TBP Balochi

عراق ءَ لوگی لٹ ءُ کُٹی ءَ دردناکیں جاورے دل ءَ پدرد کنوکیں کسھے ءِ دیم ءَ آیگ ءُ دل ءَ نہ سگکویں جاورے ودی کنت- یک جنک وتی پت ءَ یک ماھے ءَ داں زنجیراں بستگ ءُ بندیگ کتگ-

ھالانی سر بوگ ءَ پولیس ءَ گامگیج زرتگ ءُ جنک چہ پت ءِ زندان ءَ آجو کتگ-

العربیہ نیٹ ءِ رد ءَ عراق ءِ کمشنری کرکوک ءَ زنجیراں بستگیں اکس چاگردی ترامجاھاں شنگ بیتگ اَنت-

ایشانی توک ءَ گندگ بیت اِنت پولیس جنک ءَ آئی ءِ پد ءِ زندان ءَ اجو کنگ ءَ اِنت- کرکوک ءِ پولیس آپیسر ءَ نام پدر نہ کنان ءَ گوشتگ کہ چاگردی ترامجاھاں شنگ بیتگیں اکس راست اَنت ءُ جنک آجو کنگ بیتگ-

پولیس ءَ ھال سر بوتگ کہ یک جنکے لوگ ءَ زندانی کنگ بیتگ کساس یک ماھے ءَ داں جنک لٹ ءُ کُٹ کنگ بیتگ- لوگی سزا ءِ ھال ءِ سر بوگ ءَ پولیس عراق ءِ شھر ءَ سر بیتگ ءُ آئی ءَ جنک ءِ پاداں بستگیں مزنیں زنجیر بر اتگ ءُ جنک آجو کتگ-

پولیس ءَ جنک ءِ پت دزگیر کتگ ءُ کانونی پٹ ءُ پول ءَ پد کیس آمیدگس ءَ دیم دیگ بیتگ-

انسانی ھکانی گلانی رد ءَ سرجمیں ڈیھ ءَ لوگی جیڑاں لٹ ءُ کُٹی جاور گیش بوتگ اَنت کہ چریشاں زالبول، زھگ ءُ کماش لٹ ءُ کُٹ کنگ بوگ ےَ اَنت یک سالے ءِ وھد ءَ پانزدہ ھزار ءَ گیش لٹ ءُ کُٹی وئیل دیم ءَ اتکگ اَنت-

زانگ بہ بیت عراق ءِ کابینہ ءَ اے درگت ءَ کانون ءِ دیم ءَ سال دوھزار ءُ بیست ءَ کاگدے پیش بیتگ ءُ بلے داں انگت ءَ پارلیمنٹ ءَ ایشی ءِ منگ نامہ دیم ءَ.نیاؤرتگ-

سربوتگیں ھالانی رِد ءَ بلوچستان ءِ تیاپ دپی دمگ گوادر ءَ پاکستانی پوج ءُ چیریں ادارھانی کارمنداں ورنائیں نودربرے زورانسری آوار جتگ ءُ بیگواہ کتگ –

زورانسری آوار جنگ بوتگیں نودربر ءِ پجار شاہد ء عبدالحمید ءِ نام ءَ بوتگ ، اھوالکار ءِ رِد ءَ شاہد گوستگیں ماہ ءِ بزاں بیست ءُ شش جولائی ءَ زورانسری آوار جنگ ءُ بیگواہ کنگ بوتگ کہ ھنگت گار ءُ بیگواہ انت –

زانگ بہ بیت بلوچستان ءِ تیاب دپی دمگ گوادر ءَ ھوار ھوار ایندگہ ھند ءُ دمگاں پاکستانی پوج ءِنیمگ ءَ ورنایانی آوار جنی ءِ درچ یکشل ءَ برجاہ انت بلے گوستگیں لھتے وھد بیت کہ زورانسری آوار جنیانی تہ ءَ یکرندے پدا گیشی آرگ بوتگ – زورانسری آوار جنگ بوتگیں مردمانی تہ ءَ گیشتریں کچ بلوچ نودربرانی انت –

بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءِ رِد ءَ اے وھدی بلوچستان ءِ تہ ءَ کساس پنجاہ ھزار ءَ گیش مردم زورانسری آوار جنگ ءُ بیگواہ کنگ بوتگ انت کہ آھانی تہ ءَ گیشتریں کچ بلوچ ورنا ءُ سیاسی باسکانی انت ءُ بازیں مردمانی ژانگولیں جون چگل دیگ بوتگ انت –

سربوتگیں ھالانی رِد ءَ بلوچستان ءِ دمگ بولان ءُ کیچ ءَ ناشناسیں سلاہ بندیں مردماں پاکستانی پوج ءِ سر ءَ اُرش کُتگ –

گیشیں ھالانی رِد ءَ مروچی سَے شمبے ءِ روچ ءَ ناشناسیں سلاہ بندیں مردماں بولان ءِ دمگ مارگٹ ءَ پاکستانی پوج ءِ پانگسے ءِ سر ءَ اُرش کتگ، اُرش ءَ پوج ءَ جانی مالی تاوان ءِ گمان انت –

دومی نیمگ ءَ کیچ ءِ دمگ تمپ ءَ ھم پاکستانی پوج ءِ سر ءَ اُرش کنگ بوتگ –

اھوالکار ءِ رِد ءَ اے اُرش ابدوئی شیپ چار ءَ برجاھیں پوجی پانگسے سر ءَ کنگ بوتگ – اُرش ءَ راکت گولہ ءُ دگہ سلاہ کارمرز کنگ بوتگ انت –

ھالانی رِد ءَ ھردو اُرشاں پاکستانی پوج ءَ جانی ءُ مالی تاوان ءِ گمان انت – بلے ھردو اُرشانی درگت ءَ پاکستانی واکدارانی نیمگ ءَ ھچ وڈیں درشان دیگ نہ بوتگ –

زانگ بہ بلوچستان ءَ پاکستانی پوج ءِ سر ءَ بوتگیں اے دابیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ انت بلے اے اُرشانی زمہ تنی وھدی منگ نہ بوتگ انت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ یکسد ءُ بیست ءُ سَے روچ سرجم بوتگ انت –

مروچی بی ایس او پجار ءِ سینئیر وائس چیرمین بابل ملک بلوچ، یونٹ سیکریٹری اللہ گل بلوچ ءُ فہیم بلوچ ءَ بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھنے وھد ءَ گل ءِ کمک سرکماش ماما قدیر بلوچ ءَ گوشتگ کہ اگاں بہ چارے بلوچستان ءَ زھرشانی ءُ روانکانی درچ یکشل ءَ برجاہ انت –

آئی ءَ گوشتگ کہ ایردستیں راج ءِ ھاتر ءَ آسودگی بیگواھیں پرزندانی یل بوگ ءَ اتک کنت بلے تمرد ءُ مھکمیں مات ءُ گھار مروچی وتی پرزندانی نمیرانی ءُ آوار جنی ءَ ھچ موتک نیار انت –

آئی ءَ گوشتگ کہ رمزان ءِ ماہ بہ بیت یا ائید مئے مات ءُ گھار دگانی سر ءَ زھرشانی ءَ گندگ بنت ءُ بیگواھیں مردمانی بنجل ھم جھان ءَ پاکستان ءِ زلم زوراکیاں سرپد کنگ ءَ انت –

آئی ءَ گوشتگ کہ اے زانت ءُ جزبگ ءَ بلوچ راج ءں دیمھونی دیگ ءَ دیمروئی داتگ ءُ ھمے جزبگ پہ ریاست ءَ تباھی سوب جوڈ بوتگ کنت –

ماما قدیر بلوچ ءَ گوشتگ کہ سال دوھزار ءُ یک ءَ برجاھیں پُرایمنیں جھد ءِ تہ ءَ بلوچ راج ءَ ھر ماہ ھر روچ ھر دمان یک وڈا ھونریچ کنگ بوتگ –

