TBP Balochi

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مروچی مئے سرمچاراں جیونی ءُ نوشکی ءَ دو کاروائیاں چہ زورگریں پاکستانی پوج نشانگ کتگ ءُ آ جانی ءُ مالی تاوان داتگ-

جارکش ءَ گْوشتگ کہ بنداتی کاروائی مگرب ءِ وھد ءَ گوادر ءِ دمگ جیونی ءَ کوسٹل ھائی وے سر ءَ گبد ھند سر ءَ کتگ – مئے سرمچاراں دُژمن ءِ یک گاڑی یے ریموٹ کنٹرول آئی ای ڈی ءَ چہ دُژمن نشانگ کتگ- اے اُرش ءَ دُژمنیں پوج ءِ یک کارندھے جاہ پہ جاھی مرتگ وھدے کہ چار سک ٹپی بیتگ اَنت، ءُ گاڑی ھم ءَ سک تاوان رس اِتگ-

جارکش ءَ گْوشتگ دومی کاروائی نوشکی ءِ دمگ قادر آباد ءَ کتگ اود ءَ مئے سرمچاراں دُژمن ءِ ھازر سروس پوجی کارندہ، ظاھر ء گوھر خان مینگل نشانگ کتگ کشتگ- اے مردم ناں تھنا پاکستانی پوج ءِ بھر بیتگ بلکیں چیریں ادارہ ملٹر انٹیلی جنس ( ایم آئی ) ءِ واستا ھم کار کنگ ءَ بیتگ- انّگیں وھداں آ رکشہ ڈرائیور دروشم ءَ نوشکی ءُ کش ءُ گوراں چاریگری ءَ جرمی کار ءَ کنگ ءَ بیتگ-

جارکش ءَ گْوشتگ کہ اے کارندہ ءَ زورگریں پوج ءِ دمگی ھساب ءَ پوجی ءُ کمک کنگ ءَ بیتگ ءُ مئے گل ءَ نام دپ بیتگ- مروچی ما اے گُڈی آسر ءَ سر کتگ-

جارکش ءَ گْوشتگ کہ ما یکرندے پد ءَ تچک کنگ لوٹ ایں کہ زورگریں پاکستانی پوج ءُ آئی کمکار کجا بہ بنت، آیاں نشانگ کن ایں- مئے جُھد بلوچ راجی آجوئی ءُ وتواجھی ءَ واستا، ءُ اے کاروائی اے درچ بھر اِنت-

شال ءِ دمگ سریاب کسٹم ءَ پاکستانی پوج ءَ چیف سفر بلوچ چہ دکان ءَ دزگیر کتگ ءُ پد ءَ بیگواہ کتگ-

کھول ءِ رد ءَ دزگیر کنگ ءَ پد آئی ءِ ھچ ھال نیست انت ءُ سفر خان ءِ سلامتی ءَ یل دیگ ءِ لوٹ اش کتگ-

ھمے وڑ چہ کیچ ءَ بیگواھیں مردمے یل بیتگ-

اھوالابی رد ءَ یل دیگ بیتگیں مردم ءِ پجار طائف ء طارق جھمنند کلاھو ءِ نام ءَ زانگ بیتگ کہ بیست فروری دوھزار ءُ بیست ءُ پنچ ءَ پاکستانی پوج ءَ چہ بالیچہ ءَ آوار جتگ ءُ برتگ ءُ مروچی آئی ءِ یل بوگ ءِ ھال کھول ءَ راست کتگ-

بلوچ یکجھتی کمیٹی ءِ نیمگ ءَ شنگ بیتگیں یک بیانے ءِ تہ ءَ گْوشگ بوتگ کہ مئے جھدکار گلزادی بلوچ گْوستگیں شپ ءِ 8 بج ءِ نزیک ءَ سی ٹی ڈی ءِ کارندہ ءُ پولیس ءَ پہ زور برتگ۔ آئی ءِ جاہ ءُُ نشان ساھتانی ساھتاں زانگ نہ بوتگ۔ شپ ءِ 12:00 ءِ نزیک ءَ کوئٹہ جیل ءَ آرگ ءَ پیسر مردینے سی ٹی ڈی ءِ کارندہاں بے دردی ءَ ٹارچر کتگ۔

