TBP Balochi

ھالانی رِد ءَ شال ءِ دمگ سریاب مستونگ دگ سر ءَ ناشناسیں سلاہ بندیں مردماں پولیس موباھل اُرش نشانگ کتگ-

چریشی ءِ آسر ءَ سب انسپکٹر عبدالولی تنولی دو کارندھانی ھمراھی ءَ بیران وھدے کہ تیرگواری ءَ چہ پولیس موباھل ڈرائیور ءُ دگہ کارندھے ٹپی بیتگ اَنت-

بیران ءُ ٹپی کارندہ نادُراھجاہ ءَ برگ بیتگ اَنت دمگ سرجمیں بند کتگ- گیشیں پٹ ءُ پول پوج ءُ انتزامیہ کنگ ءَ اِنت-

بلوچستان لبریشن فرنٹ ءِ جارکش میجر گوھرام بلوچ ءَ دو جتاجتائیں شنگ کتگیں درشانی تہ ءَ سے راجی میار بارانی کوش ءُ تمپ ءَ پوج سر ءَ بیتگیں اُرش ءِ زمہ واری منّ اِتگ اَنت-

بی ایل ایف ءِ جارکش میجر گھرام بلوچ ءَ رسانکدر ءَ وتی شنگ کرتگیں درشانے ءِ تہ ءَ گوشتگ کہ بی ایل ایپ ءِ پٹ ءُ پولی ٹولی ءِ جست ءُ پرس ءُ نشانگ دیگ ءَ پد سرمچاراں دو ریاستی چاریگ امان ء بیبرگ ءُ عدنان ء خدا بخش دزگیر کرتگ اَنت ءُ گل ءِ آمیدگس ءَ پیش کرتگ اَنت۔ اے دوئیناں سک دیر اِنت کہ گل ایشانی راجی میارباری ءِ سر ءَ نام دپ بیتگ ءُ ریاستی چیریں ادارہ، ھاسکار ایم آئی ءِ ھندی کشندہ ٹولی ءِ سروک سعید ء تھسیلدار عابد ءِ سروکی ءَ کار ءَ بیتگ اَنت۔

جارکش ءَ گوشتگ کہ جست ءُ پرس ءِ میان ءَ دوئیں میارباراں وتی میارباری من اتگ اَنت ۔ امان بیبگر ءَ من اتگ کہ آ تمپ ءِ ھند دازن، گومازی ءُ آزیان ءَ ھوار آدگہ ھنداں بلوچ ورنایانی زوریں بیگواھی ءُ شھید کنائینگ ءَ تچک ءَ ھوار بیتگ۔ عدنان ء خدا بخش زورگریں پوج ءِ ھونریچی لشکرکشی، لٹ ءُ پل، دزی ءُ چاگردی ناشرکاریانی ھوار بیگ من اتگ۔ دوئیں میارباراں دگہ چنچو ریاستی چاریگانی نام داتگ آ زوت سزا دیگ بنت۔

جارکش ءَ گوشتگ کہ دلجمیں جست ءُ پرس، منگ ءُ منانکانی بنیاد ءَ گل ءِ آمیدگس ءَ دوئیں میاربار مرگ ءِ سزا داتگ اَنت۔ اشی ءِ سر ءَ بیست نُھ مارچ ءُ پنچ فروری 2025 ءَ کارکنگ بیتگ۔ سرمچاراں آمیدگس ءِ پیسلہ ءِ سر ءَ کار کرتگ ءُ امان بیست نُھ مارچ 2025 عدنان پنچ پروری 2025 ءَ تیرگواری کرتگ ءُ کشتگ اَنت۔ آیانی منگ ءِ تامربند گل ءِ بھر اِنت کجام وھد ءَ ھژدری بیت راج ءِ دیم ءَ پیش کنگ بیت۔

جارکش ءَ گوشتگ کہ دگہ یک کاروائی یے ءَ سرمچاراں چار فروری 2025 ءَ ریاستی چاریگ فھد ء مجید جھمنند تمپ کوھاڑ، مند ءِ ھند ریک بازار ءَ تیرگواری کرتگ ءُ کشتگ ءُ آئی گاڑی ءَ ھوار آدگہ سامان ھم برتگ اَنت۔

