگ ءُ پٹ ءُ پول کتگ –

زانگ بہ بیت گوستگیں روچاں ءَ تربت ءَ ناشناسیں مردماں مسلم لیگ نون ءِ امیت وار ءُ قومی اسمبلی گوستگیں سنیٹر اسلم بلیدی ءِ سر ءَ تیرگواری کتگ ءُ زدگ کتگ ات –

سربوتگیں ھالانی رِد ءَ سی پیک دگ ءِ سر ءَ پاکستانی پوج ءِ کاروان ءِ سر ءَ تراکناکیں شورواں گوں اُرش کنگ بوتگ –

ھالانی رِد ءَ بلوچستان ءِ دمگ کیچ ءِ ھند سامی ءَ ناشناسیں مردماں سی پیک ءِ دگ ءِ سر ءَ تراکناکیں شورو کل کتگ ءُ پاکستانی پوج ءِ کاروان نشانگ کتگ کہ پاکستانی پوج ءِ یک گاڑی ءِ تراکناکیں شوروانی زد ءَ.اتکگ ءُ چریشی ءَ.پوج ءَ جانی ءُ مالی تاوان رستگ –

دمگی اھوالکارانی رِد ءَ تراک پنڈوکی کئور ءَ سی پیک دگ ءِ سر ءَ بوتگ – تراک ءَ پد پوج ءَ سرجمیں راہ ءُ دگ بستگ انت –

سرکاری واکدارانی نیمگ ءَ اے درگت ءَ ھچ وڈیں درشان دیگ نہ بوتگ –

گوستگیں روچاں کیچ ءِ دمگ بلیدہ ءَ پاکستانی پوج ءِ سر ءَ بوتگیں یک اُرشے ءَ پنچ کارمند مُرتگ اِت انت ءُ وھدیکہ میجرے ءَ ھوار دو زدگ بوتگ اِت انت – اے اُرش ءِ زمہ واری بلوچستان لبریشن پرنٹ ءَ منّ اِتگ ات –

چار روچانی میان ءَ بلوچستان ءِ جتا جتائیں ھند ءُ دمگ تربت جھاؤ ءُ ھاران ءَ پاکستانی پوج ءُ گچین کاری نشانگ کنگ بوتگ انت اے اُرشانی تہ ءَ.گیشتر بلوچ آجوئی لوٹوکیں سلاہ بندیں گلاں منّ اِتگ انت بلے مروچی بوتگیں اُرش ءِ زمہ.واری ھچ گل ءَ نہ منّ اِتگ –

بلوچ آجوئی لوٹوکیں سلاہ بندیں گل بلوچ لبریشن آرمی مجید برگیڈ ءِ باسک پدائی درویش ءِ کستریں برات گل حمد مری نادراھی ءِ سوب ءَ بیران بوتگ –

اھوالکار ءِ رِد ءَ نمیرانیں درویش ءِ کستریں برات ھم جھد کار ءِ بوتگ ءُ گل حمد ءَ ھوار آئی ءِ بازیں مردمے چوش کہ زالبولاں ھم بلوچستان آجوئی ءِ لوٹ ءِ پد ءَ بیگواھی ءُ درانڈیھی ءَ ھوار وڈ وڈیں ازیت سگ اِتگ –

زانگ بہ بیت گل حمد مری نمیرانیں پدائی درویش ءِ کستریں برات ایں ءُ نمیرانیں درویش بی ایل اے مجید برگیڈ ءِ پدائی ارشکار ءِ بوتگ کہ آئی ءَ سال دوھزار ءُ یازدھے دسمبر ماہ ءَ ماں شال ءَ ارباب کرم خان دگ ءَ کشندہ ٹولی ءِ سروک شفیق مینگل ءِ گِسے سر ءَ پدائی اُرش ءِ کتگ کہ اے اُرش ءَ شفیق مینگل کلاھے رک اِتگ وھدیکہ کشندہ ٹولی ءِ کساس سِی ءَ گیش کارمند مُرتگ انت –