آئی ءَ گْوشتگ کہ آئی ءَ را چار کلاک ءَ گیش جسمانی رنگ ءَ جتگ ءُ ٹارچر کنگ بوتگ۔ یک زالبولیں جھدکارے ءِ گوں اے بے انسانی سلوک بلوچ پرامن گھگیری ءِ ھلاپ ءَ ریاست ءِ برجاھیں ناشرکاری مھم ءِ بھر اِنت۔ ما وتی کارگر ءِ سر ءَ زوراکی ءِ سرجمیں ذمہ وار ریاست ءَ لیکیں۔ اے فاشسٹ پندل مئے رھادگ بوھگ ءَ رکّینت نہ کن اَنت۔

بلوچستان ءِ دمگ نوشکی ءَ سلاہ بندیں مردماں تیرگواری کتگ ءُ پاکستانی پورسز فرنٹیئر کور ایف سی ءِ کارندہ کشتگ-

کشگ بیتگیں کارندہ ءِ پجار ظاھر ء گوھر خان مینگل ءِ نام ءُ زانگ بیتگ – وئیل نوشکی ءِ دمگ قادر آباد ءَ پیش اتکگ-

دمگی مردمانی رد ءَ اے مرد فرنٹیئر کور ایف سی ءِ کارندہ بیتگ کہ عید ءِ چُٹیانی وھد ءَ لوگ ءَ اتکگ ءُ سلاہ بندیں مردمانی نشانگ کپتگ –

داں انگت ءَ وئیل ءِ سبب زانگ نہ بیتگ ءُ زمہ واری کس ءَ پہ وت نہ زرتگ-

بلوچستان ءِ دمگ چہ ھاران ءَ بمب تراک ءِ ھال اِنت-

بمب تراک ھاران شھر ریڈ زون ءَ کمشنر رخشان ڈویژن ءِ لوگ نزیک ءَ بیتگ-

ھالانی رِد ءَ تراک ءَ یک مردمے ٹپی بیتگ-

بلے اُرش زمہ واری انگت ھچ گل ءَ نہ منّ اِتگ-

پنجگور ءِ دمگ وشبود ءَ گوستگیں شپ ءَ سرف گاڑی ءَ سواریں سلاہ بندیں مردمانی تیرگواری ءَ یک مردمے بیران ءُ سَے مردم ٹپی بیتگ انت-

چہ تیرگواری ءَ بیران بیتگیں مردم ءِ پجار بھادر شفیع ءِ نام ءَ زانگ بیتگ مک لیکچرار مسلم شفیع ءِ برات انت-

ھمے وڑ سَے ورنا سھیل، شاید ءُ فرحان ٹپی بیتگ انت زدگ بیتگین وت ماں وت وارس انت-

اُرش ءَ پد زدگ بیتگیں مردم ڈسٹرکٹ ٹیچنگ ھسپتال ءَ برگ بیتگ انت-

دمگی مردمانی رد ءَ کشندھانی سیادی سرکاری پلامرزی ءَ ھستیں ٹولی ڈیتھ اسکواڈ ءَ انت-

بلوچستان ءِ دو مزنیں شھدگانی بند بوھگ ءَ گوستگیں 10 روچاں چہ لس مھلوک، سوداگر، ءُ ٹرانسپورٹرانی مشکلات گیش بوتگ انت۔ ٹرانسپورٹر ءُ کاروباری برادری ءَ ھر روچ لکاں کلدار ءِ تاوان بوگ ءَ انت۔

کوئٹہ چیمبر آف کامرس ءِ صدر محمد ایوب مریانی ءِ گشگ انت کہ شھدگانی بند بوھگ ءِ سبب ءَ تاجراں ایوک ءَ کنٹینر ءِ ھاتر ءَ ڈیمریج چارجز ءِ تہ ءَ روچے یک لکھ 20ہزار امریکی ڈالر (کساس 33.6ملین کلدار) ءِ تاوان برداشت کنگ ءَ انت وھدے کہ ایشی ءَ چہ گیش دگہ مالی تاوان انت۔

بلوچستان نیشنل پارٹی ءَ ڈاکٹر ماہ رنگ بلوچ ءُ بلوچ یکجھتی کمیٹی ءِ ایندگہ زالبولیں سروکانی دزگیر کنگ ءِ ھاترا 28 مارچ ءَ چہ وڈھ ءَ تاں کوئٹہ ءَ لانگ مارچے بندات کتگ ات بلے سرکار ءَ زھرشانی کنوکاں کوئٹہ ءِ تہ ءَ روگ ءَ چہ مکن کتگ ات انت۔

