TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ بلوچستان ءِ دو جتاجتائیں دمگ بارکھان ءُ ھاران ءَ پاکستانی پوج ءِ کارندھانی ءُ ھال اھوالی ٹاور سر ءَ بیتگیں اُرش زمہ واری منّ اِتگ اَنت-

بی ایل ایف ءِ جارکش ءَ درشان ءِ تہ ءَ گْوشتگ کہ مئے سرمچاراں دوازدہ اپریل ءِ بیگاہ ءِ چار بیست ءِ نزیک ءَ، بارکھان ءُ رکھنی ءِ میانی دمگ ءَ پرپٹ ءَ سوار پاکستانی پوج ءِ پوجی کاروان آئی ای ڈی بمب اُرش ءَ نشانگ کتگ- اُرش ءَ یک پرپٹے سرجم ءَ تباہ بیتگ ءُ اشی ءَ سوار دو کارندہ جاہ پہ جاھی مرتگ اَنت وھدے کہ دو پرپٹ کمو تاوان رس اِتگ-

جارکش ءَ گْوشتگ کہ راجی آجوئی ءِ اے جُھد ءَ تاکت ءِ سرچمگ راج اِنت- بی ایل ایف راج ءِ تاکت ءُ پلامرزی سرجمی ستک کنت ءُ مارا وشی بیت کہ بلوچ راج آجوئی ءِ اے جُھد ءُ وتی سرمچارانی گوم ءَ ھمکوپگ اَنت-

جارکش ءَ دگہ یک درشانے ءِ تہ ءَ گْوشتگ کہ مئے سرمچاراں سیزدہ اپریل ءِ روچ ءِ یازدہ ءَ ھاران ءِ دمگ راسکوہ بُلندُک ءَ چاریگی واستا پٹ کتگیں ٹیلی کمیونیکیشن شرکت یوپون موبائل ٹاور سر ءَ اُرش کتگ اود ءَ ساڑی ئیں سرجمیں مشینری مانداشتگ ءُ تباہ کتگ اَنت-

جارکش ءَ گْوشتگ بی ایل ایف اے اُرشانی زمہ واریاں منّ اِیت ءُ بلوچستان ءِ وتواجھی ءَ تاں زورگریں پوج ءُ پوجی شوربندیاں نشانگ کنت-

بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کتگیں درشان ءَ گوشتگ کہ بی ایل اے ءِ سرمچاراں ھاران ءَ یک کاروائی یے ءِ میان ءَ لیویز تانہ دستیگ کتگ ءُ اود ءَ درستیں سلاہ برتگ اَنت ءُ دمگ ءَ تر ءُ گرد کتگ۔

آئی ءَ گوشتگ کہ گوستگیں شپ ءِ ادار یک ءِ نزیک ءَ ھاران ءِ ھند مسکان کلات ءَ لیویز ءِ یک تانھے سرمچاراں انگر کتگ ءُ وتی دست ءَ کتگ۔ اے کاروائی ءِ میان ءَ تانھا ءَ جاڑیگیں دہ کارندہ دزگیر کتگ انت ءُ اود ءَ درستیں سلاہ ءُ لشکری سامان دستیگ کتگ اَنت۔ برتگین سلاھاں سیزدہ سی تیری ءُ دگہ سامان ھوار اَنت۔ دزگیر کتگیں کارندہ راج ءِ تاوان دیگ ءَ ھوار نہ بیتگ اَنت ءُ آ یل داتگ انت۔

جارکش ءَ گوشتگ کہ اے کاروائی ءَ پد سرمچاراں دمگ ءَ تر ءُ گرد برجاہ داشتگ دانکہ زورگریں لشکر ءِ پسھی کاروائی ءِ دیم ءَ داشت بہ کن اَنت ءُ دمگ ءَ وتی ساڑی بوگ ءَ پیش داشتگ۔