کراچی ءَ بلوچستان ءِ دمگ مستونگ ءِ دو کسانسالیں برات پولیس ءَ دروگیں میڑے ءَ تیر جتگ ءُ زدگ کتگ انت – وھدیکہ آھانی کھول ءَ گوشتگ کہ پولیس دروگیں میڑے ءِ نام ءَ دیگ انت آھاں دزگیری ءِ تامر ھم شنگ کُتگ –

کھول ءِ گوشگ انت کہ بلوچستان ءِ دمگ مستونگ ءِ جھمنند نور محمد ءُ فہیم احمد ء خدا رحیم گرماگ ءِ موکلانی گوازینگ ءَ کراچی ءَ وتی مات ءِ چارگ ءَ اتکگ انت ءُ آ الفلاح ءِ دمگ گلشن منیر رفیع گارڈن ءَ وتی مات ءِ گور ءَ بوتگ انت –

بیست ءُ ھپت جولائی ءَ پولیس ءَ دروگیں میڑے ءَ ھمے زاھر کتگ کہ نور محمد ءُ فہیم احمد زدگ بوتگ انت – ھردو براتانی زدگی جاوراں تامر ھم شنگ کتگ –

پولیس ءَ آھانی بگیری ءَ ارزی نبشتہ کتگ کہ میڑ ءُ آیانی گور ءَ سلاہ ھم دستیگ کتگ بلے ھردو براتانی دزگیری ءِ وھدے سی سی ٹی وی تامر ھم شنگ بوتگ –

تامر ءِ تہ ءَ گندگ بیت کہ ھردو برات دزگیر کنگ بوگ ءَ انت، تامر ءِ تہ ءَ اے ھم گندگ بیت کہ پولیس اپسرے ءَ پسٹل ءِ گوں ءُ آیاں زاہ ءُ بد کنگ ءَ انت، پولیس کارمند ھردو براتاں پرپٹ ءَ سوار کن انتءُ گوں وت بر انت، پدا رند ءَ رفع عام سوسائٹی ءَ آھاں میڑے ءَ زدگ بوگ ءِ ھبر شنگ کتگ –

اے درگت ءَ کورنگی ءِ ایس ایس پی ءِ گوشگ انت کہ اے درگت ءَ مارا ھال دیگ بوتگ ءُ تامر ھم دیستگ انت اے درگت ءَ پٹ ءُ پول کنگ ءَ انت –

زدگ بوتگیں نور محمد ءَ سال دوھزار بیست ءُ دو ءَ حرا ہائی اسکول مستونگ ءَ دھمی تبک پاس کتگ وھدیکہ آئی ءِ کستریں برات فہیم ءَ سال دوھزار بیست ءُ دو ءَ نھمی تبک چکاس داتگ –

اے درگت ءَ آیانی مات ءُ کھول ءِ مردماں لوٹ کتگ ءُ گوشتگ کہ پولیس کارمندانی بگیری ءَ گامگیج زورگ بہ بیت –

روکپتی بلوچستان ءَ ایرانی چیریں ادارھاں یک ورنایے آوار جنگ ءَ پد بیگواہ کتگ –

گیشیں اھوالانی رد ءَ روکپتی بلوچستان ءِ دمگ نوبندیان ءَ ایرانی لشکر ءَ یک ورنایے آوار جنگ ءَ گون وت برتگ کہ چریشی ءَ پد آئی ءِ بارو ءَ دگہ اھوال نہ بیتگ اَنت-

آوار جنگ بیتگیں ورنا ءِ پجار امین ء لعل بخش جھمنند پیشین ءِ نام ءَ زانگ بیتگ-

اھوالانی رد ءَ امین وتی ھمراھانی ھمراھی ءَ چھبار ءَ شتگ وتی الاج ءَ واتر وتی ھنکین ءَ آیگ ءَ بیتگ آ نوبندیان ءَ لس پوشاکی کارندھاں گاڑی ءَ ایر گپتگ ءُ برتگ-

