TBP Balochi

بلوچستان ءِ دمگ کیچ ءِ ھند چہ تمپ ءَ بازیں مردمے پاکستانی لشکر ءَ زورانسری آوار جنگ ءَ پد بیگواہ کتگ انت-

زورانسری بیگواھیانی ویل گوستگیں روچ ءَ تمپ ءِ دمگ میراباد ءَ پیش اتکگ کہ اود ءَ پاکستانی لشکر ءَ بازار ءُ کش ءُ گوردی دمگاں بیڑ ءِ وھد ءَ بازیں مردمے زورانسری بیگواہ کتگ اَنت کہ چہ آیاں دگہ مردم یل کنگ بوتگ اَنت بلے انگت ءَ پنچ مردم لشکر ءِ دست ءَ انت-

زورانسری بیگواھیں مردمانی تہ ءَ ایوب ء واحد بخش، فضل ء فدا، سعید ء داد بخش، ضیاء الحق ء اسد اللہ ءُ عابد علی ء اسد اللہ ھوار انت-

بلوچستان ءَ ھمک زورانسری بیگواہ کنگ ءِ ویل دیم ءَ آیگ ءَ انت ءُ دومی نیمگ ءَ زورانسری بیگواہ کنگ بیتگیں مردمانی لاش ھم دزکپگ ءَ انت-

چہ بلوچستان ءَ زورانسری آوار جنی ءِ نشانگ کنگ بیتگیں جنید حمید ءُ یاسر حمید ءِ زورانسری آوار جنی ءَ نُھ ماہ سرجم بیتگ-

آئی ءِ گھار یاسمین حمید ءَ یک درشانے ءِ تہ ءَ گْوشتگ کہ آئی ءِ دوئیں برات انگت بیگواہ ءَ اَنت ءُ کھول سک گم، تُرس ءُ نااُمیتی ءِ زند گوازینگ ءَ اَنت-

یاسمین حمید ءِ رِد ءَ ھشت اکتوبر 2024 ءَ منی کستریں برات جنید حمید پاکستانی پوج ءَ بھوانی شاہ پمپ ءِ نزیک ءَ چہ ھب چوکی ءَ آوار جتگ ءُ سے روچ ءَ پد یازدہ اکتوبر 2024 ءَ آئی ءِ برات یاسر حمید چہ خیل کلات ءَ آوار جتگ ءُ بیگواہ کتگ، تاں آ روچ ءَ بگر داں مروچی آیانی درگت ءَ ھچ وڑیں سرپدی دیگ نہ بیتگ-

آئی ءَ دیمتر ءَ گْوشتگ کہ نُھ ماہ مئے کھول واستا یک تُرسناکیں وابے ءِ رنگ اِنت کہ ھرچ ساھت بے تاھیری، تُرس ءُ نااُمیتی ءَ گوزگ ءَ اِنت ریاستی ادارھانی بے تواری مارا بے تاھیر کنت ءُ انساپ ءِ ودار ھلاس بیگ نام ءَ نزانت-

یاسمین حمید ءَ گْوشتگ کہ آ اے میان ءَ سرجمیں کانودی راہ گچین کتگ انتزامیہ ءَ یکو دزبندی کتگ ، زھرشانی کتگ ءُ واکدار ءِ نیمگ ءَ باز رند ءَ دلجمی دیگ بیتگ آیانی دوستناکاں دیم ءَ کار ایں، بلے تنی وھدے ھچ وڑیں گامگیج زیرگ نہ بیتگ-

زانگ بہ بیت کہ جنید حمید ءُ آئی ءِ مستریں برات یاسر حمید گوستگیں سال اکتوبر ءَ چہ کلات ءُ ھب چوکی ءَ پاکستانی پوج ءَ آوار جنگ ءَ پد آئی ءِ کھول آیانی یل کنائینگ ءِ ھاتر ءَ زھرشانی کنگ ءَ اَنت-