بی این پی ءَ مستونگ ءِ لکپاس ءَ دو مزنیں شھدگانی سر ءَ نندانک داتگ۔ سرکار ءَ لانگ مارچ ءِ بھر زوروک دیم ءَ روگ ءَ چہ رکّینگ ءِ ھاترا کنٹینر ایر کنگ ءُ کھڈ ءِ کشگ ءَ لکپاس ٹنل ھم بند اش کتگ۔

زھرشانی ءِ دھرنا ءُ سرکاری اڑاندانی سبب ءَ 28 مارچ ءِ شپ ءَ چہ دو مزنیں شھدگ بند کنگ بوتگ اَنت کہ ایشانی تہ ءَ این 40 شھدگ پاکستان ءَ گوں ایران ءَ ءُ این 25 شھدگ کوئٹہ ءَ گوں پاکستان ءِ مستریں ءُ کاروباری شھر کراچی ءَ ھمگرنچ کنگ بیت۔

کوئٹہ چیمبر آف کامرس ءِ صدر ایوب مریانی ءَ گوشت کہ این 40 شھدگ ءِ بند کنگ ءِ سبب ءَ 847 بوزر ءَ ھوار 1200 ءَ چہ گیش مال برداریں گاڑی ایران ءِ سیمسر ءَ اوشتاتگ انت کہ ایل پی جی ءُ پٹرولیم ءِ چیز پاکستان ءَ برگ ءَ انت۔ ھر گاڑی ءِ سر ءَ روچے 100 ڈالر ءِ نزیک ءَ کنٹینر ڈیمریج ءِ چارج جنگ بوھگ ءَ انت۔

آئی ءَ گوشت کہ کوئٹہ ءِ این ایل سی ڈرائی پورٹ ءَ ایران ءِ نیمگ ءَ روگ ءَ آلو ءُ برنج ءِ باریں 200 گاڑی ھم اوشتاتگ اَنت ءُُ آھانی تہ ءَ سامان زوت ھراب بوھگ ءِ نزیک ءَ اَنت۔ اے چیزانی دمگی بازار ءَ بھا کنگ ھم ممکن نہ اِنت پرچا کہ ادا چہ لوٹ ءُ گزر ءِ نہ بوھگ ءَ ریٹ سک کم اَنت۔

بلوچستان ءِ مستریں ٹرانسپورٹ کمپنی ءِ واھند حاجی مظفر علی لھڑی ءِ گشگ انت کہ ناامنی ءُ راہ بندی ءِ سوب ءَ ٹرانسپورٹ پڑ سکیں بھران ءِ تہ ءَ انت۔

آئی ءِ گشگ ءِ رد ءَ “مئے کاروبار گوستگیں سئے ماہ ءَ چہ متاثر بوتگ ءُ گوستگیں 10 روچاں سرجم ءَ بند اِنت۔” ‘

حاجی مظفر علی لھڑی ءَ گوشت کہ مستونگ ءَ چہ گوزوکیں راہ کوئٹہ ءَ گوں کراچی ءَ ہمگرنچ کنوکیں راہ کسان تریں ءُُ مستریں راہ انت۔ مئے روچ ءَ چہ اد ءَ 12 ءَ بگر داں 15 گاڑی رؤگ ءَ انت بلے نوں ایوک ءَ دو ءُُ سئے گاڑی چہ سبی، جیکب آباد، سکھر ءُُ اندری سندھ ءَ گوزوکیں متبادل راہ ءَ روگ ءَ انت کہ اے راہ دراج ءُُ گران انت۔ اے راہ ءَ 200 لیٹر گیشیں ڈیزل کارمرز بیت ءُ کرایہ ءَ ھم نزیک ءَ دو ھزار کلدار گیش بوتگ پمیشکا مسافر اے راہ ءَ روگ ءَ چہ رکّگ ءَ اَنت۔

