کتاب : سپر روان کنت
چمشانک: ھانُل بلوچ
دی بلوچستان پوسٹ
من ھردیں کہ کتابے دست ءَ کن آں گُڑا ھمے اُمیت ءَ داراں کہ اے کتاب الم من ءَ چیزے ناں چیزے دنت ءُ وتی سان ءَ منی تہ ءَ پشت گیج اِیت۔ ابدُاللہ شوھاز ءِ اے کتاب( سپر روان کنت) یک سپر نامھے۔چوناھی ءَ سپر نامہ ءِ وانگ ءِ وھد ءَ ھمے سما کن آں کہ من الم اے سپر ءِ تہ ءَ شوکیں ندارگ، کوھن ءُ کدیمیں جاگہ، نوکیں مردم گوں نوکیں پکر ءُ لیکھاں ءُ آیانی چاگردی زندمان ءُ نندگ ءُ پاد آیگ، ھمے وڑ ءَ ابداللہ شوھاز ءِ سپر نامہ ءَ ھم من ءَ انچو دلگوش کُت۔
ابداللہ شوھاز یک شوکیں نبشتہ کارے۔ شوھاز ءِ مستریں بود اِیش اِنت کہ آ کدی ھم وتی وانوک ءَ تکانسر ءُ ایوک نہ کنت۔ وتی لبز ءُ گالانی تہ ءَ انچیں ھیال درانگاز کنت کہ مردم دلگوش بہ بیت۔ اے کتاب ءِ وانگ ءَ گوں من ءَ انچو سما بوت کہ مئے زندمان سک باز پد منتگ اِنت ءُ ما زیردستی ءِ آس ءَ سُچگ ءَ ایں۔
اے کتاب ءِ بندات چہ ھوشاپ ءِ کالج ءِ 12 کلاس ءِ نودربرانی چہ سرکار ءِ نیمگ ءَ سیل سواد ءِ سرجمیں استان ءَ روگ ءِ موہ رس اِیت۔ گُڑا شھدربرجاہ (کالج) ءِ گوں چار اُستاد ءَ لھتیں نودربر در کپ اَنت پہ وتی سپر ءَ چہ ھوشاب تُربت ءَ کاینت۔
19 مارچ ءِ بیگاہ ءِ وھدے کالج ءِ پرنسپل واجہ رشید اتکگ ءُ آیاں سر ءُ سوج اِش دنت ءُ گُشت ئِے کہ شُمارا ھمے بلوچی چادر بَڑ ءَ اِنت اے شُمے نّنگ اِنت ایشی ءَ سمبال بکن اِت۔ پرنسبل ءِ اے گپ ءِ مُول ءُ مُراد اِیش اَت کہ شُما بلوچ اِت بلوچ بہ بہ اِت ءُ بیا اِت گُڑا سپر بندات بوت اے چہ پُلیں تربت ءَ دیم پہ گودار ءَ در کپت اَنت ءُ سپر روان بوت شپ ءِ نیم ءَ بس ءَ اورماڑہ ءَ داشت شام اِش کُرت۔ شام ءَ پد پد ءَ در کپت اَنت دیم پہ کُنڈ ملیر ءَ۔ کُنڈ ملیر ءَ بلوچستان ءِ شوکیں ندارگاں بلوچستان ءِ زیبائیانی چادر پچ کُت زِر ءِ آزمانیں چولانی توار ءُ دلکشیں کوھاں ھرکس بہ گند اِیت آ زانت کہ ابرم ءِ زیبائی چی ءَ گُش اَنت۔
بلوچستان ھُدا ءَ چہ ابرمی زیبائی ءَ چکار کتگ۔ اے زیبائیانی چارگ ءَ دل ھجبر سیر نہ کنت۔ ھمے زیبائیانی ءُ زِر ءِ ھاتر ءَ بلوچ مدام جنگ ءَ اِنت وتی ساہ ءُ سراں ندر کنگ ءَ اِنت۔ سکندر اعظم ھما مردم بوتگ کہ آئی ءَ سرجمیں دُگینا ءِ سر ءَ ھاکمی کُرتک بلے بلوچستان ءِ سر ءَ ھاکمی کُرت نہ کتگ چے کہ اے سرزمین ءِ سر ءَ بلوچ ماتانی نوک بروتیں ءُ تاسپیں بچاں وتی سر کُربان کُرتگ اَنت وتی ھون ریتکگ اَنت پہ وتی مکھیں گُلزمین ءِ آجوئی ءِ واستا۔ گُڑا وھدے سکندر اعظم وتی لشکر ءَ گوں مُکران ءَ مان رچ اِیت اے ھما وھد بیت کہ موسم سک لِوار ءُ تبد بیت۔ وھدے سکندر ءِ لشکر مان رچ اِیت لشکر ءِ نیم پہ تُن ءُ لھتیں جنگ ءَ مر اِیت۔ اے جنگ ءِ دیم ءَ میر ھمل کلمتی اُوشت اِیت۔ ھمل وتی سر ءَ کُربان کنت بلے وتی زِر ءَ نہ دنت۔ اگاں ما بچاریں ھرچ کرن ءَ بلوچ گُلزمین ءِ سر ءَ یک ھملے درکیت ءُ وتی گلزمین ءُ راج ءِ رکینگ ءِ واستا وتی ھوناں ریچ اِیت۔ ھمل مُدام نمیران بنت یک ھملے شھید بیت بلوچستان دگہ ھمل رودین اِیت۔
