TBP Balochi

چارشمبے ءِ روچ ءَ بلوچستان ءِ شھر گوادر ءُ تربت ءَ پاکستانی پوج سر ءَ اُرش کنگ بیتگ-

بلوچستان ءِ تیاب دپی شھر گوادر ءَ پوج ءِ چوکی اُرش ءِ نشانگ کتگ-

اِھوالکار رِد ءَ گوادر مونڈی ءَ برجاھیں پوج ءِ چوکی سر ءَ سلاہ بندیں مردماں اُرش کتگ، داں دیراں تیرگواری برجاہ بیتگ-

دومی نیمگ ءَ کیچ ءِ بُنجاھی شھر تربت ءَ پوج چوکی سلاہ بندیں اُرش ءِ نشانگ کتگ-

سلاہ بندیں مردماں تربت آپسر ءَ مولد ریک ھند سر ءَ برجاھیں پوج چوکی سر ءَ وتکاریں سلاھاں چہ اُرش کتگ بلے واکدار نیمگ ءَ ھچ وڑیں تاوان درگت ءَ ھچ وڑیں درشان دیم ءَ نیتکگ-

کیچ ءِ دمگ دشت ءُ مند میانجی کوھی دمگ ءَ گوستگیں سے روچ ءَ چہ پاکستانی پوج ءِ لشکر کشی برجاہ ءَ اِنت-

ھالانی رِد ءَ مند ءُ دشت ءِ میانجی کوھی دمگاں تھتان کور، شالو کور، نیگوز کور ءُ اناری کور ءُ جتاجتائیں ھندانی سر ءَ پاکستانی پوج ءِ جھلی ءُ بُرزی لشکر کشی برجاہ ءَ اِنت- وھدے کہ لشکر ءِ چاریگری ڈرون کوھاں گشت کنگ ءَ اِنت- تنی وھدے ھچ وڑیں جانی تاوان ھال نیست-

زانگ بہ بیت مند ءِ کوھی دمگ دریا چم ءَ گوستگیں روچاں بلوچستان لبریشن فرنٹ ءَ پاکستانی پوج ءِ یک چوکی یے دستیگ کتگ ءُ پوج ءِ کارمند کشتگ اَنت سلاہ وتی دستیگ کتگ ءُ برتگ اَنت-

بلوچستان ءِ باپاری شھر چہ سے دسمبر دوھزار بیست سے ءَ چہ زورانسری بیگواہ اسرار اللہ ءِ کھول ءَ گڈانی موڑ نزیک ءَ شال، کراچی شھدگ زھرشانی کنان ءَ نندانک داتگ ءُ بند کتگ-

کھول ءَ گْوشتگ کہ بیگواھیں اسرار ءِ یل کنائینگ ھاتر ما اشی ءَ ساری چار رند ءَ زھرشانی کتگ نو پنچمی رند ءَ لاچار بیتگ ءُ دگ بند کتگ بلے انتزامیہ نیمگ ءَ چہ ھچ وڑیں گامگیجی دیم ءَ نیتکگ-

آئی ءَ گْوشتگ کہ انتزامیہ ءُ سیاسی مردماں بس دروگیں گپ ءُ دیوان تسلہ دیگ ابید کھول ءَ ھچ نہ رس اِتگ، کھول ءَ گْوشتگ بیگواھیں اسرار ءِ یل کنائینگ ءَ تاں دگ بند ءُ نندانک برجاہ بیت-

زانگ بہ بیت کہ اسرار بلوچ ءِ یل کنائینگ ھاتر ءَ گوستگیں روچاں کھول ءَ پاکستان ءِ بیرک چست کتگ ءُ زھرشانی کتگ اَنت، بلے اِھوالکار رِد ءَ چیریں ادارھانی نیمگ ءَ چہ آ گوشگ بیتگ اَنت کہ پاکستانی بیرک ءَ چست بہ کن اِت دگانی سر ءَ در بیا اِنت گُڑا اسرار ءَ زوت یل کن ایں- بلے تنیگت ءَ ھچ وڑیں ھال نیست-

بلوچستان ءِ دمگ بارکھان ءَ مزن شھدگ ءَ سلاہ بندیں مردماں بس داشتگ ءُ اود ءَ ھپت مردم چہ بس ءَ پجار کنگ ءَ پد ایرگپتگ ءُ کشتگ انت-