بلوچستان لبریشن پرنٹ ءِ جارکش میجر گْوھرام بلوچ ءَ رسانکدر ءَ وتی شنگ کتگیں درشان ءِ تہ ءَ گوشتگ کہ پنچ اگست دوھزار بسیت چار ءَ دژمن ءِ چاریگاں سرمچار صابر بلوچ پنام ءِ شھمین ءَ شھید کرتگ۔ چہ لھتیں سبّباں چہ گل ءَ آئی شھیدی ءِ ھال شنگ نہ کتگ ۔

جارکش ءَ گوشتگ کہ شھید صابر بلوچ ء دادشاہ گورستانی تیرتیج آواران ءِ جھمنند اِنت۔ آئی ءَ دوھزار چاردہ ءَ پہ راجی آجوئی ءِ جھد ءَ بی ایل ایف ءِ ھمگرنچی گچین کرتگ۔ جھد ءِ میان ءَ پاکستانی پوج ءَ آئی کھول زوراکیانی نشانگ کرتگ، بلے آ چہ وتی کھول ءِ درسیں ریاستی زوراکی ءُ جنجالاں ابید گوں آجوئی جُھد ءَ بندوک بیتگ۔

جارکش ءَ گوشتگ کہ دوھزار شانزدہ ءَ شھید ءِ برات محمد عظیم ءَ پاکستانی پوج ءَ زور بیگواہ کرتگ ءُ رند ءَ ھب ءَ آئی لاش چگل داتگ۔

جارکش ءَ گوشتگ کہ 2023 ءَ پاکستانی پوج ءَ آواران ءِ کوھی دمگاں لشکر کشی کرتگ، ھمے میان ءَ پوج ءَ آپ ءِ چمگانی تہ ءَ زھر مان کرتگ، ھمے زھریگیں آپانی ورگ ءَ شھید ءِ پت دادشاہ کہ آ یک شپانکے بیتگ ءُ شھید بیتگ۔

جارکش ءَ گوشتگ کہ چہ اے درسیں زوراکیاں ابید شھید صابر بلوچ ءِ کھول پہ بلوچ راجی آجوئی جُھد ءِ سوبین کنگ ءَ مرچی ھم پرکار اِنت۔ آیانی گوں جُھد ءَ وپاداری ءُ ھمگرنچی ءَ ھچ وڑیں کمی نہ یتکگ۔

جارکش ءَ گوشتگ کہ بلوچستان لبریشن فرنٹ شھید سابر بلوچ ءُ آئی کھول ءِ گرانبھائیں دیمونیاں سُھرچکیں دروت ندر کنت ءُ ھمے کول ءَ کنت کہ پہ سرڈگار ءَ جانانی دیمونی دیوکیں بامردانی کاروان ھرچ وڑ ءَ داں گڈی منزل ءَ سر کنگ بیت۔

بلوچستان نیشنل پارٹی ءِ سروک سردار اختر مینگل ءَ بلوچ یکجھتی کمیٹی ءِ زالبولیں باسک چہ شال ءَ آوار جنی ءَ ایرجنان ءَ گْوشتگ کہ اے وڑیں وئیل جاوراں گیش نگیگی نیمگ ءَ بارت-

اختر مینگل ءَ گْوشتگ کہ گُلزادی بلوچ چہ شال آوار جنی ءِ ھال اش کتگ سک سدمہ بیتگ آں اے وڑیں وئیل انسانی ھکانی تُرندیں ھلاپ ورزی ءُ انساپ ءِ دپ ءَ شھماتے-

بی این پی ءِ سروک ءَ گْوشتگ کہ جست اد ءَ چست بیت کپ واکدار کجام وڑیں کلوہ دیگ لوٹ اَنت وھدے آ ھکیں تواراں ایرموش ءِ کنگ جاہ ءَ آیانی تُرساں گوش بدار اَنت-

آئی ءَ گْوشتگ کہ اے وڑیں گامگیج بے باوری راھبنداں گیش کن اَنت جاور پیسر ءَ چہ نگیگی ءَ ڈن اَنت، ءُ اے وڑ کار آیاں گیش نگیگ کن اَنت-

بلوچستان ءَ دروگیں میڑاں زورانسری بیگواھیں مردمانی کوش ءِ وئیل ترسناکی ءَ گیش بیگ ءَ اِنت دو روچ ءَ بارکھان، ھُزدار، مشکے ءُ بلیدہ ءَ چہ دزکپتگیں ھالانی رِد ءَ جتاجتائیں وئیلاں پاکستانی پوج ءَ دوازدہ دزگیریں مردم دروگیں میڑاں کشتگ اَنت-