چاگردی ترامجاہ ایکس ءَ ڈاکٹر مھرنگ بلوچ ءَ یک درشانے ءَ گوشتگ کہ دوشمبے ءِ روچ ءَ 15 جنوری ءَ ما پاکستان ءَ میان اُستمان ءِ گوستگیں مشن ءِ چیف مشن میو ساتو، کہ پاکستان ءَ انٹرنیشنل آرگنائزیشن فار مائیگریشن ( آئی او ایم) ءِ چیف مشن اِنت،میان اُستمان ءِ ریزیڈنٹ کوارڈینیٹر آفیسر شاہ ناصر خان ءُ میان اُستمان ءِ مواسلاتی مشیر ڈاکٹر مریم شیخ ءَ گوں گند ءُ نند کتگ-

ماہ رنگ ءِ رد ءَ ما بلوچستان ءَ برجاھیں انسانی ھکانی لگتمالیانی کہ گیشتر زورانسری آوارجنی، ابید آمیدگسی پرمان ءَ کوش ءُ سرجمیں ڈیھ ءَ بلوچ ھکانی واستا پد جنوکیں گل ءِ پر ایمنیں مارچ کنوکانی ھلاپ ءَ کریک ڈاؤن ءُ نندانک ءِ مھلوک ءِ سر ءَ بیھارانی بارو ءَ سرپدی داتگ-

آئی ءَ مارا وتی پلامرزی ءِ ستکی داتگ ءُ گوشتگ کہ اے جیڑہ ءَ میان اُستمان ءِ سیکشن ءَ دیم دیگ بیت اِنت-

بلوچستان لبریشن فرنٹ ءَ وتی شنگ کتگیں درشان ءِ تہ ءَ گْوشتگ کہ مئے سرمچاراں آواران ءِ ھند جھاؤ، سیڑ ءَ دژمنیں پوج ءِ پیادگیں گشتی ٹولی ءِ سر ءَ اُرش کُرتگ کہ اُرش ءَ پوج ءِ پنچ کارمند مُرتگ ءِ دو ٹپی بیتگ۔

جارکش ءَ گْوشتگ کہ یکشمبے ءِ سُھب ءِ یازدہ ءِ نزیک ءَ بیتگیں اے اُرش ءَ نوکین ءُ وتکاریں سلاہ کارمرد کنگ بیتگ، چہ ایشی ءَ دژمنیں پوج ءِ پنچ کارمند جاھی مُرتگ ءُ دو سَک ٹپی بیتگ اَنت۔

جارکش ءَ گْوشتگ کہ زورگریں پاکستانی پوج ءِ سر ءَ سرمچارانی جوانمردیں اُرش انچوش ترسناک ءُ مزن اَنت کہ زورگریں پوج سرمچارانی اُرشانی زھراں لس آبادیانی سر ءَ مارٹر گولا آس دنت ءُ زراکی کنت۔

میجر ءَ گْوشتگ کہ یکشل ءَ برجاھیں بلوچ راجی آجوئی جنگ ءَ دژمنیں پوج سک زھنی ءُ سَسّائی نادراھی ءِ آماچ کُرتگ۔ دژمنیں پوج بازیں جنگاں کُشگ بیتگیں وتی کارمندانی مرگ ءَ چیر دنت ءُ وتی جھل کپتگیں ھاٹیگ ءِ برجاہ دارگ ءِ بے سوبیں جُھدے کنگ ءَ اِنت۔

جارکش میجر گْوھرام بلوچ ءَ گْوشتگ کہ بلوچستان لبریشن پرنٹ اے اُرش ءِ زمہ واری ءَ منّ ایت ءُ راج ءَ گْوشگ لوٹ ایت کہ بی ایل ایپ پہ وتی سرڈگار، راجی ھستمان ءُ آجوئی ءَ یکشلیں جُھد ءَ وتی راجی پرز سرپد بیت ءُ اے اُرش داں بلوچستان ءِ آجوئی ءَ برجاہ بنت۔