چیزے روچ ءِ گوزگ ءَ آئی ءِ کھول ءِ نمبر ءَ کال اتکگ ءُ آ چھبار ءَ زندان ءَ بندیگ بیتگ ءُ پد ءَ آ زاھدان ءَ برگ بیتگ ءُ چریشی ءَ پد آئی ءِ بارو ءَ دگہ اھوال دیم ءَ نیتکگ اَنت-

بلوچستان ءِ دمگ پنجگور ءُ آواران ءَ پاکستانی پوج ءِ سر ءَ اُرش ءُ سلاہ بندانی میان ءَ جنگ ءُ چوپ، ھمے وڑ کولواہ ءَ پوج ءَ لشکر کشی بندات کتگ ءُ زالبول ءُ زھگ لٹ ءُ کُٹانی نشانگ کنگ بیتگ اَنت-

اھوالانی رد ءَ پنجگور ءِ دمگ گرمکان ءَ گوستگیں شپ ءَ ناشناسیں مردماں پاکستانی پوج ءِ چیک پوسٹ نشانگ کتگ-

دمگی مردمانی رد ءَ اُرش ءَ پوج ءَ تاوانانی دیمپانی کنگ کپتگ ، بلے داں انگت ءَ پوج ءِ نیمگ ءَ ھچ اھوال دیم ءَ نیتکگ اَنت-

دومی نیمگ ءَ آواران ءُ مشکے ءِ میانی دمگ کنیرہ ءَ مروچی سھب ءَ ترندیں تیرگواری ءُ تراکانی توار اشکنگ بیتگ اَنت-

دمگی مردماں گمان پدر کنان ءَ گوشتگ کہ تراک ءُ تیرگواری پاکستانی پوج ءُ ناشناسیں سلاہ بندیں مردمانی میان ءَ بیتگ –

دومی نیمگ ءَ کولواہ ءَ ھال اِنت پاکستانی پوج ءَ جتا جتائیں ھنداں بیڑ برتگ ءُ زھگ ءُ زالبول لٹ ءُ کُٹانی نشانگ کتگ اَنت ءُ لوگانی گران بھائیں مڈی ءُ موبائل گوں وت برتگ اَنت-

بلوچستان ءِ بنجاھی شھر شال ءَ پولیو ٹیم ءِ سر ءَ اُرش ءَ دو پولیس کارندہ، دھگ ءِ وئیل ءَ شش مردم بیران بیتگ اَنت-

اھوالانی رد ءَ شال ءَ پولیو مھم برجاہ بیتگ کہ ھمے وھد ءَ شالم کلی ءَ ناشناسیں مردماں ٹیم ءِ سر ءَ اُرش کتگ – تیرگواری ءِ آسر ءَ پھزداری ءَ ھواریں دو پولیس کارندہ بیران بیتگ اَنت-

تیرگواری ءَ پد پولیس ءُ کمکی ادارہ سر بیتگ اَنت ءُ لاش اش نادراہ جاہ ءَ برتگ اَنت ئِے-

دومی نیمگ ءَ ھال اِنت کہ بارکھان ءَ دو گاڑیانی ٹکر ءَ شش مردم بیران بیتگ اَنت-

متھدہ عرب امارات دبئی ءَ باپاری ءُ تر ءُ تابی مھمکہ ءَ سیل ءُ سوادی کر ءُ کسبی ءُ درملکی آیوکیں مردمانی کچ ءُ کساس شنگ کتگ اَنت-

الاامارات الیوم ءِ رد ءَ زرکاری ءِ ادارہ ءُ تر ءُ تابی ءِ گوشگ اِنت ھمے سال ءِ سال ءِ پنچ ماھانی توک ءَ ھپتاد ءُ چار لک درملکی مردم دبئی ءَ اتکگ اَنت-