یاسر ءُ جنید حمید ءِ گھار یاسمین حمید ءَ گْوشتگ کہ آ اے میان ءَ سرجمیں کانودی راھاں شتگ ایں ءُ زھرشانی کتگ، انتزامیہ ءِ نیمگ ءَ چہ بازیں رند ءَ آ دلجمی دیگ بیتگ آیانی دوستناکاں دیم ءَ کار ایں بلے تنی وھدے منی برات دیم ءَ آرگ نہ بیتگ اَنت-

آئی ءَ گْوشتگ کہ راج ءَ چہ دزبندی کنان ءَ گْوشتگ ما پسّہ لوٹ ایں انساپ لوٹ ایں ما وتی دوستناکاں پہ سلامتی یل کنائینگ لوٹ ایں شمئے مھربانی اِنت کہ مئے گوم ءَ توار چست بہ کن اَنت اے جیڑہ ءَ دیم ءَ بیار اَنت بیگواھیں مردمانی کھولانی گوم ءَ بہ اوشت اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ دہ جولائی ءِ بیگاہ ھپت ءَ سرمچاراں تمپ ءِ دمگ ملک آباد ءَ نوکیں جوڑ بؤکیں یک پوجی چوکی یے سر ءَ اُرش کتگ ءُ آ مانداشتگ- اے میان ءَ وھدے پوج ءَ سرمچارانی نیمگ ءَ پیشکدمی کتگ، گُڑا سنگر گپتگیں سرمچاراں پسھی اُرش کنان ءَ دو کارندہ کشتگ ءُ دُژمن پُشکنزی ءَ لاچار کتگ-

جارکش ءَ گْوشتگ کہ یازدہ جولائی ءَ زامران ءِ دو جتاجتائیں ھندانی سر ءَ سرمچاراں یکیں وھد ءَ اُرش کتگ، اولی اُرش نیمروچ ءِ دوازدہ زامران ءِ دمگ پگنزان ءَ برجاھیں چیک پوسٹ سر ءَ کتگ کہ اود ءَ مزنیں سلاہ کارمرز کتگ، وھدے کہ دومی اُرش آروسئین ڈن ءِ ھند سر ءَ اسنائپر ٹولی ءَ کتگ چریشی ءَ یک کارندھے جنگ بیتگ-

جارکش ءَ گْوشتگ دوازدہ جولائی ءِ بیگاہ ھشت ءَ نوشکی ءِ دمگ زرّین جنگل ءَ برجاہ ایف سی ءِ بُنجل نشانگ کنگ بیتگ- سرمچارانی یک ٹولی ءَ اسنائپرز ءُ تھرمل سلاھاں چہ تیرگواری کتگ، وھدے کہ دومی ٹولی ءَ راکٹ ءُ وتکاریں سلاھاں چہ اُرش کتگ، چریشی ءِ آسر ءَ سے کارندہ مرتگ ءُ دو ٹپی بیتگ اَنت-

جارکش ءَ گْوشتگ کہ ھمے میان ءَ پوج ءِ کمک ءَ آؤکیں کاروان سر ءَ سنگر گپتگ ءُ اُرش کتگ، چریشی ءَ دگہ سے کارندہ مرتگ ءُ چار ٹپی بوتگ اَنت- اُرش ءَ پد دُژمنیں پوج پُشکنز بیتگ ءُ سرمچاراں پہ سلامتی وتی اوتاکاں سر بیتگ اَنت-

جارکش ءَ گوشتگ کہ دوازدہ جولائی ءِ شپ ءِ نُھ ءَ مشکے ءَ برجاہ بُنجاھی چھاؤنی سر ءَ سرمچاراں بازیں راکٹ آس داتگ ءُ مزنیں سلاھاں چہ بیست ملٹ ءِ دراجیں اُرشے کتگ-

جارکش ءَ گْوشتگ بلوچستان لبریشن فرنٹ اے کاروائیانی زمہ واری ءَ منّ اِیت ءُ اے اِھد کنت کہ بلوچستان ءِ وتواجھی ءَ تاں زورگریں پاکستانی پوج سر ءَ اُرشانی دْرچ برجاہ دار ایں-

پاکستانی لشکر ءَ چہ مشکے ءَ یک مردمے وتی بنجل ءَ لوٹائینتگ ءُ پد ءَ آ کشتگ ءُ چگل داتگ-