آئی گوشتگ کہ لھتے روچ پیش ڈی آئی جی رکشان ءِ سروکی ءَ یک دیوانے ءَ پیسلہ کنگ بیتگ کہ اگاں چونیں بلوچ ورنایے ءِ گوں بلوچ آجوئی لوٹوکیں گلاں سْیادی زانگ بیت گڑا پولیس ءُ لیویز ءَ موکل دیگ بیتگ اَنت کہ اے وڑیں مردم ھما دمان ءَ تیر جنگ بہ بنت انت۔ اے وڑیں شور دیانی مول لیویز ءُ پولیس کارندھاں بلوچ راج ءِ بگیری ءَ اوشتارینگ ءُ آیاں ریاست ءِ زوراکیانی کمک کار جوڑ کنگ اِنت۔اے پندل ھندی لشکر ءُ بلوچ راج ءِ میان ءَ دوری یے ءِ ودی کنگ ءِ جھد ءَ اِنت۔ کہ لیویز ءُ پولیس کارندہ گیشتر ھندی بلوچ اَنت۔ ھمے سوب ءَ آیاں گیشتر گوں گل ءَ دژمنی نیست۔ اگاں اے کارندہ ریاست ءِ زوراکیاں ھوار بیت اَنت ءُ بلوچ راج ءِ سر ءَ زورکی کُت اش گڑا آ نشانگ کنگ بنت انت-

جارکش ءَ گوشتگ اے وڑیں درستیں ناشرکار کہ ریاست ءِ زوراکی ءَ ھوار اَنت، آ اگاں بلوچے بہ بیت آ ھم بکشگ نہ بیت پرچا کہ آ وتی سرڈگار ءُ راج ءِ بگیری ءَ دژمنی ءَ یک وڑ ءَ شریدار اَنت۔

بلوچ یکجھتی کمیٹی ( بی وائی سی) ءِ نیمگ ءَ چہ ڈاکٹر ماہ رنگ بلوچ، صبغت اللہ شاہ جی، بیبو بلوچ ءُ بیبگر بلوچ ءِ دزگیری ءِ ھلاپ ءَ یکشمبے ءِ روچ ءَ سرجمیں بلوچستان ءَ ھزرانی مردم دگانی سر ءَ درتکگ اَنت وھدے کہ بازیں جاھانی سر ءَ پاکستانی پوج ءَ زھرشانی کنوکانی ھلاپ ءَ تاکت کارمرز کتگ-

گیشیں ھالانی رِد ءَ بلوچستان ءِ گیشتریں شھراں یکشمبے ءِ روچ ءَ بی وائی سی ءِ جار پد ءَ ھزرانی مردم دگانی سر ءَ درتکگ اَنت ءُ بی وائی سی ءِ سروک ءُ کارکنانی یل کنائینگ لوٹ کتگ-

سرجمیں بلوچستان ءَ بیؤکیں زھرشانی ءَ ھوار زھرشانی کنوکانی دستاں پلے کارڈز ءُ بینرز چست کتگ بیتگ اَنت آیانی سر ءَ دزگیریں رھشونانی یل کنائینگ ریاستی زوراکی ءِ ھلاپ ءَ ناراہ نکش بیتگ اَنت – روانک ءَ مردماں ھکومت ءِ ھلاپ ءَ ناراہ ھم جتگ-

ترانکاراں دزگیری ءِ زرواکی گْوشتگ ءُ تُرندی ءَ ایر جتگ ءُ زوت یل کنائینگ لوٹ کتگ-

رھشوناں تران تہ ءَ گْوشتگ کہ سیاسی کارکنانی دزگیری زورانسری آوار جنی، انسانی ھکانی ھلاپ ورزی ءُ بلوچستان ءِ مڈیانی لُٹ ءُ پُل منّگ نہ بیت- آیاں گْوشتگ کہ ڈاکٹر ماہ رنگ بلوچ ءِ دزگیری ءَ چہ زرمشبت ایرموش کنگ نہ بنت-

ترانکاراں گْوشتگ کہ ھکومت تاکت ءَ چہ تواراں ایرموش کنگ جُھد ءَ اِنت بلے بلوچ راج وتی ھکانی واستا مھکم اِنت ءُ جُھد ءَ برجاہ دار اِیت-

ترانکاراں کڈن کتگ کہ اگاں دزگیریں رھشون زوت یل کنگ نہ بیت اَنت گُڑا زھرشانی دراجکش کنگ ءُ سرجمیں بلوچستان ءَ تلان بیت-