چہ بارکھان ءَ مروچی سے ورنایانی لاش دزکپتگ اَنت-

بارکھان ءِ دمگ چہ مھمہ صمند خان ءَ سء ورنایانی لاش دزکپتگ اَنت کہ آ تیر جنگ ءُ کُشگ بیتگ اَنت-

دمگی اِھوالکار رِد ءَ کُشگ بیتگیں مردمانی پجّار بزدار ٹک ءَ چہ سیادی داروکیں حق نواز بزدار، شیرو بزدار ءُ گل زمان بزدار نام ءَ چہ زانگ بیتگ اَنت سئیں مردم جتاجتائیں وھداں زورانسری بیگواہ کنگ بیتگ اَنت-

اِھوالکار گوشگ اِنت کہ حق نواز بزدار پنچ اپریل ءَ موسیٰ خیل ءِ دمگ چہ کاریڑ ءَ آئی ءِ لوگ سر ءَ بیڑ وھد ءَ پوج ءَ آوار جتگ، وھدے کہ شیرو بزدار نُھ ءَ ماہ ءَ ساری بیگواہ بیتگ-

گل زمان بزدار ھم پیسر ءَ پوج ءَ آوار جتگ اَت پوج ءَ تنی وھدے ھچ وڑیں میڑ ءِ پدری نہ کتگ-

بلیدہ : دو ورنا پاکستانی پوج ءَ آوار جتگ ءُ کشتگ اَنت-

ھمے وڑ بلیدہ ءِ دمگ چہ گردانک ءَ ھال اِنت کہ پوج ءَ شش اپریل ءِ سُھب ءَ دو ورنا لوگ ءَ چہ آوار جنگ ءَ پد لھتے کلاک ءَ لَٹ ءُ کُٹانی کنگ ءَ پد کُشتگ اَنت-

بلیدہ ءَ کُشگ بیتگیں ورنایانی پجّار محراب ء رحمدل ءُ خان محمد ء ھیبتان نام ءَ چہ بیتگ اَنت، وت ماں وت سیاد گوشگ بیگ ءَ اَنت-

اِھوالکار رِد ءَ دوئیں ورنایانی سیادی یکیں لوگ ءَ اِنت چہ پاکستانی پوج ءَ آیانی میتاں کھول دست ءَ دیگ ءَ انکار کنگ ءَ اِنت، چریشی ءَ دمگ ءَ تُرندیں بے تاھیری ودی بیتگ-

ھُزدار ءُ مشکے ءَ :دگہ دروگیں میڑ

زانگ بہ بیت کہ گوستگیں روچ ءَ پنچ اپریل ءَ ھُزدار ءِ دمگ باغبانہ ءَ ھم پاکستانی پوج ءَ سے مردم دروگیں میڑ ءَ جنگ ٹاہ داتگ اَت، آیانی تہ ءَ یکے ءِ پجّار کلات ءِ دمگ چہ کوھنگ ءَ سیادی داروکیں بسیت ھشت سالی عبدالمالک ءِ محمد یوسف نام ءَ چہ بیتگ، آ یازدہ اکتوبر دوھزار بیست چار ءَ چہ تربت ءَ زورانسری بیگواہ کتگ-

ھمے وڑ ھمے یکیں روچ ءَ چہ مشکے ءَ ھم سے لاش دزکپتگ اَت، آ دروگیں میڑاں کُشتگ ءُ لاش دمگ ءَ دور داتگ اَنت – کُشگ بیتگینانی پجّار زھور ء ھزور، شاھنواز ء جلال، ءُ حبیب ء عیدو نام ءَ چہ بیتگ اَنت-

زانگ بہ بیت کہ بلوچستان ءَ زورانسری بیگواھیں مردماں دروگیں میڑاں کُشگ ءِ وئیل یکشل ءَ نکش بیگ ءَ اَنت، پوج ءِ ادارہ اے مردماں سلاہ بندیں گلاں چہ ھمگرنچ کن اَنت، بلے آیانی کھول ءُ بلوچ سیاسی پارٹی اے بھتاماں رد کنان ءَ اے بیرانیاں ریاستی زوراکی ءُ درکانودی کوش گوش اَنت-