بلوچستان ءِ دمگ آواران ءِ تھسیل مشکے ءَ پاکستانی لشکر ءِ دست دزگیر کنگ بوتگیں کریم جان ء عظیم ءِ لاش دزکپتگ۔ بندیگ کنگ ءِ وھد ءَ پاکستانی لشکر ءَ آ سک لٹ شاپ کتگ کہ چریشی ءِ سبب ءَ بیران بیتگ-

اھوالانی رد ءَ کریم جان ھم سال ءِ 22 فروری ءَ پاکستانی لشکر ءَ مشکے ءَ وتی بنجل ءَ لوٹائینتگ ءُ ایشی ءَ پد آ بیگواہ بیتگ۔ بلے آئی ءِ لاش شمبے ءِ روچ ءَ کھول ءِ دست ءَ دیگ بیتگ-

کُشگ بوتگیں کریم جان ءِ نزیکیں مردمانی گْوشگ اِنت کہ کریم جان پیسر ءَ 2023 ءَ پاکستانی لشکر ءَ دزگیر کُتگ ءُ ھشت ماہ ءَ ترندیں لٹ شاپی کنگ ءَ پد یلہ داتگ بلے اے رندی آ زندگی ءَ نہ یتکگ ءُ درکانودی کشگ بوتگ-

زانگ بہ بیت کہ بلوچستان ءَ اے رنگیں بازیں ویل دیم ءَ اتکگ کہ ایشانی تہ ءَ پاکستانی لشکر ءِ دست ءَ بندی ءِ وھد ءَ لٹ ءُ کٹانی سوب ءَ مردمانی بیرانی ءِ ھال رس اِتگ اَنت وھد چہ بازیں وئیل دیم ءَ اتکگ اَنت۔

دگہ ھمے رنگیں ویلے گوستگیں روچ ءَ چہ بلوچستان ءِ دمگ نصیر آباد ءَ پیش اتکگ ات کہ اود ءَ نصیر آباد ءِ جھمنندیں ورنا اعظم رِند بندیگ کنگ ءِ وھد ءَ پاکستانی لشکر ءَ لٹ ءُ کٹانی نشانگ کتگ ءُ کشتگ-

ایشی ءَ چہ پیسر گوستگیں ماہ ءِ 10 جون ءَ پاکستانی لشکر ءَ بلوچستان ءِ دمگ کولواہ رودکان ءَ بیڑ ءِ وھد ءَ نواب ء نوربخش دزگیر کتگ ءُ جرک بنجل ءَ برتگ ءُ رند ءَ آئی ءِ لاش دزکپتگ-

انسانی ھکانی گلاں بلوچستان ءَ زورانسری بیگواہ کنگ ءُ پد ءَ درکانودی کشگ ءِ وئیلانی پٹ ءُ پول ءِ لوٹ کتگ ءُ اے وئیلاں بلوچستان ءَ برجاھیں بلوچ نسل کشی ءِ بھر لیک اِتگ ءُ لوٹ کتگ کہ زورانسری بیگواہ کنگ ءِ وئیلانی سر ءَ تچکیں پٹ ءُ پول کنگ بہ بیت انت-

سلاہ بندیں مردماں پوج ءِ کاروان ءُ بنجل نشانگ کتگ انت-

بلوچستان ءِ دمگ نوشکی ءِ ھالانی رد ءَ گوستگیں شپ ءَ زرین جنگل ءَ پاکستانی پورسز ءِ بنجل ءِ سر ءَ سلاہ بندیں مردماں اُرش کتگ۔ ھمے وھد ءَ لشکر ءُ سلاہ بندیں مردمانی میان ءَ ترندیں جنگ ءُ چوپ برجاہ بیتگ انت-

دمگی مردمانی ءِ رد ءَ لشکر ءِ کمک ءَ سر بوھوکیں کاروان ءِ سر ءَ ھم سلاہ بندیں مردمانی اُرش کتگ۔

دومی نیمگ ءَ مشکے ءَ گوستگیں شپ ءَ ناشناسیں سلاھبنداں گجر ءَ پاکستانی لشکر ءِ مزنیں بنجل راکٹ ءُ دگہ مزنیں سلاھاں گوں نشانگ جوڑ کتگ۔

