TBP Balochi

بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کرتگیں درشان ءِ تہ ءَ گوشتگ کہ بی ایل اے ءِ سرمچاراں سوراب ءِ دمگ گدر ءَ زورگریں پاکستانی پوج ءِ بنجاھی بنجل ءِ سرا سوبمندیں ارش ءِ کتگ ءُ بنجل ءِ دو بھر وتی کنٹرول ءَ کتگ ۔ اے ارش ءِ میان ءَ زورگریں پوج ءِ کواڈ کاپٹر ءِ جتگ ءُ دور داتگ ۔ زورگریں پوج ءِ کمک ءَ اتکگیں کاروانانی سرا ھم ارش کتگ ۔ سرجمی ءَ دژمنیں پوج ءِ ھژدہ کارمند مرتگ انت ءُ وھدیکہ میڑ ءِ میان ءَ بی ایل اے پتھ اسکواڈ ءِ سرمچار ھارون بلوچ پنام دوستین نمیران بوتگ ۔

جارکش ءَ گوشتگ کہ دومی نیمگ ءَ پنجگور ، بلیدہ ، مچ ءَ دگہ سَے ارش کتگ ءُ وردن بروک ءُ کمک کار ھم نشانگ کتگ انت

جارکش جیئندبلوچ ءَ سوراب ارش ءِ سرجمیں ھال شنگ کتگ ءُ گوشتگ گوستگیں شپ ءِ کساس ادار یازدہ ءَ سرمچاراں سوراب ءِ دمگ گدر ءَ پوج ءِ بنجاھی بنجل ءِ سرا دونمیگاں ارش کتگ ۔ یک ادارے ءَ گیش برجاہ بوتگیں میڑ ءَ سرمچار بنجل ءِ دو بھرانی کنٹرول کنگ ءَ سوبمند بوتگ انت ءُ سیمی بھر ءِ کنٹرول کنگ ءِ جھد ءَ سرمچار ہارون بلوچ پنام ءِ دوستین نمیران بوتگ ۔

جارکش ءَ گوشتگ کہ اے میڑ ءَ زورگریں پوج ءِ کم چہ کم یازدہ کارمند مرتگ انت وھدیکہ بازینے ءَ جنگ ءِ وھد ءَ وتی ھمراہ یل داتگ ءُ تتکگ انت ۔ سرمچاراں بنجل ءِ سلاہ ءُ گولہ ھم دستیگ کتگ انت ۔ ھمے میان ءَ سرمچاراں یک چاریگیں ڈورن کیمرہ ءِ ھم تیر جتگ ءُ دور داتگ ۔

جیئند بلوچ ءَ گوشتگ کہ سوراب ءِ نزیک ءَ زورگریں پوج ءِ کمک ءَ دیم دیگ بوتگیں پنچ گاڑیانی کاروان ءِ سرا ھم سرمچاراں راہ بستگ ءُ ارش کتگ۔ چریشی ءَ دو گاڑی تباہ بوتگ انت ءُ دژمن پدکنزگ ءَ لاچار بوتگ ۔

آئی ءَ گوشتگ کہ چرشی ءَ پد پوج ءِ نیمگ ءَ دوازدہ دگہ گاڑیانی کاروانے ءَ دیما آیگ ءِ جھد کتگ کہ آئی ءِ سرا ریموٹ کنٹرول بمب ارش ءِ کتگ ارش ءَ دژمن ءِ یک گاڑی ءِ سرجمی ءَ تباہ چریشی ءَ دژمن ءِ دگہ ھپت کارمند مرتگ ءُ کم چہ کم یازدہ زدگ بوتگ انت ۔

جارکش ءَ گوشتگ کہ مروچی پنجگور ءِ دمگ سوراپ ءَ سی پیک دگ ءِ سرا دژمن ءِ کاروان ءِ سرا ریموٹ کنٹرول ارش ءِ کتگ چرشی ءَ دژمن ءِ یک کارمند ءِ مرتگ ءُ سَے زدگ بوتگ انت وھدیکہ آیانی گاڑی سک باز تاوان بوتگ ۔