لیویز پورسز ءَ وئیل ءِ ھال راست کتگ ءُ گوشتگ کشتگیں دراھیں مردمانی سیادی پاکستان ءِ اُستان پنجاپ ءِ جتاجتائیں جاھان انت-

بس ءِ ڈرائیور ءِ رد ءَ سلاہ بندیں مردماں ھپت مردم پجار کتگ ءُ ایر گپتگ انت ءُ چریشی ءَ پد آیاں اے ھپتیں مردم تیر جتگ ءُ کشتگ انت-

سیکورٹی بنشون ءِ رد ءَ اے بس چہ شال ءَ دیم پہ فیصل آباد ءَ روگ ءَ بیتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ زورگریں پاکستانی پوج ءِ پُلپانچیں شرکٹ فرنٹیئر کور ورکس آرگنائزیشن ( ایف ڈبلیو او ) ءِ یک سائٹ اُرش ءَ نشانگ کتگ وھدے کہ شال ءَ زورگریں پوج ءِ یک چاریگے اُرش ءِ نشانگ کتگ کُشتگ-

جارکش ءَ گْوشتگ کہ تربت ءِ دمگ ناصر آباد ءَ بی ایل اے ءِ سرمچاراں گوستگیں شپ ءَ دوازدہ سی ملٹ ءِ نزیک ءَ فرنٹیئر کور ورکس ( ایف ڈبلیو او) ءِ سائٹ سر ءَ اُرش کتگ- سرمچاراں پُلپانچیں شرکت ءِ ایوی گاڑی ءُ دگہ مشینری مانداشتگ ءُ تباہ کتگ اَنت وھدے کہ یک گاڑی یے ءُ پرپٹ وتی دستیگ کتگ اَنت – سرمچاراں اے ھند سر ءَ ساڑی ئیں پوریاگر کڈن کتگ ءُ پد ءَ یل داتگ اَنت-

آئی ءَ گْوشتگ کہ زورگریں پاکستانی پوج وتی پُلپانچیں مول ءُ مرادانی ھاتر ءَ تربت تاں مند دگ ءَ جوڑ کنگ اِنت، آئی ءِ مول ءُ مراد پوج ءِ سُر ءُ پُرانی ھاتر ءَ آسراتی دیگ ھوار اِنت- بلوچ لبریشن آرمی اے اُرش زمہ واری ءَ منّ اِیت ءُ ما تچک کنگ لوٹ ایں کہ زورگریں پوج ءِ پُلپانچیں پروجیکٹس تچکی ءَ مئے نشانگ تہ ءَ بنت-

جارکش ءَ گْوشتگ کہ بلوچ لبریشن آرمی ءِ سرمچاراں سیزدہ فروری پشمبے ءِ روچ ءَ شال ءَ گوھر آباد ھند سر ءَ یک اُرشے ءَ زورگریں پاکستانی پوج ءُ چیریں ادارھانی یک چاریگے ءُ کاردار ٹکری دودا کُشتگ-

جارکش ءَ گْوشتگ کہ ٹکری دودا لوگانی سر ءَ بیڑ ءُ زورانسری آوار جنی زورگریں پوج ءِ تچکی ءَ کمکاری ءَ ھمگرنچ بیگ ءَ ھوار مردمانی چمپروشی کتگ ءُ لب لالچ داتگ زورگریں پوج واستا پہ چاریگری ءَ داشتگ- اے چاریگ زورانسری بیگواھیِں مردمانی کھولاں چہ لکّانی کلدار آیانی دوستناکاں یل کنائینگ ءِ دلجمی داتگ-

جارکش ءَ گْوشتگ کہ چاریگ ٹکری دودا مارگٹ چونگی ءَ دوھزار چاردہ ءَ زورگریں پوج ءِ کرنل مدثر ءُ کرنل اسحاق ءِ سروکی ءَ دُژمنیں پوج ءِ ھمراھی ءَ راہ بندگ ءَ ھمگرنچ بیتگ وھدے کہ دوھزار بیست ءَ اے چاریگ سی ٹی ڈی واستا ھم کمکاری ءَ ھمگرنچ بیتگ-