آئی ءَ گْوشتگ کہ بی وائی سی ءِ ھلاپ ءَ کریک ڈاؤن ءَ چہ ھک ایرموش کنگ نہ بیت نانکہ دزگیری ءُ زورانسری آوار جنی ءَ چہ سیاسی زرمبشت ھلاس نہ بنت بلکیں ریاست ھمینچو تُرندی بکنت راجی ھکانی زرمبشت گیشتر مھکم بنت- بی وائی سی کریک ڈاؤن ءُ دزگیریاں چہ وتی توار ءَ نہ دار ایں بلکیں گیش ترندی کئیت-

ترانکاراں گْوشتگ کہ ڈاکٹر ماہ رنگ بلوچ یک نام یا یک پردے نہ اِنت نو راج ءِ روہ اِنت ءُ بلوچستان ءِ پجّار جوڑ بیتگ ڈاکٹر دزگیر کتگ ءُ ریاست ءَ اگاں اے جیڑ اِتگ کہ بلوچ راجی زرمشبت بے توار بیت گُڑا زانگ لوٹ اِیت کہ نو ھرچ بلوچ ماہ رنگ ءِ لوٹوک جوڑ بیتگ اَنت ڈاکٹر ماہ رنگ بلوچ مئے ساھانی تہ ءَ ھوار اِنت مئے ساہ چتو بے توار بنت-

آیاں گْوشتگ کہ ریاست تاکت ءِ نشہ ءَ بے میاریں زھرشانی کنوکانی ھلاپ ءَ تاکت کارمرز کنت گیشتر گینگ ودی کنگ ءَ اِنت کہ اے ریاست ءِ واستا شر نہ اِنت- ریاست گیر زمہ داری ءِ زوراکی ءَ یل بکنت پُرایمنیں سیاسی جُھد ءِ ھلاپ ءَ کریک ڈاؤن بند بہ کنت اگاں اے رویشگ برجاہ بیت گُڑا آؤکیں وھداں ریاست واستا ھترہ بیت-

آئی ءَ گْوشتگ کہ پُرایمنیں سیاسی جُھد ءِ دیم ءَ گپ دیوان جاہ ءَ ریاست تُپنگ ءَ زُرتگ ءُ اوشتاتگ ءُ اے ریاست ءِ اکلاکی پروش بیت، میانی استمانی مزھبیں جھان بلوچ چُکچینی ءِ ھلاپ ءَ پاکستان ءِ دست ءَ بدار اِیت دانکہ گیش انسانی جانانی تاوان مہ بیت-

گوادر ءِ تجربگ کار اھوالکار ءِ نیمگ ءَ نہ دیستیں مردمے ءَ جان ءِ کُشگ ءِ بیھار داتگ۔

“گوادر ءِ توار” نامی ئیں چاگردی رسانکدر ھالتاک ءِ جوڑینوک بزاں سر ءُ نامی ئیں سنگت اھوالکار جاوید ایم بی ءَ را گوستگیں شپ ءَ بے زانگیں چہ گوانکوی لمبرے ءَ گوانک ءُ ترانگ، کلوھانی وسیلہ کُشگ ءِ گُرّ ءُ نِھِر ھال سربوتگ۔

گوادر ءِ دگہ یکے اوں اھوالکار عین کادر ءَ چاگردی رسانکدر ءِ سر ءَ بیھاری کلوہ اسکرین شاٹ آئی ءِ سر ءَ دیم دیگ بوتگ ءُ نشتگ۔

آئی ءِ گْوش اِنت، جاوید ایم بی ءَ پیسر گُرّ ئِے رستگ چہ ایشی ءَ رَند فون کال ءِ وسیلہ ءَ یک ھاس ھالے ءِ شِنگ بوگ ءِ سر ءَ دلترپکہ ءِ آسر ءَ بیھار ئِے داتگ سنگین۔