جارکش ءَ گوشتگ کہ بی ایل اے ءِ سرمچاراں دژمن راشن بروکیں دو گاڑی گپتگ انت ءُ مچ ءَ زورگریں پوج ءِ کمکار عبدالغفار ءِ حاجی عبدالجبار راجپوت ءِ سرا دزبمب ارش ءِ کتگ چریشی ءَ آ سک باز زدگ بوتگ ۔ اے مرد ءَ وت ءَ دکاندارے زاھر کتگ بلے راستی ءَ پوج ءِ چاریگ ءُ کمک کار ءِ بوتگ ۔

بلوچ لبریشن آرمی ءِ جارکش جیئند بلوچ ءَ سوراب ءِ ارش ءَ نمیران بوتگیں سنگت ءِ درگت ءِ ھال بلوچ راج ءَ سر کتگ ءُ گوشتگ نمیرانیں ھارون بلوچ پنامءِ دوستین ء علی بخش بلغانی نوشکی ءِ دمگ کیشنگی، بلغانی نندوک بوتگ ۔ آ 2022 ءَ گوں بی ایل اے ءَ ھوار بوتگ ءُ بندات ءَ آئی ءَ بازار ءِ گوریلہ کاراں بھر زرتگ ءُ پدا رند ءَ کوہ ءَ اتکگ ۔ وتی پوجی ھنر ءُ زانشت ءَ چہ آ بی ایل اے پتھ اسکواڈ ءِ بھر بوتگ ۔

نمیرانیں ھارون بلوچ ءَ کلات شور پارود ، نوشکی ءُ ھاران ءِ گلی آپریشنانی سروکی کتگ ۔

جارکش ءَ گوشتگ کہ نمیرانیں ھارون ایوک ءَ نمیرانیں یاسین پنام ءِ روپ ءِ کسانی ءِ سنگت نہ بوتگ بلکنہ ھرود یکیں ھند ءِ نندوک بوتگ انت ۔ ھردوکاں آجوئی ءِ پگر بازار ءَ بگر تاں کوہ ءَ پیلو کتگ ءُ ھمے پگر ءِ ھمراھی ءَ نمیران بوتگ انت ۔

جیئند بلوچ ءَ گوشتگ کہ نمیرانیں ھارون بلوچ پنام ءِ دوستین ءِ دیمھونی بلوچ راجی زرمبش ءِ ھما درچ ءِ بھر انت کہ نسل در نسل برجاھیں گھگیری ءِ چیدگ جوڈ بوتگ۔ آئی ءِ نمیرانی ایوک ءَ بی ایل اےءِ پوجی ھمت ءُ جزبگ ءَ برز نہ کنت بلکنہ اے دیمھونی بلوچ ورنایانی ھاتر ءَ یک لیکھی چراگ ئے، کہ آجوئی ءِ راہ ءَ ھر کربانی ءَ منگ ءِ جزبگ ءَ دار ایت ۔ زورگریں تاکتانی بگیری ءَ برجاھیں اے جھد ءَ ھر یک نمیران بوتگینے ءِ ھون زرمبش ءَ نوکیں ردومے دنت ءُ اے یک تچکیں کلوہ ءِ کہ بلوچ سرڈگار ءِ سرے ھر وڈین زوراک الم بے سوب بیت انت ۔

بلوچستان ءِ دمگ پنجگور ءِ ھند سوراپ ءَ آئی ای ڈی تراک ءَ پاکستانی پوج ءِ گاڑی نشانگ کنگ بیتگ- تراک ءَ بازیں کارندھے بیران ءُ ٹپی بیگ ھال اِنت-

اِھوالکار رِد ءَ پجّار نہ بوتگیں سلاہ بندیں مردماں سی پیک دگ ءِ کش ءَ بمب ایر کنگ بیتگ ءُ پوج ءِ گاڑی گوزگ ءَ چہ آ تراک ءَ گوں نشانگ کتگ-

اِھوالکار رِد ءَ اُرش ءَ پوج ءِ تاوان چست کنگ کپتگ واکدار ءَ اے درگت ءَ ھچ وڑیں درشان شنگ نہ کتگ-

زانگ بہ بیت بلوچستان ءَ مروچی پاکستانی پوج سر ءَ تُرندیں اُرشانی درچ برجاہ ءَ اِنت کہ تنی وھدے درزنانی وئیل نکش کنگ بیتگ اَنت-