اُرش ءِ وھد ءَ دمگ ءَ مزنیں تراک ءُ تیرگواری ءِ توار بوتگ-

پاکستانی لشکر ءَ دوئیں اُرشانی تہ ءَ بیرانی ءُ مال ءُ مڈی ءِ تاوان ءِ گمان انت بلے داں انگت ءَ اے اُرشانی زمہ واری کس ءَ پہ وت نہ زرتگ انت-

ھاران شھر ءَ برجاہ ڈی آئی جی کارگس ناشناسیں سلاہ بندیں مردماں تراکاں چہ نشانگ کتگ، چریشی ءِ آسر ءَ سے مردم ٹپی بیتگ اَنت-

دمگی اِھوالکار رِد ءَ اُرش ءِ میان ءَ تُرندیں تراکانی توار اش کنگ بیتگ، چریشی ءَ پد تیرگواری درچ ھم داں دیراں برجاہ بیتگ- ٹپی زوت سول ہسپتال ھاران ءَ برگ بیتگ اَنت-

زانگ بہ بیت کہ ھاران بلوچستان ءِ ھما دمگ ھوار اِنت کہ اود ءَ جتاجتائیں وھداں پاکستانی پوج، پولیس ءُ لیویز سر ءَ جتاجتائیں وھداں وڑ وڑیں اُرشانی دیمپانی کنگ کپتگ-

بلے مروچی بیتگیں وئیل زمہ واری انگت ھچ گل ءَ نہ زرتگ-

اکس کمانچر بلوچ

من ءَ ھَلک نام ءَ نہ بوت

نبشتہ کار: شاھد اھمد

اولی بھر

دی بلوچستان پوسٹ

وھدے کہ چمیشی ءَ چہ لھتے آپ ءُ لاپ بیت کس ءَ پجّا اوں نیار اَنت بِلّے تو زباندوست، راجدوست، ندکار، شائر، بزگر، نیزگار ءُ بلوچے ئے بلّے کہ کماش ءُ زالبولے ئے آ تئی شرپ ءُ اِزت ءَ اوں نہ چار اِیت کہ من آں اد ءِ واجہ آں، زر ءُ مال ءِ مُچّی ءَ کدی کدی وتی کَساں اوں بے ھیال کنت زاناں بلوچے ءَ کہ زر ءُ کلدارے بیت گنوک ءُ بے ھوش بیت،؟ بگند ئے زرّ ءِ بازی ءَ مجگ کار نہ کنت کہ من وت ءَ گوں زر ءُ مالاں چوں بہ لتاراں۔

یک زمانگے ءَ مئے ھَند ءَ مھلوکانی مزنیاں مارا دلترک کُت کہ اے باریں چونیں سیٹے، مالدارے، اڑے گند ئے من ایشی ءِ وڑ ءَ سیٹ ءُ مالدارے بوتیں ”چے چے نہ کُت“ آ وھد ءَ ھمے وڑ ءَ جیڑ اِتگ اَت کہ اے چونیں زندگی یے بہ رَستیں ھرچی کُرتگ اَت، ھرچی رَستگ اَت۔ اے یک ”مائنڈ سیٹّے“ جوڑ بوتگ اَت کہ زر ھرچیز اِنت کہ دل بہ لوٹ اِیت بکن ءُ مجگ بس ”مادیانی“ نیمگ ءَ سر ءُ لینڈ اَت کہ زندگی ءِ مکسد بس تو کہ مالدارے بَہ ئے گوں شرپی ءَ چاگرد منی لوٹوک بیت، منی وازمندگ بیت ءُ منی ”گلام“ بیت، اے ”مائنڈ سیٹّ“ ءَ مھلوک بد ھال کُتگ اَت، وھدے استان مھلوک ءِ مالی جاوراں نگیگ کنگ ءِ جُھد ءَ کنت گڑا چمیشاں چِہ لھتے ھمے نادراھی ءَ اوپار کُت نہ کن اَنت کہ منی اِزت ءُ شرپ نوں گار مہ بیت، من بزگ بوتاں کہ نوں کس من ءَ یک ٹَکّایے ءَ جُست ءُ ھساب نہ کنت۔