جارکش ءَ گوشتگ کہ فھد ءَ چنچو وھد اِنت کہ ھندی کشندہ ٹولی ءِ سروک سعید ء تھسیلدار عابد ءِ سروکی ءَ کار ءَ بیتگ ءُ بلوچ جھدکارانی کھولانی ترسینگ، آیانی سر ءُ زوراکی کنگ ، آیانی گسانی ماندارگ، چہ گسان گرانھادیں سامانانی دزی ءُ بلوچ ورنایانی زوریں بیگواہ کنگ ءَ تچک ءَھوار بیتگ۔ اے چہ گل ءِ نیمگ ءَ باز رند ءَ کڈن کنگ بیتگ بلے آئی وتی میارباری یل نہ داتگ اَنت، ھمے درگت ءَ سرمچاراں چہ گل ءِ پیسلہ ءَ تیرگواری کرتگ ءُ کشتگ۔

جارکش میجر گھرام ءَ گوشتگ کہ بی ایل ایف تچک کنت کہ آ زورگریں ریاست ءِ ھندی چاریگاں کدی نہ بکش ایت۔ گل ھمے درسیں مردماں کڈن کنت کہ کسے کہ پہ دژمن ءِ مول ءَ راجی زرمبشت ءِ بگیری ءَ پُرکار اِنت آئی ءَ الم جست کنت۔ بی ایل ایف ءِ ھند ءِ درسیں مردماں گوش ایت کہ آ چہ ریاستی چاریگاں وتی ھرپیمیں ھمگرنچیاں ھلاس بہ کن اَنت چی ءَ کہ سرمچار آیاں کجام وھد ءَ ھم نشانگ کن اَنت۔

جارکش ءَ دگہ یک درشانے ءِ تہ ءَ گْوشتگ کہ مئے سرمچاراں کیچ ءَ زورگریں پاکستانی پوج چیک پوسٹ اُرش ءِ نشانگ کتگ جانی ءُ مالی تاوان داتگ اَنت-

جارکش ءَ گْوشتگ کہ ھشت اپریل ءِ شپ ءَ ھشت نیم نزیک ءَ تمپ ءِ دمگ کسانو ءَ برجاھیں زورگریں پاکستانی پوج ءِ چیک پوسٹ سر ءَ گرنیڈ لانچر ءِ بازیں گولھے آس داتگ کہ بُنجل تہ ءَ نشانگ ءَ کپتگ اَنت- چریشی ءَ پد سرمچاراں مزنیں سلاھاں چہ چیک پوسٹ اُرش نشانگ کتگ، چریشی ءِ آسر ءَ زورگریں پاکستانی پوج ءَ جانی ءُ مالی تاوان چست کنگ کپتگ-

جارکش ءَ گْوشتگ کہ بلوچستان لبریشن فرنٹ اے اُرش زمہ واری ءَ منّ اِیت ءُ سرجمیں بلوچستان ءَ زورگریں پاکستانی پوج ءِ بُنجلاں اُرش نشانگ کنت-

بلوچ یکجھتی کمیٹی ءِ سر ءَ ریاستی کریک ڈاؤن ءُ رھشونانی دزگیری ءِ ھلاپ ءَ جتاجتائیں دمگاں روانک کشگ بیتگ-

بلوچستان ءَ بلوچ یکجھتی کمیٹی ءِ رھشونانی سر ءَ کریک ڈاؤن لَٹ ءُ کُٹ ءُ دزگیریانی ھلاپ ءَ مروچی ھُزدار ءُ واشک ءَ راج ءَ روانک ءُ زھرشانی نکش کنائینتگ-

بلوچ یکجھتی کمیٹی جھالاوان ریجن ھُزدار زون ءِ نیمگ ءَ چہ بی وائی سی ءِ سروک ءُ کارکنانی درکانودی آوار جنگ ءُ زورانسری آوار جنی، پُرایمنیں زھرشانی کنوکانی سر ءَ ریاستی زوراکی، بے میاریں زھرشانی کنوکانی کوش، بلوچ دودماناں لگتمال کنگ ءُ چہ بلوچستان ءَ برجاہ ریاستی زوراکی ءِ سرھال ءِ ھلاپ ءَ زھرشانی روانک برجم داشتگ-