بلوچستان نیشنل پارٹی مینگل کیچ ءِ نیمگ ءَ پشمبے ءِ روچ ءَ تربت ءَ زھرشانی یے برجم دارگ بوتگ ءُ بلوچستان ءَ برجاھیں زورانسری بیگواہ کنگ ، بی وائی سی ءِ باسک زیشان زھیر ءِ کوش ءُ بلوچ سیاسی باسکانی ھلاپ ءَ دروگیں کیسانی ھلاپ ءَ ترندیں اوگام جنگ بوتگ انت-

تربت ءِ زھرشانی ءَ بی وائی سی کیچ ءِ باسک ءُ وکیلاں گوں مزنیں کساسے ءَ جنین آدم، ورنا ءُ شھر ءِ مردماں بھر زرتگ۔

اے زھرشانی ھما وھد ءَ کنگ بیتگ کہ بلوچ یکجھتی کمیٹی ءِ بنجاھی رھشون 8 جولائی ءَ چہ شال ءِ ھدہ جیل ءَ در کنگ بوتگ اَنت ءُ سول لائنز پولیس اسٹیشن ءَ برگ بوتگ اَنت، ءُ آیانی کھول ءُ وکیلاں گوں آھاں گند ءُ نند کنگ ءِ موہ نہ داتگ اش۔

دمگی مردمانی رد ءَ تھانہ ءِ کش ءُ گور ءِ سرجمیں دمگ بند کنگ بوتگ ءُ رسانکدر ءَ ھوار لس مھلوک ءَ را نزیکیں رسگ ءَ چہ نیلگ ءَ انت کہ ایشی ءَ چہ بلوچستان ءِ سیاسی گل ءُ انسانی ھکانی گلاں مزنیں جیڑھے ودی کتگ۔

بی وائی سی ءَ اے ترس ءِ درشانی کتگ کہ آئی ءِ سروک پولیس ءِ کبزہ ءَ زھنی ءُ جسمانی ٹارچر ءِ آماچ بوت کن اَنت ءُ گند ءُ نند ءِ سر ءَ بندش اے گمان ءَ گیشتر ترس ءِ نیمگ ءَ بارت انت۔

بی این پی ءِ بنجاھی کمیٹی ءِ باسک ڈاکٹر غفور بلوچ ءَ زھرشانی ءَ گوں تران کنان ءَ گشتگ کہ سیاسی سروکانی دزگیر کنگ، زورانسری بیگواہ کنگ ءُ دروگیں کیس نہ ایوک ءَ در آئینی انت بلکیں بلوچستان ءَ سیاسی بدھال گیش کنگ ءَ انت۔

آئی ءَ گْوشت کہ ریاست اگاں تواراناں بند کنگ ءِ کوشست ءَ بہ کنت گڑا آ وتی وجود ءِ سر ءَ جُست ءُ پُرس کنت۔

بی وائی سی کیچ ءِ سروک سید بی بی بلوچ ءَ کہ اے زھرشانی ءَ بھر زرتگ ات آئی ءَ زیشان زھیر ءِ کوش ءَ را ریاستی کمک ءَ ڈیتھ اسکواڈانی آسر لیک اتگ۔ آئی ءَ گوشت کہ زیشان زھیر نہ ایوک ءَ پارٹی ءِ جاڑیگیں باسک بوتگ بلکیں یک پرامن سیاسی باسکے ھم بوتگ کہ آئی ءَ را بے توار کنگ ءِ ھاتر ءَ نشانگ جوڑ کنگ بوتگ۔

ھمے وڑ بی این پی کیچ ءِ سروک ءِ سروک ھاجی عبدالعزیز بلوچ ءَ گوشت کہ بلوچستان ءَ اسٹیبلشمنٹ ءِ راھبنداں مھلوک سیاسی ءُ چاگردی رنگ ءَ نادراہ کتگ۔ زندگی ءِ ھک ءِ زورگ، سیاسی پکر ءِ جرم لیکگ ءُ زیردستانیاً زندان ءَ بند کنگ اے درست ریاستی ناشرکاری ءِ نشانی اَنت۔