گڑا پد ءَ ھمے درگت ءَ ھمے مردم اَنچیں کدم چِست کن اَنت کہ اِستان ءِ مَکسد بوتگ اَت۔ منشیات ءِ کاروبار مھلوکاں بَڈّ ءَ اَت ھر لس مردمے دگہ پلگاریں کاروبار ءِ نہ بوگ ءِ سبب ءَ مھلوک چِداں رھادگ بوت اَنت۔ میزان میزان ءَ ھر یکے در کَیت من آں، ھمے وَسّاچ کُتگیں جاورانی پُشدر ءَ لھتے دگہ مولدار گوں دگہ نمونھاں ”مائنڈ سِیٹے“ ءَ گوں دلجمی ءَ کار ءَ اِت اَنت۔ پہ زَر ءُ مالاں اَنچُش ھُژیار اِت اَنت پد ءَ گیشتر چاگرد ءِ تہ ءَ اَگلمند ھمیش اِت اَنت بزاں رَدیں زندے ءَ گْوزگ ءَ اِت اَنت، چہ وت ءَ رَد پَھمی ءُ بے زانتی ءَ چہ شِھمیں زند ءَ زِبھر اِت اَنت کہ گُشگ نہ بیت۔

ھمے بے زانتیں چاگرد ءَ من ءَ وتی وڑ ءَ کُتگ اَت اناگہ چہ ایشاں یکے بہ رَکّ اِیت گڑا آئی ءِ بَھت ءُ کِسمت اَت، بلکیں زندگی ءِ توک ءَ یک شریں کارے ءِ سبب ءَ ھمے مُزّ اِنت کہ رَستگ اَت من ءَ۔ ”یک گلامیں چاگردے ءِ مستریں زالم بے زانتی اَت“ کدی کدی من ھمے مار آں ءُ بژن ھم کناں کہ چونیں چونیں مردم چہ دستاں لَگشتگ اَنت، نشہ، دُزی، بدکاری ءِ آماچ بوت اَنت کہ گْوشگ نہ بیت۔ من ھما ساھت ءَ شری ءِ سر ءَ گیر کاراں، کہ وھد ءِ زالمیں جاوراں چوں پتاتگ اَت۔ چاگرد ءِ تہ ءَ منی نام ”گنوکے“ اَت کہ گنوک، کہ مِیدّ ئِے مزن اِت اَنت زوت زوت ءَ رؤت، جلدی جلدی ھبر کنت، من اَنچوش نامدار اِت آں کہ منی درور دگہ منی وڑیں شَگالے ءَ گْوشتگ اَت ئِے، گنوک نامدار اَت، میزان میزان ءَ جِنکانی گور ءَ ھم نامدپ بوتگ اِت آں گُش ئے اے ”گْوھبرے“ نہ بوت پورائیں ھَلکے ءَ را ڈُلّ کتگ اَت ئِے۔

گُش ئے گنوک ءَ را ھَلک نام ءَ نہ اَت پرچا کہ نامدپ اَت، من ءَ یک آدتے گون اَت کہ بِھ مسکرائی نہ زانت، من ءَ مُدام تَھنائی وش بوتگ اَت پرچاکہ کہ من ءَ وتی اِزت دوست اَت چو مہ بیت کہ کسے گوں من مسکرائی یے بکنت من پد ءَ آئی ءِ سر برانز مہ گِر آں چمیشکا من وت ءَ چہ چاگرد ءَ گِستا داشتگ اَت۔ ”رَند ءَ ھمے تَھنائی ءِ سبب ءَ وھدے دیم ءَ پُشت ءَ چکّرین آں گند آں کہ پہ وت ءَ چنکیاس دژمن جوڑ کُتگ اَت، من ءَ اے گمان نیست اَت کہ مردم من ءَ چنکیاس دوست اوں دار اَنت“-