گوانک جنوک ءَ تچکیں لبزاں گوں اھوالکار ءَ را گُشتگ ئِے کہ وتی کپن ءَ جاڑی کن۔

جاوید ایم بی ءِ گُرّ ءُ نِھِر چار ءُ تپاس کُتگ ءُ گْوشتگ کہ آئی ءَ چہ دراجیں مُدّتے ءَ اھوالکاری زمہ واریاں پیلو کنگ ءَ زوراور ءِ دیمپان انت، آئی ءِ گُشگ اَت کہ چُشیں کسم ءِ پاترپّاں اھوالکارانی گپ جَنَگ ءِ آجوئی ءِ سر ءَ اُرش انت ۔

اھوالکاراں، سول سوسائٹی ءُ شھری دمگی جاورانی سر ءَ وتی ترندیں پدکرد زاھر کُتگ ءُ چہ ھکومت ءَ زوت دلگوشی ءِ زورگ ءُ زمہ واریں مردمانی بگیر ءَ کارروائی ءِ لوٹ کُتگ۔

یات بہ بیت کہ بلوچستان ءَ اھوالکاراں ءُ رسانکدری ادارھاں در جانبدار اھوالکارانی سر ءَ باز رند ءَ نشانگ کُتگ اَنت، انیگ ءَ بلوچستان ءِ ھلک بارکھان ءِ سیادی داروکیں اھوالکار آصف خھان کھیتران ءَ را گُرّ ئِے داتگ آئی ءِ دکان ءَ را چہ پولوس ءِ نیمگ ءَ بند کنگ بوتگ، ءُ رند آ گار ءُ بیگواہ کنگ بوتگ۔

شہ بارکھان ءَ گار ءُ بیگواہ بوتگیں اھوالکار آصف ھان کھیتران روچ ءِ مروچی گار اِنت۔

بلوچستان ءِ زِربای ھند ءُ دمگاں ترندیں گرمی سوَب ءَ امبازاں زُرت اَنت، درباری موسمیات ءُ پی ڈی ایم اے ءَ چہ ھیٹ ویو ءِ بابت ءَ شیواری برجم داشت۔

درباری موسمیات ءِ رِد ءَ بلوچستان ءِ جتائیں ھَند ءُ دمگاں، چہ مرچیگ ءَ 18 کَرّا ءَ، روچ ءَ گرمائش کساس 6 چہ 8 ءِ ڈگری ءَ گیش بیت وھدے کہ شپ ءِ وھد ءَ ھم موسم سک گرم بوگ ءِ امکان اِنت۔

گرمی ءِ اے تپتگیں ساھت
ھُشک ءُ دنز گواتے آیگ ءِ گمان انت کہ انپراسٹرکچر ءَ را تاوان رست کُت کنت۔

چہ ھمے درگت ءَ پی ڈی ایم اے ءَ شھریاناں پنت ءُ سر ءُ سوج داتگ کہ آ در زلوری داب ءَ گرم ءَ درآیگ ءَ پَھریز بکن اِت ءُ آپ ءَ گیش ءَ چہ گیش کارمرز بکن اِت، دھکاناں سر ءُ سوج دیگ بوتگ کہ آ چہ گلّہ رون ءِ بارو ءَ سوڑگ ءِ موسمی جاور ءِ ھساب ءَ بہ بنت ءُ چہ گومی ءَ جانورانی رکینگ ءِ بند ءُ بست ھم بکن انت۔

چہ ایشاں گیش پی ڈی ایم اے ءَ دراھیں سیادی داروکیں ادارھاں شیوار بوگ ءُ پھریزی گامگیجانی منّت ھم پنت برجم دارگ ءِ سکین داتگ تاکہ انچیں گر ءُ چیلیں جاورانی، وھد ءُ پاس ءِ ھساب ءَ داشت کُت بکنیں۔

بلوچستان ریل واکدار رِد ءَ کراچی ءَ چہ شال ءَ رؤکیں بولان میل جیک آباد ریل اسٹیشن سر ءَ دارگ بیتگ-

اِھوالکار رِد ءَ سیکیورٹی کلیئرنس نہ بیگ سبب ءَ ریل دارگ بیتگ چریشی ءَ سوار سدانی مساپر مردین زالبول چُک تُرندیں گرمی ءَ چہ دلسیاھی ءِ دیمپان اَنت، مساپرانی گوشگ اِنت کہ اگاں اے وڑ سیکیورٹی تُرس ھست گڑا مارا چہ ٹکٹ زر گپتگ ءُ ریل ءَ پرچا نادینتگ-