ابداللہ شوھاز ءَ کُنڈ ملیر ءِ شوکیں ندارگ انچو پیش داشتگ اَنت کہ منی ھیال دور شُت۔ گُڑا کُنڈ ملیر ءَ سپر روان بوت۔ دیم ءَ اتک نانی ءِ مندر۔
اے مندر ھندوانی یک کُوھن ءُ کدیمیں مندر ے۔ ھمُک سال ھندو کاینت اد ءَ زیارت کن اَنت۔ پاکستان ءِ وڑیں استانے کہ ھمُک سال بازیں مردم مزھب ءِ نام ءِ سر ءَ جنگ ءُ کُشگ بنت آیانی ابادت جاہ پروشگ بنت۔ بلے اینچو سال ءَ پد ھم بلوچستان ءَ نانی مندر گوں ازت ءُ شرپ ءَ ھست اِنت ءُ یک ھندوے ءَ ھم اِد ءَ کس تاوان نہ داتگ۔اے بلوچ ءِ روایت ءُ دومی نیکراھانی ازت ءُ شرپ ءَ درانگاز کنت۔
سپر روان اِنت۔۔۔سُھب کہ بیت اے نودربر کراچی ءَ سر بنت۔ کراچی ءَ لیاری ءَ کاینت۔ انچو کہ کازی ساھب گُش اِیت لیاری گٹر من ءَ چو ساہ ءِ پیم ءَ دوست بنت۔ لیاری ءِ مُردم وار ءُ بزگ اَنت۔ ابداللہ شوھاز ءَ لیاری ءِ مردمانی بزگی، پدمنتگی ھم وتی سپر نامہ ءِ تہ ءَ درشان کتگ۔
راست اِنت کہ زیردستیں راج دنیا ءِ ھرچ کُنڈ ءَ بہ بیت آ پدمنتگی ءُ بزگی ءِ آماچ بیت بلے وتی بلوچیت ءَ ھجبر پراموش نہ کنت۔ لیاری ءِ بلوچ ھم وتی بلوچیت ءَ زندگ اَنت۔
کراچی ءَ نودربر دیم پہ پنچاب ءَ در کپ اَنت۔ نوں سپر ریل ءِ سر ءَ بندات بیت۔ ریل ءِ سر ءَ سپر روان یک ھوشاپ ءِ وڑیں پدمنتگ ءُ کسانیں میتگے ءَ چہ در اتکگیں نودربر اے سپر ءِ ندارگاں گوں دلگوش اَنت انت۔ نوکیں جاگہ ءُ گوں شھرانی گندگ ءَ ھبکہ اِت انت۔
وھدے آ لاھور سر بوت اَنت گُڑا اود ءَ بلوچ نودربر ایشانی دیم ءَ وش اتکی ءَ اتک انت ءُ ایشاں وتی ھاسٹل ءَ بُرت اَنت۔ شپ ءَ نودربراں نشت ءُ دیوان کُت ھند ءُ دمگی اھوال کُت۔ سپر ءِ ژند ءُ پندی ءَ سُھب ءَ یک نودربرے بیمار بوت بزان لاھور ءِ آپ ءَ نہ ساچ اِت۔ چے کہ مارا گوں لاھور ءَ ھچ سیادی نیست۔ پد ءَ آ دگہ نودربر ڈن ءَ پہ سیل ءُ گردگ ءَ رونت۔ پد ءَ یونیورسٹی کتاب جاہ ءِ نیمگ درکپ اَنت۔
اے نودربر کہ اِد ءَ اے لاھور ءِ نودربر ءُ مردماں گند اَنت گُڑا انچو سما کن اَنت کہ اے پنجابی چہ مارا وش نہ اَنت ءُ مارا پہ زھر زھر چار اَنت۔ سُبارگ ءِ وھد ءَ نودربراں برگر زُرت ءُ یک پارکے ءَ نشت ءُ وارت اَنت اِش۔ گوں ایشاں ھمل نامیں نودربرے برے زمباد ءِ کسھاں کنت کہ ایران ءِ باڈر ءَ شتگ برے وتی وانگ ءِ۔ ھمے وھد ءَ لھتیں پنجابی پارک ءَ اے نودربرانی کرا نندوک بنت آ ایشاں گوں ھیرانگی ءَ چار اَنت کہ اے چونیں مردم اَنت ءُ چون برگر ورگ ءَ اَنت۔ بزاں آ بلوچ ءَ پہ وش نیتکی چار اَنت۔