ھُزدار روانک ءَ زالبول ءُ چُکانی مزنیں کچے ءَ ھوار بیتگ اَنت اود ءَ کھنڈ ھائی وانگجاہ ءَ چہ جھالاوان کمپلیکس ءَ تاں مارچ کتگ ءُ ناراہ جتگ-

بی وائی سی ءِ ھلاپ ءَ کریک ڈاؤن ءُ سروکانی دزگیری ءِ ھلاپ ءَ بلوچستان ءِ دمگ واشک ءَ ھم روانک کش اِتگ چریشی ءَ مزنیں کچے ءَ مردم کہ چُک زالبول ءُ کماشانی مزنیں کچے ءَ بھر زرتگ-

روانک ءَ ھواریں مردماں بی وائی سی ءِ راھشونانی دزگیری تُرندی ءَ ایر جتگ ءُ ھکومت ءَ چہ لوٹ کتگ کہ بی وائی سی ءِ سروک ڈاکٹر ماہ رنگ بلوچ ءَ ھوار سرجمیں دزگیریں مردماں زوت یل بکن اِت-

زھرشانی روانک ءَ اے لوٹ ھم کتگ کہ سردار اختر جان مینگل ءَ بلوچ ننگ ناموس مارچ سر ءَ بیتگیں شیلنگ کریک ڈاؤن ءُ دزگیریاں ایر بہ جن اِت ءُ مارچ ءَ ھواریں مردماں ھک بدے اِت کہ آ شال ءَ برو اَنت زھرشانی نکش کت بہ کن اَنت راج اِھد کتگ کہ اھاں ھکومت زُلم ءُ نا انساپیانی سر ءَ ایر کپ اِیت گُڑا آ بے توار نہ نند اَنت-

بلوچستان ءِ بنجاھی شھر چہ شال ءُ مستونگ ءَ پاکستانی پوج ءِ دست ءَ زورانسری بیگواہ بوتگیں سے مردم یل کنگ بوتگ انت۔

اھوالانی رد ءَ ھمے سال ءِ مارچ ءَ چہ شال ءَ لوگے ءَ پاکستانی پوج ءِ دست ءَ زورانسری بیگواہ بوتگیں ورنا داؤد سمالانی یل بوتگ ءُ گس ءَ سر بوتگ۔

ھمے وڑ ءَ چہ مستونگ مرو ءَ سے ماہ پیسر پاکستانی پوج ءِ دست ءَ زورانسری بیگواھیں دو ورنا سمیع اللہ ءُ عبدالنبی ھم یل بوتگ ءُ گساں سر بوتگ اَنت۔ کھول ءَ آیانی یل بیگ ءِ ھال راست کتگ انت-

بلوچ یکجھتی کمیٹی ءِ رھشون ڈاکٹر صبیحہ بلوچ ءِ پت انگت ءَ بیگواہ انت، چیریں ادارھانی نیمگ ءَ صبیحہ بلوچ ءِ دزگیری یا بی وائی سی ءَ دزکش بوگ ءِ شرت ایر کنگ بوتگ انت-

بی وائی سی ءِ رھشون ءِ پت میر بشیر احمد چہ پنچ اپریل ءَ بیگواہ انت-

چاگردی ترامجاھاں شنگ بیتگیں درشان ءَ ڈاکٹر صبیحہ بلوچ ءَ گوشتگ منی پت ءَ ھچ جرم نیست انت بلکیں منی سیاسی لیکھانی پژدر ءَ چِست کنگ بیتگ بلکیں کانون ءِ رھبند نہ انت ءُ سیاسی بلیک میلنگ اَنت-

دمگی اھوالداراں ٹی بی پی ءَ گوشتگ صبیحہ بلوچ ءِ پت پاکستانی چیریں ادارھانی دزگیری ءَ انت – کارندھانی نیمگ ءَ کھول ءَ را گوشتگ صبیحہ بلوچ دزگیر یا بلوچ یکجھتی کمیٹی ءَ دزکش بہ بیت اِنت-