پیپلز پارٹی ءِ سر ءَ ایراد گرگ ءَ مکران بار ایسوسی ایشن نصیر احمد گچکی ءَ پیپلز پارٹی در جمھوری تاکتانی پیداوار گشتگ کہ بلوچستان ءَ ھمے پارٹی ءِ چیردستی ءَ بدتریں زلم برجاہ انت۔

مکران بار ایسوسی ایشن ءِ صدر ایڈووکیٹ محراب گچکی ءَ گشتگ کہ بی این پی ءُ بی وائی سی ءَ را سیاسی گھگیر ءِ سر ءَ سزا دیگ بوگ ءَ انت بلے وکلاء برادری ءَ آئینی ھکانی اے جد ءُ جھد ءَ آیانی گون ءَ اوشتوک انت-

بی این پی ءِ زالبولیں سروک یاسمین رؤف ءُ دگہ باسکاں ھم اے زھرشانی ءَ بھر زرتگ ءُ پارٹی ءِ جنرل سیکرٹری شے ریاز اھمد ءَ انتزامیہ کار پیلو کتگ اَنت۔

پاکستانی لشکر ءَ گوستگیں شپ ءَ تربت ءِ دمگ گوگدان ءَ بلوچ سرمچار نبیل احمد ھوت ءِ لوگ ءِ سر ءَ بیڑ برتگ ءُ پروشت ءُ پروش کتگ ءُ آئی ءِ لوگ ءِ مردم جتگ ءُ آھاناں بیھار داتگ-

چمدیستگین ءُ دمگی مردمانی رد ءَ پاکستانی لشکر ءَ مزنیں کچے ءَ دمگ انگر کتگ ءُ دمگ ءِ راہ ءُ در بند کتگ اَنت۔ اُرش ءِ وھد ءَ نوکیں ڈرون ھم کارمرز کنگ بوتگ اَنت کہ سرجمیں شپ ءَ گوگدان ءِ لوگانی سر ءَ بال بوتگ اَنت ءُ دمگی مردمانی تہ ءَ سکیں ترس ءُ بیم ودی بوتگ انت-

سانمندیں کھول ءِ گشگ ءِ رد ءَ پورسز لوگ ءَ اتکگ ءُ جنین ءُ چُکاں سک ترسینتگ ءُ جتگ انت ۔ لورسز ءَ اے ھاندان ءَ ترندیں بیھار داتگ انت-

دمگی مردماں اے ویل ایر جتگ ءُ گْوشتگ کہ لس مردمانی لوگانی سر ءَ اے وڑیں اُرش انسانی ھکانی پدّریں لگتمالی اِنت کہ ایشی ءِ مول ءُ مراد ترس ءُ بیم ءِ ودی کنگ انت-

یات بہ بیت کہ اے سال ءِ اپریل ءِ گڈسر ءَ تربت ءِ دمگ ڈنک ءَ گوں پاکستانی لشکر ءَ جنگ ءَ نبیل احمد ھوت، عمر زکاللہ ء سنگھور ءُ فیروز ساربان ء اللہ بخش دیم پہ دیمی جنگ ءَ نمیران بوتگ انت ءُ جنگ ءَ پد پورسز ءَ ھرسئیں مردمانی لاش برتگ انت-

لاشانی نہ دیگ ءِ پژدر ءَ کھول ءَ تربت ڈی بلوچ ءَ نندانک داتگ۔ پد ءَ انتزامیہ ءَ اے سئیں مردم بے کپن ءَ دمگی کبرستان ءَ دپن کتگ انت۔ وھدے کہ کھولاں لاشانی کشگ ءِ جھد کتگ گڑا پولیس ءَ ھما وھد ءَ ھم آ لٹ ءُ کٹ کتگ انت-

سرجمیں بلوچستان ءَ پاکستانی لشکر ءِ سر ءَ مھکم ءُ ھمگرنچیں اُرش برجاہ اَنت۔ اے اُرش ھما وھد ءَ بیگ ءَ اَنت کہ بلوچ آجوئی ءِ گل بلوچستان لبریشن فرنٹ ءَ سرجمیں بلوچستان ءَ مزنیں کچے ءَ آپریشن “بام” ءِ بندات کنگ ءِ جار جتگ۔