اے ساھت ءَ من یک جتائیں دروشمے ءِ تہ ءَ اِت آں من وت ءَ چار آں نہ گند آں آیاں، آ چہ من سک باز دور اِت اَنت گُش ئے من انگت ءَ گیش تَھنا بوان بوت آں، من جیڑ اِت کہ جیڑہ چاگرد نہ اَت، جیڑہ من ءُ منی گنوکی نہ اَت بلکیں جیڑہ گلامی اَت یکشل لیب دارگ ءَ اَت، اے یک نہ کُٹّوکیں جیڑہ یکشل ءَ مارا پتایگ ءَ اَت۔

اے وھدی چاگرد ءِ مستریں جیڑہ لاپ اَت ھمے لاپ ءِ شومی ءَ چنکیاس ورناھاں وت ءَ برباد کُت، ھمے لاپ ءِ شومی ءَ ورناھاں وانگ ءُ زانگ یل دات، ھمے لاپ ءِ شومی ءَ نشہ ءِ تہ ءَ آماچ بوت اَنت، لھتے اَنچیں اِشکی گنوک ودی بوت کہ بے ساری شلوار ءِ اوں سُدّ ءَ نہ اِت اَنت۔۔

روان اِنت۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان تھی وزیر ءَ وتی شنگ کرتگیں شش ماھی رپورٹ ءِ تہ ءَ گوشتگ کہ بلوچستان ءِ تہ ءَ پھازگی لشکر ءُ سیٹلرزانی سر ءَ بوتگیں اُرشانی تہ ءَ 45 درسد گیشی اتکگ ۔

شال بلوچستان سرکار ءِ تھی وزیر نیمگ ءَ شنگ کنگ بوتگیں رپورٹ ءِ تہ ءَ گوشگ بوتگ بلوچستان ءَ اے سال ءِ اولی ششیں ماھانی بزاں یک جنوری ءَ بگر تاں یازدہ جولائی 2025 ءِ میان ءَ سلاہ بندیں اُرشانی تہ ءَ گیشی گندگ ءَ اتکگ ۔

رپورٹ ءِ رِد ءَ اے ششیں ماھانی میان ءَ 501 ارش بوتگ انت کہ 257 مردم مرتگ ءُ 492 زدگ بوتگ انت ۔

تھی وزیر ءِ رد ءَ اے ششیں ماھاں پھازگی لشکر ءِ سر ءَ بوتگیں 332 اُرشانی تہ ءَ 133 کارمند بیران ءُ 338 زدگ بوتگ انت ۔ اے اُرشانی تہ ءَ دگ بندگ اُرش کنگ بوتگ ریموٹ کنٹرول بمب تراک ءُ دزبمب اُرش کنگ بوتگ انت ۔

رپورٹ ءِ رِد ءَ سیٹلرزانی ٹارگٹ ءِ تہ ءَ چہ گوستگیں سال ءَ 100 درسد گیشی گندگ ءَ اتکگ ۔ اے سال ءَ تنی وھدی چاردہ ویل بوتگ انت 52 سیٹلر کشگ بیتگ انت ءُ یازدہ زدگ بوتگ انت وھدیکہ گوستگیں سال ءَ ھپت اُرشانی تہ ءَ 22 سیٹلر کشگ بوتگ انت ۔

بلوچستان ءِ تھی وزیر ءِ ششماھی رپورٹ ءِ رد ءَ 28 آئی ای ڈی بمب اُرشاں 19 مردم بیران بیتگ انت ءُ 62 زدگ بوتگ انت وھدیکہ ھمے سال ءَ جاپر ایکسپریس ءِ سر ءَ بوتگیں اَرش ءَ 28 مردم جنگ بوتگ انت ، ریل ءِ سر ءَ بوتگیں اُرشاں یک مردمے چہ وتی زند ءَ زبھر بوتگ ۔

رپورٹ ءِ رد ءَ ششیں ماھانی تہ ءَ 35 دزبمب اَرشاں سے مردم مرتگ انت ءُ 30 زدگ بوتگ انت ۔ مزھبی جیڑھے دو ویلاں پنچ مردم مرتگ انت ۔ پولیو کارکنوکانی سر ءَ بوتگیں یک اُرشے ءَ یک مردمے مرتگ ءُ دمگی رھوتکاری ءِ سر یَ بوتگیں نھ اَرشاں 2 مردم زدگ بوتگ انت وھدیکہ آ تاوان داتگ انت ۔