پاکستانی چیریں ادارھاں نیمگ ءَ میر بشیر احمد ءَ کشگ ءَ ھوار کھول ءِ دگہ مردماں بیگواہ کنگ ءِ بیھار دیگ بیتگ انت-

جنیوا ءِ میان اُستمانی ھکانی پھریز داریں گچینی نمائندگ میری لاولر ءَ ڈاکٹر صبیحہ بلوچ ءِ ھلاپ ءَ کاروائی ءِ کنگ ءِ پژدر ءَ پدردی درشان کتگ-

زانگ بہ بیت بلوچ یکجھتی کمیٹی ءِ رھشون ڈاکٹر ماہ رنگ بلوچ جیل ءَ بندیگ کنگ بیتگ ءُ ھمے وڑ سمی دین بلوچ چہ کراچی ءَ لٹ ءُ کٹ کنگ ءَ پد دزگیر کنگ بیتگ ات ءُ پد ءَ یل دیگ بیتگ ات-

بی وائی سی ءِ باسک بیبو بلوچ ءُ گلزادی ھم جیل ءَ بندیگ کنگ بیتگ انت ءُ ھمے وڑ چہ ھب ءُ کراچی ءَ پرکاریں بی وائی سی ءِ باسک فوزیہ بلوچ ءُ ماہ زیب ھم بیگواہ کنگ بیتگ انت پد ءَ بیست ءُ چار ادار ءَ پد یل دیگ بیتگ انت-

بلوچ زالبولانی سر ءَ لٹ ءُ کٹ ءُ دزگیریانی ھلاپ ءَ شال ءَ ھواریں دمگ لکپاس ءِ ھند ءَ مروچی سیزدھمی روچ ءَ سردار اختر جان مینگل ءِ سروکی ءَ یکشل ءَ زھرشانی نندانک برجاہ انت ءُ بلوچستان ءِ سرکار ءِ جار ءِ پد ءَ شال ءَ روکیں دراھیں راھانی سر ءَ کنٹینرز ایر کنگ ءُ گار جنگ جنگ بیتگ انت-

بلوچستان ءَ یکمُشتی ءِ پکار اِنت

نبشتہ کار: شکّل بلوچ

دی بلوچستان پوسٹ

چوناھا اِستانِ پاکستان ءَ بی وائی سی ءِ سر ءَ ھما وھد ءَ کریک ڈاؤن جَتگ وھدے بی وائی سی ءِ رھشونی ءَ بلوچ راج یک راجی مُچّی ءِ شکل ءَ آؤرت۔ پاکستان یک در اَبرمی اِستانے، ءُ اے چہ راجدپتر ءَ زِبھریں اِستانے۔ بلوچستان ءَ پاکستان ءِ زوانسری بیگواھی، بلوچانی کُشت ءُ ھون، داں 77 سال اِنت برجا داشتگ، اے اِستان ءِ لگام دیگ ءَ بی ایل اے ءَ جْوانی کِردے پیلو کُتگ۔ بی وائی سی ءِ رھشون ڈاکٹر ماھرنگ بلوچ پاکستان دہشتگردی ءِ ھلاپ ءَ دگنیا ءِ میان اُستمان ءِ دیم ءَ سُھرا کُتگ کہ پاکستانی ریاست بلوچستان ءَ زورانسری ءَ وتی کبزہ یکشل ءَ داشتگ، ءُ چُشیں روچے نیست کہ پاکستان ءِ ناشرکاریں اِستان بلوچ ڈیھ ءِ گواجناں کشگ ءُ برگ ءَ نہ انت ءُ بلوچ ڈیھ ءِ پُسگاں زورانسر بیگواہ کنگ ءَ پد ماں جنگل دور دیگ ءَ نہ انت۔ اے پلیتیں اِستان پاکستان وتی سیلیں کارانی چیر دیگ ءِ ھاتر ءَ ماں رسانکدر ءَ پروپیگنڈا کنگ ءَ انت کہ بی ایل اے دہشتگردے بلے اسل ءَ بی ایل اے وتی گُلزمین ءِ آجوئی ءِ ھاتر ءَ جنگ ءَ اِنت۔ ناشرکاریں پاکستان سرپراز بٹھی ءِ وڑیں لدیگاں ماں بلوچستان ءِ سائل ءُ وسائلانی لُٹ ءُ پل کنگ ءِ ھاتر ءَ کارمرز کنگ ءَ اِنت۔ بلوچستان ءِ راجدپتر سک کوھن اِنت، ءُ ناشرکاریں پاکستان، اسلام ءِ نام ءَ بلوچستان ءَ وتی چھاونی جوڑ کُتگ، بلوچانی گون ءَ ھما زلم ءُ زوراکیاں کنگ ءَ انت کہ مرچی ڈاکٹر ماھرنگ ءِ رھشونی ءَ دگنیا اے گپ ءَ شر سرپد ءُ پوہ بوگ ءَ انت۔