“بام ”بلوچی گالے کہ بزانت ئِے “سُھب ” یا روچ ءِ ٹُکّگ ءِ وھد ”اِنت۔

بلوچستان ءِ جتا جتائیں دمگاں چہ پاکستانی لشکر ءِ سر ءَ اُرش ءِ ھال ھم رسگ ءَ اِنت کہ آھانی تہ ءَ کیچ، ھاران، ھزدار، ءُ پنجگور ھوار اَنت۔ اے اُرشاں پوجی بنجل ءُ چیک پوسٹ نشانگ جوڑ کنگ بوتگ انت۔

دمگی مردمانی رد ءَ اے اُرشانی تہ ءَ مزنیں سلاہ کارمرد کنگ بوتگ ءُ بازیں جاھاں تیرگواری بازیں کلاکاں برجاہ بوتگ انت۔

واشک ءَ ھالانی رد ءَ ناشناسیں سلاہ بندیں مردماں لیویز ءِ پوسٹ ءِ سر ءَ اُرش کتگ ءُ پوسٹ سرجم ءَ وتی دستیگ ءَ کتگ۔ اھوالانی رد ءَ اُرش کنوکاں نہ ایوک ءَ سلاہ دست کپتگ بلکیں چوکی ءِ کوٹی ءُ گاڑی ھم مانداشتگ اَنت۔

بلوچستان لبریشن فرنٹ ءَ گوستگیں شپ ءَ یک کسانیں بیانے ءِ تہ ءَ آپریشن بام ءِ جار جتگ۔ جارکش ءَ گوشت کہ بی ایل ایف ءِ آپریشن بام بلوچ آجوئی ءِ جنگ ءَ نوکیں سھب ءِ بنگیج اِنت۔ جارکش ءَ گْوشتگ کہ اے کارروائی “چہ بلوچ تیابدپ ءَ بگر داں کوہ ء سلیمان” ءَ برجاہ انت۔

بلوچستان لبریشن فرنٹ ءَ بازیں وھدے ءَ بلوچستان ءِ آجوئی ءَ پرکار انت ۔ ءُ اے جتا جتائیں وھداں جتا جتائیں وڑیں اُرشانی تہ ءَ پاکستانی لشکر ءَ نشانگ جوڑ کنگ ءَ اِنت۔

زانتکارانی گمان اِنت کہ اے کارروائی نہ ایوک ءَ پوجی بلکیں چیدگی دیم دیگ ءَ اَنت۔ بلوچستان ءِ تہ ءَ انوگیں اُرش ایوک ءَ یک لس نہ اَنت بلکیں یک برجاھیں ءُ نزیک ءَ پند جنگ ءِ درشان اَنت۔

زانتکارانی ءِ گشگ انت کہ بی ایل ایف ءِ “آپریشن بام” ءِ دراج ءُ ھمگرنچی اے گپ ءِ منانک انت کہ بلوچ آجوئی ءِ لوٹوکیں گلانی زور ءُ میدانی ھستی ءَ مزنیں کساسے ءَ گیشی بوتگ۔ جتا جتائیں دمگاں یکیں وھد ءَ اُرش ءُ ریاست ءَ سرین پروشی ءِ نشانگ جوڑ کنگ اے گپ ءَ پدر کنت کہ بلوچ آجوئی ءِ سلاہ بندیں گل نہ ایوک ءَ گامگیجی ءِ پھتو بوتگ اَنت بلکیں آھانی تہ ءَ دمگی کمک ھم ھست۔

بلوچ لبریشن آرمی ءَ پیسر ءَ ھمے رنگ ءَ ھمگرنچیں آپریشن کتگ اَنت۔ گوستگیں سال ءَ بی ایل اے ءَ یکیں وھد ءَ بلوچستان ءِ چاردہ دمگانی تہ ءَ “آپریشن ھیروپ” ءِ چیر دستی ءَ آپریشن کتگ ات کہ ایشی ءِ تہ ءَ پاکستانی انٹیلی جنس ایجنسیانی “افسر” ءِ پجار ءَ پد موسی خیل ءَ کشگ، کلات، مستونگ، نوشکی، پنجگور ءِ مستریں مزن شھدگانی سر ءَ اُرش کنگ ھوار ءُ اے آپریشن سَر بیلہ ءَ کنگ بوتگ ات کہ اود ءَ پاکستانی لشکر ءِ بنجل ءِ سر ءَ مجید بریگیڈ ءِ اُرش ءَ پد وتی دستیگی ءَ کتگ ات-