تھی وزیر ءِ گوشگ انت کہ اے ویلانی گیشی ترندی ءَ ھمے زاھر بیت کہ سلاہ بندیں ٹولی مھکمیں شوربندیانی رد ءَ پھازگی ادارہ ایدگراں نشانگ کنگ ءَ انت ۔

ایشی ءَ ابید بلوچستان ءِ آجوئی جھد ءَ جھد کنوکیں سلاہ بندیں گل بلوچستان لبریشن فرنٹ ءُ بلوچ لبریشن آرمی ءَ ھمے سال ءِ وتی وتی ششماھی رپورٹ شنگ کتگ انت ۔

بلوچ لبریشن آرمی ءِ رپورٹ ءِ رد ءَ ھمے سال ءَ جنوری تاں جون ءِ میان ءَ بی ایل اے ءَ سرجمی ءَ 95 اَرش کتگ کہ چریشی ءَ 253 پھازگی کارمند مرتگ انت ءُ سد زدگ بوتگ انت ۔ اے اَرشانی میان کساس بیست سلاہ دستیگ کتگ ءُ 39 مردم دزگیر کنگ بوتگ انت ۔

بی ایل اے ءَ پاکستانی پوج ءِ پنچ بنجلانی دستیگ کنگ ءِ ھم ٹاہ داتگ ۔ گل ءِ رد ءَ اے میان ءَ مجید بریگیڈ ءِ سَے جند ندری اُرش کتگ کہ مَچ ، کراچی ءُ گوادر ءَ کنگ بوتگ انت ، بی ایل اے پتھ اسکواڈ ءُ اسپیشل ٹیکٹیکل آپریشن اسکواڈ ءَ ھم نوشکی ، کلات ءُ شال ءَ اُرش کتگ انت ۔

بلوچستان لبریشن فرنٹ ءِ ششماھی رپورٹ ءِ رد ءَ اُرشاں 221 کارمند کشتگ 148 زدگ بوتگ انت ۔ گل ءِ رد ءَ اے اُرشاں 131 ءَ گیش سلاہ دستیگ کتگ ،88 ءَ گیش پھازگی لشکر ءِ گاڑی سرجمی ءَ تباہ ءُ بے دردی کتگ انت۔

ھردو گل اے میان ءَ وتی 53 سرمچارانی جنگ بوگ ءِ گپ راست کتگ کہ آیانی تہ ءَ بی ایل ایف ءِ ھبدہ سرمچار ءُ بی ایل اے 29 سرمچار ءُ ھپت جند ندر ھوار انت ۔

پولیس رِد ءَ بلوچستان ءِ دمگ نصیر ِآباد ءِ دمگ ڈیرہ مراد جمالی نزیک ءَ منگولی پولیس تھانہ نزیک ءَ گمانی بدکاری ءِ بھتام ءَ لوگ واجہ ءَ وتی لوگ بانُک ءِ گُٹ گپتگ ءُ کُشتگ ءُ پد ءَ تتکگ-

وئیل ھال سر بیگ ءَ منگولی پولیس ءَ لاش دستیگ کتگ نادُراھجاہ ءَ برتگ پہ گیشیں چار ءُ ٹپاس ءَ پد کھول ءِ دست ءَ داتگ ءُ ایف آئی آر نبشتہ کتگ ءُ میابار ءِ پٹ ءُ پول بندات کتگ-

زانگ بہ بیت کہ بلوچستان ءَ گیشتر وھداں ننگ ءِ نام سر ءَ کُشگ ءِ وئیل دیم ءَ کاینت بلے اے وئیل ءَ ھمگرنچ گیشتریں میاربار کانود ءَ چہ وت ءَ رکینتگ ءُ تچگ ء سوبمند بیتگ اَنت-

بازیں وئیل انچیں ھم دیم ءَ اَتکگ اَنت کہ اود ءُ زاتی دلرنجی سر ءَ زالبولاں کُش اَنت ننگ ءِ نام ءَ دیگ بیتگ اَنت ءُ پد اے وڑیں جیڑھاں ٹکی رسم ءُ رواج ءِ بُنیاد ءَ میاربار سزا ءَ چہ رکّ اَنت-