جارکش ءَ گُڈی ءَ گْوشتگ کہ بلوچ لبریشن آرمی اے چاریگ ٹکری دودا کوش ءِ زمہ واری ءَ منّ اِیت وھدے کہ اے نیٹورک ءَ چہ ھمگرچ دگہ مردماں ھم ھمے وڑ گُڈی آسر ءَ سر کنگ بنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں ھپدہ فروری ءِ سُھب دہ ءِ نزیک ءَ مشکے ءِ دمگ بنڈکی ءَ جوڑ بیؤکیں دگ ءَ سر ءَ ساڑی ئیں دُژمن سر ءَ اسنائپر ءَ اُرش کتگ- یک کارمندے یے جاہ پہ جاھی جنگ بیتگ- وھدے کہ دُژمنیں پوج ءَ سرمچارانی رندگیری کتگ ءُ وتی پیسرگیں راھبندانی رِد ءَ آیانی انگیر کنگ جُھد کتگ بلے سرمچاراں چیرجنگی رپکاں دُژمن بے سوب کتگ- بی ایل ایف ءِ سرمچاراں پیسر ءَ چہ دُژمن ءِ پسّھی ءِ ودار ءَ جتاجتائیں ھندانی سر ءَ سنگر گپتگ ُءُ نشتگ اَنت، دُژمنیں پوج انگیر ءَ ھوار دو گاڑیانی سر ءَ سرمچاراں تُرندیں اُرشے کتگ ءُ ویگو گاڑیاں سوار پنچ کارمند جاہ پہ جاھی مرتگ اَنت وھدے کہ لفٹیننٹ کاشف ءَ ھوار ھپت کارمند ٹپی بیتگ اَنت وھدے کہ دومی نیمگ ءَ انگیر کنوکیں ٹولی ءَ سے پرپٹاں سوار ھپت کارمند اُرش ءِ نشانگ ءَ اَتکگ ءُ مرتگ اَنت وھدے کہ یک پرپٹے سُتکگ، آ دگہ دوئیں پرپٹاں ءُ یک گاڑی ءَ سک تاوان رس اِتگ-

آئی ءَ گْوشتگ کہ میڑ میان ءَ دُژمنیں پوج ءِ کُمک ھاتر ءَ آؤکیں ھیلی کاپٹرز ھم سر بیتگ اَنت ءُ اے مزنیں جنگ چار کلاکاں تاں برجاہ بیتگ- سرمچاراں وتی جنگی مڑیانی ھمراھی ءَ ناں تھنا ھیلی کاپٹرانی سر ءَ تُرندیں اُرشے کتگ بلکیں وتی پھاز ءِ داران پہ سلامتی دراھگ ءَ سوبمند بیتگ اَنت-

جارکش ءَ گْوشتگ کہ اے اُرش پاکستانی پوج واستا یک یاتے ءِ بھر اِنت کہ بلوچ سرمچار کجام ھم دروشم ءَ وتی سرڈگار سر ءَ زورگر ءِ ساڑی بیگ ءَ اوپار نہ کنت ءُ داں ھما وھد ءَ اے جنگ ءَ برجاہ دار اِیت دانکہ بلوچستان آجو نہ بیت-

جارکش ءَ گْوشتگ کہ اے اُرش ءِ سرجمیں تامُر زوت بی ایل ایف ءِ رسانکدر سیل آشوب ءَ شنگ کنگ بیت-

آئی ءَ گْوشتگ کہ بی ایل ایف اے اُرشانی زمہ واری ءَ منّ اِیت ءُ بلوچستان ءِ وتواجھی ءَ تاں وتی جُھد ءَ برجاہ دارگ اِھد کنگ ھمراھی ءَ پاکستانی پوج ءَ آؤکیں وھداں اے وڑیں اُرشانی نشانگ کن ایں-

بلوچستان ءِ دمگ کیچ ءِ بُنجاھی شھر تربت ءَ گوستگیں شپ ءَ سلاہ بندیں مردماں بند ساچی شرکت فرنٹیئر کور ورکس ءِ سائٹ اُرش ءِ نشانگ کتگ-

ھالانی رِد ءَ گوستگیں شپ ءِ دوازدہ نزیک ءَ سلاہ بندیں مردمانی مزنیں کچے ءَ تربت ءَ ناصر آباد ءِ ھند سر ءَ ایف ڈبلیو او ءِ سائٹ سر ءَ اُرش کتگ-

اُرشکاراں شرکت ءِ مشنری مانداشتگ اَنت وھدے کہ یک گاڑی یے ءُ پرپٹے وتی دستیگ کتگ وھدے کہ پوریاگر کڈن کتگ ءُ یل داتگ اَنت-