بی وائی سی ءِ سر ءَ پی پی پی ءِ ھکومت ءَ وتگڑیں کریک ڈاؤن جَتگ، ءُ بی وائی سی ءِ لیڑشپ ءِ بندیگ کنگ ءَ پاکستان گیش بلوچانی چُکچینی ءَ برجا دارگ ءِ ارادہ ءَ ایر کنت۔ بلوچستان پاکستان ءَ زورانسری کبزہ کُتگ، 1948 ءَ، اے گپ ءَ کس انکاری نہ اِنت کہ پاکستانی پوجی لشکراں بلوچستان ءَ بلوچانی گون ءَ زُلم کنگ ءَ انت۔ بلے پاکستان ءَ اے بری بلوچ رھشونیں زالبول زندان ءَ بندیگ کُتگ اَنت۔ بی وائی سی ءِ باسکانی سر ءَ تیر گواری کتگ، ءُ ایشی ءَ چہ اَبید ھم لس مھلوکانی سر ءَ یکدم وتی ھونواری برجا داشتگ۔ پاکستان بی وائی سی ءِ ولگوج کنگ ءِ ھاتر ءَ بلوچ راج ءَ بھر ءُ بانگ کنگ ءِ ھاتر ءَ بلوچاں پارلینانی نزام تہ ءَ دوبر پہ زور برگ ءِ جُھد ءُ کوشست بوگ ءَ انت۔ بلوچ راج ءِ آکبت بلوچستان ءِ آزاتی اِنت، بلوچ راج اے گپ ءَ شری ءِ سر ءَ سرپد انت کہ ما یک آزات اِستانے ءِ دروشم ءَ وشھال بوت کنیں۔ بلوچستان ءِ تہ ءَ لھتے وتگڑیں راجدرو تچک ءَ بلوچ راج ءِ چُکچینی ءَ اے ناشرکاریں اِستان ءِ ھمراھی ءَ گون اَنت گوں۔

پاکستان ءِ مالی نزام سک نزور اِنت، بلوچ راج ءَ انوں وت ماں وتی تپاکی الم بوگ لوٹ اِیت، اگاں یک ءُ دومیگ ءَ گلہ ھست ھم بلے اے ساھت ءَ بلوچ ڈیھ ءُ بلوچ راج ءِ بابت ءَ جیڑگ لوٹ اِیت، الم آ یکجاہ ءُ یکمُشتی ءَ وتی منزل ءَ سوبین بوت کن اَنت۔
بلوچستان شال آجو بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

چہ کراچی ءَ ھمے سال فروری ءَ پاکستانی پوج دست ءَ زورانسری بیگواہ کنگ بیتگیں نودربر یاسر بلوچ آجو بیتگ-

آئی ءِ گْھار ءَ راست کتگ گْوشتگ کہ منی برات یاسر بیست پنچ فروری ءِ شپ ءَ بیگواہ کنگ بیتگ مروچی آ آجو بیتگ ءُ پہ سلامتی لوگ ءَ سر بیتگ-

گوستگیں روچاں پاکستانی پوج دست ءَ یک دروگیں میڑے ءَ کُشگ بیتگیں سیزدہ سالی ئیں محراب ء رحمدل ءُ ھپدہ سالی ئیں خان محمد ء ھیبتان ءِ کھول ءَ شنگ کتگیں درشان ءِ تہ ءَ گْوشتگ کہ پاکستانی پوج ءِ گشتی کاروان ءَ چار اپریل ءَ دوھزار بیست پنچ ءَ کوچہ ترا جبرین بلیدہ ءَ تیرگواری کتگ دو کودکیں چُک ھما وھد ءَ کُشتگ اَنت وھدے آ دمگ ءَ مولمی مُرگانی آیگ ءَ شکار کنگ ءَ بیتگ اَنت-