ابداللہ شوھاز ءِ اے سپر نامہ ءِ تہ ءَ مارا اے گپ شری ءَ گندگ ءَ کیت کہ زیردست ءَ ارزشت زورگِر ءِ کِر ءَ چے پد ءَ دومی گپ اے ھم مارا شری ءَ سرپدی رس اِیت کہ تھنا زورگِریں لشکر بلوچ راج ءِ سر ءَ ھسد ءُ کینگ نہ دار اِیت بلکیں سرجمیں زورگِریں استان ءِ مھلوک بلوچ ءَ انسانی جند سرپد نہ بیت۔ آ بلوچ ءَ بس جنگلی ءُ ناسرپد مان کار اَنت۔
ھمے پارک ءَ چے پاد آیگ ءَ پد وھدے نودربر یک ٹیکسی یےِ گِر اَنت دیم پہ ھاسٹل ءِ روگ ءَ گُڑا ھمے ٹیکسی والا ھم بلوچ نودربراں مان نیار اِیت وھدے نودربر بلوچی سوتے پِر کن اَنت گُڑا ٹیکسی والا آ سوت ءَ بند کنت۔ پد ءَ نودربر کمو جزباتی بنت ءُ گوں ٹیکسی والا ءَ دپ ماں دپ بنت جاک کن اَنت۔منی دل ءَ ابداللہ شوھاز ءِ اے سپر نامگ سرجم ءَ زورگِر ءُ زیردست ءِ نپسیات ءِ سر ءَ اِنت۔
ھمے وڑ ءَ سپر روان کنت وھدے اے نودربر پشاور ءَ رو اَنت گُڑا اود ءَ آ کمو مردم دوستی ءُ مھمانداری گند اَنت بزاں پٹانانی ملک ءَ کمو باز بلوچ دوستی پہ وت ءَ گند اَنت بزاں آ چیز کہ ایشاں پنجاب ءِ توک ءَ نہ دیست پٹانانی تہ ءَ گند اَنت۔ پٹان ایشاں گوں باز مھروان بنت تر ءُ گرد کن انت سوت چالو کن اَنت ناچ کن اَنت۔پشتونستان ءَ ایشاں یک جیڑھے اے بیت کہ اود ءَ باز پشتون اردو گپ نہ زان اَنت بزان پشتون گیشتر پشتو گپ کن اَنت۔
ابداللہ شوھاز ءِ اے سپر نامگ ءِ وانگ ءَ پد ما چیزے مار ایں کہ مئے بلوچ نودربر انوں ھستیں وھد ءَ کہ پنجاب ءَ وانگ ءَ اَنت آ چنچو جنجالانی دیمپان بنت۔ وانگجاہ ءَ بہ گِر دانکہ بازار ءَ تر گرد ءَ آ یکشلہ پادتراپ ءُ ھراسمنٹ ءِ آماچ بنت۔انچو اے سپر آسری ءَ سر بیت وھدے نودربر واتر بوگ ءَ بنت گُڑا شال ءَ کاینت۔ وھدے شال ءَ یونیورسٹی ءَ رونت گُڑا یونیورسٹی ءِ سیکورٹی گارڈ ھمے نودربراں کہ بلوچی چادر گون بیت ایشاں گُش اِیت کہ بلوچ چادر ءَ اِد ءَ بڑ ءَ مکن اِت۔
اے نودربر ھبکہ بنت کہ مئے جند ءِ سرزمین ءِ سر ءَ مئے بلوچی چادر ءِ بڑ ءَ کنگ ءَ مارا مکن کنگ بوگ ءَ اِنت۔ وھدے پنجاب ءُ پشتونستان ءَ اے جیڑہ دیم ءَ نہ یتک۔ بزاں بلوچ ڈیھ ءِ سر ءَ زورگِر بلوچ دودمان ءُ بلوچیت ءَ چہ تُرس آماچ اِنت ءُ آ بلوچ ءِ دوداں گار کنگ لوٹ اِیت۔
ابداللہ شوھاز ءِ اے سپر نامہ ءِ تہ ءَ من ءَ بلوچ ءِ گُلامی ءِ مارشت ءَ مان پتات۔ باید اِنت بلوچ نودربر چشیں کتاباں الم بُوان اَنت۔دانکہ وتی جند ءِ بستار ءُ زورگِر ءِ نپسیات ءَ پوہ بہ بنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