ھمے رنگیں ھمگرنچیں اُرش بلوچ سلاہ بندیں گلانی ھمسنت بلوچ راجی آجوئی سنگر (BRAS) ھم کنگ ءَ گندگ بوتگ ۔

بلوچستان ءِ دمگ سوراب ءَ چار شمبے ءُ پشمبے ءِ میانی شپ ءَ ناشناسیں سلاہ بندیں مردماں پاکستانی لشکر ءِ بنجل ءُ کمک ءَ آیوکیں کاروان ءِ سر ءَ اُرش کتگ۔

دمگی مردمانی گشگ اِنت کہ اے اُرش گدر ءَ بوتگ کہ اود ءَ سلاہ بندیں مردماں نہ ایوک ءَ بنجل وتی دستیگ ءَ کتگ بلکیں پورسز ءِ نیمگ ءَ آیوکیں کمکی کاروان ھم گوں ریموٹ کنٹرول بمب ءُ سنگر گروکاں نشانگ جوڑ کتگ۔

دمگی مردمانی رد ءَ اے اُرش ءَ لشکر ءَ مزنیں تاوانے رس اتگ بلے تاں انوگ ءَ سرکاری رنگ ءَ اے گپ ءِ پدر کنگ ءُ رد کنگ نہ بوتگ۔

اے اُرشانی تہ ءَ تاں انوگ ءَ سئے کارندہ کشگ بوتگ اَنت کہ آھانی تہ ءَ لانس نائیک وکیل، نائیک عبدالغفور ءُ نائیک زھور ھوار اَنت۔ بلے گمان اِنت کہ اُرش ءِ ترندی ءِ سبب ءَ مِروکیں کارندھانی کساس گیشتر اِنت۔

انگت ءَ کس ءَ اے اُرش ءِ زمہ واری نہ زرتگ۔ بلوچستان ءَ پاکستانی لشکر پیش ےَ ھم اُرشانی آماچ اِنت۔ آجوئی دوستیں سلاہ بندیں گلاں گوستگیں وھداں ھم اے وڑیں اُرشانی زمہ واری زرتگ بلے نوکیں اُرش ءِ بابت ءَ گیشتریں ھال ءُ اھوالانی ودار اِنت۔

زورانسری بیگواھیں زھیر احمد ءِ جنک ءُ گوستگیں ھپتگ ءَ سرکاری پلامرزی ٹولی ءِ دست ءَ کُشگ بیتگیں ورنا زیشان ءِ گْوھار ادیبہ بلوچ ءَ گْوشتگ کہ زیشان ءِ شھید بیگ پہ مارا یک بلاھیں گمے، پت ءَ پد برات ءِ ساھگ ھم مئے اَچ ما پُلگ بوتگ –

آئی ءَ گْوشتگ کہ اے درد ءُ رنج درشان کنگ مہ بیت- بلے پہ بستار گْوھار منی دل ھمے گپ ءِ سر ءَ ایر اِنت کہ منی برات ءِ ھک ءِ راہ ءَ وتی جان کربان کتگ، آ نمیران بیتگ ءُ مارا وتی زیشان ءِ سر ءَ پھر اِنت، شھید زندگ اِنت-

زانگ بہ بیت کہ زیشان زھیر بلوچ ءِ کھول ءَ بھتام جتگ کہ آئی ءِ پت، زھیر بلوچ ءِ زورانسری آوار جنی ءِ ھلاپ ءَ یکشل ءَ توار چست کنگ ءِ سزا دیگ بیتگ-

زھیر بلوچ چہ بازیں سالاں بیگواہ ءَ اِنت ءُ آئی ءِ کھول ءَ ٹاہ داتگ کہ آ ریاستی ادارھانی دست ءَ اِنت- زیشان ناں تھنا وتی پت ءِ یل کنائینگ ءِ ھاتر ءَ پُرکار بیتگ بلکیں بلوچستان ءَ زورانسری آوار جنیانی ھلاپ ءَ زھرشانی ءَ ھم بھر زرتگ-