سال دو ھزار ءُ بیست ءُ دو ءِ کساسانی بنداتی پنچ ماھانی کساساں بیست درسد گیش اِنت – گوستگیں سال ءَ شش ٹک ھبدہ ملین تر ءُ تابی مردم اتکگ بیتگ اَنت-

زرکاری ءُ تر ءُ تابی ءِ ادارہ ءِ گوشگ اِنت کہ دبئی ءَ درملکی تر ءُ تابی کنوک ءُ ایوکیں مردمانی کساس ھمک وھد ءَ نوک بیان اِنت-

زرکاری ءُ تر ءُ تابی ادارہ ءِ رد ءَ جنوری ءَ داں مئی ءَ دوھزار ءُ بیست ءُ سَے ءِ وھد ءَ دبئی ءَ آیوکیں تر ءُ تاب کتگیں مردمانی توک ءَ ھندوستان ءِ مردمانی کساس گیشتر اِنت ، کہ اود ءَ دَہ لک مردم ءَ گیش دبئی ءَ اتکگ اَنت-

چہ روس ءَ پنچ لک ءُ پنجاہ ءُ چار ھزار ، چہ برتانیہ ءَ چار لک ءُ ھشتاد ءُ ھشت ھزار ، سعودی عرب ءَ چار لک ءُ چل ءُ دوھزار ءُ چہ سلطنت عمان ےَ چار لک ءُ بیست ءُ پنچ ھزار تر ءُ تابی مردماں دبئی سیل کتگ –

چہ جرمنی ءَ سَے لک ءُ ھشت ھزار ، چہ امریکہ ءَ سَے لک ءُ سَے ھزار ، چہ چین ءَ دو لک ءُ سَے ھزار ، چہ اسرائیل ءَ یک لک ءُ ھشت ءُ سَے ھزار ءُ چہ ایران ءَ یک لک ءُ شست ءُ ھشت ھزار مردم دبئی ءَ پہ سوادی اتکگ اَنت-

ایرانی آمیدگس ءَ گوستگیں یست ءُ چار ادارانی توک ءَ ھشت مردم پاھو دیگ بیتگ اَنت کہ ایشانی توک ءَ زاھدان، زابل ءُ بیرجیند ءَ بندیگ مردم پاھو دیگ بیتگ اَنت-

گوستگیں روچ ءَ زاھدان ءَ چار دگہ مردم پاھو دیگ بیتگ اَنت کہ نشہ باپاری ءِ بھتام بیتگ اَنت ءُ ایشانی کھولانی ھال دیگ ءَ ابید پاھو داتگ اَنت-

پاھو دیگ بیتگیں مردمانی پجار پنجاہ ءُ سَے سالی ئیں شھسواری شھریاری پلنگی ء شاھل جھمنند عباس علی ریگان اُستان کرمان، سی ءُ ھشت سالی ئیں سعید براھوئی ء حبیب اللہ جھمنند زابل، سِی ءُ نُھ سالی ئیں علی براھوئی پنام ءِ خان مھمد ء رستم جھمنند زابل ءُ پنجاہ ءُ پنچ سالی ئیں خدارحم مھمدانی پنام ءِ لطیف ء بھار خان جھمنند امام خمینی زاھدان ءِ ناماں زانگ بیتگ اَنت-

ھمے وڑ ءَ زابل ءِ زندان ءَ اسد اللہ امینی ء بلوچ جھمنند نیمروز اوگانستان، مھمد ارباب ء دختر جھمنند نیمروز اوگانستان ءِ ناماں زانگ بیتگ اَنت-

ھمے وڑ ءَ بیرجند ءَ یک بندیگیں مردمے پاھو بیتگ ، کہ آئی ءِ پجار فرھاد بادروزہ ناروئی ءِ نام ءَ زانگ بیتگ –

پاھو بیتگیں مردم جتا جتائیں وھداں دزگیر کنگ بیتگ اَنت ءُ مردمانی سر ءَ نشہ باپاری ءِ سر ءَ پاھو دیگ بیتگ اَنت-