آئی ءَ گْوشتگ کہ پنچ روچ ءَ گوزگ ءَ اَبید کُشگ بیتگینانی لاش کھول دست ءَ دیگ ءَ پوج انکار کنگ ءَ اِنت، بیران بیتگیں مردمانی لاش تاں مروچی تربت سول نادُراھجاہ ءِ سردجاہ ھم نہ برتگ اَنت، لاشانی ھراب بیگ تُرس اِنت-

دمگ ءِ سیاسی چاگردی پُرکاریں کارکن وسیم سفر ءَ شنگ کتگیں درشان ءِ تہ ءَ گْوشتگ کہ پروش وارتگیں پوج تُرس آماچ بیتگ ءُ کودکیں چُک کشتگ اَنت ءُ نی وتی بدنامی ءِ چیردیگ واستا کُشگ بیتگینانی لاش چیر داتگ اَنت آیاں کھول دست ءَ دیگ ءَ نہ اِنت دانکہ رسانکدر ءَ چیر اِش بدے اَنت-

آئی ءَ گْوشتگ کہ آئی ایس پی آر ءَ دوئیں چُک بلیدہ ءَ جنگ ٹاہ ھم داتگ ءُ آیاں سلاہ بندیں گل مردم پدر کنگ ءَ اِنت، بلے اے لس کسانیں چُک اَنت خان محمد ء غفور ءِ اُمر ھپدہ سال اِنت، محراب ء رحمدل ءِ اُمر سیزدہ سال اِنت کہ پہ شکار ھاتر ءَ گلّھی ڈگاراں مولمی مرگانی شکار کنگ ءَ بیتگ اَنت-

آیاں گوشتگ کہ اگاں اے کُشگ بیتگینانی لاش کھول دست ءَ ندات اَنت گُڑا کھول سول سوسائٹی سیاسی چاگردی گل پارٹیانی ھمراھی ءَ زھرشانی کنگ ءَ لاچار بہ ایں-

بلوچستان نیشنل پارٹی ءِ سروک سردار اختر مینگل ءَ گْوشتگ کہ مستونگ ءَ برجاھیں نندانک ھلاس کنگ ءِ درگت ءَ چہ گوستگیں چیئرمین سینیٹ صادق سنجرانی ءِ زاتی ھساب ءَ اِھوال کتگ بلے نندانک ھلاس کنگ ءَ ھچ وڑیں گپ نہ بیتگ-

آئی ءَ تچک کتگ گْوشتگ کہ مئے نندانک یکشل ءَ برجاہ بیت پرچاکہ ھکومت نیمگ ءَ چہ تنی وھدے ھچ وڑیں سنجیدگیں گامگیج زیرگ نہ بیتگ-

سردار اختر مینگل انّگیں ھکومت ترندی ءَ ایر جتگ گْوشتگ کہ اے بنداتی ھکومت اِنت کہ دگ وت ئِے بند کتگ اَنت – آئی ءِ گْوشگ اِنت کہ وزیر اعلیٰ ءَ ھوار سرجمیں وزیر بے وس گندگ آیگ ءَ اَنت ءُ آیانی نندانک ءَ آیگ ءُ روگ بے مکسد بیگ ءَ اِنت-

آئی ءَ گْوشتگ کہ ھکومت ناں تھنا راج ءَ سزا دیگ ءَ اِنت بلکیں گوستگیں دوازدہ روچ ءَ چہ بند کتگ وتی بدنامی ءِ سبب جوڑ بیگ ءَ اِنت-

اختر مینگل ءَ بُنجاھی ھکومت ءُ مسلم لیگ ( ن) ءِ سروکاں ھم ھال کتگ بلے تنی وھدے وڑیں شریں گامگیج گندگ نہ بیتگ-

آئی ءَ لوٹ کتگ کہ راج ءِ جیڑہ گشینگ واستا سنجیدگیں گامگیج بزرو اِنت اگاں گُڑا زھرشانی برجاہ بیت-