بلوچستان ءَ زالبول ءِ ھکانی ءُ لَٹ ءُ کُٹ ءِ ھلاپ ءَ کار کنوکیں این جی اوز ءُ گلانی رِد ءَ سرجمیں پاکستان ءَ زالبول ھمکروچ چاگردی زوراکی ءِ نشانگ بنت بلے اے وئیلانی تہ ءَ گیشتر بلوچستان ءَ بنت-

یک ماھے بیت کہ بلوچستان ءِ ھَند چاگی ءِ دمگ نوکنڈی ءِ نزیک ءَ ایران ءِ چیر دستی ءَ روبرکتی بلوچستان ءِ سیمسر ءَ راجے پاس بند کنگ بوتگ۔ ایران ءُ اسرائیل ءِ نیام ءَ گوستگیں اڈ ءِ پد ءَ واکداراں اے کراسنگ ءِ ھاتر ءَ ممکنہ پھازیں گامگیج ءِ رد ءَ ادارُکی بند کتگ۔

نوکنڈی ءُ کش ءُ گور ءِ دمگ کہ اود ءَ مھلوک چہ سیمسر ءِ بند بوگ ءَ سک باز تاوان بوتگ انت۔

چاگی ءِ دمگی مردمانی گشگ انت کہ جاور ھال ءِ وتی وتی جاہ ءَ واتر بوگ ءَ ابید راجے روگ ءُ آیگ انگت بند انت کہ ایشی ءَ نہ ایوک ءَ ھزاراں مردمانی زندمان ءِ سر ءَ تاوان رستگ بلکیں ھَند چاگی ءِ لس مالی ھم ھلاس بوگ ءِ کش ءَ سر بوتگ۔

زانگ بہ بیت کہ ڈیزل ءُ دگہ سامان چہ ایران ءَ راجے پھاز ءِ راہ ءَ سر کنگ بوتگ اَنت ءُ ھَند چاگی ءَ چہ چار ھزار ءَ گیش گاڑیاں بلکل رجسٹریشن ءِ رد ءَ ماہ ءَ یک رندے ایران ءَ سامان آرگ ءِ موکل بوتگ۔ اے کار پہ دمگی مردماں زند ءِ مستریں وسیلہ بوتگ ءُ اے محدودیں کاروبار کہ گوں مرز ءَ بندوک ات، ھزاراں ھاندان ءِ زند ءِ تھنا کمک بوتگ۔

بلے کراسنگ ءِ بند کنگ ءَ پد جاور ھال سک ھراب بوتگ اَنت۔ دمگی مردم سکیں مالی جیڑھانی دیمپان ءُ آماچ انت، کاروبار تباہ بوتگ انت، مکینک ءُ ویلڈنگ ءِ دکان، ھوٹل، ءُ ورگی سامان ءِ کاروبار تاوان ءِ آماچ انت، ھمے وھد ءَ سداں ورنا کہ روزہ ءِ سر کار کنگ ءَ انت بے روزگار بوتگ انت ءُ بازیں ھاندان نان ءِ سر ءَ وھد ءَ تیلانک دیگ ءَ انت۔

گوستگیں روچاں دلبندین ءَ برجم داشتگیں گرینڈ نیشنل جرگہ ءَ راج ءَ بلوچستان ءِ سر وزیر ءُ دگہ مزنیں اگدہ داراں چہ اپیل کتگ کہ راجے مرز ءَ را زوت پچ بہ کن انت دانکہ دمگی آبادی یک رندے پد ءَ روزگار ءِ شواز ءَ بہ کنت ءُ یک ممکنہ انسانی جیڑہ ءَ چہ بچگ بہ بیت۔

پبلک ءُ کاروباری دمگاں یک رندے پد ءَ سک باز لوٹ کتگ کہ واکداراں زوت راجے مرز پچ کنگ بہ بیت دانکہ مالی کار پد ءَ بندات بہ بنت ءُ چاگی ءِ زِبھریں مردم وشیں ساھے بہ زور انت۔