زیشان ءِ کوش ءِ سر ءَ انسانی ھکانی ادارھاں، چاگردی کارکنانی ءُ دمگی رھشونانی نیمگ ءَ تُرندیں ایرجنی دیم ءَ اَتکگ انت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ بلوچ ءِ تیاب ءَ بگر دانکہ کوہ سلیمان ءَ بلوچستان لبریشن فرنٹ ( بی ایل ایف) ءِ“ آپریشن بام” بندات بیتگ – اے میان ءَ دُژمن ءِ سر ءَ تُرند ءُ جتاجتائیں اُرش کنگ بوگ ءَ اَنت-

جارکش ءَ گْوشتگ بی ایل ایف “آپریشن بام ”بلوچ جنگ آجوئی ءِ یک نوکیں سُھبے ءِ بندات اِنت-

جارکش ءَ گوشتگ کہ سرجمیں بلوچستان ءَ اے چہ مھکمیں آپریشن ءَ دُژمن مزنیں کچے ءَ جانی ءُ مالی تاوانانی دیمپان کنگ بوگ ءَ اِنت-

جارکش ءَ گُڈی ءَ گْوشتگ کہ آپریشن سرجم بیگ ءَ پد سرجمیں ھالاں شنگ کن ایں-

بلوچستان ءِ دمگ سوراب ءِ دمگ گدر ءَ سلاہ بندیں مردماں پاکستانی پوج ءِ بُنجاھی بُنجل سر ءَ اُرش کتگ، سلاہ بندیں مردم بُنجل ءِ دستیگ کنگ ءَ سوبمند بوتگ اَنت-

دمگی اِھوالکار رِد ءَ اے وھد ءَ بُنجل ءِ نیمگ ءَ چہ تُرندیں تراکانی ءُ تیرگواری ءِ توار اش کنگ بیگ ءَ اِنت، وھدے کہ پوج ءِ سُر ءُ پُر مھدو اَنت-

زانگ بہ بیت کہ سوراب بلوچستان ءِ بُنجاھی شھر چہ شال ءَ 212 کلو میٹر ءِ گستائی ءَ اِنت- اُرش ءِ درگت ءَ واکدار ءِ تنی وھدے ھچ وڑیں درشان شنگ نہ کتگ-

گوستانک ءَ اے وڑیں اُرش بلوچستان ءَ پُرکاریں آجوئی لوٹوکیں سلاہ بندیں گل بلوچ لبریشن آرمی ءِ نیمگ ءَ کنگ بیتگ اَنت کہ اود ءَ بُنجلاں ءُ شھر دستیگ کنگ بیتگ اَنت-

بلوچ یکجھتی کمیٹی ءِ بندیگیں رھشون چہ ھدہ جیل ءَ درکنگ ءُ سول لائنز تانہ ءَ برگ بوتگ انت کہ اود ءَ دچار کپگ ءِ سر ءَ ھم بندش ایں ۔

بلوچ یکجھتی کمیٹی ءِ رھشون زیک ھشت جولائی ءَ چہ شال ءِ ھدہ جیل ءَ درکنگ ءُسول لائنز پولیس اسٹیشن ءَ برگ بوتگ انت ۔ ھالانی رد ءَ آئی ءَ چہ پد کھول ءُ وکیلاں آیانی دچار کپگ ءَ ھم نیلگ ءَ انت ۔

اے وھد ءَ تانہ ءِ چپ ءُ چاگرد سیل کنگ بوتگ انت ءُ پوجی کارمند لس مھلوک ءُ اھوالکاراں ھم آیانی نزیک روگ ءَ نیلگ ءَ انت ۔

بلوچ یکجھتی کمیٹی ءِ رھشونانی دچار کپگ ءِ سر ءَ بندش جنگ ءَ چہ ھمے شک بیت کہ بوت کنت آیانی سرا جانیءُ ماژگی تشدد کنگ بہ بیت ۔

گل ءَ وتی درشان ءِ تہ ءَ گوشتگ کہ مارا وتی رھشونانی جان سلامتی ءِ ھاتر ءَ سک باز تانسر ایں بوت کنت کہ آ لٹ ءُ کٹ کنگ بہ بنت ۔