سربوتگیں ھالانی رِد ءَ پاکستانی پوج ءُ چیریں ادارھانی کارمنداں بلوچستان ءِ دمگ آواران کولواہ ءَ دو مردم آوار جتگ ءُ بیگواہ کتگ انت –

گیشیں ھالانی ءِ رد ءَ پاکستانی پوج ءُ چیریں ادارھانی کارمنداں مروچی سھب ءَ آواران ءِ دمگ کولواہ ءَ گسے ءِ سر ءَ بیڑ برتگ ءُ زوراکی کنان ءَ دو برات زورانسری آوار جتگ ءُ بیگواہ کتگ انت – آوار جنگ بوتگیں مردمانی پجار رسول بخش ء گلام ءُ کریم بخش ء گلام ءِ نام ءَ بوتگ انت کہ ھردو کماشیں مردم اَنت ءُ لال جان بازار، سنڈم گیشکور ءِ جھمنند اَنت –

دمگی اھوالکار ءِ رِد ءَ پوج ءَ گِس پٹ ءُ پول کتگ انت مردم ھم لٹ شاپ کتگ انت –

زانگ بہ بیت بلوچ چکچینی ءُ زورانسری آوارجنیانی بگیری ءَ یک نیمگ ءِ پاکستان ءِ بنجاھی شھر اسلام آباد ءَ بلوچ یکجھتی کمیٹی ءُ بیگواھیں مردمانی کھول ءِ زھرشانی برجاہ انت ءُ مروچی پنجاہ ءُ دو روچ سرجم بوتگ انت – وھدیکہ دومی نیمگ پوج ءِ نیمگ ءَ زورانسری اوار جنیانی درچ یکشل ءَ برجاہ انت –

چاریگ

Paul Redmond, the fourth man پال ریڈمنڈ، چارمی مردم:

نبشتہ کار: حاجی خان بلوچ

چارمی بھر

دی بلوچستان پوسٹ

سی آئی اے ءِ وتی توک ءَ کے جی بی ءِ چاریگ ءِ شوھاز: اے CIA ءِ 1990 ءِ نیام ءُ گڈّسر ءِ شوھاز کہ فروری 1994 ءَ ایلڈرچ ایمس Aldrich Ames ءِ دزگیری ءَ پد ءَ وتی تہ ءِ یک سکیں ھترناکیں کے جی بی چاریگے ءِ کسہ انت۔

پال ریڈمنڈ سی آئی اے ءِ لیجنڈری ءُ چاریگ گروک ءُ ھمے وھد ءَ کاونٹر انٹیلیجنس ءِ سینئر مینجر بوتگ۔

ھمے روسی چاریگ ءِ دزگیری ءِ ھاترا آیاں گرے سوٹ GRAYSUIT ءِ نام ءَ سی آئی اے ءُ ایف بی آئی ءِ ھواری ءِ پٹ ءُ لوٹ بندات کتگ ءُ ھمے پٹ ءُ لوٹ چہ وتی تہ ءَ ھما مردم ءَ چہ ھلاس کنگ بوتگ کہ آ ھمیشی ءِ شوھاز ءَ ات انت۔

فروری 2001 ءَ روبرٹ ھینسن Robert Hanssen نامیں روسی چاریگے دزگیر کنگ بوتگ کہ آ سی آئی اے ءُ ایف بی آئی ءِ ھواریں پٹ ءُ لوٹ ءَ ایف بی آئی ءِ سپروائزری اسپیشل ایجنٹ ات۔ ریڈمنڈ اے وھد ءَ سی آئی اے ءِ سینئر منیجر ات کہ آ گرے سوٹ ءِ پوٹ ءُ لوٹ ءِ گر ءُ دار کنوک بوت۔ ریڈمنڈ وتی سر ءَ آیوکیں ھمک شواھدانی گر ءُ دار کنوک تھنا وت ات پمشکاں روسیاں ایشی ءِ رکینگ ءِ سک باز جھد کت ءُ ھمے کچ ءَ شت انت کہ وتی دگہ باز ایجنٹانی کربانی ھم داتگ۔ ریڈمنڈ ھمک رسد ءَ زانگ ءَ ات کہ پٹ ءُ لوٹ ءَ ایشانی کمک ءَ کنگ ءَ ات انت۔