اُرش ءِ نشانگ کنگ بیتگیں شرکت تربت تاں مند دگ ءِ جوڑ کنگ ءَ دلگوش بیتگ اَنت- بیست ارب کلدار ءَ چہ جوڑ بیوکیں منسوبہ ” ساؤتھ بلوچستان ترقیاتی پیکج”ءِ بھر اِنت کہ آئی ءِ بندات گوستگیں سال دسمبر ءَ بلوچستان سروزیر سرفراز بگٹی ءَ کتگ اَت-

زانگ بہ بیت بلوچستان ءَ دگ ءُ دگہ پروجیکٹانی سر ءَ کار کنوکیں شرکتاں بلوچ آجوئی لوٹوکیں سلاہ بندیں گلاں نشانگ کتگ-

اے گلانی گوشگ اِنت کہ جوڑ کنگ نام سر ءَ پُلپانچیں پروجیکٹاں دراجکش کن اَنت وھدے کہ دگ جوڑ کنگ پوجی مول ءُ مرادانی ھاتر ءَ کارمرز کنگ بنت-

بلوچستان ءِ دمگ کیچ ءَ بیگواھیں شاہ جان ءِ یل نہ کنگ ءِ ھلاپ ءَ کھول ءَ جدگال ڈن ( ڈی بلوچ پوائنٹ) ءَ مروچی دوبر نندانک دیگ ءِ جار جتگ-

گیشیں اھوالانی رد ءَ شاہ جان ءِ کھول ءَ گوشتگ مارا مئے زھگ ءِ یل کنگ ءِ کَول انتزامیہ ءَ کتگ کہ زوت یل دیگ بیت اِنت چریشی ءَ چہ ما وتی زھرشانی ھلاس کتگ بلے اے کول ءُ زبان ھلاس بیتگ شاہ یل نہ بیتگ-

آیاں گوشتگ مروچی انتزامیہ ءِ داتگیں مھلت ءِ ھلاس بوگ ءِ پژدر ءَ دوبر جدگال ڈن ءَ ایم ایٹ شھدگ ءَ بند کنگ ءَ لاچار انت –

کھول ءَ گوشتگ دانکہ شاہ یل نہ بیت انت زھرشانی برجاہ بیت اِنت-

بلوچستان ءِ دمگ آواران ءِ ھند مشکے ءَ گوستگیں روچ ءَ سلاہ بندیں مردماں پاکستانی پورسز ءِ کاروان اُرشے ءِ نشانگ کتگ-

اُرش مشکے ءِ ھند بنڈکی ءَ کنگ بیتگ ءُ ھمے وڑ اُرش ءَ پاکستانی پوج ءِ آفسیرے ءَ ھوار بازیں کارندھانی مَرگ ءُ زدگ بیتگینانی اھوال اِنت-

مروچی پاکستانی پوج ءَ دمگ انگیر کتگ ءُ زالبول ءُ زھگاں دگہ مردم لٹ ءُ کٹانی نشانگ کتگ-

دمگ ءَ اھوال انت کہ مشکے ءِ ھند تنک ءَ عبدالرحیم بازار ءَ پاکستانی پوج ءَ دمگ ءِ مردم لٹ ءُ کٹانی نشانگ کتگ انت-

دمگ ءَ پوجی ھیلی کاپٹرانی آیگ برجاہ انت – واکداراں داں انگت ءَ اے درگت ءَ دگہ گیشیں اھوال نہ داتگ انت-

روکپتی بلوچستان ءِ دمگ سراوان ءَ یک مردمے ءِ لاش دزکپتگ-

گیشیں اھوالانی رد ءَ سراوان ءِ دمگ ھوشک ءَ یک مردمے ءِ لاش دزکپتگ-

لاش دگ ءِ نزیک ءَ کپتگ کہ اود ءَ دمگی مردماں دیستگ، لاش ءِ پجار زانگ نہ بیتگ-

دمگی مردمانی رد ءَ کپتگیں لاش گمانی رنگ ءَ نشہ ءِ آماچیں مردمے ءِ بوت کنت اِنت-

تنی وھدی اے زانگ نہ بیتگ مہ مرگ چے سبب ءَ پیش اتکگ دگہ ٹپ ءُ نشانے ھم گندگ نہ بیتگ انت-