درشان ءِ تہ ءَ لوٹ کنگ بوتگ دزگیریں رھشونانی گوں گھول ءَ دچار کپگ ءِ موکل دیگ بہ بیت ءُ آیانی سر ءَ در انسانی ءُ درکانودی رویشت بند کنگ بہ بیت ۔

آئی ءَ گوشتگ کہ ما چہ درسیں انسانی ھکانی ادارہ ، وکیل ، اھوالکار ءُ لس مھلوک ءَ لوٹ کن ایں کہ آ توار چست بہ کن انت ۔

زانگ بہ بیت کہ بی وائی سی ءِ رھشون ڈاکٹر ماہ رنگ بلوچ، بیبو بلوچ، آئی ءِ پت عبدالگپار بلوچ، گلزادی بلوچ، شاہ جی صبغت اللہ، اور بیبرگ زہری سَے ماہ ساری تھری ایم پی او ءِ رد ءَ ھما وھد ءَ دزگیر کنگ بوتگ انت وھدیکہ آ شال ءَ زورانسری آوار جنی درکانودی کشت ءُ کوشانی بگیری ءَ زھرشانی ءِ رھشونی ءَ کنگ ءَ بوتگ انت ۔

سے ماہ ءَ ہدہ جیل ءَ بند بوگ ءَ پد کہ گوستگیں روچ ءَ 8 جولائی ءَ تھری ایم پی او ءِ وھد کہ ھلاس بوگ ءَ بوتگ گڑا ھمے گمان کنگ بوتگ کہ اے روچ ءَ یک آمیدگسی اجلاس ءِ بیت تانکہ آیانی نزر بندی ءَ کانودی چمشانک ءِ دیگ بہ بیت ۔

بلے پد ءَ ھم اجلاس ءَ کمے ادار ساری اناگت ءَ ایم پی او ءِ آرڈر ھلاس کنگ بوتگ ءُ درسیں رھشون انسداد دھشتگردی آمیدگس ءَ پیش کنگ بوتگ انت ءُ آیانی بگیری ءَ ارزی نبشتہ کنگ بوتگ ۔

ھمے وھد ءَ پولیس ءَ آمیدگس ءَ گوشتگ کہ اے رھشونانی بگیری ءَ ناشرکاری ءِ ارزی نبشتہ انت کہ جست پد ءَ گیشیں وھد لوٹ ایت گڑا آمیدگس ءَ پولیس ءِ لوٹ من اتگ ءُ دہ روچ ءِ ریمانڈ ھاتر ءَ پولیس ءِ دست ءَ داتگ انت ۔

بلوچ یکجھتی کمیٹی ءَ اے درسان گپ وتگڑیں بھتام گوشتگ انت گوشتگ کہ ریاست بلوچ راجکاری توار ءَ ایرموش کنگ ءِ ھاتر ءَ درکانودی کار کنگ ءَ انت ۔

گل ءِ رد ءَ اے رھشوناں ھچ وڑین درکانودی کار نہ کتگ بلکیں آ ایمنیں وڈی ءَ زورانسری آوار جنیانی بگیری ءَ توار چست کنگ ءَ بوتگ انت ۔

ھمے وڑ ءَ ایمنسٹی انٹرنیشنل، ہیومن رائٹس کمیشن آف پاکستان دگہ میان استمانی ادارھاں پیسر ءَ ایشانی دزگیری درکانودی ءِ گوشتگ ءُ ایمنسٹی انٹرنیشنل ءَ گوستگیں روچ ءَ وتی درشان ءِ تہ ءَ چہ پاکستان ءَ لوٹ کتگ کہ درسین بلوچ رھشون زوت ءَ زوت ءُ بید شرت ءَ یل کنگ بہ بنت ۔

بی وائی سی ءَ گوشتگ کہ اگاں اے رھشونانی سر ءَ لٹ شاپی یا دگہ درکانودی در انسانی رویشت ءِ دارگ بوت گڈاسرجمیں بلوچستان ءَ زھرشانی ءِ جار جنگ بیت ایں ۔ گل ءَ میان اُستمانی ادارھاں چہ لوٹ کتگ کہ زوت دزمانجنی بہ کن انت ۔