اد ءَ اے جست پاد کیت کہ اگاں ریڈمنڈ ھمے چاریگ ات کہ آئی ءِ شوھاز بوگ ءَ ات گڑا پرچا آئی ءَ ھمے کمکارانی ھال روسیاناں سر نہ کت انت۔

زانتکاری ءَ ھمے زانگ بیت کہ دژمن ءِ تہ ءَ پترتگیں چاریگ وتی رکینگ ءِ ھاتر ءَ ھر ایوکیں مزنیں ھترہ ءِ بے اسر کنگ ءِ واستا گیر رنگ دابیں ھدّ ءَ ھم رو انت، ایشی ءِ مزنیں درور کم فلبی Kim Philby ءِ کونسٹانئین وولکوف Konstantin Volkov ءِ دھوکہ دیگ انت۔

نومبر 1994 ءَ ریڈمنڈ ءِ نیمگ ءَ جوڑ کتگیں چہ پھریزی گامگیج ءَ line banner man کہ آ سی آئی اے  ءِ اسپیشل انوسٹییگشن یونٹ SIU ءِ چیف ات ءُ آئی ءَ ھوار ایس آئی یو ءِ دگہ دو افسر پارگ کت انت، پرچا کہ آیاں ریڈمنڈ ءَ ھوار سی آئی اے ءُ ایف بی آئی ءِ کاونٹرانٹیلی جنس ءِ مزنیں افسراناں ھما روسی چاریگ ءِ پروفائل دات انت کہ اے پروفائل ریڈمنڈ ءِ نیمگ ءَ اشارہ کنگ ءَ ات انت ءُ باکی افسر ھم ھمے پروفائل ءِ بنشت ءَ ریڈمنڈ ءِ سر ءَ سک دارگ ءَ ات انت۔

ریڈمنڈ کدی ھم گرگ نہ بوت ءُ آئی ءَ ریٹائرمنٹ ءَ پد ھم کے جی بی ءِ واستا ءَ چاریگی ءِ الزام رد کت انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ چکچینی ءِ بگیری ءَ پاکستان ءِ بنجاھی شھر اسلام آباد ءَ بلوچ یکجھتی کمیٹی ءُ بیگواھیں مردمانی کھول ءِ زھرشانی ءَ مروچی پنجاہ ءُ دو روچ سرجم بوتگ انت –

اسلام ءَ بلوچ درنگاز کنوکانی پلامرزی ءَ سرجمیں بلوچستان ءَ زھرشانیانی درچ یکشل ءَ برجاہ انت، مروچی سبی ءُ واشک ءَ مزنیں کچے ءَ مردم دگانی سر ءَ در اتکگ انت – سبی ءُ واشک ءِ زھرشانی ءَ زھگ ءُ زالبولاں ھوار بیگواھیں مردمانی کھول ھم ھوار بوتگ انت –

زھرشانی کنوکاں اسلام آباد ءِ بلوچ درنگاز کنوکانی پلامرزی کنان ءَ گوشتگ کہ ریاستی زوراکیانی بگیری ءَ برجاھیں اسلام آباد زھرشانی بلوچ راج ءِ توار ایں –