زانگ بہ بیت گوستگیں ماہ ءَ بولان جعفر ایکسپریس بلوچ لبریشن آرمی ءِ مجید برگیڈ ءَ ھائی جیک کتگ اَت چریشی ءَ سوار سدانی پاکستانی پوجی کارندہ بندیگ کتگ اَنت-

جعفر ایکسپریس ءِ ھائی جیک بیگ وئیل ءَ پد ریل سروسز اسرمند بیتگ-

بلوچ ریپبلکن گارڈز ءِ جارکش دوستین بلوچ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں سیزدہ اپریل ءِ شپ ءِ وھد ءَ بلوچستان ءِ دمگ کچی ءِ ھند سنی ءَ چھتری ھند سر ءَ جاسوسی ءِ واستا پٹ کتگیں ٹیلی کمیونیکیشن شرکت ءِ ٹاور سر ءَ اُرش کتگ-

جارکش ءَ گْوشتگ کہ بی آر جی ءِ سرمچاراں اود ءَ ساڑی ئیں سرجمیں مشینریری مانداشتگ ءُ تباہ کتگ اَنت-

جارکش ءَ دیمتر ءَ گْوشتگ کہ بی آر جی اے اُرش زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پوج ، دُژمن ءِ کمکار ءُ پوجی شوربندیاں نشانگ کنت-

شال ءِ دمگ خلجی کالونی فقیر آباد ءَ برات ءَ تیرگواری کتگ ءُ وتی گوھار کشتگ-

پولیس ءِ رد ءَ کشگ بیتگین ءِ پجار سعدیہ ءِ نام ءَ زانگ بیتگ کہ آئی ءِ عمر 25 ءَ داں 30 سال ءِ میان ءَ انت-

وئیل ءِ ھال ءِ سر بوگ ءَ پولیس سر بیتگ ءُ چم دیستگیں مردمے یکجاہ کتگ – کوش ءِ سبب انگت زانگ نہ بیتگ، پولیس ءِ گوشگ انت جتا جتائیں پھناتاں پٹ ءُ پول بوگ ءَ انت-

گوستگیں شپ ءَ ھاران ءِ دمگ مسکان کلات ءَ مزنیں کساسے ءَ سلاہ بندیں مردماں گشت کتگ ءُ سر خاران لیویز پولیس اسٹیشن ءِ سر ءَ اُرش کتگ ءُ دستیگ کتگ-

اھوالانی رد ءَ سلاہ بندیں مردماں گوں 15 ءَ گیش کلاشنکوف ءُ دگہ جنگی سامان چہ پولیس اسٹیشن ءَ برتگ ءُ شتگ انت-

انگت ءَ واکداراں اے وئیل ءِ سرکاری دراں پدر نہ کتگ بلے دمگی اھوالانی رد ءَ اے وئیل گوستگیں شپ ءِ یک بج ءَ بوتگ۔ اے وھد ءَ سلاہ بندیں مردماں نہ ایوک ءَ تھانہ ءِ سر ءَ قبضہ کتگ بلکیں دمگ ءَ گشت ھم کتگ۔

لیویز ءِ رد ءَ مزنیں کساسے ءَ سلاہ بندیں مردماں تھانہ ءَ ھستیں کارندہ جتگ ءُ سلاہ ءُ دگہ المی ئیں سامان زرتگ ءُ ھمے وھد ءَ دمگ ءَ گشت ھم کتگ۔

اے وئیل ءَ چہ پیسر اے ماہ ءَ خاران بازار ءِ ہندو میتگ ءَ سلاہ بندیں مردماں چپ پولیس ءِ کارمنداں سرکاری سلاہ ھم چست کتگ ات انت۔

یات دارگ بہ بیت گوستگیں روچاں سرجمیں بلوچستان ءَ بازیں وئیل دیم ءَ اتکگ کہ ایشی ءِ تہ ءَ پولیس ءُ لیویز فورس ءِ کارندھانی دست ءَ چہ سلاھانی پچ گرگ ءِ رواج گیش بوتگ انت-