آئی ءَ گوشتگ کہ مروچی سرجمیں راج آیانی گوم ءَ اُشتاتگ ریاست ءَ لوٹ ایت سنجیدگی ءَ آیانی توار ءَ گوش بہ دار ایت بلے آیانی گوشدارگے بدل ءَ ریاست آیانی دیمپانی ءَ کشندہ ٹولی اسلام آباد ءَ یکجاہ کتگ انت –

آئی ءَ گوشتگ کہ زورانسری آوار جتگیں مردم یل کنگ بہ بنت کانود ءِ رِد ءَ آمیدگس ءَ پیش کنگ بہ بنت –

درنگاز کنوکاں گوشتگ کہ زورانسری آوار جنیانی درچ یکشل ءَ برجاہ انت – ھمک روچ بلوچ ورنا آوار جنگ بوگ ءَ انت وھدیکہ دومی نیمگ ءَ ریاستی وزیر نشتگ ءُ بھتام جنگ ءَ انت –

آئی ءَ گوشتگ کہ بلوچ راج ریاستی زوراکیانی بگیری ءَ یکجاہ انت درنگاز کنوک لوٹ کنگ ءَ انت کہ ریاستی زوراکی بند کنگ بہ بیت –

دومی نیمگ ءَ چہ گوادر ءَ ھمے ھال آیگ ءَ انت کہ گلدان ءَ بلوچ چکچینی ءِ بگیری ءَ برجاھیں زھرشانی ءِ پژدر ءَ دو ورنا ایف سی ءَ وتی بنجل ءَ لوٹارینتگ انت گوانکو دستیگ کتگ انت –

وھدیکہ وانگجاہ ءِ زھگ یکجاہ کتگ ءُ پہ زور پاکستان ءِ بیرک دست ءَ داتگ انت ءُ روانک کشگ پرماتگ انت – مروچی دمگی سرکاری چانیگ وار اکبر کلمتی ءَ زالبول لٹ کٹ کتگ انت –

بلوچ یکجھتی کمیٹی ءَ گوشتگ کہ بلوچ چکچینی ءِ بگیری ءَ گوستگیں پنجاہ ءُ دو روچ انت زرمبشت ءِ چلگ ءَ انت – اولی فیز ءَ تربت ءَ فدا چار راہ ءِ سر ءَ داں سیزدہ روچ ءَ نندانک برجاہ بوتگ ـ لوٹانی نہ منگ ءِ سوب ءَ اے نندانک زرمبشت ءِ تہ ءَ بدل کتگ ءُ زرمبشت ءِ دومی فیز ءَ تربت ءَ در اتکگ ءُ جتا جتائیں ھند ءُ دمگاں مارچ کنان ءَ اسلام آباد ءَ شتگ ایں – اے میان ءَ ھر ھما جاہ ءَ کہ کاروان روان بوتگ یک نیمگے مردماں مزنیں کچے ءَ وش اتک کتگ وھدیکہ دومی نیمگ ءَ ریاست وڈ وڈیں رپک ءُ ھنراں زرمبشت ءِ دارگ ءِ جھد کتگ بے بے سوب بوتگ ـ اسلام آباد سربوگ ءَ کاروان ءِ سر ءَ کریک ڈاؤن کتگ اشی ءَ ابید درنگاز کنوک وتی جاہ ءَ اشتاتگ انت پرچاکہ کہ اے گپ چہ کس ءَ چیر نہ انت کہ نوں ریاست ءِ زوراکء اوپار کنگ نہ بنت –

آئی ءَ گوشتگ کہ ریاست ءِ گیر سنجیدگی، زوراکیانی سوب ءَ زرمبشت ءِ سیمی فیز ءِ جار جنگ بوتگ کہ ھپت جنوری ءَ سرجمیں ملک ءَ زھرشانیانی درچ ءِ بندات کنگ بوتگ ءُ ھمے درچ ءِ برجاہ داران ءَ باند ءَ بولان، ھزدار، نال، گریشہ، وڈھ، ءُ ناگ ءَ زھرشانی ءُ روانک کشگ بنت –